வளர்ப்பு நாய்களைச் சுற்றி உருவாகி வரும் வணிக வாய்ப்புகள் வியப்பு அளிப்பவை ஆக உள்ளன. வகைவகையான நாய்க்குட்டிகளை இனப்பெருக்கம் செய்து விற்பனை செய்யும் தொழிலில் பலர் ஈடுபட்டு இருக்கிறார்கள். இத்தகைய நாய்க்குட்டிகளை நல்ல விலைக்கு இவர்களால் விற்பனை செய்ய முடிகிறது. இதற்குக் காரணம் பெரும்பாலும் நாய் வளர்ப்பு, வருமானம் அதிகமாக உள்ளவர்களின் விருப்பத் தேர்வாக இருப்பதுதான்.

நாய்கள், தங்களை வளர்க்கும் மனிதர்களிடம் காட்டும் உறவு, அவர்கள் சொல்வதை புரிந்து கொண்டு செயலாற்றுவது, அவர்களுடன் விளையாடு வது போன்றவை வளர்ப்பவர்களுக்கு மிகவும் மகிழ்ச்சி அளிப்பவையாக இருக்கின்றன. மேலும் வீட்டில் தனியாக இருக்கும் குடும்ப உறுப்பினர்களுக்கு பொழுது போக்குக்கான விலங்காகவும் இருக்கிறது. வளர்ப்பு நாய்களை பராமரிப்பதை அவர்கள் விரும்பிச் செய்கிறார்கள்.

வீட்டில் போதுமான இடவசதி இருப்பவர்களே செல்ல விலங்குகளை வளர்க்க முடிகிறது. நாய்களை பராமரிப்பவர்கள், இவற்றுக்கு செலவு செய்யவும் தயங்குவது இல்லை. விலை உயர்ந்த கழுத்துப்பட்டை, சங்கிலிகள், நாய்களுக்கு எனவே தயாரிக்கப்பட்டு வரும் பிஸ்கட் போன்ற உணவுப் பொருட்கள், அவை கடித்து விளையாட உதவும் ரப்பர் எலும்புகள் என்று எண்ணற்ற பொருட்கள் சந்தைப் படுத்தப் படுகின்றன. இவற்றுக்கு எனவே தனி மருத்துவமனைகளும் பெரிய நகரங்களில் செயல்பட்டு வருகின்றன.

வளர்ப்பு விலங்குகளைச் சுற்றி உள்ள வணிக வாய்ப்புகளைப் புரிந்து கொண்ட சிலர், இத்துறையில் இறங்கி செயல்பட்டு வருகின்றனர். ‘பெட்டெக்ஸ் இந்தியா’ என்ற பெயரில் ஐதராபாத்தில் நடைபெறும் வளர்ப்பு விலங்குகள் தொடர்பான பொருட்காட்சிக்கு ஆயிரக் கணக்கான மக்கள் வருகிறார்கள். வளர்ப்பு விலங்குகளுக்கான பொருட்கள் சந்தை ஆண்டுதோறும் பத்து விழுக்காடு அளவுக்கு வளர்ந்து வருவதாக கணித்து உள்ளார்கள். எனவே இத்துறையில் உள்ள வணிக வாய்ப்புகள் குறித்து தொழில் முனைவோர் சிந்தித்துப் பார்க்கலாம்.

Also read: கால்நடைகள், கோழி வளர்ப்பு: சில பொதுவான செய்திகள்

ஹெட்ஸ் அப் ஃபார் டெயில்ஸ் என்ற பெயரில் நாடு முழுவதும் நாய் பராமரிப்புக்கு தேவையான பொருட்களை விற்பனை செய்யும் இருபத்தெட்டு மையங்களை நடத்தி வரும் ராஷி சனோன் நவ்ரங் என்ற பெண், தன்னுடைய முயற்சி எப்படி தொடங்கியது என்பதைக் கூறும்போது,

”நான் பிறந்து என் கண்களைத் திறக்கும்போதே என் வீட்டில், செல்ல நாய்க்குட்டிகளும் இருந்தன. எங்கள் வீட்டில் அப்போது இருந்தே செல்லமாக நாய்களை வளர்த்து வந்தோம். எனக்கு திருமணம் ஆனபிறகு, நான் லாபரேடர் இன நாய் ஒன்றை சாரா என்ற பெயரில் பராமரித்து வந்தேன். சாராவுக்குத் தேவையான தரமான கழுத்துப் பட்டி போன்றவற்றை வாங்க அலைந்து திரிந்தேன். எங்கும் கிடைக்கவில்லை. இதனால் நானே அவற்றை வடிவமைத்து தயாரித்துப் பயன்படுத்தினேன்.

இதைப் பார்த்த நாய்களைப் பராமரிக்கும் எங்கள் உறவினர்களும், நண்பர்களும், தங்கள் நாய்களுக்கும் இவற்றைப் போன்ற தரமான பொருட்கள் வேண்டும் என்று கேட்கத் தொடங்கினார்கள். இதைத் தொடர்ந்து எனக்குள் இதையே ஒரு தொழிலாக செய்யலாம் என்ற எண்ணம் உதித்தது. ஹெட் அப் ஃபார் டெயில்ஸ் பிறந்தது. முதலில் டெல்லியில் உள்ள செலக்ட் சிட்டிவாக் மாலில் ஒரு சின்ன கடையாகத்தான் தொடங்கினேன். இப்போது சென்னை, பெங்களூரு, மும்பை, புனே, ஐதராபாத் என்று இருபத்தெட்டு இடங்களில் எங்கள் விற்பனையகங்கள் செயல்பட்டு வருகின்றன.” என்கிறார்.

அரியானா, குர்கானில் டாக்கி டப்பாஸ் என்ற பெயரில் வளர்ப்பு விலங்குகளுக்கான உணவுகளைத் தயாரித்து விற்பனை செய்து வருகிறார், ராஷி குச்ரூ என்ற பெண். இவர் தன் நாய்க்கு கடைகளில் விற்கப்படும் பேக்கிங் உணவுகளை வாங்கிக் கொடுத்த போது, அவை அவரது நாய்க்கு ஒத்துக் கொள்ளவில்லை. எனவே, தானே அதற்குக் தேவையான உணவை வீட்டிலேயே சமைத்துக் கொடுத்தார்.இதனால் நாயின் உடல்நலம் கூடியதோடு, பளபளப்பும் அதிகரித்தது.

இதைப் பார்த்த பக்கத்து வீட்டுக்காரர்களும், தங்கள் நாய்களுக்கும் உணவு தயாரித்துத் தர முடியுமா என கேட்கவே, டாக்கி டப்பாஸ் என்ற பெயரில் நாய்களுக்கான சமைத்த உணைவை தயாரித்து வழங்கும் நிறுவனத்தைத் தொடங்கி விட்டார். முதலில் ஆர்டர் கொடுப்பவர் களின் வீடுகளுக்கே கொண்டு சென்று சமைத்த உணவை டெலிவரி செய்தார். ஆனால் காலப்போக்கில் இந்த முறையில் உள்ள குறைபாடுகளை அறிந்தார். இதுபற்றி அவர் கூறும்போது,

”சமைத்து உடனுக்குடன் கொடுக்கும் முறையில், சில் நேரங்களில் உணவு பழையதாகி விடுகிறது. இன்னும் நீண்ட தொலைவில் உள்ள வீடுகளாக இருந்தால் உணவு கெட்டும் விடுகிறது. எனவே உடனுக்குடன் வாங்கி அப்போதே நாய்களுக்கு உண்ணக் கொடுக்கும் முறை சரியாக வரவில்லை. எனவே உணவைச் சமைத்து வேக்குவம் முறையில் பேக்கிங் செய்து கொடுத்து அனுப்பத் தொடங்கினேன்.

பொதுவாக நாய்களுக்கு இனிப்புச் சுவையுள்ள பிஸ்கட்களை கொடுக் கிறார்கள். இவை நாய்களின் உடல் நலத்துக்கு உகந்தவை அல்ல. நாங்கள் நாய்களின் உடல்நலனுக்கு ஏற்ற வகையில் சிக்கன் ஜெர்க்கி, மீன் ஜெர்க்கி ஆகிய புரோட்டீன் மிகுந்த உணவுகளை வீட்டிலேயே சமைத்துக் கொடுத்து அனுப்புகிறோம்.

எங்கள் நிறுவனத்துக்கு நாங்கள் பெயர் வைக்கும்போது, பெயரே நாங்கள் செய்யும் தொழிலைக் குறிப்பிடும்படி இருக்க வேண்டும் என்று கருதினோம். டப்பா வாலாக்கள் என்றால் உணவுகளை டெலிவரி செய்பவர்கள் என்று அனைவருக்கும் தெரியும். எனவே டாக்கி டப்பாஸ் என்றால் அனைவருக்கும் நாய்களுக்கான உணவுகளை டெலிவரி செய்பவர்கள் என்று உடனே புரிந்து கொள்வார்கள் என்று கருதினோம். அதனாலேயே இந்த பெயரை தேர்வு செய்தோம். பெயரைக் கேட்ட உடனேயே நாங்கள் கருதியபடி எல்லோரும் புரிந்து கொள்கிறார்கள்.

நாய்களுக்கு ஏற்ற உணவுகளை சமைத்து வேக்குவம் பேக்கிங் செய்து அனுப்பும் பிரிவுகளை இன்னும் சில இடங்களுக்கும் விரிவு படுத்த எண்ணி இருக்கிறோம். இப்போது டெல்லியிலும், மும்பையிலும் செயல்பட்டு வருகின்றன.” என்றார்.

பொதுவாக நாய்களுக்கு இறைச்சி, மீன் உணவுகள்தான் பிடிக்கும் என்றாலும், வீட்டில் அசைவம் உண்ணாதவர்களுக்கு, நாய்களுக்கு அசைவம் சமைத்துப் போடுவதில் சிக்கல் இருக்கிறது. இந்த சிக்கலுக்கு தீர்வாக புபேந்திரா கானல் என்பவர், நாய்களுக்கான சைவ உணவுகளைத் தயாரிக்கும் ஐடியாவை செயல்படுத்தி வெற்றி பெற்று இருக்கிறார்

இது பற்றி இவர் கூறும்போது,

”எனக்கு உணவு சார்ந்த தொழிலில்தான் ஈடுபட வேண்டும் என்ற ஆவல் அதிகம். நேபாள மக்களின் உணவு வகைகளைத் தயாரித்து இந்தியாவில் விற்பது தொடர்பான பயிற்சிக்கு இமாலயா சென்றேன். ஆனால் அங்கே நாய்களுக்கு கடினமாக்கப்பட்ட சீஸ் கொடுக்கப் படுவதைப் பார்த்தேன். நாய்கள் அவற்றை ஆர்வத்துடன் மென்று கொண்டு இருப்பதையும் பார்த்தேன். அதன் பிறகு என்னுடைய சிந்தனை மாறியது. நாம் ஏன் நாய்களுக்கான இந்த சைவ உணவை மற்ற இடங்களுக்கு அறிமுகப்படுத்தக் கூடாது என்று நினைது என்னுடைய முடிவை மாற்றினேன்.

நாய்களுக்கான உணவுச் சந்தை பெரியது. நான் இந்த புதுமையான மெல்லும் சீசை அறிமுகப்படுத்தும் போது இது ஒரு புதுமையான, நாய்கள் விரும்பி மெல்லும் உணவாக விளங்கியது. அதுவரை இப்படி ஒரு சைவ உணவு இந்தியாவில் அறிமுகப்படுத்தப்படவில்லை. சைவ வீட்டுக்காரர்கள் இதை தங்கள் நாய்களுக்கு வாங்கிக் கொடுத்தார்கள். என் டாக்சீ சீவ் சந்தை விரிவடைந்தது.

இந்த உணவுப் பொருள் நாய்களின் உடல் நலனுக்கு உகந்தது. குறிப்பாக அவற்றின் பற்களுக்கு நல்லது. இதை மெல்லும்போது நாய்களின் பற்கள் தூய்மை ஆவதோடு, அவற்றுக்கு தேவையான புரதமும் கிடைத்து விடுகிறது. தற்போது இந்த மெல்லும் சீஸ் அமெரிக்கா, ஸ்பெயின், கனடா ஆகிய நாடுகளுக்கும் ஏற்றுமதி ஆகிறது.

இதைத் தொடர்ந்து தற்போது உலர் பழங்கள், காய்கறிகளைப் பயன்படுத்தி நாய்களுக்கான உணவுகளைத் தயாரித்து சந்தைப் படுத்தி வருகிறேன்.” என்று கூறும் புபேந்திரா தயாரிக்கும் அனைத்து உணவுகளும் சைவம் சார்ந்தவை.

குணால் கன்னா என்பவர், விவால்டிஸ் என்ற பெயரில் நாய்களுக்கான மருந்தகங்களை நடத்தி வருகிறார். ”இதற்காக நாங்கள் சொந்தமாக ஆய்வுக் கூடம் வைத்து இருக்கிறோம். இங்கே நாய் களுக்கு ஊட்டம் அளிக்கும் உணவுகள் மற்றும் அவற்றுக்கு ஏற்படும் நோய் களுக்கான மருந்துகள் தொடர்பான ஆய்வுகள் நடைபெறுகின்றன. இந்த ஆய்வுகளின் அடிப்படையில் உணவுகளும், மருந்துகளும் தயாரிக்கப்பட்டு விற்பனைக்கு அனுப்பப்படுகின்றன.

Also read: ஆடு வளர்ப்பு சில அடிப்படைச் செய்திகள்!

நாய்களுக்கான நோய்களைக் கண்டுபிடித்து சிகிச்சை அளிக்கும் இத்தகைய பன்னிரெண்டு ஆய்வுக் கூடங்களை அமைத்து உள்ளோம். நாய் களையும் டயபெட்டிஸ், ஆர்த்ரைட்டிஸ், கேன்சர் போன்ற நோய்கள் தாக்குகின்றன. இந்தியாவில் நாய்களுக்கு ஏற்படும் கேன்சருக்கான மருந்தை நாங்கள்தான் எங்கள் ஆய்வுக் கூடத்தில் கண்டு பிடித்து அறிமுகம் செய்தோம். வளர்ப்பு விலங்குகள் தொடர்பான பயிற்சிகளையும் தொடர்ந்து நடத்தி வருகிறோம்.

ருக்மணி வைஷ் என்ற பெண், இன்னொரு கோணத்தில் நாய்கள் தொடர்பான ஒரு தொழிலைத் தொடங்கி நடத்தி வருகிறார். பெரும்பாலும் சுற்றுலா செல்வோருடன் அவர்களின் வளர்ப்பு நாய்களை அழைத்துச் செல்ல முடியாது. தங்கும் விடுதிகளில் இதற்கான அனுமதி கிடையாது. ருக்மணி, காலர் ஃபோல்க் என்ற தன் நிறுவனம் மூலம் எந்த விடுதிகளில் வளர்ப்பு நாய்களுடன் தங்குவதற்கு அனுமதிக்கிறார்களோ, அந்த விடுதிகளை சுற்றுலா செல்வோருக்கு பதிவு செய்து கொடுக்கிறார். விடுதிகளின் நிர்வாகிகளுடன் பேச்சு வார்த்தை நடத்தி வளர்ப்பு நாய்களுடன் தங்குவதற்கான அனுமதிகளை வழங்கச் செய்கிறார். இது பற்றி அவர் கூறும்போது,

”வீட்டில் நாய் வளர்ப்பவர்கள், சுற்றுலா செல்வதை தள்ளிப்போடுவதற்கான முதன்மையான காரணங்களில், தங்களுடன் இவற்றையும் அழைத்துச் செல்ல முடியாது; இவற்றை விட்டுச் செல்ல சரியான இடமும் கிடையாது என்பவை ஆகும். ஒரு விடுமுறை சுற்றுலாவின்போது கோல்டன் ரிட்ரீவர் வகை கிக்கி செல்ல நாயை எங்களுடன் அழைத்துச் சென்றோம். விடுதிகளிலும், ரிசார்ட்டுகளிலும் அனுமதிக்க மறுத்து விட்டார்கள். பெட் ஃப்ரண்ட்லி ரிசார்ட்டுகளையே பார்க்க முடியவில்லை. இந்த தேவையை நான் தொழில் நோக்கில் சிந்தித்ததால் காலர் ஃபோல்க் நிறுவனம் பிறந்தது. காலர் ஃபோல்க் ஒரு ஆன்லைன் சேவை நிறுவனம். செல்ல விலங்குகளுடன் தங்க அனுமதிக்கும் ஓட்டல்களையும், ரிசார்ட்களையும் இதில் பதிவு செய்து கொள்ளலாம். மாதத்துக்கு சுமார் ஐம்பது பதிவுகள் மேற்கொள்ளப்படுகின்றன.” என்கிறார்.

இத்தகைய சிக்கல்களுக்கு இன்னும் சிலர் வேறு வகையான தீர்வுகளைத் தருகிறார்கள். அவர்கள் வளர்ப்பு நாய்களுக்கான விடுதிகளை நடத்துகிறார்கள். குடும்பத்தோடு வெளியூர் செல்பவர்கள், இங்கே தங்கள் நாய்களை விட்டுச் செல்லலாம். அவர்கள் அவற்றுக்குத் தேவையான உணவுகளைக் கொடுத்து பராமரித்து, குடும்பத்தினர் வெளியூரில் இருந்து வந்தவுடன் அவர்களிடம் ஒப்படைக்கின்றனர். இதற்கான கணிசமான கட்டணங்களைப் பெற்றுக் கொள்கின்றனர். சென்னையில் உள்ள ஒரு வளர்ப்பு நாய்கள் பராமரிப்பு விடுதியில் ஒரு நாளைக்கு அறுநூறு ரூபாய் கட்டணம் வாங்குகின்றனர்.

தமிழ் நாட்டைப் பொறுத்த வரை சென்னை, கோவை போன்ற பெரிய நகரங்களில் இத்தகைய வளர்ப்பு நாய்களுக்கான பராமரிப்பு சார்ந்த தொழில்களுக்கான வாய்ப்புகள் இருக்கின்றன. செல்ல விலங்குகள் வளர்ப்பது என்பது சற்று செலவு பிடிக்கும் விருப்ப வேலை என்பதால் பெரும்பாலும் வருமானம் அதிகம் உள்ளவர்களே செல்ல விலங்குகளை வளர்க்கிறார்கள். இவர்கள் தங்கள் செல்ல விலங்குகளுக்கான பொருட்களுக்கு செலவு செய்யத் தயங்குவது இல்லை. இந்த மனப்பான்மைதான் இந்த தொழிலுக்கான அடிப்படை. எனவே வருமானம் அதிகம் உள்ளவர்கள் வாழும் பகுதிகளில் மட்டுமே வளர்ப்பு நாய்கள் பராமரிப்பு தொடர்பான தொழில்களுக்கு வாய்ப்பு கூடுதலாக இருக்கும். நடுத்தர மக்கள் அதிகம் வாழும் பகுதிகளில் இத்தகைய தொழிலுக்கு வரவேற்பு குறைவாகவே இருக்கும் என்பதை தொழில் முனைவோர் மனதில் கொள்ளலாம்.

– எவ்வி

உலகில் முகநூல் பயன்படுத்தும் நாடுகளில் இந்தியா தான் முதல் இடத்தில் உள்ளது. ஏறக்குறைய 30 கோடி மக்கள் இந்தியாவில் முகநூல் பயன்படுத்தி வருகிறார்கள். அதனால், நம் தொழிலை முகநூல் பயன்படுத்தி சந்தைப்படுத்தினால் விரைவாக வாடிக்கையாளரை நோக்கி செல்லமுடியும்.

கடந்த இதழில் முகநூலில் தொழில்பக்கம் (business page) உருவாகும் முறைகளில் சில வழிமுறைகளை பார்த்தோம். இதில் அவற்றை எப்படி சிறப்பாக மாற்றுவது என்பதை பற்றி பார்ப்போம். தொழில் பக்கத்தில் புரோஃபைல் படத்தின் கீழ் ADD page button என்பதை தேர்வு செய்தால் அங்கு make a booking with you, contact you, learn more about your business, shop with you என்று நான்கு தேர்வுகள் இருக்கும்.

உங்களுடையது டிக்கெட் விற்பனை தொழில் என்றால் முதல் பட்டனை தேர்வு செய்து கொள்ளுங்கள். இரண்டாவதில் உங்கள் மொபைல் எண் கொடுத்தால் வாடிக்கையாளர்கள் உங்களை தொடர்பு கொள்ள பயன்படும். நீங்கள் யூடியூப் -ல் சேனல் உருவாக்கி அதில் வீடியோ வழியாக தொழில் செய்பவர் என்றால் (சான்று-வகுப்பு எடுப்பது, சமையல் செய்து காட்டுவது) மூன்றாவது பட்டனை தேர்வு செய்யலாம். ஆன்லைன் வழியாக பொருட்கள் விற்பனை செய்பவராக இருந்தால் நான்காவது பட்டனை தேர்வு செய்து கொள்ளுங்கள். ஒரு பட்டன் மட்டுமே தேர்வு செய்யமுடியும். ஆனால், எப்போது வேண்டும் என்றாலும் edit option மூலம் மாற்றிக்கொள்ளலாம்.

Also read: முகநூலில் தொழில் பக்கம் | டிஜிட்டல் மார்க்கெட்டிங் 8

முகநூல் தொழில் பக்கத்தில் செட்டிங்ஸ் என்பதை பார்ப்போம். பக்கத்தின் மேல்புறம் வலது பக்கம் செட்டிங்ஸ் இருக்கும். அவற்றை தேர்வு செய்துகொள்ளுங்கள். அங்கு general, Page info, Messaging என்று இடதுபுறம் நிறைய டேப் -கள் இருக்கும். ஒவ்வொன்றும் முக்கியமானதாகும். செட்டிங்ஸ் சென்றால் அங்கு general என்பது தேர்வு ஆகி இருக்கும். மேலும் வலதுபுறம் நிறைய இருப்பதை பட்டன்கள் இருப்பதை பார்க்கலாம். அதில் முதலாவதாக பேஜ் விசிபிலிட்டி என்று இருக்கும். அதில் Page Published என்று இருக்கிறதா பாருங்கள். அதில் Unpublished என்று இருந்தால் அவற்றை மாற்ற வேண்டும். இல்லையென்றால் தொழில் பக்கம் மக்களுக்கு தெரியாமல் போகும். எப்போது வேண்டுமானாலும் உங்கள் தொழில் பக்கத்தை மறைத்துக்கொள்ள முடியும். தேவைப்படும்போது pubilsh செய்துக் கொள்ள முடியும்.

இதே போல், எந்த வயதுக்காரர்கள் உங்கள் பாகத்தை பார்க்கலாம், எந்த நாட்டில் இருப்பவர்கள் பார்க்க கூடாது, யாரெல்லாம் உங்கள் பக்கத்தில் பதிவு எழுதலாம், உங்கள் பதிவு வேறு மொழியில் மொழியாக்கம் செய்யும் முறை இதே போல் நிறைய ஆப்ஷன்கள் அங்கு இருக்கும். அதில், உங்களுக்கு விருப்பமானதை தேர்வு செய்துக் கொள்ளுங்கள். இவை தொழில் பக்கம் என்பதால் முடிந்த அளவு தொழில் தொடர்பாக இருக்கும். அனைத்தையும் தேர்வு செய்தால் மக்கள் நம் பக்கத்தின் மீது நம்பிக்கை வைப்பார்கள்.

உருவாக்கிய தொழில் பக்கத்தை வேண்டாம் என்று தீர்மானித்தால் அவற்றை நீக்க இதே general-லின் கீழே ரிமூவ் பேஜ் என்ற ஆப்ஷன் இருக்கும். அதில் பேஜ் டெலிட் என்பதைக் கிளிக் செய்தால் நீக்கிவிடலாம். இரண்டும் மேற்பட்ட பக்கங்களை உருவாக்கி கொள்ளலாம். ஆனால், தினமும் இவற்றில் பதிவு எழுத வேண்டும். அப்போது தான் நம் பொருள், வாடிக்கையாளர்களை நோக்கி சென்று கொண்டே இருக்கும்.

உங்கள் தொழிலுக்கென்று ஒரு யூடியூப் -ல் சேனல் உருவாக்கி, அதில் தொழில் தொடர்பான வீடியோக்களைப் பதிவு ஏற்ற வேண்டும். அப்படி பதிவு ஏற்றப்படும் வீடியோக்களை உங்கள் முகநூல் பக்கத்தில் வர வைக்கலாம். இதன் மூலம், உங்கள் வீடியோக்கள் பெரும்பாலான மக்களை சென்று சேரும் அதன் வழியாக உங்கள் பொருட்களும் விற்பனையாகும்.

Also read: சோஷியல் மீடியா | டிஜிட்டல் மார்க்கெட்டிங் – 7

முகநூல் search -ல் யூடியூப் tab என்றுத் தேடுங்கள். பின், அதில் வரும் யூடியூப் tab ஐ தேர்வு செய்தால் உங்கள் தொழில் பக்கத்தில் அது டவுன்லோட் ஆகும். பிறகு, உங்களுக்கு இரண்டுக்கு மேற்பட்ட பக்கங்கள் இருந்தால் எந்த பக்கத்தில் யூடியூப் இணைக்க வேண்டும் என்று கேட்கும். அதில், விருப்பமான பக்கத்தை தேர்வு செய்து யூடியூபை சேர்த்துவிட்ட பிறகு, சேனல் id கேட்கும். கொடுக்க வேண்டும். பின், சேனல் சென்று, கீழ் இருக்கும் யூடியூப் முகவரியை (UCL என்பதில் தொடங்கி ig என்று முடியும் வரை, அதாவது youtube.com/channel/ UCLFFatWFdqd2r4erS8DRKig) காபி செய்து அங்கு பேஸ்ட் செய்யவும். இப்போது உங்களை முகநூல் பக்கத்தில் யூடியூப் -ல் இருக்கும் அனைத்து வீடியோக்களும் பார்க்கலாம்.

முகநூலில் தொழில் பக்கத்தை சிறந்த முறையில் பயன்படுத்த தெரிந்து கொண்டால் மக்கள் முன் உங்கள் தொழிலை வேகமாக கொண்டு சென்று சேர்க்கலாம். அடுத்து, முகநூலில் பணம் செலவு செய்து எப்படி ஒரு விளம்பரம் செய்வது என்று பார்க்கலாம். மேலும், ட்விட்டரில் எப்படி தொழில் கணக்கு தொடங்க வேண்டும் என்பதையும் பார்க்கலாம்.

– செழியன். ஜா

ஒரு விலைப் பட்டியலை கணினி மூலம் உருவாக்குவதற்கு மின்னணு விலைப் பட்டியல் அல்லது எலக்ட்ரானிக் இன்வாய்சிங் என்று பெயர். எல்லா வணிகர்களும் பல்வேறு மென்பொருள்களை பயன்படுத்தி விலைப் பட்டியல் உருவாக்குகின்றனர். அதில் உள்ள விவரம் மாதாந்திர GSTR -1 வரிப் படிவம் தயாரிக்கும் போது கையால் பூர்த்தி செய்யப்படுகிறது. இந்த தகவல்கள் GSTR -1 ஏ வரிப் படிவத்தில் எதிரொலிக்கும். இதை பார்க்க மட்டுமே முடியும். இந்த விலைப் பட்டியலுக்கான இ-வே பில் தயாரிக்க பொருளை அனுப்புபவர் (அ) போக்குவரத்து நிறுவனம் எக்சல் (அ) JSON மூலம் கையால் பூர்த்தி செய்ய வேண்டும்.

இந்த முறையை எளிமையாக்க 35வது GST கவுன்சில் கூட்டத்தில் எடுக்கப் பட்ட முடிவுபடி மின்னணு விலைப் பட்டியல் முறையை (B 2B ) 01/04/2020 முதல் நடைமுறைப் படுத்த முடிவு செய்யப்பட்டு உள்ளது. ஆண்டுக்கு ரூ.500 கோடியும் அதற்கு மேலும், மொத்த வருமானம் உடைய வணிகர்களுக்கு பதிவு செய்யப்படாத B 2C விற்பனை செய்யும் போது QR கோடு இருக்கும். ஆண்டுக்கு ரூ. 100 கோடியும் அதற்கு மேலும், மொத்த வருமானம் உடைய வணிகர்களுக்கு கண்டிப்பாகவும், மற்ற தன்னர்வ அடிப்படையில் மின்னணு விலைப் பட்டியல் நடைமுறைப் படுத்துபவர்களுக்கு உடனடியாகவும், மற்ற வரி செலுத்துபவர்களுக்கு பின்னரும் இந்த விதி நடைமுறைப் படுத்தப்படும். மின்னணு விலைப் பட்டியல் தயாரிக்க குறைந்தபட்ச மதிப்பாக ரூ. 1000/- முடிவு செய்யப்பட்டு உள்ளது.

பயன்கள்:

ஒரு மென்பொருளால் தயாரிக்கப்பட்ட விலைப் பட்டியல், இன்னொரு மென்பொருளால் படிக்க முடியும்.

தகவல் உள்ளீடு பிழைகள் குறைக்க முடியும்.

சப்ளையர் தயாரிக்கும் மின்னணு விலைப் பட்டியல் நிகழ் நேர அடிப்படையில் இயக்கப்படுவதால், உள்ளீட்டு வரி உடனடியாக கிடைக்கும்.

வலைதளத்தில் விவரங்கள் உடனடியாக கிடைப்பதால், வரி அதிகாரிகளின் சர்வே குறையும்.

பொருந்தாத பிழைகள் குறையும். தகவல் ஒத்துபோகிறதா (Re onciliation) என்று பார்க்க வேண்டிய தேவை இருக்காது.

ஒரு வணிகத்தின் எல்லா விவரங்களும் இருப்பதால் வரிப்படிவம் பூர்த்தி செய்ய எளிதாக இருக்கும்.

Also read: சரியும் பொருளாதாரத்தை தடுத்து நிமிர்த்த முடியுமா?

மின்னணு விலைப் பட்டியல் செயல்படுத்தும் முறை:

மின்னணு விலைப் பட்டியலை உருவாக்க கீழ்க்கண்ட முறையை பயன்படுத்த வேண்டும். வரி செலுத்துபவர் றிணிறிறிளிலி (PEPPOL (PAN EUROPEAN PUBLIC PROCUREMENT ONLINE ) தரத்தின் படி, தன்னுடைய மென்பொருளைப் பயன்படுத்துவதை உறுதி செய்ய வேண்டும். இது உலக அளவிலான வணிகத்தை ஆதரிக்கும் சிறப்பு கொண்ட வலைதளம் ஆகும். மென்பொருள் சேவை வழங்குபவரை தொடர்புகொண்டு விலைப் பட்டியல் தொகுப்பை இணைக்க வேண்டும்.

பல விலைப் பட்டியலுக்கான ஜெசான்(JSON) ஃபைலை ஒன்றாக உருவாக்கும் திறன் கொண்டதாக இருக்க வேண்டும். வேறு மென்பொருளை பயன்படுத்துபவர்களுக்கு இணைய இணைப்பு இல்லாத கருவி (ஆஃப்லைன் டூல்) வழங்கப்படும்.

ஆண்டுக்கு ரூ. 1.50 கோடிக்கு கீழ் மொத்த வருமானம் கொண்ட சிறிய வணிகர்களுக்கு GSTN உடன் இணைக்கப்பட்டுள்ள எட்டு வெவ்வேறு கணக்கியல் மற்றும் விலைப் பட்டியல் உருவாக்கும் மென்பொருள்களில் இருந்து ஏதாவது ஒன்றை தேர்வு செய்யலாம். இது சிறு வியாபாரிகளுக்கு இலவசமாக அவர்களுடைய கணினியில் நிறுவப்படும். இது ஆன்லைன் மற்றும் ஆஃப்லைன் கருவியாக இரண்டிலும் கிடைக்கும்.

இதற்கு பின், வரி செலுத்துபவர் இந்த மென்பொருளை பயன்படுத்தி சாதாரண விலைப் பட்டியல் கூட தயாரிக்கலாம். விலைப் பட்டியல் தயாரிக்க பெறுபவரின் பெயர், முகவரி, ஜிஎஸ்டி எண், பொருள் பற்றிய விவரம், விலை, மொத்த மதிப்பு, வரிவிகிதம், வரியின் மதிப்பு ஆகிய விவரங்களை கொடுக்க வேண்டும்.

விலைப் பட்டியலில் கண்டிப்பாக கொடுக்க வேண்டிய விவரங்களை ஜெசான் ஃபைலை பயன்படுத்தி ஐஆர்பியில் பதிவேற்றம் செய்யவேண்டும். இந்த விவரத்தை நேரடியாகவோ, ஜிஎஸ்பி -களாகவோ(GSP), ஏபிஐ -யாகவோ(API) (அ) மென்பொருள் வழங்குபவர் மூலமாகவோ செய்யலாம்.

ஐஆர்பி -யை இணையம், API, YEMYEMYES, மொபைல், ஆஃப்லைன் டூல், ஜிஎஸ்பி ஆகியவற்றின் வழியாக தொடர்பு கொள்ளலாம்.

ஐஆர்பி, பி2பி விலைப் பட்டியலில் உள்ள முக்கிய விவரங்கள் அனைத்தும் சரியாக உள்ளதா என்று பார்க்கும். பின்பு, ஏற்கனவே அந்த விலைப் பட்டியல் உருவாகி (டுப்ளிகேஷன்)இருக்கிறதா என்று சோதனை செய்யும். அதன்பின் அந்த விலைப் பட்டியலுக்கு ஒரு குறிப்பு எண்ணை தெரிவிக்கும்(IRN).

வரி செலுத்துபவர் ஏற்கனவே அந்த குறிப்பு எண்ணை உருவாக்கி இருந்தால் கூட, ஐஆர்பியில் பதிவு செய்தபின் மட்டுமே, விலைப் பட்டியல் செல்லுபடியாகும்.

ஐஆர்பி பணி:

மேற்கண்ட நடவடிக்கைகள் முடிந்தவுடன் ஐஆர்பி கீழ்க்கண்ட பணிகளை செயல்படுத்தும்.

குறிப்பு எண்ணை உருவாக்கும்.

விலைப் பட்டியலில் டிஜிட்டல் முறையில் கையெழுத்து இடும்.

சப்ளையருக்கு வெளியீடு ஜெசான்(json) ஃபைலில் QR குறியீட்டை உருவாக்கும்.
மின் விலைப் பட்டியல் உருவானதை பொருள் பெறுபவரின் இமெயில் முகவரிக்கு தகவல் அனுப்பும். இதற்கு அவருடைய இமெயில் முகவரியை மின் விலைப் பட்டியலில் குறிப்பிட வேண்டும்.

மின் விலைப் பட்டியல் விவரத்தை ஜிஎஸ்டி போர்ட்டலுக்கு வரிப் படிவம் (ரிட்டர்ன்) தயாரிக்க அனுப்பி பில் தயாரிக்க உதவி புரியும்.

புதிய வரி படிவத்தில் உள்ள விற்பனையாளரின் Annexure -I மற்றும் வாங்குபவரின் Annexure -II ஆகியவை தொடர்பு உடைய வரிக்கான காலத்தில் தானாக பூர்த்தி செய்து கொள்ளும். இதனால், வரி செலுத்துபவர் செலுத்த வேண்டியது எவ்வளவு என்பது தெளிவாக தெரியும்.

Also read: சந்தைப்படுத்தல் எளிதல்ல; திட்டமிட்டு செயல்பட வேண்டும்!

ஐஆர்பிக்கு கொடுக்க வேண்டிய ஆவணங்கள்:

ஐஆர்பிக்கு சப்ளையரின் விலைப் பட்டியல், கிரெடிட் நோட், டெபிட் நோட் மற்றும் இதர ஆவணங்களை அளித்தால் தான் விலைப் பட்டியல் தயாரிக்க வசதியாக இருக்கும்.

மின் விலைப் பட்டியலை வரி செலுத்துபவர் எப்போதும் போல் அவருடைய நிறுவன முத்திரையுடன் அச்சிடலாம். ஆனால், ஐஆர்பி மின்னணு வடிவத்தில் அச்சிட கட்டாயப்படுத்தப் படுகிறது.

மின் விலைப் பட்டியலை ஜிஎஸ்டி போரட்டலிலோ, இ-இன்வாய்ஸ் போரட்டலிலோ, ஐஆர்பி போரட்டலிலோ உருவாக்க வேண்டியது இல்லை. வரி செலுத்துபவரில் கணினியிலே உருவாக்கலாம்.

ஏற்றுமதி செய்யும் பொருளுக்கும் விலைப் பட்டியல் தயாரிக்க வேண்டும்.

மின் விலைப் பட்டியல் தயாரித்தாலும் இ-வே பில் கண்டிப்பாக தயாரிக்க வேண்டும்.

பொருள்/சேவை வழங்குபவர் அனைவருக்கும் ஒரே மாதிரியான விலைப் பட்டியல் பயன்படுத்தப் படும்…

சு. செந்தமிழ்ச்செல்வன்

தேவை இல்லாதது என்று தூக்கி எறியும் பொருட்கள் நமக்குத் தெரியாமலேயே நம் தேவையை நிறைவு செய்பவையாக இருக்கின்றன. அதாவது, நம்மால் அன்றாடம் கொட்டப்படும் குப்பைகளை மறுசுழற்சி செய்வதன் மூலம் வருவாய் கிடைக்கின்றது. இந்தியாவில் மட்டும் நான்கு லட்சம் டன் அளவிற்கு குப்பைகள் கொட்டப்படுகின்றன. இந்த குப்பைகளால் இயற்கை வளங்களான மண், காற்று, நீர் ஆகியவை அதிக அளவில் மாசு அடைகின்றன. மேலும், சுகாதார கேடையும் ஏற்படுத்துகின்றன. ஆனாலும், இந்த குப்பைகள் மூலம் நம் பொருளா தாரத்தையும், வளங்களையும் பெருக்கிக் கொள்ளமுடியும். மக்கும் குப்பை, மக்காத குப்பை என தரம் பிரித்து அவற்றால் வருமானம் ஈட்ட முடியும்.

Waste Recycling Management (WRM) என்ற முறையைப் பயன்படுத்தி பல நாடுகள் பொருளாதாரம், பொது சுகாதாரம், சுற்றுப்புறம், இயற்கை வளம், மிக பெரிய வளர்ச்சியை அடைந்துள்ளன. நாடுகள் மட்டும் அல்லாது, நம்மால் கொட்டப்படும் குப்பைக் கழிவுகள் மூலம் நாமும் வருமானம் ஈட்டலாம். வேலைவாய்ப்பையும் ஏற்படுத்தி தரலாம்.

இந்த வாய்ப்பில் முதலில் கைகொடுப்பது, வீட்டில் உருவாகும் குப்பைகளே. காய்கறி கழிவுகள், உணவு கழிவுகள், அட்டைகள், பேப்பர்கள், ஆகியவற்றை மக்கும் மற்றும் மக்காத குப்பைகள் என தரம் பிரித்து அவற்றை பணமாக்க முடியும். அதாவது, காய்கறி கழிவுகளைப் பயன்படுத்தி இயற்கை நுண்ணுயிர் உரங்களை தயாரிக்க முடியும். இதற்கான எந்திரங்களும் கிடைக்கின்றன. இருந்தாலும் வீட்டிலேயே தயாரிக்கலாம். இயற்கை உரங்களுக்கு தற்போது நல்ல சந்தை உள்ளது. இவற்றை தயாரித்து மொத்தமாகவும் விற்கலாம். நாம் கொட்டும் குப்பைகளில் பேப்பர், அட்டைகள், புத்தகங்கள் இருக்கும். இவற்றை கொட்டுவதற்கு பதிலாக பொருளாக ஈட்டலாம். இதற்கு பெரிய அளவில் சந்தை உள்ளது. பழைய காகிதங்களை தரம் பிரித்து மறுசுழற்சி செய்து காகிதக் கூழ் தயாரித்து புதிய பேப்பர்கள், எழுதும் தாள்கள், அட்டைப் பெட்டிகள், காகித தட்டுகள், காகித பொம்மைகள், காகித கப்புகள், அலங்காரப் பொருட்கள் என பல செய்யப்படுகின்றன.

காகிதக் கூழ் தயாரிக்கவே பெரிய அளவில் நிறுவனங்கள் செயல்படுகின்றன. இதுபோன்ற காகிதக் குப்பைகளை வாங்கவும், விற்கவும் நகர்புறத்தை சுற்றி நிறைய இருக்கின்றன. இவற்றைப் பயன்படுத்தி வருமானத்தை பெருக்க முயற்சிக்கலாம்.

இந்த மேனேஜ்மென்ட் மூலம், நகர்ப்புறத்தில் மட்டும் அல்லாது கிராம புறங்களிலும் செயல்படுத்தலாம். எரிபொருள், கால்நடைகளுக்கான தீவனங்கள், உரங்கள் போன்றவற்றை தயாரிக்கலாம். கால்நடை கழிவுகளைப் பயன்படுத்தி இயற்கை எரிவாயு தயாரிக்கலாம். பின், தழைகள், காய்ந்த சோளக் கதிர்கள், இவற்றைக் கொண்டு கால்நடைகளுக்கு தீவனங்கள் தயாரிக்கலாம். இதன் மூலம், வெளியில் வாங்கும் செலவு குறையும். நம் தேவைக்குப் போக, மற்றவர்களுக்கு விற்பனை செய்யலாம். வருவாய் பெருகும். இதை சிறுதொழிலாகவும் செய்யலாம்.

Also read: குப்பைகளைப் பிரித்து விற்பனை செய்யும் ஆப்

மேலும், கிராமத்தில் கிடைக்கும் மரத்தூள்கள், மரப் பட்டைகள், காய்ந்த மரப்பொருட்கள் இவற்றைக் கொண்டு எரிபொருள் தயாரிக்கலாம். மேலும், உயிரி நிலக்கரி தயாரிக்கலாம். இவற்றை, உணவு விடுதிகள், செங்கல் சூளைகள், திருமணக் கூடங்கள் ஆகிய இடங்களில் பயன்படுத்தலாம்.

அடுத்து, இயற்கை வளத்திற்கு பெரிய பாதிப்பாக இருப்பது மக்காத குப்பைகளான பிளாஸ்டிக் பொருட்கள் ஆகும். இதன் பயன்பாட்டால் மண்வளத்தை கெடுப்பதற்கு பதிலாக, பணமாக மாற்றலாம். இதற்கென்று தனி சந்தையே செயல்படுகின்றது. இவை தொடர்பான தொழிற்சாலைகள் ஏராளமாக உள்ளன. அவை, பெரிய பிளாஸ்டிக் பொருட்கள், பாட்டில்கள் என தரம் பிரித்து வாங்கிக் கொள்கின்றன. அவற்றை அரைத்து மறுசுழற்சி மூலம், பிளாஸ்டிக் மணிகள், வளையல்கள் என செய்யப்படுகின்றன.

அடுத்து எலக்ட்ரானிக் பொருட்கள், இவை 20 சதவீதம் தான் மறுசுழற்சி செய்யப்பட்டு பயன்படுத்தப் படுகின்றன. பல நாடுகள் டிவி, லேப்டாப், மொபைல் ஃபோன், கம்ப்யூட்டர் போன்றவற்றின் உதிரிப்பாகங்களில் இருந்து காப்பர், அலுமினியம், ஈயம், தங்கம் போன்றவை தரம் பிரித்து எடுக்கின்றனர். மேலும், பழைய லேப்டாப், கம்ப்யூட்டர் போன்றவற்றை மறுவிற்பனை செய்கின்றனர். இதன் மூலம் ஒரு பெரிய வருமானத்தை ஈட்டுகின்றனர்.

மேலும், பயன்படுத்திய ரப்பர் டயர்கள் மூலம் எரிபொருள் தயாரித்து, அதை தார்ச்சாலை அமைக்க பயன்படுத்துகின்றனர். மற்றும், பயனற்ற மோட்டார் செட்டுகள், பம்பு செட்டுகள், இரும்பு பொருட்கள், அலுமினியப் பொருட்கள், பித்தளை ஸ்டீல் பைப்புகள் போன்றவற்றை பிரித்து அதிலிருந்து இரும்பு, காப்பர் போன்றவற்றை விற்கின்றனர்.

மறுசுழற்சி செய்யப்படும் கழிவுகள் பற்றிக் காண்போம்.

வீட்டுக் கழிவுகள்:

காய்கறி கழிவுகள், உணவு கழிவுகள் – இயற்கை நுண்ணுயிர் உரங்கள் தோட்டம், மாடித் தோட்டம் அமைக்க.

காகிதம்: தின இதழ்கள், பேப்பர்கள், அட்டைகள், புத்தகங்கள் – எழுதும் தாள்கள், அட்டைப் பெட்டிகள், காகிதப் பைகள், காகித பிளேட்டுகள், தட்டுகள், கப்புகள், அலங்கார பொம்மைகள், பரிசுப் பொருட்கள், பேக்கிங் செய்ய..
பிளாஸ்டிக்: பாட்டில்கள், பிவிசி பைப்புகள் இன்னும் பலவகையானப் பிளாஸ்டிக் பொருட்கள் – வீட்டுப் பயன்பாட்டுப் பொருட்கள், பிளாஸ்டிக் குடங்கள், தண்ணீர் தொட்டிகள்.

Also read: புறந்தூய்மை நீரான் அமையும்

எலக்ட்ரானிக் பொருட்கள்: லேப்டாப், கம்ப்யூட்டர், யூபிஎஸ், டிவி, கீபோர்ட் – மறுவிற்பனை சந்தை, உதிரி பாகங்கள், காப்பர், தங்கம், ஈயம்.
மோட்டார்கள், பெரிய இரும்பு எந்திரங்கள், பம்பு செட்டுகள், இரும்பு கம்பிகள், பித்தளை பொருட்கள் – மறுவிற்பனை, உதிரிபாகங்கள் தனிதனியாக விற்பனை செய்தல்.

பழைய கட்டடங்கள் உடைத்தல்:

அதிலிருந்து இரும்பு, ரப்பீஸ் துகள்கள், செங்கல், மணல், கம்பிகள், மர சாமான்கள் – ஆறு, ஏரிகள் பாதுகாத்தல், இரும்பு, ரப்பீஸ், மணல் துகள்கள், மரம் என தனித்தனியாக விற்பனை செய்தல்.

மரங்கள்: மரத் துகள்கள், மரப் பட்டைகள், சறுகுகள், பழைய மரங்கள் – உயிரி நிலக்கரி, எரிபொருள் தயாரிப்பு, உணவு விடுதிகள், பேக்கரி, மாடி தோட்டம் அமைக்க.

டன் கணக்கில் கொட்டப்படும் குப்பைகளில், குறைந்த அளவுப் பொருட்களை மறுசுழற்சி செய்தாலே நல்ல வருவாயும், நல்ல இயற்கை வளமும், சிறந்த மண்வளமும் கிடைக்கும். இதனால் வேலைவாய்ப்பையும், பொருளாதாரத்தையும் உயர்த்தலாம். சுவீடன் நாடு, கொட்டும் குப்பைகளில் 53% மறுசுழற்சி செய்து முதல் இடத்தில் உள்ளது. அடுத்து, சிங்கப்பூர் 50% சுழற்சி செய்து இரண்டாம் இடத்தில் உள்ளது.

– விநாயகம்

சென்னை புறநகர் பகுதியான குன்றத்தூரில் பாவேந்தர் தமிழ்வழிப் பள்ளி உள்ளது. அப்பள்ளியை தொடங்கி, தொடர்ந்து இருபத்து ஆறு ஆண்டுகளாக நடத்தி வருகிறார், திரு. வெற்றிச்செழியன். அவரிடம், பள்ளி நடத்துவது ஒரு தொழிலாக அவருக்கு உரிய வருமானத்தைப் பெற்றுத் தருகிறதா என்று கேட்டபொழுது,

“எனது சொந்த ஊர் கோயில்பட்டி அருகே உள்ள காமநாயக்கம்பட்டி. என் உடன் பிறந்தவர்கள் ஒரு அண்ணன், ஒரு தம்பி. நாங்கள் பிறந்து வளர்ந்தது எல்லாம் நாமக்கல், சேலம் பகுதிகளில்தான். ஏனென்றால் அப்பா செயல் அலுவலராக (Executive officer) பணியாற்றினார். அவருக்கு அடிக்கடி பணியில் இடமாற்றம் நிகழும். அதனால், இடம் மாறிக் கொண்டே இருந்தோம்.

10 ஆம் வகுப்பு வரை சேலத்திலும், 12ஆம் வகுப்பு மதுரையிலும் படித்தேன். இதற்கிடையில், அண்ணன் 12ஆம் வகுப்பு முடித்துவிட்டு குன்றத்தூர் பகுதியில் பலசரக்கு கடை ஒன்றை வைத்திருந்தார். நானும் அவருடன் இணைந்து பலசரக்கு கடையை பார்த்துக்கொண்டேன். எப்படியாவது வருமானத்தை உயர்த்த வேண்டும் என்று முடிவு செய்து இருவரும் பல தொழில்களை செய்ய தொடங்கினோம். பிறகு தம்பியும் 12 ஆம் வகுப்பு படித்துவிட்டு எங்களுடன் தொழிலுக்கு வந்தார்.

பிறகு துணி வணிகம் செய்தோம். அதாவது, தவணை முறையில் துணிகளை விற்றல். அடுத்து புக் பைண்டிங், பொருட்களை பாக்கெட் செய்து விற்பது, பஜ்ஜி கடை, இனிப்பகம், விறகு கடை முதலிய தொழில்களை செய்து வந்தோம். இவற்றிற்கிடையில், தொலைதூர கல்வி முறையில் நான் பட்டப்படிப்புகளை படித்தேன். என்னை தொடர்ந்து அண்ணனும், தம்பியும் படித்தார்கள். பிறகு தோட்டக்கலை வடிவமைப்பு மற்றும் கட்டட வேலைக்கு ஒரு பொறியாளரிடம் உதவியாளராக வேலைக்கு சேர்ந்தேன். அங்கு ஒன்றரை ஆண்டுகள் வேலை செய்தேன். படிக்கும் காலங்களில் ஆசிரியர் பணி மீது எனக்கு அதிக ஈடுபாடு இருந்தது. அதனால் அண்ணன், நான், தம்பி மூவரும் இணைந்து குன்றத்தூரில் திருவள்ளுவர் கல்வி நிலையம் ஒன்றை தொடங்கினோம்.

Also read: அன்று ஸ்கெட்ச் பேனா வாங்கக் கூட காசு இல்லாத முகிலன், இன்று ஓவியப் பேராசிரியர்!

பிறகு 1993-ல் உலகத் தமிழாராய்ச்சி நிறுவனத்தில் முனைவர் பட்டத்திற்காக திருக்குறள் தொடர்பான ஆய்வுகளை மேற்கொண்டிருந்தேன். அந்த வேளையில், இந்திய பல்கலைக் கழக தமிழாசிரியர் மன்றம் சார்பில் வெள்ளி விழா கட்டுரை போட்டி நடைபெற்றது. தமிழ் மொழி, இனம், நாடு எதிர்நோக்கும் சிக்கல்களும், தீர்வுகளும் போன்ற தலைப்புகள் அப்போட்டியில் இடம்பெற்று இருந்தன.

நான் அதில் “தமிழ் மொழி, கல்வி மொழியாக எதிர்நோக்கும் சிக்கல்களும் தீர்வுகளும்” என்ற தலைப்பில் கட்டுரை எழுதி அனுப்பினேன். தேசிய அளவில் நடைபெற்ற அப்போட்டியில் மூன்றாம் பரிசு பெற்றேன். பின்பு தான், தமிழ்வழிப் பள்ளிகள் பற்றியும், அவற்றின் நன்மைகள், அதில் இருக்கும் சிக்கல்கள் ஆகியவை பற்றியும் ஆய்வு செய்யத் தொடங்கினேன். இந்த ஆய்வுதான் தமிழ்வழிப் பள்ளி தொடங்க எனக்கு உந்துதலாகவும், உதவியாகவும் இருந்தது.

நான் மாணவனாக இருந்தபொழுது, மலைப் பகுதிகளில் வசிக்கும் மக்களுக்கு கல்விப் பணி ஆற்ற வேண்டும் என்று விரும்பினேன். ஆனால் தற்போது, தாய்மொழிக் கல்வி என்பது எல்லாப் பகுதி மக்களுக்கும் அவசியமானது என்பதை உணர்ந்தேன். எனவே தான், 1994-ல் மக்கள் கல்வி மேம்பாட்டு அறக்கட்டளை ஒன்றை தொடங்கி அதன் மூலமாக பாவேந்தர் தமிழ்வழிப் பள்ளியை தொடங்கினேன்.

எங்கள் பள்ளியில் மழலைக் கல்வி முதல் ஐந்தாம் வகுப்புகள் வரை மொத்தம் ஏழு நிலை மாணவர்கள் பயின்று வருகின்றனர். அவர்களில் பெரும்பாலானோர் விளிம்பு நிலை குடும்பங்களில் இருந்து முதல் தலைமுறையாக படிக்க வருபவர்கள். இத்துடன், நான் பள்ளி விடுமுறை நாட்களில் மாணவர்களுக்கும், பெற்றோர் களுக்கும், ஆசிரியர்களுக்கும் ஆளுமைத் திறன், நுண்ணறிவு, மன வளம் ஆகியவை மேம்பட தனிப்பயிற்சிகள், பயிலரங்குகள், பொழிவுகள் முதலியவற்றை நடத்தி வருகிறேன். மேலும், அருகில் உள்ள நூலகங்களுக்கு சென்று கதை சொல்லி வருகிறேன். இவைகளில் கிடைக்கும் வருமானத்தை பள்ளிக்காக செலவிடுகிறேன். இதுவரை காட்டுப் பள்ளிக்கூடம், மழலையர் மணிப் பாடல்கள், நம்பிக்கை நாற்றுகள் முதலான நூல்களை எழுதி இருக்கிறேன்.

எங்கள் பள்ளியில் தமிழை மட்டும் அல்லாமல் தமிழரின் மரபு சார் உணவு வகைகளையும் மாணவர்களுக்கு அறிமுகப்படுத்தி, அவற்றின் நன்மைகள் பற்றியும் விளக்கி வருகிறோம். மேலும், கடந்த 15 ஆண்டுகளாக பெற்றோர், நண்பர்கள், ஆசிரியர்கள் இணைந்து பள்ளியில் உணவுத் திருவிழாவை நடத்தி வருகிறோம்.

2014ஆம் ஆண்டு, எங்கள் பள்ளி உணவுத் திருவிழாவில் காட்சிப்படுத்திய உணவு களையும், தெரிந்த பிற உணவுகளையும், உணவு சார்ந்த கட்டுரைகளையும், பட்டியல்களையும் இணைத்து “நலம் தரும் நமது பண்பாட்டு உணவுகள்”(செய்முறை விளக்கக் கையேடு) என்ற தலைப்பில் நூலாக வெளியிட்டு உள்ளோம்.

மாணவர்களுக்கு திருக்குறளின் முதன்மையை உணர்த்த வேண்டும் என்பதற்காக ஒவ்வொரு நாளும் திருக்குறள் ஓக இருக்கை கடைபிடிக்கப்படுகிறது. மாணவர்களின் தாழ்வு மனப்பான்மையை நீக்க வேண்டும் என்பதற்காக அரசின் பொதுப் பாடத்திட்டத்துடன் வாழ்வியல் கல்வியையும் இணைத்து கற்பித்து வருகிறோம். மேலும் சமூகத்துடன் இணைந்து வாழ்தல், தேவைக்காக போராடுவது, சமூக வளர்ச்சிக்கு வித்திடுவது முதலிய சமூகத்திற்குத் தேவையான வற்றையும், மாணவர்களுக்கு கற்றுத் தருகிறோம். பிறகு இசை, நடனம், நாடகம், சிலம்பம் முதலான தமிழர் கலைகளை அவர்களுக்கு பயிற்சி அளித்து வருகிறோம்.

மேலும், பள்ளியை நடுநிலைப் பள்ளியாக உயர்த்த திட்டமிட்டு உள்ளோம். அதற்கான முயற்சியில் ஈடுபட்டும் வருகிறேன். கடந்த மே மாதம் சிங்கப்பூரில் ஆசிரியர்களுக்கான இரண்டு நாள் பயிற்சி நடைபெற்றது. நான் அங்கு சென்று மழலை மற்றும் தொடக்கக் கல்வி ஆசிரியர்களுக்கு அந்நிலை மாணவர் களுக்கு எவ்வாறு கற்பிப்பது என்ற கற்பித்தல் முறைகளை அவர்களுக்கு பயிற்சி அளித்தேன்.

கல்விக்கு மையமானவர்கள் குழந்தைகள். சமூக வளர்ச்சிக்கு உதவுவது அவர்களுக்கு வழங்கப்படும் கல்வி. ஆகவே, அக்கல்வியை சரியான வழியில் மாணவர்களிடம் கொண்டு சேர்க்க வேண்டியது அரசின் பொறுப்பு. அனைத்து நிலை மக்களும் கல்வி நிலையங்களோ, பள்ளிக்கூடங்களோ, கல்லூரிகளோ, இதர கல்வி நிறுவனங் களையோ தொடங்கி நடத்தலாம். அவை சமூகத்தில் நிலவும் ஏற்றத்தாழ்வுகளை நீக்கும் என்று எண்ணுகிறேன்.

பள்ளிகள் நிரந்தர வருமானம் அளிப்பவை. இப்போது பள்ளிகள் தொடங்குவது என்பது மிக எளிதாகிவிட்டது. சிறிய அளவில் வீடுகளிலேயே நடத்த விரும்பினால் மாண்டிசோரி, கிண்டர் கார்டன் உள்ளிட்ட முன்பருவ பள்ளிக்கூடங்கள் போதுமானவை.

Also read: புத்தகம் எழுதி பிராண்ட் மதிப்பை உயர்த்தலாம்

தொடக்கப் பள்ளியோ அல்லது உயர் கல்வி பள்ளியோ அமைக்க வேண்டுமென்றால் அதற்கு அரசு ஏற்கனவே முடிவு செய்த அளவிற்கு இடம் வேண்டும். பேரூராட்சி என்றால் ஒரு ஏக்கர், ஊராட்சி என்றால் மூன்று ஏக்கர், நகராட்சி என்றால் எட்டு மனைகள் மாவட்டத் தலைநகர் என்றால் ஆறு மனைகள், மாநகராட்சி என்றால் நான்கு மனைகள் இருக்க வேண்டும். பிறகு பள்ளிக்கூடம் அருகில் மதுக்கடைகள் இருக்கக்கூடாது.

வீடுகள் அதிகம் உள்ள இடங்களிலோ அல்லது பத்து கிலோ மீட்டர் இடைதொலைவிலோ பள்ளிகளை அமைக்கலாம். உண்டி உறைவிடப் பள்ளிகள் மிகச் சிறந்தவை. ஏனெனில், மாணவர்கள் அங்கேயே தங்கி படிக்கும்பொழுது அவர்கள் தங்களின் தனித்திறமைகளை வளர்த்துக்கொள்ள ஏதுவாக இருக்கும்.

அறிவு என்பது பாடநூலில் இருப்பவை மட்டும் இல்லை. சுற்றுப்புறத்தில் நடப்பவைகளை அறிந்துக் கொள்வதும் தான். மேலும், கூட்டாக பகிர்ந்து கற்றல், விளையாடுதல் முதலியவை அவர்களின் ஆளுமைத் திறனை வளரச் செய்கிறது. கல்வி என்பது எல்லை அற்றது. எனவே படிப்பை முடித்த இளைஞர்கள் விடாமல் தொடர்ந்து படிக்க வேண்டும்.

இவர்களில் பெரும்பாலானோர் இணையதளங்களில் முடங்கி விடுகின்றனர். அவ்வாறு இல்லாமல் அவர்கள் நூல்கள் வாங்கி படிக்க வேண்டும். மற்றும் நூலகங்களுக்கு செல்ல வேண்டும். இளைஞர்கள் அடையும் உயர்வு மற்றும் வளர்ச்சி என்பவை சமூகம் கொடுத்தது. அதனை மறக்காமல் இச்சமூகத்திற்கு முடிந்த தொண்டுகளை அவர்கள் செய்ய வேண்டும்” என்று அவர் கூறினார்.

– இளங்கதிர் யோகி