சென்னை, போரூர் அருகே உள்ள கோவூரில் உள்ள செயின்ட் ஜோசப் கலை, அறிவியல் கல்லூரியில் ஓவியப் பேராசிரியராக பணி புரிந்து வருகிறார், திரு. முகிலன். அவர் ஓவியத் துறையே அவர் ஏன் தேர்ந்து எடுத்தார் என்பது குறித்தும் ஓவியம் கற்றுக் கொள்வதால் கிடைக்கும் தொழில் மற்றும் வேலை வாய்ப்புகள் குறித்து அவரிடம் கேட்டபோது,
”எனது சொந்த ஊர் தேனி மாவட்டத்தில் உள்ள சின்னமனூர். நான் ஒரு விவசாயக் குடியில் பிறந்தவன். சிறு வயது முதலே ஓவியம் வரைவதில் ஆர்வம் கொண்டவன். நான் சிறுவனாக இருந்தபோது ஸ்கெட்ச் பேனா வாங்குவதற்குக் கூட வீட்டில் பணம் இருக்காது. ஒரு முறை என் மாமா “இவன் நன்றாக ஓவியம் வரைகிறானே!” என்று சொல்லி ஐந்து ஸ்கெட்ச் பேனாக்களும் ஒரு நோட்டும் வாங்கிக் கொடுத்தார். ஒரே இரவுக்குள் அந்த நோட்டு முழுவதையும் வரைந்து முடித்து விட்டேன். அந்த அளவிற்கு ஓவியத்தில் ஆர்வம் கொண்டிருந்தேன்.
மதுரையில் உள்ள ஒரு அரசு கலை, அறிவியல் கல்லூரியில் பொருளியல் எடுத்து படித்தேன். பிறகு ஓவியத்தை முறையாகக் கற்றுக் கொள்ள விரும்பினேன். அதற்காக சென்னை தரமணியில் உள்ள அரசு கவின் கலைக் கல்லூரியில் சேர்ந்தேன். விடுதியில் தங்கி கல்லூரிப் படிப்பைத் தொடர்ந்தேன். அந்த சமயத்தில் என் அப்பா இறந்து விட்டார்.
என்னதான் குடும்பப் பொறுப்பை அண்ணன் ஏற்றுக் கொண்டாலும் என் படிப்பு, கை செலவுகளை நானே பார்த்துக் கொள்ள வேண்டும் என்று முடிவெடுத்தேன். அப்பொழுது என் உறவினரும் தோழனுமான மணி முருகன், நான் தங்கி இருந்த விடுதியில்தான் தங்கி இருந்தான். அவன் செலவிற்கு என அவர்கள் வீட்டில் தரும் பணத்தில் எனக்கும் கொஞ்சம் தந்து உதவுவான். நானும் கேட்பவர்களுக்கு ஓவியம் வரைந்து கொடுப்பேன். அதில் கிடைக்கும் வருவாயை என் செலவிற்கு வைத்துக் கொள்வேன்.
படிப்பை முடித்து விட்டு மைலாப்பூரில் உள்ள ஒரு தனியார் விளம்பர நிறுவனத்தில் வேலைக்கு சேர்ந்தேன். அங்கு ஏழு ஆண்டுகள் வேலை செய்தேன். குடும்பத்தில் ஏற்பட்ட சில சிக்கல்கள் மற்றும் வேறு சில காரணங்களால் அந்த வேலையை விட்டு விட்டேன். அங்கு வேலை செய்து கொண்டிருந்த போதே “பார்ப்பன பயங்கரவாதிகளின் கூடாரம்” என்னும் நூலிற்கு கார்ட்டூன்கள் வரைந்து கொடுத்தேன். அது தமிழ்நாட்டில் வெளிவந்த மிகவும் பிரபலமான நூல்களில் ஒன்று நான் வரைந்து கொடுத்த கார்ட்டூன்கள் பெரிய வரவேற்பைப் பெற்றன.
பிறகு மாணவர்களுக்கு கலை ஆர்வத்தையும், அரசியல் ஆர்வத்தையும் ஏற்படுத்த எண்ணினேன். மற்ற கற்பித்தல் செயல்பாடுகளை விடவும் ஓவியங்களின் ஊடாக மக்களின் வாழ்வு, அரசியல், சமூக நிலை, கலாச்சாரம், கலைகள் ஆகியவற்றை எளிமையாக சொல்லிக் கொடுக்க முடியும் என்பது என் கருத்து. எனவே கல்லூரியில் ஓவியப் பேராசிரியராக பணி புரிய முடிவு செய்தேன். என்னைப் பொறுத்த வரையில் ஒரு ஓவியம் எவ்வாறு இருக்க வேண்டும் என்றால் “அது மக்களுக்கான ஓவியமாக இருக்க வேண்டும்” என்பேன். எண்ணெய் ஓவியங்கள், முப்பரிமாண ஓவியங்கள், கார்ட்டூன்கள் என பல வகையான ஓவியங்களை மாணவர்களுக்கு கற்றுக் கொடுக்கிறேன்.
மாணவர்களுக்கு கொடுக்கப்பட்டு உள்ள பாடத் திட்டத்தில் உள்ள ஓவியங்களை மிகவும் நுட்பமாக கற்றுத் தருகிறேன். அவர்களை ஊக்கப்படுத்த, என்னோடு சுதந்திரமாக உரையாடச் செய்வேன். ஒரு தோழனைப் போல அவர்களுடன் பழகுவேன். வின்சன்ட் வான்கா, டேவிட், ஆஞ்சலோ போன்ற தலை சிறந்த ஓவியர்களைப் பற்றி சொல்லிக் கொடுப்பேன். உள்நாட்டு ஓவியர்களைப் பற்றியும் சொல்லிக் கொடுக்கிறேன்.
ஒவ்வொரு ஆண்டும் கல்லூரியில் சேரும் ஓவியம் கற்கும் மாணவர்களின் எண்ணிக்கை மிதமாகத்தான் இருக்கிறது. அந்த எண்ணிக்கையை அதிகரிக்கச் செய்வது ஆசிரியர்களிடமும் பெற்றோர்களிடமும்தான் உள்ளது. மாணவர்களின் ஓவியம் வரையும் ஆர்வத்தை கண்டறிந்து அவர்களை அந்தத் துறையில் ஊக்கப்படுத்த வேண்டும். மாறாக எதிர்மறையாக பேசி அவர்களின் ஆர்வத்தை மழுங்கடிக்கக் கூடாது.
சிவில், பொறியியல், மருத்துவம், கணக்குப் பதிவியல் படிக்கும் மாணவர்களுக்கு இருப்பது போலவே ஓவியம் கற்கும் மாணவர்களுக்கும் வேலை வாய்ப்புகள் உண்டு. இவர்கள் தொழில் முறை ஓவியர்களாக வேலை செய்யலாம்.
ஒரு நிறுவனத்தில் பகுதி நேர பணியாளராகவும் (Free lancer) வேலை செய்யலாம். விளம்பர நிறுவனங்களில் வேலை செய்யலாம். கேட்பவர்களுக்கு ஓவியம் வரைந்து கொடுத்து வருவாய் ஈட்டலாம். வீட்டிலேயே ஓவிய வகுப்புகள் எடுக்கலாம். ஓவியப் பேராசிரியர்களாக பணியில் சேரலாம். அனிமேஷன் (Animation) படங்களுக்கு டிசைன் (design) அமைத்துக் கொடுக்கலாம். இன்னும் ஓவியங்களைக் கொண்டு புதிய புதிய சாதனைகளையும் படைக்கலாம். புது வகையான ஓவியங்களையும் உருவாக்கலாம்.
நானும் கல்லூரியில் பணி புரிவது மட்டுமல்லாமல் வீட்டில் வாரந்தோறும் ஞாயிற்றுக் கிழமைகளில் வீட்டிற்கு அருகாமையில் உள்ள மாணவர்களுக்கு ஓவிய வகுப்பு எடுக்கிறேன். அதிலும் வருவாய் கிடைக்கிறது.
இப்படி ஓவியக் கலை பணம் ஈட்டுவதற்கான பல வாயில்களைக் கொண்டு உள்ளது என்பதை நாம் அறிந்து கொள்ள வேண்டும். மேலும் ஓவியக் கண்காட்சிகளில் பங்கு பெறலாம்.அதன் மூலம் நாம் சிறந்த ஓவியர்களாகவும் அங்கீகரிக்கப்படலாம். மக்களுக்கான ஓவியங்களை வரையும் சிறந்த ஓவியர்களை என் வகுப்பறையில் இருந்து உருவாக வேண்டும் என்பது எனது இலட்சியம். அது நிச்சயம் நடந்தேறும் என்ற நம்பிக்கை எனக்கு முழுமையாக உண்டு” என்றார்.
-இளங்கதிர் யோகி
