HR – ஊழியர்கள் நன்றாக வேலை செய்ய வேண்டுமா?

Valar
-
0
HR – ஊழியர்கள் நன்றாக வேலை செய்ய வேண்டுமா?

சிறந்த தொழிலதிபர் ஒரு சிறந்த நிர்வாகியாகவும் இருக்க வேண்டும். அப்போதுதான் ஊழியர் களை நன்றாக வழிநடத்த முடியும். இதோ அதற்கு சில ஆலோசனைகள் –

உங்கள் ஊழியர்களுக்கு ஒரு பணியை வழங்கும் போது, அதை எப்படி செய்ய வேண்டும் என்று தெளிவாக சொல்ல வேண்டும். முடிந்தால் அதை எழுதிக் கொடுத்தால் இன்னும் சிறப்பாக வேலை நடக்கும். நீங்கள் பட்டும் படாமல் ஒரு விசயத்தை சொல்லி விட்டு பின் அது நடைபெறவில்லை என்று கத்தக் கூடாது.

ஒரு பணியை ஒப்படைக்கும் போது அந்த பணி முடிவடைய வேண்டிய நேரத்தையும் பணியாளர்களிடம் தெரிவிக்க வேண்டும். அப்போதுதான் வேலை முடியும். சரியான இடைவெளி யில் அவர்கள் அந்த வேலைகளை செய்கிறார்களா என கண்காணிக்க வேண்டும். அதே சமயம் நச்சரிக்கவும் கூடாது.

நம் ஊழியர்களை மற்றவர்கள் முன் திட்டுவதோ கண்டிப்பதோ கூடாது. எந்த சிக்கல்களிலும் நம் பணியாளர் களை விட்டுக் கொடுக்கக் கூடாது. நிறுவனத்தில் வேலை செய்பவர்களின் சிக்கல்களை புரிந்து வேலை வாங்க வேண்டும்.

நம் ஊழியர்களுக்கு இந்த விசயத்தில் நாம் இப்படித்தான் எதிர்பார்ப்போம் என தெளிவாக தெரிய வேண்டும். அப்போது தான் ஒரு ஒழுங்கு முறை இருக்கும்.

எப்போதும் நாம் பார்ப்பதற்கு உற்சாகமாக இருக்கவேண்டும், அப் போதுதான் நம் ஊழியர்களும் உற் சாகமாக வேலை செய்வார்கள். நாம் செய்யும் எந்த வேலையையும் திருத்தமா கவும் நேர்த்தியாகவும் செய்யவேண்டும் அப்போதுதான் நம் ஊழியர்களும் அப்படி செய்ய முற்படுவார்கள்.

பிறந்தநாள், திருமண நாள் போன்ற வற்றை அலுவலகத்தில் கொண்டாட லாம் இதனால் அவர்களிடையே உற்சாகம் பிறக்கும்.

நேர்மை அனைத்து மட்டத்திலும் இருக்கவேண்டும், அதை நம்மிடம் இருந்தே தொடங்கவேண்டும்.

நம்மிடம் வேலை பார்ப்பவர்கள் நம்மிடம் உள்ள குறைகளை சுட்டிக் காட்டினால் திருத்திக் கொள்ள வேண்டும், நம் தவறுகளை சொல்லு வதன் மூலம் அவர்கள் நமக்கு உதவிதான் செய்கிறார்கள்.

-சந்தோஷ்

தரமான கருப்பட்டி விற்பனை செய்கிறேன் – மணிவண்ணன்

Valar
-
0
தரமான கருப்பட்டி விற்பனை செய்கிறேன் – மணிவண்ணன்

பத்து கிலோ கருப்பட்டிக்குப் பின்னால் உள்ள உழைப்பு பற்றி இயற்கைக் கரங்கள் என்ற அமைப்பை நடத்தி வருவதோடு, கலப்படமற்ற கருப்பட்டியை விற்பனை செய்து வரும் பர்கூரில் உள்ள திரு. ஆர். மணிவண்ணன் விளக்கிக் கூறிய போது,
”ஒரு ஆண் அதிகாலை 4 மணி முதல் மரம் ஏறணும் இருபது முதல் இருபத்தைந்து மரம் ஏறி பாளைய சீவி ஊறி இருக்குற தெளுவு (பதநீரை) எடுத்து கொண்டு வந்து வடிகட்டி தரணும்
எட்டு ஒன்பது மணி தாண்டினா தெளுவு புளிச்சிடும். பனை வெல்லம் தரமா வராது. மழை வந்து விட்டாலும் வெல்லம் தரமா இருக்காது. சுண்ணாம்பு அதிகமா இருந்தாலும் சரியா வராது, சுண்ணாம்பு குறைவா இருந்தாலும் தரமா இருக்காது.
ஒரு நேரம் மரம் ஏறவில்லை என்றாலும் பதனீர் போதுமான அளவுக்கு கிடைக்காது. காலையில் எத்தனை மரம் ஏறினோமோ அத்தனை மரங்களையும் மாலையிலும் ஏறி பாளையை சீவி விடணும். அனைத்தையும் ஏறி முடிக்க இரவு 11 மணி ஆகி விடும்
அடுத்து ஒரு பெண் அடுப்பின் அருகே உட்கார்ந்து பதநீரைக் காய்ச்சி, பாகு எடுத்து அச்சுகளில் ஊற்றி, ஒரு வாரம் நிழலில் காய வைத்து தர வேண்டும்..
இது மட்டுமல்ல; அடுப்புக்கு விறகு தேவை. அதுவும் பெரிய கட்டை விறகா கவும் இருக்கக் கூடாது. அடுப்பு முழுவதும் படர்ந்து எரிய வேண்டும் அதற்கு தகுந்தாற் போல் சிமிர் விறகாக மட்டுமே இருக்க வேண்டும் அதற்காக குடும்பமே காட்டுக்குப் போய் விறகு வெட்டி எடுத்து வர வேண் டும் அல்லது பணம் கொடுத்து வாங்க வேண்டும்.
இவ்வளவு வேலை செய்தால்தான் ஒரு குடும்பம், ஒரு நாளில் எட்டு முதல் பத்து கிலோ பனை வெல்லம் உற்பத்தி செய்ய முடியும்.
பதினைந்து ஆண்டுகளுக்கு முன் எங்க ஊர்ல மட்டும் 150 பேர் மரமேறினாங்க, அப்பா உட்பட. இன்று மூன்றில் ஒரு பங்கு ஆட்கள் கூட மரம் ஏறுவதற்கு இல்லை. காலையில் இறக்கிய அசல் பதநீர் 11 மணிக்கு மேல தாங்காது கெட்டு விடும். (அதுவும் நாலு மாச பனை சீசன்லதான் கிடைக்கும்)
சில பதநீர் அருந்துவதில் ஆர்வம் உள்ளவர்கள், மரமேறும் தோழிலாளியிடம் லிட்டர் 50 ரூபாய்க்கு பனை மரத்தடியில் இருந்தே பதநீரை வாங்கிக் கொண்டு போய் விடுகிறார்கள்.
இவ்வளவும் தாண்டி தரமான கருப்பட்டியை உற்பத்தி செய்து விற்பனை செய்கிறோம். குறைந்தது ஐந்து கிலோ அளவுக்கு வாங்குபவர்களுக்கு அவர்கள் முகவரிக்கே அசல் கருப்பட்டியை அனுப்பி வைக்கிறோம். நல்ல கருப்பட்டியை விற்பனை செய்கிறோம் என்ற மனநிறைவு எனக்கு இருக்கிறது. இப்போது கருப்பட்டி இனிப்பு வகைகளையும் தயாரிக்கிறோம்” என்கிறார், திரு. மணிவண்ணன். (9487624149)

  • மலர்

உணர்வுகளையும், ஆற்றலையும் ஒன்று படுத்தும் தேநீர்

Valar
-
0
உணர்வுகளையும், ஆற்றலையும் ஒன்று படுத்தும் தேநீர்

 

உலகம் முழுதும் பயிரிடப்படும் தேயிலையின் மூலம் பர்மா மற்றும் சீனத்தின் தென் மேற்கு மாகாணம் என அறியப்படுகிறது தேயிலை, ‘தீயேசியே’ (Theaceae) குடும்பதைச் சேர்ந்த குற்றுச் செடி ஆகும். குட்டையாக இரண்டு மீட்டர் உயரம் வரை வளரும். ஈரப்பதமான பருவநிலை, மழையளவு, மண் வளம் சிறப்பாக உள்ள மலைச்சரிவுகளில் மட்டுமே சாகுபடி செய்யப்படுகிறது.

Also read: உடற்பயிற்சி மனதை சீராக்கும்; மன அழுத்தத்தை குறைக்கும்!

இன்று, இந்தியாவின் பானத் தேர்வு இன்னும் மசாலா சாயாகவே இருக்கிறது.  இன்னும் பெரும்பாலான மக்கள் பிரீமியம் தேநீர் கலவைகளைத் தேர்வு செய்கிறார்கள்.

சிறந்த சுவைக்கு மூன்று இலைகளும், ஒரு இலை மொக்கும் உள்ள ‘ஃப்ளஷ்’ (Flush) எனப்படும் செடியின் மேற்பகுதியில் வளரும் இலைகள் மட்டுமே பறிக்கப்படும். தேயிலை வகைகளில் சீனா மற்றும் இந்திய அசாம் தேயிலை என இரண்டு வகைகளே பயிரிடப்படுகின்றன. தென்கிழக்கு ஆசியா மற்றும் இந்தியாவை பூர்வீகமாகக்கொண்ட தேயிலை தற்போது உலகம் முழுவதும் பயிரிடப்படுகிறது.

உலகில் மிகப் பெரிய தேயிலை உற்பத்தி நாடாகவும், நுகர்வு நாடாகவும் இந்தியா விளங்குகிறது..

இந்தியாவின் மாகைபரி தோட்டத்தின் தேயிலை ஒரு கிலோவுக்கு டாலர் 1,850 என்ற அளவில் விற்கப்படுகிறது. இம்பீரியல் தேநீர் உலகின் மிக விலையுயர்ந்த தேயிலைகளில் ஒன்றாகும். டார்ஜிலிங்கில் இருந்து வரும் ஓலாங் தேநீர் தேயிலைகள் பறிக்கும் பருவத்தில் பௌர்ணமி நாட்கள் மற்றும் இரவுகளில் மட்டுமே பறிக்கப்படுகிறது.

மாம்பழம் மற்றும் புதினா கலந்த பச்சை தேயிலை முதல் மல்லிகை கலந்த வெள்ளை தேநீர் வரை கலவைகள் உள்ளன.

Also read: மகிழ்ச்சி அதிகரிக்கும், இவற்றைப் பின்பற்றினால்!

இன்று, இந்தியர்களுக்கு [மற்ற நாடுகளைப் போலவே] ஒரே மாதிரியான தேநீர் மற்றும் வேறு பலசுவைகளிலும் கிடைக்கின்றன.

ஒரு பிரீமியம் தேநீர் மற்றும் ஒரே கலவை அல்லது சுவை கொண்ட வழக்கமான ஒன்றுக்கு இடையேயான வேறுபாடு அதிகம். மேலும் தேநீர் குடிப்பவர்கள் தேர்வு செய்வதற்கு முன்பு பல காரணிகளைக் கருதுகின்றனர்.

தேயிலை மீதான காதல் இளைஞர் களிடையே அதிகரித்து வருகிறது. இந்திய தேயிலை வாரியத்தின் கூற்றுப்படி, 80 சதவீத இந்தியர்கள் தங்கள் பால் தேநீரை சர்க்கரையுடன் விரும்புகிறார்கள் என்றாலும், சர்க்கரை இல்லாமல் பால் அல்லாத தேநீர் நுகர்வும் அதிகரித்து வருகிறது.  அமெரிக்காவில், காப்பி தான் ஆதிக்கம் செலுத்துகிறது. ஆனால் ஆசிய மற்றும் ஐரோப்பிய நாடுகளில் தேநீர்தான் ஆதிக்கம் செலுத்துகிறது.

அசாம் தேநீர் பெரும்பாலும் வட இந்தியாவில் உட்கொள்ளப்பட்டாலும், நீலகிரி தேநீர் இந்தியாவின் தெற்குப் பகுதியில் விரும்பப்படுகிறது. ஆனால் டார்ஜிலிங் தேநீர் தான் பெருமைக்குரிய இடத்தை ஆக்கிரமித்து உள்ளது. டார்ஜிலிங் தேயிலை சீனாவிலிருந்து வந்திருந்தாலும், இந்திய வடகிழக்கு நிலப்பரப்பு மற்றும் காலநிலை டார்ஜிலிங் தேயிலைக்கு தனித்துவமான சுவையை அளிக்கிறது.  டார்ஜிலிங்கில் பயிரிடப்படும் தேயிலையானது இயற்கை உரம் கொண்டு பயிரடப்படுகிறது.

இந்தியாவே பல கப்கள் தேநீரால் தான் இயங்கிக் கொண்டிருக்கிறது.

Also read: ஆசிரியர்களுக்கும், மாணவர்களுக்கும் மகிழ்ச்சி அளிக்கும் நடைமுறைகள்

தங்களின் எல்லா உணர்வுகளும் ஆற்றலும் ஒன்று கூட தேநீரை அருந்துவது பயன் அளிக்கிறது என்கிறார்கள் தேநீர் விரும்பிகள். கொரோனா ஊரடங்கின்போது தனியாக தங்கி இருந்தவர்கள் அதிகம் தவித்துப் போனது தேநீருக்காகத்தான். தேநீர் கடைகள் திறப்புக்குப் பின்னரே அவர்கள் மகிழ்ச்சி அடைந்தார்கள்.

– த. செந்தமிழ்ச் செல்வன்

மேலாண் இயக்குநர், இயக்குநர்கள் தேர்வு எப்படி நடைபெற வேண்டும்?

Valar
-
0
மேலாண் இயக்குநர், இயக்குநர்கள் தேர்வு எப்படி நடைபெற வேண்டும்?

நிறுமங்களின் சட்டம் 2013 இல் தனியார் வரையறுக்கப்பட்ட நிறுமங்களில் நிருவாக இயக்குநரை அல்லது முழுநேர இயக்குநரை கட்டாயமாக நியமனம் செய்ய வேண்டும் என்றோ அல்லது நியமனமே செய்ய வேண்டாம் என தடுக்கவோ, தவிர்க்கவோ இல்லை. ஆயினும், எந்த ஒரு தனியார் வரையறுக்கப்பட்ட நிறுமமும் திறனுடன் செயலாற்றுவதற்காக, அந்நிறுமத்தில் நிருவாக இயக்குநரை அல்லது முழுநேர இயக்குரை நியமித்து கொள்வது நல்லது என பரிந்துரைக்கப் படுகின்றது.

நிறுமங்களின் சட்டம் 2013 பிரிவு 2 (54) இன்படி நிருவாக இயக்குநர் என்பவர் நிறுமத்தின் நிறும அமைப்பு விதிமுறைகளின் படி (Articles of Association) அல்லது அந்த நிறுமத்தில் மேற்கொள்ளப்பட்ட ஒப்பந்தத்தின் படி அல்லது நிறுமத்தின் பொதுக்குழு கூட்டத்தில் நிறைவேற்றப்பட்ட தீர்மானத்தின் படி அல்லது இயக்குநர்களின் குழுக்கூட்டத்தில் நிறைவேற்றப்பட்ட தீர்மானத்தின் படி நிறுமத்தை திறம்பட நடத்தி செல்வதற்கான அந்நிறுமத்தின் அனைத்து அதிகாரங்களையும் கைகொண்டு செயல்படும் நிருவாக இயக்குநர் அல்லது வேறு ஏதேனும் பெயரில் செயல்படும் நபராவார்.

நிறுமங்களின் சட்டம் 2013 பிரிவு 2 (94) இன்படி முழுநேர இயக்குநர் என்பவர் அந்நிறுமத்தின் முழு நேரமும் பணிபுரியும் இயக்குநராவார். வேறு சொற்களில் கூறுவதெனில், ஒரு நிறுவனத்தின் விவகாரங்களை கவனித்துக் கொள்வதில் தனது முழு நேரத்தையும் கவனத்தையும் செலவழித்து பணிபுரியும் இயக்குநரே முழுநேர இயக்குநராவார்.

Also read: “தொழில் சார்ந்த கொள்கை முடிவே சரியான பொருளாதார நடைமுறை”

ஏற்கனவே ஒரு நிறுமத்தின் இயக்குநராக இருக்கும் நபர் மட்டுமே அந்நிறுமத்தில் நிருவாக இயக்குநராகவோ அல்லது முழுநேர இயக்குநராகவோ நியமிக்க முடியும். அதனால் ஒருநபர் எந்த ஒரு நிறுமத்திலும் நிருவாக இயக்குநராகவோ அல்லது முழுநேர இயக்குநராகவோ செயல்பட வேண்டுமெனில் முதலில் அந்த நபர் அந்நிறுமத்தில் இயக்குநராக இருக்க வேண்டும் என்பது முன் நிபந்தனையாகும்

அதனால் தற்போது ஏதேனும் ஒரு நபரை, ஒரு நிறுமத்தில் கூடுதல் இயக்குநராக இயக்குநர்களின் குழுவில் நியமனம் செய்தால் அந்த கூடுதல் இயக்குநராக பதவி வகிப்பவர் தானாகவே அந்நிறுமத்தின் நிருவாக இயக்குநராகவோ அல்லது முழுநேர இயக்குநராகவோ நியமனம் செய்வதற்கு தகுதி உடையவர் ஆகின்றார்.

ஆயினும், அந்த கூடுதல் இயக்குநர் பதவி அடுத்த பொதுப்பேரவை கூட்டம் நடைபெறும் வரை மட்டுமே நிருவாக இயக்குநராகவோ அல்லது முழுநேர இயக்குநராகவோ பதவி வகிக்க முடியும் அந்த பொதுப்பேரவை கூட்டத்தில் அந்த கூடுதல் இயக்குநரை மறுநியமனம் செய்வதற்கு ஒப்புதல் அளிக்கப்பட்டால் தானாகவே அக்கூடுதல் இயக்குநர் தொடர்ந்து அந்நிறுமத்தின் நிருவாக இயக்குநராகவோ அல்லது முழுநேர இயக்குநராகவோ பதவி வகிக்க இயலும்.

பொதுவாக எந்த ஒரு நிறுமத்திலும் நிருவாக இயக்குநராகவோ அல்லது முழுநேர இயக்குநராகவோ நியமனம் செய்பவருக்கு குறைந்த பட்சம் 21 வயதும் அதிக பட்சம் 70 வயதும் இருக்க வேண்டும் 70 வயதிற்கு மேல் எனில் அந்நிறுமத்தின் பொதுப்பேரவை கூட்டத்தில் சிறப்புத் தீர்மானம் நிறைவேற்றி பொதுப்பேரவையில் உறுப்பினர்கள் அத்தீர்மானத்திற்கு ஒப்புதல் அளிக்க வேண்டும். ஐந்து ஆண்டுகளுக்கு மட்டுமே நிருவாக இயக்குநராகவோ அல்லது முழுநேர இயக்குநராகவோ நியமனம் செய்ய முடியும். மேலும், காலநீட்டிப்பு வேண்டுமெனில், மற்றொரு ஐந்து ஆண்டிற்கு மறுநியமனம் செய்து கொள்ளலாம்.

ஆயினும் இயக்குநரின் பதவி காலம் ஒரு ஆண்டிற்குள் இருக்கும் போது நிருவாக இயக்குநராகவோ அல்லது முழுநேர இயக்குநராகவோ நியமனம் செய்ய முடியாது. இந்நிலையில் நிருவாக இயக்குநர், முழுநேர இயக்குநர் ஆகிய இரண்டு பதவிகளையும் வகிப்பவர்கள், நிறுமத்தின் நிருவாகத்தை திறம்பட நடத்துபவர்கள்தான் எனில் இவ்விருவர்களுக்கும் இடையேயான வேறுபாடுகள் யாவை என்ற கேள்வி நம் மனதில் இயல்பாக எழும்.

நிருவாக இயக்குநரை ஐந்து ஆண்டுகளுக்கு மட்டுமே ஒவ்வொரு முறையும் நியமனம் செய்ய முடியும். முழுநேர இயக்குநர் அவர் வாழ்நாள் முழுவதற்குமாக நியமனம் செய்யலாம். தனிநபர் ஒருவர் நிருவாக இயக்குநராக இரண்டு நிறுமங்களில் மட்டுமே பணிபுரிய முடியும். ஆனால் முழுநேர இயக்குநர் ஒரே ஒரு நிறுமத்தில் மட்டுமே பணிபுரிய அனுமதிக்கப் படுவார்.

நிறுமங்களின் சட்டம் 2013 இன்படி நிருவாக இயக்குநரை அல்லது முழுநேர இயக்குநரை நியமனம் செய்வதற்கான வழிமுறைகள்

நிறுமத்தின் அமைப்பு விதிமுறைகளில் இவ்வாறு நிருவாக இயக்குநரை அல்லது முழுநேர இயக்குநரை நியமனம் செய்வதற்காக குறிப்பிடப்பட்டு ஒப்புதல் பெறப்பட்டு இருக்க வேண்டும். அவ்வாறு இல்லையெனில் அவ்விதிமுறைகளில் திருத்தம் செய்வதன் வாயிலாக நியமனம் செய்வதற்கான விதிமுறைகளை சேர்க்க வேண்டும். அதற்காக இயக்குநர்களின் குழுக்கூட்டத்தை கூட்டி அதில் நிருவாக இயக்குநரை அல்லது முழுநேர இயக்குநரை நியமனம் செய்வதற்கான விதிமுறைகளை உருவாக்குவதற்கான தீர்மானம் நிறைவேற்றி ஒப்புதல் பெறவேண்டும். மேலும் நியமனம் செய்யும் நிருவாக இயக்குநர் உடன் அல்லது முழுநேர இயக்குநர் உடன் இந்நியமனம் தொடர்பான நிபந்தனைகள், விதிமுறைகள் ஆகியவற்றுடன் தனியாக ஒப்பந்தம் ஒன்றை ஏற்படுத்திக் கொள்ள வேண்டும்.

Also read: பங்குதாரர் நிறுவனங்கள் ஏன் தொடர்ந்து நிலைப்பது இல்லை?

படிவம் எண் டிஐஆர் (DIR) – 12 இல் நிருவாக இயக்குநரை பற்றிய அல்லது முழுநேர இயக்குநரை பற்றிய விவரங்களை முழுவதுமாக நிரப்பிய பின், இயக்குநர்களின் குழுக்கூட்டத்தில் இதற்காக நிறைவேற்றப்பட்ட தீர்மானத்திற்கான படிவம் எண் எம்ஜிடி (MGT) – 14 இல் மேலும், தேவையான விவரங்களை நிரப்பிக் கொண்டு இவ்வாறு நியமனம் செய்யப்பட்ட முப்பது நாட்களுக்குள் நிறுமங்களின் விவகார அமைச்சகத்தின் எம்சிஏ (MCA) கீழ் செயல்படும் நிறுமங்களின் பதிவாளரிடம் இவ்விரு படிவங்களையும் வழங்க வேண்டும்.

புதியதாக நியமனம் செய்வது மட்டுமல்லாமல் மறுநியமனம் செய்வது நியமன நிபந்தனைகளை அல்லது விதிமுறைகளில் மாறுதல்கள் செய்து கொண்டாலும், அதையும் படிவம் எண் டிஐஆர் – 12 படிவம் எண் எம்ஜிடி – 14 ஆகியவற்றின் வாயிலாக நிறுமங்களின் பதிவாளரிடம் வழங்க வேண்டும். எந்த ஒரு நிறுமத்திலும் சாதாரண இயக்குநர் பதவியை வகிப்பவர் எனில் அவ்வியக்குநர் தன் பதவி விலகலை எழுத்து மூலமாக தம் நிறுமத்தின் இயக்குநர் குழுவிடம் அளித்து விட்டால் போதுமானது ஆகும்.

ஆயினும் நிருவாக இயக்குநர் அல்லது முழுநேர இயக்குநர் எனில் பதவி விலகல் கடிதம் அளித்து அந்த கடித்தத்தை இயக்குநர்களின் குழுக்கூட்டத்தில் ஏற்றுக் கொண்டால் மட்டுமே பதவி விலக முடியும். அதுவரையில் அவர் தன் பதவியில் தொடர்ந்து இருக்க வேண்டும். தனியார் வரையறுக்கப்பட்ட நிறுமத்தில் நிருவாக இயக்குநரை அல்லது முழுநேர இயக்குநரை நியமனம் செய்வது தொடர்பாக பொதுப்பேரவை கூட்டத்தில் ஒப்புதல் பெறத் தேவையில்லை. அவ்வாறே, அவர்களுக்கான ஊதியம் தொடர்பான நிறுமங்களின் சட்ட விதிகள் பொருந்தாது. மின்னனு படிவம் எண் MR – 1 வழங்கவும் தேவையில்லை.

– வசந்தகுமார்

கம்பெனியின் பெயரை மாற்றுவது எப்படி?

Valar
-
0
கம்பெனியின் பெயரை மாற்றுவது எப்படி?

கம்பெனிகளின் பெயர் மாறுதல் செய்வது என்பது கம்பெனிகளின் சட்டம் 2013 பிரிவு 13(2)உம் கம்பெனிகள் உருவாக்குதல் விதிகள் 2014 பிரிவு 29(1), 29(2) ஆகியவை சார்ந்தது ஆகும். ஒரு நிறுவனத்தின் பெயரில் மாற்றங்கள் ஏதேனும் செய்வதாக இருந்தால், அவ்வாறான மாற்றங்கள் கம்பெனிகளின் சட்டம் 2013 பிரிவு நான்கின் உட்பிரிவுகள் (2) மற்றும் (3) ஆகியவைகளுக்கு உட்பட்டு இருக்க வேண்டும்.

கம்பெனியின் பெயர் மாறுதலுக்கு பிறகான கம்பெனியைப் பதிவு செய்ததற்கான புதிய பதிவு சான்றிதழை படிவம் எண் ஐஎன்சி-25 வாயிலாக வழங்கப்படும். இதற்கான படிமுறைகள் பின்வருமாறு,

பெயர் மாற்றம் செய்ய விரும்புவோர் கம்பெனிகளின் விவாகாரத் துறைக்கான (Ministry of Corporate Affairs( MCA) ) இணைய பக்கத்தில் முதலில் ஒரு புதிய பயனாளராக பதிவு செய்து கொள்ள வேண்டும். பின்னர் பின்வரும் படிமுறைகளைப் பின்பற்ற வேண்டும்.

கம்பெனியின் பெயரை மாற்றி அமைக்க முடிவு செய்த உடன், கம்பெனியின் பெயர் மாற்றத்திற்கு தேவையான தீர்மானத்தை அந்த கம்பெனியின் இயக்குநர்களின் குழுக் கூட்டத்தில் நிறைவேற்ற வேண்டும். ஆயினும் கம்பெனிகளின் பதிவாளர் ஒப்புதல் அளிப்பதற்கு ஏற்ப கம்பெனியின் புதிய பெயரை இயக்குநர்களின் குழு பரிசீலனை செய்து முடிவு செய்ய வேண்டும்.

Also read: விற்பனையும், மார்க்கெட்டிங்கும் ஒன்றா? வேறுவேறா?

இயக்குநர் குழுவினால் (போர்டு ஆஃப் டைரக்டர்கள்) இவ்வாறு பெயர் மாற்றம் செய்வதற்கு தேவையான தீர்மானத்தை நிறைவேற்றிய பின்னர், நிறுவனத்தின் பதிவாளரால் அங்கீகரிக்கப்பட்ட எம்சிஏ (MCA) இணைய பக்கத்தில் கம்பெனி பெயர் ஒதுக்கீடு பெறுவதற்கான ஆர்யுஎன் (RUN) என்று சுருக்கமாக அழைக்கப்படும். ஒருங்கிணைந்த பெயர் ஒதுக்கீடு சேவையின் (Reserve Unique Name service ) வாயிலாக அந்த கம்பெனிக்கான புதிய பெயரை பெற்றுக் கொள்ளலாம். அதனால் முதலில் இந்த ஆர்யுஎன் எனும் சேவையின் மூலம் நம் கம்பெனிக்கான புதிய பெயர் வேண்டி விண்ணப்பிக்கவும், அவ்வாறு விண்ணப்பிக்கும் போது பின்வரும் கடேட்டாக்களை நிரப்ப வேண்டும்.

நியூ ரெக்வெஸ்ட் (New Request) எனும் வாய்ப்பை தேர்வு செய்ய வேண்டும். என்டிட்டி டைப் (Entity type) என்பதில் கீழிறங்கு பட்டியலின் வாயிலாக கம்பெனியின் வகையை தேர்வு செய்ய வேண்டும். சிஐஎன் (CIN) இதில் பெயர் மாறுதல் செய்ய விருக்கும் கம்பெனியின் சுட்டி எண்ணை உள்ளீடு செய்ய வேண்டும். பிரப்போஸ்டு நேம்ஸ் (Proposed Names) இதில் புதியதாக தேர்வு செய்யப்பட்ட பெயர்கள் அதிக பட்சம் இரண்டு பெயர்களை மட்டும் உள்ளீடு செய்ய வேண்டும்.

அடுத்து கமென்ட் செக்ஷன் (Comment section). இதில் கம்பெனியின் நோக்கங்களை பற்றி ஒரு வரிக்குள் குறிப்பிட வேண்டும். சூஸ் ஃபைல் டேப் (Choose file Tab) இயக்குநர்களின் குழுக் கூட்டத்தில் பெயர் மாறுதல் செய்வதற்காக நிறைவேற்றப்பட்ட தீர்மான நகலை கண்டிப்பாக இதில் இணைக்க வேண்டும். இந்த நிலையில் பின்வரும் கருத்துகளை மனதில் கொள்ள வேண்டும்.

நம்மால் தேர்ந்து எடுக்கப்பட்ட பெயர்கள் தனித்துவம் மிக்கதாக ஏற்கனவே உள்ள கம்பெனிகளின் பெயர்கள் அல்லது பதிவு செய்யப்பட்ட வணிக முத்திரைகளாக இல்லாமல் வேறுபட்டதாக இருக்க வேண்டும். ஆர்யுஎன் எனும் இணைய சேவையை பயன்படுத்திக் கொள்வதன் மூலம் நம் விருப்பப்படி, அதிக பட்சமாக இரண்டு பெயர்களைப் மட்டுமே பெற முடியும். இந்த நிலையில் பொருத்தமான பெயர்கள் கிடைக்க வில்லை எனில், மீண்டும் புதிய பெயர்களை தேர்வு செய்வதற்காக மற்றொரு முறை மட்டுமே விண்ணப்பிக்க அனுமதிக்கப்படும். அதாவது இரண்டு வாய்ப்புகள் மட்டுமே இந்த சேவை பெயரை தேர்வு செய்துக் கொள்ள அனுமதிக்கும். அதற்கு மேல் அனுமதிக்காது.

ஆர்ஓசி (ROC) என சுருக்கமாக அழைக்கப்படும் கம்பெனிகளின் பதிவாளரால் கம்பெனியின் பெயர் அங்கீகரிக்கப்பட்ட பின்னர் அதிக பட்சமாக இருபது நாட்களுக்கு மட்டும் நமக்கான ஒதுக்கீடாக அனுமதிக்கப்படும். அதன் பின்னர் இந்த பெயருக்கான அங்கீகாரம் திரும்பப் பெறப்படும் மீண்டும் புதியதாகத்தான் விண்ணப்பிக்க வேண்டும்.

கம்பெனிகளின் பதிவாளரால் கம்பெனியின் பெயர் அங்கீகரிக்கப்பட்ட உடன் இஜிஎம் (EGM) என சுருக்கமாக அழைக்கப்படும் உறுப்பினர்களின் அசாதாரண பொதுப் பேரவைக் கூட்டத்தை கூட்டி, அதில் இவ்வாறு கம்பெனியின் பெயர் மாறுதல் செய்வதற்கு தேவையான சிறப்புத் தீர்மானத்தை நிறைவேற்ற வேண்டும். மேலும், இவ்வாறு பெயர் மாறுதலை MOA, AOA ஆகிய கம்பெனியின் அடிப்படை ஆவணங்களில் தேவையான திருத்தம் செய்வதற்காக பொதுப் பேரவையின் ஒப்புதல் பெற வேண்டும். ஒப்புதல் பெற்ற பின்னர், பின்வரும் இரண்டு மின்னணு படிவங்களை ஆர்ஓசி என சுருக்கமாக அழைக்கப்படும் கம்பெனிகளின் பதிவாளரிடம் வழங்க வேண்டும்.

முதல் படிவமாக மின்னணு படிவம் எண் எம்ஜிடி (MGT-14) என்பதை அசாதாரண பொதுப் பேரவைக் கூட்டத்தில் சிறப்பு தீர்மானம் நிறைவேற்றப்பட்டு ஒப்புதல் பெற்ற முப்பது நாட்களுக்குள் ஆர்ஓசி இடம் எம்சிஏ இணைய பக்கத்தின் வாயிலாக வழங்கி ஒப்புதல் பெற வேண்டும். இவ்வாறான முதல் மின்னணு படிவம் எண் எம்ஜிடி-14-ஐ வழங்கும் போது பின்வரும் ஆவணங்களுடன் இணைத்து வழங்க வேண்டும்.

அசாதாரண பொதுப் பேரவைக் கூட்டத்திற்கான இஜிஎம் அழைப்பு அறிவிப்பு. அசாதாரண பொதுப் பேரவைக் கூட்டத்தில் இஜிஎம் பெயர் மாறுதல் செய்வதற்காக நிறைவேற்றப் பட்ட சிறப்பு தீர்மான நகல்.

பெயர் திருத்தம் செய்யப்பட்ட பின்னரான MOA,AOA ஆகிய கம்பெனியின் அடிப்படை ஆவணங் களின் நகல்கள்.

– இவ்வாறு இணைக்கும் அனைத்து ஆவணங்களும் பிடிஎஃப் (Pdf) வடிவமைப்பில் இணைக்க வேண்டும்.

மின்னணு படிவம் எண் எம்ஜிடி-14 ஐ தேவையான ஆவணங்களுடன் ஆர்ஓசி இடம் எம்சிஏ இணைய பக்கத்தின் வாயிலாக வழங்கிய பின்னர் ஆர்ஓசி ஆனவர் அதனை சரி பார்த்து இதற்கு ஒப்புதல் வழங்குவார். அவ்வாறான ஒப்புதல் பெறப்பட்ட பின்னர் மற்றொரு மின்னணு படிவம் எண் ஐஎன்சி-24 என்பதை இரண்டாவது படிவமாக அசாதாரண பேரவைக் கூட்டத்தில் சிறப்பு தீர்மானம் நிறைவேற்றப்பட்டு ஒப்புதல் பெற்ற முப்பது நாட்களுக்குள் ஆர்ஓசி இடம் எம்சிஏ இணைய பக்கத்தின் வாயிலாக வழங்க வேண்டும்.

இவ்வாறான இரண்டாவது மின்னணு படிவம் எண் ஐஎன்சி-24 ஐ வழங்கும் போது பின்வரும் ஆவணங்களுடன் இணைத்து வழங்க வேண்டும்.

அசாதாரண பொதுப் பேரவைக் கூட்ட இஜிஎம் நடவடிக்கை குறிப்புகளின் நகல்.

அசாதாரண பொதுப் பேரவைக் கூட்டத்திற்கான இஜிஎம் அழைப்பு அறிவிப்பு.

அதனைத் தொடர்ந்து நடைபெற்ற அசாதாரண பொதுப் பேரவைக் கூட்டத்தில் இஜிஎம் பெயர் மாறுதல் செய்வதற்காக நிறைவேற்றப்பட்ட சிறப்பு தீர்மான நகல்.

அதன் உடன் பெயர் திருத்தம் செய்யப்பட்ட பின்னரான விளிகி ,கிளிகி ஆகிய கம்பெனியின் அடிப்படை ஆவணங்களின் நகல்கள்.

இவ்வாறு இணைக்கும் அனைத்து ஆவணங்களும் பிடிஎஃப் வடிவமைப்பில் இணைக்க வேண்டும்.

மேலே கூறிய தேவையான ஆவணங்கள் தயாராக இருக்கின்றது எனில் மின்னணு படிவம் எண் எம்ஜிடி-14, மின்னணு படிவம் எண் ஐஎன்சி-24 ஆகிய இரண்டு மின்னணு படிவங்களையும் எம்சிஏ இணைய பக்கத்தில் இருந்து பதிவிறக்கம் செய்து மிகச் சரியாக நிரப்ப வேண்டும். அவ்வாறு நிரப்புவதற்கான விளக்க குறிப்புகள் பின்வருமாறு,

மின்னணு படிவம் எண் எம்ஜிடி-14

முதலில் கம்பெனியின் பதிவு எண்ணை சிஐஎன் (CIN) உள்ளீடு செய்து தேவையான அனைத்து விவரங்களையும் நிரப்ப வேண்டும். அசாதாரண பொதுப் பேரவைக் கூட்டத்தில் நிறைவேற்ற பட்ட தீர்மானத்தை பதிவு செய்வதற்கான தேர்வுசெய் பெட்டிகளை நிரப்ப வேண்டும். அசாதாரண பொதுப் பேரவைக் கூட்டத்திற்கான இஜிஎம் அழைப்பு, அறிவிப்பு விவரங்களையும் அவைகளை அனுப்பிய நாளையும் சிறப்புத் தீர்மானம் நிறைவேற்றப்பட்ட நாளையும் நிரப்ப வேண்டும்.

சிறப்பு தீர்மான விவரங்கள் தொடர்பு உடைய சட்டப் பிரிவு, அதற்கான நோக்கம், தீர்மான விவரங்கள் ஆகியவற்றை நிரப்ப வேண்டும். தீர்மானத்துக்கு ஒப்புதல் வழங்குவதற்கான உரிமை பெற்றவர்கள் சாதாரண தீர்மானமா அல்லது சிறப்புத் தீர்மானமா என்பதற்கான தேர்வுசெய் பெட்டியை தேர்வு செய்ய வேண்டும். ஏற்கெனவே குறிப்பிட்ட ஆவணங்களை இந்த படிவத்துடன் இணைக்க வேண்டும்.

இந்த படிவத்தில் கையொப்பமிட அங்கீகரிக்கப்பட்ட இயக்குநரின் டிஜிட்டல் கையொப்பத்துடன் அதனை CA அல்லது CS அல்லது CMA ஆகியோர்களுள் ஒருவரால் அளிக்கப் பட்ட சான்றுடன் வழங்க வேண்டும்.

மேலே கூறிய படிவத்தையும் ஆவணங்களையும் எம்சிஏ இணைய பக்கத்தில் பதிவேற்றம் செய்வதற்கு முன் இவை அனைத்தும் மிகச் சரியாக இருக்கின்றதா என மீண்டும் ஒருமுறை முழுவதுமாக முன் ஆய்வு செய்ய வேண்டும். பின்னர் இந்த மின்னணு படிவம் எண் எம்ஜிடி-14 ஐ. அதன் இணைப்புகளுடன் எம்சிஏ இணைய பக்கத்தில் பதிவேற்றம் செய்ய வேண்டும்.

இதன் பின்னர் மின்னணு படிவம் எண் எம்ஜிடி-14 உம் அதன் இணைக்கப்பபட்ட ஆவணங்களையும் முழுவதுமாக ஆர்ஓசியால் ஆய்வு செய்யப்பட்டு சரியாக இருக்கின்றது எனில் இதற்கு ஒப்புதல் வழங்குவார். இதனை தொடர்ந்து மின்னணு படிவம் ஐஎன்சி-24 ஐ பின்வருமாறு தயார் செய்ய வேண்டும்.

மின்னணு படிவம் எண் ஐஎன்சி-24:

கம்பெனியின் பதிவு எண்ணை சிஐஎன் உள்ளீடு செய்து தேவையான அனைத்து விவரங்களையும் நிரப்ப வேண்டும். கம்பெனியின் புதிய பெயர் ஒப்புதல் பெறுவதற்கான ஆர்ஓசி இடம் வழங்கிய தனித்துவமான பெயர் ஒதுக்கீட்டிற்காக ஆர்யூஎன்-இல் விண்ணப்பித்த போது உருவான சேவை கோரும் எண்ணை (Service request number (SRN)) உள்ளீடு செய்ய வேண்டும். மேலும் தேவையான விவரங்களை உள்ளீடு செய்ய வேண்டும்.

Also read: செயற்கை நுண்ணறிவு மூலம் விசால் சிக்கா செய்த மாற்றங்கள்

பெயர் மாறுதல் செய்வதற்கான முழுமையான காரண விவரங்களை குறிப்பிட வேண்டும். மேலும், சிறப்பு தீர்மானம் நிறைவேற்றப்பட்ட நாளையும், மின்னணு படிவம் எண் எம்ஜிடி-14ஐ ஆர்ஓசி இடம் வழங்கப்பட்ட நாளையும் குறிப்பிட வேண்டும். ஏற்கனவே கம்பெனியை பதிவு செய்யும் போது வழங்கப்பட்ட கம்பெனிப் பதிவு சான்றிதழில் குறிப்பிட்டு உள்ள கம்பெனியின் பெயரை குறிப்பிட வேண்டும். அது மட்டும் இன்றி பின்வரும் விவரங்களை மிகச் சரியாக நிரப்ப வேண்டும்.

அசாதாரண பொதுப் பேரவைக் கூட்டத்தில் கலந்து கொண்ட உறுப்பினர்களின் எண்ணிக்கை, அவர் களின் பங்குகளின் எண்ணிக்கை விவரங்களை குறிப்பிட வேண்டும். சிறப்புத் தீர்மானம் நிறைவேற்றுவதில் கலந்து கொண்டு ஓட்டு எடுப்பில் சிறப்புத் தீர்மானத்திற்கு ஆதரவாக வாக்களித்த உறுப்பினர்களின் எண் ணிக்கை, அவர்களின் பங்குகளின் எண் ணிக்கை விவரங்களை குறிப்பிட வேண்டும். சிறப்புத் தீர்மானம் நிறை வேற்றுவதில் கலந்து கொண்டு ஓட்டு எடுப்பில் சிறப்புத் தீர்மானத்திற்கு எதிராக வாக்களித்த உறுப்பினர்களின் எண்ணிக்கை, அவர்களின் பங்குகளின் எண்ணிக்கை விவரங்களை குறிப்பிட வேண்டும்.

சிறப்புத் தீர்மானம் நிறைவேற்றுவதில் கலந்து கொண்டு ஒட்டு எடுப்பில் கலந்து கொள்ளாத உறுப்பினர்களின் எண் ணிக்கை, அவர்களின் பங்குகளின் எண் ணிக்கை விவரங்களை குறிப்பிட வேண்டும். ஏற்கெனவே குறிப்பிட்டு உள்ள ஆவணங்களை இந்த படிவத்து டன் இணைக்க வேண்டும். இந்த படிவத்தில் கையொப்பமிட அங்கீகரிக்கப் பட்ட இயக்குநரின் டிஜிட்டல் கையொப்பத்துடன் அதனை CA அல்லது CS அல்லது CMA ஆகியோர்களுள் ஒருவரால் அளிக்கப்பட்ட சான்றுடன் வழங்க வேண்டும்.

மேலே கூறிய படிவத்தையும் ஆவணங்களையும் எம்சிஏ இணைய பக்கத்தில் பதிவேற்றம் செய்வதற்கு முன் இவை அனைத்தும் மிகச் சரியாக இருக்கின்றதா, என மீண்டும் ஒரு முறை முழுவதுமாக முன் ஆய்வு செய்ய வேண்டும்.

பின்னர் இந்த மின்னணு படிவம் எண் ஐஎன்சி-24 ஐ அதன் இணைப்புகளுடன் எம்சிஏ இணைய பக்கத்தில் பதிவேற்றம் செய்ய வேண்டும். இதன் பின்னர் மின்னணு படிவம் எண் ஐஎன்சி-24 உம் அதன் இணைக்கப்பட்ட ஆவணங் களையும் முழுவதுமாக ஆர்ஓசியால் ஆய்வு செய்யப்பட்டு சரியாக இருக்கின் றது எனில் படிவம் எண் ஐஎன்சி-25 இன் வாயிலாக கம்பெனிக்கான புதிய பெயர் உடன் இந்த கம்பெனியை பதிவு செய்ததற்கான சான்றிதழை வழங்குவார்.

கம்பெனியின் பெயரை மாற்றுவதற்கு உரிய கட்டணங்களை செலுத்த வேண்டும் என்பதை மனதில் கொள்ளவும்.

– முனைவர் ச. குப்பன்

இயக்குநர்களிடம் இருந்து கடன் பெற முடியுமா?

Valar
-
0
இயக்குநர்களிடம் இருந்து கடன் பெற முடியுமா?

பதிவு பெற்ற இந்திய நிறுமங்களால் (பப்ளிக் லிமிடெட், பிரைவேட் லிமிடெட்) தங்கள் இயக்குநர்களுக்குக் கொடுக்கப்பட்ட கடன்களைப் பற்றி மட்டுமே இதுவரை பேசப்பட்டு வந்துள்ளன. ஆனால் தாம் பதவி வகிக்கும் நிறுமங்களுக்கே கடன்களை வழங்கிய இயக்குநர்களைப் பற்றிய செய்திகள் இப்போதுதான் அங்கொன்றும், இங்கொன்றுமாக வந்து கொண்டு உள்ளன.

இவ்வாறு நிறுமங்களுக்கு இயக்குநர்கள் கடன் வழங்குவது குறித்த சந்தேகங்களைத் தவிர்ப்பதற்கு, அண்மைய திருத்தப்பட்ட நிறுமங்களின் சட்டம் (கம்பெனி சட்டம்) 2013 – இன் படி இயக்குநர்களிடம் இருந்து நிறுமங்கள் ஃபிக்சட் டெப்பாசிட், கடன் ஆகிய இரு வழிகளில் ஏதேனும் ஒரு வகையில் தொகையைப் பெறலாம்.

இயக்குநர்களிடம் இருந்து பெறப்படும் கடன்களை பொதுவாக இயக்குநரின் சொந்த நிதியில் இருந்து பெறப்பட்ட தொகை மற்றும் தாம் பெற்ற கடன் நிதியில் இருந்து பெறப்பட்ட தொகை என்று இரண்டு பிரிவுகளாக வகைப் படுத்தலாம்

Also read: யாராவது சொல்லுங்களேன்!

நிறுமம் நிறுமங்களின் சட்டம் 2013 பிரிவு 180 இன் கீழ் பொருந்துமாறு கடன் பற்றிய தகவல்கள் இயக்குநரின் அறிக்கை மற்றும் நிறுவனத்தின் நிதிநிலை அறிக்கை கள் ஆகியவற்றில் தக்க குறிப்புகளுடன் வெளிப்படுத்தப்பட வேண்டும்..

இயக்குநர் கடன் வாங்கிய தொகைகளில் பெறப்பட்ட தொகை

இதன் கீழ் இயக்குநர் ஒரு பங்குநர் அல்லாத சூழ்நிலை, இயக்குநர் ஒரு பங்குநராக உள்ள சூழ்நிலை ஆகிய இரு வகைகள் உள்ளன.

இயக்குநர் ஒரு பங்குநர் அல்லாத சூழ்நிலையில், அவரிடம் இருந்து பெறப்பட்ட தொகை நிறுமங்களின் சட்டம் 2013 பிரிவு 76 – ன் விதிமுறைகளுக்குள்ளும், வைப்புகளை ஏற்றுக் கொள்ளும் விதிமுறைகள் 2014 உடனும் வருகின்றன. நிகர சொத்து மதிப்பு ரூ. 100 கோடி அல்லது அந்நிறுமத்தின் விற்பனை வருமானம் ரூ. 500 கோடி ஆக உள்ள ஒரு பொது நிறுமத்தால் (பப்ளிக் லிமிடெட்) மட்டுமே ஃபிக்சட் டெப்பாசிட் தொகையை பெற முடியும்.

நிறுமங்களின் சட்டம் 2013 பிரிவு 76 இன்படி ஒவ்வொரு ஆண்டும் கடன் தகுதி மதிப்பீட்டை (credit rating) பெறவும், வைப்புத் தொகைக்கு குறையாமல் அந்நிறுமங்களின் சொத்துகளைப் பொறுப்பு ஏற்பதற்காக பதிவாளரிடம் அந்த சொத்துகளின் மீது பொறுப்பு உருவாக்கி (create a charge) பதிவு செய்ய வேண்டும்.

இயக்குநர் ஒரு பங்குநர் எனும் சூழ்நிலையில், பெறப்பட்ட தொகை ஃபிக்சட் டெப்பாசிட் ஆக கருதப்படுகின்றது.

நிறுமங்களின் சட்டம் 2013 பிரிவு 180, படி ஒரு நிறுமம், தம் இயக்குநர்களிடம் இருந்து கடன் பெற, அந்த நிறுமத்தின் பங்குநர்களின் பொதுப் பேரவை கூட்டத்தில் ஒரு சிறப்புத் தீர்மானத்தை நிறைவேற்றி இருக்க வேண்டும். (அவ்வாறான சிறப்பு தீர்மானம், படிவம் MGT-14 – இன் கீழ் நிறுமங்களின் பதிவாளருக்கு வழங்கி இருக்க வேண்டும்.).

Also read: அடல் பென்ஷன் திட்டம்

ஏற்கனவே வங்கிகளிடம் இருந்து பெறப்பட்ட கடன்கள் மட்டும் அல்லாமல், நிறுமத்தின் பெறப்பட்ட பங்கு மூலதனம் (paid-up share capital), ஒதுக்கீடுகள் (free reserves) மற்றும் பத்திரங்களின் பிரீமியம் (securities premium) ஆகியவற்றின் மொத்த மதிப்பை விட கூடுதலாக கடன் பெறுவதற்காக இந்த சிறப்பு தீர்மானம் நிறைவேற்றப்பட்டு இருக்க வேண்டும்

இருப்பினும் 05.06.2015 தேதியிட்ட நிறுமங்களின் சட்டம் 2013 பிரிவு 180 இற்கான அறிவிப்பு, பிரைவேட் லிமிடெட்-க்கு பொருந்தாது. எனவே, இவை, பிரிவு 180 – ன் கீழ் ஒரு சிறப்புத் தீர்மானத்தை நிறைவேற்றுவதோடு மட்டும் அல்லாமல், வைப்புத் தொகையை ஏற்றுக் கொள்ள முடியும். அனைத்து பப்ளிக் லிமிடெட் நிறுவனங்களும், நிறுமங்களின் சட்டம் 2013 பிரிவு 180 படி சிறப்புத் தீர்மானத்தின் வாயிலாக மட்டுமே இயக்குநர்களிடம் இருந்து கடன் பெறமுடியும்.

– முனைவர் ச. குப்பன்

அமெரிக்காவில் வீடு கட்டும் தொழிலில் ஈடுபடும் சீனர்கள்

Valar
-
0
அமெரிக்காவில் வீடு கட்டும் தொழிலில் ஈடுபடும் சீனர்கள்

வீடு என்பது மனிதனுக்கு அடிப்படைத் தேவை; பொருளாதார வளர்ச்சியின் அளவீடு அது! தனி மனிதரின் பொருளாதார வளர்ச்சியை மட்டுமல்லாமல் நாட்டின் பொருளாதார வளர்ச்சியையும் வீட்டுவசதி வெளிப் படுத்துகிறது. அமெரிக்க ஐக்கிய நாட்டில் ஒவ்வொரு குடும்பத்துக்கும் ஒரு வீடு கிடைப்பதை அரசு உறுதிப்படுத்துகிறது.

இரண்டாம் உலகப் போரினால் ஏற்பட்ட பொருளாதார இழப்புகளில் இருந்து மக்கள் மீண்டு வர வீடு கட்டும் கட்டுமான தொழில் பயன்பட்டது. 1949ஆம் ஆண்டு இதற்காகச் சட்டம் இயற்றப்பட்டு குறைந்த வருவாய்ப் பிரிவினருக்கு அரசே வீடு கட்டும் தொழிலில் ஈடுபட்டது.

நிலம் அரசின் கட்டுப்பாட்டில் உள்ளது. மக்கள் விவசாயத்துக்கும், குடியிருப்புகள் கட்டவும் மற்றும் தொழிற்சாலைகளுக்கும் நிலத்தை வாங்கிப் பயன்படுத்திக் கொள்ளலாம். நிலத்தை குடியிருப்புப் பகுதி, வணிகப் பகுதி, தொழிற்சாலைப் பகுதி, காடுகள் என வரையறை செய்து உள்ளார்கள். இவற்றை மாற்றுவதற்கு அனுமதிப்பது இல்லை.

குடியிருப்புகளின் குறைந்த பட்ச அளவை, அடுக்குமாடி மற்றும் தனிவீடுகளுக்கு அரசே நிர்ணயிக்கிறது. தனி வீடுகளையும் அரசு அல்லது குழுமங்கள் கட்டுவதால் நாடு முழுவதும் அவை ஒன்று போலவே தோற்றம் அளிக்கின்றன. அடுக்குமாடி வீடுகளின் குறைந்த பட்ச அளவு 700 சதுர அடி என உள்ளது. மாநிலத்துக்கு மாநிலம் சிறிய வேறுபாடு இருக்கலாம். வசதி படைத்தவர் வீடு, மற்றவர் வீடு என்பதை வீட்டின் உள்புறம் உள்ள வண்ணப் பூச்சுகள், அறைகலன்கள் போன்றவை காட்டும்.

Also read: தூக்கி விட்ட வீட்டு மனை விற்பனை!

நியூ ஜெர்சி மாநிலத்தில் வீடுகளின் தேவை அதிகப்பட்டதால் அண்மையில் இந்த குறைந்தபட்ச அளவை 590 சதுர அடி என குறைத்து உள்ளார்கள். 2016 செய்தி மூலம் ஐந்து ஆண்டுகளில் வீடுகளின் பற்றாக்குறை தீர்த்து விடும் என கணிக்கப்படுகிறது. வீட்டுத்தேவை என்பதை ஐந்து வயதுக்கு மேற்பட்ட குழந்தைகளின் எண்ணிக்கையை வைத்து திட்டமிடுகிறார்கள். அடுக்குமாடி குடியிருப்புகள் ஆனாலும், தனி வீடுகளானாலும் சட்டம் ஒட்டிய நிறுவனங்களே அவற்றைப் பராமரிக்க வேண்டும்.

இதனால் வீடு கட்டும் குழுமங்கள் நிரந்தரமாக, தேவையான பணியாளர் களுடன் இயங்குகின்றன. கட்டி முடித்ததும் பராமரிப்பது வாங்கியவர் களின் வேலை என விட்டு ஓட முடியாது. இதனால் கட்டிடங்கள் நல்ல முறையில் கட்டப்படுகின்றன. வாங்கியவர்கள் நீதிமன்றங்களுக்கு அலைய வேண்டியது இல்லை.

நியுஜெர்சி மாநிலத்தில் மால்டன் எனும் நகரில் கட்டப்படும் குடியிருப்புகள் தனி வீடுகளானாலும், அடுக்குமாடி குடியிருப்புகள் ஆனாலும் அடித்தளத் துக்கு மட்டுமே காங்க்ரீட் பயன்படுத்தப் படுகிறது. அதற்கு மேல் இரும்பு பாளங்களால் ஆன தூண்கள் தேவைப்படும் இடங்களில் நிறுவப் படுகின்றன. சுவர்கள் மரச் சட்டங் களாலும், ஒட்டுப் பலகையாலும் (Plywood) எழுப்பப்படுகின்றன. மேல் தளமும் மரத்தால் போடப்படுகிறது.

1949 முதல் நம் நாட்டின் வீட்டு வசதி வாரியம் போலத் துறைகளை அமைத்து அடுக்குமாடி குடியிருப்புகளை அரசு கட்டியது. நடுத்தர வருவாய் மற்றும் குறைந்த வருவாய்ப் பிரிவினர் இவற்றால் பயன்பெற்றனர். 1965க்குப் பின்னர் வீடு கட்டும் குழுமங்களுக்கு (Real Estate Companies) வங்கிகள் மூலம் கடன் கொடுத்து தொழில் ஊக்கப்படுத்தப் பட்டது; குறைந்த வட்டிக் கடன் (Subsidised Debit Services) முறை பயன்பட்டது.

1990 இல் எடுக்கப்பட்ட ஒரு புள்ளி விவரப்படி அரசுத் துறைகள் கட்டிய வீடுகள் 43 இலட்சம் இருந்ததாகத் தெரிகிறது. 1990 -க்குப் பின்னர் தனியார் குழுமங்கள் ஊக்கப்படுத்தப்பட்டன. ஆயினும், குறைந்த வருவாய் பிரிவினருக்கு அரசு மானியம் கொடுக்கிறது. வீடுகளை இந்தக் குழுமங்கள் விலைக்கும் கொடுக்கின்றன, வாடகைக்கும் விடுகின் றன. எனவே, பலரும் வாடகைக் குடியிருப்புகளில் மனநிறைவு அடைகின் றனர்.

அங்கு பழக்கத்தில் உள்ள காப்புரிமை எண் (Social Security Number) மூலம் குடிமக்களது வீட்டு வசதி கண்டறியப் படுகிறது.

நிலம், வீட்டின் தேவை, அளவு, வகை எல்லாவற்றையும் அரசு கட்டுப் படுத்துவதால் இயற்கை வளங்கள் பாதுகாக்கப்படுகின்றன. மரம், சிமென்ட், மணல், செங்கல் போன்றவற்றைப் பதுக்குவது மற்றும் மணல் கொள்ளை போன்றவை தவிர்க்கப்படுகின்றன. நிலத்தை காலி மனைகளாகப் பிரிக்க முடியாது என்பதால் விளை நிலங்களும், காடுகளும் பாதுகாக்கப் படுகின்றன. இவற்றில் அரசியல் ஒரு தொழிலாக மாறவில்லை.

பணக்கார நாடான அமெரிக்காவில் குடிசை வாசிகளும், நடைபாதை வாசிகளும் உள்ளனர். வறுமைக் கோட்டுக்குக் கீழே வாழும் மக்களும் உள்ளனர். பிச்சைக்காரர்களையும் பார்க்க முடியும். ஆனால் இவர்களின் எண்ணிக்கை குறைவாகவே உள்ளது. 2017 ஆம் ஆண்டின் புள்ளி விவரக் கணக்கின் படி 2% மக்கள், சுமார் மூன்று முதல் நான்கு இலட்சம் பேர் வறுமைக் கோட்டின் கீழ் உள்ளனர்.

Also read: தனி வீடு வாங்க ஆர்வம் காட்டுவது ஏன்?

ஒருவர் மாதம் இரண்டாயிரம் டாலருக்குக் கீழ் வருவாய் உடையவராய் இருந்தால் வறுமைக் கோட்டின் கீழ் உள்ளனர் என கொள்ளப்படுகின்றார்.

வீடுகட்டும் தொழிலில் உள்ள கட்டுப்பாடுகளுக்கு உட்பட்டு ‘கட்டு மானக் குழுமங்களை’ நிறுவி தொழில் செய்யலாம்.. சீனர்கள் இங்கு வீடு கட்டும் தொழில் செய்கிறார்கள். சுற்றுலாத் தலங்களில் தங்கும் சிறிய வீடுகளைக் கட்டுகிறார்கள். 100 சதுர அடி முதல் 300 சதுர அடி வரை உள்ள வீடுகளை சீனர்கள் வடிவமைத்து நல்ல வருமானம் ஈட்டுகிறார்கள். சக்கரங்கள் பொருத்தி காருடன் இழுத்துச் செல்லும் வீடுகளைக் கூட தயாரிக்கிறார்கள்.

சீனாவில் இருந்து தொழிலாளர்களை அழைத்து வந்து தொழில் செய்ய சீன அரசு அமெரிக்க அரசுடன் ஒப்பந்தம் செய்து உள்ளது.

– நாஞ்சில் நடராசன்

ரியல் எஸ்டேட் – போக்கியம், ஒத்தி இரண்டும் ஒன்றுதானா?

Valar
-
0
ரியல் எஸ்டேட் – போக்கியம், ஒத்தி இரண்டும் ஒன்றுதானா?

சொத்தை அடமானம் வைத்து கடன் வாங்கினேன் என்று சொல்வதை நம் அன்றாட வாழ்வில் பலரிடம் கேட்டு இருப்போம். போக்கியத்திற்கு விட்டு பணம் வாங்கினேன் என்று காஞ்சிபுரம் திருவண்ணாமலை பகுதிகளில் சொல்வார்கள். அடமான பத்திரங்களில், ரூபாய் இரண்டு லட்சத்திற்கு போக்கிய பத்திரம் என்று பதிவும் செய்து இருப்பார்கள்.

திருநெல்வேலி, மதுரை பக்கங்களில் ஒத்திக்கு விட்டு இருக்கிறேன் என்பார்கள். பத்திரங்களில் ஒத்தி தொகை, ஒத்தி கெடு, ஒத்தி சொத்து, ஒத்தி பத்திரம் என்றே குறிப்பிடுவார்கள். பலர் ஒத்தி வேறு, போக்கியம் வேறு மற்றும் அடமானம் வேறு என்று நினைத்து கொண்டு இருக்கிறார்கள். ஆனால் உண்மையில் இரண்டும் ஒன்று தான்.

இந்த அடமானம் நான்கு வகையாக நம் தமிழகத்தில் நடைமுறையில் இருக்கிறது. சாதாரண அடமானம், ஈட்டு அடமானம், சுவாதீன அடமானம் மற்றும் பத்திர வைப்பு அடமானம் என்பனவாகும்

சாதாரண அடமானம்

ஒரு தொகையை கடன் வாங்கும் போது தன் சொத்தை அடமானம் எழுதி கொடுத்து வாங்குவது ஆகும். அதில், மாதம் தோறும், அல்லது ஆண்டு தோறும் கொடுக்க வேண்டிய வட்டி மற்றும் அசல் திருப்பி கொடுக்க வேண்டிய கெடு தேதி குறிப்பிடப்பட்டு இருக்கும்..

அசலையும், வட்டியையும் கடன் வாங்கியவர்கள் திருப்பிக் கொடுக்காத போது இந்த பத்திரத்தை வைத்து நீதிமன்றத்தில் வழக்கு பதிவு செய்து, நீதிமன்றம் மூலம் சொத்தை அடமானம் போட்டவர் எழுதி வாங்கலாம் அல்லது ஏலத்தில் விற்பனைக்கு கொண்டு வரலாம்.

Also read: கிரய பத்திரம் எழுதி வாங்கும் போது கவனம் தேவை

ஈட்டு அடமானம்:

இது கடன் கொடுப்பவருக்கு மிகவும் சாதகமான அடமானம் ஆகும். சாதாரணமாக பணம் திரும்ப வரவில்லை என்றால் வக்கீல் நோட்டீஸ் அனுப்பி, நீதிமன்றம் போய் வழக்காடித்தான் சொத்தை எழுதி வாங்க முடியும்.

ஆனால் இந்த ஈட்டு அடமானத்தில் நேரடியாக அடமானம் போட்டவர் முன் அறிவிப்பு நோட்டீஸ் மட்டும் கொடுத்து விட்டு, பதிவு செய்யப்பட்ட ஏல கம்பெனி மூலம் ஏலத்திற்கு கொண்டு வந்து, சொத்தை சார்பதிவகத்தில் பதியலாம்.

நிறைய பேர் “ஈட்டு அடமானம்“ என்று எழுதி இருப்பார்கள். ஆனால் சொத்து மாற்று சட்டம் 69 பிரிவு எங்களை கட்டுப்படுத்தும் என்ற சட்டப்பிரிவை எழுதி இருக்க வேண்டும். இப்படி எழுதவில்லை என்றால் இது சாதாரண அடமானமாகவே கருதப்படும்.

சுவாதீன அடமானம்:

ஒரு சொத்தில் இருந்து வாடகையோ வருமானமோ வரும். அதைப் பெறும் உரிமையை அப்படியே கடன் கொடுப்பவருக்கு குறிப்பிட்ட காலத்துக்கு கொடுத்து கடன் வாங்குவது சுவாதீன அடமானம். இந்த அடமானத்தில் வாங்கிய கடனை திருப்பி கொடுக்க தேவை இல்லை. கெடு தேதியில் சொத்தை அடமானம் கொடுத்தவரிடம் திருப்பி கொடுக்க வேண்டும். இதனை தான் போக்கியம் அல்லது ஒத்தி என்று கூறுகிறார்கள்.

இதில் முதலில் அடமானம் போட்டு கெடு தேதி 3 ஆண்டுகள் போட்டு விட்டார்கள். 2 ஆண்டுகள் முடிந்து விட்டன. சொத்து உரிமையாளருக்கு இப்பொழுது இன்னும் பணம் தேவைப்படுகிறது. அதனால் ஏற்கனவே சுவாதீன அடமானம் போட்டு இருப்பவரிடம் சென்று மீண்டும் ஒரு தொகையை பெற்று கொண்டு, போக்கியத்திற்கு மேல் போக்கியம் போடலாம்.

அதாவது முதல் போக்கியம் முடியும் முன்பே அதனை உள்ளடக்கி அதற்கு அடுத்த கெடு தேதி நிர்ணயித்து இன்னொரு போக்கியம் போடலாம்.

பத்திர ஒப்படைப்பு அடமானம்:

பெரும்பாலும் தொழில் செய்பவர்கள் அவசரத்திற்கு கடன் வாங்க கையில் இருக்கும் சொத்து பத்திரங்களை ஈடாக வைத்து கடன் பெறுவார்கள். அந்த கடனை வட்டியுடன் திருப்பிக் கொடுக்கும் போது சொத்து பத்திரங்களை மீட்டுக் கொள்ளலாம்.

இதனை பதிவு செய்ய வேண்டும் என்ற தேவை இல்லை. தற்போது வங்கிகள் வீட்டுக் கடன் கொடுக்கும் போது பத்திரங்களை வங்கி வைத்துக் கொண்டு இந்த அடமானம் போடுகிறார்கள். இதனை பத்திரப் பதிவு அலுவலகத்தில் பதிவும் செய்கிறார்கள். இந்த அடமானம் மாநகர் பகுதிகளில் மட்டுமே செல்லும் என்று சட்டம் சொல்கிறது.

Also read: ஏல சொத்துகளில் உள்ள, வெளியே தெரியாத செய்திகள்

கிராமங்களில் செல்லாது. எனவே சென்னை, மதுரை, கோவை, திருச்சி போன்ற நகரங்களில் இந்த பத்திர ஒப்படைப்பு அடமானப் பத்திரம் போடப்படுகிறது. சொத்தை அடமானம் கொடுப்பவர் பெரும்பாலும் பொருளாதார வலிமை குறைந்த நிலையிலும், அடமானம் பெறுபவர் பொருளாதாரத்தில் வலிமையான நிலையிலும் இருப்பார்கள்.

அதனால் அடமானம் கொடுப்பவருக்கு நெருக்கடி கொடுக்கும் கட்டுப்பாடுகள், அழுத்தங்கள் கொடுக்கும் வகையில் பொருத்தமற்ற விதிமுறைகளை அடமான பத்திரத்தில் எழுதுவதோ, அல்லது அடமான பத்திரத்திற்கு வெளியில் தனியாக பதிவு செய்யாமல் ஒரு ஒப்புதல் பத்திரம் எழுதுவதோ, நீதிமன்றத்தில் செல்லாது.

சில இடங்களில் கடன் கொடுத்து, அடமானம் பத்திரம் போடுவதற்கு பதிலாக, கொடுத்த கடன் தொடர்பாக கிரய பத்திரம் முன் கூட்டியே போடுகிறார்கள். பிறகு கடனை திருப்பிக் கொடுத்தவுடன் மறு கிரயம் செய்து கொடுக்கிறார்கள். அல்லது பவர் வாங்கி வைத்துக் கொள்கிறார்கள்.

இது போன்று கிரய பத்திரம் போட்டு கடன் வாங்குவது சொத்தை இழப்பதற்கு வழி வகுக்கும். அரசும் இது போன்ற தவறான நடைமுறைகளுக்கு எதிரான சட்டங்கள் இயற்ற வேண்டும். கடனில் இருப்பவர்களின் சொத்துகளை குறைந்த விலைக்கு வாங்குவதற்கு இதனை ஒர் உத்தியாகவே ஒரு சிலர் பயன்படுத்து கிறார்கள்.

பவர் கொடுத்து கடன் வாங்கி விட்டு, நீங்கள் சென்று விட்டால் பவரை வைத்து வேறு ஒரு சார்பதிவகத்தில், வேறு ஒரு சொத்துடன் இணைத்து கிரய பத்திரம் போட்டு வைத்துக் கொள்வார் கள். மேலும் பவரை வைத்து சேல்ஸ் அக்ரிமென்டும் போட்டு விடுவார்கள்.

பெரும்பாலும், கடன் கொடுப்பவர்கள் தங்கள் பணப் பாதுகாப்புக்காக இப்படி செய்கிறார்கள் என்று சொன்னாலும், சிலர் தவறாகப் பயன்படுத்துகிறார்கள் என்பதையும் நினைவில் கொள்ள வேண்டும். இரு சாராரும் எச்சரிக்கையுடனும், நாணயமாகவும் நடந்து கொண்டால் உறவு சுமுகமாக இருக்கும். இரு தரப்பாருக்கும் மனக்குறை மற்றும் பொருளாதார இழப்பு ஏற்படாமலும் இருக்கும்.

– சா. மு. பரஞ்சோதிபாண்டியன்

நாட்டுக் கோழி வளர்த்து நல்ல லாபம் பெறுவது எப்படி

Valar
-
0
நாட்டுக் கோழி வளர்த்து நல்ல லாபம் பெறுவது எப்படி

ப்ராய்லர் கோழிகளை வளர்ப்பதைப் போலவே நாட்டுக் கோழிகளை வளர்த்து விற்பனை செய்பவர்களும் அண்மைக் காலமாக அதிகரித்து வருவதைப் பார்க்க முடிகிறது. ப்ராய்லர் கோழிகளை விட நாட்டுக் கோழிகளின் இறைச்சியே உடலுக்கு நல்லது என கருதும் போக்கு மக்களிடையே கொஞ்சம் கொஞ்சமாக உயர்ந்து வருகிறது. இதன் காரணமாக நாட்டுக் கோழிகளின், நாட்டுக் கோழி முட்டைகளின் விற்பனையும் குறிப்பிடத் தக்க அளவு கூடி வருகிறது.

கன்னியாகுமரி மாவட்டம், பரம்புவிளையில் கேவிஎஸ் நாட்டுக் கோழிப்பண்ணை என்ற பெயரில் நாட்டுக் கோழிப்பண்ணை ஒன்றை நடத்தி வருகிறார், திரு. ஷிபின். அவரிடம் நாட்டுக் கோழி வளர்ப்பு பற்றிக் கேட்டபோது,

”நான் சிறுவனாக இருக்கும்போதே எங்கள் வீட்டில் சுமார் ஐம்பது கோழிகள் வளரும். பலரும் எங்கள் வீட்டுக்கு வந்து கோழிகளையும், முட்டைகளையும் வாங்கிச் செல்வார்கள். நல்ல லாபம் கிடைக்கும்.

நான் நான்கு ஆண்டுகளாக நாட்டுக் கோழிப்பண்ணை நடத்தி வருகிறேன். எங்கள் வீட்டில் இருந்து சுமார் ஒரு கிலோ மீட்டர் தொலைவில் வயல் பகுதியில் எங்கள் கோழிப் பண்ணை அமைந்து உள்ளது. வீடுகள் உள்ள பகுதியின் அருகிலேயே பண்ணையை வைத்தால், தூசுகள் காரணமாக கோழிகளுக்கு பாதிப்பு வர வாய்ப்பு உள்ளது. வயல்வெளிப் பகுதியில் பண்ணையை வைத்தால் மற்றவர்களுக்கும் எந்த இடைஞ்சலும் இருக்காது.

Also read: கால்நடைகள், கோழி வளர்ப்பு: சில பொதுவான செய்திகள்

கன்னியாகுமரி மாவட்டம் குளிர் கூடுதலாக உள்ள பகுதி என்பதால் இங்கு ப்ராய்லர் கோழிகள் நன்றாக வளர்வது இல்லை. அதனாலும் இங்கு நாட்டுக் கோழிப் பண்ணைகளே அதிகமாக உள்ளன.

பண்ணை தொடங்கிய காலத்தில் கோழி வளர்ப்பு தொடர்பான சில நுட்பங்கள் தெரியாததால், கொஞ்சம் கோழிகள் இறந்து விட்டன. அதன் பிறகு வேறு சில நணபர்களின் கோழிப் பண்ணைகளுக்கு சென்று அவர்களிடம் இருந்து நிறைய செய்திகளைத் தெரிந்து கொண்டேன். பண்ணையை தூய்மையாக வைத்து இருக்க வேண்டும். நோய்ப் பரவலைத் தடுக்க தரையில் சுண்ணாம்புத் தூள் தூவி வைத்து இருக்க வேண்டும். நோய்களால் பாதிக்கப்படும் கோழிகளை உடனுக்குடன் அப்புறப்படுத்தி விட வேண்டும். நோயால் பாதிக்கப்பட்ட கோழி சோர்வாக இருக்கும். தீவனம் எடுத்துக் கொள்ளாது. இந்த கோழிகளை பண்ணையிலேயே விட்டு வைத்து இருந்தால் இதன் எச்சத்தை மற்ற கோழிகள் மிதிப்பதன் மூலம் நோய் மற்ற கோழிகளுக்கும் பரவி விடும். லுசோட்டா என்ற ஒரு மருந்து இருக்கிறது. இந்த நோய்த் தடுப்பு மருந்தை மாதம்தோறும் கொடுத்து வந்தால் நோய் வராமல் பாதுகாத்துக் கொள்ள முடியும்.

கோழிகளுக்ககு அம்மை நோய் வராமல் தடுக்க தடுப்பு மருந்து உள்ளது. கோழிக் குஞ்சுகளுக்கு முப்பது நாள் ஆனவுடன் இந்த தடுப்பு மருந்து ஊசி போட்டு விட வேண்டும்.

கோழியின் எச்சம் வெள்ளையாக இருந்தால் அதை வெள்ளைக் காய்ச்சல் என்பார்கள். சிவப்பாக இருந்தால் ரத்தக் காய்ச்சல் என்பார்கள். அததற்க்கு தனித்தனியே மருந்து இருக்கிறது. இந்த மருந்துகளைக் கொடுத்து அந்த கோழிகளைக் காப்பாற்றி விடலாம். ஆர்டிஏகே என்ற ஒரு நோய் இருக்கிறது. இந்த நோய் வந்தால் கோழியைக் காப்பாற்றுவது மிகவும் கடினம். நோய் வந்து இறந்த கோழிகளை நான் இறைச்சி விற்பனைக்கு கொடுப்பது இல்லை. அவற்றை புதைத்து விடுவோம்.

கோழிகளுக்கு இடையே சண்டை வந்து காயங்கள் ஏற்பட்டால் அதன் மூலம் கோழிப் பண்ணையில் நாற்றம் வரும்; கோழிகள் இறந்து அதைக் கவனிக்காமல் விட்டாலும் மறுநாள் நாற்றம் வரும். உணவு செரிமானம் ஆகாமல் கோழிகள் வாந்தி எடுத்தாலும் நாற்றம் வரும். அந்த மாதிரி நேரங்களில் அந்த பகுதியை நன்றாக தூய்மை செய்து சுண்ணாம்புப் பொடி போட்டு விட்டால் நாற்றம் போய் விடும்.

நான் நாட்டுக் கோழிகளை மட்டுமே வளர்த்து வருகிறேன். ஆண்டுக்கு ஒரு கோழியிடம் இருந்து இருநூற்று ஐம்பது முட்டைகள் வரை கிடைக்கும். நாட்டுக் கோழி முட்டைகளுக்கு ப்ராய்லர் கோழி முட்டைகளை விட அதிக விலை கிடைக்கும். எங்களிடம் முட்டை வியாபாரிகள் எட்டு ரூபாய் வீதம் வாங்கிச் சென்று பத்து ரூபாய் அல்லது பன்னிரெண்டு ரூபாய் என்று விற்பனை செய்வார்கள்.

இரண்டாயிரம் சதுர அடியில் கொட்டகை அமைத்து இருக்கிறேன். தற்போது சுமார் இருநூறு கோழிகள் இருக்கின்றன. வேலைக்கு ஆட்களை யாரையும் வைத்துக் கொள்ளவில்லை. எல்லா வேலைகளையும் நானே பார்க்கிறேன்.

காலையில் ஏழு மணி முதல் எட்டு மணிக்குள் ஒரு முறையும், மாலை நான்கு மணி முதல் ஐந்து மணிக்குள் ஒரு முறையும் என இரண்டு வேளைகள் தீவனம் வைப்பேன். தீவனத்தை நானே தயாரித்துக் கொள்கிறேன். மக்காச் சோளம், உருட்டுக் கம்பு, வெள்ளைச் சோளம் ஆகியவற்றை தீவனமாகக் கொடுப்பேன்.

ஐம்பது கிலோ சோளம், ஐம்பது கிலோ அரிசித் தவிடு, ஐம்பது கிலோ தேங்காய்ப் புண்ணாக்கு, ஐம்பது கிலோ உருட்டுக் கம்பு, ஐந்து கிலோ கருவாடு, இரண்டு கிலோ சுண்ணாம்பு ஆகியவற்றைக் கலந்து அரைத்து வைத்துக் கொள்வேன். இந்த தீவனத்தில் நாட்டுக் கோழிகளுக்குத் தேவையான சத்துக்கள் அனைத்தும் இருக்கும். மதியம் மூன்று மணி அளவில் எல்லா கோழிகளையும் கூண்டில் இருந்து திறந்து விட்டு விடுவேன். ஐந்து மணி வரை வெளியே சுற்றி விட்டு தீவனம் வைத்த உடன் திரும்ப ஷெட்டுக்கே வந்து விடும்.

Also read: பண்ணையில் மீன் வளர்ப்பு

நூற்று இருபது நாட்களில் ஒரு கோழியின் எடை இரண்டரை கிலோ வந்து விடும். இந்த எடை வந்த உடன் விற்று விடுவேன். சில கோழிகள் தொன்னூறு நாட்களிலேயே இந்த எடையை அடைந்து விடும். ப்ராய்லர் கோழிகளை விட நாட்டுக் கோழிகளின் விலை அதிகம். ஒரு கிலோ இருநூறு ரூபாய் வரை போகும். இறைச்சியின் விலை இன்னும் அதிகம்.

நானே ஒரு கோழி இறைச்சிக் கடையும் வைத்திருக்கிறேன். புதிய கோழிகளை என் பண்ணையில் இருந்தே கொண்டு வருவதால் வாடிக்கையாளர்கள் மனநிறைவுடன் வாங்கிச் செல்கிறார்கள்.

நான் கோழிகளுடன் வான்கோழி, காடையையும் வளர்த்து வருகிறேன். அவற்றையும் அக்கறையுடன் கவனித்து வருகிறேன். வான்கோழிகளுக்கு வந்த நோய்கள், கோழிகளுக்கு வராமல் இருக்க இரண்டு இடங்களிலும் வேறுவேறு செருப்புகளைப் பயன்படுத்த வேண்டும்.

நான் முழு நேரமாக இந்த தொழிலைத்தான் செய்கிறேன். கோழிப் பண்ணைகளுக்கு என அரசு உரிமம் தருகிறது. அந்த உரிமத்தையும் வாங்கி வைத்து இருக்கிறேன். தரமான இரும்புத் தூண்கள், தரமான ஷீட்டுகள் கொண்டு பண்ணையை அமைத்து இருக்கிறேன். இன்னும் கோழிகளின் எண்ணிக்கை அதிகரிக்கும் முயற்சியில் தற்போது ஈடுபட்டு இருக்கிறேன்” என்றார் திரு. ஷிபின்.

– ச. சங்கீதா

திறமையில் அப்பாவின் வாரிசாக விளங்கும் மகள் ஜீன் லியூ

Valar
-
0
திறமையில் அப்பாவின் வாரிசாக விளங்கும் மகள் ஜீன் லியூ

ஜீன் லியூ (Jean Liu) சீன நாட்டை சேர்ந்த இவர், தற்போது உள்ள டேக் உலகத்தில் ஒரு ஆற்றல் வாய்ந்த பெண்மணி. இவர் டிடி ச்யூசிங் (Didi Chuxing) நிறுவனத்தின் தலைவர். டிடி நிறுவனம் தற்போது உலகம் முழுவதும் பல நாடுகளில் பெரிய அளவில் சவாரி சேவையை (Ride Hailing) வழங்கி வருகின்றது.

ஒரு நாளைக்கு சராசரியாக இந்த நிறுவனம் 30 மில்லியன் சவாரிகளை உலகம் முழவதும் செய்து வருகின்றது. அது அமெரிக்க நாட்டை சார்ந்த ஊபர் (Uber) நிறுவனத்தை விட ஒரு நாளைக்கு 10 மில்லியன் அதிகம்.

ஜீன் லியூ பற்றி பார்க்கும் போது, இவர் சீன தலைநகரம் பெய்ஜிங்கில்(Beijing) 1976-ல் ஜூன் மாதம் பிறந்தவர். அமெரிக்காவில் உள்ள ஹார்வர்டு பல்கலைக் கழகத்தில் (harvard university) Msc கம்ப்யூட்டர் சயின்ஸ் 2002-ல் படித்து முடித்தார்.

Also read: இயற்கை வேளாண்மை செய்யும் அனுராதா!

சீனாவில் மிகவும் பிரபலமான மனிதர்களில் Tech Icon-களுள் ஜின் லியூவின் தந்தை, லில் சுயூஅன்ச்இ (Lil Chuanzhi) யும் ஒருவர். இவர் சீன நிறுவனமான லெனோவோ(Lenovo) வின் நிறுவனர். எப்படியாவது தனக்கென ஒரு தனி பெயரை உருவாக்க வேண்டும் என்பது ஜீன் லியூ-வின் எண்ணம்.

2014-ல் தொடங்கப்பட்டு இரண்டு ஆண்டுகள் மட்டுமே ஆன டிடி ச்யூசிங் நிறுவனத்தில் சேர்ந்தார். அப்போது தொடங்கியது இவருக்கும் டிடி நிறுவனத்துக்கும் இடையேயான பயணம். ஒரு நாள் ஜீன் நிறுவனத்தில் வேலைப்பார்த்து வரும் பெண் கம்ப்யூட்டர் எஞ்சினியர், நான் கருவுற்று இருப்பதால் வேலையை விட்டு விலகுகிறேன் என்று கூறினார். அதற்கு ஏன் வேலையை விட வேண்டும் என்று கேட்டார் ஜின். அவர், வேலைக்கு வருவது எனக்கு சிக்கல் இல்லை. தினமும் வழக்கமாக மூன்று மணிநேரம் பயணம் செய்து வருவதுதான் கடினமாக இருக்கின்றது. தொடர்வண்டி மற்றும் சுரங்கப்பாதையில் நெரிசலில் என்னால் வேலைக்கு தொடர்ந்து வர முடியாது என்றார். அப்போது, ஜின்லி தனது நிறுவனத்தை பெரியதாக்க வேண்டும் என்று நினைத்தார். மற்றும் சீனாவின் மிகவும் பெரிய சிக்கல்களில் ஒன்றான போக்குவரத்தை முறைபடுத்த வேண்டும் என்று எண்ணினார்.

தனது அடுத்த கட்ட முயற்சியாக நிறுவனத்தை விரிவு படுத்த முதலீட்டாளர்களை அதிகபடுத்தினார். சீனாவில் இயங்கி வரும் மற்றொரு உள்ளூர் சவாரி சேவையை வழங்கி வரும் நிறுவனமான க்வாய்டி(kuaidi) யை தனது நிறுவனத்தை இணைத்துக் கொண்டார். இந்த நிறுவனம் டிடி க்கு தொடக்க காலத்தில் மிகவும் சவாலாக இருந்தது.

2019-ல் நடைபெற்ற வேல்டு எக்கனாமிக் ஃபோரம் (world economic forum) நிகழ்வில் உரையாற்றிய ஜீன் லீ, எங்கள் நிறுவனத்தின் தயாரிப்பு குழுவினர், ஊபர் சீனாவில் நுழைந்த தொடக்கத்தில், மூன்று மாதங்கள் எங்கும் செல்லாமல் அலுவலகத்திலேயே தங்கி, உறங்கி வேலைபார்த்தனர். மூன்று மாத கடின உழைப்புக்கு பின்னர் உருவாக்கிய திட்டங்களை புதிய மார்க்கெட்டிங் யுத்திகள் மூலம் அறிமுகப் படுத்தினோம் என்றார்.

ஊபர் அறிமுகப்படுத்த பட்ட சில மாதங்களில் மக்களுக்கு நிறைய சலுகை விலையில் சவாரிகளை அளித்தோம். ஊபர் மற்றும் டிடி இரண்டு நிறுவனங்களும் கிட்டத்தட்ட பல பில்லியன்களை வாடிக்கையாளர்களுக்கு சலுகைகளாய் செலவு செய்தனர்.

டிடி நிறுவனம் சீன மக்கள் மற்றும் சீனாவின் சந்தை நிலவரம் ஆகியவற்றை நன்கு அறிந்து செயல்பட்டது. சீனாவின் மிகப்பெரிய கட்டண சேவையை வழங்கி வரும் நிறுவனங்களான அலீ பே (Ali pay) மற்றும் வீசாட் பே (wechat pay) டிடி நிறுவன பயணிகளுக்கு மென்மையாக கட்டணம் செலுத்தும் வழியை அமைத்து தந்தது.

டிடி ச்யூசிங் நிறுவனம் உலகம் முழுவதும் விரிவடைய தொடங்கியது. லத்தின் அமெரிக்கா, ஆஸ்திரேலியா, ஜப்பான் மற்றும் சில ஆசிய நாடுகளில் தற்போது இயங்கி வருகின்றது. தற்போது உலகில் டிடி நிறுவனத்தின் மிகப்பெரிய சந்தை தெற்கு ஆசிய நாடுகள் தான்.

டிடி நிறுவனம் மற்ற சேவைகளான உணவு டெலிவரி(Food Delivery) மற்றும் பொது இடங்களில் மின்சார பைக் பகிர்வது (e-Bike Sharing) போன்ற சேவைகளிலும் ஆர்வம் காட்டி வருகிறது.

Also read: சிறுதானிய சகோதரிகள்

தற்போது ஜீன் லியூ வின் நிறுவனமும் ஒரு கேள்வி குறியில் இருக்கின்றது. எனினும் டிடி நிறுவனம் மீண்டும் தன் பயணத்தை தொடரும் என்றும் வெகுவிரையில் சீனாவும், சீன நாட்டு மக்களும் இந்த வைரஸ் தாக்குதலில் இருந்து மீண்டு தங்களது சாதாரண வாழ்க்கைக்கு திரும்பி தொழில் ஓட்டத்தை தொடங்குவார்கள் என்று நம்புவோம்.

– செ. தினேஷ் பாண்டியன்

1...141516...59Page 15 of 59