மேலாளர்கள் சிறப்பாக செயல்பட இந்த ஆலோசனைகள் உதவும்

Valar
-
0
மேலாளர்கள் சிறப்பாக செயல்பட இந்த ஆலோசனைகள் உதவும்

சிறப்பாக செயல்படும் மேலாளர், அவருக்குக் கிடைக்கக் கூடிய வளங்களை எப்போதும் அறிந்திருப்பது மட்டுமன்றி அவற்றை அருமையாக பயன்படுத்தவும் முயற்சி மேற்கொள்வார்.
இத்தகைய வளங்களுள் அடங்குவன –
நிதி
நிலைச் சொத்துகள்
பணியாற்றுபவர்கள்
இருப்புச் சரக்கு
பணி முறைகள்
சந்தைத் தந்திரம்
நேரம்
இவற்றுள் எதையாவது தவறாக நிருவகித்தால் அது கடுமையான சிக்கல்களை உருவாக்கும் என்பதை மேலாளர் நன்கு அறிந்து இருத்தல் வேண்டும்.

நிதி மேலாண்மை
நிதி மேலாண்மை என்பது, கொடுக்கப்பட்ட தொகை அல்லது வளங்களில் இருந்து அதிக அளவு நன்மையை நிறுவனத்திற்கு ஏற்படுத்துவது ஆகும்.

இதில் உட்பட்டவை:
முதலீடு தோற்றுவித்தல்
சாதாரண முதலீடு மற்றும் கடன் ஆகியவற்றின் கலவை வீதத்தை நிருணயித்தல்
மாற்று முதலீட்டு வாய்ப்புகளில் முடிவெடுத்தல்
இலாபப் பங்குக் கொள்கைகான அடிப்படையைப் பரிந்து உரைத்தல்

இதில் நிர்ணயிக்கப் படுபவை:
ஒரு வணிகத்தில் எந்த அளவு சொத்துகளை மொத்தத்தில் கைக்கொண்டு பராமரிக்க வேண்டும்.
இந்தச் சொத்துகள் எந்த வடிவத்தில் அமைய வேண்டும்.
இந்த நோக்கத்திற்குத் தேவையான மொத்த நிதித் தேவை எந்த வகையில் நிறைவு செய்யப்பட வேண்டும்.
நிதி மேலாண்மையின் கடினப் பகுதியானது நிறுவனத்தின் வரவு – செலவுத் திட்டத்தை வடிவமைப்பதாகும். வரவு – செலவுத் திட்டம் என்பது திட்டத்தைப் பண அளவிலும் நேர அளவிலும் முடிவு செய்வது ஆகும்.
இவற்றைப் பின்னர் குறிப்பிட்ட கால இடைவெளிகளில் ஒப்பிட்டுப் பார்க்கப் பயன் படுத்தலாம். வேறுபாடுகளை எப்படிக் கையாண்டு சிறந்த முடிவுகளை எட்ட முடியும் என்பது நிருவாகத் திறமைக்குரிய தொடர்ச்சியான சோதனையாகும்.
வரவு – செலவுத் திட்டத் தயாரிப்பு என்பது பெரிதும் வணிகத்தின் தன்மையைப் பொறுத்து அமையும். எடுத்துக் காட்டாகக் கீழ்க்கண்டவற்றின் அடிப்படையில் அமையலாம்.

வணிகம் ஈட்டக்கூடிய வருவாய் அளவை முடிவு செய்தல்
விற்பனை, அகவிலை, இலாபம் ஆகியவற்றின் கடந்த காலச் சாதனையின் நீட்டிப்பு
கடந்த காலச் சாதனையின் அடிப்படையில் முன் அளவீட்டு இலாபத்துடன் தற்போது

திட்டமிட்டு உள்ள இலாபத்தைச் சரிக்கட்டுதல்.
வரவு – செலவுக் கட்டுப்பாட்டு ஏடுகள், குறிக்கோள்களை அடைவதற்கான முன்னேற்றத்தைப் பதிவு செய்யும் அறிக்கைகளாகும். அகவிலை பற்றிய தகவல்களையும், இலக்கங்களையும் இவை அறிவித்தாலும், இவை அடிக்கடி மனிதர்களால் விளைவிக்கப் படுபவை என்பதை நினைவு கொள்ள வேண்டும்.
அடிப்படையான நிதிக்கட்டுப்பாட்டுக் களங்களுள் தொடர்ந்த சோதனைக்குக் கீழ்க்கண்டவை உட்பட்டிருக்க வேண்டும்: அகவிலை, விற்பனை, பிற வருவாய்கள், பண்டகச் சுழற்சி, கடன் கட்டுப்பாடு, கைப்பண இருப்பு நிலை, முதலீட்டின் மீது வருவாய், மொத்த லாபம், நிகர லாபம், அங்காடி நிலை.

பொதுத் துறையில் வற்புறுத்தப்படுவது வேறு. இங்குக் கவனத்திற்கு உரியவை:

  • ஒரு குறிப்பிட்ட பொதுக்கொள்கையின் குறிக்கோள்களைக் கண்டு கொள்ளுதல்
    இத்தகைய குறிக்கோள்களை அடைவதற்குத் தேவையான செயல் திட்டங்களை விளக்குதல்.
  • இத்திட்டங்களுக்கான செலவுகளின் முன்னளவீடு தயாரித்தல்
  • கிடைக்கக் கூடிய நிதி அளவுடன் இம் முன்னளவீடுகளைத் தொடர்பு படுத்தித் தேவைப்பட்ட அளவுக்குப் பொருந்த வைத்தல்.
  • செலவினங்களை வரவு – செலவுத் திட்டத்திற்குப் பொருந்த வைத்தல்.
  • செயல் திட்டங்களையும், நிதித் திட்டங்களையும் பொதுவான பொருளாதாரக் குறிக்கோள்களுடன் தொடர்பு படுத்தல்.
  • தேவையான கட்டுப்பாட்டுச் சோதனைகளை ஏற்படுத்தல்.

கிடைக்கக் கூடிய நிதியுதவி அளவின் எல்லையை உணர்ந்து, அதிலிருந்து குறிக்கோள்களையொட்டி உச்ச அளவு வருவாயை உறுதிப்படுத்துவது என்ற பொதுவான அடிப்படைக் கூறு இரு துறைகளுக்குமே பொருந்துவதாகும்.

பெறப்படும் வருவாய் ஈட்டம் தொடர்புடைய எல்லாக் காரணிகளையும்- பணவீக்கம் உட்பட- கணக்கில் எடுத்துக் கொள்ள வேண்டும்.

நிலைச் சொத்துகள்
பொதுவாகக் கட்டிடங்கள், ஆலை, தளவாடங்கள், ஊர்திகள் என்று விவரிக்கப்படுபவை – நிறுவனத்திற்கு எதிர்காலத்தில் நன்மை ஈட்டும் என்று எதிர்பார்க்கக் கூடிய அனைத்துப் பொருளாதார வளமைக் கூறுகளையும் குறிக்கும்.
இத்தலைப்புகளில் அதிகமான அளவில் குறிப்பிடத்தக்க இனங்கள் உள்ளன. இவை மேலாளரின் குறைவு படாத கவனத்துக்கு உரியவை. இவற்றுள் சிலவற்றைத் தேர்வு செய்தோமானால் அவை செலவுகளைக் கணிசமான அளவு அதிகரிக்கக் கூடிய இயல்புடைய அகவிலை இனங்களைக் காட்டும்.

கட்டிடங்கள்
ஒவ்வொரு ஆண்டிலும் இவற்றிற்கான செலவு எவ்வளவு?
இடவசதி மொத்தமும் முழுமையாகப் பயன்படுத்தப் படுகிறதா?
இன்னும் சிறப்பாக இதை எப்படிப் பயன்படுத்த முடியும்?
சொந்தமாக உரிமை படைத்திருப்பது சிக்கனமா அல்லது வாடகைக்கு எடுப்பது சிக்கனமா? இருப்பதை விற்றுவிட்டுப் பின்னர் அதையே வாடகைக்குப் பெறுவது சிக்கனமா?
உபரியாக உள்ள இடவசதியைக் காலி செய்து விடலாமா அல்லது வாடகைக்கு விடலாமா?

ஆலையும், தளவாடங்களும்
சொந்தமாக இருக்கவேண்டுமா, அல்லது வாடகைக்கு எடுக்கலாமா?
ஒவ்வொரு இனமும் பொருள் சிக்கனத்துடன் பயன்படுத்தப் படுகிறதா?
திட்டமிட்ட பராமரிப்பு உள்ளதா?
உபரிகளின் மதிப்பு என்ன?
புதுப்பித்தல் பற்றிய கொள்கை என்ன?
எந்திரங்களை இயக்கும் அனைவரும் முறையாகப் பயிற்சி பெற்றவர்களா?
கிடப்பு நேரம் அல்லது காத்திருக்கும் நேரத்தின் விழுக்காடும், செலவும் என்ன?

ஊர்திகள்
ஊர்திகளின் ஒப்பிடக் கூடிய மொத்த இயக்கச் செலவு எவ்வளவு?
ஒரு குறிப்பிட்ட கால அளவில், பராமரிப்பு உட்பட ஆன மொத்தச் செலவின் அடிப்படையில், ஒவ்வொரு ஊர்தியையும் பராமரிப்பது நியாயப் படுத்தப்படுகிறதா? வேறு மாற்றுகள் என்ன?
ஊர்திகளைத் தொகுதியாகப் பராமரிப்பது நன்மை பயக்குமா?
இந்த வரிசையில் இருந்து, உங்கள் இயக்கங்களுக்குப் பொருத்தமான பிற தலைப்புகள் உங்கள் எண்ணத்தில் உதிக்கும் என்பதில் ஐயமில்லை. உங்கள் வணிகத்தின் மொத்த இலாபம் அல்லது இழப்புக்கும், செலவுச் சிக்கனத்துக்கும் இடையே உள்ள வேற்றுமையை இது விளக்கும். இந்தக் களங்களில் பொதுச் செலவுகளும் கவனமாகக் கண்காணிக்கப்பட வேண்டும்.

பணியாற்றுபவர்கள்
செயலாற்ற வேண்டிய நடவடிக்கைகளின் இயல்புக்குப் பொருத்தமாகப் பணியமைப்புத் தன்மை இருப்பதை உறுதி செய்ய வேண்டும்.
விளக்கப்பட்ட குறிக்கோள்களை அடைவதற்குப் பணியாற்றும் நபர்களிடையே உள்ள உறவு முறைகளின் பின்னல் ஒன்று பணி அமைப்பை விவரிக்கலாம். அதனுடைய அமைப்பு பல்வேறு வடிவங்களை எடுக்கலாம். வழிவழி வழக்கிலுள்ள முறையான பணியமைப்பு என்பது குடும்ப மரம் அல்லது வரிசை முறை எடுத்துக்காட்டு ஆகும்.

இது சார்பணியாளர் மீது மேற்பார்வையாளருக்கு உள்ள திட்டமிட்ட அதிகாரத்தை விளக்குவதாகும். இது தேவையான கொள்கைகளை உருவாக்கும் வழிமுறைகளின் அடிப்படையில் உருவானதாகும். அதிகாரத்தின் போக்கு மேலிருந்து கீழாகத் தெளிவாக்கப்பட்ட வழித் தொடர்பு மூலமாகச் செல்கிறது. இதை ஆதிக்கத் தொடர் எனலாம். தகவல் தொடர்பும் இவ்வாறே மேலிருந்து கீழாகச் செல்லும்.

ஒரே மாதிரியான பணிகளைச் செய்யும் பணியாளர்கள் ஒன்றாய் இணைந்து, முறையான பணி அமைப்பில் இருந்து அதிகமான மாறுபாடின்றிப் பணி செய்யும் தேவையைச் செயல்முறைப் பணி அமைப்பு வலியுறுத்துகிறது.

எடுத்துக் காட்டாகத் தலைமை அலுவலகப் பண்டக மேலாளர், மாவட்ட அலுவலகப் பண்டக அலுவலருடன் நேரடியாக நடவடிக்கை மேற்கொள்வதைக் கூறலாம். பணியின் இயல்பைப் பொறுத்து இவ்வமைப்பில் வலுவும் இருக்கலாம்; வலுக்குறைவும் இருக்கலாம்.

Also read:கார்ப்பரேட் மேலாளர்களுக்குத் தேவையான அடிப்படைப் புரிதல்கள்

பணி அமைப்பு நெறிகள் சிக்கலானவை என்றாலும் மற்றும் இரு அமைப்புகள் கருதுதலுக்கு உரியவை. முதலாவது தனிப்பட்டப் பணியமைப்பு. குறிப்பிட்ட காரணங்களுக்காகப் பணி அமர்த்தப் பட்ட தலைமையின் கீழ் தனித்திறமைப் பணியாளர்களை ஒன்று படுத்திச் செயற்குழுக்களை ஏற்படுத்தி இப்பணியமைப்பு செயல்படுகிறது. தனித் திட்டம் நிறைவுற்றதும் இப்பணியாளர்கள் தங்கள் மூல நிலைகளுக்குத் திரும்பச் சென்று விடுவர்.

இதிலிருந்து மற்றொரு அமைப்பும் உருப்பெறும். இதன் பெயர் அணிக்கோவைப் பணி அமைப்பு என்பதாகும். இருக்கக் கூடிய பணி அமைப்புக்கு உள்ளேயே அணிக் குழுக்கள் முறையாக நிறுவப்படுவதற்கு இப்பணி அமைப்பு உதவுகிறது. எடுத்துக்காட்டாக, உற்பத்திப் பொருள் மேம்பாட்டுக் குழுக்கள், சந்தை மேம்பாட்டு அணிகள் அல்லது சிறப்பு வட்டாரக் குழுமங்களைக் கூறலாம்.

இதில் குறிப்பிடத் தக்க சிறப்பு என்னவென்றால் பணி அமைப்பின் அமைப்பு முறை குறிக்கோள்களை அடைவதற்குத் துணை புரிவதாக இருக்க வேண்டுமேயன்றி அதற்குத் தடையாக இருக்கக் கூடாது என்பதாகும்.

தேக்கமுடைய அல்லது தடைகளுடைய வழி அமைப்புகள் எப்போதுமே அதிகச் செலவு வைக்கக் கூடியவை. தடைகள் பெரும்பாலும் மேல் மட்டத்திற்கு அருகில் ஏற்படுகின்றன. ஒரு குப்பியில் உள்ள நீர்மம் வேகமாக வெளியேறாமல் அதன் குறுகிய கழுத்து தடை செய்கிறது என்பதும், அக்கழுத்து மேலிடத்திற்கு மிக அருகில் உள்ளது என்பதும் உண்மையே.

மனித வளங்கள் என்பதன் பொருள் என்ன? இதற்கு மாற்றாக உங்களுக்குப் பணியாற்ற எந்திரங்களை அமைக்கலாம். ஆனால், மேலாளராகிய நீங்கள் மனிதர்களையும் நிர்வகித்துதான் ஆக வேண்டும் என்படை நினைவில் கொள்ள வேண்டும்.

எந்திரங்களுக்கும் மனிதர்களுக்கும் இடையே உள்ள வேற்றுமைது:

  • மனிதர்களை எதிர்பார்க்கும் விதத்தில் பயன் படுத்துவதற்கு, அவர்களுக்கு சொந்த சிந்தனை இருக்கிறது.
  • மனிதர்களால் முடிவுகள் மேற்கொள்ளத் தக்க அளவில் கணிப்பிட முடியும்.
  • உங்கள் நிறுவனத்தில் மனிதர்களுக்கு அவர்களுடைய பங்கு குறித்து எதிர்பார்ப்புகள் உள்ளன.
  • அதிகரித்த உற்பத்தித் திறனுக்குப் பல தரப்பட்ட குறிப்பிடத்தக்க தொண்டுகளை மனிதர்களால் ஆற்ற இயலும் – அவர்கள் விரும்பினால்.

ஆகவே, இத்தகைய திறமைகளை முழுமையாக உங்கள் நிறுவனத்திற்குப் பயன்படுத்திக் கொள்ள நீங்கள் பாடுபட வேண்டும். இதில் எவ்வளவு அதிகமாக நீங்கள் ஈடுபடுகிறீர்களோ அவ்வளவுக்கு நீங்கள் பயன் விளைவிக்கக் கூடியவராக இருப்பீர்கள்.

சுருக்கமாக,
நீங்கள் பொறுப்பை ஒப்படைத்தால் அது விருப்புடன் ஏற்கப்படும்.
இந்தத் தலைப்பின் கீழ் அடிப்படையானதும், இன்றியமையாததுமான சிலவற்றைக் குறிப்பிடுவது பொருத்தமானதாகும்:

  • ஒரு மேலாளர் மனிதர்களின் கைகளைப் போலவே அவர்களுடைய அறிவையும் பயன்படுத்திக் கொள்ள வேண்டும்.
  • பணி எங்கு நிகழ்கிறதோ எல்லா விவரங்களும் எங்குத் தெரியுமோ அங்குப் பொறுப்பு சுமத்தப் பட வேண்டும். கீழ்மட்டத்தில் உள்ள பொருத்தமான நபருக்கு அது வழங்கப் படவேண்டும்.
  • பெரும்பாலான மனிதர்களிடம் வெளிப்படுத்தப் படாத திறமைகள் அதிகமாகத் தேங்கிக் கிடக்கின்றன.
  • குறைந்த முயற்சியில் அதிக வேலையை முடிப்பது எப்படி என்பதைக் கண்டுபிடிக்கும் திறமை அந்த வேலையை உண்மையில் செய்கின்றவர்களிடம்தான் அடிப்படையில் அமைந்து உள்ளது. இத்திறமையைப் பயன்படுத்துபவர்களைப் பாராட்டி பெருமைப் படுத்த வேண்டும்.
  • ஒவ்வொருவரும் அவரவர் பணியை அவருடைய சொந்தப் பணியாக ஏற்பாரானால் அவர் அதில் அதிகக் கருத்தைச் செலுத்துவார்.
  • ஒரு நிறுவனத்தால் பணி அமர்த்தப்படும் மனிதர்கள் அந்நிறுவனத்தில் பெரும் பங்கு வகிக்கின்றனர்.
  • பணிகள் குறித்து முடிவு மேற்கொள்ளும் போது, அவர்கள் ஈடுபடுத்தப் பட்டால் அல்லது கலந்து ஆலோசிக்கப் பட்டால் அவர்கள் விருப்புடன் முன்வருவார்கள்.

– கார்டன் பி. ராபி (தமிழில்
இரா. சுப்பராயலு)

ரீஃபண்ட் விவரங்களை எப்படி தெரிந்து கொள்வது?

Valar
-
0
ரீஃபண்ட் விவரங்களை எப்படி தெரிந்து கொள்வது?

கேள்வி: நான் கூட்டு வணிகத்தில் 2017-18 – ல் கூட்டாளிக்கு அலுவலக வாடகை மாதம் ரூ.10,000 செலுத்துகிறேன். இதற்கு ஜிஎஸ்டி வரி உண்டா?
பதில்: 01.07.17 முதல் 13.10.17 வரை Reverse Charge Mechanism (RCM) ல் இந்த நிறுவனம் 18 % வரி செலுத்த வேண்டும். இதுவரை செலுத்தாவிடில் வட்டி 18% செலுத்த வேண்டும். ஜிஎஸ்டி மட்டும் Input Tax Credit-ITC எடுத்து கொள்ளலாம். கூட்டாளிக்கு ரூ.20 லட்சத்திற்கும் குறைவாக வருவாய் உள்ளதால் அவருக்கு ஜிஎஸ்டி பதிவு தேவையில்லை.

கேள்வி: ஒரு நபர் கலப்பு திட்டத்தில் தவறாக சேர்ந்து அதற்குரிய வரியை செலுத்தினால் என்ன விளைவுகள் ஏற்படும்?
பதில்: தவறாக சேர்ந்து கலப்பு வரி கட்டினால் சிஜிஎஸ்டி section 73 அல்லது 74 ன் படி நடவடிக்கை எடுக்கப்பட்டு தண்டம் வசூலிக்கப்படும்

கேள்வி: நடவடிக்கைக்குரிய உரிமை (actionable claim) ஜிஎஸ்டி யில் எவ்வாறு எடுத்து கொள்ளப்படுகிறது?
பதில்: நடவடிக்கைக்கு உரிய உரிமை (actionable claim) அட்டவணை III ன் கீழ் வருவதால் அவை வழங்கலாக (neither supply of goods nor services) கருதப்பட மாட்டாது.

கேள்வி: செல்வன் என்பவர் எழிலனை அணுகி முகிலன் என்பவருக்கு அவருக்கு வேண்டிய சரக்கை அனுப்ப செய்து அதற்கு உரிய இன்வாய்சை அனுப்ப செய்கிறார். சரக்கு நேரடியாக செல்கிறது. இதில் செல்வன் என்பவர் ஜிஎஸ்டி யில் ஏஜென்டாக கருதப்படுவாரா? ?
பதில்: Circular No. 57/31/2018-ஜிஎஸ்டி dt 04.09.18 ன் படி அவர் ஏஜென்ட் ஆக ஜிஎஸ்டி யில் வருவது இல்லை.

Also read:சேவைத் தொழில்களுக்கும் ஜிஎஸ்டியின் கீழ் காம்போசிஷன் திட்டம்

கேள்வி: ஒரு ரசாயன உரம், உரமல்லாத பயன்பாட்டிற்கு வழங்கல் செய்தால் ஜிஎஸ்டி வரி விகிதம் என்ன?
பதில்: Circular No. 54/28/2018-ஜிஎஸ்டி தேதி 09.08.2018ன் படி உரமல்லாத பயன்பாட்டிற்கு வழங்கல் செய்தால் 18% வரி வசூலிக்கப்பட வேண்டும்.

கேள்வி: அரசின் சேவைகளை பெறும்போது Reverse Charge Mechanism (RCM) ஜிஎஸ்டி வரி கட்ட வேண்டும் என்றால் தண்டம் மற்றும் அபாரதத்தின் மீதும் வரி உண்டா?
பதில்: அதன் மேல் ஜிஎஸ்டி வரி கட்ட தேவை இல்லை..

கேள்வி: ஆபரண தங்கம் மற்றும் வைரம் இறக்குமதிக்கு ஜிஎஸ்டி வரி உண்டா?.
பதில்: ஆம். சுங்க வரி செலுத்திய பின் 3% IGST விதிக்கப்படும். அந்த ஐஜிஎஸ்டியை Input Tax Credit- ITC எடுத்து கொள்ளலாம்

கேள்வி: ஜிஎஸ்டி போர்ட்டலில் என்னுடைய ரீஃபண்ட் ஸ்டேட்டஸ் எவ்வாறு தெரிந்து கொள்வது?
பதில்: ஜிஎஸ்டி portal ™ Services > Refunds > Track Application Status service ல் தெரிந்து கொள்ளலாம்.

கேள்வி: என்னுடைய எல்லா சப்ளையும் zero rated (exports) ஆக இருந்தால் ஜிஎஸ்டி பதிவு தேவையா?
பதில்: ஆம். கொள்முதலில் உள்ள ஜிஎஸ்டி வரியை திரும்ப பெறுவதற்கோ இல்லை output IGST யை திரும்ப (ரீஃபண்ட்) பெறுவதற்கோ ஜிஎஸ்டி பதிவு அவசியம் தேவை.

காசோலை திருப்பம்: இடைக்காலமாக 20% சட்டம்

Valar
-
0
காசோலை திருப்பம்: இடைக்காலமாக 20% சட்டம்

காசோலை ஒன்று கிடைக்கப் பெற்றால் அந்த காசோலையில் எழுதப்பட்டு உள்ள தேதியில் இருந்து மூன்று மாதங்களுக்குள் வங்கியில் வழங்கி அந்த தொகையை நம் கணக்கில் வரவு வைக்கச் செய்ய வேண்டும். ஒருவேளை அவ்வாறு தொகையை வரவு வைக்காமல் காசோலை கொடுத்தவர் கணக்கில் பணம் இல்லை என காசோலை திரும்பினால், அந்த காசோலை கொடுத்தவருக்கு, அந்த காசோலையில் குறிப்பிடப்பட்டு இருந்த பணத்தை உடன் வழங்கக் கோரி, முப்பது நாட்களுக்குள் கடிதம் ஒன்றினை அனுப்ப வேண்டும்.

அவ்வாறான கடிதம் கிடைத்த பதினைந்து நாட்களுக்குள் காசோலை வழங்கியவர் பணம் வழங்கி விட வேண்டும். அவ்வாறு வழங்கவில்லை எனில் பாதிக்கப்பட்டவர் இதற்கான நீதிமன்றத்தில் Cheque Bounce குறித்து வழக்கு தொடுக்கலாம். வழக்கு பதிவு செய்யப்பட்ட ஆறு மாதங்களில் நீதிமன்றம் தீர்ப்பு அளக்க வேண்டும் என சட்டம் உள்ளது.

இவ்வாறு காசோலைகள் திரும்புவதால் தொழில் நிறுவனங்கள் பணத் தட்டுப்பாடு ஏற்பட்டு தடுமாறுகின்றன. இதற்காக நீதிமன்றத்தில் வழக்கு தொடுத்து அந்த தொகையை பெறுவதற்குள் போதும் போதும் என ஆகி விடுகிறது. இவ்வாறான நிலையில் செலாவணி முறிச் சட்டம் 1881 இல் பிரிவு 143கி, 148 ஆகிய இரண்டிலும் திருத்தம் செய்து கடந்த செப்டம்பர் 1., 2018-ல் இருந்து நடைமுறைப் படுத்தப்பட்டு உள்ளது.

Also read:வங்கி மோசடிகளுக்கு, தனியார்மயம்தான் தீர்வா? இல்லை என்கிறார்கள், வல்லுநர்கள்!

தொடர்புடையவர் மீது வழக்கு தொடுத்த பின்னர் இடைக்கால நிவாரணமாக 20% -க்கு மிகாமல் 60 நாட்களுக்குள் வட்டியும் சேர்த்து வழங்குமாறு நீதிமன்றம் உத்திரவிடலாம். இந்த உத்திரவின்படி தொடர்புடைய நபர் தொகை வழங்கத் தவறினால் அவருக்குச் சொந்தமான சொத்துகளை மாவட்ட ஆட்சியர் வாயிலாக பொது ஏலத்தில் விற்பனை செய்து பாதிக்கப்பட்டவருக்கு வழங்குமாறு நீதிமன்றம் உத்திரவிடலாம்.

பிரிவு 148 இன் படி பாதிக்கப்பட்டவர் வழக்கு தொடுத்தவுடன், காசோலை கொடுத்தவர் நீதிமன்றத்ததில் 20% தொகையை வைப்புத் தொகையாக செலுத்த வேண்டும். வழக்கில் காசோலை கொடுத்தவருக்கு சார்பாக தீர்ப்பு வந்தால், அந்த 20% தொகையும் அதற்கான வட்டியும் சேர்த்து அவருக்கு திருப்பி வழங்கப் பெறும்.

– ச. குப்பன்

பால் உற்பத்தியைப் பெருக்கும் தீவன ரகங்கள்

Valar
-
0
பால் உற்பத்தியைப் பெருக்கும் தீவன ரகங்கள்

தீவன வகைகளான கம்பு நேப்பியர் கோ (CN) 4, கினியா புல் கோ சிளி (GG) மல்டிகட் தீவன சோளம் கோ(FS) 29, மற்றும் லூசெர்ன்கோ 1 போன்ற கால்நடைகளுக்கான தாவர தீவனங்கள் தமிழ்நாடு மற்றும் அண்டை மாநிலங்களில் விவசாயிகள் நடுவே மிகவும் பிரபலமாக உள்ளன. இந்த வகைகள் தேசிய அளவில் தீவனம் ஆராய்ச்சி மற்றும் வளர்ச்சியில் ஒரு புதிய காலக்கட்டத்தை உருவாக்கி உள்ளது. தமிழ்நாடு மற்றும் அதன் அண்டை மாநிலங்களான கேரளா, ஆந்திரப் பிரதேசம், கர்நாடகா மற்றும் மகாராஷ்டிரா மாநில கால்நடை விவசாயிகளுக்கு இந்த வகை தீவனங்கள் பெரும் வாய்ப்பாக உள்ளன. இவ்வகை தீவனங்களின் சாகுபடி கால்நடை விவசாயிகள் வெண்மைப் புரட்சிக்கு தங்கள் பங்களிப்பை வெற்றிகரமாக அளிக்க வழி வகுக்கிறது.

கம்பு நேப்பியர் கலப்பின புல் கோ (சி.என்) 4
கம்பு நேப்பியர் கலப்பின புல் கோ (சி.என்) 4, சிறந்த அம்சங்களை கொண்டு உள்ளது. இதன் தண்டு மென்மையாகவும், நார்ச்சத்து குறைந்தும், சர்க்கரை சாறு நிறைந்ததாகவும் உள்ளது. இத்தீவன தண்டில் வெள்ளை நிற பூச்சு பரவலாக இருக்கும். இதில் தூர்கள் பல இருக்கும் அது வேகமாக வளரும் தன்மையுடையதாக இருக்கும். இது நீளமான இலைகள், இலைக் கதிர்கள் மற்றும் உறையில், இலை விளிம்புகள் மென்மையானதாகவும் கூர்மை அற்றதாகவும் இருக்கிறது. இலை தண்டு விகிதம் அதிகமாக உள்ளது. கறவை மாடுகள், ஆடுகள் இவ்வகை தீவனங்களை விரும்பி உண்ணுகின்றன.

கோ (சி.என்) 4 சராசரி பச்சை தீவன புல்லின் மகசூல் 382 டன் / எக்டர் / வருடம் இது சிளி 3 தீவன புல் இரகத்தை காட்டிலும் 32.9% உயர்விளைச்சலை கொண்டுள்ளதாக பதிவு செய்யப்பட்டிருக்கிறது.
இந்தியாவில் கம்பு நேப்பியர் கலப்பு கோ (சி.என்) 4 தாக்கம்
2008 ல்இருந்து 2014 வரையிலான கால கட்டத்தில் 1,07,03,873 மொத்தம் தண்டு வெட்டி இந்தியாமுழுவதும் 15 மாநிலங்களில் பரவி பரந்துள்ளது.

Also read :பால்பண்ணைகளை நம் நாட்டுக்கு ஏற்ப அமைக்க வேண்டும் 

கினியா புல் கோ (GG) 3
கினியாபுல் கோ 3, மும்பாச பகுதியில் இருந்து கொண்டு வரப்பட்ட தீவனமாகும். இது அதிக அளவில் தூர் உண்டாகின்ற நல்ல வீரியம் உள்ளது. இது அதிகப் படியான இலை, தண்டு விகிதம் பெரிய மற்றும் நீண்ட இலைகள் கொண்டு உள்ளன. கறவை மாடுகள், செம்மறிஆடுகள், பன்றிகள் மற்றும் ஈமு பறவைகள் இத்தீவனத்தை விரும்பி உண்கின்றன. இந்த பசுந்தீவன புல்லின் மகசூல் ஒரு எக்டருக்கு 320 டன்கள். இது கோ 2 தீவன புல்லின் மகசூலுடன் ஒப்பிடும் போது 18.5 சதவீதம் உயர் விளைச்சலாகும். .

மல்டிகட் தீவன சோளம் கோ(FS) 29
சோளம், மற்றும் குதிரை மசால் முதன்மை தீவனப் பயிராக மேற்கு உத்திர பிரதேசம், ஹரியானா, பஞ்சாப், ராஜஸ்தான், தமிழ்நாடு, தில்லி நகரங்களில் மூன்றில் இரண்டு பங்கிற்கு மேல் தீவன சாகுபடி காரிப் பருவத்தில் செய்கின்றனர்.
இந்த பிரபலமான மல்டிகட் தீவன சோளம் கோ 29. இந்தியாவில் முதல் முறையாக தமிழ்நாடு வேளாண்மைப் பல்கலைக் கழகம், கோயம்புத்தூர் தீவன பயிர்த் துறையால் 2001 ஆம் ஆண்டில் வெளியிடப்பட்டது. ஒரு ஆண்டில் 6-7 அறுவடைகள் செய்யப்படுகின்றன. மற்றும் மகசூல் 170 டன்/எக்டர்/ஆண்டு. இது வறட்சியை மிதமாக தாங்கக் கூடியது.

குதிரைமசால், கோ 1
இத்தீவனம் தமிழ்நாடு வேளாண்மைப் பல்கலைக் கழகம், தீவன பயிர் துறையால் 1980 ஆம் ஆண்டில் வெளியிடப்பட்டது. இப்பயிர் ஒரு ஆண்டிற்கு ஒரு எக்டருக்கு 80-90 டன்கள் மகசூல் தரக்கூடியது. இது 30 நாட்கள் இடைவெளியில் ஒரு ஆண்டிற்கு அதிகபட்சமாக 12 முறை அறுவடை செய்யலாம்.

– எவ்வி

முன்னேற விரும்புகிறவர்களுக்கு ‘முன் ஏர்’ ஆக இருக்கவிரும்புகிறேன்!

Valar
-
0
முன்னேற விரும்புகிறவர்களுக்கு ‘முன் ஏர்’ ஆக இருக்கவிரும்புகிறேன்!

வியாபாரத்தில் முன்னேற விரும்புகிறவர் களுக்கு ஒரு வழிகாட்டியாக செயல்பட்டுக் கொண்டிருக்கும் எழுத்தாளர், பேச்சாளர், தொழில் ஆலோசகர் ‘வெற்றி விடியல்’ திரு. சீனிவாசனுடன் பேட்டி கண்ட போது அவர் கூறிய சில முதன்மையான செய்திகள் –
”வியாபாரம் செய்பவர்கள் விற்பனையில் கவனம் செலுத்துவார்கள். தினசரி உற்பத்தி போன்றவற்றில் ஈடுபாட்டோடு இருப்பார்கள். ஆனால் வரவு செலவு கணக்கோடு பிணக்கு இருக்கும். எட்டிக்காயைப் போல் எட்டத்தில் வைத்து விடுவார்கள். அதைக் கவனிக்கவே மாட்டார்கள்.

பெரும்பாலான வியாபாரத் தோல்விகளுக்கு இதுவே காரணம். அதை வலியுறுத் தியே ஃபேஸ்புக்கில் STM – Entrepreneur சிறுதொழில் முனைவோர் குழு தொடங்கப் பட்டது. குழுவில் தற்போது 11 லட்சத்திற்கும் அதிகமான உறுப்பினர்கள் இருக்கிறார்கள். எல்லோருமே தொழில்முனைவோர் அல்ல. ஆனால் வாய்ப்பு கிடைத்தால் செய்வதற்குத் தயாராக இருப்பவர்கள்.

தொழில் முனைவோர் கணக்கு வழக்குகளைப் பார்க்காமல் அலட்சியமாக இருப்பது ஒரு பக்கம் என்றால், அடுத்ததாக சந்தையைச் சரியாக ஆய்ந்தறியாமல உற்ப தியில் இறங்குவது. ஆழம் தெரியாமல் காலை விடும் முயற்சி இது. மூன்றாவது ஆர்வக் கோளாறில் அதிக வட்டிக்குக் கடனை வாங்கி மூச்சிறைத்து மூலையில் உட்கார்ந்து விடுவது.

இந்த மூன்றுமே பெரிய தடைகள். அவற்றை எப்படிக் கையாள வேண்டும் என்பதைச் சொல்லித் தர வேண்டும் என்ற எண்ணத்தின் அடிப்படையிலேயே தொழில் பயிற்சி முகாம்களை ஏறத்தாழ 25 ஆண்டு களாக நடத்தி வருகிறேன். அல்லது பலரும் நடத்துகின்ற நிகழ்ச்சிகளில் பங்கு பெறுகிறேன். அதனால் ஆயிரத்திற்கும் மேற்பட்ட நிகழ்வுகளில் உரையாற்றி உள்ளேன்.

‘மேடைப் பேச்சு’த் திறனை வளர்க்க நாங்கள் பயிற்சி வகுப்புகள் நடத்துகிறோம். அதற்கான போடியம் அமைப்பு என் வழிகாட்டுதலோடு நடக்கிறது. கள நடவடிக்கைகளை நண்பர் திரு. வெங்கட் பார்த்துக் கொள்கிறார். திறன் படைத்த பல மேடைப் பேச்சாளர்கள் கலந்து கொண்டு பயிற்சி அளிக்கிறார்கள்.
தற்போது குறுகிய காலப் பயிற்சி அளிக்கிறோம். இரண்டு நாள்கள் நடக்கும். அரை நாள் இந்தத் திறன் பற்றிய விவரங்கள். மீதமுள்ள நேரம் முழுவதும் பங்கு பெறுபவர் கள் மேடையேறிப் பேச வேண்டும், சுழற்சி முறையில். ஒவ்வொருவருடைய வலுவான திறன் கூறுகளைக் கண்டறிந்து சொல்வோம். கூர் தீட்ட வேண்டிய விஷயங்களையும் சுட்டிக் காட்டுவோம்.

Also read:என்ன செய்தால், எப்படி செயல்பட்டால் நாம் வளரலாம்?

சீனிவாசன் என்பது ரொம்ப காமனான பெயர். ‘காமனான’ என்பதற்கு வேறு அர்த்தம் கொண்டு விடாதீர்கள். பரவலாக இருக்கும் பெயர் என்று சொல்ல வந்தேன். டெலிபோன் டைரக்டரியில் சீனிவாசனும், சுப்பிரமணியமும்தான் அதிகம் இருக்கிறது. அதனால் தனியாக அடையாளப் படுத்தும் போது சிரமம் இருக்கும். நான் ஆடிட்டர் சீனிவாசன் பேசுகிறேன் என்று ஃபோனில் சொன்னால் ‘எனக்கு அந்த பேர்லயே ஆறு ஆடிட்டரைத் தெரியும் சார்’ என்று கேட் போடுவார்கள். அதனால் ‘வெற்றி விடியல்’ அடைமொழியைச் சேர்த்துக் கொண்டேன். ‘வெற்றி விடியல்’ என்பது மாணவர்களுக்காக நான் நடத்தும் சுய முன்னேற்றப் பயிற்சியின் தலைப்பு. அவ்வளவே. இது விருதோ பட்டமோ அல்ல.

ஒரு கூடுதல் செய்தி. ஃபேஸ்புக்கில் சீனிவாசன் என்று தேடிப் பாருங்கள். ஆயிரக் கணக்கில் புரொஃபைல் வரும். மாறாக Vetri Vidiyal என்று மட்டும் தட்டச்சு செய்யுங்கள் போதும். Srinivasan என்று கூட தட்டச்சு செய்ய வேண்டாம். என் படம் தோன்றும். நான் எழுதிய இரண்டு நூல்கள் வெளி வந்து உள்ளன. சேமிப்பிற்காக ஒன்று. ‘பைசா கோபுரம் கட்டுவோமே.’ இன்னும் ஒன்று, சிறுதொழில் முனைவோருக்காக ‘பிசினஸ் ரகசியங்கள்.’

மூன்றாவது ஒரு மொழிபெயர்ப்பு. மும்பையைச் சேர்ந்த மேலாண்மைப் பயிற்சியாளர் திரு ஷாரு ரங்கனேகர் எழுதிய Learn Management from your wife என்னும் புத்தகம். தமிழில் ‘மனைவி சொல்லே மேனேஜ்மெண்ட் மந்திரம்’ என்னும் தலைப்பில் மொழி பெயர்த்து உள்ளேன். மூன்றையுமே சென்னையைச் சேர்ந்த ‘கற்பகம் புத்தகாலயம்’ வெளியிட்டு உள்ளது.

புதிய தேடல் என்பது ஒரு சுவையான பணி. சான்றாக வானொலி நிலையத்தார் ஒரு முறை, பூட்டு என்பதையும் இன்னொரு முறை, பறவைகளின் கூடுகள் என்பதையும் தலைப்பாகக் கொடுத்தனர். ஒவ்வொரு தலைப்பிலும் 50 நிமிடங்கள். அப்போது நான் சேகரித்த விவரங்கள் பல டஜன் வியப்புக் குறிகளை என் தலைக்கு மேல் நடனமாட வைத்தன.

என்னுடைய முதன்மையான இலக்கு, வியாபாரம் செய்து வாழ்க்கையில் முன்னேறத் துடிப்பவர்களுக்கு ஒரு ‘முன் ஏர்’ போன்று இருக்க வேண்டும் என்பதே!” என்றார், வெற்றி விடியல் திரு. சீனிவாசன்

-சு. கணேஷ்குமார்

கோரோனாவுக்கு பின்னாலாவது சிறு தொழில்களின் சிக்கல் தீர்க்கப்படுமா?

Valar
-
0
கோரோனாவுக்கு பின்னாலாவது சிறு தொழில்களின் சிக்கல் தீர்க்கப்படுமா?

இந்தியாவில் விவசாயத்திற்கு அடுத்து, மக்களுக்கு அதிக வேலைவாய்ப்பு கொடுத்து வருவது, சிறு, குறுந் தொழில்கள் என்பது அனைவருக்கும் தெரியும். ஆனால் இன்றைக்கு சிறு, குறுந் தொழில்களின் வளர்ச்சி பெரும் பின்னடைவைச் சந்தித்து வருகிறது. கொரோனாவுக்குப் பிறகு ஆயிரக்கணக்கான சிறு, குறுந் தொழில் முனைவோர் கடுமையான இன்னல்களுக்கு உள்ளாகி இருக்கிறார்கள். பதிவு பெற்ற நிறுவனங்களை விட, பதிவு பெறாத நிறுவனங்களின் எண்ணிக்கையும், அவர்களுக்கான பாதிப்பும் அதிகம்.

தமிழகத்தில் படித்தவர்களின் எண்ணிக்கை உயர்ந்து வருகின்றது. ஆனால் அந்த படித்தவர்கள் உடல் உழைப்பு சார்ந்த வேலைகளை விரும்புவது இல்லை. ஆனால் அதே நேரத்தில் படிப்பறிவு குறைவாக உள்ள, ஆனால் உடல் உழைப்புக்கு தயாராக இருப்பவர்கள் தெருவுக்கு ஒரு மதுக்கடை வந்த நாளில் இருந்து பெரும்பாலானோர் மதுவுக்கு அடிமையாகி எப்பொழுதும் மயக்க நிலையிலேயே உள்ளனர். சிறிய வயதிலேயே ஆற்றல் இழந்து திரிகின்றனர். கடினமான உடல் உழைப்பு வேலைகள் செய்ய, அவர்கள் உடல் நிலை ஒத்துழைப்பது இல்லை.

உழைப்புக்கு ஏற்ற உடல் நிலை உள்ளவர்கள், நாளுக்கு நாள் தமிழகத்தில் குறைந்து கொண்டே வருகின்றனர்.

இன்றைய சூழ்நிலையில் ஒரு சிறு தொழிலை தமிழகத்தில் வெற்றிகரமாக நடத்துவது என்பது சவாலான ஒன்று. போதிய நிதி வசதி இல்லாதது, பெரிய நிறுவனங்கள், சிறு நிறுவனங்களுக்குத் தர வேண்டிய தொகையை குறித்த காலத்தில் தராதது, வங்கிகளின் மிகையான வட்டி மற்றும் மறைமுக கட்டணங்கள், தேர்ச்சி பெற்ற மற்றும் பெறாத தொழிலாளர்கள் பற்றாக்குறை, உயர்ந்து விட்ட தொழிலாளர் சம்பளம், மின்சார சிக்கல், ஜிஎஸ்டி சிக்கல், தொழில் நடத்த கட்டுப்படியாகக் கூடிய விலையில் போதிய இடம் இல்லாதது, என்று இன்னும் பல்வேறு சிக்கல்களை சொல்லிக் கொண்டே போகலாம். இந்த சிக்கல்களை கொரோனா இன்னும் பல மடங்கு அதிகரித்து விட்டது.

ஒரு தொழிலை நடத்த வேண்டும் என்றால் பல்வேறு துறைகளை அணுகி, அனுமதி பெற வேண்டி உள்ளது. தமிழகத்தில் உள்ள பல தொழில் தொடர்பான அதிகாரிகள், தங்களை அரசு தொழில் வளர்ச்சிக்கும், தொழில் முனைவோருக்கு உதவவும் வேலைக்கு அமர்த்தி உள்ளது என்பதை மறந்து விட்டவர்களாகவே இருக்கிறார்கள் என்பதை இங்கு சுட்டிக்காட்ட வேண்டி உள்ளது.

பிளாஸ்டிக் தொழிலையே சான்றாக எடுத்துக் கொள்ளலாம். 01.01.2019 முதல் தமிழ்நாட்டில் 14 வகையான பிளாஸ்டிக் பொருட்களுக்கு தடை என்று அரசு அறிவித்து விட்டது. பல ஆண்டுகளாக இந்த தொழிலில் இருந்து வருகிறோம். சரியோ, தவறோ அரசு தடை விதித்த பிறகு அந்த பொருள்களை தயாரிக்கக் கூடாது. அதற்கு பதில் மீதம் உள்ள பொருட்களை தயாரிக்கலாம் என்று நினைத்து, உரிய அனுமதி பெற அரசு துறைகளை அணுகினால், சொல்லொணாத துன்பங்களை எதிர்கொள்கிறோம்.

சரி, இது தொடர்பாக முதல் அமைச்சருக்கு தகவல் தெரிவித்து, அவர் மூலம் நிவாரணம் பெறலாம் என்று நினைத்து முதலமைச்சரின் தனிப்பிரிவுக்கு கடிதம் அனுப்பினால், அந்த கடிதத்தை முதலமைச்சரின் தனிப்பிரிவில் இருந்து, உரிய துறைக்கு அனுப்பி விடுகிறார்கள். ஆனால், அந்த துறையில் இருந்து, நாம் கேட்ட சிக்கலுக்கு உரிய தீர்வு கிடைப்பது இல்லை. தொடர்பு இல்லாமல் ஏதோ ஒரு பதிலை அனுப்பி, வைத்த அந்த செய்தியை அதோடு முடித்து விடுகின்றனர். சான்றுக்கு, தமிழகத்தில் பிளாஸ்டிக் தடை நடைமுறைப் படுத்திய பிறகு, மேற்படி ஆணையை நடைமுறைப் படுத்தும், தமிழ்நாடு மாசுகட்டுபாடு வாரியத்திடம் பிளாஸ்டிக் தொழில் தொடர்பாக பல்வேறு விளக்கங்களை பெற வேண்டி உள்ளது.

இது தொடர்பாக வாரியத்துக்கு எந்த விளக்கம் கேட்டு அனுப்பினாலும், 25.06.2018 அன்று வெளியிட்ட தமிழக அரசு ஆணை எண். 84ல் உள்ள வாசகங்களையே, திருப்பித் திருப்பி அனுப்புவது;, அல்லது பதிலே போடாமல் இருந்து விடுவது என்று இருந்து விடுகின்றனர்.

இது தொடர்பாக முதல்வருக்கு கடிதம் அனுப்பினால் கூட, அதே பதில்தான் வாரியத்திடம் இருந்து வருகின்றது. என்ன செய்வது என்றே புரியவில்லை. தமிழக முதல்வர் அவர்கள், தமிழகத்தில் பல்வேறு சிக்கல்களால் போராடிக் கொண்டு இருக்கும் மீதம் உள்ள சிறு, குறுந் தொழில்களாவது அரசு எந்திரத்தால் மேற்கொண்டு பாதிக்கப்படாமல், தொழில் நடத்த தகுந்த நடவடிக்கைகளை எடுக்க வேண்டுகிறோம்.

– ஜி. சங்கரன், தமிழ்நாடு, பாண்டி பிளாஸ்டிக் சங்கம், சென்னை -112
(9003023815)

அறிவியல் போட்டியில் வெற்றி பெற்ற, தமிழக மாணவி ‘நாசா’வுக்கு செல்கிறார்!

Valar
-
0
அறிவியல் போட்டியில் வெற்றி பெற்ற, தமிழக மாணவி ‘நாசா’வுக்கு செல்கிறார்!

தமிழகத்தின் மதுரை மாநகரில் உள்ள மகாத்மா மான்டிசோரி மெட்ரிக் மேல்நிலைப் பள்ளியின் பத்தாம் வகுப்பு மாணவி செல்வி ஜே. தான்யா தஸ்னம் வரும் அக்டோபர் மாதத்தின் முதல் வாரத்தில் அமெரிக்கா செல்ல இருக்கிறார். அங்கே அந்நாட்டின் நாசா (NASA) எனப்படும் அமெரிக்க வான்வெளி அறிவியல் மற்றும் விண்வெளி ஆய்வு நிர்வாகத் தலைமையகத்தில்(National Aeronautics and Space Administration) ஒரு வாரம் வரை செலவிட இருக்கிறார். அப்போது நாசாவை முழுமையாகச் சுற்றிப் பார்க்கவும், அங்குள்ள விஞ்ஞானிகளுடன் கலந்துரையாடவுமான வாய்ப்பினைப் பெறுவார்.
இணையம் மூலம் மாணவர்களுக்கு பயிற்சி அளிப்பது மற்றும் கல்வி சுற்றுலா ஏற்பாடு செய்வது போன்ற சேவைப் பணிகளில் ஈடுபட்டு வரும் அமெரிக்க நிறுவனமான கோ4குரு(Go4Guru), 2019-ஆம் ஆண்டு இந்திய அளவில் நடத்திய அறிவியல் ஆப்டிட்யூட் மற்றும் பொது அறிவுப் போட்டியில் (Science Aptitude and General Knowledge Test) வெற்றி பெற்ற மூன்று பேர்களில் செல்வி. தான்யா தஸ்னமும் ஒருவர் என்பது குறிப்பிடத்தக்கது.

ஆந்திரப் பிரதேசத்தின் குண்டூரைச் சேர்ந்த பாஷ்யம் குழுமப் பள்ளிகளின் – ஐ.ஐ.டி. அறக்கட்டளைப் பள்ளி மாணவியான செல்வி. சாய் புஜிதா மற்றும் மராட்டிய மாநிலத்தில் உள்ள அலிபக் என்ற ஊரின் ஜிண்டால் வித்யா மந்திர் பள்ளியில் படிக்கும் மாணவன் திரு. அபிஷேக் ஷர்மா ஆகிய இருவரும் 2019-ஆம் ஆண்டுப் போட்டியில் வெற்றி பெற்ற மற்ற இரு மாணவர்கள் ஆவர். கோ4குரு நிறுவனம் நடத்திய தேசிய விண்வெளி அறிவியல் போட்டி 2019-இல் பங்கேற்ற ஆயிரக் கணக்கான மாணவர்களில் இருந்து இந்த மூவரும் தேர்வு செய்யப்பட்டு உள்ளனர்.

2020-ஆம் ஆண்டுக்கான தேசிய விண்வெளி அறிவியல் போட்டியை, கோ4குரு நிறுவனம் அண்மையில் தொடங்கி வைத்தது.. விண்வெளிக்கு அனுப்பப்பட்டு, தற்போது அண்டவெளியில் சுழன்று கொண்டிருக்கும் நாசாவின் சார்பாக ஆய்வுப் பணிகளை மேற்கொண்ட அனுபவம் உள்ள முன்னாள் விண்வெளி வீரர் முனைவர். டான் தாமஸ் இந்தப் போட்டிகளைத் தொடங்கி வைத்தார். இந்த நிகழ்ச்சியில் சவீதா குழும மருத்துவ மற்றும் பொறியியல் கல்வி நிறுவனத்தின் தொடங்குநரும், வேந்தருமான முனைவர் என். எம். வீரைய்யனும் கலந்து கொண்டார். மேலும், நாசாவில் பணியாற்றி ஓய்வு பெற்ற விஞ்ஞானியான முனைவர் தாமஸ் தமிழகத்தின் பல்வேறு கல்வி நிறுவனங்களைப் பார்வையிட்டு, மாணவர்களிடையே உரையாற்ற தேவையான ஏற்பாடுகளையும் கோ4குரு, சவீதா பல்கலைக்கழகத்தின் ஆதரவோடு ஏற்பாடு செய்து உள்ளது.

Read also:அவர்கள் முடியாது என்றார்கள்; நாங்கள் வென்று காட்டினோம்!

முனைவர் தாமஸ், அக்டோபர் 4-ஆம் தேதி வரை தமிழகத்தில் மட்டுமின்றி, இந்தியாவின் பல்வேறு பகுதிகளில் உள்ள பள்ளி மற்றும் கல்லூரி மாணவர்களிடையே உரையாற்ற இருக்கிறார்.

2019-ஆம் ஆண்டில் நடைபெற்ற இந்திய அளவிலான அறிவியல் போட்டியில் வெற்றி பெற்ற மாணவர்கள், கோ4குரு நிறுவனத்தின் சார்பில் வரும் அக்டோபர் மாத முதல் வாரத்தில் நாசாவில் நடத்தப்பட இருக்கும் பன்னாட்டு அளவிலான விண்வெளி அறிவியல் தொடர்பான கட்டுரைப் போட்டியிலும் கலந்து கொள்கிறார்கள். இதில் வெற்றி பெறும் 5 மாணவர்களுக்கு, அமெரிக்காவில் உள்ள ஃபுளோரிடா இன்ஸ்டிட்யூட் ஆஃப் டெக்னாலஜி என்ற நிறுவனம் 10 ஆயிரம் அமெரிக்க டாலரினை கல்வி உதவித் தொகையாக வழங்க முன் வந்துள்ளது.

இந்திய மாணவர்கள் மேற்கொள்ள இருக்கும் நாசா பயணம் மற்றும் அடுத்து நடக்க இருக்கும் விண்வெளி அறிவியல் போட்டிகள் குறித்து செய்தியாளர்களிடம் பேசிய கோ4குரு நிறுவனத்தின் தலைமை செயல் அதிகாரியான திரு. காயம்பூ இராமலிங்கம், “பன்னாட்டு அளவில் நடக்கும் விண்வெளி அறிவியல் ஆய்வுகள் மற்றும் அவற்றை மேற்கொள்ளும் நிறுவனங்கள் குறித்து இந்திய மாணவர்களும் தெரிந்து கொள்ள வேண்டும் என்ற நோக்கத்தில் 2017-ஆம் ஆண்டு இந்த அறிவியல் போட்டிகளைத் தொடங்கினோம்.

இதில் சமூகத்தின் எல்லாத் தரப்பு மாணவர்களும், பங்கேற்க வேண்டும் என்பதாலேயே எளிமையான அறிவியல் மற்றும் பொது அறிவு கேள்விகளைக் கொண்டு இந்தப் போட்டியை வடிவமைத்து உள்ளோம். இது இணைய வழியில் நேரடியாக பங்கேற்கும் வகையிலான ஒரு போட்டி. மாணவர்கள், அவரவரது வீடுகளில் இருந்தும் கூட இப்போட்டியில் பங்கேற்க முடியும்” எனத் தெரிவித்தார்.

– ராகு

சரியும் பொருளாதாரத்தை தடுத்து நிமிர்த்த முடியுமா?

Valar
-
0
சரியும் பொருளாதாரத்தை தடுத்து நிமிர்த்த முடியுமா?

முன்னணி மோட்டார் சைக்கிள் உற்பத்தி நிறுவனங்களில் ஒன்றான ஹீரோ மோட்டோ கார்ப்பரேஷன் நிறுவனம் நான்கு நாள்கள் உற்பத்தியை நிறுத்துவதாக அறிவித்தது. வியாபார மந்த நிலை காரணமாக ஆகஸ்ட் 15 முதல் 18 வரை நான்கு நாள்கள் வேலையில்லா நாள்களாக அறிவிக்கப்படுவதாக நிர்வாகம் தரப்பில் கூறப்பட்டது.

முன்னதாக டிவிஎஸ் லூகாஸ் நிறுவனம் ஏற்கெனவே சில நாள்களை வேலையில்லா நாள்களாக அறிவித்து இருந்த நிலையில், குறிப்பிட்ட மூன்று பிரிவுகளைத் தவிர்த்து மற்ற பிரிவுகளில் உள்ள ஊழியர்களுக்கு ஆகஸ்ட் 16, 17 ஆகிய நாட்களை வேலையில்லா நாள்களாக அறிவித்தது. டிவிஎஸ் நிறுவனத்தின் அங்கமான டிவிஎஸ் லூகாஸ், மோட்டார் வாகனங்களுக்கான எலெக்ட்ரிக் கருவிகளைத் தயாரித்து வருகிறது.

மகேந்திரா & மகேந்திரா நிறுவனம் ஜூலை முதல் செப்டம்பர் வரை, 8 முதல் 14 நாள்கள் தங்களது தொழிற்கூடங்களை மூடுவதாக அறிவித்ததுது. டாட்டா மோட்டார்ஸ் நிறுவனம் 8 நாள்களும், மாருதி சுசுகி 3 நாள்களும், டொயோட்டா கிர்லோஸ்கர் நிறுவனம் 8 நாள்களும், அசோக் லேலண்ட் நிறுவனம் 9 நாள்களும், போஸ்ச் நிறுவனம் 10 நாள்களும், ஜம்மா ஆட்டோ நிறுவனம் 20 நாள்களும் மற்றும் வாப்கோ நிறுவனம் 19 நாள்களும் தங்களது தொழிற்கூடங்களை முடுவதாக அறிவித்து மூடின.

ஹீரோ மோட்டோ கார்ப்பரேஷன் நிறுவனத்தைப் பொறுத்தவரை இந்தியாவில் ஐந்து இடங்களில் தொழிற்கூடங்கள் உள்ளன. ஆந்திர மாநிலம், சித்தூர் மாவட்டத்தில் ஆறாவதாக ஒரு தொழிற்கூடம் கட்டப்பட்டு வருகிறது.
நடப்பு நிதியாண்டின் தொடக்கத்தில் இருந்தே ஹீரோ நிறுவனத்தின் விற்பனை குறைந்து உள்ளது. வியாபார மந்த நிலை காரணமாக தொடர்ந்து முன்னணி நிறுவனங்கள் வேலை நாள்களை குறைத்து வருவதால் ஊழியர்களுக்கும் நேரடி மற்றும் மறைமுக பாதிப்பு ஏற்பட்டு உள்ளது.

இந்திய ஆட்டோமொபைல் கூட்டமைப்பு ஜூலை மாதத்துக்கான உள்நாட்டு வாகன விற்பனை குறித்த விவரங்களை அண்மையில் வெளியிட்டு இருந்தது.
அதில் மோட்டார் சைக்கிள் விற்பனையில் 18.88 சதவிகிதம் சரிவு ஏற்பட்டுள்ளதாகக் கூறப்பட்டது. 2018 ஜூலையில் 11,51,324 மோட்டார் சைக்கிள்கள் விற்பனை செய்யப்பட்டிருந்த நிலையில், இந்த ஆண்டின் ஜூலை மாதத்தில் இந்த எண்ணிக்கை 9,33,996 ஆகக் குறைந்து உள்ளது. ஒட்டு மொத்த இரு சக்கர வாகன விற்பனையில் 16.82 சதவிகித சரிவு ஏற்பட்டு உள்ளது. மேலும் கார், வர்த்தக வாகனங்கள் என அனைத்து ஆட்டோமொபைல் விற்பனையும் பெரும் சரிவைச் சந்தித்து உள்ளது.
வாகன உற்பத்திக்கான செலவுகள் அதிகரிப்பு, உதிரிப்பாகங்கள் இறக்குமதிக்கான வரி உயர்வு, அதிக ஜிஎஸ்டி போன்ற பல்வேறு நெருக்கடிகளைச் சந்தித்து வரும் வாகனத் துறை, விற்பனையில் ஏற்பட்டுள்ள வீழ்ச்சியால் மேலும் பாதிக்கப்பட்டுள்ளது.

Also read:எதிலெல்லாம் முதலீடு செய்யக் கூடாது?

அதன் தொடர்ச்சியாகவே டிவிஎஸ் லூகாஸ் நிறுவனத்தின் வேலை நாட்கள் குறைப்பு ஏற்பட்டு உள்ளது. வியாபார நிலைமை தொடர்ந்து ஆய்வு செய்யப்பட்டு வருவதாகவும், இது குறித்து ஊழியர்களுக்குப் பின்னர் அறிவிக்கப்படும் என்றும் தெரிவிக்கப்பட்டு உள்ளது.
ஆயிரக் கணக்கானோர் பணியாற்றும் சென்னையின் முக்கியமான ஆட்டோமொபைல் நிறுவனம் வேலை நாட்களைக் குறைப்பது அதிர்ச்சியை ஏற்படுத்தி உள்ளது. இது மற்ற நிறுவனங்களுக்கும் தொடருமோ என்ற கேள்வியையும் எழுப்பி உள்ளது.

அதிக மக்கள் தொகை கொண்ட, தொழில் வளர்ச்சி பெறும் நாட்டில் மோட்டார் வாகன சந்தை வீழ்ச்சியை நோக்கி செல்வது பல்வேறு கேள்விகளை எழுப்பி உள்ளது.
இது பற்றி பொருளாதார வல்லுநர் திரு. ஜெ. ஜெயரஞ்சன், கூறியபோது,
”விற்பனையை ஒவ்வொரு ஆண்டும் அதற்கு முந்தைய ஆண்டோடு ஒப்பிடுவர், அல்லது இந்த காலாண்டை இதற்கு முந்தைய காலாண்டோடு ஒப்பிடுவர். இப்படிப் பார்க்கும் போது கடந்த 40 மாதங்களில் இல்லாத அளவுக்கு இப்போது மோட்டார் வாகன விற்பனை குறைந்து உள்ளது. அதிலும் கடந்த 15 லிருந்து 20 மாதங்களில் தொடர்ந்து வீழ்ச்சியை நோக்கி சென்று கொண்டு இருக்கிறது. இதையே வியாபார மந்த நிலை என்று கூறுகிறார்கள். மோட்டார் வாகன உற்பத்தித் துறை மட்டுமல்ல பல துறைகளும் தற்போது வீழ்ச்சி அடைந்து வருகின்றன. ஒவ்வொரு துறையிலும் அந்த வீழ்ச்சியின் அளவு வேறுபடுகிறது.

சாதாரண மக்கள் பயன்படுத்தும் ஸ்கூட்டர், மோட்டார் சைக்கிள்கள், அதற்கு பின் குறைந்த விலை கார்கள், அதிக விலை கார்கள், லாரி, பேருந்து, டிராக்டர் ஆகிய அனைத்தையும் உள்ளடக்கியதுதான் மோட்டார் வாகன உற்பத்தித் துறை. இதில் உள்ள ஒவ்வொரு வாகனப் பிரிவுகளும் ஒவ்வொரு துறைகளை முதன்மைப் படுத்துகின்றன.

சான்றாக டிராக்டர் உற்பத்தியில் மந்த நிலை ஏற்படுகிறது என்றால் கிராமப் புறங்கள் நன்றாக இல்லை என்று பொருள். விவசாயம் செழிப்பாக இல்லை என்றால் டிராக்டர்கள் வாங்குவது குறைந்து போகும். கிராமப் புற, நகர்ப் புறங்களைச் சார்ந்த கீழ் நடுத்தர வகுப்பினரிடம் வேலை வாய்ப்பு, பணப் புழக்கம் இல்லை என்றால் மோட்டார் சைக்கிள்கள் விற்பனை இருக்காது.
உயர் நடுத்தர வர்க்கத்தினரிடம் பணப்புழக்கம் குறைகிறது என்றால் கார்கள் விற்பனை குறைந்து விடும். புதிய தொழில் தொடங்கப்படவில்லை என்றால், தொழிலுக்கான முதலீடுகள் குறைந்து போனால் சரக்கு போக்கு வரத்துக்கான லாரிகள் விற்பனை குறைந்து போகும். ஆக ஒட்டு மொத்தமாக மோட்டார் வாகன உற்பத்தித் துறையின் வியாபாரம் மந்த நிலையை அடைந்ததற்கு காரணம், அனைத்து தரப்பிலும் பணப் புழக்கம் இல்லை, பொருளாதாரம் தேக்க நிலையை அடைந்து உள்ளது.

இந்தத் துறையில் உள்ள சுமார் பத்து நிறுவனங்கள் சில நாள்கள் தொழிற்கூடங்களை மூடுவதால், அவற்றைச் சார்ந்து உள்ள நிறுவனங்களுக்கும் பாதிப்பு ஏற்படும்.
ஒவ்வொரு பெரிய நிறுவனத்திற்கு பின்னாலும் ஆயிரம் சிறிய நிறுவனங்கள் உள்ளன.

சான்றுக்கு ஒரு பிரபல நிறுவனம் கார் தயாரிக்கிறது என்றால், முழு காரையும் அந்த நிறுவனம் தயாரிப்பது இல்லை. காரில் உள்ள உதிரி பாகங்கள் அனைத்தும் தனித்தனி நிறுவனங்களில் தயாராகி பெரிய நிறுவனத்திற்கு வரும். அதாவது ஒரு நிறுவனம் காரின் டயரை மட்டும் தயாரிக்கும், இன்னொரு நிறுவனம் பிரேக்கை மட்டும் தயாரிக்கும், மற்றொரு நிறுவனம் எலெக்ட்ரிக் பாகங்களை தயாரித்து அனுப்பும். காருக்கு தேவையான இரும்பு தகடுகள் ஒரு தொழிற்சாலையில் தயாராகும். அந்த இரும்பு வேறு ஒரு ஆலையில் இருந்து வரும்.
பெரிய நிறுவனம் அந்த பாகங்களை எல்லாம் சேர்த்து காரை உருவாக்கும். இந்நிறுவனம் சில நாள்கள் தொழிற்கூடத்தை மூடினால் அதற்கு பாகங்களை விநியோகிக்கும் ஆயிரம் நிறுவனங்களும் தங்களது உற்பத்தியை நிறுத்த வேண்டும். அந்த நிறுவன ஊழியர்களும் குடும்பங்களும் வேலையிழப்பை சந்திக்க வேண்டி வரும்.

Also read:சீனாவிடம் கற்றுக் கொள்ள என்ன இருக்கிறது?

இத்தகைய ஆலை மூடலால் ஏற்படும் இழப்பு ஒரு சங்கிலித் தொடர் போன்றது. இந்த தற்காலிக வேலை இழப்பால் பாதிக்கப்படும் லட்சக் கணக்கான குடும்பங்களின் வருவாய் பறி போகிறது. வாகன உற்பத்தி நிறுவனங்களின் வியாபாரம் மந்த நிலையை அடையும். அதனால் அதை நம்பி உள்ள நிறுவனங்கள், அதைச் சார்ந்த லட்சக்கணக்கான குடும்பங்களைச் சேர்ந்த இவர்களுக்கு நிரந்தர வேலை இழப்பு ஏற்படும். இதற்கு மல்டிபிளையர் என்று பெயர். அடுக்கி வைக்கப்பட்ட சீட்டுகளில் ஒன்றை அடித்தால் ஒன்று மற்றொன்றை அடித்து சாய்த்துக் கொண்டே போகுமே அப்படியானது இது.
அப்படியானால் ஒட்டு மொத்தமாக அத்தனை தரப்பையும் பதம் பார்த்து விடுமா இந்த வியாபார மந்த நிலை?
இல்லை. அதைத் தடுக்க வாய்ப்புகள் உள்ளன. அவ்வாறு சரிந்து கொண்டே வரும் சீட்டுக் கட்டில் இடையில் இரண்டு சீட்டுகளை உருவி விட்டால் போதும், பின்னால் உள்ள சீட்டுகள் விழாமல் தடுக்கலாம். அதைப் போல் வியாபார மந்த நிலையைப் போக்க நிறுவனங்களுக்கு அரசு, வங்கிகள் மூலமாக நிதியை அளிக்க வேண்டும். மேலும் இந்த வாகனங்களை வெளிநாடுகளுக்கு ஏற்றுமதி செய்யும் பணிகளை மேற்கொள்ள வேண்டும். அதன் மூலம் இந்த மந்த நிலையை குறைக்கலாம்.

மிக முக்கியமாக கிராமப்புற வேலைவாய்ப்புகளை ஊக்குவிக்க வேண்டும், அரசு அவர்களுக்கான வேலைவாய்ப்புகளை ஏற்படுத்திக் கொடுக்க வேண்டும். கிராமப் புறங்களில் தேக்க நிலை ஏற்பட்டால் ஒட்டு மொத்தமாக நாட்டின் அனைத்து துறைகளையும் பாதிக்கும். வாங்கும் திறன் அதிகரித்தால்தானே சந்தையில் விற்பனை இருக்கும். அதை விடுத்து வெளிநாட்டு நிறுவனங்களுக்கு எவ்வளவு சலுகைகள் அளித்தாலும் அவர்கள் தொழில் தொடங்க முன்வர மாட்டார்கள். தங்கள் பொருள்களை விற்க முடியா விட்டால் எப்படி வருவார்கள்? வேலைவாய்ப்புகளை ஏற்படுத்தா விட்டால் இந்த சீட்டுக்கட்டு சரிவதை நிறுத்த முடியாது.” என்கிறார், திரு. ஜெயரஞ்சன்.

– எவ்வி

விதை முளைக்கவில்லை; பதவி கிடைத்தது

Valar
-
0
விதை முளைக்கவில்லை; பதவி கிடைத்தது

வெற்றிகரமாக செயல்படும் ஒரு நிறுவனத்தின் மேலாண் இயக்குநர், செயல் திறன் உடைய ஒருவரை தன் நிறுவனத்தில் பணி புரியும் இளைஞர்களிடம் இருந்து தலைமை மேலாளர் ஆக பணி புரிய தேர்வு செய்ய விரும்பினார். அதற்கு அறிவிப்பு ஒன்றினை வெளியிட்டார்.

அதாவது தனக்குக் கீழ் பணிபுரியும் இளைஞர்கள் அனைவரையும் ஒரு கூட்டரங்கில் ஒன்று சேர்த்து அவர்களிடம் “இளைஞர்களே உங்கள் ஒவ்வொருவரிடமும் ஒரு மரத்திற்கான விதையும் அதனை முளைக்க வைத்து வளரச் செய்வதற்கான மண் தொட்டியும் வழங்கப்படும். நீங்கள் உங்கள் வீடுகளில் மண்தொட்டியை வைத்து அதில் விதையை ஊன்றி தினமும் தண்ணீர் ஊற்றி பராமரிக்க வேண்டும். ஒரு ஆண்டுக்குப் பின்னர் அனைவரும் மண்தொட்டியை அதில் வளர்ந்து உள்ள செடியுடன் எடுத்துக் கொண்டு வர வேண்டும். அப்போது நான் அவற்றைப் பார்வையிட்டு உங்களுள் ஒருவரை தலைமை மேலாளர் ஆக தேர்வு செய்வேன்” எனக் கூறி அனுப்பி வைத்தார்.

அவர்களுள் ஒருவரான அன்பு எனும் இளைஞரும், ஆர்வமாக வீட்டிற்கு சென்று தன் துணைவியிடம் விவரங்களைக் கூறி, அலுவலகத்தில் கொடுத்த விதையை, தொட்டியில் ஊன்றி சூரிய ஒளி படும் இடத்தில் வைத்து தண்ணீர் ஊற்றி பராமரித்து வந்தனர்.

அந்த இளைஞனுடன் பணி புரிந்த மற்ற நண்பர்கள், தாங்கள் நட்ட விதை முளைத்து செடியாக வளர்வது பற்றி அவ்வப்போது பேசிக் கொண்டிருந்தனர். ஆனால், அன்பு தொட்டியில் மட்டும் எதுவும் முளைக்கவே இல்லை. ஆயினும் நாள்தொறும் தண்ணீர் ஊற்றி பராமரித்து வந்தார். ஒரு ஆண்டு ஆனது. அப்போதும் முளை விடவில்லை. அனைவரும் குறிப்பிட்ட நாளில் அதே கூட்டரங்கிற்கு தாம் வளர்த்து வந்த செடிகளுடனான தொட்டிகளுடன் வந்து சேர்ந்தனர்.
ஆனால் செடி ஏதும் முளைக்காத தொட்டியை கூட்டரங்கிற்கு எடுத்து வந்த போது மற்ற அனைவரும் அதை வியப்புடன் பார்த்தனர். இந்நிலையில் நிறுவனத் தலைவர் கூட்டரங்கிற்கு வந்து சேர்ந்தார்.

“நண்பர்களே! இன்று உங்களுள் ஒருவரை தலைமை மேலாளர் ஆக நியமனம் செய்ய இருக்கிறேன். என்று கூறி விட்டு, அருகில் இருந்த தன் நேர்முக உதவியாளரை அழைத்து, அன்பு என்பவரை அழைத்து வரச் சொன்னார். அன்பு, குழப்பத்துடன் செடி எதுவும் முளைக்காத அவருடைய தொட்டியுடன் மேடைக்கு வந்தார்.
உடன் தலைவர், “வாருங்கள் அன்பு அவர்களே ! இந்த நிறுவனத்தின் தலைமை மேலாளராக தேர்ந்து எடுக்கப்பட்டு உள்ளீர்கள். அந்த பதவியை ஏற்றுக் கொள்ளுங்கள்!” என கைகுலுக்கி வாழ்த்தினார்.

தொடர்ந்து, மற்றவர்களைப் பார்த்து, “நண்பர்களே! நான் கடந்த ஆண்டு உங்கள் அனைவருக்கும் இதே நாளில் முளைக்காத விதைகளைத்தான் கொடுத்தேன். நீங்கள் சில நாட்களாகியும் விதை முளைக்கவில்லையே என்று கவலைப்பட்டு அந்த முளைக்காத விதைக்கு பதிலாக, வேறு விதையை ஊன்றி செடியாக வளர்த்துக் கொண்டு வந்து இருக்கிறீர்கள்.
ஆனால் அன்பு மட்டும் நான் கொடுத்த விதை முளைக்காததால், அந்த தொட்டியை வெறுமனே கொண்டு வந்து இருக்கிறார். இந்த உண்மைத் தன்மைக்காகவே அவரை தலைமை மேலாளர் ஆக தேர்வு செய்தேன். ஒரு நிறுவனத்தின் சிறப்பான செயல்பாட்டுக்கு அந்த நிறுவனத்தின் உண்மைத் தன்மை உள்ள மேலாளர்களே பெரும் பங்கு வகிக்கிறார்கள்.” என்றார்.

– ச. குப்பன்

அமெரிக்காவில் அரசின் பொதுப் பள்ளிகளே அதிகம்!

Valar
-
0
அமெரிக்காவில் அரசின் பொதுப் பள்ளிகளே அதிகம்!

“அமெரிக்காவில் அனைத்துப் பள்ளிகளும் தனியார் பள்ளிகள்தாமே?”, “அமெரிக்காவில் பெரும்பாலான மாணவர்கள் தனியார் பள்ளிகளில்தானே படிக்கின்றனர்?” என்றெல்லாம் நண்பர்கள் கேட்பதுண்டு. ஆனால், இங்குள்ள நிலைமையோ நாம் நினைப்பதற்கு நேர்மாறானது.

அமெரிக்காவில் மொத்த மாணவர்களின் எண்ணிக்கை ஏறத்தாழ 5 கோடியே 60 இலட்சம் பேர். இவர்களுள் 5 கோடியே 7 இலட்சம் பேர், அதாவது ஏறத்தாழ 90% மாணவர்கள் அரசுப் பள்ளிகளில் பயில்கின்றனர்.
இங்கு அரசுப் பள்ளிகள் பொதுப் பள்ளிகள் (Public Schools) என்று அழைக்கப்படுகின்றன. 10% மாணவர்கள் மட்டுமே தனியார் பள்ளிகளில் பயில்கின்றனர்.

2017-18 ஆண்டில் 33 இலட்சம் அரசுப் பள்ளி மாணவர்களும், 3 இலட்சம் தனியார் பள்ளி மாணவர்களும்+2 முடிக்கின்றனர். பள்ளிப் படிப்பை முடிப்பவர்களில் ஏறத்தாழ 70% பேரே கல்லூரியில் சேருகின்றனர்.
அமெரிக்காவில் மொத்தம் 98,200 அரசுப் பள்ளிகளும், 34,600 தனியார் பள்ளிகளும் உள்ளன. அரசுப் பள்ளிகளோடு ஒப்பிடும்போது தனியார் பள்ளிகளில் மாணவர்கள் எண்ணிக்கை குறைவாகவே உள்ளது.

32 இலட்சம் ஆசிரியர்கள் அரசுப் பள்ளிகளில் பணிபுரிகின்றனர். அரசுப் பள்ளிகளில் சராசரியாக ஓர் ஆசிரியருக்கு 16 மாணவர்களும், தனியார் பள்ளிகளில் ஓர் ஆசிரியருக்கு 12 மாணவர்களும் உள்ளனர்.
2017-18 ஆண்டில் பள்ளிக் கல்விக்காக அரசுக்கு ஆன செலவு 623.5 பில்லியன் டாலர்கள் இன்றைய ரூபாய் மதிப்பில் 43 இலட்சத்து 64 ஆயிரத்து 500 கோடி ரூபாய்க்குச் சமம்.

ஒரு கல்வி ஆண்டில் ஒரு மாணவருக்கு ஆகும் செலவு 12,300 டாலர்கள் (ஏறத்தாழ 8 இலட்சத்து 61 ஆயிரம் ரூபாய்) ஆகும். மாவட்ட, மாநில, மத்திய அரசமைப்பின் மொத்தச் செலவில் 32% பள்ளிக் கல்விக்காகச் செலவிடப்படுகின்றது. அமெரிக்காவின் மொத்த ஜிடிபி-யில் 7 சதவீதத்துக்கும் மேல் கல்விக்காகச் செலவிடப்படுகின்றது. அதிகபட்சமாக 2009-ஆம் ஆண்டில் 7.6% செலவிடப்பட்டது. 2016-இல் 7.2% செலவிடப்பட்டுள்ளது.

இங்கு என் பேரன் முதல் வகுப்புப் படித்த அரசு தொடக்கப் பள்ளியில் நான் நேரில் பார்த்தவையும், தெரிந்து கொண்ட தகவல்களும்:
பெரிய பெரிய வகுப்பு அறைகள். ஒவ்வொரு மாணவர்க்கும் தனி மேஜை, நாற்காலி.
ஒரு வகுப்பில் 20 மாணவர்கள், இரண்டு ஆசிரியர்கள். போதுமான எண்ணிக்கையில் ஆண்/பெண் கழிப்பு அறைகள். மிகப்பெரிய நூலகம். ஏராளமான புத்தகங்கள், கணினிகள். மிகப்பெரிய விளையாட்டுத் திடல். அழகான கலையரங்கம்.
அரசுப் பள்ளிகளில் அந்தப் பகுதியில் குடியிருப்பவர்கள் மட்டுமே படிக்க முடியும். கல்வி ஆண்டில் எப்போது வேண்டுமானாலும் சேரலாம். ரசுப் பள்ளிகளில் பிள்ளைகளைப் படிக்க வைக்கவே பெற்றோர் விரும்புகின்றனர். அதற்காக, அரசுப் பள்ளி இருக்கும் பகுதிக்கு மாறிக் கொள்கின்றனர்.

அரசுப் பள்ளிகளில் கட்டணம் எதுவும் கிடையாது. முற்றிலும் இலவசக் கல்வி. புத்தகம், நோட்டு எதுவும் வாங்க வேண்டாம். யூனிஃபார்ம் கிடையாது. ஏழை மாணவர்களுக்கு இலவச மதிய உணவு உண்டு. மற்றவர்கள் மாதத் தொடக்கத்தில் ஒரு தொகையைச் செலுத்திவிட்டு, தேவையான நாட்களில் மதிய உணவு பெற்றுக் கொள்ளலாம்.

ஒவ்வொரு மாணவரும் டஜன் கணக்கில் பேனா, பென்சில், ரப்பர் போன்றவற்றை வாங்கி ஆண்டுத் தொடக்கத்தில் பள்ளியில் கொடுத்துவிட வேண்டும். ஏழை மாணவர்கள் தர வேண்டியது இல்லை. அவற்றை மொத்தமாகப் போட்டு அனைத்து மாணவர்களும் பகிர்ந்து கொள்வர்.
புத்தகம், நோட்டுகள் எதையும் சுமந்து செல்ல வேண்டியது இல்லை. தினமும் ஒன்றிரண்டு ஹோம்-ஒர்க் தாள்களை ஒரு கோப்புறையில் வைத்துத் தருவர். அவற்றைச் செய்து முடித்து அடுத்த நாள் திருப்பித் தரவேண்டும்.
நொறுக்குத் தீனி, மதிய உணவு எடுத்துச் செல்லலாம். தூய்மையான குடிநீர் உண்டு.
சனி, ஞாயிறு, புதன் அரைநாள் பள்ளி விடுமுறை. பெற்றோர் இருவரும் வேலைக்குச் செல்கின்ற வீட்டுக் குழந்தைகளை மாலை 6 மணிவரை பார்த்துக் கொள்ளும் வசதி உண்டு. அதற்குக் கட்டணம் செலுத்த வேண்டும்.
தனியார் பள்ளிகளில் பள்ளிப் பேருந்து வசதி கிடையாது. அனைத்து அரசுப் பள்ளிகளிலும் உண்டு.

ஒரு பேருந்து நிறுத்தத்தில் பள்ளிப் பேருந்து நிற்கும்போது, சாலையின் இரு புறங்களிலும் செல்லுகின்ற வாகனங்கள் அனைத்தும் அப்படியே நின்றுவிட வேண்டும். பள்ளிப் பேருந்தைக் கடந்து எந்த வாகனமும் செல்லக் கூடாது. பிள்ளைகள் இறங்கி அல்லது ஏறி முடித்துப் பள்ளிப் பேருந்து கிளம்பிய பிறகே பிற வாகனங்கள் பயணத்தைத் தொடர வேண்டும்.

– அருணகிரி (மு. சிவலிங்கம் பதிவில் இருந்து..)

1...272829...59Page 28 of 59