அண்மையில்தான் நிதி அமைச்சர் திருமதி. நிர்மலா சீதாராமன், வங்கிகள் இணைப்பைப் பற்றி அறிவித்தார். ஆனால் அதைத் தொடர்ந்து வந்து உள்ள இந்தியப் பொருளாதாரம் குறித்த ஜிடிபி (Gross Domestic Product) தரவுகள் அதிர்ச்சி கொடுப்பதாக இருக்கின்றன. 2019 – 20 நிதி ஆண்டுக்கான, 2019 ஏப்ரல் – 2019 ஜூன் காலாண்டு காலத்துக்கான, இந்தியாவின் பொருளாதார வளர்ச்சியைக் குறிக்கும் ஜிடிபி வெறும் 5 சதவிகிதம் என அறிவிக்கப்பட்டு அனைவரையும் ஏமாற்றம் அடையச் செய்து இருக்கிறது.

கடந்த 2018 – 19 நிதி ஆண்டின் மார்ச் 2019 காலாண்டில் இந்தியாவின் பொருளாதார வளர்ச்சியைக் குறிக்கும் ஜிடிபி 5.8 சதவிகிதமாக இருந்தது. மக்களிடையே நுகர்வில் ஏற்பட்டிருக்கும் சரிவுதான் இந்த 0.8 சதவிகித ஜிடிபி சரிவுக்கு முதன்மையான காரணமாக இருக்கிறது.

கடந்த ஐந்து ஆண்டு காலங்களில், இந்தியப் பொருளாதாரம் ஏப்ரல் 2019 முதல் ஜூன் 2019 வரையான காலத்தில்தான் மிகக் குறைந்த வளர்ச்சி கண்டு இருக்கிறது.

போதுமான முதலீடுகள் வராதது, தேவைகள் குறைந்தது போன்றவைகள்தான் இந்திய பொருளாதார வளர்ச்சி சரிவுக்கு காரணம் என்கிறார்கள் பொருளாதார வல்லுநர்கள்.

ஜிடிபி வளர்ச்சி குறித்து, பொருளாதார ஆலோசகர் திரு. கிருஷ்ணமூர்த்தி சுப்ரமணியன், 2019 – 20 நிதி ஆண்டுக்கான ஜிடிபி வளர்ச்சி 7 சதவிகிதமாக இருக்கலாம் எனச் சொல்லி இருந்தார்.

ஆர்பிஐ தன்னுடைய ஆகஸ்ட் மாத நிதிக் கொள்கைக் கூட்டத்தில், இந்தியாவின் ஜிடிபி வளர்ச்சி 2019 – 20 நிதி ஆண்டில் 6.9 சதவிகிதமாக இருக்கும் எனக் கணித்து இருந்தது. அதே நேரத்தில் 2019 – 20 நிதி ஆண்டின் ஏப்ரல் முதல் செப்டம்பர் வரையான முதல் அரையாண்டில் ஜிடிபி வளர்ச்சி 5.8 சதவிகிதமாகவும், அடுத்த அக்டோபர் 2019 – மார்ச் 2020 வரையான அரையாண்டில் ஜிடிபி வளர்ச்சி 6.6 சதவிகிதமாகவும் இருக்கும் எனக் கணித்து இருந்தது.

உலகின் முக்கிய அனலிஸ்ட் நிறுவனங்களில் ஒன்றான க்ரிசில், இந்தியாவின் 2019 – 22 நிதி ஆண்டுக்கான ஜிடிபி வளர்ச்சியை 6.9 சதவிகிதமாக நிர்ணயித்து இருக்கிறது. இதற்கு காரணமாக மோசமான வானிலை, உலக பொருளாதார மந்த நிலைகளைச் சுட்டிக் காட்டுகிறார்கள். இந்திய பொருளாதாரம் முதல் அரையாண்டில் மந்த நிலையில் இருந்தாலும், அடுத்தடுத்த வட்டி விகித குறைப்பு, நுகர்வு போன்ற காரணங்களால் அடுத்த அரையாண்டில் நிலை கொள்ளும் எனச் சொல்லி இருக்கிறார்கள்.

– அரசி

– 86 வயது சமையல் கலைஞர் நாராயணன் விளக்குகிறார்!

தொழில் முனைவோர் எந்த வயதிலும் சுறுசுறுப்பாக இருப்பார்கள்; அவர்களுக்கு யாராலும் பணி ஓய்வு கொடுக்க முடியாது என்பதற்கு ஒரு எடுத்துக் காட்டாக விளங்குகிறார் எண்பத்து ஆறு வயதிலும் தனது சிறிய அளவிலான உணவகத்தை தனது மகளுடன் சேரந்து நிர்வகித்து வரும் திரு. நாராயணன். இவர் சென்னை, குன்றத்தூரில் ­உள்ள சம்பந்தம் நகரில், ஓட்டல் தென்றல் என்ற சைவ உணவகத்தை நடத்தி வருகிறார். சமையல் துறைக்கு அவர் வந்தது குறித்தும், அவர் தொழில் வாழ்க்கை குறித்தும் வளர்தொழிலுக்க அவர் அளித்த பேட்டியின் போது,

”நான் கேரளாவைச் சேர்ந்தவன். எனக்கு அப்போதி பதினொரு வயது இருக்கும். என் குடும்ப சூழ்நிலை காரணமாக ஏதாவது வேலைக்கு போக வேண்டிய கட்டாயம். தெரிந்தவர் ஒருவர் என்னை ஒரு ஓட்டலில் பணிக்கு சேர்த்து விட்டார். அங்கு என்னுடைய வேலை, சமையலுக்குத் தேவையான பொருட்களை கடைகளில் இருந்து வாங்கி வருவது, சமையலுக்கு உதவியாக இருப்பது ஆகியவைதான். அதற்கு மாத ஊதியமாக ஒன்றரை ரூபாய் தந்தார்கள்.

அந்த உணவகத்தில் சில மாதங்கள்தான் வேலை பார்த்தேன். என்னுடைய அண்ணன் அங்கிருந்து சென்னைக்கு அழைத்து வந்தார். அப்போதுதான் சிந்தாதிரிப்பேட்டை, அண்ணாசாலையில் கீதா கஃபே திறப்பதற்கான பணிகள் நடந்து கொண்டு இருந்தன. அங்கே வேலைக்கு சேர்ந்தேன். அப்போது அது பெரிய உணவகமாக அமைந்து இருந்தது. சென்னையின் பல பகுதிகளில் இருந்து அங்கே உண்ண வருவார்கள். உணவுகள் தரமாகவும், சுவையாகவும் இருக்கும். பரிமாறுகிறவர்களும் நல்ல சீருடையுடன், நட்புடன் பரிமாறுவார்கள். அந்த காலக் கட்டத்தில் கீதா கஃபேயின் காப்பிக்கு அடிமையானவர்கள் நிறைய பேர்கள் இருந்தார்கள்.

அங்கு சில மாதங்கள் வேலை பார்த்த பிறகு, வேறு ஓட்டலுக்கு சென்று விட்டேன். எனக்கு கொஞ்சம் கோபம் அதிகமாக வரும். இதனால் ஏதாவது காரணங்களால், அவ்வப்போது கோபப்பட்டு ஓட்டல் ஓட்டலாக மாறிக் கொண்டிருந்தேன். எனது இந்த கோபத்தை கட்டுப்படுத்தி பணி புரிந்து இருந்தால் என் வளர்ச்சி இன்னும் பெரிதாக இருந்து இருக்கும். தொழில் முனைவோராக இருந்தாலும், பணி புரிவோராக இருந்தாலும் தேவையற்ற கோபங்களில் இருந்த தங்களைக் காத்துக் கொள்ள வேண்டும். கோபம் என்ற உணர்ச்சிக்கு ஆட்பட்டு எடுக்கும் முடிவுகள் பல நேரங்களில் தப்பாக போய் விடுவதை என் அனுபத்தில் கண்டு உணர்ந்து இருக்கிறேன்.

பல ஓட்டல்களில் பணி புரிந்ததால், ஓட்டல் தொழில் தொடர்பான பல செய்திகளை விரைவிலேயே கற்றுக் கொண்டேன். இருபத்தைந்து வயதிலேயே மாஸ்டர் ஆகி விட்டேன். நான் பணி புரிந்த அனைத்து உணவகங்களிலுமே, அந்த உணவகங்களின் உரிமையாளர்களுக்கு அன்பானவனாகவே இருந்தேன்.

கோவையில் ஒரு ஓட்டலில் மூன்று ஆண்டுகள் பணி புரிந்தேன். அந்த ஓட்டலில் ஒவ்வொரு மாத சம்பளத்தில் இருந்தும் ஐந்து ரூபாய் பிடித்து வைத்திருந்து, அவசரத்தேவை என்றால் அந்த தொகையை நம்மிடம் கொடுப்பார்கள். ஒருமுறை என் தேவைக்காக அந்த தொகையைக் கேட்ட போது கொடுக்க மறுத்ததோடு என்னை அடித்தும் விட்டார்கள்.

அங்கிருந்து வெளியேறி சொந்தமாக தேநீர் கடை தொடங்கினேன். சரியாக வரவில்லை.

கேரளாவில் இருந்து வருபவர்கள் பெரும்பாலும் தேநீர்க் கடை, சிறிய ஓட்டல்கள் தொழிலில் ஈடுபடுவதாக பலரும் எண்ணுகிறார்கள். கேரளாவில் இருந்து மட்டும் அல்ல; வெளியூர்களுக்கு வேலைக்கு வருபவர்கள் அனைவருமே இந்த வேலைகளில், தொழில்களில்தான் ஈடுபடுவார்கள். ஏனென்றால், தேநீர்க் கடைகளிலும்,

ஓட்டல்களிலும் தான் உடனடியாக வேலை கிடைக்கும். அதே போல், சொந்தமாக கடை வைப்பவர்களும் முதலில் தேநீர்க் கடையைத் தான் தேர்ந்து எடுப்பார்கள். ஏனென்றால் அதற்கு குறைந்த அளவு முதலீடு போதும். உரிமையாளரே டீ மாஸ்டராகவும் இருந்தால் லாபமும் கூடுதலாக இருக்கும். தேநீர் அனைவரும் அருந்தக் கூடிய ஒன்றாகவும் உள்ளது. எனவே பொதுவாக அதில் நட்டம் ஏற்படாது.

பிறகு சிறிய உணவகம், இனிப்பகம், தேங்காய்க் கடை, எண்ணெய்க் கடை, காப்பித் தூள் கடை என பல கடைகள் வைத்தேன். எதையும் தொடர்ந்து நடத்த முடியவில்லை. இப்போது சிந்தித்துப் பார்த்தால் என்னுடைய பொறுமை இன்மையும், சிந்திக்காமல் எடுத்த அவசர முடிவுகளே இதற்குக் காரணமாக இருக்குமோ என்று எண்ணுகிறேன்.

ஓட்டல் தென்றல் என்னுடைய இருபத்தெட்டாவது கடை. இங்கு வியாபாரம் நன்றாக நடந்து கொண்டு இருக்கிறது. என் மகள் லட்சுமி வயிற்று பேத்தியின் பெயர் தென்றல். அவள் பெயரில்தான் இந்த உணவகத்தை நடத்தி வருகிறேன். லட்சுமிதான் எனக்கு உதவி யாக இருக்கிறார். சாப்பிட வருபவர் களுக்கு பரிமாறுவது, பார்சல் கட்டுவது போன்ற வேலைகளைப் பார்த்துக் கொள்கிறார். சமையல் வேலைகளை நான் பார்த்துக் கொள்கிறேன்.

ஒரு முறை எங்கள் உணவகத்துக்கு வந்து சாப்பிட்டவர்கள், தொடர்ந்து வருகிறார்கள். காலையில் இட்லி, பூரி-கிழங்கு, பொங்கல், வடை ஆகியவற்றை தயாரிப்பேன். பொங்கல் அதிகமாக விற்பனை ஆகும். இதற்குக் காரணம் பொங்கலுடன் நான் வழங்கும் சுவையான சாம்பார்தான். என் சமையலின் சுவைக்கு காரணம் நான் சேர்க்கும் பொருள்கள்தான்.

பொங்கலுக்கு, ஒரு கிலோ பச்சரிசி என்றால், ஒரு கிலோ பாசிப்பருப்பு சேர்ப்பேன், பெரிய ஓட்டல்களில் கூட கிலோ அரிசி என்றால் நூற்று ஐம்பது அல்லது இருநூறு கிராம் பருப்பு மட்டுமே சேர்ப்பார்கள். இரண்டாவது, ஒரு கிலோ பொங்கலுக்கு முக்கால் கிலோ எண்ணெய் சேர்த்தால் கரண்டியில் ஒட்டாது, மென்மையாகவும் இருக்கும். அடுத்து, பச்சை மிளகாய், மிளகு, சீரகம், இஞ்சி, முந்திரி ஆகியவற்றை நெய்யில் தாளிக்க வேண்டும். பானையில் வைத்து தம் கொடுக்க வேண்டும். அதாவது பதினைந்து நிமிடங்களுக்கு அப்படியே மூடி வைத்து விட வேண்டும். இதைத்தான் தம் கொடுப்பது என்கிறேன். இதைப் போன்ற பல நுட்பங்கள் உணவகச் சமையலில் இருக்கின்றன. இவற்றை ஓட்டல்கள் நடத்தும் தொழில் முனைவோர் கற்றுக் கொள்ள வேண்டும்..

அடுத்து சாம்பார். பருப்பு வேக வைக்கும் போதே தேவையான அளவு காய்கறிகள், மற்றும் மசாலாக்களை (மஞ்சள் தூள், மிளகாய் தூள், தனியா தூள்) சேர்த்து கொதிக்க வைக்க வேண்டும். பின் அதனோடு தாளிப்பையும் சேர்த்து கொதிக்க வைக்கும் போது மணமாகவும், சுவையாகவும் இருக்கும். தாளிப்பின் போது கட்டிப் பெருங்காயம் சேர்க்க வேண்டும். உடன், கொத்து மல்லி, கறிவேப்பிலை சேர்த்து கொதிக்க வைக்கம்போது மேலும் மணமாக இருக்கும். இந்த சாம்பாரை விரும்பி வரும் வாடிக்கையளர்கள் அதிகம். இந்த சாம்பாரை வாங்கிக் குடிப்பவர்களும் இருக்கிறார்கள்.

சில பெரிய ஓட்டல்களில் சாம்பார் செய்முறை முற்றிலும் மாறுதலாக இருக்கும். பருப்பை வேக வைத்து, புளித் தண்ணீரில் தேவையான காய்கறிகளையும், மசாலா வையும் சேர்த்து தனியே வேக வைத்து சாம்பாரைத் தாளித்து, மேற்கண்ட கலவையை சேர்த்து கொதிக்க வைப்பர். இறுதில் கறிவேப்பிலை, கொத்துமல்லி சேர்த்து இறக்குவார்கள். இந்த முறையில் சுவையும், மணமும் குறைவாகவே இருக்கும்.

நான் ஓட்டல்களில் வேலை செய்துக் கொண்டு இருக்கும் போதே, சுவைக்காகவும், மணத்திற்காகவும் சற்று மாறுதலாக சமைத்துப் பார்ப்பேன். வாடிக்கையாளர் களை கவர்வதற்கு இத்தொழிலில் சுவையும், மணமுமே முக்கிய காரணம் ஆகும்.

தொடக்கத்தில் அவ்வளவாக ஆர்வம் இல்லாமல் தொடங்கிய இந்த வேலைதான் இன்றைக்கு என்னை வாழ வைத்துக் கொண்டு இருக்கிறது. இடையில் எனக்கு நடிகராக வேண்டும் என்ற ஆவலும் இருந்தது. அதன் விளைவாக என்னுடைய 22-ஆவது வயதில் ஒரு நாடகத்தில் நடித்தேன். அதில், என்னுடன் நடிகர் சிவகுமாரும் இணைந்து நடித்தார். மேலும், எனக்கு பாடல்கள் எழுதுவதிலும், பாடுவதிலும் ஆர்வம் உண்டு. என் மனைவி திருமதி. தங்கமணியை நினைத்து நிறைய கவிதைகள் எழுதி வைத்து இருக்கிறேன். எனக்கு மொத்தம் ஏழு குழந்தைகள். அவர்களில் இருவர் இறந்து விட்டனர். ஒரு மகள் என்னுடன் இருக்கிறார். மகன்கள் வேறவேறு தொழில்களில் இருக்கிறார்கள். அவ்வப்போது அன்புடன் என்னைப் பார்த்துச் செல்வார்கள்.” என்றார் திரு. நாராயணன்.

– சா. கு. கனிமொழி

கடந்த ஜுலை 19, 2019 உடன் 14 தனியார் வங்கிகள் அரசுடமையாகி அரை நூற்றாண்டாகி விட்டது. அதற்குப் பின்னர், 1980ல் மேலும் சில தனியார் வங்கிகளை பிரதமர் தேசிய மயமாக்கினார்.

இன்று அந்த வங்கிகளின் நிலைமை என்ன? பொது மக்களுக்குச் சாதகமா… பாதகமா? அவற்றின் சேவையும், தரமும் மேம்பட மைய அரசு என்னென்ன நடவடிக்கை எடுக்கலாம்?

சாதனை: பாசிட்டிவான அம்சங்களை முதலில் கவனிக்கலாம். விரல் விட்டு எண்ணினாற் போன்ற ஒரு சில பெரும் செல்வர்களுக்கு மட்டுமே 1969 வரைஅவை கடன் அளித்து வந்தன. நடை பாதையில் கடை வைத்திருப்பவர்கள், சிறிய ஊரில் தொழில் நடத்திப் பிழைப்பவர்கள், விவசாயிகள் போன்ற பலரும் வங்கியை அணுகி, கடன் பெற்று, முன்னேறலாம் என்ற நிலைக்கு வந்தது 1969க்கு பின்தான். இதை யாரும் மறுக்க இயலாது.

2010 க்குப் பிறகு, கணினியின் செயல்பாடு மெருகேறி, ‘ஆதார வங்கித் தன்மை’ (கோர் பாங்கிங் சிஸ்டம்) நுழைந்தவுடன், வங்கிகளின் சேவை மிகவும் மாறி விட்டது.

குறைந்த செலவில், உடனே தொகை அனுப்பும் வசதி, இல்லத்தில் அமர்ந்து கொண்டே கைபேசி மூலம் இருப்பைத் தெரிந்து கொள்ளவும், பணப் பரிமாற்றம் செய்யவும் இருக்கிற வாய்ப்பு, விடுமுறையானால் கூட, அண்மையில் இருக்கும் ஏடிஎம்மில் பணம் எடுக்கிற பயன்பாடு… என்று பட்டியல் நீண்டு கொண்டே போகின்றது. (இதனாலேயே தொடர் விடுமுறை, வேலை நிறுத்தம் போன்றவற்றால் வாடிக்கையாளர்கள் பெருமளவு பாதிக்கப்படுவது கிடையாது.)

சோதனை: முதலில் குறிப்பிட வேண்டியது ஆட்குறைப்பும், வல்லுநர்கள் பற்றாக்குறையும். சுமார் 50 லட்சம் கடன் தொகைக்கு விண்ணப்பித்து வரும் வாடிக்கையாளருக்கு கூட சரியான, தெளிவான பதில் சொல்ல அதிகாரிகள் இல்லை. “… இல்லை, விடுப்பு” “உங்கள் கிரெடிட் ஸ்கோர் பார்க்கணும்” “சிஸ்டம் சரியாக வேலை செய்யவில்லை” “மேலதிகாரி மாற்றலாகி விட்டார்” போன்ற சாக்கு போக்குகள் சொல்லி, வாடிக்கையாளரை இழுத்தடிக்கிறார்கள்.

இதனாலேயே வீட்டுக்கடன், வாகனக் கடன் போன்ற பிரிவுகளுக்கான கடன்களை வங்கிகள் உடனே வழங்குகின்றன போலத் தோன்றுகிறது.

அடுத்ததாக வாராக் கடன். இதனால் அனைத்து வங்கிகளுமே விழிபிதுங்கி நிற்கின்றன. நானறிந்த வரையில், ஒரு கோடிக்கு மேல் (இன்று 25 கோடியாக இருக்கலாம்) கடன் வழங்கும் போது இரண்டு அல்லது மூன்று வங்கிகள் சேர்ந்துதான் வழங்குவார்கள். மத்திய ரிசர்வ் வங்கியின் அதிகாரியும் இதில் இடம் பெறுவார். இப்படியிருக்கும்போது, ஏக் தம் நூறு கோடி கடன் பெற்று, ஓடி விடுகிறார்கள். இது எப்படி நடைபெறுகிறது? நிச்சயமாக அரசியல் தலையீடு இருப்பதால்தான்.

மூன்றாவது பணியாளர்களிடம்… கடை நிலை ஊழியரில் இருந்து பொது மேலாளர் வரை… தென்படும் ஒழுக்கக் கேடு, விரைவில் பணம் குவிக்கலாம் என்கிற மனநிலை எல்லாரிடையேயும் பரவி உள்ளது. கேஒய்சி போல கேஒய்எஸ் (Know Your Staff -உங்கள் ஊழியரை தெரிந்து கொள்ளுங்கள்) என்ற தன்மை கொணர வேண்டும் என்று ஓய்வு பெற்ற மூத்த மேலதிகாரி என்னிடம் தெரிவித்தார்.

மைய அரசு வங்கிகளின் நிலைமையை முற்றும் உணர்ந்து உரிய நடவடிக்கைகள் எடுக்க வேண்டியது அவசியம்.

வேதனை: என்னதான் சேவையில் முன்னேற்றம் இருந்தால்கூட, பல “பற்றுகள்” இருப்பில் திடீரென வந்து விடுகின்றன. மேலும், எஸ்எம்எஸ் எனும் குறுஞ்செய்தி அனுப்ப என்று மாதம்தோறும் குறிப்பிட்ட கட்டணம் வசூல் பண்ணினாலும், முக்கியமான அம்சங்களில் குறுஞ்செய்தி வருவதில்லை.

என் நண்பரின் மகனுக்கு வீட்டுக் கடனில், வீடு காப்பீடு செய்யும் போது ஒரேயடியாக 5 ஆண்டுகளுக்கு சேர்ந்து மொத்தமாக பற்று வைத்து விட்டார்கள். அதே போல், பாதுகாப்புக் கட்டணத்துக்காக, இருப்பில் உள்ள ஆயிரம் ரூபாயை எடுக்க முடியாமல் ‘நிறுத்தி’ விட்டார்கள். வங்கியின் கோணத்தில் இது சரியாக இருக்கலாம். ஆனால் முன்னறிவிப்பு தராமல் செய்யலாமா?

எல்லா வங்கிகளுமே இது போன்ற சிக்கல்களுக்குத் தரும் ஒரே பதில்: “நாங்கள் பண்ணவில்லை சார்,. சிஸ்டம் செய்து விடுகிறது.” சிஸ்டம், பேக்கேஜ், ரன் போன்ற சொற்களை படித்தவர்களாலேயே புரிந்து கொள்ள முடிவதில்லை. சாதாரண வாடிக்கையாளர்கள் புரிந்து கொள்வார்களா?

முன்பு பாரத ஸ்டேட் வங்கி செய்து வந்த பல வேலைகளை… வருமான வரி, ஓய்வூதியம் – அரசு வங்கிகளின் மீது சுமத்தி விடுவதால், ஒரு சாதாரண வாடிக்கையாளர் கேட்கிற சந்தேகங்களுக்குப் பதிலளிக்க நேரம் இருப்பதில்லை.

ஆனாலும், ஒரு சிலர்,, இன்னும் சில ஆண்டுகளில், வங்கிக்குள் நுழைந்து கேள்வி கேட்டாலே ‘சார்ஜ்’ பண்ணி விடுவார்கள். நாம் சேமிக்கும் தொகைக்கும் கட்டணம் போடுவார்கள் போல இருக்கிறது என்று அஞ்சுகிறார்கள். வருங்காலத்துக்காக சேமிக்கும் பழக்கம் அதிகம் உள்ள இந்தியாவில், அந்த நிலைமை வருவதற்கான வாய்ப்பு அரிது.

ஆனாலும், தொழில் துறை மேலும் வளர்ச்சி பெற, விரைவில் விண்ணப்பங்களை ஆராய்ந்து கடன் வழங்கும் திறமை உள்ள இளைஞர்களை நியமித்து பயிற்சி அளிப்பதும் மைய அரசின் பொறுப்பாகும். வாடிக்கையாளர் சேவையை இன்னும் மேம்படுத்த வேண்டியதும் மிகத்தேவை.

– வாதூலன்

நம் தொழிலுக்கு உதவி புரிபவற்றுள் ஒன்றான ப்ளாகர் (Blogger), கூகுள் வழங்கும் இன்னொரு இலவச சேவையாகும். இது ஒரு வலைத்தளம் போல் இயங்கக் கூடியது.. தொழில் தவிர்த்து உங்கள் படைப்புகளை வெளியிடக் கூட ப்ளாக் உருவாக்கலாம்.

தொழில் வலைத் தளத்தில் பொருட்கள், படங்கள், விலைப்பட்டியல், தள்ளுபடிகள், தொடர்பு முகவரி போன்றவை இருக்கும். பொருட்கள் தொடர்பான பெரிய கட்டுரைகளை வலைத் தளத்தில் வெளியிடுவதை விட ப்ளாக்-ல் வெளியிடலாம் மற்றும் தொழில் தொடர்பான கூடுதல் செய்திகளை வெளியிட ப்ளாகர் சிறந்த இடம் ஆகும்.

வலைத்தளம் உருவாக்க டெவலப்பர் உதவி தேவைப்படும். ஆனால் ப்ளாக்-ஐ நாமே உருவாக்கி விடலாம். இதற்கு வலைத் தள மொழி தேவை இல்லை. உங்கள் ஜிமெயில் முகவரி கொண்டு இந்த சேவையை பயன்படுத்திக் கொள்ளலாம்.

blogger.com என்ற வலைத் தளத்திற்கு சென்று உங்கள் ஜிமெயில் முகவரி கொடுத்து லாகின் செய்யுங்கள் Blogger profile என்ற காலம் தோன்றும் இங்கு நீங்கள் கொடுக்கும் பெயர் அனைத்து கட்டுரைகளின் அடிப் பகுதியில் தோன்றும். அதனால் எதற்காக ப்ளாக் உருவாக்குகிறீர்களோ அதற்கு ஏற்ற பெயர் அல்லது உங்களுக்கு ஏற்ற பெயர் கொடுத்து அடுத்த பக்கத்திற்கு செல்லுங்கள்.

ப்ளாக் எந்த வித கோடிங்(Coding) இல்லாமல் உருவாக்கலாம் என்பதால். அங்கு தயாராக மாதிரி டெம்ப்ளேட்கள்(Template) இருக்கும். அவற்றில் இருந்து உங்களுக்கு பிடித்த டெம்ப்ளேட்டை தேர்ந்து எடுத்துக் கொள்ளலாம். தேவைப்படும் பொழுது மாற்றியும் கொள்ளலாம்.

டெம்ப்ளேட் தேர்ந்து எடுத்த பிறகு உங்களுக்கான பிளாக் தயாராகி விடும். இடது பக்கத்தில் நிறைய டேப்-கள் (tabs) இருக்கும் அதில் செட்டிங் பகுதிக்கு சென்று ப்ளாக் தலைப்பு மற்றும் ப்ளாக் பற்றி சிறு அறிமுகம் கொடுங்கள். ஜிமெயில் முகவரி கொண்டு உள்ளே வரும் பொழுதும் ப்ளாக் தலைப்பு கொடுக்க முடியும். பிறகு அதில் மாற்றங்கள் செய்ய வேண்டும் என்றால் செட்டிங் (Setting) பகுதியில் மாற்றிக் கொள்ள முடியும்.

HTTP / HTTPS :
செட்டிங் பகுதியில் http / https என்ற இடத்தில் https என்பதற்கு சரி (yes) கொடுங்கள். அதாவது https என்பதில் கடைசி எழுத்தான “S” பாதுகாப்பை (Security) குறிக்கிறது. https என்பது உங்கள் வலைத் தளம் அல்லது ப்ளாக் போன்றவற்றில் இருந்தால் அந்த வலைத் தளம் அல்லது ப்ளாக் பாதுகாப்பானது என்று பொருள். படிப்பவர்களுக்கு நம்பிக்கையை அதிகரிக்கும். அதனால் இங்கு https என்பதை தேர்வு செய்யுங்கள்.

வலைத்தளத்திற்கு https வேண்டும் என்றால் அதற்கு ஆண்டுக்கு இரண்டாயிரம் ரூபாய் அளவுக்கு கட்டணம் செலுத்த வேண்டி இருக்கும். இவற்றை SSL certificate என்று அழைப்பார்கள்.

முக்கியமான சில வலைத்தளங்களைப் அவை  பெற்று இருப்பதைப் பார்க்க முடியும்.https என்பதற்கு முன் சிறு பூட்டு படம் இருக்கும். உதாரணமாக தமிழ் கம்ப்யூட்டர் என்ற வலைத்தளத்தில் பாருங்கள் சிறு பூட்டு (lock)  அடுத்து https என்பது இருப்பதை பார்க்கலாம்.

https என்பது முக்கியமானது என்றாலும் சாதாரணமான static வலைத்தளத்திற்கு தேவையில்லை.ecommerce போன்ற dynamic வலைத்தளத்திற்குத்தான் தேவை. இவற்றை வலைத்தளத்தை உருவாக்கும் பொழுது வாங்க வேண்டும் என்று இல்லாமல் எப்பொழுது வேண்டுமென்றாலும் வாங்கிக் கொள்ளலாம்.

Also read:ஆன்லைனில் ட்ரேட்மார்க் பதிவு செய்வது எப்படி?

ப்ளாகில் கட்டுரை அதற்கு ஏற்ற படங்கள், வீடியோ போன்றவை பதிவேற்ற முடியும். மிக முக்கியமாக படங்கள் மற்றும் வீடியோக்கள் நகல் எடுக்கப்படாமல் நமது சொந்த படங்களாகவோ, வீடியோக்களாகவோ இருந்தால் சிறந்தது ஆகும். மற்றவர்கள் பதிவு இட்டு இருக்கும் படங்களையோ, வீடியோக்களையோ பயன்படுத்துவதாக இருந்தால் அவரிடம் ஒப்புதல் வாங்கி பயன்படுத்தலாம்.

இணையத்தில் ஏராளமாக படங்கள் உள்ளட. அவற்றில் பதிப்பு உரிமை இல்லாதவற்றை நாம் பயன்படுத்த தடை இல்லை. பதிப்பு உரிமை உள்ளவற்றைப் பயன்படுத்த, அவர்களிடம் அனுமதி வாங்கியே பயன்படுத்த வேண்டும். சில நிறுவனங்கள் படங்கள், வீடியோக்களை விலைக்கு விற்பனை செய்கின்றன. அவர்களிடன் உரிய கட்டணம் செலுத்தினால் அந்த படங்களையோ, விடியோக்களையோ நம்மை பயன்படுத்திக் கொள்ள அனுமதிப்பார்கள்.

இவ்வாறே அரிய செய்திகளையும், கட்டுரைகளையும் விற்பனை செய்பவர்களும் இருக்கிறார்கள். அதனால் படங்கள் பயன்படுத்தும் பொழுது சரிபார்த்து பயன்படுத்த வேண்டும். ஆனால், காப்பிரைட் இல்லாதவையும் இணையத்தில் குவிந்து கிடக்கின்றன.

ஒரு ஜிமெயில் முகவரிக்கு ஒரு பிளாக் மட்டுமே உருவாக்க முடியும். புதிய ப்ளாக் உருவாக்க அதாவது ஒன்றுக்கு மேற்பட்ட ப்ளாக் வேண்டும் என்றால் புதிய ஜிமெயில் முகவரி கொடுத்து உருவாக்க வேண்டும். தொழில் வளர்ச்சிக்கு ப்ளாக் முக்கியமானதாகும். வாரம் ஒரு கட்டுரையாவது இதில் பதிவு செய்தால் தொடர்ந்து படிப்பார்கள். பல மாதங்களுக்கு ஒரு கட்டுரை என்று எழுதினால் ப்ளாக்குக்கு வரும் பார்வையாளர்கள் குறைந்து விடுவார்கள். தொடர்ந்து கட்டுரைகள், படங்களை பதிவு செய்து கொண்டே இருக்க வேண்டும்.

உங்கள் ப்ளாக்கில் எவ்வளவு பார்வையாளர்கள் வருகிறார்கள், எந்த கட்டுரையை படிக்கிறார்கள், எந்த நாட்டில், மாநிலத்தில், ஊரில் இருந்து படிக்கிறார்கள், ஆண்-பெண் எத்தனை பேர் ப்ளாக்கிற்கு வருகை தருகிறார்கள் என்பதை அறிய கூகுள் அனலிடிக்ஸ் பயன்படுத்தலாம். தொடரின் மூன்றாவது கட்டுரை (https://valar.in/4609/how-to-you-google-analytics) கூகுள் அனாலிடிக்ஸ் எப்படி பயன்படுத்துவது என்பதை விரிவாக பார்த்தோம். அதே போல் உங்கள் ப்ளாக்கிற்கு கூகுள் அனலிடிக்ஸ்tracking id பயன்படுத்தி பார்வையாளர்களின் எண்ணிக்கையை தெரிந்து கொள்ளுங்கள்.

ப்ளாக்கரில் கூட பார்வையார்களின் எண்ணிக்கையை பார்க்க முடியும். ஆனால் அதிகப்படியான தகவல் அனாலிடிக்ஸ் வழங்குவதால், அனாலிட்டிக்சை பயன் படுத்திக் கொள்ளலாம்.

Also read: கூகுள் மை பிசினசில் பதிவு செய்யுங்கள் | டிஜிட்டல் மார்க்கெட்டிங் -4

ப்ளாக்கர் கூகுள் நிறுவனத்தின் இலவச சேவை என்பதால் அனைவரும் இதில் இணைந்து கொள்ள முடியும் . தொழில் செய்யும் அனைவரும் தங்கள் தொழில் தொடர்பான செய்திகளை இதில் வெளியிட்டு வந்தால் வாடிக்கையா ளர்களாலும், உங்கள் நிறுவனம் பற்றி தெரிந்து கொள்ள விரும்பும் புதியவர்களாலும் உங்கள் நிறுவனத்தின் செய்திகளை அறிந்து கொள்ள முடியும்.

– செழியன். ஜா