அமெரிக்கா-சீனா இடையேயான வர்த்தகப் போர் காரணமாக, அமெரிக்கா உடனான இந்தியாவின் ஏற்றுமதி உயர்ந்துள்ளது. நடப்பு நிதி ஆண்டின் முதல்பாதியில் 755 மில்லியன் டாலர் அளவில்அமெரிக்காவுக்கு இந்தியா கூடுதல் ஏற்றுமதியை மேற்கொண்டிருப்பதாக ஐக்கிய நாடுகளின் வர்த்தகம் மற்றும் முதலீடு தொடர்பான அமைப்பு மேற்கொண்ட ஆய்வில் தெரியவந்துள்ளது.

குறிப்பாக வேதிப் பொருட்கள், உலோகங்கள், தாதுப் பொருட்கள் ஆகியவற்றை இந்தியா அதிக அளவில் அமெரிக்காவுக்கு ஏற்றுமதி செய்திருப்பதாக அந்த ஆய்வில் தெரிவிக்கப்பட்டு உள்ளது.

கடந்த ஆண்டு முதலே அமெரிக்கா மற்றும் சீனாவுக்கு இடையே வர்த்தகப் போர் நிலவி வருகிறது. சீனப் பொருட்களுக்கு அமெரிக்காவும், அமெரிக்கப் பொருட்களுக்கு சீனாவும் வரி விகிதத்தை கடுமையான அளவில் உயர்த்தின. இதனால் இரு நாடுகளும் பாதிப்பைச் சந்தித்தன. அந்தவகையில் சீனாவின் ஏற்றுமதி அமெரிக்காவில் குறைந்ததனால், அந்த வாய்ப்புகள் பிற நாடுகளுக்கு கிடைத்தன.

கிட்டத்தட்ட 21 பில்லியன் டாலர் அளவில் அமெரிக்கா உடனான சீனாவின் வர்த்தகம் வேறு நாடுகளுக்கு திசைமாற்றப்பட்டது. இதில் தைவான், மெக்ஸிகோ, ஐரோப்பிய ஒன்றியம் ஆகியவை பெரும் பயன் அடைந்தன. இந்தியா, கொரியா, கனடா ஆகிய நாடுகள் குறைந்த அளவில் பயன் அடைந்தாலும், அமெரிக்கா உடனான அந்நாடுகளின் வர்த்தகம் 0.9 பில்லியன் முதல் 1.5 பில்லியன் வரைஉயர்ந்துள்ளது.

இந்த வர்த்தகப் போரினால் இந்தியா நடப்பு நிதி ஆண்டின் முதல்பாதியில் அமெரிக்காவுக்கு 755 மில்லியன் டாலர் அளவில் கூடுதல் ஏற்றுமதியை மேற்கொண்டுள்ளது. வேதிப் பொருட்கள் 243 மில்லியன் டாலர் அளவிலும், தாது மற்றும் உலோகங்கள் 181 மில்லியன் டாலர் அளவிலும், மின் இயந்திரங்கள் 83 மில்லியன்டாலர் அளவிலும் ஏற்றுமதி செய்யப்பட்டுள்ளன. தவிர வேளாண் பொருட்கள், அலுவலக இயந்திரங்கள், ஜவுளிப் பொருட்கள் ஆகியவற்றின் ஏற்றுமதியும் உயர்ந்துள்ளன.

நடப்பு நிதி ஆண்டின் முதல்பாதியில் 35 பில்லியன் டாலர் அளவில் அமெரிக்காவுடனான ஏற்றுமதியை சீனா இழந்துள்ளது. இந்த இரு நாடுகளுக்கிடையேயான வர்த்தகப் போர் அந்த இரு நாடுகளை மட்டும் பாதிப்பதில்லை, மாறாக உலகப் பொருளாதாரத்தையும் பாதிக்கிறது என்று ஐ.நா வர்த்தக அமைப்பு தெரிவித்துள்ளது.

அமெரிக்காவில் சிக்காகோவில் கன்சாலஸ் என்றொரு பாதிரியார் வாழ்ந்து வந்தார். அவருக்கு ஒருநாள் ஏழை எளிய மக்களுக்காக ஒரு சிறந்த தொழிற்கல்வி நிறுவனத்தைத் தொடங்க வேண்டும் என்ற ஆசை பிறந்தது.

நல்லவற்றை போதிக்கும் அந்த கல்வி நிறுவனத்தைத் தொடங்க அவர் எவ்வளவு பணம் தேவை என்று கணக்கு போட்டுப் பார்த்தார். அவர் விரும்பும் அந்த சிறந்த கல்விக் கூடத்தைத் தொடங்க சுமார் ஒரு மில்லியன் டாலர் தேவைப்பட்டது.
அவரிடம் அவ்வளவு பணம் இல்லை. தம்மால் இது முடியாது என்று அவர் விட்டு விடவில்லை. நாள்தோறும் இதே எண்ணமாகவே இருந்தார். எப்பொழுதும் இதைப்பற்றியே சிந்தித்து வந்தார். இப்படியே சுமார் இரண்டு ஆண்டுகள் சென்றன.

இதற்கு என்ன செய்யலாம் என்று சிந்தித்துப் பார்த்தபோது தேவாலயத்தில் பிரார்த்தனை முடிந்த பின்னர் தனது எண்ணத்தை வந்திருப்போரிடம் சொல்லலாம் என்று முடிவு செய்தார். மனிதர்கள் உதவக்கூடும் என்ற எதிர்பார்ப்புடன் அதன்படி 1890ம் ஆண்டில் ஒரு நாள் தான் நிறுவ விரும்பிய கல்விக் கூடத்தைப் பற்றி மிகச் சிறப்பாக விரிவான முறையில் எடுத்து உரைத்தார்.

அந்தக்கூட்டத்தில் ஒரு பெரிய பணக்காரர் இருந்தார். அவர் பெயர் ஆர்மர். கன்சாலசின் பேச்சும் எண்ணமும் அவரை மிகவும் கவர்ந்து விட்டது. உடனே பாதிரியாரை அணுகி தான் பத்து மில்லியன் டாலர் நன்கொடை தருவதாய்க் கூறினார். மேலும் கன்சாலஸ் தொடர்ந்து ஐந்து ஆண்டுகள் அந்த கல்வி நிறுவனத்தை தலைமையேற்று நடத்த வேண்டும் என்றும் கேட்டுக் கொண்டார்.

பின்னர் ஆர்மர் தான் தருவதாய் கூறிய தொகையின் ஒரு பகுதியாக ஒரு மில்லியன் டாலர் பணத்தையும் கொடுத்தார். கன்சாலஸ் ஒரு மில்லியன் டாலரைக் கொண்டு 1893ல் ஆர்மர் இன்ஸ்டிட்யூட் ஆஃப் டெக்னாலஜி என்றொரு கல்வி நிறுவனத்தைத் தொடங்கினார். அவரே அக்கல்லூரியின் தலைவராகவும் பொறுப்பு ஏற்றுக் கொண்டார். ஆர்மர் இன்ஸ்டிடியூட் ஆஃப் டெக்னாலஜி என்ற பெயரில் புதிய கல்வி நிறுவனம் செயல்படத் தொடங்கியது.

இன்று உலகத்தின் சிறந்த கல்வி நிறுவனங்களில் இதுவும் ஒன்றாக திகழ்கிறது.

ஒரு நிறுவனம் அடுத்த கட்டத்தை நோக்கிச் செல்வதற்குப் புதிய தொழில்நுட்பங்களைப் பயன்படுத்தினால், நிச்சயம் வளர்ச்சிக்கு அதிக வாய்ப்புகள் உள்ளன என்று கூறுகிறார் டேப்ட்ரீ (Tab Tree) நிறுவனர் திரு. விஜயன். நமது இதழுக்காக அவரிடம் பேட்டி காண சென்னை இராயப்பேட்டையில் உள்ள அவரது நிறுவனத்திற்குச் சென்றோம். அப்போது அவர் இவ்வாறு கூறினார்-

“நான் ஒரு பொறியியல் பட்டதாரி. 2001 ஆம் ஆண்டு தங்கவேலு பொறியியல் கல்லூரியில் எலக்ட்ரிக்கல் அண்டு எலக்ட்ரானிக்ஸ் துறையில் பட்டம். பெற்றேன். கல்லூரியில் படிக்கும்போதே நண்பர்களுக்காக கணினிகளை பழுதுபார்க்கும் வேலையைச் செய்து வந்தேன். 2001 -ல் கல்லூரி முடிந்தது. எனது நண்பர்கள் அனைவரும் வேலை தேட ஆரம்பித்தனர்.

அப்போது ஐடி துறை மிகவும் சரிவடைந்த நிலையில் இருந்தது. அதனால் மிகக் குறைந்த ஊதியம் மட்டுமே தரத் தயாராக இருந்தார்கள். அதனால், கல்லூரி முடிந்து சில நாட்களிலே எனது நண்பர் ஒருவருடன் சேர்ந்து கம்ப்யூட்டர் சேல்ஸ் அண்டு சர்வீஸ் செய்ய ஆரம்பித்தேன்.

அப்போது சவுக்கார் பேட்டையில் ஒரு சிறிய இடத்தில் எங்களது நிறுவனத்தை பிட்ஸ் அண்டு பைட்ஸ் என்ற பெயரில் ஆரம்பித்தேன். தொடக்கத்தில் வீடுகள், அலுவலகம் என எங்கெல்லாம் கணினியில் சிக்கல் உள்ளதோ, அங்கே சென்று அவர்களிடம் இருந்து கணினியை எடுத்து வந்து சரிசெய்து ஒரு நாளிலே டெலிவரி செய்து விடுவோம். ஆறு ஆண்டுகள் வரை இந்த சேல்ஸ் அண்டு சர்வீஸ் வேலையை செய்து வந்தோம். அப்போது நிறைய அனுபவங்கள் கிடைத்தன.
எனக்கு புதிய தொழில்நுட்பங்களை அறிவதும், அவற்றைப் பயன்படுத்தி அலுவலகங்களில் உள்ள தொழில்நுட்பச் சிக்கல்களுக்கு தீர்வு காண்பதும் மிகவும் விருப்பமான ஒன்றாக இருந்தது. அதன் காரணமாக 2006 ஆம் ஆண்டு அதே பெயரில் ஐடி கன்சல்டிங் சேவையை ஆரம்பித்தேன். அதாவது ஒரு நிறுவனத்திற்கு கணினி தொடர்பாக தேவையான அனைத்து வசதிகளையும் வழங்குதே இதன் நோக்கம்.

நான் தொடங்கியது ஐடி கன்சல்டிங் நிறுவனம்தான். ஆனாலும் நான் சேல்ஸ் அண்டு சர்வீஸ் சேவையையும் இதே பெயரில் நடத்தி வந்ததால் எங்களை ஒரு ஐடி கன்சல்டிங் நிறுவனமாக யாரும் பார்க்கவில்லை. எந்த வரவேற்பும் இல்லை. அதனால் மார்க்கெட்டிங் மற்றும் பிராண்டிங் என்பதும் ஒரு நிறுவனத்திற்கு எவ்வளவு முக்கியம் என்பதை அறிந்து கொண்டேன் பின்னர் டேப்ட்ரீ என்று எங்கள் நிறுவனத்தின் பெயரை மாற்றினோம். அதற்கென வெப்சைட் நிறுவினோம்.

Also read:டிடிஎச் சேவைகளில் வந்துள்ள புதிய தொழில் நுட்பங்கள்!

நான் எனது நிறுவனத்திற்கான சிறந்த மார்க்கெட்டிங் ஆக நினைப்பது எங்கள் நிறுவனத்தால் மனநிறைவு அடைந்த வாடிக்கையாளர், எங்களின் சேவையை மற்றவர்களுக்கு பரிந்துரை செய்வதைத்தான்.

எங்கள் நிறுவனத்தில் தற்போது பல சேவைகள் இருக்கின்றன. அவற்றுள் முதன்மையாக நான்கு சேவைகள் உள்ளன. அவை, இன்ஃப்ரா கன்சல்ட்டிங், டேர்ன் கீ ப்ராஜெக்ட், மெயின்ட்டனன்ஸ், டேட்டா கேப்சர் ஆகும். இந்த நான்கிற்குள் எங்களது அனைத்து சேவைகளும் அடங்கும். இன்ஃப்ரா கன்சல்டிங் என்பது, ஒரு நிறுவனத்திற்கு தேவையான அனைத்துக் கணினிகளையும் அமைத்துக் கொடுப்பது. அதில் பயன்படுத்தும் ஒவ்வொரு பொருளையும் எங்கு வாங்க வேண்டும், எந்த தரத்தில் வாங்க வேண்டும் என அனைத்து விவரங்களுக்கும் ஆலோசனை தருவோம்.

டேர்ன் கீ ப்ராஜெக்ட் என்பது புதிதாக ஆரம்பிக்கப்படும் நிறுவனம் எங்களுடன் ஒப்பந்தம் செய்து கொண்டு அவர்கள் நிறுவனத்திற்கு என்னென்ன தேவை என்பதை கூறிவிடுவார்கள். அதற்கு ஏற்றாற்போல் கணினி அமைத்தல், மென்பொருள் நிறுவுதல், இணைய இணைப்பு ஏற்படுத்துதல், ஆன்ட்டி வைரஸ் நிறுவுதல், பேக்கப் எடுத்தல், செக்யூரிட்டி அலெர்ட் செட்டிங்ஸ் என அனைத்தையும் முடித்துக் கொடுப்போம். மெயின்ட்டனன்ஸ் என்பது கணினி அமைத்த பிறகு எந்த சிக்கல் வந்தாலும் அதனை சரி செய்ய எங்களது பொறியாளர் ஒருவர் அந்த நிறுவனத்திலேயே இருப்பார்.

டேட்டா கேப்சர் என்பது ஒரு நிறுவனம் பற்றிய அனைத்து விவரங்களையும் சேகரிப்போம். அதாவது, எங்கள் சேவைகளை செயல்படுத்துவதற்கு முன்னர், மற்றும் செயல்படுத்திய பின்னர் என இரு வகையாக தரவுகளை சேகரிப்போம். எங்கள் சேவைகளுக்கு முன்னர் அவர்களது செயல்பாட்டுக்கான வேகம் மற்றும் தெளிவு, தரம் ஆகியவற்றால் அவர்களது லாபம் எவ்வளவு இருந்தது, எங்கள் சேவைகளை செயல்படுத்திய பின்னர் எவ்வாறு இருந்தது என்று இந்த தரவுகள் மூலம் தெரிந்து கொள்ள முடியும்.

எங்கள் சேவைகள் நடுத்தர நிறுவனங்களுக்குப் பெரிதும் பொருந்தும். எங்களிடம் தற்போது 800 நிறுவனங்கள் வாடிக்கையாளர்களாக இருக்கின்றனர். நாங்கள் நிறுவனம் தொடங்கிய காலத்தில் 4 ஊழியர்கள் மட்டுமே இருந்தனர். தற்போது எங்களிடம் 134 ஊழியர்கள் இருக்கிறார்கள். மற்றும் பாண்டிச்சேரி மற்றும் சென்னையில் எங்கள் நிறுவனம் இருக்கிறது. பெங்களூர் மற்றும் சேலத்தில் எங்கள் எங்களது குழுக்கள் உள்ளன.

எனது தொழில்நுட்பத் திறமைக்கு ஏற்றவாறு எனது இலக்குகளையும் வைத்து இருக்கிறேன். இன்னும் அதை நான் அடையவில்லை. அதை அடையத் தேவையான வேலைகளைச் செய்து வருகிறேன் என்றார், திரு. விஜயன் (9840990784).

– எஸ். உஷா

தொழில் அதிபர்களில் எழுதுபவர்கள் மிகச் சிலரே! என்னதான் வணிகக் கல்வி வழங்கும் கல்லூரிகளில் பணிபுரியும் பேராசிரியர்கள் தொழில் பற்றியும் வணிகம் பற்றியும் எழுதினாலும், தொழிலதிபர்கள் எழுதும் எழுத்துகள் அளவுக்கு அனுபவம் சார்ந்து இருக்காது. அதனாலேயே தொழிலதிபர்கள் எழுதும் நூல்களுக்கு உலகம் முழுவதும் வரவேற்பு அதிகமாக உள்ளது. ராபர்ட் கியோசாகியின் வெற்றிக்கான முக்கிய 15 விதிகள்.

திரு. ராபர்ட் கியோசாகி (Robert Kiyosaki) அமெரிக்காவைச் சேர்ந்த தொழி லதிபர். இவர் தொழில் முன்னேற்றம் குறித்தும், வாழ்வில் உயரத் தேவையான பண்புகள் குறித்தும் நிறைய எழுதி இருக்கிறார். தன்னம்பிக்கை உருவாக்கும் பயிற்சியாளர். வணிகக் கல்வி அளிக்கும் ரிச் டாட் (Rich Dad) பயிற்சி நிறுவனத்தை தோற்றுவித்தவர். இவர் எழுதிய ரிச் டாட் புவர் டாட் (Rich Dad Poor Dad) புத்தகம் உலக அளவில் அதிகமாக விற்பனை ஆன புத்தகங்களில் ஒன்று.

திரு. ராபர்ட் கியோசாகி, வெற்றிக்கான முதன்மையான பதினைந்து விதிகளாக பின்வருவனவற்றைக் கூறுகிறார்.
1. நீங்கள் எதிர்கொள்ளும் சிக்கலான நேரங்கள் உங்களுக்கு வளர்ச்சிக்கான புதிய வாய்ப்புகளை உருவாக்கும். நீங்கள் வேகமாக செயல்படுவீர்கள்.

2. வெற்றி நோக்கியே உங்கள் கவனத்தைச் செலுத்துங்கள். உங்கள் தொழில் வெற்றியே உங்களுக்கான முதன்மை இலக்காக இருக்கட்டும். கவனம் முழுவதும் வெற்றயை நோக்கியே குவியட்டும்.

3. வாழ்க்கையை எளிமையாக அமைத்துக் கொள்ளுங்கள்.
அது உங்கள் உறுதித் தன்மையை அதிகரிப்பதோடு தன்னம்பிக்கை யையும் அதிகரிக்கும்.

4. உங்கள் திறமைகளை அதிகரிக்க, வல்லமையை அதிகரிக்க அனுபவங்கள் நிச்சயம் கைகொடுக்கும், அவை நல்ல அனுபவங்களாக இருந்தாலும், கெட்ட அனுபவங்களாக இருந்தாலும்.

5. ஏதேனும் தவறுகள் நடந்து விட்டால், அவற்றில் இருந்து பாடம் கற்றுக் கொள்ளுங்கள்.

Also read:உங்களுக்கு உதவும் குறிப்புகள்

6. தொடர்ந்து கற்றுக் கொள்வது என்பது உங்கள் வாழ்க்கையோடு இணைந்த ஒன்றாகட்டும். ஒரு போதும், எந்த வயதானாலும் கற்றுக் கொள்வதை நிறுத்தி விடாதீர்கள்.

7. பணம் தொடர்பான இலக்குகளில் தெளிவாக இருங்கள். அவை முடிந்த வரை துல்லியமாகவும் இருக்கட்டும்.

8. பொறுப்புகளை ஏற்கத் தயங்கா தீர்கள். பெரும்பாலான மனிதர்களுக்கு பொறுப்பைத் தட்டிக் கழிக்கும் குணம் இருக்கிறது. வளர்ச்சிக்கு பயன்படாத இயல்பு இது.

9. எல்லோரும் திடீரென மாட்டிக் கொண்டு தவிப்பது, எதிர்பாராத செலவினங்கள் ஏற்படும்போதுதான். எனவே எதிர்பாராத, எதிர்கால செலவுகள் குறித்தும் திட்டங்களுடன் இருங்கள். அதற்கான நிதி ஒதுக்கீடு செய்து வைத்திருங்கள்.

10. செலவுகள் எப்போதும் உங்கள் கட்டுப்பாட்டில் இருக்கட்டும். தேவை யற்ற செலவுகளை தவிர்க்கத் தயங்கா தீர்கள்.

11. உங்களை மதிக்கும், உங்களுக்கு ஆதரவாக இருக்கும், உங்களைப் போல எண்ணும் மனிதர்களின் எண்ணிக்கை உங்கள் நட்பு வட்டத்தில் அதிகமாக இருக்கட்டும். இதற்கான முயற்சிகளையும் தொடர்ந்து செய்து கொண்டிருங்கள்.

12. தோல்விகளையும், இழப்புகளை யும் கண்டு அஞ்சாதீர்கள். இவற்றைக் கண்டு அஞ்சினால் உங்கள் ஓட்டம் உங்களை அறியாமலேயே தடைபட்டு விடும்.

13. எதற்காக உழைக்கிறோம் என்பதில் தெளிவாக இருங்கள். இது வேறு ஒன்றுமில்லை, தெளிவான இலக்கு உங்களுக்கு இருக்க வேண்டும். அப்போதுதான் நீங்கள் கடினமாக உழைப்பதற்கான பயன் கிடைக்கும்.

14. நீங்கள் ஈட்டும் பொருளை சேமிப்பதை விட முதிலீடு செய்யுங்கள். சரியாக முதலீடு செய்யப்படும் பணம் கூடுதல் லாபத்தை ஈட்டித் தரும்.

15. ஒரு பொருளை வாங்கும் முன், இது இப்போது தேவைதானா என்று உங்களை நீங்களே கேட்டுக் கொள்ளுங்கள். இதற்கான பணத்தை எப்படிக் கொண்டு வரப்போகிறோம் என்பதிலும் தெளிவாக இருங்கள்.

– மலர்

ஜிஎஸ்டி சட்டத்தில் பதிவு செய்து வரி செலுத்தும் ஒவ்வொரு வணிகரும் (சில குறிப்பிட்டவர்கள் தவிர) சிஜிஎஸ்டி, எஸ்ஜிஎஸ்டி சட்டப் பிரிவு 44-ன் படி தங்களின் ஒரு ஆண்டுக்கான மாதம்தோறுமான மற்றும் காலாண்டு விற்பனை தொடர்பாக வழங்கப்பட்ட தகவல்களை ஒருங்கிணைத்து படிவம் ஜிஎஸ்டிஆர் – 9 -ல் ரிட்டர்ன் தாக்கல் செய்ய வேண்டும். இந்த ஒரு ஆண்டுக்கான ரிட்டர்ன் படிவ மாதிரியை (Annual Return) அறிக்கை எண் – 39/2018 (மத்திய வரி) மூலமாக 04-09-2018 அன்று நடுவண் அரசு வெளியிட்டு உள்ளது.

இந்த படிவம் யாருக்கு பொருந்தாது?
ஜிஎஸ்டி சட்டத்தின் கீழ் பதிவு பெற்ற பின்வருபவர்கள் ஆண்டுப் படிவம் தாக்கல் செய்ய வேண்டியது இல்லை.
1. வரி உள்ள வெளி வழங்கல் செய்யும் தற்செயல் வணிகர்கள்.
2. உள்ளீட்டு சேவை வழங்கும் விநியோகிப்பாளர்கள்.
3. வரி விதிக்கத்தக்க வெளிவழங்கல் செய்யும் இந்தியாவில் வசிக்காத வணிகர்கள்.
4. பிரிவு 51 -ன் படி வரிப் பிடித்தம் செய்து வரி செலுத்தும் வணிகர்கள் அல்லது சேவை வழங்குநர்கள். இது நடுவண் அரசின் அறிக்கை எண் – 51 (மத்திய வரி) 13-09-2018 படி 01-10-2018 முதல் நடைமுறைக்கு வர இருக்கிறது.
5. பிரிவு 52 -ன் படி வரி சேகரித்து (டிசிஎஸ்) வரி செலுத்தும் இ-காமர்ஸ் ஆப்பரேட்டர்கள் ஆண்டு ரிட்டர்னை படிவம் ஜிஎஸ்டிஆர் -9 – ஙி தாக்கல் செய்ய வேண்டும். ஆனால் இந்த படிவத்தை இதுவரை நடுவண் அரசு வெளியிடவில்லை.
பிரிவு – 52 நடுவண் அரசு அறிக்கை எண் : 51 (மத்திய வரி) 13-09-2018 படி 01-10-2018 முதல் நடைமுறைக்கு வர உள்ளது.
எப்போது தாக்கல் செய்ய வேண்டும்?

ஒரு நிதி ஆண்டுக்கான ரிட்டர்ன் படிவம் அடுத்த ஆண்டுக்குள்ளோ அல்லது டிசம்பர் 31 அன்றோ தாக்கல் செய்ய வேண்டும். அதாவது, 2017-18 நிதி ஆண்டுக்கான (01-07-2017 முதல் 31-03-2018 வரை) ஆண்டு ரிட்டர்ன் படிவம் 31-12-2018 அன்றோ அதற்கு முன்ன தாகவோ தாக்கல் செய்யப்பட வேண்டும். 01-04-2017 முதல் 30-06-2017 வரை உள்ள விற்பனை விவரத்தை இந்த ஆண்டு ரிட்டர்ன் படிவத்தில் தாக்கல் செய்ய வேண்டியது இல்லை.

ஆண்டு ரிட்டர்ன் படிவங்களின் வகைகள்:
படிவம் ஜிஎஸ்டிஆர் – 9
படிவம் ஜிஎஸ்டிஆர்-1,2,3 தாக்கல் செய்து வரி செலுத்தும் வணிகர்கள் அனைவரும் இந்த படிவத்தை தாக்கல் செய்ய வேண்டும்.
படிவம் ஜிஎஸ்டிஆர் 9-A
இணக்க வரி (காம்போசிசன் வரி) செலுத்தும் எல்லா வணிகர்களும் இந்த படிவத்தை தாக்கல் செய்ய வேண்டும்.
படிவம் ஜிஎஸ்டிஆர் 9-B
ஒரு நிதி ஆண்டில் படிவம் ஜிஎஸ்டிஆர் – 8 தாக்கல் செய்த இ காமர்ஸ் ஆப்பரேட்டர்கள் அனைவரும் இந்த படிவத்தை தாக்கல் செய்ய வேண்டும்.
படிவம் ஜிஎஸ்டிஆர் 9-C
ஒரு நிதி ஆண்டின் விற்பனை இரண்டு கோடி ரூபாயைத் தாண்டினால், அவர் படிவம் ஜிஎஸ்டிஆர் 9-C- ஐ தாக்கல் செய்ய வேண்டும். இவருடைய கணக்குகள் ஒரு ஆடிட்டரால் (சிஏ அல்லது ஐசிஏஐ) தணிக்கை செய்யப்பட வேண்டும். இதன் நகல் ஏற்கெனவே செலுத்தப்பட்ட வரி, தணிக்கை செய்யப்பட்ட பின் செலுத்த வேண்டிய வரி பற்றிய அறிக்கை ஆகியவற்றை படிவம் படிவம் ஜிஎஸ்டிஆர் 9-C உடன் இணைக்க வேண்டும்.

ஒருவர் ஒன்றுக்கு மேற்பட்ட ஜிஎஸ்டி பதிவு எண்கள் பெற்று இருந்தால், ஒவ்வொரு பதிவு எண்ணும் ஒரு தனி ஆளாக கருதப்படும். ஆகவே ஒவ்வொரு பதிவு எண்ணுக்கும் தனித்தனியாக ஆண்டு விற்பனை வருமான படிவம் தாக்கல் செய்ய வேண்டும்.
தண்டத் தொகை
ஆண்டு விற்பனை வருமான படிவத்தை குறிப்பிட்ட காலத்திற்குள் தாக்கல் செய்யாவிட்டால், பிரிவு 46-ன் படி பதினைந்து நாட்களுக்குள் படிவத்தைத் தாக்கல் செய்யுமாறு பதிவு பெற்றவருக்கு அறிக்கை வழங்கப்படும்.
படிவம் தாமதமாக தாக்கல் செய்யப்பட்டால், அவ்வாறு எத்தனை நாட்கள் தாமதம் ஆனதோ, அத்தனை நாட்களுக்கும் நாள் ஒன்றுக்கு இருநூறு ரூபாய் (சிஜிஎஸ்டி ரூ.100+எஸ்ஜிஎஸ்டி ரூ.100) வீதம் தண்டம் விதிக்கப்படும். ஐஜிஎஸ்டி சட்டத்தின் கீழ் தண்டம் விதிக்கப்படாது. அதிகபட்ச தண்டத் தொகையாக ஆண்டு விற்பனை வருமானத்தின் மீது 0. 50%-க்கு மிகாமல் (சிஜிஎஸ்டி சட்டத்தின் கீழ் 25% + எஸ்ஜிஎஸ்டி சட்டத்தின் கீழ் 25%) தண்டம் விதிக்கப்படும். சிஜிஎஸ்டி சட்டம் பொதுப்பிரிவு 125 படி ரூ.25,000 வரை தண்டம் விதிக்க முடியும். தாமத கட்டணத்துடன் ஆண்டுக்கு 18% வட்டியும் சேர்த்து வசூலிக்கப்படும்.

படிவத்தை திருத்த முடியுமா?
ஜிஎஸ்டி சட்டம் பிரிவு 44/விதி 40 ஆகிய இரண்டிலும் ஆண்டு விற்பனை வருமான படிவம் தாக்கல் செய்த பின் அதை திருத்தம் செய்வது குறித்து எந்த விளக்கமும் தரப்படவில்லை. ஆகவே ஆண்டு விற்பனை வருமான படிவம் தாக்கல் செய்தால் அதுவே இறுதியானது. அதில் எந்த மாறுதலும் செய்ய முடியாது.
ஆண்டு விற்பனை வருமான தகவல்கள்
படிவம் ஜிஎஸ்டிஆர் – 9, ஆறு பகுதிகளாகவும் 19 அட்டவணை களாகவும் பிரிக்கப்பட்டு உள்ளது. இந்த படிவத்தில் கொடுக்க வேண்டிய தகவல்கள் என்ன என்பதைப் பார்ப்போம்.

பகுதி – 1 : வரி செலுத்துபவர் பற்றிய பின்வரும் அடிப்படை விவரங்களைக் கேட்கும் தன்மையில் இருக்கும்.
> நிதி ஆண்டு, ஜிஎஸ்டி பதிவு எண், பதிவு செய்துள்ளவரின் சட்டப்பூர்வமான பெயர், பதிவு செய்யப்பட்ட வணிக நிறுவனத்தின் பெயர்.
இந்த விவரங்கள், ஏற்கெனவே பதிவு செய்து இருப்பதால், தானாகவே ஆன்லைனில் இருந்து தோன்றும்.

பகுதி- 2 : நிதி ஆண்டில் தெரிவிக்கப்பட்ட வெளி வழங்கல், உள் வழங்கல் பற்றிய விவரங்கள். இது அந்த ஆண்டில் தாக்கல் செய்யப்பட்ட கீழ்க்கண்ட விற்பனை வருமானங்களின் சுருக்கத்தை ஒருங்கிணைப்பதன் மூலம் எடுக்கப் பட்டதாக இருக்கும்.
> பதிவு பெறாத வணிகர்களுக்கு செய்யப்பட்ட வெளிவழங்கல் (B2C)
> பதிவு பெற்றவர்களுக்கு செய்யப் பட்ட வெளிவழங்கல் (B2B)
> வரி செலுத்தி வெளிநாட்டுக்கு ஏற்றுமதி செய்யப்பட்ட வழங்கல் (சிறப்பு பொருளாதார மண்டல வழங்கல் தவிர)
> வரி செலுத்தி சிறப்பு பொருளாதார மண்டலங்களுக்கு செய்யப்பட்ட வழங்கல்
> கருதப்பட்ட ஏற்று மதிகள்(Deemed Export)
> பெறப்பட்ட முன் பணத்துக்கு வரி செலுத்திய பின்னும் விலைப் பட்டியல் (டேக்ஸ் இன்வாய்ஸ்) எழுப்பப்படாமல் இருந்தால் அதைப்பற்றிய விவரம்.
> எதிரிடை வரி (ரிவர்ஸ் சார்ஜ்) செலுத்த வேண்டிய உள்வழங்கல்.
மேற்கண்டவற்றின் மொத்த தொகையில் வரவு குறிப்பு (கிரடிட் நோட்) தொகையைக் கழித்து பற்றுக் குறிப்பு (டெபிட் நோட்) தொகையைக் கூட்டிக் கொள்ள வேண்டும். மாத படிவத்தில் திருத்தங்கள் (அமெண்ட்மென்ட்) இருப்பின், அதாவது வழங்கலோ அல்லது வரியோ கூட்டியோ, குறைத்தோ இருந்தால் அத்தகவலை தெரிவிக்கலாம். இறுதியாக வழங்கல் மற்றும் முன்பணத்தின் மீது செலுத்த வேண்டிய வரியைக் குறிப்பிட வேண்டும்.

Also read:காம்போசிஷன் வரிப் படிவங்கள்

வரி செலுத்தத் தேவையில்லாத வெளிவழங்கல் மற்றும் வரி பற்றி அந்த நிதி ஆண்டில் பின்வரும் தகவல்களும் தெரிவிக்கப்பட வேண்டும்-
> வரி செலுத்தாமல் வெளிநாட்டுக்கு ஏற்றுமதி செய்யப்பட்ட வெளிவழங்கல்.
> வரி செலுத்தாமல் சிறப்பு பொருளாதார மண்டலத்தில் உள்ள நிறுவனங்களுக்கு செய்யப்பட்ட வழங்கல்.
> பெறுபவர் எதிரிடை வரி அடிப்படையில் செலுத்த வேண்டிய வரி.
> வரியற்ற வழங்கல், வரிவிலக்கு பெற்ற வழங்கல் மற்றும் ஜிஎஸ்டி இல்லாத வழங்கல்.
மேற்கண்டவைகளின் மொத்த தொகையில் கிரடிட் நோட் தொகையைக் கழித்து டெபிட் நோட் தொகையைக் கூட்டி தெரிவிக்க வேண்டிய தொகை.
> வரி செலுத்தத் தேவையற்ற மொத்த தொகை மற்றும் முன்பணம் உட்பட்ட மொத்த விற்பனை வருமான தொகை.

பகுதி – 3 : நிதி ஆண்டில் தாக்கல் செய்யப்பட்ட மாதாந்திர படிவங்களில் தெரிவிக்கப்பட்ட மொத்த உள்ளீட்டு வரி விவரங்கள் –
> படிவம் ஜிஎஸ்டிஆர் – 2 கி மூலமாக பெறப்பட்டு மொத்த உள்ளீட்டு வரி வரவு (அட்டவணை 3 & 5 விவரம் தானாகத் (Auto Populated) தோன்றும்.
> 2017 – 18 நிதி ஆண்டில் உள்வழங்கல் பெறப்பட்ட ஏப்ரல் 2018 முதல் செப்டம்பர் 2018 வரை பெறப்பட்ட உள்ளீட்டு வரிவரவு. (இதில் இறுக்குமதி மற்றும் எதிரிடை உள்ளீட்டு வரி வரவு இதில் சேராது). சிறப்பு பொருளாதார மண்டல நிறுவனங்கள் மூலம் பெறப்பட்ட சேவை மீதான உள்ளீட்டு வரி வரவை சேர்த்துக் கொள்ளலாம்.
> மேற்கண்ட இரண்டுக்கும் உள்ள உள்ளீட்டு வரி வரவில் உள்ள வேறுபாட்டுத் தொகை.
> உள்ளீட்டு வரி வரவு இருந்து அதைப் பயன்படுத்தாமல் இருந்தால் அதைப் பற்றிய விவரம்.
> உள்ளீட்டு வரி வரவு இருந்து, ஆனால் பெறத் தகுதியற்ற வரி வரவு.
> இறக்குமதி மீது செலுத்தப்பட்ட ஜஜிஎஸ்டி பற்றிய விவரம் (சிறப்பு பொருளாதார மண்டல நிறுவனங்கள் மூலம் பெறப்பட்ட உள்வழங்கல் உட்பட) இறக்குமதி மூலம் பெறப்பட்ட ஐஜிஎஸ்டி வரவு தானாகத் திரையில் தோன்றும்.
> ஐஜிஎஸ்டி செலுத்தியதற்கும், பெறப்பட்ட தொகைக்கும் உள்ள வேறுபாடு.
> இறக்குமதி செய்யப்பட்ட பொருள் மீது பயன்படுத்தப்படாத உள்ளீட்டு வரி வரவு.

பகுதி – 4 : சென்ற நிதி ஆண்டில் தாக்கல் செய்யப்பட்ட படிவங்கள் படி செலுத்தப்பட்ட வரி விவரம்.
> ஐஜிஎஸ்டி, சிஜிஎஸ்டி, செஸ், தாமதக் கட்டண வட்டி, தண்டத் தொகை, மற்றும் வேறு ஏதேனும் வரி செலுத்த வேண்டி இருந்தால், அது பற்றிய விவரம். இதில் செலுத்தப்பட்ட செலுத்தப்பட்ட தொகை எவ்வளவு, உள்ளீட்டு வரி மூலம் நேர் செய்யப்பட்ட சிஜிஎஸ்டி, எஸ்ஜிஎஸ்டி, ஐஜிஎஸ்டி மற்றும் செஸ் எவ்வளவு என்பது தொடர்பான மொத்த தொகைகளை தனித்தனியாக தெரிவிக்க வேண்டும்.

பகுதி – 5 :
> நடப்பு நிதி ஆண்டில் ஏப்ரல், 2018 முதல் செப்டம்பர், 2018 வரை சென்ற நிதி ஆண்டுக்கான நடவடிக்கைகள் பற்றி தாக்கல் செய்து இருந்தால், அதற்குரிய வரி வருமானம், செலுத்த வேண்டிய சிஜிஎஸ்டி, எஸ்ஜிஎஸ்டி, ஐஜிஎஸ்டி மற்றும் செஸ் பற்றிய விவரம்.
> திருத்தம் செய்யப்பட்டதால் செலுத்த வேண்டிய வரி, செலுத்திய வரி ஆகியவற்றை சிஜிஎஸ்டி, எஸ்ஜிஎஸ்டி, ஐஜிஎஸ்டி, செஸ் மற்றும் வட்டி எவ்வளவு என்பதை தனித்தனியாக தெரிவிக்க வேண்டும்.

பகுதி – 6 : (பிற தகவல்கள்)
> திரும்பப் பெற வேண்டிய மொத்த வரி, அனுமதிக்கப்பட்ட வரித் திருப்பம் (ரீஃபண்ட்), அனுமதிக்கப்படாத வரித் திருப்பம், கிடைக்கப் பெறாமல் இருக்கும் மொத்த திருப்பத் தொகை.
> கோரப்பட்ட மொத்த வரி, செலுத்தப்பட்ட வரி, செலுத்தப்படாமல் இருக்கும் மீதி வரி.
> இணக்க வரி (காம்போசிசன் வரி) செலுத்துவோர் மூலம் பெறப்பட்ட வழங்கல், பொருள் வழங்கலாகக் கருதப்படும் (பிரிவு 143 படி). ஒப்புதல் அடிப்படையில் பொருள் வழங்கப்பட்டு, பொருள் திரும்பப் பெறாதது பற்றிய விவரம்.
> எச்எஸ்என் கோட்-படி பெறப்பட்ட உள்வழங்கல், அனுப்பப்பட்ட வெளிவழங்கல் ஆகியவற்றின் மொத்த தொகை, எண்ணிக்கை, வரி விகிதம், அதற்குரிய சிஜிஎஸ்டி, எஸ்ஜிஎஸ்டி, ஐஜிஎஸ்டி மற்றும் செஸ் பற்றிய விவரம்.
> சிஜிஎஸ்டி, எஸ்ஜிஎஸ்டி சட்டங் களின் கீழ் செலுத்த வேண்டிய, செலுத்திய தாமதக் கட்டணம் பற்றிய விவரம்.

இறுதி படிவம் : ஆண்டு விற்பனை வருமான படிவமும், இறுதி படிவமும் ஒன்றா என்றால் இல்லை என்றுதான் கூற வேண்டும்.
இறுதி விற்பனை வருமான படிவம் ஜிஎஸ்டிஆர் – 10 என்பது ஜிஎஸ்டி சட்டத்தின் கீழ் பதிவு செய்தவரின் பதிவு நீக்கப்பட்டாலோ, பதிவை திரும்ப ஒப்படைத்தாலோ தாக்கல் செய்ய வேண்டும். மற்றவர்கள் இந்த படிவத்தை தாக்கல் செய்ய வேண்டியது இல்லை. இந்த படிவம் நீக்கம் செய்யப்பட்ட அல்லது திரும்ப ஒப்படைத்த மூன்று மாதங்களுக்குள் தாக்கல் செய்யப்பட வேண்டும்.

– சு. செந்தமிழ்ச்செல்வன்