ஓயாத போராட்டத்திற்கு பிறகுதான் வெற்றி! என்பது வரலாறு நமக்குச் சொல்லித் தரும் மாறாத பாடம். ஆனால், திரு. மாரிமுத்து அவர்கள் தம் தொழிலில் வெற்றி பெறுவதற்காக மேற்கொண்ட முயற்சிகள் கூடுதலானவை.பல்வேறு தொழில்களில் கால்பதித்து அதில் வெற்றி கிடைக்காமல், தான் ஈடுபட்ட பதினேழாவது தொழிலில்தான் அவரால் வெற்றிக்கனியை எட்டிப் பிடிக்க முடிந்திருக்கிறது.

காதல் மணம் புரிந்து, இரண்டு குழந்தைக்குத் தந்தை (இதில் ஒரு குழந்தை SPECIAL CHILD), உடன் பிறந்த இரண்டு தங்கைகளுக்கு ஆற்ற வேண்டிய கடமை. இப்படி குடும்பத்திற்கும் முக்கியத்துவம் கொடுத்துக்கொண்டு கூடவே சமூகத்திற்கு ஆற்ற வேண்டிய பணிகளையும் செய்தபடி இந்த வெற்றியை ஈட்டி உள்ளார்.

அவர் மேற்கொண்ட தொழில் பயணத்தை நம்முடன் பகிர்ந்து கொண்டார். அவருடைய பேட்டியிலிருந்து…

“எங்களுடைய பூர்வீகம் உத்தரமேரூர். தொழில் வாய்ப்பு தேடி சென்னைக்கு என் முன்னோர் குடிபெயர்ந்தனர்.

மயிலாப்பூரில் மிகப்பெரிய குடிசை மாற்று வாரிய குடியிருப்புகளில் ஒன்றான பல்லக்கு மாநகரில், நான் பிறந்தது முதல் வசித்து வருகிறேன்.

என் தந்தையார் மிகச்சிறந்த’ பிளம்பர்’. இது தொடர்பான ஒப்பந்த பணிகளை எடுத்து ஆட்களை வைத்து செய்வார்.

தொழிலில் நல்ல வருமானம் ஈட்டினார். ஆனால் குடிப்பழக்கம் அவரை ஆட்கொண்டது. பணி முடித்து மாலையில் பணத்துடன் வரும் அவரை ஒரு கும்பல் சூழ்ந்து கொள்ளும்.அனைவரும் குடித்து, என் தந்தையார் பாக்கெட்டில் இருக்கும் பணத்தை காலி செய்து விடுவார்கள். நாளடைவில் நிலைமை மோசமானது. குடிப்பழக்கம் எங்கள் குடும்ப நிம்மதியை சீர்குலைத்தது. என் தந்தையாரையும் செயல் இழக்க வைத்தது.என் தாயார் சரோஜா நான்கு பிள்ளைகளையும் காப்பாற்ற போராடினார்.

நான் பள்ளிப் படிப்பை முடிக்கும் முன்பே வருவாய் ஈட்ட வேண்டிய நிலையில் இருந்தேன்.

எல்டாம்ஸ் ரோட்டில் கிளினிக் வைத்து நடத்திய பிரபல மருத்துவரிடம் மாலை நேரத்தில் வேலை பார்த்துக் கொண்டே ப்ளஸ் டூ மற்றும் டிப்ளமா முடித்தேன்.

அதன்பிறகும் அப்பணியில் தொடர்ந்தபடி, பகல் நேரங்களில் பழரசம் விற்பனை செய்வது, துணி-மணிகள் விற்பது, அடுக்குமாடி குடியிருப்பு வீடுகளுக்கு காய்கறிகள் வாங்கி கொடுப்பது, போன்ற சிறு சிறு தொழில்களை செய்தேன். ஒரு கட்டத்தில் கம்ப்யூட்டர் உதிரி பாகங்களை வாங்கிவிற்றேன். கம்ப்யூட்டர் பழுது பார்க்கக் கற்றுக் கொண்டு அது தொடர்பான பணியிலும் ஈடுபட்டேன்.

இத்தகைய முனைப்புகளுக்கு இடையே என் இரண்டு சகோதரிகளின் திருமணத்தை நடத்தி முடித்தேன்.

மேற்கொள்ளும் தொழிலில் சீரான வளர்ச்சி கிடைக்காதபோது அடுத்த தொழிலுக்கு மாறினேன்.

2003 ம் ஆண்டில், சிறீ எஸ்.கே.எஸ் சப்ளையர்ஸ்(SRI S. K. S SUPPLIERS) என்ற பெயரில் துணிப்பந்தல்(Shamiyana) ,சாப்பாட்டு மேசை, நாற்காலி, சமையல் பாத்திரங்கள் போன்ற பொருட்களை வாடகைக்கு விடும் தொழில் தொடங்கினேன். ஒரு சிறிய கடையை வாடகைக்கு எடுத்து இதை செய்யத் தொடங்கியபோது ஆரம்பம் மிகவும் சிரமமாக இருந்தது.

கடை ஆரம்பித்த புதிதில் ஒரு நடுத்தர வயது பெண் “எனக்கு நான்கு பெண் குழந்தைகள் உள்ளனர். நான்தான் கஷ்டப்பட்டு வளர்த்தேன். முதல் பெண்ணுக்கு திருமணம் நிச்சயிக்கப்பட்டு உள்ளது. சமையல் பாத்திரம் வேண்டும்,” என்றார்.என் தாயார் பட்ட சிரமங்கள் கண் முன் வந்தது. அப்போதுதான் புதிய “டபரா “வாங்கி வைத்திருந்தேன். மதிப்பு ரூ 6,000. அதை பெற்றுக்கொண்டு முன் பணம்கூட கொடுக்காமல் அப்பெண் சென்றார்.

உரிய காலத்தில் அவர் திரும்பத் தராததால் அவர் கொடுத்த முகவரிக்கு சென்றோம். அப்படி யாரும் அங்கு இல்லை என்று தெரிய வந்தது. தொடக்கமே அதிர்ச்சியை ஏற்படுத்திய தொழிலாக இருந்தது. ஆனாலும் முயற்சி செய்தேன். இராப்பகலாக கடினமாக உழைத்தேன் என் நண்பர்கள் நிறைய தொடர்புகளை ஏற்படுத்திக் கொடுத்தனர்.

வாடிக்கையாளர்கள் எண்ணிக்கை சீராக வளர்ந்து வருமானம் அதிகரித்தது.பத்தாயிரம் ரூபாய் முதலீடு படிப்படியாக உயர்ந்து பத்து லட்சம் ஆனது.என் தம்பி திரு. சுந்தரும் பக்கபலமாக இருந்து தொழில் வளர்ச்சிக்கு உதவுகிறார்.

தற்போது 300 சிறந்த வாடிக்கையாளர்கள் இருக்கிறார்கள்.அவர்கள் வீட்டு நிகழ்ச்சிகள் என்றால் முதல் அழைப்பு எனக்கு தான் வரும்.மயிலாப்பூர், மந்தைவெளி, ராஜா அண்ணாமலைபுரம் மற்றும் சுற்றுவட்டாரப் பகுதிகளில் பரவலாக இவர்கள் உள்ளனர்.

நிகழ்ச்சிகளுக்கு என்னிடம் தொடர்பு கொள்ளவும் போது, எது கேட்டாலும் ஒப்புக்கொண்டு, இல்லாத பொருளை என்னைப்போன்ற வணிகம் செய்யும் நண்பர்களிடம் வாங்கித்தருகிறேன் என்றார்.

மார்க்சிஸ்ட் கம்யூனிஸ்ட் கட்சியின் மலைப்பகுதி கிளை செயலாளரான திரு. மாரிமுத்துவின் துணைவியார் திருமதி. சாமுண்டீஸ்வரி, இருவரும் காதல்மணம் புரிந்தவர்கள்.

திரு. மாரிமுத்து ஒரு புத்தகப் பிரியர். பண்டிகை தோறும் ஏராளமான புத்தகங்களை வாங்குவதை வழக்கமாகக் கொண்டுள்ளார். “நேரம் கிடைக்கும்போது புத்தகங்கள் படிப்பேன்.பெரியார் எழுதியவற்றை விரும்பி படிப்பேன், என்கிறார் மகிழ்ச்சிபொங்க திரு. கா. மாரிமுத்து.

-ம.வி. ராஜதுரை

நம் நாட்டின் வணிகம் சார்ந்த வரலாற்றை புரட்டிப்பார்த்தோமானால் ஆர்வம் உள்ள தொழில்முனைவோர்களுக்கு சந்தையில் சிறப்பான வாய்ப்பு இருப்பது தெரியவரும். சிலருக்கு சந்தையை கைப்பற்றும் அளவிற்கு வணிகம் சார்ந்த புத்திக்கூர்மை இருக்கும். அப்படிப்பட்ட ஒருவர்தான் தூத்துக்குடியைச் சேர்ந்த ராஜீவ் காந்தி. இனி, அவர் பேசியதில் இருந்துஞ்..

தூத்துக்குடியில் எனக்கு சொந்தமாக ‘மாருதி சால்ட்’ என்ற பெயரில் உப்பள நிறுவனம் உண்டு. அப்பாவுக்கு பிறகு நான்தான் கவனிக்கிறேன். எனக்கு மீடியா மீது ஒரு விரும்பம் இருந்தது. அதனால், மீடியா தொடர்பாக படிக்க சென்னை சென்றேன். அங்கு, புகழ்பெற்ற ஒரு இன்ஸ்ட்டியூட்டில் விஸ்காம் சேர்ந்தேன். வாரத்தில் மூன்று நாட்கள் படிப்பேன். மூன்று நாட்கள் உப்பளம் செல்வேன். அப்போதான், அம்மணிய பார்த்தேன்( மனைவி). பார்த்த உடனே பிடித்தது பொய் சொல்ல மாட்டேன். நாங்க ரெண்டு பேரும் பேச பேச எங்களுக்குள் ஒரு புரிதல் ஏற்பட்டது. என் வீட்டில் என்னோட விருப்பம் என்று கூறிவிட்டனர். அவங்க வீட்டில் எதிர்ப்பு இருந்தது. இன்றுவரை பெரிதாக ஈடுபாடு காட்டவில்லை. படிப்பு முடிவதற்குள்ளேயே திருமணத்தை முடித்தோம். இப்போது, மற்றவர்கள் பாராட்டும் விதத்தில் வாழ்ந்து கொண்டு இருக்கிறோம். அடுத்த கேள்விக்கு, நான் பதில் சொல்கிறேன் என்று கணவரின் வாயைப் பொத்தினார் விஜயலட்சுமி.

இவர், உப்பளம் பிஸ்னஸ் கவனித்துக் கொண்டு இருந்தார். நான் வீட்டில் சும்மாதான் இருந்தேன். எனக்கு அப்பப்போ விலை உயர்ந்த செல்போன், லேப்டாப்ன்னு வாங்கி கொடுத்துக் கொண்டு இருந்தார். அவற்றை டைம் பாஸ்காக பார்க்க தொடங்கினேன். அதுவே, ஒரு கட்டத்தின் பிஸ்னஸ் ஆசையே தூண்டி விட்டது. அப்போது, ராஜீவ்காந்தியிடம் பேசினேன். நம்ம ஏன் திருமணம் மற்றும் பிஸ்னஸ் புரோமோஷன் மாதிரியான ஈவன்ட் தொழில் செய்யக்கூடாது? என்றேன். அவருக்கு முகமெல்லாம் மலர்ச்சி. காரணம், ‘நாம படிச்ச மீடியா படிப்ப இப்போவாவது பயன்படுத்த நினைச்சயே சூப்பர்’ என்றார்.

அவர், அழகாக ஓவியம் வரைவார், வீடியோ எடிட்டிங்-ம் அற்புதமாக செய்வார். அதனால், முதலில் ‘செல்ஃபிபுள்ள’ என்கிற பேரில் ஒரு யுடியூப் சேனல் தொடங்கினோம். அதில், சில சுற்றுலா தளங்கள் பற்றியும், புது ஜோடிகள் தங்கி மகிழும் சில ரிசார்ட் பற்றியும் பதிவு செய்தோம். எங்களை வெவ்வேறு வகையான நிறுவனங்கள் நாடின. குறிப்பாக, ஜூவல்லர்ஸ் நிறுவனம் எங்களை நாடி, எங்களிடம் உள்ள திருமண நகைகளை புரோமோட் செய்ய வேண்டிக் கேட்டார்கள். சிலர் திருமணத்திற்கான ஃபோட்டோகிராஃபி மற்றும் வீடியோ கிராஃபி செய்யும்படி கேட்டனர். முதலில் அதை மட்டுமே செய்து கொடுத்தோம்.

ஃபோட்டோ கிராஃபி மற்றும் வீடியோகிராஃபியை பொறுத்தவரை விதவிதமான ஆல்பம் கொடுப்போம். அவர்கள் சொல்வதற்கு ஏற்ற மாதிரி பட்ஜெட் கொடுப்போம். எங்கள் விருப்பப்படி செய்வதற்கு நாங்கள் ஒரு பட்ஜெட் வைத்து உள்ளோம். அந்த பட்ஜெட்டில் திருமணம், வரவேற்பு மற்றும் திருமண ஜோடிகளை அழைத்து அவுட்டோர் சூட்டிங் எடுத்து ஃபோட்டோஸ் என அனைத்தும் சேர்த்து ஆல்பம் போட்டுக் கொடுப்போம். அதே போல, வீடியோவையும் எடிட்டிங் செய்து ஆவணப்படமாக கொடுப்போம். இந்த இரண்டையும் தவிர வேறு வேலைகளை எடுத்துக்கொள்ள மாட்டோம்.

அதேபோல, அவர்களின் திருமண அழைப்பிதழை வைத்து சோசியல் மீடியாவில் புரோமோ கொடுப்போம். இவை தவிர, திருமண வீட்டாரே அனைத்து வேலைகளையும் பார்க்க சொன்னால், திருமண அட்டை அச்சு செய்வது முதல் வரவேற்பு பெண்(வெல்கம் கேர்ள்), வரவேற்பு நடனம் மற்றும் மேடை அலங்காரம் என அசத்தி விடுவோம். இப்போது, தூத்துக்குடியில் திருமண நிகழ்ச்சி நடத்துவது மற்றும் ஃபோட்டோ கிராஃபி கலைக்கு முதன்மையான இடத்தில் இருக்கிறோம். தென் மாவட்டங்களில் எங்களுக்கு அதிகமான சலுகைகள் கிடைக்கிறது. தமிழ்நாடு முழுக்க முதன்மையான இடத்திற்கு வரவேண்டும் என்பதுதான் எங்களுடைய நீண்ட நாள் ஆசை.

இப்போது, இந்த ஈவன்ட் தொழிலில் பயண ஏற்பாடு தொழிலையும் இணைத்து உள்ளோம். இந்தத் தொழிலை இணைத்ததற்கு காரணம் உண்டு. எங்கள் குடும்பத்துடன் அண்மையில் குற்றாலம் சென்றிருந்தேன். வெறும் குற்றாலம் என்ற கோணத்தில் மட்டும் சிந்திப்பவர்களுக்கு அருவி மட்டுமே கண்களை குளிர்ச்சியாக்கும். ஆனால், அந்தத் தளத்தை சுற்றுலா தளமாக பார்க்க விரும்பினால் நிறைய உள்ளன. குறிப்பாக, ரிசார்ட் மட்டுமே பல வகையான ரிசார்ட்கள் உள்ளன. மேற்கு மலைத் தொடர்ச்சியில் இந்த மாதிரியான ரிசார்ட்கள் அமைந்திருப்பது வியப்பாக இருந்தது. நாங்கள், கொஞ்சம் இன்டீரியர் ரிசார்ட்டில் தங்கினோம். அவ்வளவு அழகாக இருந்தது. அங்குள்ள ரிசார்ட்டில் தங்தான் குற்றாலம் முதன்மை அருவி முதல் பாலருவி வரை சுற்றிப் பார்ப்பதற்கான இடங்களைப் பட்டியல் செய்தோம். 15 இடங்கள் சிக்கின. இது எங்களுக்கு வியப்பாக இருந்தது. அப்போது, இதையும் எங்களுடைய தொழிலாக்கிக் கொள்ளலாம் என்று நினைத்தோம். அதுமுதல், நானும் என் மனைவியும் கன்னியாகுமரி, நெல்லை, தூத்துக்குடி, விருதுநகர் என தென் மாவட்டங்கள் முழுவதும் சுற்றுலா தளங்கள் மற்றும் தங்கும் விடுதிகள் என மிகப்பெரிய பட்டியல் வைத்து உள்ளோம்.

இப்போது, நெறுங்கிய நண்பர்களுக்கு தங்கும் எற்பாடுகளையும் சுற்றி காட்டுவதற்கான வழிகாட்டியையும் ஏற்பாடு செய்து வருகிறோம். உப்பள தொழிலை பொறுத்தளவில் ஒரு நிலையான தொழில் அது கைவந்த கலை என்பதால், இந்தப் புதிய ஈவன்ட் தொழிலில் அதிக அக்கறை எடுத்து வருகிறேன். தென்னகத்தில் எங்களுக்கான மிகப்பெரிய சந்தை காத்திருப்பதாக நினைக்கிறேன்.

– தாமு. தமிழமுதன்

நம்முடைய வலைத்தளத்திற்கு மற்ற வலைத்தளத்தில் (Website), வலைப்பூக்களில் (Blogger)) தொடர்பு (Link) ஏற்படுத்துவதே Back Link என்று அழைக்கப்படுகிறது. இவற்றை லிங்க் பில்டிங்(Link Building) என்றும் டிஜிட்டல் மார்கெட்டிங் -ல் குறிப்பிடப்படும்.

சான்றாக, நாம் ஒரு தொழில் செய்து வருகிறோம் அந்த தொழில் பற்றி மற்றவர்களிடம் சொல்லுவோம். நாம் மட்டுமே சொன்னால் சில மக்களையே சென்று சேரும் கூடவே நம் தொழிலை பற்றி நம் நண்பர்கள், உறவினர்கள், வாடிக்கையாளர்கள், நமக்கு அறிமுகமான மனிதர்கள், இவர்கள் எல்லோரும் நம் தொழில் பற்றி மற்றவர்களிடம் பேசினால் நம் தொழில் பல நபர்களை சென்று சேரும். அதாவது, நம் தொழிலுக்கு இவர்கள் எல்லாம் பின்னால் இருந்து உதவி செய்கிறார்கள் இவர்கள்தான் நம் தொழிலுக்கான backlink.

இதே போல் நம் வலைத்தள முகவரி கொண்டு நேரடியாக நம் தொழில் பற்றி வாடிக்கையாளர்கள் தெரிந்து கொள்ளலாம். ஆனால், அனைவருக்கும் நம் வலைதள முகவரி தெரிவதற்கு பல மாதங்கள் ஆகலாம். அதனால், நம் வலைத்தளத்தை பற்றி மற்ற வலைத்தளங்கள் அவர்களுக்கு தெரிவித்தால் இன்னும் வேகமாக அனைவரிடமும் சென்று சேரும். இவைதான் டிஜிட்டல் மார்கெட்டிங் -ல் back link என்று அழைக்கப் படுகின்றன.

இந்த தொடரின் தொடக்கத்தில் ON Page Seo பார்த்தோம். அதில் மற்றொன்று OFF Page Seo ஆகும். Back-link முழுவதும் இந்த OFF Page Seo வை குறிக்கும். அதாவது, OFF Page Seo என்பது Back-Link உருவாக்குவதை குறிக்கிறது. நிறைய வலைத்தளங்கள் நம் தொழில் வலைத்தளத்தை விளம்பரம் செய்ய உள்ளன. அவற்றில் நம் வலைத்தளத்தை பற்றி குறிப்பிடலாம். நம் தொழில் மற்றும் பொருட்களை பற்றி PPT உருவாக்கி அவற்றை பதிவேற்றலாம்.

சான்றாக, www.slideshare.net என்ற வலைத்தளத்தில் உங்கள் தொழில் பற்றிய செய்திகளை PowerPoint(PPT) ஆக வெளியிட்டால் வாடிக்கையாளர்கள் கூகுள் வழியாக நம் பொருட்களை தேடினால் அதில் நம் வலைத்தளம் வரலாம் அல்லது நாம் பதிவு செய்துள்ள ppt யம் அவர்களுக்கு தெரியலாம்.

உங்கள் தொழில் பற்றி சிறிய வீடியோ ஒன்றை எடுத்து அவற்றை வீடியோ வலைத்தளங்களில் பதிவேற்றுங்கள். https://www.youtube.com போன்ற சில வலைத்தளங்கள் நிறைய உள்ளது. உங்கள் தெரிந்தவர் வலைபூக்களில்(blogspot), வலைத்தளத்தில் (Website) உங்கள் வலைத்தளத்தை பற்றி அவர் எழுதினால் அதன் மூலம் அவரின் நட்பு வட்டாரங்களுக்கு உங்கள் வலைத்தளம் அறிமுகமாகும் இவற்றை guest posting என்று டிஜிட்டல் மார்கெட்டிங் -ல் அழைப்பார்கள். உங்கள் தொழில் பற்றிய நம்பகத்தன்மை அதிகமாகும் guest posting மூலம்.

நீங்களே ஒரு வலைப்பூ(Blogger) உருவாக்கி அதில் தொடர்ந்து உங்கள் தொழில், நிகழ்ச்சிகள், புதிய பொருட்கள் அறிமுகம், வாடிக்கையாளர் கருத்துக்கள் போன்றவற்றை தொடர்ந்து எழுதி வருவதன் மூலம் இணையத்தில் உங்கள் தொழில் பற்றிய செய்திகள் பரவலாக இருக்கும்.

உங்கள் தொழில், பொருட்கள் பற்றி சிறு கட்டுரை எழுதி அவற்றை www.freeprwebdirectory.com போன்ற article submision வலைதளத்தில் பதிவேற்றலாம். இதுபோல் நிறைய வலைத்தளங்கள் உள்ளது. Top 10 article submission website என்று கூகுளில் தேடினால் நிறைய உங்கள் பார்வைக்கு வரும் அதில் சிலவற்றை தேர்ந்து எடுத்து பதிவேற்றுங்கள்.

நமக்கு தெரியாத விடைகளை நாம் கூகுளில் தேடி தெரிந்து கொள்வோம். நமக்கு தோன்றும் கேள்விகளை நீங்கள் www.quora.com போன்ற கேள்வி பதில் வலைத்தளத்தில் கேட்டால் பதில் தெரிந்தவர்கள் அதற்கு பதில் சொல்வார்கள். அதனால், நீங்கள் quora வலைத்தளத்தில் ஒரு கணக்கு தொடங்கி உங்கள் தொழில் சார்ந்து யாராவது கேள்வி கேட்டிருந்தால் அதற்கு பதில் சொல்லி உங்கள் வலைத்தளத்தை அதில் பதிவிட்டால் கேள்வி கேட்டவர் அதை படித்து அதை தெடர்ந்து உங்கள் வலைதளம் வருவதற்கு வாய்ப்பு உண்டு. அதனால் இது போன்ற வலைத்தளத்தை கவனியுங்கள். Image share செய்வதற்கு சில வலைத்தளங்கள் (social Media) உண்டு. சான்று, www.pinterest.com போன்ற படங்கள் பதிவேற்றும் வலைத்தளத்தில் உங்கள் பொருட்கள், தொழில் தொடர்பான படங்களை பதிவிட்டால் வாடிக்கையாளர்கள் அவற்றை பின்பற்றி உங்கள் வலைத்தளத்திற்கு வருவார்கள்.

இதே போல் Bookmark submission, Document Sharing, Classified Submission போன்று நிறைய வலைத்தளங்கள் உண்டு அவற்றில் எல்லாம் உங்கள் தொழில் செய்திகள், படங்கள் என்று தொடர்ந்து பதிவு செய்து கொண்டே வாருங்கள். சில மாதங்கள் பிறகு இணையத்தில் பரவலாக உங்கள் தொழில் மற்றும் வலைத்தளம் பற்றிய செய்திகள் இருக்கும்.

வாடிக்கையாளர் உங்கள் பொருட்களை கூகுளில் தேடினால் இவற்றில் ஏதாவது ஒன்று அவர்கள் பார்வைக்கு வரும். அதன் மூலம் அவர்கள் உங்கள் பொருட்களை வாங்கலாம், வலைத்தளத்தை பார்வை இடலாம், உங்கள் தொழில் செயல்பாடுகள் அவர்களுக்கு சுலபமாக தெரியவரும்..
மேலே உள்ள அனைத்தும் மற்றவர்கள் வலைதளத்தில் நம் தொழில் பற்றி செய்திகள் பதிவு செய்வது ஆகும். அதனால் நமக்காக அந்த வலைத்தளங்கள் நம் தொழில் பற்றி மற்றவர்களுக்கு வழங்கும். இவைதான் backlink என்று டிஜிட்டல் மார்கெட்டிங் -ல் மிக முக்கிய இடத்தை வகிக்கிறது.

டிஜிட்டல் மார்க்கெட்டிங் செய்ய விரும்புவோர்கள் கண்டிப்பாக உங்கள் தொழில் பற்றி இணையத்தில் எங்கெல்லாம் வாய்ப்பு உள்ளதோ அங்கெல்லாம் பதிவு செய்யுங்கள். நாளடைவில் இணையம் எங்கும் உங்கள் தொழில் நிறைந்து இருக்கும்..

– செழியன்.ஜா