சில நேரங்களில் நமக்கு மனம் உற்சாகம் இல்லாமல் காணப்படும். மனதை உற்சாக நிலைக்கு கொண்டு வருவது எப்படி? மனநல ஆலோசகர் திருமதி. ஜான்சிராணி சில வழிகளைச் சொல்லித் தருகிறார்.
உங்களிடம் இருப்பவர்கள் உற்சாகமான தொழிலாளர்களா?
இரண்டு கைகள் தட்டினால் தான் ஓசை வரும். அதைப்போலதான் நாமும் தொழி லாளர்களும். ஒருவருக்கு ஒருவர் முரண்பட்டால் நட்டம் என்னவோ நமக்குதான். அதனால் தொழிலாளர்களிடம் கண்டிப்புடன் இருக்க வேண்டும் அதேநேரம் தோழமையுடன் பழக வேண்டும். கடந்த காலத்தில் நாம் பெற்ற அனுபவமே நாளடைவில் நமது மனப்பான்மையாக மாறி விடுகின்றது. நாம் வாழ்க்கையில் புதுப்புது அனுபவம் பெறப் பெற நமது மனப்பான்மையும் மாறிகொண்டே வருகின்றது. ஒருகால கட்டத்தில் அதுவே நிலைத்து விடுகின்றது. ஒரு நிறுவனத்தின் வளர்ச்சி தொழிலாளர்களால் நிர்ணயிக்கப்படுவதால் அதைப் பற்றி அறிந்து கொள்வது அவசியம்.
உற்சாகத்தொழிலாளர்கள்:
நல்ல உள்ளங்களை பெற்றிருக்கும் தொழிலாளர்களை கொண்டிருக்கும் நிறுவனங்களில் சிக்கல்கள் குறைவு. லாபம் அதிகம். இவர்களை உற்சாகத் தொழிலாளர்கள், ஊக்கமான தொழிலாளர்கள் என்று சொல்லலாம்.
ஊக்கமற்ற தொழிலாளர்கள்:
ஏதோ வந்தோமா, வேலை செய்தோமா என ஏனோதானோ மனதினைப் பெற்ற உற்சாகம் இல்லாத தொழிலாளர்களை கொண்டிருக்கும் நிறுவனங்களில் சிக்கல்கள் அதிகம்; லாபம் குறைவு. அதனால் பணியாளர்களை தேர்வு செய்யும் நேரம் ஊக்கமுடைய தொழிலாளர்களாக தேர்வு செய்திட வேண்டும்.
சமயங்களில் இந்த குணம் கொண்ட தொழிலாளர்கள் பணியில் சேர்ந்து விடுவதுண்டு. இவர்கள் தொழிற்சாலையின் முன்னேற்றத்திற்கு விருப்பம் இல்லாதவர்களாகவும், பல சிக்கல்களுக்கு காரணமானவர்களாகவும் இருப்பார்கள். சரி, இது இவர்களுக்கு எதனால் ஏற்படுகின்றது. பொறாமை, சுய இரக்கம், உற்சாகமின்மை, குறை காணுதல், பணி முரண்பாடு, பணியில் களைப்பு, வயோதிகம், சட்டென்று உணர்ச்சிவசப்படுதல், தோல்விக்கு பிறரை காரணமாக சொல்லுதல், பயம், வயிற்றுக் கோளாறு, பணியில் கவனமின்மை, போதை மருந்து, மதுவுக்கு அடிமையாதல், குடும்ப சூழ்நிலை, குறைந்த வருமானம் ஆகிய ஏதாவது ஒரு காரணத்தால் ஏற்படுகின்றது. இப்படிப்பட்ட பணியாளர்களை கவனித்து, தனிப்பட்ட முறையில் அவர்களிடம் பேசி, நல்ல மனநல மருத்துவரை ஆலோசித்து சிகிச்சை அளிப்பது முக்கியம்.
குடும்ப சிக்கல், இருந்தால் தகுந்த ஆலோசனை வழங்குதல் தேவை. பணியிடத்தில் அவருக்கு சிக்கல் இருந்தால் அதனையும் கேட்டறிந்து சரிசெய்திட வேண்டும். முதலாளி தனிப்பட்ட முறையில் விசாரித்தாலே தொழிலாளர்கள் உற்சாகமடைந்து விடுவார்கள். பாதி சிக்கல் அதனாலேயே தீர்ந்து விடும். இந்த அணுகுமுறையை மட்டும் ஒவ்வொரு நிறுவன தலைவரும் கடைப்பிடித்தால் அவர்கள் தொழில் வளர்ச்சி அடைவதோடு நிறைந்த லாபமும் காண்பார்கள்.
-வேலன்
வணிகர்களுக்கான சில அடிப்படைச் செய்திகள்
தொழிலுக்கென்று எழுதப்படாத விதிகள் ஆயிரம் இருப்பினும் சில முக்கிய காரணிகளை தெரிந்து கொண்டு தொடங்கினால் வெற்றி சிகரத்தை எட்டிப் பிடிக்கலாம். தொடங்கும் தொழிலின் தன்மையை பொறுத்து சில காரணிகளில் மாற்றம் இருந்தாலும் கூட அடிப்படை காரணிகள் அனைத்து வியாபாரத்திற்கும் பொருந்தும்.
அடிப்படைக் காரணிகள்:
1.தொடக்க காலக் கட்டங்களில் வேலைக்கு நிறைய ஆட்களை, நிறைய சம்பளத்துக்கு நியமிப்பதை குறைத்துக் கொண்டு மிகத் தேவையான பணியாளர்களை மட்டும் சேர்த்து வியாபாரத்தை பெருக்க வேண்டும். வணிக வளர்ச்சிக்கு ஏற்ப பின்னர் ஆட்களை அதிகரித்துக் கொள்ள வேண்டும்.
2.செய்யும் தொழிலின் மீது அளவு கடந்த ஆர்வமும் அக்கறையும் இருப்பது நல்லது.
3.உற்பத்தி செய்யக் கூடிய பொருளோ அல்லது சேவையோ மக்களின் உண்மை தேவையை நிறைவு செய்வதாக இருந்தால் மிகவும் நல்லது.
4.தெளிவான குறிக்கோள், பொறுமை, நேர்முகச் சிந்தனை மூன்றும் தொழிலை வளம் பெறச் செய்யும் காரணிகள்.
5.தோல்விகள் நம்மை தோற்கடிக்க முடியாது என்ற எண்ணமும் அதே நேரத்தில் தோல்விகளின் மூலம் கற்றுக் கொள்ளும் மனப்பக்குவமும் இருந்தாலே 50 விழுக்காடு வெற்றி கிடைத்து விட்டதாக கொள்ளலாம்.
6.கூட்டுத் தொழில் தொடங்க இருப்போர் தங்கள் தொழிற்கூட்டாளியைத் தெரிவு செய்வதில் மிகுந்த அக்கறையும் கவனமும் செலுத்துவது மிகவும் முக்கியம். கூட்டாளிகளாக சேர்ந்து தொடங்கிய நிறைய நிறுவனங்கள் உடைந்து சிதறும் கதைகள் நாம் அறிந்ததே.
மேலாண்மை குறைபாடுகள்:
வியாபார உரிமையாளர்கள் தங்கள் கவனத்தை தொழில் வளர்ச்சியின் முக்கிய தூண்களான பணம், கொள்முதல், விற்பனை, உற்பத்தி மற்றும் திறமையான ஊழியர் களை தேர்ந்தெடுத்தல் ஆகியவற்றில் செலுத்துவது மிகவும் சிறந்தது.
read also: வாடிக்கையாளர் எந்த வகையானவர் என்பதைப் புரிந்து கொள்ள வேண்டும்
போதிய பணமின்மை:
வியாபாரம் செய்ய நினைக்கும் சிலர் செய்யும் முக்கிய தவறு, தான் செய்யப் போகும் வியாபாரத்திற்கான முதலீட்டுத் தொகையை குறைத்து மதிப்பிடுவது. வியாபாரத்தைத் தொடங்குவதற்கு மட்டும் இல்லாமல் அதில் நிலைத்து நிற்பதற்கான பணத்துடனும் தொழில் தொடங்குவது முக்கியத் தேவையாகும். உற்பத்தி செய்யும் பொருட்களுக்கு சந்தை நிலவரங்கள் கை கொடுக்குமா? விற்பனை மூலம் எவ்வளவு வருமானம் கிடைக்கும்? என்பதை முன்னரே சரியாக கணக்கிட முடியாது. உற்பத்தி செய்யப்படும் பொருட்கள் மக்களை சென்றடைய சிறிது காலம் பிடிக்கலாம். அதுவரை தாக்குப் பிடிக்கும் அளவுக்கு நம்மிடம் முதலீடு இருக்க வேண்டும்.
இடத்தெரிவு:
எங்கு வியாபாரத்தைத் தொடங்க போகிறோம்? என்ன வியாபாரம் செய்ய போகிறோம்? நாம் தெரிவு செய்திருக்கும் இடம் நம்முடைய வியாபாரத்திற்குப் பொருத்தமான இடம்தானா? என்பது போன்ற சில ஆராய்ச்சி வேலைகளை வியாபாரப் பணிகளைத் தொடங்கும் முன் கருத்தில் கொள்வது நல்லது.
அகலக்கால்:
வியாபாரத்தைத் தொடங்கும் பலரும் சிறு வெற்றிகளுக்குப் பின் தொழிலை பெரிய அளவில் விரிவு படுத்துவதும் அதில் அனைத்தையும் இழந்து விடுவதும் காலங்காலமாக நடைபெறுகிறது. இருக்கும் வியாபாரத்தை விரிவு படுத்துவதை தீவிர யோசனைக்குப்பின் சிறிது சிறிதாக செய்ய வேண்டுமே தவிர ஒரேஅடியாக அகலக் கால் வைத்தல் கூடாது.
-வேணி
பழக்கத்திற்கு அடிமையான விலங்கு போல இருக்கலாமா?
இப்போதெல்லாம் நடந்து போக பாதைகளே இல்லை. அந்த அளவுக்கு வாகனங்களின் ஆக்கிரமிப்புகள்;.அதே போல வாழ்க்கைப் பாதையிலும் அந்த அளவுக்கு அறிவுரை சொல்லும் ஜீன்ஸ் போட்ட சாமியார்கள் முதல் கார்ப்பரேட் காவி உடை ஆட்கள் வரை நமக்கு புத்தி சொல்லிக் கொண்டே இருக்கிறார்கள். இந்த நாட்களில் நம்மை வழிநடத்திச் செல்ல ஒரு ரோல் மாடல் இல்லை. காந்தியோ, விவேகானந்தரோ, புத்தரோ, பெரியாரோ யாரும் இப்போது இல்லை. எனவே நாம்தான் நமது காலடியை கவனமாக எடுத்து வைக்க வேண்டும். இன்னொரு முக்கியமான சொல் உங்களது வாழ்க்கையை நீங்கள் தான் வழிநடத்திச் செல்ல முடியும். ஏனென்றால் உங்களது பலம், பலவீனம் பற்றி உங்களுக்குத்தான் தெரியும். உங்களது அடிகளை அளந்து வைப்பதை விட புத்திசாலித்தனமாக எடுத்து வைத்தால் வெற்றிகள் உங்களை வந்தடையும்.
மாறுதல் என்பதைப் பற்றி இப்போது அதிகம் பேசுகிறார்கள். எந்த பொருளும் மாறிக் கொண்டே இருந்தால்தான் அதில் உயிர் இருக்கும் என்கிறார்கள். ஆனால் நாம் மாறுகி றோமா என்றால் இல்லை. வழக்கமான மின்ரயில் பயணத்தில் முந்தைய நாள் பயணித்த சீட்டில் அமருவதைத்தான் விரும்புவோம். மனிதன் என்பவனே பழக்கத்திற்கு அடிமையான விலங்கு என்றுதான் சொல்வார்கள்.
எப்போதும் ஒரே பாதையில் சென்று கொண்டிருக்கிறார்கள். ஒரு காரியத்தை முடிப்பதற்கு கூட எப்போதும் ஒரே மாதிரி சிந்திக்காதீர்கள். வேறு மாதிரி சிந்தித்துப் பாருங்கள். அதை மாற்றி யோசிப்பது சிறந்தது என்பார்கள். அப்படிச் சிந்திக்கும்போது அந்த வேலையை குறைவான சக்தியில் குறைவான நேரத்தில் முடிப்பதற்கும் ஒரு யோசனை கிடைத்திருக்கும். அதனால் எப்போதும் ஒரே மாதிரி இருக்காதீர்கள். ஒரே மாதிரி சிந்திக்காதீர்கள். ஒரே மாதிரி உடையணியவும் செய்யாதீர்கள். எந்த நேரத்தில் வேண்டுமானாலும் துடிப்போடு எழுந்து செயல்படக் கூடியவராக நீங்கள் உங்களை மேம்படுத்திக் கொள்ளுங்கள். மூடும் கதவு தெரியும்; திறந்த கதவுகள் கண்ணுக்குத் தெரியாது.
எல்லோருக்கும் தெரிந்த ஒரு வாசகம் இது .ஒரு கதவு மூடப்படும்போது இன்னொரு கதவு திறந்து கொள்கிறது. இதை நம்மில் எத்தனை பேர் நம்புகிறோம். ஒரு வினை ஏற்பட்டால் அதற்கேற்ப எதிர்வினை ஏற்பட வேண்டும் என்பதை இயற்பியலிலும், வேதியியலிலும் படித்திருக்கிறோம். ஆனால் உண்மை வாழ்க்கையில் ஒரு தோல்வியோ அல்லது ஒரு அசாதாரண நிகழ்வோ ஏற்பட்டிருக்கிறபோது நாம் அந்த தோல்வியைத்தான் திரும்பத் திரும்ப பார்த்துக் கொண்டிருக்கிறோம். அப்படி பார்க்காதீர்கள். அங்கே வேறு நல்ல வாய்ப்புகளும் இருக்கின்றன என்று எளிதாகச் சொல்லி விடலாம்.
read also: எதிர்மறை மனிதர்களை எதிர்கொள்வது எப்படி?
ஆனால் தனக்கு வந்தால் தானே தலை வலியும், திருகுவலியும் தெரியும். உண்மைதான். நான் ஒப்புக் கொள்கிறேன். அந்த மோசமான அனுபவம் ஏற்பட்டிருந்தால்தான் தெரியும். அது போன்ற மோசமான அனுபவங்கள் எனக்கு பலமுறை ஏற்பட்டிருக்கின்றன. அப்போதெல்லாம் என்னை துவண்டு போய் விடாமல் என்னை கை தூக்கி விட்டிருப்பது என்னிடம் இருக்கிற நகைச்சுவை உணர்வும், தன்னம்பிக்கையும்தான்.
சீட்டுக்கட்டில் ஒரு முறை தோற்றால் எல்லா சீட்டுகளையும் கலைத்துப் போட்டு விட்டு மறுமுறை ஆட உட்கார்ந்து கொள்வது மாதிரி நான் எல்லாவற்றையும் கலைத்துப் போட்டு விட்டு மறுபடி முயற்சி செய்ய தொடங்கி விடுவேன். இந்த முறை நானே என்னை ஒரு புதிய ஆளாகப் புதுப்பித்து கொண்டு தான் முயற்சியை தொடருவேன். நான் ஒரு புதிய ஆள் என்பதால் எனக்கு ஏற்பட்டிருந்த முந்தைய தோல்வி என்னுடையதில்லை. நான் இப்போது புதிதாக முயற்சிக்கிறேன். புத்துணர்வோடு முயற்சிக்கிறேன். வெற்றி கிடைக்கும் என்ற நம்பிக்கையில் முயற்சிக்கிறேன்.
எல்லாருக்கும் எல்லா நேரத்திலும் நல்லதே நடக்கும் என்று சொல்ல முடியாது. பெரும் பாலான செய்திகள் நம் கையில் இல்லை. அதற்காக நடப்பதை எல்லாம் விதி என்று ஏற்றுக் கொண்டு சும்மா உட்கார்ந்திருக்க முடியாது. ஒரு அசாதாரணமான நிகழ்வு நடக்கிறதா? உடனே உடைந்து போகாமல் அப்படியே உட் கார்ந்து அந்த சூழ்நிலையை கவனித்துப் பாருங்கள்.
ஏன் அப்படியானது? யார் யாரெல்லாம் இதற்கு காரணம்? இந்த சூழலிலிருந்து மீண்டு வர முடியுமா? முடியாதா?அப்படி வெளியே வர முடியாதென்றால் குறைந்தது என்ன செய்யலாம், யார் யாரிடம் ஆலோசனை கேட்கலாம்? இப்போது என்ன மாற்று ஏற்பாடுகளைச் செய்து வரலாம். எத்தனை காலத்திற்கு இந்த கஷ்டம் இருக்கும். இது போன்ற சூழ்நிலைகள் ஏற்படும் போது மற்றவர்களாக இருந்தால் என்ன செய்தி ருப்பார்கள்? நாம் என்ன செய்ய வேண்டும்? நமக்கு வேறு ஏதாவது மாற்று ஏற்பாடு செய்து கொள்ள முடியுமா?அப்படி மாற்று ஏற்பாடு செய்து கொண்டபிறகு என்ன செய்யலாம். இழந்ததை மீட்க முடியுமென்றால் அதற்கு என்ன என்ன முன்னேற்பாடுகள் செய்து கொண்டு எத்தனை நாளைக்குள் செய்து முடிக்க முடியும்? என்றெல்லாம் சிந்தித்துப் பார்க்கலாம்.
read also: மேடு பள்ளங்களாக வரும் தடைகளைத் தாண்டுவது எப்படி?
நல்லதையே நினைக்கிறோம். நல்லதையே செய்கிறோம் என்று வைத்துக் கொண்டாலும் கூட எதிர்பாராத நிகழ்வுகளை நம்மால் தவிர்த்துவிட முடிவதில்லை. நாம் வாழ்வில் நாம் இரண்டு வழிகளில்தான் வாழ்ந்து வருகிறோம். ஒன்று. சிந்தனையால். இன்னொன்று செயலால். இதில் சிந்திப்பதுதான் முதலில். அதன் பிறகு தான் செயல் வருகிறது. ஒரு நல்லது கெட்டதை எதிர்கொள்வது கூட முதலில் சிந்தனையாகவும், பிறகு செயலாகவும், எதிர் வினையாகவும் வருகிறது.
அதனால் நமது சிந்தனையை கூர்தீட்டிக் கொள்வதோடு, எதையும் எதிர்பார்த்து சிந்தி க்கப் பழகிக் கொள்வோம். மேலாண்மையியலில் கூட இதை எதிர்பார்த்து செயல்படுவது என்கி றார்கள். எதிர்பார்த்து செயல்படுவது ஒரு புறம் இருந்தாலும் எதிர்பார்த்து சிந்திப்பதை வழக்க மாக்கிக் கொள்ளவும். எதிர்பாராமல் ஏதாவது நோய் தாக்குமென்று எதிர்பார்த்து மெடிக்கல் பாலிசி எடுத்து வைத்துக் கொள்ளலாம். எதிர் பாராக நிகழ்வு ஏதாவது ஏற்படும் என்பதை எதிர்பார்த்து ஒரு இன்சூரன்ஸ் பாலிசி எடுத்து வைத்துக் கொள்ளலாம். எதிர்பாராமல் இழப்பு ஏற்படலாம் என்பதை எதிர்பார்த்து ஆறுமாதத் துக்கான செலவுக்கான பணத்தை மொத்தமாக பிக்சட் டெபாசிட்டில் போட்டு வைத்துக் கொண்டு வரலாம். இது போன்ற பாதுகாப்பு ஏற்பாடுகளை முதலில் செய்து வைத்துவிட்டால் எதிர்பாராத கஷ்டம் வந்து விட்டாலும் கூட அதிலிருந்து மீண்டு வருவது எளிதாக இருக்கும்.
அதையும் மீறி ஏதாவது நிகழ்ந்து விடுகிறது. அப்போதுதான் கண்களையும், காதுகளையும் திறந்து வைத்துக் கொண்டு சுற்றுப்புறத்தை கவனிக்க வேண்டும். அதாவது எல்லா கதவுகளும் மூடிக் கொண்டாலும் அங்கே கண்ணுக்குத் தெரியாத அல்லது சரியாக கவனிக்கப் படாத சில கதவுகள் புதிதாக திறந்து கொள்ளத் தான் செய்கின்றன. அந்த கதவுகளின் வழியே நம் பயணத்தை வைத்துக் கொண்டோமானால் நமக்கு தோல்வி என்பதே இல்லை.
– பேராசிரியர்.டி.ஏ.விஜய்
இந்த ஐந்து இயல்புகள் உங்களிடம் இருக்கிறதா?
பிறக்கின்ற பொழுதே யாரும் சாதனையாளராகப் பிறப்பதில்லை. அவர்கள் அணுகுமுறையாலும், மனப்பான்மையினாலும், உருவாக்கிக் கொண்ட நோக்கினாலும், மேற்கொண்ட முயற்சியினாலும், பயிற்சியினாலும் மற்றவர்களிடமிருந்து வேறுபடுகின்றனர்.
சாதனையாளராக முதல்படி தன்னை அறிதல் வேண்டும்.
நாம் முதலில் நம்மைப் பற்றி அறிந்து கொள்ள(Self Realisation) வேண்டும். ஒவ்வொரு வரிடமும் எண்ணற்ற ஆற்றல்கள் திறமைகள் புதைந்து கிடக்கின்றன. அவற்றை வெளியில் கொண்டுவர அவற்றைப் பற்றிய அறிவு வேண்டும். நாம் வளர, வளர உள்ளமும் வளர்கின்றது. உடல் வளர்ச்சியை விட உள்ளத்தின் வளர்ச்சி விரைவானது. உள்ளத்தின் வேட்கை, ஆற்றல் அளவிடற்கரியது. அது மிகவும் நுட்பமானது.
உள்ளம் மூன்று நிலைகளில் செயல்படும். ஒன்று மேல் மனம். வெளிப்படையாக, அந்தந்த நேரத்திற்கேற்ப நம்மை இயக்கும். இரண்டாவது, நடுமனம். எல்லாவற்றையும் சேர்த்து வைத்துக் கொள்ளும் பெட்டகம். கணிப்பொறியின் சேமிப்புக் கிடங்கு போன்றது. தேவைக்கு அதனை வெளியில் கொண்டு வந்து பயன்படுத்துவோம். சான்றாக, தேர்விற்கு படிப்பதைக் கூறலாம். எல்லாவற்றையும் வாங்கி வைத்திருந்து, தேர்வின் பொழுது கேட்கப் பெற்ற கேள்விக்கு விடையை மட்டும் தருவது நடுமனம். மூன்றாவது, ஆழ்மனம். இது உள்ளார்ந்தது. எப்பொழுதாவது வெளிப்படும்.
நமது குடும்பம், பள்ளி, கல்லூரி, நண் பர் குழாம் எல்லாம் நமது உள்ளத்தைப் பண்படுத்த, வளர்க்க உதவுகின்றன. உள்ள முதிர்ச்சிதான் உள்ளத் திண்மையாக, உறுதிப்பாடாக வெளிப்படுகின்றது.
”வெள்ளத்தனைய மலர்நீட்டம்; மாந்தர்தம்
உள்ளத்தனையது உயர்வு”, என்றும்,
”எண்ணிய எண்ணியாங்கு எய்துவ எண்ணியர்
திண்ணியர் ஆகப் பெறின்”,
என்ற இரண்டு குறட்பாக்களும் உள்ளத்தின் சிறப்பையும் ஆற்றலையும் கூறுகின்றன.
கல்வியின் மூலமும், பல்வேறு நூல்களைப் படிப்பது, பலரோடு பழகுவது, பல இடங்களுக்குச் செல்வது என பல வழிகளில் அறிவைப் பெருக்குகின்றோம். மூளையை வளப்படுத்துவதும், கூர்மைப்படுத்துவதும் தொடர்ந்து நடைபெறுகின்றன.
read also:உன்னை அறிந்தால்.., நீ உன்னை அறிந்தால்..!
தன்னை, தனக்குள் இருக்கும் மூலதனத்தை அறிந்து கொண்டவர்கள் செயல்பாடு தனி வகையாக இருக்கும். அவர்கள் மற்றவர்களை அப்படியே பின்பற்ற மாட்டார்கள். மற்றவர்கள் செய்கின்ற தொழிலைச் செய்தாலும், தனிவழியில் அவர்கள் செயல்பாடு இருக்கும்.
ஒரு சாதனையின் தொடக்கம் ஒரு கருத்தாக (Idea) இருக்கும். மற்றவர்களுக்கு, அது கற்பனையாகத் தோன்றும் செயல்பட முடியாததாக இருக்கும். பெரும்பாலும் சாதனையாளர்களின் செயல்பாட்டில் கீழ்க்கண்ட இயல்புகள் இருப்பதை ஆய்வாளர்கள் சுட்டிக் காட்டுகின்றனர்:
1. தன்னைப் பற்றிய அறிவு-விழிப்புணர்வு.
2. தன்னூக்கம் (Personal Motivation)- தன்னைத் தானே செயல்படத் தூண்டும் எண்ணத் திண்மை. இடர்ப்பாடுகளைத் துச்சமாக எண்ணி முன்னேறும் மன முதிர்ச்சி.
3. முயற்சி- விடாமுயற்சி. தோல்வி கண்டு துவளாமை. நோக்கத்தை நோக்கி முன்னேறுதல்.
4. சுய கட்டுப்பாடு- ஒழுக்கம், கவனம் சிதறாமை, தற்காலிக சுக போகங்களில் நாட்ட மின்மை.
5.உழைப்பு- அறிவார்ந்த, ஈடுபாட்டோடு கூடிய உழைப்பு. உழைப்பில் இன்பம்.
– டாக்டர் மா.பா.குருசாமி
மண்புழு உரம் உற்பத்தியை தொழிலாகவும் செய்யலாம்.
மண்புழு உரம் உற்பத்தித் தொழில் நுட்பம் பயன்படுத்தி ஆர்வமும், இட வசதியும் உள்ளவர்கள் மண்புழு உரம் தயாரிக்கலாம். முதல் மண்புழு உரக்குழியில் (Vermi bed). மண்புழுக்களை இட்டு முப்பது நாட்கள் கழித்து குப்பைகளைக் கொட்ட வேண்டும். 6x3x3 என்ற அளவிலான இரண்டு உரக்குழிகளில் இருந்து ஆண்டுக்கு ஆறு தடவை மண்புழு உரத்தை எடுக்கலாம். இரண்டு முதல் இரண்டரை டன் வரை கிடைக்கும். இதைப்போல எத்தனைக் குழிகள் வேண்டுமானாலும் அமைத்து உரம் உற்பத்தி செய்யலாம்.
மண்புழு உரம் உற்பத்தி செய்ய பயன்படுத்தாத மாட்டுத் தொழுவம், கோழிப்பண்ணை மற்றும் கட்டிடங்களை பயன்படுத்த முடியும். திறந்த வெளி என்றால் நிழலான இடமாக இருக்க வேண்டும். வெயில் மற்றும் மழையில் இருந்துபாதுகாப்பதற்கு, தென்னங் கீற்று கூரையை பயன்படுத்தலாம்.
ஒரு உரக்குழி சிமென்ட் தொட்டியின் உயரம் 2 அடி மற்றும் அகலம் 3 அடி ஆக இருக்கவேண்டும். ஹாலோ ப்ளாக்ஸ், செங்கல் இவற்றை பயன்படுத்தி தொட்டிகளைக் கட்டலாம். சிறிய அளவில் மண்புழு உரம் தயாரிக்க நினைப்பவர்கள் மரப் பெட்டிகளையோ, பிளாஸ்டிக் பெட்டிகளையோ கூட பயன்படுத்தலாம். மண்புழு உரம் தயாரிக்க கடின தரை மிகவும் அவசியம். தரை மிருதுவாக இருந்தால் மண்புழு மண்ணுக்குள் செல்ல வாய்ப்பு இருக்கிறது. மேலும் மண்புழு படுகையில் தண்ணீர் விடும் பொழுது, கரையக் கூடிய சத்துக்கள் எல்லாம் நீரில் கரைந்து மண்ணுக்குள் சென்று விடும். சிமென்ட் தொட்டிகளுக்கு பதில் குறைந்த விலையில் கிடைக்கும் 450 gsm hdpe Azolla bed களும் பயன்படுத்தப்படுகின்றன. மாடித் தோட்டம் அமைப்பதற்கும் சில வேளாண் பணிகளுக்கும் கூட இந்த அசோல்லா தொட்டிகள் பயன்படுத்தப் படுகின்றன. இவை சுமார் மூன்று ஆண்டுகள் வரை வரும். 
நெல், உமி அல்லது தென்னை நார்க்கழிவு அல்லது கரும்புத் தோகைகளை தொட்டியின் அடிப்பாகத்தில் 3 செ.மீ உயரத்திற்கு பரப்ப வேண்டும். ஆற்று மணலை இதற்கு மேல் 3 செ.மீ உயரத்திற்கு தூவ வேண்டும். பிறகு 3 செ.மீ. உயரத்திற்கு மண் பரப்ப வேண்டும். இதற்கு மேல் தண்ணீரைத் தெளிக்க வேண்டும். களிப்பு அதிகம் உள்ள மண் மண்புழு உரம் தயாரிப்புக்கு ஏற்றதல்ல.
மண்புழு உரம் தயாரிக்க பயிர் தூர், களைகள், வைக்கோல், உமி, எரு, மலைப் பயிர்கள், தண்டு, இலைகள், பழத்தோல்கள், கால்நடைகள் சாணம், மூத்திரம், சாண எரிவாயுக் கழிவு, உணவு பதப்படுத்தும் ஆலையின் கழிவுகளான தோல், ஓடு, பயன்படுத்தாத குழம்பு, காய்கறிகள்; சமையல் எண்ணெய் ஆலையில் இருந்து கிடைக்கும் விதை ஓடுகள், பிரஸ்மட், கழிவு நீர், பார்லி கழிவுகள்; விதை பதப்படுத்தும் ஆலைகளில் இருந்து கிடைக்கும் பழங்கள் (மத்திய பகுதி), முளைக்காத விதைகள்; வாசனை திரவியங்கள் ஆலையில் இருந்து கிடைக்கும் தண்டு, இலை, பூக்கள்;தென்னை நார்க் கழிவு, காய்கறிக் கழிவுகளை மண்புழு உரத் தயாரிப்புக்கு பயன் படுத்தலாம். இத்தகைய கழிவுகளை அல்லது இவற்றில் சில கலந்த கலவையை மண்புழு உரத் தொட்டியின் விளிம்பு வரை நிரப்ப வேண்டும்.
மக்கக் கூடிய கழிவுகளை குவித்து, அதில் சாணக் கரைசலை தெளித்து, 20 நாட்கள் மக்கிய கழிவுகள் மண்புழு சாப்பிடுவதற்கு ஏதுவாக இருக்கும். நன்றாக உலர்ந்த கால்நடைக் கழிவுகளையும், சாண எரிவாயுக் கழிவுகளையும் மட்டுமே மண்புழு உரம் தயாரிக்க நேரடியாக பயன்படுத்தலாம்.
மண்புழுக்களிலும் பல வகைகள் உள்ளன. யுடிரில்லஸ் யுவாஜினே (EudrillusUaginae), ஐசினியா ஃபோட்டிடா போன்ற சிலவகை மண்புழுக்கள் மண்ணை உட் கொள்ளாமல் இலை தழைகளை மட்டுமே உண்டு கழிவுகளை வெளியேற்றுகின்றன. சிலவகை மண்புழுக்கள் மண்ணுடன் இலை தழைகளையும் உண்டு கழிவை வெளியேற்றுகின்றன. இரண்டுமே மண்புழு உரம் தான். சில வகைப் புழுக்கள் மண்ணின் மேற்பரப்பிலேயே வாழும். இவற்றிற்கு எப்பிஜெயிக் (Epigeic) வகை என்று பெயர். வேறு சிலவகை ஒன்றரை மீட்டர் ஆழம் வரை மேலும், கீழும் இடம் பெயர்ந்து காணப்படும். இவ்வகை புழுக்களுக்கு அனெசிக் (Anacic) என்று பெயர். இன்னும் சில மண்ணின் அடிப் பகுதியிலேயே வாழும். இவற்றிற்கு எண்டோஜெயிக் (Endogeic) என்று பெயர். மண்புழு உரத் தயாரிப்புக்கு மேல் மட்டப் புழுக்கள் உகந்தவை. மேல்மட்ட, இடைமட்ட வகைப் புழுக்களைக் கலந்தும் பயன்படுத்தலாம். அடிமட்டப் புழுக்கள் ஏற்றவை அல்ல. மண்புழுக்கள் தேவைக்கும் அதிகமாக வளர்ந்து விட்டால், தேவையான அளவுக்கு போக மீதமுள்ள எண்ணிக்கையை அப்புறப்படுத்த வேண்டும். இல்லை எனில் இடவசதி இல்லாததால் மண்புழுக்கள் இறந்துவிடும்.
தேர்ந்தெடுக்கப்பட்ட மண்புழுக்களை சமமாக பரப்ப வேண்டும். ஒரு மீட்டர் நீளம் X 1மீட்டர் அகலம் X 0.5 மீட்டர் உயரத்திற்கு இரண்டு கிலோ மண்புழு (சுமார் 2000 மண்புழு) தேவைப்படுகிறது. மண்புழுக்களை கழிவுகளுக்குள் விட வேண்டும் என்ற கட்டாயம் இல்லை. மேலே பரப்பினால் போதுமானது. தினமும் தண்ணீர் தெளிக்க வேண்டும். ஊற்றக் கூடாது. 60 சதவீதம் ஈரப்பதம் இருக்க வேண்டும். அறுவடைக்கு முன்னதாக தண்ணீர் தெளிப்பதை நிறுத்தி விட வேண்டும்.
முதல்தடவை உரம் எடுக்க 120 நாட்கள் ஆகும். அதன்பிறகு 90 நாட்களுக்கு ஒருமுறை மண்புழு உரம் அள்ள முடியும். தொட்டி முறையில், மண்புழு உர படுகையின் மேல் உள்ள மண்புழு கழிவினை மட்டும் அள்ள வேண்டும். வாரத்திற்கு ஒரு முறை அள்ள வேண்டும். சேகரித்த உரத்தை அதிக வெயில்படாத காற்றோட்டம் உள்ள இடத்தில் சேமித்து வைக்கவும். இவ்வாறு சேமித்து வைக்கப்பட்டுள்ள மண்புழு உரத்தில் நன்மை தரும் நுண்ணுயிர்கள் அதிக அளவில் வளரும். மண்புழு உரத்தை சல்லடையில் இட்டு சலிக்கும் பொழுது, நன்றாக மக்கிய உரம் மற்றும், மக்காத கழிவுகளை தனித்தனியாக பிரித்து எடுக்கப்படும். மக்காத கழிவுகளை மறுபடியும் மண்புழு படுக்கையில் இடவும்.
சாணப்பந்துகள் உரக்குழியில் பல இடங்களில் வைக்கப்பட வேண்டும். இதனால் மண்புழுக்கள் அந்த சாணத்தினால் கவரப்படுகின்றன. பிறகு இதனை தண்ணீரில் போடுவதன் மூலம் சாணம் கரைந்து மண் புழுக்கள் பிரித்தெடுக்கப்படுகின்றன. இந்தப் புழுக்கள், அடுத்த மண்புழு உரம் தயாரிக்கப் பயன்படுத்தப்படுகின்றன.
அசிட்டோஃபேக்டர், அசோஸ்பைரில்லம், பாஸ்போபேக்டிரியா, சூடோமோனாஸ், போன்ற உயிர் உரங்கள் மூலம் மண்புழு உரத்தினை ஊட்டமேற்றலாம். இதனால் சத்துக்கள் அதிகரிக்கின்றன. ஒரு டன் கழிவிற்கு ஒரு கிலோ அசோபாஸ் (அசோஸ்பைரில்லம் மற்றும் பாஸ்போ – பேக்டீரியா) என்ற அளவில் இருபது நாட்களுக்கு பின் மண்புழு படுகையில் சேர்க்கலாம். இந்த நன்மை தரும் நுண்ணுயிர்கள் காற்றில் இருக்கும் தழைச்சத்தை மண்புழு உரத்தில் நிலைநிறுத்துகிறது. பயிர்களுக்கு வேண்டிய வளர்ச்சி ஊக்கிகளை சுரந்து மண்புழு உரத்தில் நிலை பெறச் செய்கிறது. கரையாமல் இருக்கும் மணிச்சத்தை கரைத்து கொடுக்கிறது.
மக்கிய உரத்தை பாக்கெட் செய்வதை விட திறந்த வெளியில் சேமிப்பது சிறந்தது ஆகும். திறந்த வெளியில் உரத்தை சேமிக்கும் பொழுது தண்ணீர் தெளித்து ஈரப்பதத்தை காக்க வேண்டும். இதனால் நுண்ணுயிர்கள் அழிவதை தடுக்கலாம். 40 சதவிகித ஈரப்பதத்துடன் வைப்பதினால் மண்புழு உரத்தின் தரம் குறையாமல் பாதுகாக்கலாம். விற்கும் சமயத்தில் மட்டுமே பைகளில் நிரப்ப வேண்டும்.
இயற்கை வேளாண்மையில் மண்புழு உரத்துக்கு தனி இடம் இருக்கிறது. தற்போது மண்புழு உரம் ஒரு கிலோ இருபத்தைந்து ரூபாய் முதல் ஐம்பது ரூபாய் வரை விற்பனை ஆகிறது.
தமிழ் நாட்டில் மண்புழு உரம் ஈரோடு, கோவை, பொள்ளாச்சி, செங்கை, சென்னை, பாண்டிச்சேரி போன்ற பகுதிகளில் பயன்படுத்தப் படுகின்றன. பூச்செடிகள், மிளகாய், மாதுளை, கத்தரி, வெண்டை ஆகிய பயிர்களுக்குப் போட்டுப் பார்த்ததில் நல்ல வேறுபாடு தெரிகிறது. மற்றபடி எல்லா செடிகள், மரங்களுக்கும் போடலாம். வீட்டு பூந்தொட்டிகளுக்கு மிகவும் ஏற்றது.
வெர்மிவாஷ் (Vermiwash) என்ற பெயரில் மண்புழு உரக் கரைசலையும் தயாரிக்கலாம். ஒரு பெரிய வாளியிலோ, தொட்டியிலோ குறிப்பிட்ட அளவுக்கு மண் எடுத்து மண்புழுக்களை இட வேண்டும். பின்னர் மாட்டுச் சாணம் இட்டு, வாளியின் மேற்பகுதியில் சொட்டுச் சொட்டாக தண்ணீர் விழவைக்க வேண்டும். இந்தத் தண்ணீர் சாணம், வைக்கோல், மண்புழுக் கழிவு ஆகியவற்றுடன் கலந்து உரச்சத்து மிகுந்த கரைசலாக வாளியின் அடிப்பகுதியில் உள்ள துளை மூலம் கிடைக்கும். இந்தக் கரைசலை திரவ உரமாகப் பயன்படுத்தலாம்.
– கே.எஸ். கீதா, எம்.எஸ்சி.,
மஞ்சள் நடவு முதல் பக்குவப்படுத்துதல் வரை..
மஞ்சள் பல்வேறு மண்வகைகளில் குறிப்பாக வண்டல் கலந்த மண், குறைவான களிமண் கொண்ட நிலம் போன்றவற்றில் சாகுபடி செய்யப்படுகிறது. குறுமண்ணும், வண்டலும் கலந்த வடிகால் வசதி உள்ள நிலம் மிகவும் உகந்தது. களர், உவர் நிலங்கள் மஞ்சள் சாகுபடிக்கு ஏற்றது அல்ல. நீர்ப்பாசனத்துக்கு உப்பு கலந்ந தண்ணீரும் ஏற்றது அல்ல. தமிழ்நாட்டில் மே இரண்டாம் வாரத்தில் இருந்து, ஜூன் இரண்டாம் வாரத்துக்குள் நடவு செய்ய வேண்டும்.
கோ1, சுவர்ணா, ரங்கா, ராஸ்மி, சுகந்தம், ராஜேந்திர சோனியா, கிருஷ்ணா, சோமா, சுரோமா என்று பல உயர்விளைச்சல் வகைகள் உள்ளன. நிலத்தை இரண்டு முறை உழ வேண்டும். மூன்றாம் உழவின் போது ஏக்கருக்கு பத்து டன் தொழு உரம் மற்றும் எண்பது கிலோ வேப்பம் பிண்ணாக்கு இட்டு மண்ணுடன் கலக்க வேண்டும். பின்னர் சுமார் நாற்பது செமீ இடைவெளியில் நீள பார்களையும், குறுக்கு கால்வாய்களையும் அமைக்க வேண்டும்.
ஒரே அளவு பருமனாக உள்ள விதைக் கிழங்குளைதேர்வு செய்ய வேண்டும். நடவிற்கு ஏற்ற கிழங்குகளை தாய்க் கிழங்கு மற்றும் விரலிக் கிழங்கு என இருவகைப் படுத்தலாம். இவற்றில் தாய்க் கிழங்கே நடவுக்கு ஏற்றது. இருப்பினும் தாய்க் கிழங்கினை நடுவதற்கு அதிக அளவு விதைக் கிழங்கு தேவையாக இருப்பதால் செலவு அதிகம் ஆகிறது. எனவே சாகுபடிச் செலவை கட்டுப் படுத்த விரலிக் கிழங்கையும் நடவு செய்யலாம். தாய்க் கிழங்கு பெரிதாக இருப்பின் இரண்டாக அறுத்து நடவு செய்யலாம். மூன்றில் இருந்து ஆறு பருவக் கணுக்கள் உள்ள விரலி மஞ்சள் நடவுக்கு ஏற்றது. கிழங்கு முளைக்காத இடங்களில் தாய்க் கிழங்கில் இருந்து முளைத்த முப்பது நாள் நாற்றுகளை நட்டு நிரவலாம். இதற்கு தனியே நாற்றங்கால் அமைத்துப் பராமரிக்க வேண்டும்.
மஞ்சள் நடவு செய்ய ஒரு ஏக்கருக்கு எழுநூற்று ஐம்பது கிலோ தாய்க் கிழங்கு தேவைப்படும். விரலிக் கிழங்கு எனில் அறுநூறு கிலோ தேவைப்படும். பூச்சிகள், நோய்களால் பாதிக்கப்படாமல் இருக்க பாசலோன் 35 இ.சி. அல்லது மானோ குரோட்டோபாஸ் 26 சதம் மருந்தை ஒரு லிட்டர் நீருக்கு இரண்டு மிலி என்ற அளவில் கலந்து அத்துடன் இரண்டு கிராம் மேன்கோசெப் மருந்தையும் கலந்து தயாரிக்கப்பட்ட கரைசலில் கிழங்குகளை பதினைந்து நிமிடங்கள் ஊற வைத்து பின்னர் 24 மணி நேரம் நிழலில் உலர வைத்து விதைக்க வேண்டும். பார்களின் ஓரங்களில் முப்பது செமீ இடைவெளியில் ஐந்த செமீ ஆழத்தில் நட வேண்டும்.
ஏக்கருக்கு ஐம்பது கிலோ தழைச் சத்து தேவை. இதில் பத்து கிலோவை அடி உரம் இடும்போது இட வேண்டும். மீதி உள்ளதை நான்கு பகுதிகளாகப் பிரித்து முப்பது, அறுபது, தொன்னூறு மற்றும் நூற்று இருபதாம் நாட்களில் இட வேண்டும். இந்த தழைச் சத்து முழுவதையும் வேப்பம் பிண்ணாக்கு கலந்த யூரியா உரமாக இட வேண்டும். இருபத்து ஐந்து கிலோ மணிச் சத்து தேவை. இதற்கு நூற்று ஐம்பது கிலோ சூப்பர் பாஸ்பேட் உரத்தை ஒரே தடவை மற்ற உரங்களுடன் அடி உரமாக இட வேண்டும். நாற்பது கிலோ சாம்பல் சத்து தேவை. இதையும் தழைச் சத்து இடுவதைப் போன்றே பிரித்து இட வேண்டும். மேலும் ரசாயன உரங்களுக்கு பதிலாக அசோஸ்பைரில்லம் மற்றும் பாஸ்போபேக்டீரியம் போன்ற உயிர் உரங்களையும் பயன்படுத்துகிறார்கள். ஏழு பாக்கெட் அசோஸ்பைரில்லத்தையும், ஏழு பாக்கெட் பாஸ்போபேக்டீரியத்தையும் தொழு உரத்துடன் கலந்து கடைசி உழவின் போது இட வேண்டும். உயிர் உரங்களை ஏனைய ரசாயன உரங்களுடன் கலக்கக் கூடாது.
ஊட்டக் குறைபாடு ஏற்பட்டால் இலைகளின் ஓரங்கள் வெளிறி சுருண்டு விடும். இதற்கு ஆறு கிலோ சூப்பர் பாஸ்பேட் உரத்தை பத்து லிட்டர் தண்ணீரில் முன் தினம் மாலையில் ஊற வைத்து அடிக்கடி கலக்கி விட வேண்டும். மறுநாள் காலையில் தெளிவான மேல்பாக நீரை வடித்து எடுத்து அதில் நூற்று ஐம்பது கிராம் இரும்பு சல்பேட் (அன்னபேதி), நூற்று ஐம்பது கிராம் துத்தநாக சல்பேட், நூற்று ஐம்பது கிராம் யூரியா, நூற்று ஐம்பது கிராம் போராக்ஸ் சேர்த்துக் கலக்கி இதை சுமார் இருநூற்று ஐம்பது லிட்டர் தண்ணீரில் கலந்து காலையிலோ அல்லது மாலையிலோ தெளிக்கவும்.
மஞ்சள் முளைத்து வந்த பின் அறுபது, தொன்னூறு, நூற்று இருபதாம் நாட்களில் மண் அணைக்க வேண்டும். நட்ட மூன்றாம் நாள் பாசிலின் எனும் களைக் கொல்லி இருநூறு மிலியை இருநூறு லிட்டர் தண்ணீரில் கலந்து நிலத்தில் மீது சீராகத் தெளிக்க வேண்டும். இது ஒரு மாதம் வரை களைகளைக் கட்டுப்படுத்தும். பின்னர் மண் அணைக்கும் முன் களை எடுத்து மண் அணைக்கலாம். கோடை வெப்ப காலங்களில் வாரம் ஒருமுறை நீர் பாய்ச்ச வேண்டும். கிழங்குகள் வளர்ச்சி அடையும் பருவத்தில் இன்னும் குறைந்த கால இடைவெளியில் தண்ணீர் பாய்ச்ச வேண்டும்.
மஞ்சள் வகைக்கு ஏற்ப ஏழு, ஒன்பது, பத்து மாதங்களில் அறுவடைக்கு வரும். இலைகள் மஞ்சளாக மாறி காயத் தொடங்கிய பிறகு அறுவடை செய்ய வேண்டும். மண்ணைத் தோண்டி எடுத்த கிழங்குகளின் மீது ஒட்டி இருக்கும் சிறு வேர்கள், மண்ணை அகற்றி சுத்தம் செய்ய வேண்டும். ஏக்கருக்கு பத்து டன் முதல் பன்னிரெண்டு டன் வரை இந்த ஈர மஞ்சள் அறுவடை செய்யப்படுகின்றன.
அதன் பிறகு மஞ்சள் கிழங்குகளை வேக வைத்தல், காய வைத்தல், மெருகேற்றுதல், சாயம் பூசுதல் ஆகிய செயல்கள் நடைபெறுகின்றன. மண் அல்லது செம்பு பாண்டங்களில் கிழங்குகள் மூழ்கும் அளவுக்கு தண்ணீர் ஊற்றி வாயை சாக்கினால் மூடி வேக வைக்க வேண்டும். தாய்க் கிழங்குகளையும், விரலிக் கிழங்குகளையும் தனித்தனியே பிரித்து வெண்ணிற ஆவி நறுமணத்துடன் வரும் வரை வேக வைக்க வேண்டும்.
நீருடன் காரத் தன்மை உடைய சுண்ணாம்பு மற்றும் சோடியம் பை கார்பனேட் என்ற உப்பை லிட்டருக்கு ஒரு கிராம் என்ற அளவில் கலந்து கிழங்குகளை வேக வைக்கும் நடைமுறையும் உள்ளது. இம்முறையில் நல்ல ஆரஞ்சு கலந்த மஞ்சள் நிறம் கிடைக்கிறது. கிழங்குகளை மெருகேற்ற உட்புறம் சல்லடை போன்ற அமைப்பு உடைய 32 கிலோ உலர்ந்த கிழங்குகள் பிடிக்கும் பீப்பாய்கள் பயன்படுத்தப்படுகின்றன. இவற்றில் கிழங்குகளை நிரப்பி கையாலோ, எந்திரத்தாலோ சுற்றி விட வேண்டும். முப்பது நிமிடங்களில் மெருகேற்றப்பட்ட மஞ்சள் கிடைக்கும்.
மஞ்சளுக்கு செயற்கையாக சாயமிடும் முறையும் இருக்கிறது. முன்னர் கெமிக்குரோம் என்ற ரசாயனம் பயன்படுத்தப்பட்டு, அது உடல்நலனுக்கு உகந்தது அல்ல என்பதால் அரசால் தடை செய்யப்பட்டது. ஈரோட்டில் மஞ்சள் தூளே சாயம் இடப் பயன்படுத்தப்படுகிறது.
நாற்பது கிராம் படிகாரம், இரண்டு கிலோ மஞ்சள் தூள், நூற்று நாற்பது கிராம் ஆமணக்கு விதை, முப்பது கிராம் சோடியம் பை சல்பேட், முப்பது மிலி அடர் ஹைட்ரோ குளோரிக் அமிலம் ஆகியவற்றை ஒன்றாக அரைத்து சாயக் கலவை தயாரிக்க வேண்டும். இந்த அளவு நூறு கிலோ மஞ்சளுக்கு பொதுமானது ஆகும். பிறகு இக்கலவையை பிரம்புக் கூடையில் இட்ட மஞ்சள் மீது சீராக ஊற்றிக் சாயம் சீராகப் பரவும் வகையில் குலுக்க வேண்டும். பிறகு வெயிலில் உலர்த்த வேண்டும். இந்த முறையை மைசூர் மத்திய உணவு தொழில் நுட்ப ஆராய்ச்சி மையம் கண்டு பிடித்துத் தந்தது.
பொதுவாக அறுவடை முடிந்த பதினைந்து நாட்களில் பக்குவப்படுத்துவது நல்லது. ஒரு ஏக்கருக்கு சுமார் இரண்டு டன் பக்குவப்படுத்தப்பட்ட மஞ்சள் கிடைக்கும்.
– முனைவர். முகமது அப்துல் காதர்
அறுபது+ வயதிலும் சவாலான முயற்சிகளில் ஈடுபடத் தயங்காதீர்கள்..
இப்போதெல்லாம் 60 வயதைத் தொட்டவுடன், உடலளவிலும் மனதளவிலும் இனி தன்னால் பெரிதாக ஒன்றும் செய்ய முடியாது என்று நம்மில் பலர் முடிவு செய்து கொள்கிறார்கள்…
60 வயதுக்கு பிறகுதான் ஒரு பலமான, வளமான மூளையோடு நாம் பயணிக்க ஆரம்பிக்கிறோம்… பல விஷயங்களில் அனுபவப்பட்டு, தெளிந்து, வாழ்க்கையை புரிதலோடு பார்க்கிற பருவம் இந்த இரண்டாவது இன்னிங்ஸ் தான்…!!!
60 வயதுக்கு மேல் தவறாமல் செய்ய வேண்டிய அவசியமான விஷயங்கள்:
புதிய உந்துசக்தியை உருவாக்க புதிதான, உங்களுக்கும் தேவையான சவால் ஒன்றைக் கையிலெடுங்கள்.உங்களை சுறுசுறுப்பாக வைத்துக் கொள்ள கடினமான இலக்கை முன்னிலைப்படுத்தி அதனை நோக்கி நிதானமாக, ஆனால் உறுதியோடு செல்லுங்கள். எப்போதுமே புதிய விஷயங்களைத் தேடுங்கள், புதிய மனிதர்களிடம் பேசுங்கள். இளைஞர்களோடு பழகுங்கள்.
நன்றாக உடுத்துங்கள்
அழகான உடைகளை ரசனையுடன் தேர்வு செய்து, மிடுக்காக உடுத்துங்கள். 60 வயதில் நரையும், திரையும், வழுக்கையும் அழகுதான். உலகின் மிகப் பெரிய சாதனைகளைச் செய்தவர்கள், நிறைய பேரை ஈர்க்கின்றவர்களில் 60+ காரர்கள் தான் அதிகம்..!!!
அழகான உடைகளை ரசனையுடன் தேர்வு செய்து, மிடுக்காக உடுத்துங்கள். 60 வயதில் நரையும், திரையும், வழுக்கையும் அழகுதான். உலகின் மிகப் பெரிய சாதனைகளைச் செய்தவர்கள், நிறைய பேரை ஈர்க்கின்றவர்களில் 60+ காரர்கள் தான் அதிகம்..!!!
பெரும்பாலான இளைஞர்களுடன், ஒத்த கருத்து நண்பர்களுடன் புதிய இடங்களுக்கு, புதிய அனுபவங்களைத் தேடி பயணம் செல்லுங்கள். வேறுபட்ட மனிதரோடு உரையாடுங்கள். ஆர்வமூட்டும் பயணங்கள் நம்மை துள்ளிக் குதிக்க வைக்கும்.
புதிய சிந்தனைகளுடன் கூடிய புத்தகங்களைப் படியுங்கள்
புதிய நவீன சிந்தனையாளர்களின் புத்தகங்களைத் தேடி நிறைய படியுங்கள். உங்கள் மூளைக்கு தீனி போட நிறைய, நிறைய புதிய விஷயங்களைத் தேடிப்படியுங்கள். நகைச்சுவைக் கதைகளை, நிகழ்வுகளை, ஒளிமங்களை விரும்பி காணுங்கள். சிரித்துப் பேசுங்கள், பிறர் சிரிக்கப் பேசுங்கள். பொறாமைக் காரர்களை காலவிரயம் கருதி ஒதுக்குங்கள்.
புதிய நவீன சிந்தனையாளர்களின் புத்தகங்களைத் தேடி நிறைய படியுங்கள். உங்கள் மூளைக்கு தீனி போட நிறைய, நிறைய புதிய விஷயங்களைத் தேடிப்படியுங்கள். நகைச்சுவைக் கதைகளை, நிகழ்வுகளை, ஒளிமங்களை விரும்பி காணுங்கள். சிரித்துப் பேசுங்கள், பிறர் சிரிக்கப் பேசுங்கள். பொறாமைக் காரர்களை காலவிரயம் கருதி ஒதுக்குங்கள்.
உடற்பயிற்சிகள் மிகத் தேவை
மன ஆரோக்கியம், உடல் ஆரோக்கியம் பேணுங்கள், நடைப் பயிற்சி, மூச்சுப்பயிற்சி,
மன ஆரோக்கியம், உடல் ஆரோக்கியம் பேணுங்கள், நடைப் பயிற்சி, மூச்சுப்பயிற்சி,
எளிய உடற்பயிற்சிகள், சிறு சிறு ஆசனங்கள் அன்றாடம் செய்யுங்கள்.
வாரம் ஒரு முறையாவது உங்கள் நண்பர்கள், குடும்பத்தினருடம் வெளி இடங்களுக்குச் சென்று சிரித்து, மகிழ்ந்து, உண்டு, உறவாடுங்கள். மறந்தும் சாய்வு நாற்காலியைத் தேடி விடாதீர்கள்.
பொதுச் சேவையில் நாட்டம் கொள்ளுங்கள். ஏரி, குளம், தூய்மை, சுற்றுச்சூழல், பசுமை, சமூக நேர்மை காத்தலில் ஆர்வம் கொள்ளுங்கள். முதலில் நம்மைச் சார்ந்தவர்களுக்கு, பின்னர் அடுத்தவர்களுக்கு, உதவி தேவைப் படுபவர்களுக்கு, உங்களால் இயன்ற வகையில் உதவுங்கள். அவர்கள் நன்றியில் உங்களை நீங்களே புதிதாக ரசித்து மகிழ்வீர்கள்.
– பெரீஸ் மகேந்திரவேல்
”சாமியின் சக்தியை எவனோ இறக்கிட்டுப் போறான்டோய்..” – ஒரு கல்வெட்டு ஆய்வாளரின் சுவையான அனுபவங்கள்
கல்வெட்டுகள் அதிகம் உள்ள தமிழ்நாடு
ஒரு இனத்தின் வரலாற்றை, வாழ்வியலை அறிந்து கொள்வதில் தொல்லியல் ஆய்வு முதன்மையான பங்கு ஆற்றுகிறது. வரலாறு என்பது ஒரு கட்டமைப்பு. வரலாற்றை விட்டு மனிதர்கள் நீங்க முடியாது. மனிதர்களை விட்டு வரலாறும் நீங்க முடியாது. மனிதர்கள் எப்படி வாழ்ந்தார்கள், எப்படி வீழ்ந்தார்கள் என்பதை வரலாற்றில் இருந்து எடுத்துக் கொள்பவர்களே வளர முடியும்.
உலகத்திலேயே இந்தியாவில்தான் கல்வெட்டுகள் அதிகம். இந்தியாவிலும் தமிழ்நாட்டில்தான் அதிகம். தமிழ்நாட்டு கல்வெட்டுகள் நிறைய அழிந்து விட்டன. குறிப்பாக கடந்த சுமார் நூறு ஆண்டுகளாக கோயில் திருப்பணி என்ற பெயரில் கல்வெட்டுகளை உடைத்துப் போட்டுக் கொண்டு இருக்கிறார்கள்.
தமிழர்கள் எந்த மண்ணையும் கைப்பற்றி ஆளவில்லை. ஆனால், பழங்காலத்திலேயே பல நாடுகளுக்குச் சென்று வணிகம் செய்து இருக்கிறார்கள். ஐரோப்பாவிற்கும், ஆசியாவிற்கும் இடையே உள்ள செங்கடல் பகுதியில் அமெரிக்க ஆய்வாளர்களால் செய்யப்பட்ட தொல்லியல் ஆய்வின் போது இரண்டாயிரம் ஆண்டுகளுக்கு முற்பட்ட தமிழ் எழுத்துகள் பொறிக்கப்பட்ட ஓடுகள் கிடைத்து இருக்கின்றன. இதை அவர்கள் பதிவு செய்து இருக்கிறார்கள்.
பிராமண மாணவர்களுக்கே எல்லாம்…
சங்க காலத்திற்குப் பிறகு, நாடு விடுதலை பெறும் வரை எந்த அரசும் தமிழில் கல்வி கற்பிப்பதற்காக கொடை அளித்ததற்கான எந்த சான்றும் இதுவரை கிடைக்கவில்லை. அவர்கள் கொடை அளித்தது எல்லாம் குருகுல கல்விக்குதான். குருகுல கல்வி பிராமணர்களுக்கு மட்டும்தான். பிராமண மாணவர்களுக்கு கல்வி தருவதற்கு, எண்ணெய் தேய்ப்பதற்கு, மருத்துவத்துக்கு என் பலவாறாக பட்டியல் இட்டு கொடை கொடுத்ததைப் பற்றிய கல்வெட்டுகள்தான் கிடைத்து இருக்கின்றன. வேதங்கள், சம்பிரதாயங்கள் இவற்றை பிராமணர்களுக்கு கற்றுத் தருவதற்கு ஏராளமாக கொடைகளை வாரி வழங்கி இருக்கிறார்கள்.
ஆனால் எந்த அரசும் பள்ளிகளை நிறுவி, எல்லோருக்கும் தமிழ் இலக்கியத்தை, இலக்கணத்தை, மொழியைக் கற்றுக் கொடுக்கவில்லை. தமிழ் கல்வி என்பது தனிப்பட்ட புலவர்களின், ஆசிரியர்களின் தன்னார்வத்தைப் பொறுத்தே வளர்ந்து வந்து இருக்கிறது.
கிடா வெட்டி படையல் போட்டுத் தப்பினோம்
கல்வெட்டு ஆய்வுகளுக்குச் செல்லும் போது பல வியப்பான அனுபவங்களைச் சந்தித்து இருக்கிறேன்.
ஒரு ஊரில் நடுகல்லை தெய்வமாக நினைத்து வழிபடுகிறார்கள். அதற்கு பூ வைப்பது, பொட்டு வைப்பது, கிடா வெட்டி படையல் போடுவது என்று திருவிழா கொண்டாடிக் கொண்டு இருக்கிறார்கள். இந்த நடுகல் வழிபாடு, இறந்தவர்கள் நினைவாக ஒரு பெரிய கல்லை நட்டு, அவர்களை தெய்வமாக வழி படுகிற பண்டைய தமிழர் மரபில் இருந்து வந்தது. வேடியப்பன் சாமி என்கிற நடுகல் தெய்வம் தருமபுரியில் இருக்கிறது. அதை படம் எடுத்துக் கொண்டு நாங்கள் கிளம்பும் போது, யாரோ ஒருவன் இதைப் பார்த்து விட்டு, ”நம்ம சாமியின் சக்தியை எவனோ ஒருத்தன் இறக்கிக்கிட்டுப் போறான்டோய்..” என்று கத்த, கத்தி கம்புடன் அந்த பகுதியில் உள்ளவர்கள் வந்து வழிமறித்து விட்டார்கள். நாங்கள் எவ்வளவோ எடுத்துச் சொல்லியும் அவர்கள் புரிந்து கொள்ளவில்லை. ”சரி, என்ன செய்ய வேண்டும்?” என்று கேட்டோம். அதற்கு அவர்கள் சொன்னபடி கிடா வெட்டி பூசை செய்த பிறகுதான் விட்டார்கள். 
பொதுமக்களுக்கு நடுகல்லைப் பற்றியும் தெரியாது; கல்வெட்டுகள் பற்றியும் தெரியாது. இதனால் நடுகல் ஒரு ஆள் நிற்பது மாதிரி நட்டு இருக்கும். கத்தியைத் தூக்கிக்கிட்டு இருக்கிறது மாதிரி இருக்கும். அதற்கு மேலும் கீழும் கிறுக்கின மாதிரி இருக்கும் என்று அடையாளம் சொல்வோம். அங்கே உள்ள ஆடு, மாடு மேய்ப்பவர்கள் கண்டு வந்து எங்களுக்கு சொல்வார்கள்.
வரலாற்றுச் சிக்கலைத் தீர்த்து வைத்த கல்வெட்டு
கல்வெட்டு பயிற்சிப் பள்ளியில் படிக்கும் மாணவர்கள் படிப்பு முடிந்ததும் ஒரு ஊரை எடுத்து ஆராய்ந்து ஆய்வேடு ஒன்றை எழுதித் தர வேண்டும். இதற்காக அவர்கள் அந்த ஊர் மக்களோடு கலந்து பழக வேண்டும். அப்போதுதான் அங்கு உள்ள கல்வெட்டுகள் பற்றியோ பழங்கால நினைவுச் சின்னங்கள்பற்றியோ அறிந்து எழுத முடியும். இது போல தம்பை என்ற ஊருக்கு சென்ற செல்வராஜ் என்ற மாணவருக்கு அங்கே இருந்த ஒரு கல்வெட்டைக் காட்டி இருக்கிறார்கள்.
அந்த மாணவர் சென்று பார்த்த போது, அது மிகவும் பழைய கல்வெட்டு என்பதால் அவருக்கு ஒன்றும் புரியவில்லை. அதை படம் எடுத்து அனுப்பி வைத்ததைத் தொடர்ந்து நாங்களை சென்று பார்த்தோம். நம்முடைய வரலாற்றுக்கு ஒளி பாய்ச்சிய கல்வெட்டுகளில் ஒன்று அது.
”சதியபுதூர் அதியமான் நெடுமான் அஞ்சி நீக்கிப்பளி” – அந்த கல்வெட்டில் இருந்த இந்த சின்ன வரிதான் மிகப் பெரிய வரலாற்றுச் சிக்கலைத் தீர்த்து வைத்தது. அதியமான் பரம்பரை பற்றியோ, அவன் காலம் பற்றியோ தெரியாமல் இருந்த நிலைக்கு அந்த கல்வெட்டுதான் முற்றுப் புள்ளி வைத்தது..
– க. குழந்தைவேலன், தொல்லியல் ஆய்வாளர்
உன்னை அறிந்தால்.., நீ உன்னை அறிந்தால்..!
தன்னை அறிந்து இருத்தல் என்றால் என்ன?
மனிதர்களுக்கு, ‘தன்னை அறிந்து இருத்தல்’ என்பது மற்ற எல்லாவற்றையும் விட முதன்மை ஆனது ஆகும். தன்னை அறிந்து இருத்தல் என்றால் என்ன? என் திறமைகள் என்ன?; என் திறமை இன்மை என்ன?; என்னால் முடிந்தது என்ன?; என்னால் முடியாதது என்ன?; என் பலம் என்ன?; என் பலவீனம் என்ன?; என்னால் முடியக் கூடியது என்ன?; என்னால் முடியாதது என்ன?; எது எனக்குப் பிடிக்கும்?; எது எனக்குப் பிடிக்காது?; நான் விரும்புவது என்ன?; நான் வெறுப்பது என்ன?; என் தேவை என்ன?; என் தேடல் என்ன? போன்ற கேள்விகள் ஒருவருக்கு தன்னைப் பற்றி தெரிந்து இருக்க உதவும். சாக்ரட்டீசின், ‘உன்னையே நீ எண்ணிப் பார்’ என்ற வரிகள் உலகப் புகழ் பெற்றவை ஆகும்.
நம்மில் பெரும்பான்மையோருக்கு மேற்கூறிய பெரும்பாலானவற்றில் தெளிவு இருக்காது. யாரிடமாவது திடீரென்று உங்களுக்கு என்ன பிடிக்கும் என்று கேட்டுப் பாருங்கள்; தடுமாறிப் போவார்கள். ஏன, உங்களிடமே கேட்டுப் பாருங்கள், உடனே பதில் வராது. உன்னை அறிந்தால்.., நீ உன்னை அறிந்தால்.., வாழ்க்கையில் உன்னத நிலையை அடையலாம் என்று சொல்கிறார்களே, அது எப்படி? நான் என்னை அறிவதாலேயே எப்படி உயர்வு அடைய முடியும்? நான் என்னைப் பற்றி அறிந்து இருந்தால், இது என்னால் முடியும் என்றும், இது என்னால் முடியாது என்றும் தெளிவாக முடிவு எடுக்க முடியும்.
முடிவு எடுக்கும் திறமை வளர தன்னை அறிந்து இருத்தல் மிகத்தேவை
ஒருவருடைய வெற்றி, தோல்வி என்பது அவரது முடிவு எடுக்கும் திறமையினால்தான் உறுதி செய்யப்படுகிறது. எனவே முடிவு எடுக்கும் தன்மை (Judgement Capacity) வெற்றிக்கான அடிப்படை ஆகும். முடிவு எடுக்கும் திறனை அடைய தன்னை அறிந்து இருத்தல் அடிப்படை தேவை ஆகும். என் திறமை இவ்வளவு, இதற்கு இவ்வளவு ஆதாரம் தேவை, இந்த முயற்சியில் இந்த இந்த தடைகளை எதிர்கொள்ள நேரலாம் என்பது தெரிந்து முயற்சியில் ஈடுபடும்போது தடைகளும் கூட உங்கள் முயற்சியின் ஒரு கூறு ஆகி விடும்.
தன்னை அறிதல் என்பதில் நம்முடைய உயர்வுகள் என்ன, பின்னடைவுகள் என்ன என்பதை அறிந்து இருப்பதும் ஆகும். முடியாததை முடியாது என்று ஏற்றுக் கொள்ளும் பக்குவமும், முடியும் என்பதை முடியும் என்று ஏற்றுக் கொள்ளும் தெளிவும் இருக்க வேண்டும். அப்படி அறிந்து இருந்தால் பெரும்பாலும் தோல்விகளுக்கு வாய்ப்பு இல்லை. மேலும் ஒருவர் தொடர்ந்து வெற்றிகளை சந்திக்கும் போது அவருடைய தன்னம்பிக்கை இயல்பாகவே உயர்கிறது. துணிச்சலும் தானாக வந்து சேரும். முடிவு சரியாக இருக்கும்போது வெற்றி வந்து சேர்கிறது;வெற்றிகள் தன்னம்பிக்கையை அதிகரிக்கின்றன; தன்னம்பிக்கை ஆக்கப் பூர்வமான துணிச்சலை வழங்குகிறது. இவை ஒரு சங்கிலி போல ஒன்றை ஒன்று பின்தொடர்ந்து வருகின்றன.
திறமைக்கு ஒவ்வாத முடிவை எடுத்தால்..?
இதே போல நமக்கு போதிய திறமை இல்லாத, திறமைக்கு ஒவ்வாத ஒரு முடிவை எடுக்கும்போது தோல்வியை சந்திக்க நேர்கிறது. தோல்விகளை சந்திக்க சந்திக்க தன்னம்பிக்கை குறையும்; களைப்பும், சோர்வும் எற்படும்; துணிச்சல் குறையும். மற்றவர்களுக்கு நம் மீது இருக்கும் நம்பிக்கை குறையவும் இந்த தோல்விகள் வாய்ப்புகளைத் தந்து விடும். ஏனையோரின் மதிப்பில் நாம் குறைந்து போய் விட்டால் நமக்கு வரும் வாய்ப்புகள் குறைந்து விடும். வாய்ப்புகள் குறைந்தால் வளர்ச்சி தடைபடும். இந்த மாதிரி தன்னம்பிக்கை குறையும் போது அப்படியே விட்டு விட முடியாது. மீண்டு வர வேண்டும். தன்னம்பிக்கை பெறுவதற்கான முயற்சிகளைச் செய்ய வேண்டும். அதற்கான பயிற்சிகளில் பங்கு பெற வேண்டும்; நூல்களைப் படிக்க வேண்டும். தன்னம்பிக்கை தருபவர்களின் நட்பைப் போற்றி அவர்களுடன் அடிக்கடி கலந்து உரையாட வேண்டும்.
இதுவும் கூட சாதனைதான்!
வாழ்க்கையில் ஏற்றம், இறக்கம் என்ற இரண்டு மட்டும் இல்லை, இருந்த இடத்திலேயே அதாவது ஏற்றமும் இல்லாமல், இறக்கமும் இல்லாமல் இருந்த இடத்திலே இருப்பதும் ஒரு நிலை ஆகும். ஏற்றம் அடைவது மட்டும் சாதனை அல்ல; இன்றைய வேகமான, போட்டி மிகுந்த, போராட்டம் மிகுந்த வாழ்க்கைச் சூழலில் வீழ்ச்சி அடையாமல் இருப்பதும் ஒரு சாதனைதான். இந்த கோரோனா காலம் அதையும் நமக்கு உணர்த்தி வருகிறது. இருக்கும் நிலையை விடக் கீழே சென்று விடாமல், வீழ்ச்சி அடைந்து விடாமல் நம்மைக் காப்பாற்றிக் கொள்வதும் சாதனையாகவே கருதப்பட வேண்டும்.
என்னை நான் அறிந்து இருப்பதால் என் திறமை எனக்குத் தெரிகிறது. எனக்குத் தெரிந்ததை மற்றவர்களுக்குத் தெரிவிக்கிறேன். ஓ இவருக்கு இவ்வளவு தெரிகிறதா என்று மற்றவர்கள் வியக்கிறார்கள். தெரிந்தவர் இவர் என்று மதிக்கிறார்கள். வாய்ப்புகள் வந்து சேர்கின்றன. சில நேரங்களில் இவருக்கு இவ்வளவு தெரிகிறதா என்று சிலருக்கு காழ்ப்புணர்ச்சியும் தோன்றுகிறது. அவர்கள் நம் மீதான வெறுப்புணர்ச்சியை பரப்புகிறவர்களாக இருப்பார்கள். அவர்களையும் தெரிந்து வைத்துக் கொண்டு வினை ஆற்ற வேண்டி இருக்கிறது.
Also Read:
எனவேதான் நம்மைப் பற்றி யாராவது ‘தெரியும்’ என்று கூறிய உடன் ஒரு இனம் புரியாத அச்சம் ஏற்படுகிறது. எச்சரிக்கையாக இருக்க வேண்டும் என்ற முன் எச்சரிக்கை உணர்வு தோன்றுகிறது. நம்மைப் பற்றி தெரிந்து இராதவர்களிடம் இந்த அச்சம் ஏற்படுவது இல்லை. அவர்களை துணிச்சலுடன் எதிர் கொள்கிறோம். நம்மைப் பற்றி நாம் தெரிந்து வைத்து இருப்பதில் உள்ள நன்மைகளை இப்படி எல்லாம் உளவியல் நமக்குக் கற்றுத் தருகிறது.
– டாக்டர் மா. திருநாவுக்கரசு, மனநல மருத்துவர்