சீன விவசாயி ஒருவரின் வீட்டிற்கு அருகே தவளைகள் நிறைந்த குளம் ஒன்று இருந்தது. அதில் ஏராளமான அளவிற்கு, அதாவது நூற்றுக் கணக்கில் தவளைகள் இருப்பதாக கருதினார். நீண்ட நாட்களாக அவை இரவு முழுவதும் கத்திக் கொண்டே இருப்பது அவருக்கு எரிச்சலாக இருந்தது. நகரில் உள்ள அவருடைய நண்பரிடம் சென்று, ”என் வீட்டுக்கு அருகே உள்ள குளத்தில் உள்ள நூற்றுக் கணக்கான தவளைகள் இரவெல்லாம் கத்தி என்னைத் தூங்க விடாமல் செய்கின்றன. இதற்கு என்ன செய்யலாம்?”என்று ஆலோசனை கேட்டார்.

அதற்கு நண்பர், அந்த தவளைகளை எல்லாம் பிடித்து ஒரு உணவகத்துக்கு விற்பனை செய்து விடலாம் என்று ஆலோசனை கூறினார். சீனாவில் தவளைகளை உண்ணும் பழக்கம் உள்ளது.

இரண்டு நண்பர்களும் சேரந்து வலை வீசினர். குளம் முழுவதும் துழாவியும் இரண்டே இரண்டு தவளைகள்தான் கிடைத்தன.

ஒரு ஜோடி தவளைகள் சேர்ந்து சத்தமிடுவதைத்தான் இரவின் இருளில் எண்ணிக்கை அறியாமல் நூற்றுக் கணக்கான தவளைகள் சத்தம் போடுவதாக அந்த விவசாயி தவறாக நினைத்ததைப் போன்று மற்ற நிறுவனங்களின் உண்மை செயல் பாட்டினை அறியாமல் அல்லது தெரியாமல் பல தொழில் முனைவோர் போட்டியாளர்களை தவறாக கணித்துச் செயல்படுகிறார்கள்.

– முனைவர் ச. குப்பன்

எனது கட்டுரைகளைப் படித்துக் கொண்டிருக்கும் ஒருவர் என்னைப் பார்க்க வந்தார். அவரிடம் அறிவாற்றலும், முயற்சியும் இருப்பது பேச்சில் வெளிப்பட்டது. ஒரு சந்தேகத்தைத் தெளிவு படுத்த வந்திருந்தார்.

”தொழிலைத் தொடங்கி நடத்த நான் தயார். ஆனால் எனது திட்டங்கள் எல்லாம் கற்பனையில் விண்ணில் கோட்டை கட்டுவதைப் போல இருக்கின்றன. வேண்டிய நிதியை எப்படி பெறுவதென்று புரியவில்லை; தெரியவில்லை. முடவன் கொம்புத் தேனுக்கு ஆசைப்படுவதைப் போல எனது தொழில் விருப்பங்கள் இருப்பதாக எனது நண்பர்கள் கூறுகிறார்கள்” என்றார். அவரது குரலில் வேதனை மண்டிக் கிடந்தது.

அவரது தொழில் திட்டத்தைப் பற்றிக் கேட்டேன். ஒரு குண்டூசி உற்பத்தி செய்யும் தொழிற்சாலையை உருவாக்குவது அவரது நோக்கம்; அதனைப் பற்றி எல்லா விவரங்களையும் திரட்டி வைத்திருந்தார்.

நிதி உதவிக்கு வங்கிகளை அணுகியிருக்கின்றார். அவர்கள் அவரிடம் நன்றாகப் பேசினாலும் கடன் வழங்க தயங்குவது வெளிப்படையாகத் தெரிந்திருக்கின்றது. அந்த மனநிலையில்தான் என்னைப் பார்க்க வந்தார்.

நான் அவரிடம் நிதி கிடைக்கக் கூடிய வழிமுறைகளைப் பற்றி எல்லாம் பேசினேன். எப்படி நிதியை நிர்வகிக்க வேண்டும் என்பதையும் விளக்கினேன். புதிய நம்பிக்கையோடு எழுந்து விடை பெற்றுச் சென்றார்.

ஒரு விளக்கு எரிவதற்கு மின்சாரம் எப்படி ஆதாரமாக இருக்கின்றதோ, அது போல், தொழில், வணிக நிறுவன வளர்ச்சிக்கு நிதி ஆதாரமாக இருக்கின்றது.

ஒரு தொழிலுக்கு வேண்டிய மூலதனத்தை இரண்டு வகைகளாக பிரிக்கலாம். ஒன்று நிலையான மூலதனம் (Fixed Capital) மற்றொன்று செயல்பாட்டு மூலதனம் (Working Capital).

நிலையான மூலதனம் என்பது நிலம், கட்டடம், எந்திரங்கள் என்று நிலைத்திருக்கும் வகையில் முதலீடு செய்வதாகும். இதன் அளவு தொழிலின் இயல்பை ஒட்டி அமையும்.

செயல்பாட்டு மூலதனம் என்பது மூலப் பொருள்கள் வாங்க, கூலி கொடுக்க, மின்சாரக் கட்டணம் செலுத்த என அன்றாட செலவுகளுக்குத் தேவையான பணமாகும். இதன் அளவு உற்பத்தியினை ஒட்டி இருக்கும்.

முதலில் சொந்தமாக நம்மால் எவ்வளவு முதலீடு செய்ய முடியுமென்று பார்க்க வேண்டும்.

இன்று பலபேர் சொந்த முதலே இல்லாமல் தொழிலைத் தொடங்க முயல்கின்றனர். இது தரையில் ஊன்றாமல் கரணம் போட முயல்வதைப் போன்றது. எல்லோருக்கும் இது வாய்ப்பதில்லை.

சொந்த முதலென்றால் நமது கையிலேயே இருக்க வேண்டுமென்பதில்லை. தொழிலைத் தொடங்குவதற்கு முன்னால் நம்மால் சேர்க்கக் கூடியதைச் சொந்த முதலாக கருதலாம். இதற்கு பல வழிகள் உள்ளன.

நமது பெற்றோரை, உடன் பிறந்தவர்களை, நம்மீது நம்பிக்கை கொண்ட உறவினர்களை முதலீடு செய்யும்படி கூறலாம். அவர்களுக்கு வட்டியோ, ஆதாயத்தில் பங்கோ தருவதாக ஏற்பாடு செய்து கொள்ளலாம்.

ஒரு நிறுவனத்திற்கு நிதி கிடைக்க சில வழிமுறைகள் உள்ளன.
சொந்தமாகத் தொழில் செய்கின்றவர்களுக்கு வங்கிகள் கடன் வழங்குவது முன்பை விட எளிதாகி இருக்கின்றது. வங்கிகளிடன் நிதி பெறுவதில் சிரமங்கள் இருக்கலாம். ஆனால், அது இயலாத ஒன்று என்று கூறி விட முடியாது.

வங்கிகளிடன் கடனையும், அரசு தரும் மானியங்கள் போன்ற சலுகைகளையும் பெற்று தொழிலை வளர்த்திருக்கும் பலரை நான் அறிவேன்.

இப்பொழுது பல தனியார் நிதி நிறுவனங்களும் தொழில் கடன் தருகின்றன. இவற்றிடமிருந்து நிதி பெறுகின்ற பொழுது கவனமாக இருக்க வேண்டும். ஏனென்றால் இவற்றின் வட்டி விகிதம் அதிகமாக இருக்கும்.

நிதி நிர்வாகம்

ஒரு தொழிலை நடத்துவதில் நிதி நிர்வாகம் என்பது மிக முக்கியமான ஒன்றாகும். கிடைக்கின்ற நிதியைச் சரியாகப் பேணிக்காத்து, தக்க முறையில் முதலீடு செய்ய வேண்டும்.

ஏராளமாக நிதி இருந்தால் சிறப்பாகத் தொழிலை நடத்தி விடலாமென்று பலர் நினைக்கின்றனர். உண்மை அதுவன்று. இருக்கின்ற நிதியை நாம் எப்படி நிர்வகிக்கின்றோம் என்பதை ஒட்டித்தான் வெற்றிப் பாதையின் கதவு நமக்குத் திறக்கும்.

நமது தொழிலின் வளர்ச்சி நிலையில் எப்பொழுதெல்லாம் எவ்வளவு பணம் தேவை என்பதைத் திட்டமிட வேண்டும். அதற்கான நிதியை எத்தெந்த வகையில் பெற முடியும் என்பதை முடிவு செய்து, அதற்கு வேண்டியவற்றைச் செய்து கொள்ள வேண்டும்.
தொழில் நடத்துகின்ற பொழுது கிடைக்கின்ற ஆதாயத்தை வெளியில் எடுக்கக்கூடாது.

அதனைச் சேமிப்பாக மாற்றி, தொழிலில் மறு முதலீட்டிற்குக் கொண்டு வர வேண்டும். வைப்பு நிதிகளாக சேமிப்பை மாற்றுகின்ற பொழுது, எதிர்காலத்தில் அவை நிதி மூலங்களாகி தொழில் வளர்ச்சிக்குக் கை கொடுக்கும்.

நாம் கொடுக்க வேண்டிய, செலுத்த வேண்டிய பணத்தை உரிய காலத்தில் கொடுக்க வேண்டும். கையில் பணம் தேங்கக்கூடாது. சேர்கின்ற பணத்தை ஏற்ற முறையில் பயன்படுத்த வேண்டும். கையில் மூலப் பொருள்களாக செய்து முடித்து விற்பனைக்குச் செல்லும் பொருள்களாக இருப்பு வைக்கலாம். பணமாக இருப்பு வைத்தால் வட்டி நட்டமாகும்.

நமக்கு வரவேண்டிய பணத்தை வசூலிப்பதில் தனிக்கவனம் செலுத்த வேண்டும். ரொக்க விற்பனை சிறந்தது. ஆனால் பெரும்பாலான தொழில்களில் கடனுக்குக் கொடுத்து வாங்காமல் தொழில் செய்ய முடியாது. ஆதலால் கடன் கொடுப்பதைத் தவிர்க்க முடியாது ஆனால் கடன் கொடுக்கின்ற பொழுது அவர்களின் நம்பகத் தன்மை அறிந்து கொடுக்க வேண்டும். நமது நிதி சுழற்சி முறையைப் பாதிக்காத வகையில் கடன் கொடுத்து வாங்க வேண்டும்.

ஒரு நிருவனத்திற்கோ, ஓராளுக்கோ நிறைய கடன் கொடுக்க கூடாது. கடன் நிற்வாகம் நிதி நிர்வாகத்தில் சிறப்பான இடத்தைப் பெறுகின்றது.
நமது நிதி நடவடிக்கைகளை இணைத்துச் செயல்படுத்த வேண்டும். நமது முதலீடு, முதலீட்டுக்கு வாங்கும் கடன், கட்டடங்களைக் கட்டுதல், எந்திரங்கள் வாங்குதல், மூலப் பொருள்களைப் பெறுதல், கூலி, சம்பளம் தருதல், விற்பனை செய்தல், விளம்பரம் போன்ற வளர்ச்சிச் செலவுகளை மேற்கொள்ளுதல், கொடுத்த கடனை வசூலித்தல், பெற்ற கடனைத் திருப்பிக் கொடுத்தல், வரி செலுத்துதல் என்று பல்வேறு நிதி நடவடிக்கைகள் இருக்கும்.

நிதி நடவடிக்கைகளைப் பொறுத்தவரை ‘முக்கியம்’ ‘முக்கியமில்லை’ என்று வகைப்படுத்த முடியாது; கூடாது. எல்லாம் முக்கியம்தான். எல்லா நிதி நடவடிக்கைகளும் உரிய காலத்தில் நடைபெற வேண்டும். பணம் வாங்குவதிலும் செலுத்துதலிலும் காலதாமதம் கூடாது.

எல்லா நிதி நடவடிக்கைகளும் தனித்தனியாக நடைபெற்றாலும், அவற்றிற்கிடையில் ஓர் இணைப்பும் தொடர்பும் இருக்கும். இவற்றைப் புரிந்து கொண்டு செயல்பட வேண்டும். வசூலாகின்ற பணம் தடங்கலின்றிக் கிடைத்தால்தான், செலுத்துகின்ற பணத்தை முறையாகச் செலுத்த முடியும்.

நிதியைப் பொறுத்தவரை நாம் எப்பொழுதும் விழிப்போடு செயல்பட வேண்டும். நிறுவனத்திற்கு வருகின்ற எல்லாப் பணத்தைப் பற்றியும், செலுத்துகின்ற, செலவிடுகின்ற எல்லாப் பணத்தைப் பற்றியும் நாம் தெரிந்திருக்க வேண்டும். முறையாகக் கணக்கு வைப்பதும், அவ்வப்போது கணக்கைச் சரிபார்ப்பதும் தேவையாகும்.

– டாக்டர் மா.பா. குருசாமி

இன்றைக்கு நிறைய கல்லூரிகளில் பிபிஏ, எம்பிஏ போன்ற தொழில், வணிகம் சார்ந்த படிப்புகள் உள்ளன. ஏராளமான மாணவர்கள் இவற்றில் சேர்ந்து படிக்கின்றனர். இத்தகைய படிப்புகளைப் படிக்கும் மாணவ, மாணவியரிடம் அந்த படிப்புகள் தொழில் முனைப்பு ஆர்வத்தைத் தூண்டுகின்றனவா, அவ்வாறு தூண்ட கல்லூரிகள் என்னென்ன முயற்சிகளை மேற்கொள்கின்றன என்ற கேள்வியோடு, சென்னை போரூருக்கு அருகே உள்ள கோவூரில் உள்ள செயின்ட் ஜோசப் கலை அறிவியல் கல்லுரியின் வணிகவியல் துறைத் தலைவர் முனைவர். கிறிஸ்டினா அவர்களை அணுகியபோது,

”பிபிஏ போன்ற படிப்புகள் வணிக நிர்வாகம் சார்ந்த படிப்பு ஆகும். இதன் வழியே மார்க்கெட்டிங், நிதி நிர்வாகம், உற்பத்தி போன்ற தொழில் துறையின் அடிப்படைகளைப் பற்றிய பாடங்களை மாணவர்கள் பயில்கிறார்கள். இந்த பாடங்கள் அனைத்தும் தொழில் முனைவுக்கு உதவக் கூடிய பாடங்கள் ஆகும். பிபிஏ-வின் இறுதி ஆண்டில் தொழில் முனைவோர் ஆவதற்கான பாடத் திட்டமும் அறிமுகப்படுத்தப்பட்டு உள்ளது.

எங்கள் கல்லூரியில் பிபிஏ படிக்கும் மாணவர்களில் பாதிக்கும் மேற்பட்டவர்களுக்கு தொழில் தொடங்கும் ஆர்வம் உள்ளது. மற்றவர்கள் படித்து விட்டு ஏதாவது ஒரு வேலைக்கு செல்ல விரும்புகிறார்கள்.

பெரும்பாலான தொழிலதிபர்கள், வணிகர்களின் பிள்ளைகள் இந்த படிப்பில் சேர்ந்து படிக்கிறார்கள். தங்கள் தந்தையின் தொழிலில் அவர்களுக்கு உதவவும் அந்த தொழிலை மேலும் முன்னெடுத்துச் செல்லவும் விரும்பி அவர்கள் இந்த படிப்பில் சேர்ந்து படிக்கிறார்கள்.

நாங்கள் எங்கள் மாணவர்களை தொழிற்சாலைகளுக்கு அழைத்துச் சென்று காட்டுகிறோம். அண்மையில் ஃபாக்லி (fogli) என்ற நிறுவனத்திற்கு மாணவர்களை அழைத்துச் சென்றோம். அங்கு என்னென்ன பிரிவுகள் உள்ளன, என்னென்ன செயல்பாடுகள் நடக்கின்றன என்பதை எல்லாம் நேரடியாகப் பார்த்து அறிந்து கொண்டார்கள்.

எங்களிடம் படிக்கும் மாணவர்களில் சிலர் படிக்கும் பொழுதே சிறிய தொழில்கள், வணிகங்களைத் தொடங்கி நடத்துகிறார்கள். சில மாணவர்கள் படித்துக் கொண்டே பகுதி நேரப் பணிகளிலும் ஈடுபடுகிறார்கள். எங்கள் மாணவர்கள் வேலை தேடுபவர்களாக இருப்பதை விட வேலை கொடுப்பவர்களாக உயர வேண்டும் என்றே விரும்புகிறோம். அதற்கேற்ப அவர்களை உற்சாகப்படுத்துகிறோம். தனிப்பட்ட முறையில் நானும் வணிக இதழ்களில், வணிக ஆங்கில நாளேடுகளில் படித்த செய்திகளை அவர்களுடன் பகிர்ந்து கொள்கிறேன். வணிக இதழ்களைப் படிக்குமாறு ஆலோசனை கூறுகிறேன்.” என்றார், திருமதி. கிறிஸ்டினா.

– ஆர். நந்தினி

சென்னை போன்ற நகரங்களில் இளநீர்க் கடைகள் இல்லாத சாலைகளே இல்லை என்று எளிதில் சொல்லி விடலாம். அந்த அளவுக்கு இளநீர்க் கடைகள் சாலை ஓரக் கடைகளாக இயங்கி வருகின்றன. அதே போல இளநீர் விற்பனை செய்யும் மூன்று சக்கர சைக்கிள்களும் ஆங்காங்கே சுற்றி வருகின்றன. ஆண்கள் மட்டுமே இளநீர் சீவிக்கொண்டிருந்த நிலையில் இப்போது ஏராளமான பெண்களும் இளநீர் சீவிக் கொண்டிருக்கிறார்கள்.

சென்னை, இராமாபுரம், மவுன்ட் – பூந்தமல்லி சாலை ஓரமாக இளநீர்க் கடை வைத்து இருக்கிறார், திருமதி. தேவி. அவரிடம் இளநீர் வியாபாரம் பற்றிக் கேட்டபோது,

”நான் இருபத்தைந்து ஆண்டுகளாக இளநீர் விற்பனை செய்து வருகிறேன். முதலில் இதே இடத்தில் பழைய இரும்புக் கடை வைத்திருந்தோம். அரசு நகருக்குள் உள்ள பழைய இரும்புக் கடைகளை தடை செய்த போது, இளநீர்க் கடைக்கு மாறினோம்.
நாங்கள் பழைய இரும்பு மறுசுழற்சிக் கடை நடத்திக் கொண்டிருந்த போது, அருகில் ஒருவர் இளநீர்க் கடை வைத்து இருந்தார்.

அவ்வப்போது அந்த கடையை எங்களை பார்த்துக் கொள்ளச் சொல்லி விட்டு, அவர் தனது வேறு பணிகளை முடித்து விட்டு வருவார். அப்போது இளநீர் வெட்டி பழகிக் கொண்டேன். பழைய இரும்புக் கடையை மூட வேண்டிய சூழ்நிலை ஏற்பட்ட போது, இளநீர்க் கடையை எங்களிடமே ஒப்படைத்து விட்டு அவர் வேறு பணிக்கு சென்று விட்டார்.

என்னுடைய கணவரின் மறைவுக்குப் பிறகு முழுநேரமாக நான்தான் கடையைப் பார்த்துக் கொள்கிறேன். இது எனக்கு ஒரு வருமானம் தரும் தொழிலாக இருந்தாலும், மக்களின் தாகம் தணிக்கும் சேவை செய்கிறோம் என்ற மனநிறைவும் எனக்கு இருக்கிறது. இளநீரைப் பார்த்தாலே அது வழுக்கை உள்ள இளநீரா, வெறும் தண்ணர் மட்டும் உள்ள இளநீரா, முற்றிய இளநீர் என்பதை என்னால் கண்டு பிடித்து விட முடியும். வாடிக்கையாளர் கேட்பதற்கு ஏற்ப தேர்வு செய்து சீவிக் கொடுப்பேன்.

புதுச்சேரி, பொள்ளாச்சி ஆகிய பகுதிகளில இருந்து சென்னைக்கு நிறைய இளநீர் கொண்டு வரப்படுகிறது. இளநீர் மொத்த வணிகர்களிடம் இருந்து நாங்கள் எங்கள் தேவைக்கு ஏற்ப வாங்கிக் கொள்கிறோம். வாங்கும் விலைக்கேற்ப ஒரு காய்க்கு ஐந்து ரூபாய் முதல் பத்து ரூபாய் வரை லாபம் வைத்து விற்பனை செய்வோம்.

வெயில் காலத்தில் இளநீர் விற்பனை நன்றாக இருக்கும். பனிக் காலம், மழைக் காலங்களில் அவ்வளவாக விற்பனை இருக்காது. விற்பனைக்கேற்ப கொள்முதல் செய்து கொள்வேன். அதிக அளவாக ஒரு நாளில் ஐநூறு இளநீர்க் காய்கள் வரை விற்பனை செய்து இருக்கிறேன். சில நாட்களில் இருபது இளநீர் அளவுக்கு கூட விற்பனை ஆகி இருக்கிறது.

தற்போது அருகே பெரிய கட்டடங்கள் வந்து விட்டதால், அங்கு வருபவர்கள் எங்கள் கடையை மறைத்தபடி தங்கள் வாகனங்களை நிறுத்தி விட்டு செல்வதால், விற்பனை குறைந்து விட்டது. எனவே வேறு இடம் பார்த்துக் கொண்டிருக்கிறோம்.

பொதுவாக மக்களிடம் இளநீர் குறித்த விழிப்புணர்வு அதிகரித்து இருக்கிறது. அதில் உள்ள சத்துகள், அது உடலுக்கு தரும் நன்மைகள் பற்றி எல்லோருக்கும் தெரிகிறது. இதனால் செயற்கை கோலா பானங்களை குடிப்பதற்கு பதில் இளநீர் குடிப்பதை விரும்புகிறார்கள். எனவே இளநீர் விற்பனைக்கு சரிவு எற்பட வாய்ப்பே இல்லை. இதற்கான வாடிக்கையாளர்கள் தொடர்ந்து அதிகரித்தபடியேதான் இருப்பார்கள்.” என்றார்.

– ரா. காயத்ரி