-நெல் அரிசி புரோக்கர்கள் சங்கத்தின் புதிய தலைவர் திரு. திராவிடமணி சிறப்புப் பேட்டி

சென்னைக்கு அருகே உள்ள செங்குன்றத்தில் ‘செங்குன்றம் சுற்று வட்டார நெல் அரிசி புரோக்கர்கள் சங்கம்’ செயல்பட்டு வருகிறது. அதன் தலைவராக திரு. திராவிட மணி அண்மையில் தேர்ந்து எடுக்கப்பட்டு உள்ளார். நெல், அரிசி வணிகத்தில் செங்குன்றம் பெற்று இருக்கும் இடம், இன்றையா வணிக நிலை ஆகியவை பற்றி திரு. திராவிடமணி, வளர்தொழில் இதழுக்கு பேட்டி அளித்தார். அப்போது அவரிடம் கேட்கப்பட்ட கேள்விகளுக்கு அவர் அளித்த பதில்கள் பின்வருமாறு –

நெல், அரிசி வணிகத்தில் புரோக்கர்களின் பங்கு என்ன?

செங்குன்றம் பகுதியில் விற்பனையாகும் நெல் பல வெளி ஊர்களுக்கும், வெளி மாநிலங்களுக்கும் கொண்டு செல்லப்படுகின்றது. செங்குன்றம் சந்தை கிட்டத்தட்ட தமிழகத்திலேயே நெல்லுக்கு என இயங்கும் மிகப் பெரிய சந்தைகளிள் ஒன்று. செங்குன்றம் சுற்று வட்டார பகுதியில் மொத்தம் சுமார் நூற்று நாற்பதுக்கும் மெற்பட்ட அரிசி ஆலைகள் இயங்கி வருகின்றன. அவற்றுள் ஐம்பது ஆலைகள் சுறுசுறுப்பாக இயங்கி வருகின்றன. நெல்லின் விலையை நிர்ணயிப்பதில் புரோக்கர்களின் பங்கும் இருக்கிறது. இவர்கள் நெல்லை விற்க வரும் வியாபாரிகளுக்கும் கொள்முதல் செய்ய வரும் வியாபாரிகளுக்கும் பாலமாக இருந்து வணிகத்தை முடித்து வைக்கிறார்கள். நெல் விவசாயிகளுக்கும், வியாபாரிகளுக்கும் கூட நாங்கள் பாலமாக இருக்கிறோம்

எங்கு இருந்து லோடுகள் வந்தாலும் அவற்றை விற்பனை செய்ய எடுத்து வந்து இருக்கும் வணிகரின் முன்னிலையிலேயே நெல் வாங்க வந்து இருக்கும் வணிகரிடம் பேசி விலை நிர்ணயித்து இருவருக்கும் மனநிறைவாக வணிகத்தை முடித்து கொடுக்கிறோம்.

சந்தைக்கு வரும் எல்லா நெல்லும் அவ்வப்போதே விற்பனை ஆகி விடுமா?

எங்கள் பகுதிக்கு நள்ளிரவு பன்னிரன்டு மணி முதலே நெல் ஏற்றிய சரக்கு லாரிகள் வரத் தொடங்கி விடும். காலை ஐந்து மணி முதல் புரோக்கர்கள் லாரிகளில் இருக்கும் நெல் வகை, தரம் ஆகியவற்றை ஆராய்ந்து, கொள்முதல் செய்ய வந்து இருக்கும் வணிகர்களிடம் நெல் முட்டைகளை விற்பனை செய்வதற்கான பணிகளில் ஈடுபடத் தொடங்கி விடுவார்கள்.

போக்குவரத்து நெரிசல் ஏற்படுவதன் காரணமாக காலை ஒன்பது மணிக்கு மேல் எந்த சரக்கு வாகனங்களும் செங்குன்றம் நகரின் உள்ளே உள்ள மெயின் சாலையில் நிறுத்தக் கூடாது. அப்படி ஒன்பது மணிக்கு மேலும் அந்த லாரியில் இருக்கும் நெல் விற்பனை ஆகவில்லை என்றால் அப்படிப்பட்ட லாரிகளை தனியார் பார்க்கிங் இடங்களுக்கு கொண்டு சென்று, நிறுத்தி விடுவோம். அங்கிருந்தபடி விற்பனை நடைபெறும். அந்த நிறுத்தும் இடங்களில் லாரிகளை நிறுத்த ஒரு மணி நேரத்திற்கு ரூ.100 என்ற விகிதத்தில் கட்டணம் செலுத்த வேண்டி இருக்கும். பெரும்பாலும் அன்றன்றைக்கே விற்பனை ஆகி விடும்.

நீங்கள் எவ்வளவு காலமாக இந்த தொழிலில் இருக்கிறீகள்?

இந்த பகுதிக்கு சுமார் 1970 களிள் இருந்தே நெல் லோடுகள் வரத் தொடங்கி விட்டன. 1980களின் தொடக்கத்தில் இருந்தே நமது அண்டை மாநிலமான ஆந்திராவில் இருந்து நெல் லோடுகள் கணிசமாக வரத் தொடங்கி விட்டன. நான் இந்த தொழிலில் 1981 – ல் இருந்தே ஈடுபட்டு வருகிறேன். தற்போதைய சந்தை நிலவரப்படி இங்கு வரும் நெல்முட்டைகள் சுமார் 70% சதவிதத்திற்கும் மேற்பட்டவை ஆந்திராவில் இருந்துதான் வருகின்றன.

ஒரு நாளைக்கு சராசரியாக ஏழுபது முதல் நூறு லாரிகள் வந்து செல்கின்றன. நல்ல பருவத்தில் சுமார் நூற்று ஐம்பதுக்கும் மேற்பட்ட லாரிகள் வருகின்றன. சீசனே இல்லை என்றாலும் குறைந்தது ஐம்பது லாரிகள் கண்டிப்பாக வந்து விடும்.
நான் அரிசி தரகராக இருப்பதோடு நெல்லை கொள்முதல் செய்து விற்பனை செய்வதும் உண்டு. இது போன்று பல தரகர்கள் நெல் வணிகத்திலும் ஈடுபடுவார்கள்.

ஒரு தரகர் ஒரு கைப்பிடி நெல்லை கையில் எடுத்துப் பார்த்தே இந்த நெல் பத்து முட்டைக்கு ஆறு முட்டையில் இருந்து ஏழரை முட்டை வரையில் அரிசி தருமா எனக் கூறி விடும் அளவுக்கு திறமையாக இருப்பார்கள்.

இப்போது அரிசி ஆலைகளைப் பொறுத்தவரை பல புதிய தொழில் நுட்பங்கள் வந்து விட்டன. முன்பு எல்லாம் நெல்லில் கருப்பு கலந்து இருந்தால், அந்த லோடையே சில நேரங்களிள் புரோக்கர்கள் புறக்கணித்து விடுவார்கள். ஆனால் தற்போது நெல்லில் உள்ள கருப்புகளை, கற்களை பிரித்து எடுக்கும் பணியை நவீன அரிசி ஆலைகளில் உள்ள எந்திரங்களே செய்து முடித்து விடுகின்றன. இப்படிப்பட்ட செயல்களைச் செய்ய குறைந்தது இருபது டன் நெல்லை அந்த எந்திரத்தின் உள்ளே கொட்ட வேண்டும். தற்போது ஒரே நேரத்தில் ஐம்பது டன் நெல்லைக் கூட உள்வாங்கி அரிசியாக்கும் நவீன அரிசி ஆலைகள் வந்து விட்டன.

இங்கு இருந்து அரிசி எந்த ஊர்களுக்கு அதிக அளவில் அனுப்பப் படுகிறது?

சேலம், நசரத்பேட்டை, திருவண்ணா மலை, ஊட்டி, விக்கிரவாண்டி, வேலூர் போன்று பல இடங்களுக்கு அரிசி லோடுகள் செல்கின்றன.

தஞ்சாவூர், மதுரை, திருச்சி, மணப்பாறை மற்றும் தூத்துக்குடி ஆகிய மாவட்டங் களுக்கும் சரக்குகள் கொண்டு செல்லப் படுகிறது. மகாராஷ்டிரா மாநிலம் நாக்பூரில் இருந்தும் கூட இங்கு நெல் விற்பனைக்கு வருகின்றது.

செங்குன்றத்தில் இருந்து அரிசி ஏற்றுமதி செய்யப்படுகிறதா?

ஏற்றுமதியைப் பொறுத்தவரை பெரிய அளவில் நடைபெறவில்லை.
எனக்குத் தெரிந்த வரை, அருகே உள்ள பொன்னேரியில் இருந்து இருவர் ஏற்றுமதி வணிகத்தில் ஈடுபட்டு இருக்கிறார்கள். குறிப்பாக நார்ச்சத்து அதிகம் உள்ள சிவப்பு அரிசியான பிசிலிகாரு போன்ற வகை அரிசிகள் மலேசியா, சிங்கப்பூர் ஆகிய நாடுகளுக்கு ஏற்றுமதி செய்யப்படுகிறது.

வேதி உரங்கள் பயன்படுத்தாமல் விளைவிக்கப்படும் ஆர்கானிக் அரிசிக்கான விற்பனை வாய்ப்பு இங்கே உள்ளதா?

ஆர்கானிக் அரிசி எனப்படும் இயற்கை உரம் மட்டும் பயன்படுத்தி விளைவி க்கப்படும் அரிசிகள் இப்போது நம் சந்நையில் விற்பனைக்கு வருவது கிடையாது. அதனை விளைவிக்கும் விவசாயிக்கு பயன் குறைவு என்பதால், பெரும்பாலும் சிலர் மட்டுமே அவர்கள் விருப்பத்திற்கு என சிறிய அளவில் விளைவித்து வருகின்றனர்.

அரிசி வணிகத்தில் புதிய இளைஞர்கள் இறங்கலாமா? அதற்கான தங்கள் ஆலோசனை என்ன?

அரிசி வணிகத்தைப் பொறுத்தவரை புதிதாக எவர் வேண்டும் என்றாலும் தொடங்கலாம். ஒரு இளைஞர் அனுபவம் பெற்ற வணிகரிடம் இருந்து பயணித்து அனுபவம் பெற்ற பின்பு அவர் துணிச்சலுடன் தயக்கம் இன்றி செயல்படலாம்.
எங்கள் சங்கமும், சங்க உறுப்பினர்களும் புதிதாக வருபவர்களுக்கு இழப்பு எற்படாத வகையில் அவரை வழி நடத்தி அவருக்கு தொழில் நுணுக்கங்களை கற்றுக் கொடுப்போம். ஒரு லோடு விலை சராசரியாக முன்றரை லட்சம் ரூபாய் வரை இருக்கும். முன்பு டிராக்டர்களிள் சிறிய சிறிய லோடுகள் வந்து கொண்டு இருந்தன. தற்போது அது போன்ற லோடுகள் வருவது இல்லை. ஒருவர் தனியாகவோ, அல்லது சிலர் சேர்ந்தோ ஓரு லோடினை வாங்கி வியாபாரம் செய்யலாம்.

ஜிஎஸ்டிக்குப் பின் அரிசிக்கான வரி விதிப்பு எப்படி இருக்கிறது?

அரிசி என்பது அன்றாடம் தேவைப்படும் உணவுப் பொருள். கலைஞர் அவர்களின் ஆட்சி காலத்தில் அரிசிக்கு வரிவிலக்கு கொண்டு வந்தார். தற்போது ஜிஎஸ்டியில் அரிசிக்கு வரி விதிக்கப்படுகின்றது. அதாவது அரிசியை அப்படியே பிராண்டு பெயர் இல்லாமல் விற்பனை செய்தால் அதற்கு ஜிஎஸ்டி வரி இல்லை. பிராண்டு பெயருடன் விற்பனை செய்தால் ஜிஎஸ்டி செலுத்தியாக வேண்டும்.

ஒரு அரிசி லோடுக்கு ஒரு முறை செஸ் வரி (சராசரியாக ரூ.1000) செலுத்தினால் போதுமானது. அதனை பயன்படுத்தி எந்த மாநிலத்துக்கும் கொண்டு செல்லலாம். அரிசி உணவுப் பொருள் என்பதால் ஒரு மாநிலத்தில் இருந்து மற்ற மாநிலத்துக்கு செல்லும் போது பெரிதாக எந்த கட்டுப்பாடும் கிடையாது.

அரிசியை எவ்வளவு நாட்களுக்கு இருப்பு வைத்து விற்பனை செய்ய முடியும்? அல்லது பயன்படுத்த முடியும்?

அரிசியை அதிக அளவாக ஒரு ஆண்டு வரை கெடாமல் இருப்பு வைக்க முடியும். ஆனால் அப்படி அதிக காலம் கெடாமல் இருப்பு வைக்க, நெல்லை அரைத்த பின்பு, அரிசியை ஹீட்டர் முலம் நன்கு உலர வைத்து சற்றும் ஈரப்பதம் இல்லாமல் சிறப்பாக பேக் செய்து வைக்க வேண்டும். இப்படிச் செய்தால்தான் அரிசி ஒரு ஆண்டு வரை கெடாமல் இருக்கும். சாதாரணமாக பேக் செய்தால், ஆறு மாதம் வரை கெடாமல் இருக்கும். ஒட்டல்களுக்கு சப்ளை செய்யும் சிலர், ஆலையில் இருந்து வரும் அரிசியை அப்படியே பேக் செய்து கொடுத்து விடுவார்கள். அப்படிப்பட்ட அரிசி முன்று மாதங்கள் மட்டுமே கெடாமல் இருக்கும்.

தற்போது ஆலைகளில் ஐம்பது டன் வரை ஒரே முறையில் நெல்லை அரிசியாக்க முடியும். அப்படி வரும் அரிசி சைலோ (silo) எனப்படும் சேமிப்புத் தொட்டியில் சென்று சேர்ந்து விடும். தொட்டியில் இருந்து கன்வேயர் பெல்ட் மூலம் 25 கிலோ மூட்டைகளாக நிரப்பப்பட்டு, தைக்கப்பட்டு தானியங்கி முறையில் அரிசி மூட்டைகள் வந்து விடும். அதனை எடுத்து அடுக்குவதற்கே தற்போது ஆலைகளில் மனிதவளம் தேவைப்படுகின்றது.

நெல், அரிசி புரோக்கர்கள் சங்கத்தின் பணிகள் என்ன? தற்போது தாங்கள் கடுமையான போட்டிக்கு இடையே வெற்றி பெற்று புதிய தலைவராக தேர்ந்து எடுக்கப்பட்டு இருக்கிறீர்கள். என்னென்ன பணிகளை மேற்கொள்ள இருக்கிறீர்கள்?

எங்கள் நெல் அரிசி புரோக்கர்கள் சங்கம் 1986ல் தொடங்கப்பட்டது. சங்கம் உருவாக காரணமாக இருந்த பன்னிரென்டு பேர்களிள் நானும் ஒருவன். நான் தொடக்க காலத்தில் இருந்தே எல்லா பதவிகளிலும் இருந்து இருக்கிறேன். தற்போது மூன்றாவது முறையாக தலைவராக தெர்ந்தெடுக்கப்பட்டு உள்ளேன். நான் புதிதாக தலைவராக தேர்ந்தெடுக்கப்பட்ட நிலையில், எங்கள் உறுப்பினர்கள் அனைவருக்கும் காப்பீடு திட்டம் கொண்டு வர உள்ளோம். செங்குன்றம் பகுதியில் இயங்கி வரும் நெல் அரிசி வியாபாரிகள் சங்கத்தின் கீழ் இயங்கும் திருமண மண்டபத்தில் எங்கள் உறுப்பினர்களுக்கு 25% தள்ளுபடி வழங்க திட்டமிட்டு உள்ளோம்.

உறுப்பினர்களிள் பிள்ளைகள் மேற்படிப்பிற்காக செல்லும் போது அவர்களுக்கு கல்வி ஊக்கத் தொகையை பரிசாக வழங்குகின்றோம். எதிர்பாராமல் சங்க ஊறுப்பினர் ஒருவர் காலமானார் என்றால் அவர்கள் குடும்பத்திற்கு ரூ.50,000 சங்கம் சார்பாக வழங்கி வருகின்றோம்.

செங்குன்றம் பகுதியில் அனைத்து அரிசி மண்டிகளும், தரகர்களும் நம்பிக்கையுடனும், நேர்மையுடனும் தொழிலை நடத்தி வருகின்றனர். தமிழகத்தில் அரிசி விலையை நிர்ணயிக்கும் ஒரு முக்கிய சந்தையாகவும் செங்குன்றம் செயல்பட்டு வருகின்றது. (98401 59597)

-செ. தினேஷ்பாண்டியன்

இன்றைக்கு தொழில் நிறுவனங்களுக்கு மட்டும் அல்ல, அனைத்து செயல் பாடுகளுக்கும் வெப்சைட் என்பது இன்றியமையாத ஒன்று என்று ஆகி விட்டது. இதற்குக் காரணம், வெப் சைட் எனப்படும் இணைய தளம் மூலமாக இருபத்து நான்கு மணி நேரமும் நம் நிறுவனத்தைப்பற்றி உலகில் எங்கு இருந்தும் அறிந்து கொள்ள முடியும் என்பதோடு, வணிக வாய்ப்பையும் அதிகரிக்கின்றன என்பதுதான்.

ஆனாலும் சில வணிகர்களுக்கு இந்த நுட்பம் பற்றிய புரிதல் இல்லாமல் இருப்பதால், இணைய தளம் தொடர் பான தயக்கம் இருக்கிறது. வெப் சைட்டுகளை வடிவமைத்துத் தரும் பல நிறுவனங்கள் உள்ளன. இவற்றில் பல நாணயமாக செயல்பட்டாலும், சில நிறுவனங்கள், வாடிக்கையாளர்களின் அறியாமையைப் பயன்படுத்தி நியாயத்துக்குப் புறம்பாக அதிக கட்டணம் பெறுவது, தொடர் சேவை அளிக்காமல் அலைக்கழிப்பது போன் றவற்றை செய்து வாடிக்கையாளர்களிடம் கெட்ட பெயரை சம்பாதித்துக் கொள்கிறார்கள்.

வெப் சைட் உருவாக்கல், இப்போது எளிதானதாக மாறி விட்டது. ஒரு இணைய தளம் உருவாக்கும் போது முதலில் பிக்ராக் போன்ற டொமைன் பதிவாளர்களை அணுகி டொமைன் பெயர் பதிவு செய்யப்படுகிறது. இந்தப் பெயர் வாடிக்கையாளர்கள் எளிதில் நினைவில் வைத்து இருக்கும் வகையில் அமைய வேண்டும். நாம் தேர்ந்து எடுக்கும் பெயரை இணைய வடிவமைப்பாளர்களே பதிவு செய்து தந்து விடுவார்கள்.

இணைய தள வடிவமைப்புக்கான தொழில் நுட்பங்கள் அளவில்லாமல் கிடைக்கின்றன. இவற்றைப் பயன்படுத்தியே இணைய தள வடிவமைப்பாளர்கள் நமக்கான இணைய தளத்தை உருவாக்கித் தருகிறார்கள்.

இணைய தள வடிவமைப்ப £ளர்களிடம், முதலில் இணைய தள உருவாக்கத்துக்கான கட்டண விவரங்களைக் கேட்டு உறுதிப்படுத்திக் கொள்ள வேண்டும். பின்னர் நம் நிறுவனத்தைப் பற்றி வாடிக்கை யாளர்களுக்குத் தெரிய வேண்டிய முதன்மை யான செய்திகள், பொருத்தமான படங்கள் போன்றவற்றை இணை தளய வடிவமை ப்பாளர்களுக்குத் தர வேண்டும். நாம் செய்திகளைக் கொடுத்தால், கட்டணம் பெற்று அவற்றை சிறப்பாக எழுதித் தரும் கன்டென்ட் ரைட்டர்களையும் இதற்கு பயன்படுத்தலாம்.

என்னென்ன தலைப்புகளில் தகவல்கள் இடம் பெறலாம் என்ற ஆலோ சனைகளையும் இணைய தள வடிவமைப்பாளர்களிடம் இருந்து பெறலாம். தங்கள் தொழில் சார்ந்த மற்ற இணைய தளங்களைப் பார்த்தாதும் தெளிவு பெறலாம்.
நம் இணைய தளத்தின் வாயிலாகவே பொருட்களை வாங்கும் வசதியும் இருக்க வேண்டும். இதற்கான பேமன்ட் கேட்வே- யையும் இணைய வடிவமைப்பாளர்களே இணைத்துத் தந்து விடுவார்கள்.

வெப் சைட்டின் யூசர் நேம், பாஸ்வேர்டு ஆகியவற்றை இணைய வடிவமைப் பாளர்களிடம் தவறாமல் பெற்று ரகசியமாக வைத்திருக்க வேண்டும். பின்னர் வேறு யார் மூலமாகவாவது இணைய தளத்தில் மாறுதல் செய்ய வேண்டி இருந்தால் இந்த யூசர் நேம், பாஸ்வேர்ட் கண்டிப்பாக தேவைப்படும்.

-எவ்வி

கடந்த டிசம்பர் மாதம் நடைபெற்ற நாடாளுமன்ற குளிர்கால கூட்டத் தொடரில் திரிணமுல் காங்கிரஸ் கட்சியின் உறுப்பினர் திரு. டிரேக் ஓ பிரையன், ”டிஜிட்டல் இந்தியாவைப் பற்றி பேசும் ஆளும் கட்சி, தகவல் பாதுகாப்புச் சட்டத்தை எப்போது நிறைவேற்றும்?” என்ற வினாவை எழுப்பினார். அதற்கு விடை அளித்த சட்ட அமைச்சர் திரு. ரவிசங்கர் பிரசாத், ஓய்வு பெற்ற உச்சநீதி மன்ற நீதிபதி திரு. பி. என். ஸ்ரீகிருஷ்ணா தலைமையில் ஒரு கமிட்டி அமைத்து உள்ளதாகவும், அது வரைவு அறிக்கையை வழங்கிய பின் பல நிறுவனங்களுடன் ஆலோசித்து, திருத்தங்கள் செய்து அந்த தகவல் பாதுகாப்பு சட்டத்தை நடைமுறைப் படுத்துவோம் என்று கூறினார்.

கிருஷ்ணா கமிட்டியும் தகவல் பாதுகாப்பு சட்டத்துக்கான வரைவு அறிக்கையை (ட்ராஃப்ட் பில்) கடந்த ஜூலை, 2018-ல் வழங்கியது. அந்த அறிக்கையில் நம் நாட்டில் உள்ள இணைய பயனாளர்களின் தகவல்களை அடங்கிய டேட்டா சென்டர்களை இந்தியாவில்தான் அமைக்க வேண்டும். மேலும் குடிமக்களின் பாதுகாப்பு கருதி இந்திய அரசு, சில தகவல்களைக் கேட்டால், அவற்றை அந்த நிறுவனங்கள் கொடுக்க வேண்டும் என்று வலியுறுத்தியது. இது பல பன்னாட்டு நிறுவனங்களுக்கு எள்ளளவும் பிடிக்கவில்லை.

பரவலாகப் பயன்படுத்தப்படும் இணைய உலாவியான மோசில்லா ஃபயர்ஃபாக்ஸ் நிறுவனத்தின் தலைமை அதிகாரி திருமதி. மிச்சேல் பேக்கர், இந்தியாவில் டேட்டா சென்டரை வைத்தால் எங்கள் வணிகம் கடுமையாக பாதிக்கும் என்று கூறி உள்ளார். இந்த வரைவு அறிக்கையில் நம் நாட்டில் உள்ள இணைய பயனாளர்கள் குறித்த தகவலை எவருக்காவது விற்றால் அல்லது களவாடினால் அந்த நிறுவனத்தை கடுமையாக தண்டிக்கும் வகையில் அமைந்து இருக்கிறது. இது நம் தகவல்களை விற்கும் ஸ்டார்ட் அப் நிறுவனங்களுக்கும் பொருந்தும்.

கூகுள் நிறுவனத்தின் தலைமை செயல் அதிகாரியும், இந்தியாவை பூர்வீகமாகக் கொண்டவருமான திரு. சுந்தர் பிச்சை, இந்த வரைவு அறிக்கைக்கு தனது தரப்பில் இருந்து கடுமையான எதிர்ப்பை கடிதத்தின் மூலமாக அரசுக்கு தெரிவித்தார். இது போன்ற சட்டங் களால் ஸ்டார்ட் அப் நிறுவனங்கள் பாதிப்பு அடையும். (அவற்றில் முதலீடு செய்திருப்பவை பன்னாட்டு நிறுவனங்கள் தானே!) தகவல்கள் தங்கு தடையின்றி நாடுகளைக் கடந்து சென்றால்தான் ஸ்டார்ட் அப் நிறுவனங்கள் இலாபம் அடைய முடியும் என்றார்.

அதனைத் தொடர்ந்து இந்திய மென்பொருள் நிறுவனங்களின் கூட்ட மைப்பான நாஸ்காம் உறுப்பினரும், இந்தூரில் உள்ள ஐஐஎம், மேலாண்மை இயல் புலத்தின் இயக்குநரும் ஆன திரு. ரிஷிகேசா கிருஷ்ணன், இந்த வரைவு அறிக்கை இணைய தள கொள்கைக்கே முரணானது என கடுமையாக சாடினார்.

அமெரிக்க இணைய தள பயனாளர் களின் தகவல்கள் அமெரிக்காவில்தான் இருக்கும். அமேசான். ஃபேஸ்புக் போன்ற நிறுவனங்கள், தங்கள் டேட்டா சென்டர்களை (Data Center) அமெரிக்கா வில்தான் வைத்து உள்ளன. அவ்வப் போது டேட்டா சென்டர்களில் சேமிக் கப்பட்ட தகவல்களை அமெரிக்க உளவு நிறுவனங்கள் இந்த நிறுவனங்கள் கொடுத்து இருப்பது பற்றி நாம் செய்தித் தாள்களில் படித்து இருக்கிறோம்.

நம் நாட்டில் டேட்டா சென்டர் அமைந்தால் மட்டுமே, இங்கே நடைபெறும் இணையம் சார்ந்த குற்றச் செயல்களைக் கண்டு பிடித்து தடுக்க முடியும்.

அமெரிக்கா மற்றும் ஐரோப்பிய நாடுகளில் அங்கு உள்ள இணைய பயனாளர்களின் ஒப்புதல் இல்லாமல், அவர்களைப் பற்றிய தகவல்களை பிற நிறுவனங்களுக்கு விற்பனை செய்யக் கூடாது என்ற கடுமையான விதி பின்பற்றப்படுகிறது.
ஏனென்றால் இங்கு செல்பேசி சேவைகளை வழங்கி வரும் நிறுவனங்கள், அங்காடிகளையும் நடத்தி வருகின்றன.

அனைத்து அலைபேசி எண்களுடன் ஆதார் எண்களும் இணைக்கப்பட்டு உள்ளன. இது போன்ற நிறுவனங்கள், தங்களுடைய துணை நிறுவனங்களுக்குத் தான் தகவல்களைக் கொடுக்கிறோம் என்று கூறுவதற்கு வாய்ப்பு இருக்கிறது. ஆகவே, தணிக்கையாளர்கள், இந்த டேட்டா சென்டர்களை தணிக்கை செய்து ஆண்டு பொதுக்குழு கூட்டத்தில் சிஸ்டம் ஆடிட் அறிக்கையை வழங்க வலியுறுத்த வேண்டும்.

இதுபோன்ற சட்டப் பிரிவுகளைச் சேர்த்தால்தான் பாதுகாப்பான இணைய பணப்பரிமாற்றங்களையும், வணிகத்தையும் செய்ய முடியும்.

-மதிமான்

வணிகப் பொருட்களையோ அல்லது சேவைகளையோ, வாடிக்கையாளரிடம் தனித்துவமாய் அடையாளப்படுத்த பயன்படுத்தப்படும் ஒரு சின்னம் அல்லது குறியீட்டையே ட்ரேட் மார்க் என்கிறோம். இந்த ட்ரேட் மார்க் ஒருவரின் அல்லது ஒரு நிறுவனத்தின் வியாபார பொருட்களை அல்லது சேவைகளை மற்றவர்களிடம் இருந்து வேறுபடுத்திக் காட்டுகின்றது.

இத்தகைய ட்ரேட் மார்க்கை பதிவு செய்வதற்கான நடைமுறைகள் என்ன என்பதை காணலாம். ஒரு வணிகர் இந்த ட்ரேட் மார்க்கை அதற்குரிய கட்டணத்துடன் ட்ரேட் மார்க் பதிவு அலுவலகத்தில் பதிவு செய்து கொண்டால் அந்த பதிவானது பத்து ஆண்டுகளுக்கு செல்லுபடியாகும்.

அதற்குப் பின்னர் மீண்டும் உரிய கட்டணத்துடன் புதுப்பித்துக் கொள்ள வேண்டும். பல்வகை பொருட்கள் அல்லது சேவைகளுக்கான ட்ரேட் மார்க்கை பதிவு செய்வதற்கு ஒரேயொரு விண்ணப்பம் போதுமானதாகும். ட்ரேட் மார்க் பெற இணையத்தின் வாயிலாகவும் பதிவு செய்ய முடியும். அதற்கான படிமுறைகள் பின்வருமாறு:

முதலில், பதிவு செய்ய விரும்பும் ட்ரேட் மார்க்குக்கான பெயரை அல்லது சின்னத்தை (Logo) வேறு யாரும் பதிவு செய்யவில்லையா என உறுதி செய்து கொள்ள வேண்டும். இதற்கு ipindiaonline.gov.in/ tmrpublicsearch /frmmain.aspx/ என்ற இணைய தளத்துக்கு செல்ல வேண்டும். அங்கு உரிய முறையில் தேடினால், ஏற்கெனவே பதிவு செய்யப்பட்டு விட்டதா, இல்லையா என்பதைத் தெரிந்து கொள்ளலாம்.

அவ்வாறு பதிவு செய்யப்படாமல் இருந்தால், நம் வணிகம் எந்த வகைக்குள் வருகின்றது என சரி பார்க்க வேண்டும். இதற்கு ipindiaonline.gov.in/ tmrpublicsearch /classfication_goods_service.htm என்ற இணைய முகவரிக்கு செல்ல வேண்டும்.

பின்னர் இந்த இணைய பக்கத்தில் உள்ள அதற்கான படிவத்தில் தேவையான அனைத்து விவரங்களையும் நிரப்ப வேண்டும். அதனுடன் டிஜிட்டல் கையொப்ப சான்றிதழை (digital Signature Certificate(DSC)) யும் இணைத்து சப்மிட் செய்ய வேண்டும்.

இதுவரை கூறிய அனைத்தையும் சரியாக செயல்படுத்தி அனுப்பிய பின்னர், விண்ணப்பதாரரின் மின்னஞ்சல் முகவரிக்கு, பதிவு செய்தவை அனைத்தும் சரியாக உள்ளதா இல்லையா என்பதை தெரிவிக்கும் மின்னஞ்சல் ஒன்று வந்து சேரும். ட்ரேட் மார்க் பதிவு செய்யும் இணைய பக்கத்தில் நம் கணக்கில் உள்நுழைவு செய்வதற்கான இணைய இணைப்பு ஒன்றும் இந்த மின்னஞ் சலுடன் கிடைக்கப் பெறும்.

மேற்கண்ட நடைமுறைகளை முடித்த பின், நமக்கு வந்த மின்னஞ்சலில் குறிப்பிட்டுள்ள இணைப்பில் உள்நுழைவு செய்து TM-A எனும் படிவத்தை நிரப்ப வேண்டும். அடுத்து இந்த இணைய தளத்தின் முகப்பு பக்கத்தில் உள்ள Paymentஎன்பதை சொடுக்கினால் தோன்றும் திரையில் NEFT அல்லது கிரடிட் கார்ட் – எதன் மூலம் பதிவு கட்டணத்தினை செலுத்த விரும்பு கின்றோம் என்பதை தேர்வு செய்து அதன் வாயிலாக பதிவுக் கட்டணத்தை செலுத்த வேண்டும். பதிவுக் கட்டணம் செலுத்தியதற்கான ஏற்புகை சீட்டு தானாகவே உருவாகி விடும். இரண்டு நாட்கள் கழித்து இதே இணைய பக்கத்தின் Generate Receipt எனும் பொத்தானை சொடுக்கி அச்சு எடுத்துக் கொள்ளலாம்.

அடுத்து நம் விண்ணப்பம் ட்ரேட் மார்க் பதிவு அலுவலர்களால் சரிபார்க்கப்படும். விதிமுறைப்படி அனைத்தும் சரியாக இருந்தால் ட்ரேட் மார்க் பதிவாளரால் மீண்டும் ஒருமுறை சரிபார்க்கப்படும். அதன் பின்னர் ட்ரேட் மார்க் தொடர்பாக வெளியிடப்படும் இதழில் நம் ட்ரேட்மார்க் வெளியிடப்படும். அதனோடு இந்த ட்ரேட் மார்க்கை வழங்குவதில் யாருக்காவது மறுப்பு இருந்தால் அதனை 30 நாட்களுக்குள் தெரிவிக்குமாறு அறிவிப்பு ஒன்றும் இருக்கும். முப்பது நாட்களுக்குள் மறுப்பு எதுவும் வரவில்லை எனில் விண்ணப்பித்தவருக்கு ட்ரேட் மார்க் பதிவுச் சான்றிதழ் வழங்கப்படும்.

பதிவுக்கான மேற்கண்ட பணிகள் நடைபெற்றுக் கொண்டிருக்கும் போது விண்ணப்பித்தவர், தம் பொருட்க ளுக்கான ட்ரேட் மார்க் அருகில் ஜிவி என்ற குறியீட்டையும், சேவைகளுக்கான ட்ரேட்மார்க் எனில் ஷிவி என்ற குறியீட்டையும் பயன்படுத்திக் கொள்ளலாம். சான்றிதழ் கைக்கு கிடைக்கப் பெற்ற பின்னர் தமக்கு அனுமதிக்கப்பட்ட வணிக குறியீட்டுடன் டி என்ற குறியீட்டினை சேர்த்து பயன்படுத்திக் கொள்ளலாம். ட்ரேட் மார்க் பதிவு செய்வதற்கு தேவையான ஆவணங்கள் பின்வருமாறு-

தனி உரிமையாளர் எனில் –
விண்ணப்பிக்கும் ட்ரேட் மார்க் நகல் (விரும்பினால்),
முகவர் அல்லது பதிவு பெற்ற வழக்குரைஞர் மூலம் விண்ணப்பித்தால் உரிமையாளர் கையொப்பமிடப்பட்ட படிவும் எண் 48,
உரிமையாளரின் அடையாளச் சான்று
உரிமையாளரின் முகவரிச்சான்று

நிறுவனம் சார்பில் எனில் –
ட்ரேட்மார்க் நகல்
கையொப்பமிடப்பட்ட படிவும் எண் 48,
.சிறு நிறுவனம் எனில் பணிஆதார பதிவுச் சான்றிதழ்,
கம்பெனி எனில் பதிவுச் சான்றிதழ், பங்குதாரர்கள் எனில் கூட்டாண்மை ஒப்பந்தம்,
கையொப்பமிடுபவரின் அடையாளச் சான்று,
கையொப்பமிடுபவரின் முகவரிச்சான்று
நிறுமம் எனில் பதிவு செய்வதற்கான இயக்குநர்களின் குழுவின், தீர்மானம்.

-முனைவர் ச. குப்பன்

இன்றைக்கு வேலை வாய்ப்பாக இருந்தாலும் சரி, வணிகமாக இருந்தாலும் சரி, போட்டிகள் மிக மிக அதிகம். தொழில் சார்ந்து உலக அளவில் போட்டி போட வேண்டிய தேவை உள்ளது. சீனாவும், அமெரிக்காவும் கடுமையான தொழில் போட்டி யில் உள்ளன. இந்தியா, சீனா மற்றும் கொரிய தயாரிப்பு களுடன் போட்டி போடு கின்றது.

இந்த நிலையில் மாற்று மொழியை அறிந்திருந்தால் அது ஒரு கூடுதல் பலம். இப்போது இந்தியாவில் உள்ள சிலர் சீன, கொரிய மொழிகளைக் கற்கிறார்கள். இதற்கென பயிற்சி மையங்களும் உருவாகி வருகின்றன.

மொழி பல இடங்களை, பல நிறுவனங்களை, பல நாடுகளை, பல மனிதர்களை ஊடுருவி நாம் கடந்து செல்லும் அளவற்ற பலத்தை நமக்கு அளிக்கிறது. பல மொழி அறிந்திருங்கள். தமிழ் நாட்டில் தமிழறிந்தோரிடம் தமிழில் பேசுங்கள். இதுவே முன் னேற்றத்தை நோக்கிய பாதை .

தத்து எடுக்கப்பட்ட ஜெஃப் பிசோஸ் அடைந்த வெற்றி

உலகினால் அறியப் பட்ட நவீன வரலாற்றின் முதன்மையான பணக் காரராக ஆகியிருக்கிறார், அமேசான் நிறுவனர் திரு. ஜெஃப் பிசோஸ் (Jeff Bezos). நூற்றைம்பது பில்லியன் டாலர் சொத்து மதிப்பு உள்ள இவர்தான் இணையதள விற்பனைப் புரட்சியைத் தொடங்கி வைத்தவர்.

பல ஆண்டுகள் நட்டத்தில் இயங்கி பின் லாபத்திற்கு மாறியவர். வால்மார்ட் நிறுவனத்தை எதிர் கொண்டு வெற்றி அடைந்தவர். இப்படி அடுக்கிக் கொண்டே போகலாம். இவருக்கு போட்டியாக இந்தியாவில் தோன்றிய நிறுவனம் ஃப்ளிப்கார்ட். வட இந்தியர் ஒருவரால் தொடங்கப்பட்டு தற்போது வால்மார்ட் இந்த நிறுவனத்தை வாங்கி இருக்கிறது.
இவர் ஒரு தத்தெடுக்கப்பட்ட குழந்தை. தொழிலை தன் வீட்டின் கார் நிறுத்தும் இடத்தில் தோடங்கியவர்.

வாழ்க்கையில் வெற்றி பெற, தீராத ஆர்வம், கடுமையான உழைப்பு, தன்னம்பிக்கை இருந்தால் போதும், பின்புலம் தேவை இல்லை. சாதி, மத, இன, மொழி வேறுபாடுகளை மறந்து பீடுநடை போடுங்கள், முன்னேற்றப் பாதையை நோக்கி.
கடந்த காலத்தையே அசை போட்டுக் கொண்டிராமல், நம் நேரத்தை, ஆற்றலை வருங்காலத்தை நோக்கி செலுத்துங்கள்.

மாற்றிக் கொண்டால் என்ன?

கடந்த ஒரு ஆண்டில் உற்பத்தித் துறையில் எனக்கு தனிப்பட்ட முறையில் அறிமுகம் உள்ள நண்பர்கள் சிலரிடம் உரையாடும் போது, அனைவரின் ஒருமித்த கருத்து, தமிழகம் தொழில்துறையில் தேய்ந்து வருகிறது என்பதே.
காரணம், தொழிலைத் தொடங்க அனுமதி வழங்க ஒற்றைச் சாளர முறையை முழுமையாக பின்பற்றவில்லை என்பது இவர்கள் கருத்து. தமிழகத்தின் பெரிய தொழில் குழுமத்தில் ஒன்று சென்னைக்கு அருகில் உள்ள ஆந்திர எல்லை நகரங்களில் தங்களது கிளை உற்பத்தி நிறுவனங்களை தொடங்கு கின்றது. காரணம், ஒற்றைச் சாளர முறை சரிவர செயல்படவில்லை என்பதே.

எனக்கு தெரிந்த உடனடி தீர்வு, திரு. க. பாண்டியராஜன், திரு . சம்பத் இருவரும் தங்கள் துறைகளை தங்க ளுக்குள் மாற்றிக் கொண்டு பணியாற்ற வேண்டும். திரு. பாண்டியராஜன், தொழில் பின்னணி உள்ளவர். தமிழக தொழில் துறையினரிடம் நேரடித் தொடர்பு உள்ளவர்.

சிறப்பூட்டும் மெட்ரோ தொடர்வண்டி சேவை

ஒரு நாட்டின், மாநிலத்தின், மாவட்டத்தின், பகுதியின் பொருளாதார வளர்ச்சியின் முதல் தேவை, அதன் போக்குவரத்து உள் கட்டமைப்பே . நம் சென்னை அந்த வகையில் பல ஆண்டுகளுக்கு முன்னரே, புறநகர் இரயில் போக்குவரத்தின் மூலமாக பெரும் மேன்மை அடைந்து இருந்தது.

தற்போது நிலப்பரப்பின் கீழ் உருவாக்கப்பட்டு உள்ள மெட்ரோ தொடர்வண்டிப் போக்குவரத்து உலகத் தரம் வாய்ந்தது. இதை உருவாக்கிய அரசுகள், அலுவலர்கள் பாராட்டுகளுக்கு தகுதியானவர்கள். சத்தமில்லாமல், ஆக்கிரமிப்புகள் இல்லாமல் உருவாகி உள்ளது, பன்னாட்டுத் தரமிக்க இரயில் சேவை.

ஒரு காலத்தில் இதை நான் சிங்கப்பூரில் பார்த்தது உண்டு. சென்னையின் பெருமைகளில் இதுவும் ஒன்றாகி விட்டது. உலகின் தலைசிறந்த பத்து நகரங்கள், இதைப் போன்ற நிலப் பரப்பின் கீழ் அமைக்கப்பட்டு உள்ள இரயில் சேவையினால் வளர்ந்த நகரங்களே. நாமும் அந்த வரிசையில் வெகு விரைவில் சேருவோம்.

வெற்றி பெறுக

தமிழகத்தை தொழில் முனைவதில் சிறந்த மாநிலமாக மாற்றிக் காட்டுவோம். ஆயிரக் கணக்கான பொறியியல் வல்லுநர்கள் ஒவ்வொரு ஆண்டும் கல்லூரிகளில் இருந்து வெளி வருகின்றனர். தொழில் தொடங்குவதற்கு உள்ள தடைகளைக் கண்டு பின் வாங்குகின்றனர்.

உலகளவில், உளவியல் ரீதியாக பெரும்பான்மையானோர் தாங்கள் கொண்டு உள்ள வீண் அச்சங்களின் அடிப்படையில் வாழ்க்கையை நகர்த்து கிறார்கள். சிலர், தாங்கள் வளர்த்துக் கொள்ளும் நம்பிக்கைகளின் அடிப் படையில் வாழ்க்கையை நகர்த்தி வெற்றியை அடைகின்றனர். பொறியியல் பட்டதாரிகள் நம்பிக்கைகளை வளர்த்துக் கொண்டு முயன்று தொழில் முயற்சிகளில் ஈடுபட்டு வெற்று பெற வேண்டும்.

-சரவணராஜா