பயண ஏற்பாடு மற்றும் சுற்றுலாத் தொழில் உலக அளவில் முன்னிலை வகிக்கும் தொழில்களில் ஒன்றாகும். சில நாடுகள் தங்கள் வளர்ச்சிக்கு சுற்றுலாத் தொழிலையே நம்பி இருக்கும் நிலையும் உள்ளது. மாதா மாதம் குறிப்பிட்ட தொகையை வசூலித்து, சுற்றுலா அழைத்துச் செல்லும், சிறிய அளவில் செயல்படும் சுற்றுலா நிறுவனங்கள் முதல், பன்னாட்டு அளவில் பயண மற்றும் சுற்றுலா ஏற்பாடுகளை செய்து தரும் பன்னாட்டு நிறுவனங்கள் வரை செயல்பட்டு வருகின்றன.

கண்டிப்பாக வரிசையில் நின்றுதான் தொடர்வண்டி பயணச் சீட்டுகளை முன்பதிவு செய்ய வேண்டி இருந்த நிலை இன்றைக்கு அடியோடு மாறி விட்டது. அதே போல விமான பயணச் சீட்டுகளும், இருந்த இடத்தில் இருந்தே இணையம் வாயிலாக பதிவு செய்ய முடிகிறது. நீண்ட தொலைவு செல்லும் பேருந்துகளுக்கான பயணச் சீட்டுகளையும் இணையம் வாயிலாகவே பெற முடிகிறது.

இணையம் வந்த பிறகு எல்லா தொழில்களிலும் அது பெரிய மாற்றத்தை ஏற்படுத்தி இருப்பதைப் போலவே, சுற்றுலாத் தொழிலிலும் மாற்றங்களை ஏற்படுத்தி உள்ளது. உலகின் எந்த மூலைக்கு செல்வதற்கும் ஆன பயணச் சீட்டுகளையும், தங்கும் விடுதிகளையும் எங்கிருந்தும் பதிவு செய்து கொள்ள முடிகிறது. அதற்காக ஆகும் செலவினங்ளையும் முன்னதாகவே திட்டமிட்டுக் கொள்ள முடிகிறது.

தாங்களாகவே பயண ஏற்பாடுகளைச் செய்து கொள்பவர்கள் ஒரு பக்கம் என்றால், சுற்றுலா நிறுவனங்கள் வாயிலாக ஏற்பாடுகளைச் செய்து கொள்பவர்கள் மறுபக்கம். இவ்வாறு சுற்றுலா ஏற்பாடு செய்து தரும் நிறுவனங்களின் தேவை அண் மைக் காலமாக பெருகி வருகிறது. ஏற்பாடுகள் செய்து தருவதை ஒரு அனுபவமுள்ள சுற்றுலா நிறுவனத்தின் கையில் ஒப்படைத்து விட்டு நாம் எந்த பிக்கலும் பிடுங்கலும் இல்லாமல் சென்று விட்டு வரலாம் என்று பலரும் கருதுவதே இதற்குக் காரணம்.

சுற்றுலா சேவை நிறுவனங்களுக்கு, இணையத்தின் வருகை மிகப்பெரிய அளவில் வாய்ப்புகளை திறந்து விட்டுள்ளது. அவர்களின் பணியையும் எளிமையாக்கி உள்ளது. வெளிப்படைத் தன்மை அதிகரித்து உள்ளது. இணையம் சுற்றுலாத் தொழிலுக்கு அறிமுகமான காலத் தொடக்கத்திலேயே இணையத் தைப் பயன்படுத்தத் தொடங்கிய சுற்றுலா நிறுவனங்களில் ஒன்று மேக்மைடிரிப் (MakeMyTrip).

ஆன்லைன் பயண ஏற்பாட்டுச் சேவை நிறுவனங்களில் அதிக அளவில் சந்தைப் பங்கைப் பெற்றுள்ள நிறுவனம். இதன் தலைமை மார்க்கெட்டிங் அதிகாரி ஆக இருப்பவர்,திரு. சவ்ஜன்யா ஸ்ரீவத்சவா. ஆன்லைன் வழி பயண ஏற்பாட்டுத் தொழில் பற்றி இவர் கூறிய போது, ”இந்த தொழில் துறையில் இன்று நாங்கள்தான் முதலிடத்தில் இருக்கிறோம். இதை ஒரு தனியார் சந்தை ஆய்வு நிறுவனமும் உறுதிப்படுத்தி இருக்கிறது. மகிழ்ச்சிக்காக ஊர் சுற்றுபவர்களின் வேலையை எளிதாக்கித் தருவது தான் எங்கள் பணி என்று சொல்லலாம். மேலும் எல்லா தரப்பினருக்கும் இந்த சேவையை கொண்டு செல்வதும் எங்கள் இலக்கு ஆகும்.

இதற்கு நாங்கள் ஊடகங்களில் விளம்பரங்கள் செய்வது போக, வேறு பல முயற்சிகளையும் மேற்கொள்கிறோம்.  குறிப்பாக எங்கள் இணைய தளத்தில் உள்ள நீங்களே உங்கள் விடுமுறை சுற்றுலாவை திட்டமிடுங்கள் என்ற டூ இட் யுவர் செல்ஃப் வசதி தங்களுக்கேற்ற பயணங்களை தாங்களே சிறப்பாக திட்டமிட உதவுகிறது. இதன் வாயிலாக வண்டிகளின் முன்பதிவு கிடைக்கும் நாட்கள், விடுதிகளில் அறைகள் கிடைக்கும் நாட்கள், கட்டண விவரங்கள் போன்றவற்றை முன்பே அறிந்து கொண்டு திட்டமிடலாம். வாடிக்கையாளர்களின் செலவழிக்கும் வசதிக்கு ஏற்ப, பின்னரும் சில சுற்றுலா சார்ந்த செயல்பாடுகளைச் சேர்த்துக் கொள்ளவும் இந்த வசதி பயன் உள்ளதாக இருக்கிறது.

இதே போல நாங்கள் அறிமுகப்படுத்தி இருக்கும் இன்னொரு வசதி, வழி அறிவோம் என்ற பொருள் உள்ள ரூட் பிளானர். இதைப் பயன்படுத்தி, பயணம் செய்ய இருக்கும் இரண்டு முனைகளுக்கு இடையே உள்ள வெவ்வேறு வகையான வாய்ப்புகளை அறியலாம். விமானம் முதல் பேருந்து வரையில் உள்ள அத்தனை வாய்ப்புகளையும் கட்டணங்களுடன் அறிந்து கொள்ளலாம்.

எங்கள் சேவைகளை சந்தைப்படுத்த பல்வேறு உத்திகளையும் செயல்படுத்துகிறோம். நாங்கள் அளிக்கும் தள்ளுபடித் திட்டங்களுக்கு வாடிக்கையாளர்களிடம் நல்ல வரவேற்பு உள்ளது. அதே நேரத்தில் எங்களின் சேவைகளை ஏற்கெனவே பயன்படுத்தி உள்ள வாடிக்கையாளர்களை எங்களின் இணைய தளத்தை பார்வையிட உள்ள வாய்ப்புகளையும் தொடர்ந்து ஏற்படுத்துகிறோம். மொபைல்களிலும் எங்கள் சேவைகளைப் பார்வையிட்டு பதிவு செய்யலாம். இதற்கான சிறந்த ஆப் எங்களால் வழங்கப்படுகிறது. இது இணையத்தை பயன்படுத்தாத வாடிக்கையாளர்களையும் இணையப் பயன்பாடு நோக்கி வரச் செய்கிறது.

இந்த துறையில் வளர்ச்சிக்கு உகந்த தரமான போட்டி நிலவுகிறது. இது எதிர்காலத்தில் இணையம் வழி டிராவல் வணிகத்தை இன்னும் மேல் எடுத்துச் செல்லும். ஆன்லைன் இணையம் வழி டிராவல் வணிகத்தைப் பொறுத்த வரை மிதக்கும் ஐஸ் கட்டியின் மேல் முனையை மட்டுமே தொட்டு இருக்கிறோம். இன்னும் அடையப்படாத பெரிய பகுதி உள்ளே மறைந்து இருக்கிறது.

மொத்தத்தில் சுமார் ஐம்பது முதல் அறுபது மில்லியன் வாடிக்கையாளர்கள் இணையம் வழி வணிகத்தில் ஈடுபடுகிறார்கள் என்றால் டிராவல் வணிகத்தைப் பொறுத்தவரை இது சுமார் பதினைந்து மில்லியன் இருக்கக் கூடும். மீதி உள்ள முப்பத்தைந்து முதல் நாற்பது மில்லியன் பேர்கள் ஆன்லைன் பயன்பாடு பற்றித் தெரிந்து இருக்கிறார்கள். ஆனால் அவர்கள் டிராவல் தொடர்பான பயன்பாட்டுக்காக இன்னும் இணையத்தைப் பயன்படுத்தத் தொடங்கவில்லை. இதை ஒரு மிகப்பெரிய வாய்ப்பாக கருதுகிறோம். இணையம் வழியாக விடுதிகளுக்கு முன்பதிவு செய்பவர்கள் சுமார் பத்து விழுக்காட்டினர்தான். இங்கும் பெரிய வாய்ப்பு இருக்கிறது.

தற்போது மக்களிடம் சுற்றுலா ஆர்வம் அதிகரித்து வருகிறது. இவர்களின் சுற்றுலாக் கனவை நிறைவேற்ற துணை நிற்பதுதான் எங்கள் பணி. இதற்கான சேவைகளை வழங்குபவர் என்ற நிலையில் இருந்து எங்களை நாங்களே பயண வல்லுநர்கள், அதாவது டிராவல் எக்ஸ்பர்ட் என்ற நிலைக்கு உயர்த்திக் கொண்டிருக்கிறோம்.
வாடிக்கையாளர்கள் தொடர்பாக நாங்கள் தொடர்ந்து ஆய்வுகளை மேற்கொண்டு வருகிறோம். எங்களிடம் பயண திட்டங்கள் குவியல் குவியலாக இருக்கின்றன. ஆனால் பெரும்பாலானோருக்கு இந்த திட்டங்களில் ஈடுபாடு இல்லை.

தங்களுக்கெனவே ஒரு திட்டத்தை அமைத்துக் கொள்ள விரும்பு கிறார்கள். அவர்களுக்கு ஏற்ப நாங்கள் செயல்பட வேண்டி இருக்கிறது. ஆண்டுக்கு ஒரு சுற்றுலா என்ற மனப்பான்மையும் மாறி வருகிறது. நீண்ட நாட்கள் செல்லும் ஒரு சுற்றுலாவை விட குறுகிய நாட்களில் அமையும் சுற்றுலாக்களை விரும்புகிறார்கள்.

ஒரு சுற்றுலா செல்வது என்றால் பல நாட்கள் திட்டமிட்டு, காத்திருந்து செல்வது பழங்காலமாகி விட்டது. இப்போது உடனுக்குடன் திட்டமிட்டு நினைத்த நேரத்தில் சுற்றுலா செல்ல விரும்பும் காலம் ஆகி விட்டது. இதற்கு ஏற்ப நாங்களும் வேகமாக செயல்பட வேண்டி இருக்கிறது.

எங்களை வாடிக்கையாளர்களிடம் கொண்டு செல்ல பலவிதமான விளம்பர முயற்சிகளை மேற்கொள்கிறோம். தொலைக்காட்சி ஊடகம், பரவலாக எல்லா தரப்பு மக்களிடமும் செய்தியைக் கொண்டு சேர்க்கிறது. வெளிப்புற விளம்பர போர்டுகளை அமைத்து மக்களிடம் நினைவூட்டுகிறோம். சில வானொலிகளிலும் எங்கள் விளம்பரங்கள் ஒலிக்கின்றன. ஃபேஸ்புக் போன்ற சமூக வலைத் தளங்களையும் பெரிய அளவில் பயன்படுத்துகிறோம்.

சுமார் இருபத்தைந்து முதல் நாற்பது வயதுள்ள வாடிக்கையாளர்களையே நாங்கள் குறி வைக்கிறோம். அதே போல ஐந்து லட்சத்திற்கும் மேறபட்ட மக்கள் தொகை கொண்ட நகரங்களையும் குறி வைக்கிறோம்.

நாடு முழுவதும் எங்களுக்கு பதினெட்டு அலுவலகங்கள் இருக்கின்றன. நாற்பது தனி உரிமை (ஃப்ரான்சைசி) பெற்ற நிறுவனங்களும் உள்ளன. நாங்கள் தற்போது நேரடி வணிகத்தை விட ஆன்லைன் வணிகத்திலேயே கூடுதல் கவனம் செலுத்துகிறோம்.
ஆன்லைன் எனும்போது, ஒரு வாடிக்கையாளர் எல்லா போட்டி நிறுவனங்களின் கட்டண விவரங்கள், அவை தரும் சேவைகள், பயன்படுத்திய வாடிக்கையாளர்கள் அளித்துள்ள கருத்துரைகள் அடிப்படையிலேயே தேர்வு செய்கிறார்கள். எனவே கட்டண நிர்ணயம் தொடர்பாக நாங்கள் எச்சரிக்கையாகவே செயல்படுகிறோம். சேவை சரியில்லை என்றால் மறு நாளே இணையத்தில் ஏற்றி விடுகிறார்கள்.

உள்நாட்டைச் சேர்ந்த சுமார் முப்பதாயிரம் விடுதிகளும், வெளிநாடுகளைச் சேர்ந்த இரண்டு லட்சம் விடுதிகளும் எங்கள் தொடர்பில் உள்ளன. மகிழ்வு உலாவை உண்மையிலே மகிழ்ச்சியாக்குவதில் விடுதிகளுக்கு பெரும்பங்கு உண்டு.

மொபைல்கள் தரும் இணைய வசதிகள் ஒரு புதுப் பாதையை அமைத்து வருகின்றன. எங்களிடம் தொடர்பு கொள்பவர்களில் சுமார் நாற்பது விழுக்காட்டினர் மொபைல் ஆப் வழியாகவே தொடர்பு கொள்கிறார்கள். எனவே மாநில மொழிகளிலும் ஆப்களை உருவாக்கி வருகிறோம். அவர்கள் தங்கள் தாய்மொழி வாயிலாகவே எங்கள் ஆப்களை பயன்படுத்தும் காலம் விரைவிலேயே வரும் என்று எதிர்பார்க்கிறோம்.

தொடர்ந்து எங்களின் சிந்தனையும், செயல்பாடுகளும் பயணங்களை எளிமையாக்குவது தொடர்பாகவும், வாடிக்கையாளர்களுக்கு சுமையற்ற மகிழ்ச்சியை கூடுதல் ஆக்கும் வாய்ப்புகளை தேடுவதுமாகவே இருக்கிறது.” என்றார்.

– நேர்மன்

இருபத்தி நான்கு ஆண்டு கால இசைப் பயணத்தில் கிட்டார் வாசிப்பாளராக, மேடை இசையமைப்பாளராக, மெல்லிசைப் பாடகராக ஒலிப்பதிவாளராக தன்னை பக்குவப்படுத்திக் கொண்டவர், திரு. ஸ்டீபன் ராயல். திரைப்பட                 இயக்குநர் சஞ்சய்ராம் உதவியுடன் இசையமைப்பாளராக அறிமுகமாகி இருக்கிறார். இனி அவர் கூறியதிலிருந்து;

“எனக்கு சொந்த ஊர் எல்லப்பட்டி. மூணாறு தேயிலைத் தோட்டப் பகுதியில் உள்ளது. நான், என் தாய் தந்தைக்கு 12ஆவது மகன். குடும்ப பொருளாதார சிக்கலில் உழன்றாலும், தனக்கான இரையை தானே தேடிக் கொள்ள வேண்டும் என்ற எண்ணத்தில், 1990ல் சென்னைக்கு வந்தேன்.

முதலில் சாந்தோம் கம்யூனிகேசன் மைய ஒலிப்பதிவு கூடத்தில் சிறிய வேலை கிடைத்தது. ஒலிப்பதிவு கூடத்தில் வேலை பார்த்ததால் நாமும் இசைக்கருவி ஒன்றைக் கற்றுக்கொள்ள வேண்டும் என்ற ஆர்வத்தில் கிட்டார் இசையைக் கற்றுக் கொண்டேன்.

பின்னர், ஜெயஸ்ரீ ஒலிப் பதிவு கூடத்தில் வேலை கிடைத்தது. ஜெயஸ்ரீ ஒலிப் பதிவு கூடம் இசைஞானி இளையராஜா முதல் பல இசையமைப்பாளர்கள் பயன்படுத்திய கூடம். அதாவது, இசையமைப்பாளர் அனிருத் தாத்தாவின் ஒலிப்பதிவு கூடம். அங்கேதான் ஒலிப்பதிவு செய்யும் நுட்பத்தைக் கற்றுக் கொண்டேன்.
கடந்த பன்னிரெண்டு ஆண்டுகளுக்கு முன்பு செல்வமணி ஒலிப்பதிவுக் கூடம் என்ற பெயரில் சொந்தமாக ஒலிப்பதிவு செய்யும் தொழிலை தொடங்கினேன். சிறிய அளவில் தொடங்கப்பட்ட ஒலிப்பதிவு கூடம், இன்று ரூ.50 லட்சம் செலவில் விரிவாக்கப்பட்டு, பின்னணி பாடுதல், பின்னணி இசை, பின்னணி பேசுதல் மற்றும் எடிட்டிங் என பல பிரிவுகளை உள்ளடக்கிய பெரிய தொழிலகமாக உள்ளது.

தமிழ் பாடல்கள் மீது ஆர்வம் உள்ளவர்கள் ஆல்பம் (Album) தயாரிக்க விரும்பும்போது என்னையே தேடி வருகிறார்கள்.

தமிழ் மீது பற்று கொண்ட தமிழன் நான் என்பதால் அவர்கள் எங்கள் நிறுவனத்தை விரும்புகிறார்கள். அதன் பயனாக சுமார் ஐநூறு பாடல் ஆல்பங்களுக்கு இசையமைத்து தயாரித்துக் கொடுத்திருக்கிறேன்.

திரு.வைகோ, திரு. திருமாவளவன், திரு. சீமான் போன்ற அரசியல் தலைவர்களின் கொள்கைப் பாடல்களை என் கூடத்தில்தான் ஒலிப்பதிவு மற்றும் இசை அமைத்து வாங்கிச் செல்வார்கள்.

என்னுடைய இசையமைப்பு மற்றும் ஒலிப்பதிவு ஆற்றலைப் பார்த்து, திரைப்பட இயக்குநர் திரு. சஞ்சய் ராம், குற்றாலம் என்கிற படத்திற்கு இசையமைக்க வைத்தார்.
அந்தத் திரைப்படம் வெளிவரும் முன்பே ஆனந்த மழை, ஒரு ஓவியம் உயிராகிறது. அதிர்ஷ்டம் 143, முத்துராமலிங்க தேவர் என நான்கு திரைப்படங்களுக்கு இசையமைக்கும் வாய்ப்பு கிடைத்து உள்ளது.

முன்பைவிட இப்போது இசையமைப்பதற்கு புதிய கருவிகள் அதிகம் வந்து உள்ளன. அதனால், வாய் மொழி பாடல், இசை, ராகம் போன்றவற்றை படிக்காதவர்கள்கூட எளிமையாக பாடிவிடலாம்.

காரணம், அவர்களில் குரலை மாற்றி அமைக்கும் வகையிலான டோன்ஸ், பிளக்கிங்ஸ் கருவிகள் மற்றும் குரல், சுதியை மாற்றி அமைக்கும் மென்பொருள்கள், இசைத் தொகுப்புக்கான சி.டி.கள் என வந்து குவிந்து உள்ளன. எனவே, இன்றைக்கு இசை அமைப்பது எளிது. நிலைத்து நிற்பது தான் கடினம்.

நிலைத்து நிற்பதற்கு கிரியேட்டிவிட்டி வேண்டும். அது மண் சார்ந்ததாக, பண்பாடு சார்ந்ததாக, புதிய தொழில்நுட்பம் சார்ந்ததாக எதுவாகவும் இருக்கலாம். அவை இருந்தால் மட்டுமே வெற்றி பெற முடியும். அந்த வெற்றிக்காக இரவு பகலாக உழைத்துக் கொண்டு இருக்கிறேன்.

தற்போது, திரைப்படத்திற்கு இசையமைப்பது எப்படி? பாடகராக பயிற்சி எடுப்பது எப்படி? வெஸ்டர்ன் இசையைக் கற்றுக் கொள்வது எப்படி? குறும் படம் தயாரிப்பது எப்படி? ஆகியவற்றிற்கான பயிற்சி வகுப்புகள் என அரங்கத்தி லேயே தனி வகுப்பறைகள் வைத்து இருக்கிறேன். அதற் கான பயிற்றுநர்களை கொண்டு நடத்தி வருகிறேன்.

கடந்த பன்னிரெண்டு ஆண்டுகளில் நல்ல வளர்ச் சியை எட்டியிருப்பதாக நினைக்கிறேன்.

இப்போது, என்னுடைய கனவு திரைப் படங்களுக்கு இசையமைப்பது, இளைஞர்களுக்கு இசையமைக்கச் சொல்லிக் கொடுப்பது. வேறு சிந்தனைகளில் கவனத்தை சிதறவிட விரும்பவில்லை” என்றார், திரு.ஸ்டீபன் ராயல். ஆனந்த மழை திரைப்படத்திற்கான பாடலை ஒலிக்க விட்டு நம்மையும் கேட்க வைத்து மகிழ்வித்தார். (9840111103)

-ஆ.வீ. முத்துப்பாண்டி

ஒரு அறிவியல் அறிஞர் இந்தியாவின் குடியரசுத் தலைவர் ஆன அதிசயம், முனைவர் அபஜெ. அப்துல் கலாம் அவர்கள் குடியரசுத் தலைவர் ஆன போது நடந்தது. இவர் போல மக்களிடம் நெருக்கமாக இருந்த குடியரசுத்                   தலைவர் வேறு யாரும் இல்லை.

குறிப்பாக இளைஞர்களிடமும், மாணவர்களிடமும் இவர் காட்டிய அக்கறை நாடு முழுவதும் மகிழ்ச்சி அலைகளை எழுப்பியது. இவர் மாணவர்களுக்கு மட்டும் வழி காட்டவில்லை. மாணவர்களின் வளர்ச்சிக்கு ஆசிரியர்களின் பங்கு எப்படி இருக்க வேண்டும் என்றும், பெற்றோரின் பங்கு எப்படி இருக்க வேண்டும் என்றும் எடுத்துக் கூறினார்.

அண்மைக் காலமாக இவர் அளவுக்கு இளைஞர்களின் மனதைக் கவர்ந்தவர் எவரும் இல்லை. நாடு முழுவதும் உள்ள இளைஞர்கள் இவர் பேச்சைக் கேட்கவும், இவர் நூல்களைப் படிக்கவும் காட்டிய ஆர்வம் அளவிட முடியாதது. அதற்கேற்ப இவருடைய பேச்சும், எழுத்தும் ஒவ்வொருவரையும் முன்னேற்றத்தை நோக்கி உந்தித் தள்ளியது.

மாணவர்களை மட்டும் அல்ல தொழில் முனைவோரையும் இவருடைய நூல்கள் வழி நடத்தின. மேலாண்மைக் கல்லூரிகள் பலவும் இவரை தங்கள் கல்லூரிகளுக்கு அழைத்து மகிழ்ந்தன. அவருடைய திடீர்மறைவும் ஒரு மேலாண்மைக் கல்லூரியில், மாணவர்களுக்கு நடுவே நடந்து இருப்பது இன்னும் வியப்புக்கு உரிய ஒன்றாகும்.

அவர் ஒரு எளிய குடும்பத்தில் பிறந்து வளர்ந்தவர் என்பதால் அவருக்கு, சாதாரண மக்களின் பிரச்சனைகள் புரிந்து இருந்தன. வளர்ச்சி எது என்பதில் உள்ள தெளிவான புரிதலை மக்களிடையே ஏற்படுத்தினார். அவருடைய கருத்துகள் சின்னஞ்சிறு கிராமங்களில் உள்ளவர்களுக்கும் எட்டியது. குடியரசுத் தலைவர் பொறுப்புக் காலம் முடிந்த பின்னரும், அவர் எப்போதும் தனக்குள்ள அதே வேகத்தோடு இயங்கிக் கொண்டு இருந்தார்.

மாணவர்களுடன் இருப்பதை, அவர்களுடன் கலந்துரையாடி அவர்களை உற்சாகப்படுத்துவதில், அவர்களின் வளர்ச்சிக்கு பயன்படும் செய்திகளை பகிர்ந்து கொள்வதில் அவருக்கு இருந்த ஆர்வம் கண்டு இந்தியாவே வியந்தது.
தன்னுடைய கருத்துகளை எப்போதும் உறுதியுடன் கூறிய இவர், எல்லா கட்சிகளில் உள்ளவர்களுக்கும், எல்லா மாநிலங்களில் உள்ளவர்களுக்கும், எல்லா மதங்களில் உள்ளவர்களுக்கும், மத நம்பிக்கை இல்லாதவர்களுக்கும் மிகமிக விருப்பமான சமுதாயத் தலைவராக விளங்கினார்.

இவருடைய பிறந்த நாளை மாணவர் நாளாக அறிவிக்க வேண்டும் என்ற வேண்டுகோள் மாணவர்களிடையேயும், மக்களிடையேயும் எழுந்து உள்ளது. இந்த வேண்டுகோளை வளர்தொழில் அதன் வாசகர்கள் சார்பில் வழிமொழிகிறது. இதை அரசு நிறைவேற்றித் தரும் என்ற நம்பிக்கையுடன் வளர்தொழில் மக்கள் குடியரசுத் தலைவருக்கு தனது ஆழ்ந்த இதய அஞ்சலியை செலுத்துகிறது.
– ஆசிரியர்

இன்று நிறைய பெண்கள் படித்து விட்டு வேலை இல்லாமல் உள்ளனர். இவர்களில் சிலர் என்ன தொழில் தொடங்கலாம் என கேட்கின்றனர். அவர்களின் சிந்தனைக்காக சில தொழில்களின் பட்டியல் இதோ:                            அழகுக்கலை பார்லர் மற்றும் பயிற்சி மையம் பெண்கள், ஜிம், கிரச், நர்சரி பள்ளி, நர்சரி (செடிகள்/ கன்றுகள்) விற்பனை, டிடிபி மற்றும் செராக்ஸ், சிறு ரியல் எஸ்டேட் நிறுவனம், டெய்லரிங் / ஜரி ஒர்க் / எம்ப்ராய்டரி, பேன்சி ஸ்டோர், உணவு பதப்படுத்துதல் (குடிநீர், ஜூஸ், ஊறுகாய், அப்பளம், மசாலா பொடிகள்), சிமென்ட் ஹாலோ பிளாக், பெண்களுக்கான டிரைவிங் பயிற்சிப் பள்ளி, ரெடிமேட் துணிகள் தயாரிப்பு / ஜவுளி வியாபாரம், மருத்துவ ஆய்வு மையம், மருத்துக்கடை, மகளிர் ஹாஸ்டல், செல்போன் சர்வீசிங், பர்னிச்சர் தயாரிப்பு / விற்பனை.

இன்சூரன்ஸ் ஏஜென்சி, திருமண தகவல் நிலையம்,  போட்டோ ஸ்டுடியோ,  பழங்கள், காய்கறி விற்பனை நிலையம், பழச்சாறு கடை, வெப் டிசைனிங்,  சிறு ஓட்டல், பால் பண்ணை, பால் பொருட்கள் தயாரிப்பு, சூப் விற்பனையகம், இட்லி / தோசை மாவு.

உப்பு மொத்த / சில்லறை விற்பனை, இன்டர் நெட் மையம், வாடகை பாத்திர நிலையம், இன் வெட்டர் / யுபிஎஸ் / ஸ்டெபிலைசர் விற்பனை / ரிப்பேரிங் / சர்வீசிங், சிப்ஸ் (வாலை, உருளை) தயாரிப்பு,  வீட்டு கட்டுமான பொருள்கள்.

கண் கண்ணாடி கடை, லாண்டரி, வணிக நிறுவனங்களுக்கு ஸ்டேஷனரி சப்ளை, செயற்கை நகை உற்பத்தி, பசை தயாரிப்பு, கண்ணாடி பிரேம், வேலை வாய்ப்பு மையம், சிறு பைனான்ஸ் (நகை அடகு) போன்ற தொழில்கள் பல உள்ளன.

தங்களுக்குப் பொருத்தமான தொழிலைத் தேர்ந்தெடுத்து முயற்சிகளை மேற்கொள்ளலாம்.

– எம். ஞானசேகர்

தமிழ்நாட்டில் சிறு, குறுந் தொழில்கள் நலிவடைய என்ன காரணம்? அவ்வாறு நலிவு அடையாமல் இருக்க என்ன செய்ய வேண்டும்? ஆராய்ந்து திரட்டிய சில முதன்மையான வழிகாட்டல்கள் இங்கே தொகுத்துத் தரப்படுகின்றன.

தொடங்கும் முன் சந்தை ஆய்வு செய்ய வேண்டும். தொடங்கிய பின் முழுக் கவனம் செலுத்த வேண்டும். 100% கவனமும், அக்கறையும் இருந்தால்தான் வெற்றி பெற முடியும்.

பணம் இருக்கிறது; கடனாக கிடைக்கிறது; என்பதால் எந்த தொழிலையும் தொடங்கக் கூடாது. எந்த தொழிலையும் யோசித்து, பயிற்சி பெற்று, அனுபவம் கிடைத்த பின், லாபகரமானதுதான் என உறுதி செய்தபின் தொடங்க வேண்டும்.
முழு நேரத் தொழிலா? பகுதி நேரமா? பகுதி நேரத்தில் செய்தால் வெற்றி கிடைக்குமா? யாராவது அதே தொழிலைச் செய்து வெற்றி பெற்றுள்ளனரா? என ஆராய்ந்து முடிவு செய்யுங்கள்.

தொடங்கிய உடனேயே அதிக சம்பளத்தில் ஆட்கள் பலரை நியமித்து விட்டு அவதிப்படாதீர்கள். நல்ல லாபம் வந்த பின் பணியாளர்களை நியமிப்பது நல்லது. ஆரம்பத்தில் தேவையான சிலரை மட்டும் வைத்து சமாளிக்க முயல வேண்டும்.

ஒருவரை பணியில் சேர்க்கும் முன் அவரது வரலாறு, படிப்பு, அனுபவம் இவற்றை தீரவிசாரித்து பின்புதான் சேர்க்க வேண்டும். அவரால் 1:5 என்ற விகிதத்தில் லாபம் வந்தால்தான் சேர்க்க வேண்டும். சான்றாக, ஒரு சலூன் என வைத்துக் கொண்டால் ஒருவர் 25,000/- ரூபாய் மாதம் சம்பாதித்து கொடுத்தால் தான் ரூ.5000/- சம்பளம் கொடுக்க முடியும்.

பங்குதாரர்களைச் சேர்த்துக் கொண்டு தொழில் தொடங்குவதை தவிர்க்க முயலுங்கள். முடியாவிடில் தங்களுக்கு பல ஆண்டுகள் அறிமுகமான உறவினர்கள், நண்பர்களை கணக்கு வைத்து, தெளிவாக பேசி முடிவு செய்து சேர்க்க வேண்டும்.

இன்று பலர் முதலில் கடுமையாக உழைத்து விட்டு, சிறிது லாபம் வர ஆரம்பித்ததும், வீண் செலவு செய்வது, அதிக விலை உள்ள வாகனம் வாங்குவது, பல கிளப்களில் உறுப்பினராகி சுற்றுவது என தொடங்கி விடுகின்றனர். இந்த தவறைச் செய்யவே செய்யாதீர்கள்.  ஒரு ஊழியர் வரவில்லை; அந்த எந்திரத்தை இயக்க வேறு ஏற்பாடு செய்யத் தெரிய வேண்டும். ஒரு சேல்ஸ் மேன் வரவில்லை, அதற்கான மாற்று ஏற்பாடுகளை உடனுக்குடன் செய்ய வேண்டும். எதற்கும் தயாராக இருக்க வேண்டும்.

மார்க்கெட்டிங் மிக கஷ்டமானது, அதுவும் கடனில் கொடுத்தால் பணம் முழுமையாக வராது. எனவே முதலி லேயே சர்வே செய்து, உடனுக்குடன் பணம் வருமா, நாணயமானவர்களா என ஆய்ந்து, அறிந்து பின் கடனுக்கு கொடுக்க வேண்டும்.
லாபத்தில் ஒரு குறிப்பிட்ட பகுதியை உங்கள் தொழிலுக்கு ஏற்ப பல வகை விளம்பரங்களுக்கு செலவு செய்து கொண்டே இருக்க வேண்டும்.
– எம். ஞானசேகர்

அந்த உணவகத்தின் உரிமையாளர் மலர்முகிலனுக்கு, உணவகத்தில் இருந்து தொலைபேசி வந்தது. பேசியவர் தலைமை சமையல்காரர்.

”சார், நீங்க வச்சிருக்கிற சூப்பர்வைசர், எங்களை எல்லாம் மோசமாக நடத்துகிறார், அவர் இருந்தா எங்களால வேலை செய்ய முடி யாது, நாங்க எல்லாம் வேலையை விட்டுப் போறோம்.”
”நீங்க எல்லாம் என்றால்..?”
”அவரைத் தவிர மற்ற எல்லோரும்..!”
”ஒருவரை வேலைக்கு சேர்ப்பதும், வேலையை விட்டு அனுப்புவதும் என்னுடைய வேலை, அதை நீங்கள் சொல்லுவது எந்த விதத்தில் நியாயம்?
”நேற்று, பணியாளர் ஒரு வரை இவர் அவமானப்படுத்தியதால் அது கைகலப்பு வரை போய் விட்டது. அவரை இவர் அடிக்க, இவரை அவர் அடிக்க.. வாடிக்கையாளர்கள் நடுவே உங்கள் ஓட்டலுக்கே கெட்ட பெயர் ஏற்படுவது மாதிரி ஆகிவிட்டது. எங்களையும் அவர் இப்படி நடத்த மாட்டார் என்பதற்கு எந்தவிதமான உறுதியும் இல்லை. அதனால்தான் இந்த முடிவை நாங்கள் எல்லோரும் சேர்ந்து எடுக்க வேண்டி இருக்கிறது. ஒன்று அவரை வைத்துக் கொள்ளுங்கள், அல்லது எங்களை வைத்துக் கொள்ளுங்கள்.”
”சரி, நான் சிறிது நேரம் கழித்துப் பேசுகிறேன்”

மலர் முகிலனுக்கு வேறு தொழில் இருக்கின்றது. கூடுதலாக ஒரு உணவகமும் நடத்தலாம் என்ற விருப்பத்துடன் அந்த உணவகத்தைத் தொடங்கி இருந்தார். திறமையான ஆட்களைத் தேர்வு செய்து போட்டிருந்தார். எல்லா உணவுப் பொருட்களும் சுவையாக இருந்தன. வாடிக்கையாளர்களின் வருகை படிப்படியாக அதிகரித்த வண்ணம் இருந்தது. மளிகைப் பொருட்கள் முதல் காய்கறிகள் வரை அத்தனையையும் முதல் தரமாக வாங்க வேண்டும் என்று அறிவுறுத்தி இருந்தார். ஒரு முறை பயன்படுத்திய எண்ணெயை மறுபடியும் பயன்படுத்தக் கூடாது என்று உறுதியுடன் கூறி இருந்தார்.

பத்திரிகையில் போட்டிருந்த ஆட்கள் தேவை விளம்பரத்தைப் பார்த்து விட்டு வந்தவர்தான் அந்த சூப்பர்வைசர் சுதந்திரம். ஓட்டல் பணிக்கு என்று முதன்முதலாக அவரைத்தான் பணிக்கு எடுத்தார்.

நிறைய உணவகங்களில் பணிபுரிந்த அனுபவம் இருந்தது. நகரில் உள்ள ஏதாவது ஒரு உணவகத்தின் பெயரைச் சொன்னால் போதும், நான் அங்கே இருந்திருக்கிறேன். அந்த முதலாளிக்கு என்மீது பிரியம் அதிகம். குடும்பச் சூழ்நிலை காரணமாக தொடர்ந்து அங்கே இருந்து விலக வேண்டியதாகி விட் டது” என்று கூறுவதை நம்பாமல் இருக்க முடியவில்லை.

உணவகத்துக்கு வேண்டிய தளவாடச் சாமான்கள் முதல் அத்தனைக்கும் அவரை நம்பி செயல்பட்டார். வேலைக்கு ஆட்களை எடுக்கும்போது கூட அவர் ஆலோசனையுடனேயே எடுத்தார்.

திடீரென்று தொலைபேசியில் அழைப்பார். ”சார், இவர் சரியாக இல்லை, நாணயமாக இல்லை, எல்லா உணவுகளுக்கும் பில் போடுவது இல்லை, அனுப்பிவிடலாம்” என்பார். அல்லது சமையல் பொருட்களை இவர் நிறைய வீணடிக்கிறார், குடித்து விட்டு சமையலறைக்குள் வருகிறார் என்பார். ஓட்டல் தொழிலில் நிரம்ப அனுபவம் பெற்றவர் சொல்வது தவறாகவா இருக்குமா? என்ற எண்ணத்துடன், இவரும் சரி சொல்வார்.

அப்படி ஒருவரை அனுப்ப நேரும் போது, அவருக்கு உரிய ஊதியத்தை உடனே கொடுத்து கனிவாகப் பேசி அனுப்புங்கள் என்று மலர்முகிலன் சொன்னதை, அப்படியே செயல்படுத்தி இருந்தால் இந்த சிக்கல் ஏற்பட்டு இருக்காது. செயல்படுத்தாமல் நடந்த தால்தான் இந்த தொல்லை ஏற்பட்டு இருந்தது.

தன்னுடைய ஊதியத்துக்காக காலை முதல் காத்துக் கொண்டிருந்தவரை சற்றும் மதிக்காமல் மாலை வரை இழுத்தடித்ததில் அவர் கடுமையான கோபத்துக்கு ஆளாகி இவரை திட்ட, பதிலுக்கு இவர் திட்ட கை கலப்பு வரை போயிருக்கிறது.
பணியாளர்கள் அத்தனை பேரும் போய் விட்டால் எப்படி உணவகத்தை நடத்துவது என்ற கவலையுடன் சுதந்திரத்தை தொலைபேசியில் அழைத்தார்.

தொலைபேசிக்காக காத்திருந்தது போல, அவர் எடுத்த உடனேயே, ”அந்த ஆள் என்னை அடிக்க வருகிறான், நம்ம ஆட்கள் அதைத் தடுக்க வரவில்லை. கேட்டதற்கு நாங்கள் எல்லாம் வேலையை விட்டுப் போகிறோம் என்கிறார்கள். இவங்களை நம்பியா சார் நாம ஓட்டல் தொடங்கினோம். அவங்க போனா அடுத்த நாளே எல்லா வேலைக்கும் நான் ஆட்களைக் கொண்டு வருவேன்…” என்று படபடத்தார்.

உரிமையாளருக்கும், ஒருவரை வேலையை விட்டு அனுப்புங்கள் அப்போது தான் நாங்கள் வேலைக்கு வருவோம் என்று சொல்வதை ஏற்க முடியவில்லை. மேலும் சுதந்திரம் தொடக்கம் முதலே கூடவே இருக்கிறார். பெருக்குவது முதல் மாப் போடுவது வரை எல்லா வேலைகளையும் எடுத்துப் போட்டுச் செய்பவர். கொஞ்சமும் அதைப் பற்றி நினைக்காமல், நன்றி இல்லாமல் எப்படி அவரை போகச் சொல்வது என்று சிந்தித்தவர், அவரை வேலையை விட்டு போகச் சொல்ல, வேண்டாம் என்று முடிவு எடுத்தார்.

மற்ற பணியாளர்களிடம், ”இனி இவ்வாறு நடைபெறாமல் பார்த்துக் கொள்வோம். நீங்கள் வேலையைப் பாருங்கள்” என்று கூறியதற்கு அவர்கள் ஒட்டு மொத்தமாக மறுத்து விட்டு, சம்பளத்தை வாங்கிக் கொண்டு புறப்பட்டு விட்டார்கள். அவர்களில் இருவர் மட்டும் சற்று யோசனைக்குப் பின் நாங்கள் வேலை பார்க்கிறோம் என்று தங்கினார்கள்.

அவர்களையும், பிறகு அவசரத்துக்கு கிடைத்தவர்களையும் வைத்துக்கொண்டு ஓட்டல் நடந்தது. வாடிக்கையாளர்களின் வருகை குறையத் தொடங்கியது. புதிய ஆட்களைப் போட்டு முயற்சித்ததில் வாடிக்கையாளர்களின் எண்ணிக்கை மெதுவாக அதிகரிக்கத் தொடங்கியது.

ஓட்டல் தொழிலில் ஆட்கள் நிர்வாகம் எந்த அளவுக்கு முதன்மையானது என்பதும், நல்ல ஆட்கள் கிடைப்பது எவ்வளவு சிரமம் என்பது உரிமையாளருக்குப் புரிந்தது. தான் நேரடியாக இருந்து பார்க்கும் வாய்ப்பு இல்லாத நிலையில் அந்த தொழிலில் அனுபவம் உள்ள சுதந்திரத்தை நம்பி செயல்பட்டுக் கொண்டு இருந்தார்.

அவர் சிந்திக்க மறந்த ஒன்று, பார்க்கும் ஓட்டலில் எல்லாம் நான் இருந்தேன் என்று சொல்கிறார், ஏன் இத்தனை ஓட்டல்களுக்கு மாறும் நிலை அவருக்கு ஏற்பட்டது? இவர் சரியான ஆளாக இருந்தால் எப்படி அவர்கள் இவரை விட்டு இருப்பார்கள்? என்று மட் டும் நினைக்க மறந்து விட்டிருந்தார்.

ஒரு தொழிலுக்கான அனுபவத்தை இரு வழிகளில் பெற முடியும். ஒரு வழி, அத்தகைய தொழில் நிறுவனத்தில் குறிப்பிட்ட காலம் பணிபுரிந்து அனுபவம் பெறுவது; இன்னொரு வழி, அந்த தொழிலைத் தொடங்கி தானே செலவழித்து அனுபவம் பெறுவது. இந்த இரண்டாவது வழியில் மலர்முகிலன், ஓட்டல் தொழில் பற்றிய அனுபவ அறிவைப் பெற்றுக் கொண்டு இருந்தார்.

அவர் முதன்மையாக நடத்திக் கொண்டிருந்த தொழில், வேறு ஒரு நிறுவனத்தில் பத்து ஆண்டுகள் பணிபுரிந்து அனுபவம் பெற்ற பின் தொடங்கியது. அதனால் அவரால் அந்த தொழிலை வெற்றிகரமாக நடத்த முடிந்தது.

ஓட்டல்களில் சாப்பிடுவதைத் தவிர வேறு அனுபவமும் இல்லாமல் தொடங்கிய இந்த தொழிலிலும் வெற்றி அடைந்தே தீர வேண்டும் என்ற நம்பிக்கையுடன் செயல்பட்டுக் கொண்டு இருந்தார்.

ஆனால் தொடர்ந்து, ஆட்களைத் தக்க வைத்துக் கொள்ள முடியவில்லை.
பொதுவாக இந்த உணவகப் பணிகளுக்கு வருகிறவர்கள், பெரும்பாலும் குடிப்பவர்களாக இருந்தார்கள். திடீர் திடீர் என்று வேலையை விட்டுப் போகிறவர்களாக இருந்தார்கள். அப்படிப் போகாதவர்களை சுதந்திரம் அவர்களுடன் சண்டை போட்டு அனுப்பிக் கொண்டிருந்தார். தான் உணவகத்தின் நலனுக்காகவே இப்படிச் செய்வதாகக் காட்டிக் கொண்டிருந்தார்.

தொடர்ந்து ஏன் இப்படி நடந்து கொண்டிருக்கிறது? நல்ல திறமையாளர்களை சுதந்திரம் ஏன் விரட்டிக் கொண்டு இருக்கிறார்? பெரிய கேள்வியாக உரிமையாளர் மனதில் எழுந்தது.

ஒரு தொழில் முனைவர் காலத்துக்கும் ஒரே மாதிரி சிந்தனையில் இருக்க முடியாது. அவ்வப்போது எழும் சூழ்நிலைகளை மனதுக்குள் போட்டு ஆய்வு செய்து கொண்டுதானே இருப்பார்? பொதுவாக தொழில் முனைவோருக்கு ஏற்படும் சிக்கல்களில் ஒன்றுதான் இது என்பது அவருக்கு புரிந்தே இருந்தது.
திடீரென்று, அன்றும் அதே போல ஒரு தொலைபேசி.

”நாங்கள் எல்லாம் வேலையைவிட்டுப் போறோம்”
”ஏங்க? என்ன ஆச்சு?”
”ஒன்று அவரை வைத்துக் கொள்ளுங்கள்; அல்லது எங்களை வைத்துக் கொள்ளுங்கள்”
மீண்டும் முதல்லே இருந்தா..?
அதைத் தொடர்ந்து உணவகத்தில் இருந்து வெயிட் டர் ஒருவரின் தொலைபேசி வந்தது.
”சார், இங்கே எல்லாம் வெளியே உட்கார்ந்து கொண்டு பிரச்சனை பண்ணிக்கிட்டு இருக்காங்க. சுதந்திரத்தை திட்டிக்கிட்டு இருக்காங்க..”
அடுத்ததாக இவர் எதிர் பார்த்தபடியே சுதந்திரம் தொலைபேசி வந்தது.
”என் செல்போனை பிடுங்கிக்கிட்டாங்க. நான் போலீஸ் ஸ்டேஷனுக்குப் போய் புகார் கொடுக்கப்போறேன்..”

மலர்முகிலன், இது எது வரை போகுமோ போகட்டும் என்று காத்திருந்தார்.
காவல் நிலையத்துக்கு போகிறேன் என்று போன சுதந்திரம் பாதியிலே திரும்பி வந்து விட்டதாக தகவல் கிடைத்தது.

சரி, இனிமேலும் நாம் நேரடியாக களத்தில் இறங்காமல் இருக்க முடியாது என்று உணர்ந்து கொண்ட மலர்முகிலன் உடனே உணவகத்துக்குப் புறப்பட்டுச் சென்றார். பொதுவாக இத்தகைய சூழ்நிலைகளை எல்லாம், நம்முடைய திறமையை வளர்த்துக் கொள்ள கிடைக்கும் வாய்ப்பாகக் கருதுபவர் என்பதால் அவ்வளவாக அலட்டிக் கொள்ளாமல் சென்றார்.
அங்கே போனதும், சுதந்திரமும், மற்றவர்களும் ஒருவர் மீது ஒருவர் காட்டமாக இருந்தனர்.

இப்படிப்பட்ட சூழ்நிலை வருவது இது இரண்டாவது முறை. என்ன முடிவு எடுக்கலாம்? முடிவு எடுப்பதை கொஞ்சம் தள்ளிப் போடலாம் என்று கருதினார் மலர்முகிலன்.
முதலில் அவருடைய செல்போனை அவரிடம் கொடுங்கள்.
செல்போனை சுதந்திரத்திடம் கொடுத்தார்கள்.

”சுதந்திரம் நீங்க நம்முடைய இன்னொரு அலுவலகத்தில் இரண்டு நாட்கள் தங்கி இருங்கள்” என்று அனுப்பி வைத்தார். அங்கே இருந்தவர்களிடம் நீங்கள் போய் வேலையைப் பாருங்கள் என்று அனுப்பி வைத்தார்.
மறுநாள், சுதந்திரம், தொலைபேசியில் அழைத்து ”என்னுடைய செல்போனில் இருந்த மெமரி கார்டு ஒன்றை அவர்கள் எடுத்து வைத்திருக்கிறார்கள். வாங்கிக் கொடுங்கள்” என்றார்.

அதன் பிறகுதான் அந்த திருப்பம்.
மெமரி கார்டை எடுத்தவர்கள், அதை மலர்முகிலனிடம் கொடுத்து, ”நிச்சயமா நீங்க இதை கம்ப்யூட்டர்ல போட்டுப் பார்த்து விட்டுத்தான் அவரிடம் கொடுக்க வேண்டும்” என்றார்கள்.

“இன்னொருவர் மெமரி கார்டை நாம் போட்டுப் பார்ப்பது நாகரிகம் இல்லையே”
”இல்லை. இதை நீங்கள் கண்டிப்பாகப் பார்க்க வேண்டும். உங்களுக்குத் தெரிய வேண்டிய பல செய்திகள் இதில் உள்ளன. நம்முடைய உணவகத்தின் வளர்ச்சி தொடர்பானவை உள்ளன” என்றனர்.

மெமரி கார்டில் உள்ள வற்றை கம்ப்யூட்டரில் போட்டுப் பார்த்தார். காவல் நிலையத்துக்குப் புறப்பட்டுப் போனவர் ஏன் பாதியிலேயே திரும்பி வந்தார் என்பதற்கான காரணம் புரிந்தது.

உணவகத்தில் பணிபுரிந்த சில பெண்களின் படங்கள் பதிந்து வைக்கப்பட்டு இருந்தன. அவருக்கு வரும் செல்பேசி அழைப்புகளை பதியும் பழக்கம் அவருக்கு இருந்திருக்கிறது.

உணவகத்தில் பணிபுரிந்த ஒரு பெண் பெயரில் ஒரு ஃபோல்டரையே போட்டு அவருடன் பேசியது அத்தனையையும் பதிந்து வைத்து இருந்தார்.

இன்னொரு ஆடியோவில், ”ஓனர் இந்த வாட்டி விளம்பரத்துல அவருடைய நம்பரையே கொடுத்து விட்டார். அதனால உங்க ஒட்டலுக்கு தேவையான ஆட்களை என்னால எடுத்து அனுப்ப முடியவில்லை. கொஞ்சம் பொறுமையாக இருங்க. நான் காய் நகர்த்துறேன்..”- இதைக் கேட்டதும் மலர்முகிலனுக்கு வியப்பாக இருந்தது.

சில ஆட்கள் தேவை விளம்பரங்களில் சுதந்திரத்தின் செல்பேசி எண்ணைக் கொடுத்து, வேலை கேட்பவர்களிடம் பேசச் சொல்லி இருந்தார். இவர் அந்த விளம்பரங்களைப் பார்த்து தொடர்பு கொண்டவர்களை இவருக்குத் தெரிந்த வேறு ஓட்டலுக்கு அனுப்பி வைத்து இருப்பது இதன் மூலம் தெரிந்தது.

இன்னொரு ஆடியோவில், ஒரு பெண்ணிடம், ”இது என்ன மயிர் வேலை. நான் வேறு ஒரு காரணத்துக்காக இங்கே வேலை செய்து கொண்டு இருக்கிறேன்” என்று கூறுகிறார்.. அது என்ன காரணமாக இருக்கும்? மலர்முகிலன் பல கோணங்களில் சிந்திக்கத் தொடங்குகிறார். இப்படியே பல வில்லத்தனமான பேச்சு உள்ள ஆடியோ ஃபைல்கள்.

மிகவும் நம்பிக்கைக்கு உரியவராக காட்சி அளித்த சுதந்திரம், என்னமா தந்திரம் செய்து கொண்டிருக்கிறார்? கெட்டிக்காரன் புளுகை எட்டு நாளில் தெரிந்து விடும் என்று முன்னோர் சொல்லி இருக்கிறார்கள். இந்த தந்திரத்தின் புளுகு விரைவிலேயே தெரியாமலா போய்விடும்?
காத்திருந்தார், மலர்முகிலன்.
மறுநாள்..
சுதந்திரம், மலர்முகிலனைச் சந்திக்க நேரம் கேட்டு, குறிப்பிட்ட நேரத்தில் சந்திக்க வந்தார்.
மெமரி கார்டு செய்திகள் பற்றி எதுவும் கேட்காமல் சுதந்திரத்திடன் இனிமையாகப் பேசிக் கொண்டு இருந்தார்.

”என்ன சுதந்திரம்? தொடர்ந்து இப்படி சிக்கலாகவே இருக்கே, என்ன செய்யலாம்?”
”உங்க கிட்ட சொல்ல தயக்கமா இருக்கு…”
”சும்மா சொல்லுங்க..”
”அனுபவம் இல்லாம நீங்க இந்த ஓட்டல் தொழில்ல இறங்கிட்டு கஷ்டப்படுறீங்க. நான் வேணும்னா எடுத்து நடத்தட்டுமா? உங்களுக்கு மாதம் ஒரு தொகை கொடு த்து விடுகிறேன். அதுக்காக அதிகமா கேட்டா என்னால கொடுக்க முடியாது…”
ஏதோ மலர்முகிலன் ஒரு முடிவுக்கு வந்து விட்டதைப் போலவே எண்ணிப் பேசினார், சுதந்திரம்.

இப்போது புரிந்து விட் டது, சுதந்திரத்தின் தந்திரம்.
ஆட்களை எல்லாம் ஏன் விரட்டிக் கொண்டிருந்தார் என்பதற்கான காரணமும் புரிந்தது.
என்னமா சிந்திக்கிறாங்க..- வியப்புடன் பார்த்துக் கொண்டிருந்தவர், கணினியை இயக்கினார். ஸ்பீக்கரில் சுதந்திரத்தின் குரல் தெளிவாக ஒலித்தது, இது என்ன மயிர் வேலை….

– நேர்மன்