வேலை வாய்ப்பு, தொழில்நுட்ப வளர்ச்சி, பயன்பாடு ஆகியவற்றின் அடிப்படையில் விவசாயம், ஆட்டோமொபைல் ஆகிய துறைகளுக்கு அடுத்தபடியாக உள்ளது, அச்சுத் துறையாகும். இது எழுதப் படிக்கத் தெரிந்த, எந்த நிலையிலும் உள்ள எந்த ஒரு மக்களாலும் தவிர்க்க முடியாத துறையாகும். காரணம் மனித அறிவுடன் நேரடியாகத் தொடர்புடையது, இந்தத் துறை.

இப்படிப்பட்ட சிறப்புடைய இந்தத் துறை நவீன அறிவியல், தொழில்நுட்பம், கணினி வளர்ச்சியால் மிக வேகமாகவும், நிலையாகவும் வளர்ந்து வருகிறது என்பது குறிப்பிடத்தக்கதாகும். புதிய மாற்றங்களுக்கு ஏற்ப தன்னைத் தகவமைத்துக் கொண்டு வளர்ந்து வருவது இந்தத் துறையின் சிறப்புகளுள் ஒன்றாகும்.

இன்று அச்சுத்துறையில் வேலை வாய்ப்பு என்பதும், சுயதொழில் வாய்ப்பு என்பதும் அதிகமாக இருக்கிறது.
தொழில்நுட்ப, அறிவியல் வளர்ச்சியால் இன்று அச்சுத் துறையில் படித்தவர்களுக்கு தேவையும் அதிகமாகி வருகிறது.

அதற்குத் தகுந்தாற் போல அச்சுத்துறை சார்ந்த படிப்புகள் பல நிலைகளில் சொல்லிக் கொடுக்க கல்வி நிலையங்களும் முயற்சித்து வருகின்றன.

+2 முடித்த, அல்லது டிப்ளமா முடித்த மாணவியருக்கு அச்சுத் துறையில் பொறியியல் பட்டம் பெற அருமையான வாய்ப்பு காத்திருக்கிறது. கோவை அவிநாசிலிங்கம் மகளிர் உயர்கல்விப் பயிலகத்தில் (பல்கலைக் கழகம்) National Board of Accreditation (NBA)யால் ஒப்புதல் அளிக்கப்பட்ட அச்சுத் துறைக்கான இளம் பொறியியல் பட்டப்படிப்பு (BE Printing Technology) பெண்களுக்காக நடத்தப்படுகிறது.

இந்தியாவிலேயே பெண்களுக்காக இளம் பொறியியல் பட்டப் படிப்பு நடத்து ஒரே பயிலகம் இது என்பது குறிப்பிடத் தக்கதாகும். (அச்சுத்துறைப் பயிற்சி படிப்பு கள் நடத்தும் மற்ற கல்வியகங்களில் மாண வர்க்காக மட்டும் அல்லது இரு பாலருக் குமாகவே நடத்தப்படுகின்றன)

இந்தப் பல்கலைக் கழக முதன்மைப் பகுதியிலேயே சாரதாலயா அச்சகம் என்ற பெயரில் அச்சகமும் நடத்தப்படுகிறது. இத னால் மாணவியருக்கு அனைத்துப் பகுதிக ளிலும் நேரடி செயல்முறைப் பயிற்சியும் கிடைக்கிறது. அது தவிர தமிழகம் மற்றும் தென் மாநிலங்களில் உள்ள பெரிய அச்சகங் களுக்கும் மாணவியர் அழைத்துச் செல்லப் பட்டு செயல்விளக்கம் தரப்படுகின்றனர்.

தமிழகத்தின் பல்வேறு பகுதிகளில் நடத்தப்படும் அச்சுத்துறைக் கண்காட்சிக ளுக்கும் மாணவியர் அழைத்துச் செல்லப் படுவதால் துறையில் அறிமுகப் படுத்தப் படும் புதிய கருவிகள், எந்திரங்கள் மற்றும் தொழில்நுட்பம் பற்றிய இற்றைப்படுத்த லும் இவர்களுக்குக் கிடைக்கிறது.

பல்கலைக் கழகத்தின் ஆசிரியையர் மட்டுமல்லாது, அச்சுத் துறையில் பட்டறிவு மிக்க அச்சகத்தினரையும் நேரில் வரவ ழைத்து வகுப்புகள் நடத்தப்படுகின்றன.

உயர்கல்வித் துறை அறிவித்துள்ள கட்டணம் மட்டுமே வாங்கப்படுகிறது. நன் கொடை உள்ளிட்ட வேறு எந்தவொரு வகையிலும் பணம் வாங்கப்படுவது இல்லை. சிறந்த மாணவியருக்கு, அனைத்திந்திய அச்சகதாரர் பேரவை (All India Federation of Master Printers (AIFMP) மூலமாக ஆண்டுதோறும் கல்வி உதவித் தொகை வழங்கப்படுகிறது.

பொதுவாகக் கருதப்படுவதைப் போல, மாணவியருக்கு இங்கு வழங்கப்படும் கல்வி, அச்சகங்களில் வெறும் எந்திரங்களை இயக்குவதற்கான படிப்பு மட்டும் அல்ல. மாறாக அவர்களுக்குப் பல்வேறு மேலாண்மைத் திறன்களுடனேயே கல்வி வழங்கப்படுகிறது.

இதுவரையிலும் இங்கு படித்துள்ள மாணவியர் அனைவரும் நல்ல நிறுவனங் களில் பணி வாய்ப்பினை பெற்றுள்ளனர்.
வெளியூர் மாணவியர் தங்கிப் படிப்ப தற்காக, அழகிய எழில் சூழ்ந்த மலையடி வாரத்தில், தூய்மையான சுற்றுச்சூழல் நிலவும் இடத்தில், பாதுகாப்பான தங்கும் விடுதி வசதியும் உள்ளது.

அச்சக நண்பர்களின் குடும்பத்துப் பெண் குழந்தைகளுக்கு துறை சார்ந்த உயர்கல்வி பெறுவதற்கு இது ஒரு சிறந்த வாய்ப்பாகும்.

-முனைவர். டிகேஎஸ். லட்சுமிபிரியா, பேராசிரியர் மற்றும் துறைத் தலைவர், அச்சுத் தொழில்நுட்பத் துறை, அவிநாசிலிங்கம் மகளிர் உயர்கல்விப் பயிலகம், கோவை – 641 108 (பேசி:99401 63309)

பருப்பு உடைப்புத் தொழில் தமிழ்நாட்டிலேயே வட சென்னையில்தான் அதிகம் நடைபெறுகிறது. இரண்டு மூன்று தலைமுறைகளாக இந்த தொழிலைச் செய்து வளர்ந்து வரும் தொழில் முனைவோர் குடும்பங்கள் ஏராளமாக இங்கே இருக்கின்றன. அத்தகைய குடும்பம் ஒன்றைச் சார்ந்தவர் திரு. டி. ஞானசேகரன். வர்ஷினி தால் மில் என்ற பெயரில் தனது பருப்பு உடைப்பு நிறுவனத்தை நடத்தி வருகிறார். பருப்பு உடைப்பதற்குத் தேவையான புதுமையான எந்திரங்கள், பெரிய களம் போன்றவற்றை இவர் நிறுவனம் பெற்று இருக்கிறது. அவரிடம் பருப்பு உடைப்புத் தொழில் பற்றிப் பேட்டி கண்டபோது,

”பொதுவாக முழு உளுந்து, முழு துவரை, முழு பச்சைப்பருப்பு போன்ற பருப்பு வகைகளை கொள்முதல் செய்து, அவற்றின் தோல் நீக்கி, முழு பருப்பாக அல்லது இரண்டாக உடைத்து மொத்த வணிகம் செய்கிறோம். இதற்கான ஹல்லிங் எந்திரங்கள், கல் நீக்கும் எந்திரங்கள், மூட்டை நிரப்பும் எந்திரங்கள் அத்தனையும் எங்களிடம் உள்ளன.

இந்த தொழிலை எங்கள் அப்பா தொடங்கி நல்ல வளர்ச்சிப் பாதைக்கு கொண்டு வந்தார். என் படிப்பு முடிந்த உடன் நானும் இந்த தொழிலில் அவருக்குத் துணையாக இருந்து, பருப்பு உடைப்புத் தொழிலின் நுட்பங்களை அறிந்து கொண்டேன். இப்போது இன்னும் பெரிய அளவில் வளர்ந்து இருக்கிறோம்.

பெரும்பாலும் வடசென்னையில் பருப்பு உடைக்கும் தொழிலில் இருப்பவர்கள் விருதுநகரைச் சேர்ந்தவர்கள். இங்கு வந்து முதன் முதலில் பருப்பு உடைக்கும் தொழிலில் ஈடுபட்டவர் ஒரு விருதுநகர்காரராக இருக்க வேண்டும். அவரைத் தொடர்ந்து நிறைய விருதுநகர்காரர்கள் இங்கு வந்து இந்த தொழிலில் ஈடுபட்டு இருக்க வேண்டும். பொதுவாகவே தெற்கு மாவட்ட மக்கள் கடுமையாக உழைக்கக் கூடியவர்கள். பருப்பு உடைப்புத் தொழிலுக்கும் அதிக உழைப்பு தேவைப்படும். அத்தகைய உழைப்பு காரணமாகவே இங்கே பருப்பு உடைக்கும் தொழிலில் விருதுநகர்காரர்கள் சாதித்து வருகிறார்கள்.

அதே போல தங்களிடம் வேலை பார்ப்பவர்கள் அல்லது உறவினர்கள் சொந்தமாக பருப்பு உடைக்கும் மில் தொடங்கினால், இவர்கள் அவற்றைப் போட்டியாக கருதுவது இல்லை. அவர்கள் வளர்ச்சிக்கும் உதவும் மனம் இவர்களுக்கு இருந்தது. அதற்கேற்ப எந்த ஒளிவு மறைவும் இல்லாமல் அவர்களுக்கும் தொழிலைக் கற்றுக் கொடுப்பார்கள். எந்திரங்கள் வாங்கும் போதும் உரிய ஆலோசனைகளைத் தரத் தயங்க மாட்டார்கள்.

என் அப்பா, நான் இந்த தொழிலுக்கு வருவதை விரும்பினார். இன்றைக்கு சில வணிகர்கள், உரிய முறையில் தங்கள் மகன், மகள்களுக்கு தங்கள் தொழிலை அறிமுகப்படுத்துவது இல்லை. இதனால் அவர்கள் பிள்ளைகள் படித்து விட்டு வேலைக்கு போக விரும்புகிறார்கள். தொழில் அதிபர்களாக இருப்பவர்கள், தங்கள் மகனுக்கோ, மகளுக்கோ தங்கள் தொழிலை உரிய காலத்தில் அறிமுகப்படுத்தி அதில் பழக்கத் தொடங்கி விட வேண்டும். அப்படித்தான் என் அப்பா செய்தார். தொழில் தொடர்பான அனைத்தையும் எனக்குக் கற்றுக் கொடுத்தார். அனைத்து வேலைகளிலும் என்னை ஈடுபடுத்தினார். வெளி மாநிலங்களுக்கு, வெளிநாடுகளுக்கு கொள்முதல் செய்யச் செல்லும்போது என்னையும் உடன் அழைத்துச் சென்றார். என் அப்பாவின் இந்த அணுகுமுறை காரணமாக, தொழிலை நன்றாக கற்றுக் கொள்ள முடிந்தது.

துவரை, உளுந்து, பச்சைப்பயிறு ஆகியவை தமிழ்நாடு, ஆந்திரா, மகாராஷ்ட்ரா, மத்திய பிரதேசம், குஜராத், உத்திர பிரதேசம் ஆகிய மாநிலங்களில் அதிக அளவில் விளைகின்றன. நாங்கள் ஆந்திரா, மகாராஷ்டிராவில் இருந்து அதிக அளவில் பருப்பு வகைகளை கொள்முதல் செய்கிறோம். மேலும் தான்சானியா, பர்மா போன்ற நாடுகளில் இருந்து இறக்குமதியும் செய்கிறோம். இந்தியாவில் விளையும் பருப்பு வகைகளே அதிக தரத்துடன் விளங்குகின்றன.

நாங்கள் சில்லரை விற்பனை செய்வது இல்லை. பாக்கெட் போட்டும் விற்பனை செய்வது இல்லை. எங்கள் வாடிக்கையாளர்கள், மொத்த விறைபனையாளர்கள்தான். பிராண்ட் பெயர்களில் விற்பனை செய்யப்படும் உணவுப் பொருட்களுக்கு மட்டுமே ஜிஎஸ்டி வரி விதிக்கப்படுகிறது. நாங்கள் உடைக்கப்பட்ட பருப்புகளை எந்த வித பிராண்ட் பெயர்களும் இல்லாமல் விற்பனை செய்வதால் எங்களுக்கு ஜிஎஸ்டி வரி கிடையாது.

என்னுடைய அப்பாவுக்குப் பிறகு சுமார் இருபத்தைந்து ஆண்டுகளாக இந்த தொழிலைச் செய்து வருகிறேன். எங்கள் நிறுவனம் நல்ல வளர்ச்சி பெற்று வருகிறது. இந்த தொழில் உணவு சார்ந்த தொழில் என்பதால் தொடர் வளர்ச்சி இருந்து கொண்டே இருக்கும். நாளுக்கு நாள் மக்கள் தொகை அதிகரித்துக் கொண்டே இருப்பதால், தேவையும் உயர்ந்த கொண்டேதான் இருக்கும்.

எனக்கு மூன்று மகள்கள். அனைவரும் படித்துக் கொண்டு இருக்கிறார்கள். அவர்களை படிப்படியாக இந்த தொழிலில் ஈடுபடுத்தும் எண்ணம் இருக்கிறது. அவர்கள் ஆர்வம் காட்டினால், பெரிய தொழிலதிபர்களாக அவர்கள் உருவெடுக்க வாய்ப்பு இருக்கிறது. எல்லா தொழில்களிலும் ஆண்களுக்கு இணையாக பெண்களும் சாதிக்கும் காலம் இது. என் மகள்களும் எதிர்காலத்தில் பெரிய அளவில் வளர்ந்து சாதிப்பார்கள் என்ற நம்பிக்கை எனக்கு இருக்கிறது.” என்றார்.

-ரூபிகா

சுமார் நான்கு ஆண்டுகளுக்கு முன்பு, சைனா அதிபர் திரு. சி ஜின்பிங்க் (Xi Jinping) அரசு, உலக பொருளாதாரத்தின் மீது, சைனாவின் உள்ளூர் பொருளாதாரம் ஆதிக்கம் செலுத்த வேண்டும் என்பதற்காக, ‘மேட்-இன் சைனா 2025’ என்ற தொழில் உத்தியை (Strategy) வகுத்தது. இதனால், அமெரிக்கா, முதன்மையாகக் கருதும் உடல்நலம் மற்றும் நலவாழ்வுத் துறையில் (ஹெல்த் கேர்) முதலீடு செய்ய சைனா முன்வந்தது.

2018 ஆம் ஆண்டில், உடல்நலம், உயிரிதொழில் நுட்பம் (பயோடெக்), ரியல் எஸ்டேட் மற்றும் பொழுதுபோக்குத் துறையில், சைனா அதிகளவில் அமெரி க்காவில் முதலீடு செய் திருந்தது. அமெரிக்கா – சைனா பொருளாதார மற்றும் பாதுகாப்பு திறனாய்வுக் குழுவின் (எக்கனாமிக் & செக்யூரிட்டி ரிவ்யூ கமிஷன்) அறிக்கை இதனை சுட்டிக் காட்டுகிறது.

அமெரிக்காவின் அந்நிய நாட்டு முதலீடுகளுக்கான குழுவானது (தி கமிட்டி ஆன் ஃபாரின் இன்வெஸ்ட்மென்ட் இன் யூஎஸ் – சுருக்கமாக சிஎப்அய் யூஎஸ்), அறிக்கையானது, கடந்த ஆண்டின் முடிவு வரை, உயிரி தொழில் நுட்பம் உள்ளடக்கிய, அறிவுசார் தொழில்

நுட்பத்தில் சைனாவின் பங்கு முக்கியமானது என்று சுட்டிக்காட்டி உள்ளது.

கடந்த 2018 ஆம் ஆண்டில், அமெரிக்காவின் ஐந்து தொழில்நுட்ப ஒப்பந்தங்களில், சைனாவின் முக்கிய நிறுவனங்கள் பங்கு பெற்று உள்ளன. ‘ஆசியா பிரைவேட் ஈக்வட்டி ரிவ்யூ’ என்ற குழு அறிக்கையின் படி, இது 349 மில்லியன் டாலராகும். இது 2017 இல் சைனாவின் ஒன்பது தொழில்நுட்ப பரிமாற்றங்களில் 602.4 மில்லியன் டாலர் முதலீட்டை விட குறைவுதான்.

2018 நில வரப்படி, ஏழு வகை யான மாபெரும் துணிகர முதலீடுகள் மற்றும் தனிப்பட்ட ஈக்விட்டி நிதிகள் அமெரிக்காவிலும் சைனாவிலும் ஒருங்கே செய்யப்பட்டு உள்ளன. இவற்றில் நான்கு நிறுவனங்கள் நலவாழ்வுத் (ஹெல்த்கேர்) துறையைத் தேர்ந்தெடுத்து உள்ளன.

மேலும் சைனாவின் உயிரி தொழில் நுட்ப நிறுவனங்களும், அமெரிக்க முதலீட்டில் முக்கிய பங்கு வகித்து வருகின்றன. இவை மருத்துவம் மற்றும் மரபியல் தகவல் (ஜெனட்டிக் டேட்டா) துறையில் பங்கேற்பு செய்துள்ளன.

-பைந்தமிழ் குமரன், வடக்கு சூரங்குடி

இதுவரையில் ஒரு சிறுதொழில் நிறுவனம், தான் உற்பத்தி செய்யும் பொருளைக் கொண்டு ஈட்டும் விற்பனை வருமானமானது ஆண்டு ஒன்றிற்கு ஒன்றரைக் கோடி ரூபாய்க்கு மிகாமல் இருந்தால் இந்த சரக்கு சேவை வரியின் கீழான கலவை திட்டத்தினை (Composition Scheme) தெரிவு செய்து, பல்வேறு வரி விகிதங்களுக்கு பதிலாக அவைகளுள் ஏதேனும் ஒரு வரி விகிதத்தை மட்டும் அனைத்திற்கும் பின்பற்றி வரி செலுத்தினால் போதும்.

அவ்வாறே வரி செலுத்தியதற்கான அறிக்கை அரசிற்கு காலாண்டிற்கு ஒருமுறை அனுப்பினால் போதும் என்ற வசதி பொருட்களை உற்பத்தி செய்பவர்களுக்கு மட்டும் இருந்து வந்தது. இதனால் சேவை வழங்குபவர்கள், இந்த ஜிஎஸ்டி-யின் கீழான கலவை திட்டத்தினை தெரிவு செய்ய முடியாத நிலை இருந்தது.

கடந்த 01.04.2019 முதல் பொருட்களின் உற்பத்தி மட்டுமல்லாது பல்வேறு சேவைகளை வழங்கிடும் சேவையளர்களும் விருப்பபட்டால் காம்போசிஷன் திட்டத்தை தெரிவு செய்து பயன்படுத்திக் கொள்ளலாம். காம்போசிஷன் திட்டம் என்றால் என்ன?

சிறுதொழில் நிறுவனங்களில் பொருட்களை உற்பத்தி செய்வது, அந்த பொருட்களை கட்டுகளாக கட்டுவது (பேக்கிங்), அந்த கட்டுகளை நுகர்வோருக்கு கொண்டு செல்வது என்றவாறு ஒரே வருமான வரி கணக்கு எண்ணின் கீழ் பணிகளை தனித்தனியாக செய்வார்கள்.

அது போன்றே கணினி மென்பொருள் உருவாக்குவது, அதனை பயனாளரின் கணினியில் நிறுவுகை செய்வது, பின்னர் அந்த பயன்பாட்டில் ஆண்டு முழுவதும் சிக்கல் எழுந்தால் சரி செய்து பராமரிப்பது என ஒரே வருமானவரி கணக்கு எண்ணின் கீழ் பணிகளை தனித் தனியாக செய்வார்கள்.

அதனைத் தொடர்ந்து அந்தந்த பணிகளுக்கென தனித்தனி வரி விகிதங்களில் சரக்கு சேவைவரி அரசிற்கு செலுத்த வேண்டியுள்ளது. இதனால் அதிக காலவிரயமும் பொருட் செலவுகளும் ஏற்படுகின்றன ஒரு சிறுதொழில் நிறுவனம் தாம் வழங்கிடும் சேவைகளினால் ஈட்டும் விற்பனை வருமானத்தின் அடிப்படையில் காம்போசிஷன் திட்டத்தினை தெரிவு செய்து, பல வரி விகிதங்களுக்கு பதிலாக ஒரேயொரு விகிதத்தை மட்டும் அனைத்திற்கும் பின்பற்றி வரி செலுத்தினால் போதும்.

இந்த வசதியின் படி சேவை வழங்குவதற்காக தனித்தனியாக விற்பனை பட்டியல் தயார்செய்வதற்கு பதிலாக சேவையை வழங்கியதற்கான பட்டியலை மட்டும் தயார் செய்து வழங்கினால் போதும் மேலும் அந்த பட்டியலில் ‘taxable person paying tax in terms of notification No. 2/2019-Central Tax (Rate) dated 07.03.2019, not eligible to collect tax on supplies’. என்ற வரியை கண்டிப்பாக குறிப்பிட வேண்டும்

பொதுவாக இந்த வசதியை தெரிவு செய்யும் சேவை வழங்குபவர் தான் வழங்கும் சேவைகளுக்கு 6% மட்டும் வரி செலுத்தினால் போதும். உணவு விடுதி, தங்கும் விடுதி ஆகிய சேவைகளை வழங்குபவர்கள் 5% வரி செலுத்தினால் போதும் இதற்கான அறிக்கை சமர்ப்பிப்பதற்காக படிவம் எண் GST CMP- 01 அல்லதுGST CMP- 02 ஆகியவற்றை பயன்படுத்த வேண்டும்.

-முனைவர் ச. குப்பன்

இந்தியா முழுவதும் கடந்த இரண்டு மூன்று ஆண்டுகளாக ரொக்கமில்லாத பணப்பரிமாற்றம் ஓரளவு உயர்ந்து வருகிறது. 160 மில்லியன் மக்கள் இந்த வசதியை பயன்படுத்தி கொள்கின்றனர். பாதுகாப்பு தன்மையை கூடுதலாக்கும் வகையில் புதிய விர்ச்சுவல் கிரடிட் /டெபிட் (Virtual Credit/Debit Cards) எனும் புதிய வசதி தற்போது அறிமுகப் படுத்தபட்டு உள்ளது. இதன் பயன்கள் பின்வருமாறு.

இழப்பு ஏதேனும் ஏற்படுமாயின் இந்த விர்ச்சுவல் அட்டையில் எவ்வளவு தொகை குறிப்பிட்டு உள்ளோமோ அந்த தொகை அளவுக்கு மட்டுமே இழப்பு ஏற்படும்.

இது கையில் வைத்திருக்ககும் அட்டை இல்லை; விர்ச்சுவல் அட்டை என்பதால் யாராலும் அபகரிக்க முடியாது இந்த விர்ச்சுவல் அட்டை செயலில் இருக்கும் கால அளவு அதிகபட்சம் இரு நாட்கள் மட்டுமேயாகும்.

இதன் வாயிலான பணப் பரிமாற்றம் OTP எனும் ஒரு முறைக்கு மட்டுமே ஆன கடவுச் சொற்களின் வாயிலாக மட்டுமே அனுமதிக் கப்படும். ஒவ்வொரு முறையும் PIN, OTP ஆகியவற்றின் வாயிலாக மட்டுமே இந்த விர்ச்சுவல் அட்டையை உருவாக்க முடியும்.

தொட்டுணரக் கூடிய டெபிட், கிரடிட் கார்டை அச்சிட்டு அனுப்பிப் பெறுகின்ற நடைமுறை இதில் அறவே ஒழிக்கப் படுகின்றது
வழக்கமான கடனட்டையை பெறுவ தற்காக கட்டணம் செலுத்துவதைப் போன்று இதனை பெறுவதற்காக தனியாக கட்டணம் செலுத்த தேவையில்லை. தேவை இல்லை எனில் இந்த விர்ச்சுவல் அட்டையை அறவே நீக்கம் செய்து மிகுதி தொகையை நம் கணக்கில் வரவு வைத்துக் கொள்ள முடியும்.

இந்த வசதியை ஸ்டேட் வங்கி, யூனியன் வங்கி, எச்டிஎஃப்சி, ஐடிபிஐ, பேங்க் ஆப் பரோடா போன்ற வங்கிகள் வங்கிகள் வழங்குகின்றன

இந்த வசதியை இன்டர்நெட் பேங்கிங், மொபைல் பேங்கிங் ஆப் ஆகிய இரு வழிகளில் பெற முடியும். இந்த வசதியை பெறுவதகு முதலில் இவைகளின் வாயிலாக நம் வங்கியின் முகப்புத் திரையில் உள்நுழைவு செய்ய வேண்டும். பின்னர் services section எனும் பகுதிக்கு சென்று அதில் Generate Virtual Card எனும் வாய்ப்பினை தேர்வு செய்து சொடுக்க வேண்டும்.

தொடர்ந்து விர்ச்சுவல் டெபிட்/கிரடிட் அட்டையில் நாம் பயன்படுத்த விழையும் தொகையை குறிப்பிட்டு Submit கிளிக் செய்ய வேண்டும். உடன் ஒன் டைம் பாஸ்வேர்டு ஒன்று உருவாகி நம் கைபேசிக்கு வந்து சேரும். இதனை உள்ளீடு செய்து Submit கொடுக்க வேண்டும். உடன் விர்ச்சுவல் டெபிட் அல்லது கிரடிட் அட்டை ஒன்று உருவாகி விடும். இந்த அட்டை 48 மணி நேரம் மட்டுமே செயல்படும்.

இந்த விர்ச்சுவல் அட்டையை குறிப்பிட்ட நோக்கத்திற்காக மட்டும் அல்லாது குறிப்பிட்ட தொகை காலியாவது வரை மட்டும் பயன்படுத்திக் கொள்ள முடியும்.

-முனைவர் ச. குப்பன்

இன்றைய உலகில் சில புகழ்பெற்ற குறியீடு (Brand) கொண்ட பொருள்களுக்குக் கூடச் சந்தைப்படுத்துதல் தேவைப்படுகிறது. பொது மக்களுக்கு நன்கு அறிமுகமான பொருள்களுக்கே புகழ்பெற்ற மனிதர்களை வைத்து விளம்பரம் செய்கிறார்கள்.

ஆனால் மருந்துகள், வீட்டுக் கருவிகள் போன்றவற்றை விற்பதற்குப் பிரதி நிதிகள்தான் முக்கியம். இப்போது புறநகர்களில் கூட நிறைய அடுக்கு வீடுகள் (Flats) எழும்பி வருகின்றன. உள் அலங்காரம், சமையலறைக்குத் தேவையான மாடூலர் வகை மின்தூக்கிகள் அனைத்துக்குமே விளம்பரப் படுத்துதல் இன்றியமையாதது.

அடுத்த தெருவில் வசிக்கும் நண்பர், தாங்கள் புதிதாகக் கட்டுகிற இரண்டு மாடித் தளத்துக்கு கூட்டிச் சென்றார். நாங்கள் போன போது, விற்பனைப் பிரதிநிதியுடன் கட்டடப் பொறியாளரும், ஒப்பந்ததாரரும் இருந்தார்கள். ‘‘இவர்தான் சார் வீட்டு உரிமையாளர், இவரிடம் சொல்லுங்கள்’’ என்று நண்பரைப் பொறியாளர் சுட்டிக் காட்டினார்.

அவ்வளவுதான்; பிரதிநிதி மடமட வென்று பாடம் ஒப்பிக்கும் மாணவன் போல், குறிப்பிட்ட மின்தூக்கியின் பிளஸ் பாயின்ட்களை சொல்லலானார். இந்த வகை மின்தூக்கி, மின்சாரம் தடைப் பட்டாலும், தானாகவே இயங்கத் தொடங்குமாம்; ஜெனரேட்டர் தேவைப் படாதாம். நண்பரின் கேள்விகளுக்கு எல்லாம் உடனுக்குடன் பதில் சொன்னார்; மின்னஞ்சலைக் கொடுத்து பிற விவரங் களைப் பார்க்கும் படியும் கூறினார்.

‘‘எஸ்டிமேட் கூடுதல்தான், ஆனா, மனைவியிடம் கேட்கணும்’’ என்று நண்பர் சொன்னாரே தவிர முகத்தில் நிறைவு தெரிந்தது.

ஆக, விற்பனையில் முதல் அம்சம் புலப்பட்டு விட்டதல்லவா? அணுகு முறையில் (Approach) பொறுமை மிகத் தேவை. அணுகுமுறைத் திறனை ஓரளவு வளர்த்துக் கொள்ள இந்த நாளில் ஊடகங்களும், பத்திரிகைகளும் உதவு கின்றன. புரியவில்லையா? எந்தத் துறையில் ஒருவர் சற்றுப் புகழ்பெற்றவராக இருந்தாலும், அவரைப் பற்றிக் கால் பக்கத்துக்கு, படத்துடன் செய்திகள் வெளிவருகின்றன. குறிப்பாகக் கட்டுமானத் தொழிலிலும், மருத்துவத் துறையிலும்.

அவரை நினைவு வைத்துக் கொண்டு விற்பனைப் பிரதிநிதி, ‘‘உங்கள் பேட்டி படித்தேன் சார்’’ என்று சொன்னால் போதும், மனிதர் மகிழ்ந்து போய் விடுவார். மருத்துவத்தில், நீரிழிவு, வயிற்றுக் கோளாறு இவை பற்றி சில மருத்துவர்களின் கட்டுரைகள், பேட்டிகள் பல ஏடுகளின் இணைப்புப் பகுதியில் வருகின்றன. ஒருவேளை நீங்கள் நேரடியாகப் படிக்கா விட்டாலும், வேறு யார் மூலமாகவோ தெரிந்து கொண்டாலும் பரவாயில்லை. நீங்களே பார்த்ததாகச் சொல்லுங்கள்.

இயல்பாக இந்த நினைவாற்றல் உறுதியாக விற்பனை பிரதிநிதியின் அணுகுமுறையை மேலும் வலுப்படுத்தும்.

அடுத்துத் தேவைப்படுவது முழுமையான பகுத்தறிவு. குறிப்பாக மருத்துவத்துக்குத் தேவை. ஏனெனில் அலோபதி மருந்துகளுக்கு பக்க விளைவுகள் உண்டு. டாக்டர் இதைப் பற்றி எப்படி விசாரித்தாலும், நன்கு புரிந்து கொண்டு விளக்கும் திறமை தேவை. அவ்வப்போது நாளேடுகளில் வெளிவரும் கருத்துக்களை மேற்கோளிட்டுக் கூறலாம்.

‘‘அமெரிக்க ஆய்வு இந்த வேதிப் பொருள் ஒன்றும் தீங்கு செய்யாது என்று சொல்கிறது’’ என்று குறிப்பிடலாம். டாக்டருக்கோ, வல்லுநருக்கோ இது தெரியாமல் இருக்குமா? இருந்தாலும் நீங்களும் தெரிந்து வைத்து இருக்கிறீர்கள் என்பதுதான் பிளஸ் பாயின்ட்.

மூன்றாவது விற்பனைக்குப் பின் சேவை. தொடக்கத்தில் சொன்ன நிகழ்வில், மின்தூக்கி பொருத்திய பின்; அதன் பயன்பாடு எப்படி என்று கவனித்துக் கொண்டே இருக்க வேண்டும். குறிப்பிட்ட கால அளவு இலவச சேவையைச் சலிக்காமல் தொடர வேண்டும். நிறைய நிறுவனங்களும், தனியார் வங்கிகளும் இந்த – ‘‘விற்பனைக்குப் பின் சேவையை’’ முறையாகச் செய்வது கிடையாது.

ஆக, விற்பனையில் முன்னணியில் நிற்க, மூன்று அம்சங்கள் – அதாவது A, K, A – (Approach, Knowledge, After Sales Service) முக்கியம் என்று வல்லுநர்கள் கருதுகிறார்கள். இதில் இரண்டாவதைத் தான் – அதாவது முழுமையான அறிவு – முதலில் பெற வேண்டும். மற்ற இரண்டையும் அனுபவத்தில் வளர்த்துக் கொள்ளலாம்.

-வாதூலன்