அன்றாட வாழ்க்கைக்கு தேவையான பல வகைப் பொருட்களை, பல வகையான தொழில் நிறுவனங்கள் நாளும் தயாரித்து வருகின்றன.

ஒரு பொருளை தயாரிப்பதில் இருந்து அதனை கடைக் கோடி வாடிக்கையாளர் கைகளுக்கு கொண்டு சேர்ப்பது வரைக்கும் உள்ள தொடர்ச்சியான நிகழ்வில் பல மேலாண்மை நடவடிக்கைகள் உள்ளன.

அதில் முதல் நடவடிக்கை என்பது மூலப் பொருட்களை தயார் நிலையில் வைத்திருப்பது. மூலப் பொருள் தயார் நிலையில் உள்ள போதுதான் உற்பத்தி தடை இல்லாமல் நடைபெறும். அதே வேளையில், அளவுக்கு அதிகமான மூலப் பொருட்களை வாங்கி குவித்து வைத்து விட்டாலும் முதலீடு அதில் முடங்கி விடும்.

உற்பத்தி செய்த பொருட்களை மிகச் சரியாக பேக்கிங் செய்து அதனை மொத்த விற்பனையாளர்களின் கைகளுக்கு கொண்டு போய் சேர்க்க வேண்டும். அதற்கான போக்குவரத்து செலவுகளை ஏற்க வேண்டும். அந்த பொருள் பற்றிய அறிமுகத்தை வெளிச் சந்தையிலும் , மக்கள் மத்தியிலும் பிரபலப்படுத்த வேண்டும். அதற்கான விளம்பரச் செலவுகள் உள்ளன.

இந்த நிலையில் முதல் நிலையான மூலப்பொருட்கள் சேகரிப்பிலேயே நாம் நின்று விட முடியாது.

இந்த இடத்தில் தான் இந்த JIT என்ற தியரி வேலை செய்கிறது. இந்த தியரியின் படி, ஒரு பொருளின் உற்பத்தி, அதன் சந்தையின் தேவை, விற்பனை வேகம், அதன் மறு தேவைகள், இதற்கு எல்லாம் மேலாக, மூலப் பொருளின் கையிருப்பு – என இந்த அம்சங்களை எல்லாம் கணக்கில் எடுத்துக் கொள்ள வேண்டும். பின்பு, அதனையொட்டி மூலப் பொருட்களின் கொள்முதலை கூட்டவோ , குறைக்கவோ செய்ய வேண்டும்.

இதனை முறையாக கையாளும் முறைக்குப் பெயர் தான் தேவைக்கு ஏற்ற கொள்முதல் அதாவது JIT என மேலாண்மை தியரியில் அழைக்கபடுகிறது.

-பள்ளபட்டி அஸ்கர் அலி

விமானங்கள் தயாரிக்கும் இரண்டு பெரிய நிறுவனங்கள் என்றால் அவை ஐரோப்பிய நாட்டைச் சார்ந்த ஏர்பஸ் (Airbus) நிறுவனமும், அமெரிக்க நாட்டை சார்ந்த போயிங் (Boeing) நிறுவனமும்தான். இவற்றில் முதலில் தொடங்கிய நிறுவனம், போயிங் நிறுவனம். 1916களில் இருந்து இந்நிறுவனம் இயங்கி வருகின்றது, ஏர்பஸ் நிறுவனம் 1970களில் இருந்தே விமானங்களை உருவாக்கி வருகிறது.

கடந்த 2018 அக்டோபர் மாதம் 29 – ம் தேதி லயன் ஏர் எனும் விமான நிறுவனத்தால் இயக்கப்பட்ட போயிங் 737 Max 8 ரக பயணிகள் விமானம், ஜகார்த்தா மாநிலத்தில் புறப்பட்டு (Take off) பன்னிரண்டு வினாடிகளில் விபத்துக்கு உள்ளாகி ஜாவா கடல் பகுதியில் விழுந்தது. இந்த விபத்தில் சுமார் 189 பயணிகள் உயிரிழந்தனர்.

தற்போது உலகத்தில் பயணிகள் மற்றும் சரக்கு விமானங்கள் 25,000 க்கும் மேல் இயங்கி வருகின்றன அவை அனைத்தும் இந்த இரண்டு நிறுவனங்கள் மட்டும் தயாரித்தவைதான்.

போயிங், ஏர்பஸ் இரண்டு நிறுவனங்களிலும் பெரிய அளவில் வெற்றி பெற்ற விமானங்கள் என்று பார்த்தால் அவை போயிங் 737 வகையும், ஏர்பஸ்சில் A320 வகை விமானமும்தான். 737 வகை விமானம் சுமார் 10,000க்கும் மேலும் A320 வகை விமானம் 9,000க்கும் மேலும் உலகம் முழுவதும் இயங்கி வருகின்றன.

செப்டம்பர், 2014 -ல் ஏர்பஸ், A320 Neo என்ற புது வகை விமானத்தை தயாரித்து விற்பனைக்கு கொண்டு வந்தது. வெளியிட்ட சில மாதங்களிலேயே A320 Neo வகை விமானம் விமான போக்குவரத்து நிறுவனங்களிடையே நல்ல வரவேற்பை பெற்றது. இந்த வகை விமானத்தால் 15% அளவுக்கு ஏரிபொருளை சேமிக்க முடிந்தது. அப்போது முதல் இரு நிறுவனங்களுக்கும் இடையே தொழில் போட்டி இன்னும் வேகம் எடுத்தது.

போயிங் நிறுவனமும் A320 Neo விமானத்திற்கு போட்டியாய் 737MAX- 8 எனும் விமானத்தை அறிமுகம் செய்தது. இந்த இரண்டு நிறுவனங்களும், தங்களது இந்த இரண்டு வகை விமானங்களை மேம்படுத்துதலின் போது விமானத்தின் எஞ்சின் அளவை பெரியதாக்கின.

பயணிகள் மற்றும் சரக்கு விமானங்களிள் எஞ்சினை இறக்கையில்தான் பொருத்தி இருப்பார்கள். 737MAX- 8 க்கும் A320 Neo க்கும் உள்ள முக்கிய வேறுபாடு என்பது A320 Neo விமானத்தில் எஞ்சினுக்கும், தரைக்கும் உள்ள உயரம். 737MAX- 8 யை ஒப்பிடும் போது நியோவில் உயரம்அதிகமாக இருந்தது. அதாவது 737MAX- 8- ல் கிரவுண்டு கிளியரன்ஸ் (Ground Clearance) குறைவாக இருந்தது.

இப்படி கிரவுண்டு கிளியரன்ஸ் குறைவாக இருப்பதால் 737MAX- 8 – ல் எஞ்சினின் வடிவமைப்பை சற்றும் மாற்றாமல் அப்படியே இறக்கையை மேலே உயர்த்தினர். இப்படி எஞ்சினை உயர்த்தியதால் விமானத்தின் சென்டர் ஆப் கிராவிட்டியும் (COG) மேலே சென்றது.

இப்போது, Angle of Attatck (AOA) என்றால் என்ன என்பதை அறிவோம். பொதுவாக விமானத்தின் இறக்கைகளை ஏர்ஃபாயில் (Airfoil) எனப்படும் வகையிலேயே வடிவமைப்பார்கள். அப்படி வடிவமைத்தால் மட்டுமே விமானம் மேல் நோக்கி எழும்ப இறக்கை உந்துதலாக இருக்கும். இறக்கையின் பின் விளிம்பில் (Trailing Edge) இருந்து முன் விளிம்பு (Leading Edge) வரை ஒரு லைனை வரைந்தால் அதுகார்ட் லைன் (Chord Line) என அழைக்கப்படும். அப்படி அந்த கார்ட் லைனையும் கிடைமட்ட லைனையும் (Horizontal Line) இதற்கு இடைப்பட்ட கோணத்தையும் (Angle) அளத்தால் நமக்கு விமானத்தின் ஆங்கில் ஆப் அட்டாக், விமானம் பறந்து கொண்டு இருக்கும் போது எவ்வளவு என்பது தெரிய வரும்.

பறந்து கொண்டு இருக்கும் விமானத்தின் ஸ்டால் ஆங்கிளை (Stall Angle) பைலட்டுகள் நெருங்க விட மாட்டார்கள். அப்படி விமானம் ஸ்டால் ஆங்கிளை நெருங்கினால் அது விபத்துக்கு உள்ளாகும். பொதுவாக எல்லா விமானத்திலும் ஸ்டால் ஆங்கிள் 12 முதல் 20 டிகிரி வரை இருக்கும்.

737 மேக்சில் இப்போது அதன் சென்டர் ஆர் கிராவிட்டி உயர்ந்ததால் விமானம் மேல் நோக்கி எழும்ப டேக் ஆஃப் செய்ய அதிக ஆங்கிள் ஆப் அட்டாக் தேவைப்படுகின்றது. அப்படி அதிக கோணத்தை நெருங்கி ஸ்டால் ஆங்கி¬ளை நேருங்காமல் இருக்க போயிங் நிறுவனம் புதிதாக ஒரு மென்பொருளை 737MAX- 8 – ல் அறிமுகபடுத்தியது.

இப்போது 737MAX- 8 -ல் என்ன கோளாறு எற்பட்டது என்றால், விமானம் பறக்கும் போது அதிக ஆங்கிள் ஆஃப் அட்டாக் ஏற்பட்டால் அதனை ஸ்டால் ஆங்கிளை நெருங்க விடாமல் குறைப்பதற்கு போயிங் நிறுவனம், MCAS (Maneuvering Characteristics Augmentation System) எனப்படும் செயற்கை நுண்ணறிவு மென்பொருளை (artificial intelligence software) உருவாக்கி, அதனை 737MAX- 8 – ல் பொறுத்தி விட்டது.

இப்போது இந்த மென்பொருளின் செயல்பாடு என்னவென்றால் விமானம் வானத்தில் பறந்து கொண்டு இருக்கும் போது அதில் AOA அதிகம் ஆனால் அதனை விமானத்தின் முன்பக்கத்தில் AOA பொறுத்தப்பட்டு இருக்கும், இரண்டு AOA­ சென்சார்களில், ஒன்றில் (ஒரு ஏஒஏ சென்சார்) மட்டும் இருந்து தகவலை தொடர்ந்து எடுத்து பிராசஸ் செய்து அதற்கு ஏற்றாற் போல் விமானம் அதுவாகவே விமானத்தின் வால் பகுதியில் இருக்கும் எலிவேட்டரை (Elevator) பயன்படுத்தி விமானத்தின் ஆங்கிள் ஆஃப் அட்டாக் கோணத்தை குறைக்கும்.

இதனால் விமானம் ஸ்டால் ஆங்கிளை நெருங்காது. விமானம் பறந்து கொண்டு இருக்கும் போது, அதன் எலிவேட்டரே விமானத்தை மேல் உயர்த்த வேண்டுமா அல்லது தாழ்த்த வேண்டுமா என்பதை முடிவு செய்யும்.

இப்படி ஒரு மென்பொருள் விமானத்தில் பொருத்தப்பட்டு உள்ளது என்பதைக் குறித்து போயிங் நிறுவனம் விமானிகளுக்கு தெரிவிக்கவைல்லை. முதல் விபத்து எற்பட்ட பின்னரே போயிங் நிறுவனம் அதனை கையேடு புத்தகத்தில் விமானிகளுக்காக அப்டேட் செய்தது.

முதல் விபத்து ஏற்பட்டு ஐந்து மாதங்களுக்குள், கடந்த மார்ச் மாதம் பத்தாம் தேதி எத்தியோப்பியாவில் இருந்து புறப்பட்டு (டேக் ஆஃப் செய்து) ஆறு வினாடிகளில் விமானம் விபத்துக்கு உள்ளானது. இந்த விபத்தில் 157 பயணிகள் உயிரிழந்தனர். பொதுவாக விமானம் டேக் ஆஃப் செய்யும் போது அதிக ஆங்கிள் ஆஃப் அட்டாக் இருக்கும் அதனால் விமானத்துக்கு லிஃப்ட் அதிகமாக தேவைப்படும். அதன் கோணம் கிட்டத்தட்ட ஸ்டால் ஆங்கிளை நெருங்கி இருக்கும்.

737MAX- 8 – ல் எஞ்சின் பொருத்தப் பட்டு இருக்கும் இடத்தைப் பொறுத்து மற்ற விமானங்களைக் காட்டிலும் இதில் லிஃப்ட் சற்று அதிகமாக இருக்கும். இப்படிபட்ட அதிக கோணத்தை குறைக்கவே இந்த பயணிகள் விமானத்தில் போயிங் நிறுவனம் இப்படி ஒரு புதுவகை மென்பொருளை உருவாக்கி அதனை பயன்பாட்டிற்குக் கொண்டு வந்தது.

மார்ச் மாதம் நடந்த விபத்தால் இந்தியா உட்பட ஐம்பதுக்கும் மேற்பட்ட நாடுகள் 737MAX- 8 வகை பயணிகள் விமானத்தை தங்கள் நாடுகளில் பறப்பதற்கு தடை விதித்தன. ஃபெடரல் ஏவியேஷன் அட்மினிஸ்ட்ரேஷன் (FAA(Federal Aviation Administration) என்பது அமெரிக்க அரசாங்க அமைப்பாகும். அந்த நாட்டில் உள்ள சிவில் விமானப் போக்குவரத்தை கட்டுப்படுத்தும் அதிகாரம் கொண்ட அமைப்பு இது. இப்படிப்பட்ட உறுதித்தன்மை இல்லாத MCAS மென்பொருளை FAA பயணிகள் விமானத்தில் பொருத்த அனுமதி அளித்திருக்கக் கூடாது என்பது பல விமான நிறுவனங்களின் குற்றச்சாட்டாக இருக்கிறது.

முதல் விபத்து நடைபெற்ற பின்னர்தான் போயிங் நிறுவனம், இப்படி ஒரு மென்பொருள் விமானத்தில் இருப்பதை விமானிகள் மற்றும் விமான நிறுவனங்களுக்கு வெளிப்படுத்தியது. அதன் பின்னர் சில விமான போக்குவரத்து நிறுவனங் களைச் சார்ந்த விமானிகளுக்கு மட்டும் MCAS பற்றி PPT முலம் போயிங் நிறுவனம் பயிற்சி அளித்தது. அப்போதும் சிமுலேட்டர் (simulator) பயன்படுத்தி பயிற்சி வழங்கவில்லை என்பதும் பலரின் குற்றசாட்டு.

இரண்டாவது விபத்து நடப்பதற்கு முன்னர், அந்த விமானத்தை இயக்கி வந்த விமானி MCAS சிஸ்டத்தை பற்றி முன்னரே அறிந்து இருந்ததால், விபத்தைத் தவிர்க்க அவர் கடுமையாக முயன்ற போதும் அந்த மென் பொருள், விமானியின் செயல்களை புறக்கணித்து விட்டது. இப்படிபட்ட MCAS சிஸ்டத்தை விமானியால் செயல் இழக்கவும் செய்ய முடியவில்லை. இதன் விளைவாகவே இரண்டாம் விபத்து நடைபெற்றது.

கடந்த மார்ச் மாதம் முதல் தற்போது வரை 737 மேக்ஸ் 8 வகை பயணிகள் விமானம் ஒன்று கூட விற்பனையாகவில்லை. தற்போது போயிங் நிறுவனம் அப்டேட்டட் MCAS வெர்சன் என்று அறிமுகபடுத்தி உள்ளது. முன்பு ஒரு AOA சென்சாரில் இருந்து மட்டும் தகவலைப் பெற்று பிராசஸ் செய்த எம்சிஏஎஸ், தற்போது இரண்டு சென்சார்கள் வாயிலாகவும் தகவலை பெற்று இயங்கும்.

குறிப்பாக இந்த இரண்டாம் பதிப்பு பொருத்தபட்டு இருக்கும் AOA சென்சா ருக்கும் ஒன்றுக்கும் மற்ற ஒன்றுக்கும் வேறுபாட்டின் அளவு 5.5 டிகிரிக்கு மேல் இருந்தால் தானாகவே எம்சிஏஎஸ் மென்பொருள் செயல் இழந்துவிடும். அது மட்டும் இன்றி தற்போது புதிய மென் பொருளிள் ஒரு விமானியால் எந்ந நேரமும் எம்சிஏஎஸ் சிஸ்டத்தை புறக்கணிக்க (Override) முடியும்.

தற்போது போயிங் நிறுவனம் தனது இரண்டு விபத்திலும் உயிரிழந்தவர்களின் குடும்பத்தினருக்கு இழப்பீட்டைக் கொடுத்து வருகின்றது. இருப்பினும் 300க்கும் மேற்பட்டவர்கள் உயிரிழந்ததற்கு யார் பொறுப்பு ஏற்பார்கள்?

பந்தயத்தில் ஒடிக் கொண்டே இருந்தால் தான் வெற்றி பெற முடியும் என்ற சூழலில் நிறுவனங்கள் இருந்தாலும், அந்த நிறுவனங் களின் தயாரிப்புகள் எந்த காரணத் தாலும் இயற்கைக்கும், மற்ற மனித உயிர்களுக்கும் எவ்வித பாதிப்பும் ஏற்படுத்தாத வகையில் இருக்க வேண்டும்.

மேற்கண்ட இரண்டு விபத்துகளுக்கும் அடிப்படையான காரணம் என்ன என்று கூர்ந்து பார்த்தால் அவற்றுக்கு இடையே நடந்து வரும் தொழில் போட்டிதான் என்பது வெளிப்படையாகத் தெரிகிறது.

கடந்த காலங்களில் போயிங் நிறுவனம் அறிமுகம் செய்த விமானங்களால், விமான போக்குவரத்துத் தொழிலில் பெரும் மாற்றம் ஏற்பட்டது என்பதும் உண்மை. தற்போதும் தனது லாபத்தில் பெரும் பகுதியை தனது ஆராய்ச்சி மற்றும் மேம்பாட்டுப் பணிக ளுக்கு செலவழித்து வருகிறது. இருப்பினும் இந்த இரண்டு விபத்துகளும் போயிங் விமானங்கள் குறித்த நம்பகத் தன்மையில் ஒரு ஓட்டையைப் போட்டு விட்டன.

-செ. தினேஷ்பாண்டியன்,பி. டெக்., (ஏரோநாட்டிகல்)

-ஆர்க்கிடெக்ட் செல்வி. கிருத்திகா

சென்னையில் உள்ள முகமது சதக் கல்லூரியில், பி. ஆர்க்., முடித்த பின் நண்பர் திரு. மணிகுமாருடன் இணைந்து டிடீடி ஸ்டுடியோ (D. T. D. Studio) என்கிற பெயரில் கட்டடங்களுக்கான வரை படங்களை உருவாக்கித் தருவதோடு, கட்டுமான பணிகளையும் மேற்கொண்டு வருகிறார், செல்வி வெ. கிருத்திகா.

சிமென்ட், சுட்ட செங்கல், ஜல்லி, இரும்புக் கம்பிகளைப் பயன்படுத்தாமல் வீடு கட்டும் திட்டங்களை நிறைவேற்றி வருகிறார், செல்வி. கிருத்திகா.

”சிமென்டை பயன்படுத்தி மேற் கொள்ளப்படும் கட்டுமானத்தை விட இது உறுதியானதாகவும், இரண்டு மடங்கு ஆயுட்காலம் கொண்டதாகவும் இருக்கும்.” என்கிறார், கிருத்திகா. இந்த கட்டுமான முறை பற்றி அவர் மேலும் கூறும்போது,

இத்தகைய வீடுகளில் வெளியில் உள்ள வெப்பத்தைவிட 3 முதல் 4 டிகிரி குறைவாக இருக்கும். இதே போல குளிரையும் குறைத்துக் கொடுக்கும்.

எங்களைப் பொறுத்தவரை இது போன்ற கட்டுமானங்கள் ஒரு புதுமை அல்ல. காலத்திற்கு தேவையானவை. செங்கல், சிமெண்ட், இரும்பு, மற்றும் ஆற்றுமணல், சேர்க்காமல் புதுச்சேரி ஆரோவில்லில் 6 மாடி கட்டிடம் கட்டப்பட்டுள்ளது. அந்த கட்டிடம் இத்தகைய கட்டுமானத்துக்கு ஒரு முன் மாதிரியாக உள்ளது.

கருத்தரங்குகள், ஆய்வுக் களங்கள், பயிற்சி வகுப்புகளுக்கு தன்னார்வலர்களாக நாங்கள் பயணித்த போது ஆர்கிடெக்ட் திரு. சுதீர் எங்களுக்கு அறிமுகமானார். அவர் சுற்றுச் சூழல் ஆர்வலர். பகுதி நேர பேராசிரியராக (விசிட்டிங் ஃபேக்கல்டி) யாக பல்வேறு ஆர்க்கிடெக்சர் கல்லூரிகளுக்குச் சென்று வருபவர். பியூசிஎல் அமைப்பில் உள்ள அவர் சுற்றுச்சூழலை பாதுகாக்கும் வீடுகளை உருவாக்குவதில் ஆர்வம் காட்டி வருகிறார். அவரிடமிருந்து நிறைய தகவல்களை தெரிந்து கொண்டோம்.

எங்களுக்கு இப்படிப்பட்ட வீட்டைக் கட்டும் முதல் வாய்ப்பை சென்னை, கூடுவாஞ்சேரியில் உள்ள திரு. ராஜ்குமார் கொடுத்தார். தரைத் தளம் மற்றும் முதல் மாடியுடன் 3500 சதுர அடியில் அவருடைய வீட்டை கட்டி வருகிறோம். வீட்டுப் பணிகள் முடியும் நிலையில் உள்ளன.

நான்கு படுக்கை அறைகள், இரண்டு சமையல் அறைகள், இரண்டு பொது அறைகள் மற்றும் இரண்டு வரவேற்பு அறைகளை உள்ளடக்கியது, இந்த வீடு. கட்டுமானத்திற்குத் தேவையான மணலை பெரும் பாலும் அந்த கட்டுமானம் நடைபெறும் பகுதியில் இருந்தே எடுத்துக் கொண்டோம். அடித்தளத்துக்கு கருங்கற்களையும், அதோடு சுண்ணாம்பு, மற்றும் களி மண் சாந்தை பயன்படுத்தினோம். சுவருக்கு கம்ப்ரஸ் செய்யப்பட்ட மணல் கற்களைப் (Compressed Blocks) பயன்படுத்தினோம்.

கம்ப்ரஸ் கற்கள் செய்ய திரு. ராஜ்குமார் கேட்டுக் கொண்டதற்கு இணங்க 8% சிமென்ட கலந்தோம்

இந்த வீட்டைப் பார்த்து விட்டு அதே பகுதியைச் சேர்ந்த திரு. காசிராமன் என்பவரும் இதே மாதிரி வீட்டைக் கட்டித் தரும்படி எங்களுடன் ஒப்பந்தம் செய்துள்ளார், அந்தப் பணியும் தொடங்கி நடைபெற்று வருகிறது. இவர் அறவே சிமென்ட கலக்க வேண்டாம் என்று கூறி இருக்கிறார். 1700 சதுர அடியில் தரைத்தளம் மற்றும் முதல் மாடியுடன் இந்த வீட்டின் பணியும் விரைவில் நிறைவு பெற உள்ளது.

திராய் உள்ளிட்ட பயன்பாடுகளுக்கு உள்ளூரிலேயே வளரும் மரவகைகளை பயன்படுத்துவது சிறப்பு. நாற்பது ஆண்டுகளுக்கு மேல் ஆயுட்காலம் கொண்ட மரங்களை பயன்படுத்தும்போது கட்டடங்கள் உறுதியாக இருக்கும் பூச்சி தொல்லை வராது.

நாங்கள் மேற்கொள்ளும் சுற்றுச் சூழலுக்கு உகந்த கட்டுமானங்களுக்கு (Eco Friendly Constructions) தேவையான மண், மற்றும் மரப் பொருட்களை முடிந்த வரை அதே பகுதியில் இருந்தே பெற்றுக் கொள்கிறோம்

நாங்கள் ஆய்வுக்காக திருத்தணி அருகில் உள்ள அத்திமாஞ்சேரிக்கு சென்றிருந்தோம். அங்குள்ள மலையடிவாரத்தில் மலைவாழ் பழங்குடி மக்களான இருளர்களின் 35 குடும்பங்கள் உள்ளன. 2015ஆம் ஆண்டு பெய்த பெருமழையின் போது நான் அங்குதான் இருந்தேன். வெள்ளத்தில் அவர்களின் வீடுகள் அடியோடு பாதிக்கப்பட்டன. மழை முடிந்ததும் அங்குள்ள மண்ணையும், தாவரங்களையும் பயன்படுத்தி மிக உறுதியான வீடுகளை ஒரு சில நாட்களில் கட்டிக் கொண்டார்கள். அவர்கள் வீடு கட்டும் முறையை வியப்புடன் அருகில் இருந்து பார்த்துக் கொண்டிருந்தேன். ஒரு தேர்ந்த பொறியியல் திறமை அவர்கள் வீடு கட்டும் முறையில் இருந்தது.

நாங்கள் சிமென்ட், சுட்ட செங்கல்கள், ஜல்லி பயன்படுத்தாமல் கட்டும் வீடுகள் பற்றி அறிந்த ஆர்கிடெக்ட் நண்பர்கள் பலர் வந்து கட்டுமானப் பணிகளைப் பார்வையிட்டனர். தங்கள் மகிழ்ச்சியை வெளிப்படுத்தினர். தமிழகத்துக்கு வந்த கட்டுமான துறையில் ஆர்வம் உள்ள வெளிநாட்டு நண்பர்களும் வந்து பார்த்து பாராட்டிச் சென்றனர்.

இது போன்ற இயற்கை நட்பு வீடுகள் தமிழகம் முழுவதும் உருவாக வேண்டும் என்பதற்காக பயிற்சி வகுப்புகளும் நடத்தி வருகிறோம். திண்டிவனத்தில் நாங்கள் நடத்திய பயிற்சி வகுப்பில் 102 பேர் கலந்து கொண்டு, பயிற்சி பெற்றனர்.” என்றார் செல்வி. வெ கிருத்திகா. (7904010879)

-ம. வி. ராஜதுரை

இன்றைக்கு பொதுவாக வீடுகளில் கணவர், மனைவி இருவருமே வேலைக்கு செல்கிறார்கள். இருவரும் வேலைக்குச் சென்றாலும் வீட்டு நிர்வாகம் மற்றும் சமையல் பணிகளை மனைவியே செயல்படுத்த வேண்டி இருக்கிறது. கணவர் தன்னால் முடிந்த வேலைகளைச் செய்து கொடுத்து ஒத்துழைப்பாக செயல் பட்டாலும், முந்தைய காலம் போல வீட்டிலேயே மசாலா சாமான்களை அரைத்து பயன்படுத்த நேரம் இருப்பது இல்லை. இதனால் தங்களுக்குத் தேவையான மசாலா பொடிகள் ரேடிமேட் ஆக கிடைப்பதால் அனைத்தையும் கடைகளிலே வாங்கி சமையல் பணிகளை எளிதாக்கிக் கொள்கிறார்கள். இப்போது பணிக்குப் போகும் மகளிர் மட்டும் என்றில்லாமல் அனைத்து பெண்களுமே சமையலுக்குத் தேவையான மசாலா பொடிகளை கடைகளிலே வாங்கிப் பயன்படுத்திக் கொள்ளும் போக்கு வளர்ந்து விட்டது.

இதனால் மசாலா பொடிகளின் சந்தையும் வேகமாக வளர்ந்து வருகிறது. பல நிறுவனங்களில் மசாலா பொடிகள் கடைகளில் விற்பனை செய்யப்படு கின்றன. காமதேனு மசாலா என்ற பெயரில் தனது மசாலா பொடிகளை சந்தைப் படுத்தி வருகிறார், காமதேனு மசாலா நிர்வாக இயக்குநர், திரு. காலுராம். தனது உற்பத்திப் பொருட்கள் பற்றி அவர் வளர்தொழில் இதழுக்கு பேட்டி அளித்தார். அப்போது அவர் கூறியதாவது,

”என்னுடைய தனிப்பட்ட அனுபவமே இந்த தொழிலுக்கான விதை போட்டது. கடைகளில் பொதுவாக கிடைக்கும் மசாலா பொடிகளை வாங்கி வீட்டில் சமைத்த உணவுகள் எனக்கு ஒத்துக் கொள்ளவில்லை. செரிமானக் கோளாறு கள் ஏற்பட்டன. இதற்கான காரணம் பற்றி சிந்தித்த போதுதான், அவற்றில் வேதிப் பொருட்கள் சேர்மானங்களாக சேர்க்கப்பட்டு இருப்பதை உணர்ந்தேன். அவைதான் வயிற்றுக் கோளாறுகளுக் கான காரணம் என்பதையும் உணர்ந் தேன். நாம் ஏன் ரசாயன சேர்மானங்கள் சேர்க்காத தூய்மையான மசாலா பொடிகளை தயாரித்து சந்தைப்படுத்தக் கூடாது என்று தோன்றியது. இதன் விளைவாக 2016 -ல் காமதேனு மசாலா நிறுவனம் தோன்றியது.

உயர் தர விளைபொருள்களை விவசாயிகளிடமிருந்து நேரடியாகப் பெற்று அவற்றை சுகாதாரமான முறை யில் அரைத்து விற்பனை செய்கிறோம்.

எங்கள் நிறுவனம் தொடங்கிய காலத்தில் புகழ் பெற்ற பெரிய மசாலா நிறுவனங்களும் சில சிறிய நிறு வனங்களும் சந்தையில் இருந்தன. தரமற்ற பொருட்களை கொடுத்த நிறு வனங்கள் காலப்போக்கில் காணாமல் போயின.

பெரும் நிறுவனங்கள் லட்சக் கணக்கில் விளம்பரங்களில் செல வழித்து அதன் மூலம் வாடிக் கையாளர்களை இழுத்தன. இச்சூழ்நிலையில் கடைக் காரர்களிடம் விடாமுயற்சி யுடன் தொடர்ந்து சென்று எங்கள் பொருட்களை கொண்டு சேர்த்தோம்.

முதலில் சிறுசிறு சரங்களாக பொருட்களை வாங்கினார்கள், நுகர்வோரிடம் இருந்து ஆதரவான பதிலும், பொருட்களுக்கான தேவையும் பெருகியதால் விற்பனை அதிகரித்தது. நாங்கள் எங்களுடைய பொருட்களை திணிக்கவில்லை. காமதேனு மசாலா பொருட்கள் மீது வாடிக்கையாளர் களுக்கும் கடைக்காரர்களுக்கும் படிப் படியாக நம்பிக்கை வளர்ந்ததே எங்கள் வளர்ச்சிக்குக் காரணம். முதலில் ஒரு மாதத்திற்கு ரூபாய் 50,000 ஆக இருந்த தமிழக விற்பனை தற்போது ரூபாய் 50 லட்சமாக உயர்ந்து இருக்கிறது.

அடுத்தபடியாக தென் மாநிலங்களுக் கும் எங்கள் பொருட்களை கொண்டு செல்வதற்கான முயற்சியில் இறங்கி இருக்கிறோம். ஆந்திரா போன்ற மாநிலங்களில் காரத் தன்மையை அதிகம் விரும்புவதால் அதற்கேற்ப மசாலா கூட்டுப் பொருட்களை தயாரித்து விற்பனை செய்ய இருக்கிறோம். மாநிலங்களுக்கு ஏற்ற சுவையில் ரசாயன கலப்பு இல்லாத பொருட் களை தயாரித்து வழங்கும் நடவடிக்கையில் இருக்கிறோம்.

இந்தியா முழுவதும் காமதேனு மசாலா பொருட்களை விற்பனை செய்வதற்கான கட்டமைப்பை உருவாக்கும் திட்டம் இருக்கிறது. இது எங்களின் நீண்ட கால திட்டமாகும்.

அரசாங்கத்திடம் இருந்து எந்த ஒரு உதவியையும் எதிர்பார்க் காமல், எங்களு டைய சொந்த நிதியைக் கொண்டே நிறுவனத்தை இயக்கிக் கொண்டு இருக்கி றோம். எங்களுடைய தொழிலுக்கு என்று உள்ள அசோசியேசனில் சேர்வதற்கான முயற்சியிலும் உள்ளோம்.

தமிழ்நாட்டில் இருபது மாவட்டங் களில் பரவலாக வளர்ந்திருக்கிறோம் இவ்வாண்டு இறுதிக்குள் மற்ற மாவட் டங்களிலும் முழுவதுமாக வேரூன்றுவ தற்கு நடவடிக்கை எடுத்து வருகிறோம்.

காமதேனு மசாலாவில் மூன்று பிரிவுகள் உள்ளன.
மசாலா பொருட்கள் பிரிவு; கடுகு, மிளகு, சீரகம் போன்ற பொருட்களின் பிரிவு; மாவுப் பொருட்கள் பிரிவு என வகைப்படுத்தப்பட்டு உள்ளது. தற்போது தமிழகம் முழுவதும் டீலர்கள் நியமிக்கும் பணி நடைபெற்று வருகிறது, போதிய ஆட்கள், சந்தையில் மற்ற பொருட் களை ஜிஎஸ்டி மூலம் விற்பனை செய்து கொண்டிருக்கும் அனுபவம் மற்றும் வாகன வசதி உள்ளவர்களுக்கு மூன்று பிரிவு பொருட்களையும் விற்பனை செய்யும் வாய்ப்பை வழங்குகிறோம்.

மசாலா போன்ற பொருட்களுக்கு இருசக்கர வாகனமே போதுமானது சந்தையில் ஓரிரு ஆண்டுகள் அனுபவம் தேவை. ஜிஎஸ்டிக்கு விண்ணப்பித்து உள்ளவர்களும், ஜிஎஸ்டி தேவைப் படாத பொருட்களை விற்பனை செய்யும் முகவர்களும் எங்களிடம் பொருட்களை பெற்று முகவர்களாகி ஜிஎஸ்டி பெற்று விற்பனை செய்யலாம்.

காமதேனு மசாலா நிறுவனத்தில் சுமார் 80 வகையான பொருட்களை விற்பனை செய்கிறோம் எனவே குறைந்த பட்சம் 50 ஆயிரம் ரூபாய் முதலீடு தேவை.

குறைந்த முதலீட்டில் செய்வதற்கேற்ற வணிக வாய்ப்புகளைத் தேடிக் கொண்டு இருக்கும் இளைஞர்கள் இந்த வாய்ப்பைப் பயன்படுத்தி தொடர்ந்து முன்னேறலாம். நாங்கள் பேருந்து விளம்பரங்கள், எஸ்எம்எஸ் விளம்பரம் மற்றும் பத்திரிக்கை விளம்பரங்கள் மூலம் காமதேனுவின் தரமான பொருட்களை பொதுமக்களிடையே கொண்டு சேர்க்கிறோம்.

தொடக்கத்தில் மூன்று பேர்கள் பணிபுரிந்த எங்கள் நிறுவனத்தில் இப்போது 40க்கும் அதிகமான பணியாளர்கள் பணிபுரிகின்றனர். தரமான பொருட்களை விடாமுயற்சி யுடன் விற்பனை செய்து வெற்றிகரமாக வளர்ந்து வருகிறோம்.” என்றார். (9962974440, 9962974449)

-கா. முரளி

-உலகின் மிகப் பெரிய வெற்றியாளர்கள் தரும் குறிப்புகள்

பொதுவாக உலகின் தொழில்துறையாக இருந்தாலும் வெற்றி பெற்றவர்கள் பெரும்பாலும் பரந்த மனம் கொண்டவர் களாகவே இருக்கிறார்கள். தாங்கள் வளரும்போதே மற்றவர்களும் வளர் வேண்டும் என்ற எண்ணம் கொண்டே செயல்படுகிறார்கள். தங்கள் வாழ்க்கையில் கற்றுக் கொண்டவற்றை அவர்கள் கமுக்கமாக வைப்பது இல்லை. அவற்றை அனைவருக்கும் தெரிவிக்கவே விரும்புகி றார்கள். அப்படி சில பெரிய தொழில் அதிபர்கள் தெரிவித்த பயன்படக் கூடிய கருத்துகள் இங்கே தொகுத்துத் தரப்படுகின்றன.

ஜாக் மா (Jack Ma)

இவர் சீனாவின் மிகப் பெரிய தொழில் அதிபர். அலிபாபா இணையம் வாயிலான விற்பனைப் பேரங்காடியை நிறுவியவர் மற்றும் அதன் தலைவர். சீனாவின் மிகப்பெரிய பணக்காரர் ஆவதற்கு முன்பு அதிக தோல்விகளையும், புறக்கணிப்புகளையும் சந்தித்தவர். அவற்றை எல்லாம் தன் திறமையாலும், தன்னம்பிக்கையாலும், செயல்பாடுகளாலும் வெற்றி கண்டவர். அவர் கூறும் ஆலோசனைகள்: >மற்றவர்களின் புறக்கணிப்பை ஆக்க பூர்வமாக பயன்படுத்துங்கள்.

> உங்கள் கனவை உயிர்ப்புடன் வைத்திருங்கள் (Keep Your Dream Alive).

> ஒவ்வொன்றைப் பற்றியும் குறை கூறிக் கொண்டு இருக்காதீர்கள். அவற்றில் உள்ள வாய்ப்புகளை பாருங்கள்.

> தொலைநோக்குடன் சிந்திக்கப்பட்ட உங்களின் முயற்சி வெற்றி அடையாது, என்று யார் கூறினாலும் ஏற்றுக் கொள்ளா தீர்கள்.

> உங்களை வளர்த்துக் கொள்ள கற்றுக் கொண்டே இருங்கள்.

> செயல்பாடுகளில் ஒரு முனைப் படுத்துல் இருக்கட்டும். கவனத்தை ஒரு முகமாக குவித்து ஆர்வமாக செயல்படுவதே சிறந்த வெற்றிக்கு வழி வகுக்கும். அலைபாய்ந்து கொண்டே இருப்பது வெற்றிக்கு வழி வகுக்காது.

> உங்கள் தொழில் வளர்ச்சிக் கனவின் மீது தீராத பற்று கொண்டிருங்கள்.

> முதலில் வாடிக்கையாளர்கள்; இரண் டாவது ஊழியர்கள்; மூன்றாவதுதான் முதலீட்டாளர்கள் என்று வரிசைப்படுத்தி செயல்படுங்கள்.

> நிறுவனத்தின் மதிப்பை உருவாக்குதல், புதுமைமை புகுத்துதல் போன்றவற்றில் தொடர்ந்து ஆர்வம் செலுத்துங்கள். > உங்கள் நிறுவனத்துக்கான தனிப் பண்பாட்டை உருவாக்குவதிலும் உங்கள் முயற்சி இருக்கட்டும்.

> உங்கள் நிறுவனத்திற்கான பெயரை தேர்ந்து எடுப்பதில் கவனமாக இருங்கள். அது ஒரு அழகான, எவரும் நினைவில் வைத்திருக்கும் வகையிலான நல்ல பெயரை தேர்ந்தெடுங்கள்.

லாரி பேஜ் (Larry Page)

கூகுள் நிறுவனத்தின் இணை நிறுவனர். அதன் தொடக்க நிறுவனமான ஆல்ஃபாபெட் இன்கார்ப்பரேஷன் நிறுவனத்தின் தலைவர். அவர் வெற்றிக்கான வழிகளாக எவற்றைக் கூறுகிறார் என்று பார்க்கலாம்.

> தோல்விகளுக்கு பயப்படாதீர்கள்.

> நீங்கள் செயல்படுத்தும் திட்டங்களை ஒழுங்கு படுத்தி அமையுங்கள். உங்கள் நிறுவனத்தில் எண்ணற்ற திட்டங்கள் இருக்கலாம் அவை எல்லாவற்றையும் ஒழுங்கு படுத்தி கட்டமையுங்கள்.

> உங்கள் கனவு இலக்குகளை பின்பற் றுங்கள் (Follow Your Dreams).

> சிறந்த ஐடியாக்களை வைத்திருங்கள். பணம் அதிகமாக கிடைக்கும் என்பதற்காக உங்களுக்கு போதுமான தெளிவு இல்லாத துறையில் தொழிலை தொடங்காதீர்கள்.

> உங்கள் திட்டத்தை தொலை நோக் குடன் நீண்ட காலத்திற்காக தீட்டுங்கள்.

> சவால்களை ஏற்றுக் கொள்ளுங்கள்.

> ஒரே நிலையில் தங்கி விடாதீர்கள். ”சரியான ஆட்களை” தேர்ந்தெடுத்து பதவியில் அமர்த்தி பொறுப்புகளைக் கொடுத்து நீங்கள் அடுத்த கட்டத்திற்கு செல்லுங்கள்.

> தொழில் துறையில் ஏற்படும் மாற்றங் களை சரியாக பயன்படுத்திக் கொள்ளுங்கள்.

> பெரிய சிக்கல்களைத் தீர்க்க உணர்ச்சி வசப்படாமல் தீர்க்க முயற்சி செய்யுங்கள். ஒருவருக்கு ஏற்படும் சிக்கலுக்கான தீர்வுகள்தான் புதிய தொழில்களுக்கு வழி வகுக்கின்றன. தகவல்கள் கிடைப்பதில் நமக்கு ஏற்பட்ட சிக்கலின் தீர்வுதான் கூகுள்.

முகேஷ் அம்பானி (தலைவர் மற்றும் மேலாண் இயக்குநர், ரிலையன்ஸ் இண்டஸ்ட்ரீஸ்)

> உங்கள் பார்வையை விரிவாக்குங்கள்.

> எதற்கெடுத்தாலும் அஞ்சிக்கொண்டே இருக்காதீர்கள். உங்களை வலுவானவராக நினைத்து செயல்படுங்கள். இடையில் வரும் சிக்கல்களை எப்படி எதிர்கொள்ள வேண்டுமோ அப்படி எதிர்கொள்ளுங்கள்.

> இலக்குகள் குறித்து சிந்தியுங்கள். இவை தொடர்பானவற்றைத்தான் ‘கனவு காணுங்கள்’ என்று கூறுகிறார்கள்.

> மன உறுதியுடைய குழுக்களை, வணிக வலைப்பின்னல்களை உருவாக்குங்கள்.

> புதிய முயற்சிகள் என்றில் நிச்சயம் ஒருபுறம் இடர் இருக்கவே செய்யும். இடர்களைத் தாண்டி சிந்தித்து இத்தகைய ரிஸ்க் எடுப்பதில் இருந்து மிகச் சிறந்த பாடங்களை கற்றுக் கொள்ளலாம்.

> வெற்றியின் மீது எப்போதும் விருப்பம் கொண்டிருங்கள்.

> உறுதியான உங்கள் உள்ளுணர்வுகளை நம்புங்கள்.

> நீங்கள் செய்த செயல்கள்தான் உங்க ளைப் பற்றி பேசும்.

> எல்லோரையும் நம்புங்கள், ஆனால் யாரையும் சார்ந்து இருக்காதீர்கள்.

ஜெஃப் பெசாஸ் (Jeff Bezos) அமேசான்.காம் நிறுவனர்

> நீங்கள் எடுத்த முடிவுகள் ஒரு வேளை தோல்வியைத் தந்தாலும் அதற்காக வருத்தப் படாதீர்கள். அடுத்த என்ன செய்வது என்பது குறித்து சிந்தியுங்கள்.

> நீங்கள் செய்ய நினைப்பதை துணிந்து செய்யுங்கள் (Take a Risk).

> உங்களுக்கு பேரார்வம் (Passion) இருக் கும் துறைகளிலேயே செயல்படுங்கள்.

> வாடிக்கையாளர்கள் மீது கவனம் செலுத்துங்கள்.

> நிறுவனத்திற்கு நல்ல பெயரை தேர்ந்:து எடுங்கள்.

> வாடிக்கையாளர்களுக்கு சிறந்த அனுப வத்தை உருவாக்குங்குகள். அவர்களுக்கு அதிக மதிப்பு கொடுங்கள்.

> மார்க்கெட்டிங்குக்கு செலவிடுவதைப் போலவே, வாடிக்கையாளர்களின் சேவை களுக்கும் அதிகம் செலவிடுங்கள்.

> உங்கள் நிறுவனத்துக்கென்று தனி பண் பாட்டை உருவாக்குங்கள்.

> சில நேரங்களில் மதிப்பு மிக்க பொருட்களை குறைவான விலையில் விற்பனை செய்யுங்கள். அது அதிக அளவிலான வாடிக்கையாளர்கள் உங்கள் பொருட்களை பயன்படுத்த வாய்ப்பை ஏற்படுத்தும்.

> உங்கள் அறிவையும், உள்ளுணர்வையும் சரியான விகிதத்தில் பயன்படுத்துங்கள்.

ராபர்ட் கியோசாகி Robert Kiyosaki

இவர் அமெரிக்க தொழிலதிபர். பங்கு முதலீட்டாளர். வாழ்வியல் எழுத்தாளர். கல்வியாளர். தன்னம்பிக்கை பயிற்சியாளர்.

> உங்களைச் சுற்றி உங்களைப் போன்ற போல் எண்ணம் (Like minded) கொண்ட ஆதரவான மனநிலை கொண்ட மனிதர் களை வைத்திருங்கள்.

> கடினமான தருணங்கள் உங்களுக்கு புதிய வாய்ப்புகளை (Opportunities) உருவாக்கும்.

> நீங்கள் சேமிப்பதை விட கூடுதலாக முதலீடு செய்யுங்கள். சேமிப்பில் இருந்து வரும் வட்டி போன்ற லாபத்தை விட முதலீடே அதிக லாபத்தை அடைய வழி வகுக்கும்.

> எப்போதும் ஒரு பொருளை வாங்கும் முன், இந்த பொருள் இப்போது தேவைதானா? என்று கேளுங்கள். அந்த கேள்விக்கான பதில், கண்டிப்பாக தேவைதான் என்று இருந்தால் மட்டும் வாங்குங்கள்.

> உங்கள் வாழ்க்கையை மிக எளிமையாக்குங்கள்.

எலன் மஸ்க் Elon Musk

இவர் டெஸ்லா மோட்டார்சின் இணை நிறுவனர். ஸபேஸ் எக்ஸ் நிறுவனத்தின் தலைமை அதிகாரி. சோலார் சிட்டியின் இணைநிறுவனர் மற்றும் தலைவர். ஓப்பன் ஏஐ-யின் துணைத் தலைவர். பே பால் ஆஃப் கான்ஃபினிட்டி உடன் இணைக்கப்பட்ட எக்ஸ் டாட் காம் நிறுவனர்.

> நிறுவனத்திற்கு சிறந்த, திறமையான மனிதர்களை தேர்ந்தெடுங்கள்.

நீங்கள் செய்வதை விரும்பிச் செய்யுங்கள்.

>தோல்வியைக் கூட உங்களுக்கு விருப்பமானதாக நினைக்கத் தொடங்குங்கள். தோல்வி அடைவதில் உங்களுக்கு விருப்பம் இல்லை என்றால் புதுமையாக எதையும் செய்ய இயலாது.

>நீங்கள் இளைஞராக இருக்கும் காலத்திலேயே துணிச்சலுடன் செயல்படும் மனப்பக்குவத்தைப் பெறுங்கள்.

நீங்கள் செய்வதை, ஏதேனும் சிக்கல் வரும்போது இடையில் விட்டு விடாதீர்கள். தொடர்ந்து வெற்றி பெற உழையுங்கள்.

>வளர்ந்துவரும் துறையில் வாய்ப்புகளை தேடுங்கள்.

>நீங்கள்தான் செய்தாக வேண்டும் என்ற உங்கள் முதன்மையான பணிகள் மீது கவனம் செலுத்துங்கள்.

>உங்களுக்கு அப்பால் உள்ள சிக்கல்களையும் தீர்க்க முயற்சி செய்யுங்கள்.

>விழித்திருக்கும் ஒவ்வொரு மணி நேரமும் நீங்கள் பணி புரிவதற்கான நேரம்தான் என்பதை எப்போதும் மறக்காதீர்கள்.

ஆலன் சுகர் Alan Sugar

மின்னணு பொருட்கள் உற்பத்தி நிறுவன தலைவர். தொழில் மற்றும் அரசியல் ஆலோசகர்.

>பின்னடைவுகளுக்கும் தயாராக இருங்கள். உங்கள் திட்டத்தில் நம்பிக்கை, நோக்கத்தில் உறுதி, பேரார்வம் கொண்டு இயங்குங்கள்.

>உங்களுக்கு அனுபவம் இருக்கும் தொழிலைத் தொடங்குங்கள். இந்த அனுபவம் ஒரு நிறுவனத்தில் நீங்கள் வேலை பார்த்ததின் மூலம் பெற்றதாக இருக்கலாம் அல்லது உங்களது பொழுது போக்கின் மூலம் கிடைத்த அனுபவமாக இருக்கலாம். சிலர் தெரியாத தொழிலையும் தொடங்கி வெற்றி பெற்று இருக்கிறார்கள் என்பதையும் மறக்க வேண்டாம். இவர்கள் அந்த தொழிலைத் தொடங்கிய பின் தங்கள் செலவில் அனுபவம் பெற்றவர் களாக இருப்பார்கள்.

>உங்கள் தொழில் சார்ந்த வல்லுநர் களிடம் ஆலோசனை கேளுங்கள். நண்பர்கள் என்பதற்காகவோ, உறவினர்கள் என்பதற்காகவோ அவர்களுக்கு சற்றும் தொடர்பு இல்லாத தொழில் சார்ந்தவை குறித்து ஆலோசனை கேட்காதீர்கள். நண்பர்களும், உறவினர்களும் உங்களுக்கு என்ன சொன்னால் பிடிக்குமோ அதை மட்டுமே சொல்வார்கள். உண்மையான கருத்துகளை சொல்லத் தயங்குவார்கள்.

>ஒவ்வொரு அடியாக எடுத்து வையுங்கள். நீங்கள் நடக்கப் பழகும் முன் ஓட முயற்சிக்க வேண்டாம். முதலில் சிறியதாக தொடங்குகள். ஒன்றில் வெற்றி பெற்ற பின் அடுத்த முயற்சியைத் தொடங்குங்கள்.

>உங்கள் தொழிலுக்கான சந்தையை முழுவதும் ஆராய்ந்து பாருங்கள். சந்தையில் உங்கள் தொழிலை ஒத்த நிறுவனங்கள் ஏற்கனவே இருக்கும் என்றால், வாடிக்கையாளர்கள் உங்களிடம் ஏன் வாங்க வேண்டும்? அவர்களை எப்படி வரவழைக்க வேண்டும் என்று ஆராயுங்கள்.

>முறையான தொழில் திட்டத்தை உருவாக்குங்கள். இந்த தொழில் திட்டம் நீங்கள் எந்த திசையில் செல்ல வேண்டும் என்பதை காட்டும் மற்றும் சந்தையை புரிந்து கொள்வதற்கு உதவும். மற்றவர்கள் செய்ய வேண்டிய செயல்களை அவர்களுக்கு ஒதுக்கீடு செய்து நிர்வகிக்க இந்த திட்டமிடல் உதவும்.

>உங்களுக்கென்று தனித்துவமான செயல்முறையைக் கண்டு பிடியுங்கள். அது புதியதாக இருக்க வேண்டும் என்பது இல்லை. பல செயல்முறைகள் முன்பே செய்தவைதான் என்றாலும் செய்யும் விதத்தை சிறந்ததாக மாற்றுங்கள்.

>வங்கிகள் உங்களுக்கு பணம் கொடுப் பார்கள் என்று எதிர்பார்க்க வேண்டாம். தொழிலில் முதலில் உங்களிடம் இருக்கும் பணத்தை போடுங்கள், அது கொஞ்சமாக இருந்தாலும் பரவாக இல்லை. எந்த தொழிலையும் குறைந்த முதலீட்டிலும் தொடங்கி பின்னர் பெரிதாக வளர முடியும். தொழிலில் நம்பகத் தன்மையுடன் இருப்பதை வங்கிகளுக்கு உணர்த்தினால் அவர்கள் தயக்கம் நீங்கி கடன் கொடுக்க முன்வருவார்கள்.

>இயல்பாக இருங்கள். உங்களுக்கு தோன்றிய ஐடியா சிறந்தது என்று நீங்கள் நினைக்கலாம். ஆனால் அந்த ஐடியா யாருக்காவது தேவைப்படுமா, செலவு குறைந்ததா, நடைமுறையில் செயல்படுத்த முடியுமா? என்பதை விருப்பு – வெறுப்பு இல்லாமல் சிந்தியுங்கள்.

மார்க் கியூபன்
Mark Cuban

அமெரிக்கத் தொழலதிபர், பங்கு முதலீட்டாளர். எச்டி டிவி கேபிள் நெட்ஒர்க் சேர்மன். டல்லாஸ் மாவெரிக்ஸ், லேண்ட்மார்க் தியேட்டர்கள், மேக்னோலியா பிக்சர்ஸ் உரிமையாளர்.

> உங்கள் திறமைகளை தெரிந்து வைத்துக் கொள்ளுங்கள். அந்த திறமைகளை இன்னும் உயர்த்திக் கொள்வதற்கு தொடர்ந்து முயற்சி செய்யுங்கள்.

> நீங்கள் தொடங்க இருக்கும் தொழில் மீது உங்களுக்கு பேரார்வம் இல்லை என்றாலும் இல்லையென்றாலும், அது உங்கள் மனதை ஆட்டிப்படைக்கவில்லை என்றாலும் அந்த தொழிலை தொடங்காதீர்கள். நாம் செய்ய இருக்கும் ஒன்றின் மீது பேரார்வம் இருந்தால் மட்டுமே வெற்றி பெற முடியும்.

> உங்கள் தொழில் எதிர்மறையாக செல்லும்போது, அதில் இருந்து மீட்டு எடுக்க இந்த பேரார்வம் மட்டுமே கை கொடுக்கும்.

> உங்கள் நிறுவனத்தில் வேலை செய்ய விரும்புபவர்களையே வேலைக்கு தேர்ந்து எடுங்கள். ஆட்களைத் தேர்ந்து எடுக்கும்போது இந்த விஷயத்தில் எச்சரிக்கையாக இருங்கள். குறிப்பாக முதன்மையான பணிகளில் ஆர்வம் இல்லாதவர்களைப் போட்டால் நீங்கள் எதிர்பார்க்கும் வகையில் அவர்கள் செயல்பாடுகள் அமையாது.

> உங்கள் நிறுவனம் எப்படி வருமானம் ஈட்டப் போகிறது, எப்படி விற்பனை செய்யப் போகிறீர்கள் என்பதில் ஒரு தெளிவு இருக்க வேண்டும். இது தொடர்பாக உங்களுக்கு வழி காட்ட ஆடிட்டர்கள் உதவக் கூடும்.

> நிறுவனத்தில் வேலை பார்ப்பது பணியாளர்களுக்கு பிடிக்குமானால், நேரத்தை எப்படி பயன் உள்ளதாய் செலவழிப்பது என்பதை அவர்களே கண்டு பிடித்து விடுவார்கள். விருப்பம் இல்லாத ஊழியர்கள் அலுவலக நேரத்தை வீணாக்கி விடுவார்கள்.

> அலுவலகத்தை தடுப்புகள் இல்லாமல் திறந்த அலுவலகமாக அமையுங்கள். எங்கிருந்து பார்த்தாலும் முழு அலுவல கமும், பணி புரிவோரும் அனைவரின் கண்களிலும் படுமாறு இருக்கட்டும். அப்போதுதான் ஒவ்வொரு ஊழியர்க ளுக்கும் என்ன நடக்கிறது என்பது தெரிய வரும். இது அவர்களின் ஆற்றலை அதிகரிக்கும்.

> உங்களுக்குத் தெரிந்த தொழில் நுட்பத்தைப் பயன்படுத்துங்கள். அதைப் போலவே உங்கள் ஊழியர்களுக்கு தெரிந்த தொழில்நுட்பங்கள் உங்கள் நிறுவனத்துக்கு பயன்படுமாறு அமையும் என்றால் அவற்றையும் பயன்படுத்த அனுமதியுங்கள்.

> நிறுவன கட்டமைப்புகளை உருவாக் குங்கள். யார், யாரிடம் தங்கள் பணிகள் தொடர்பான அறிக்கைகளை வழங்க வேண்டும் என்பதை தெளிவாக முடிவு செய்து அறிவியுங்கள்.

> தேவை அற்ற ஆடம்பரமான பொருட் களை வாங்காதீர்கள்.

> உங்கள் வாடிக்கையாளர்களை தொடர்பு கொள்வதற்கு பொது தொடர்பு நிறுவனத்தை (பிபீஓ) பயன்படுத்தாதீர்கள். உங்கள் நிறுவனத்தின் மூலம் நீங்களே அவர்களை தொடர்பு கொள்ளுங்கள். அது அவர்களுடனான நெருக்கத்தை அதிக ரிக்கும் என்பதோடு உடனுக்குடன் அவர்க ளுக்கான சேவைகளை செய்து கொடுக்கவும் உதவும்.

கெம்மன்ஸ் வில்சன்
Kemmons Wilson

இவர் ஹாலிடே இன் ஓட்டல்களின் நிறுவனர்.

>தினமும் அரை நாள் கடுமையாக உழையுங்கள். ஒரு நாளுக்கு இருபத்து நான்கு மணி நேரம் இருக்கிறது. இதில் பன்னிரண்டு மணி நேரம் .. அதாவது அரை நாள், நாம் முன்னேறுவதற்காக முழு மூச்சுடன் பயன்படுத்தினால் வெற்றி வசப்படும்.

>உழைப்புதான் எல்லா வாய்ப்புகளை யும் திறக்கும் சாவி.

> உங்களிடம் எவ்வளவு இருக்கிறது என்பது மகிழ்ச்சியை உருவாக்காது. உங்களிடம் இருப்பதை எப்படி பயன் படுத்துகிறீர்கள் என்பதைப் பொறுத்துதான் மகிழ்ச்சி அதிகரிக்கும்.

>ஒரு மனிதனின் வெற்றி அல்லது தோல்விக்கு அவரின் அறிவுத் திறனை விட மனப்பாங்கே (ஆட்டிட்யூட்) முதன்மையான பங்காற்றுகிறது.

> வெற்றியடைய துணிச்சலாய் செயல் களைச் செய்ய வேண்டும்.

> அதிகமாக உழைத்தால் அதிக பயன் அடையலாம். உழைக்கும் அளவை விட அதிகமாக பொருளீட்ட இயலாது.

> எதையும் நாளை என்று தள்ளிப் போடக்கூடாது.

> கவலைப்படாதீர்கள். கடந்த காலத்தை உங்களால் மாற்ற முடியாது. எதிர்காலத்தை பற்றி கவலைப்பட்டால் அது உங்கள் நிகழ்கால வளர்ச்சிக்கு எதிராக அமைந்து விடும். கவலையால் எந்த நன்மையையும் விளையாது.

> வெற்றி ஏணியில் ஒவ்வொரு படியாகத் தான் ஏற வேண்டும்.

>வாய்ப்புகளை ஏற்றுக் கொள்ள பயப் படாதீர்கள்.

ஆர். ஜி. சந்திரமோகன்

இவர் இந்தியாவின் மிகப் பெரிய பால் பொருட்கள் நிறுவனமான ஹட்சன் அக்ரோ ப்ராடக்ட்ஸ் லிமிடெட் தலைவர் மற்றும் மேலாண் இயக்குநர். அருண் ஐஸ் கிரீம், ஐபாகோ ஐஸ் கிரீம், ஆரோக்யா பால், கோமாதா பால் ஆகியவை இவர்களின் முதன்மையான தயாரிப்புகள்.

> பிசினசில் இருப்பவர்கள் எடுத்த எடுப்பிலேயே பாதுகாப்பு என்ற பெயரில் வீடு, மனை என்று பணத்தை முடக்கக் கூடாது. அந்த பணத்தை வைத்து தொழில் செய்தால் நாலு பேருக்கு வேலையும் கொடுக்கலாம் நாமும் முன்னேறலாம்.

>நல்ல தொழில் ஆலோசகர்களை நம் முடைய வட்டத்தில் வைத்திருக்க வேண்டும்.

>குறிப்பிட்ட தொழில் தொடர்பான புதிய செய்திகளை, தொழில் நுட்பங்களை அறிந்து வைத்து இருக்க வேண்டும்.

> ஒரு தொழிலிலும் ஒரு புதிய நுட்பத்தைப் பயன்படுத்துவது, தரத்தை உயர்த்தும் என்றால் அதனை பயன்படுத்த தயங்கக் கூடாது. அதற்கேற்ற புதிய எந்திரங்களை வாங்கி நிறுவி விட வேண்டும்.

>காலத்திற்கேற்ற உத்திகளை வடிவ மைத்து பயன்படுத்த வேண்டும்.

சாம் வால்டன்
Sam Walton

அமெரிக்க தொழிலதிபர். வால்மார்ட் நிறுவனர்.

> தீர்க்க முடியாத சிக்கல் என்று எதையும் நினைக்க வேண்டியது இல்லை. மேல்பார்வைக்குத் தீவிரமாகத் தோன்றுகிற சாவால்களைக் கூட துணிச்சலுடன் எதிர்கொள்ளுங்கள். வென்றால் மகிழ்ச்சி; தோல்வி அடைந்தால் அனுபவம். இரண்டுமே விலை மதிக்க முடியாத சொத்துக்கள்!

> வெற்றி என்பது எல்லோருக்கும் சொந்தமானது. சரியான வாய்ப்பும், ஊக்கமும் தரப்பட்டால், சாதாரண மனிதர்களால் கூட, பெரிய வெற்றிகளை பெறமுடியும்.

> ஒரு நல்ல சிந்தனையை மீண்டும் மீண்டும் உரசிப் பார்த்து, அது சரியாக வரும் என்ற முடிவுக்கு வந்து விட்டால் உடனே செயல்படுத்துங்கள்.

> நாம் நம்முடைய பழைய வெற்றிகளில் மனநிறைவு அடைந்து விட்டால் நாம் அங்கேயே தேங்கி நின்று விடுவோம். அதை மறந்து விட்டு, அடுத்து என்ன என்கிற ஆர்வத்துடன் வாழ்க்கையை அணுகுவதே நம்மை மேலும் உற்சாகம் உள்ளவர் களாகவும், புதிய வெற்றிகளை அடைபவர் களாகவும் செய்யும்.

> தனிப்பட்ட முறையிலும், தொழிலிலும் சிக்கனம் என்பது முதன்மையானது. நாம் சேமிக்கிற ஒவ்வொரு துளியும், தவிர்க்கிற ஒவ்வொரு தேவையற்ற செலவும் நமது லாபத்தை அதிகரிக்கும்.

> பணமும், வெற்றியும் நமக்கு கிடைக் கும் போது, அதோடு சேர்ந்து வருவது மற்ற சிலரின் பொறாமை. நம்மைப்போல் வெற்றியடைய முடியாதவர்கள், அந்த இயலாமையில் நம்மைப் பற்றி பல விதமாக பேசுவார்கள். நமது முன்னேற்றத்திற்கு தடைபோட முயல்வார்கள். அவற்றை எல்லாம் பொருட்படுத்தாமல், நமது வெற்றிப் பயணத்தை தொடர வேண்டும்.

> வணிகத் துறையில் பெரியதாக வெற்றி பெற வேண்டுமென்றால், நாம் நம்முடைய லாபத்துக்காக மட்டும் உழைக்கக் கூடாது. நமது வாடிக்கையாளர்களுடைய லாபத்துக் காகவும் உழைக்க வேண்டும்.

டோனால்ட் டிரம்ப்
(Donald Trump)

அமெரிக்க தொழிலதிபர். எழுத்தாளர். தலைவர், டிரம்ப் ஆர்கனைசேஜன். அமெரிக்க குடியரசுத் தலைவர்.

>நீங்கள் பணத்திற்காக மட்டும் என்று உங்கள் வேலையை செய்ய வேண்டாம்.

>தவறுகளில் இருந்து பாடம் கற்றுக் கொள்ளுங்கள். ஒரு போதும் உங்கள் தவறுகள் உங்களை கீழே செல்ல விடாமல் பார்த்துக் கொள்ளுங்கள்.

> குறிக்கோளை உயர்வாக வையுங்கள்.

>ஒரு போதும் நீங்கள் செய்யும் செயலில் இருந்து பின்வாங்காதீர்கள்.

> உங்கள் துறை சார்ந்த கூடுதலான செய்திகளை அறிந்து வைத்து இருங்கள்.

> உங்களுக்கு விருப்பமான செயலில் சிக்கல்கள் இருந்தாலும் அதிலேயே கவனத்தை செலுத்துங்கள்.

> திறமையான ஊழியர்கள், குழுக்களை கொண்டிருங்கள்.

தொகுப்பு: சந்தோஷ்