மின் பணியாளர்களின் தேவை அதிகரித்து வரும் காலம் இது. எல்லா அலுவலகங்களுக்கும், வீடுகளுக்கும் அவசரத் தேவைக்கு கைகொடுப்பவர்கள் இவர்கள்தான். இந்த துறையில் படித்தவர்களும் வெற்றி பெறுகிறார்கள். கல்வி நிறுவனங்களில் படிக்காமல், எலெக்ட்ரீஷியன் ஒருவரிடம் உதவியாளராக இருந்து கற்றுக் கொண்டு தொழில் செய்பவர்களும் இருக்கிறார்கள். திரு. ஜி. கோபி, குன்றத்தூரில் ஜிஎஸ் எலெக்ட்ரிகல் என்ற பெயரில் மின்சாதனங்கள் விற்பனையகம் ஒன்றை நடத்தி வருவதோடு வீடுகள், அலுவலகங்களுக்கான மின் பணிகளையும் செய்து கொடுக்கிறார். இவருடைய தொழில் பற்றி இவரிடம் கேட்ட போது,
”எனக்கு சிறு வயதில் இருந்தே எலெக்ட்ரிகல் வேலைகள் மீது ஆர்வம் இருந்தது.

பல வகையான மின் விளக்குகளைப் பார்த்து வியப்பேன். பன்னிரெண்டாம் வகுப்பை முடித்த உடன் எலெக்ட்ரிகல் மற்றும் எலெக்டரானிக்ஸ் டிப்ளமா படிப்பில் சேர்ந்தேன். அந்த படிப்பில் முதல் ஆறு மாதங்கள் மின்னியல் பற்றியும், அடுத்த ஆறு மாதங்கள் மின்னணுவியல் பற்றியும் கற்றுக் கொடுத்தார்கள்.

பின்னர் அனுபவம் பெற்ற எலெக்ட்ரிசிட்டி போர்டு லைசன்ஸ் ஹோல்டர் (Eb Licence Holder) ஒருவரிடம் ஐந்து ஆண்டுகள் பணிபுரிந்தேன். சம்பளம் குறைவாக இருந்தாலும் வேலைகளைக் கற்றுக் கொண்டேன். அதன் பிறகு நானே சொந்தமாக மின் பணிகளை செய்து கொடுக்கத் தொடங்கினேன். வாடிக்கையாளர்கள் அழைக்கும் நேரத்தில் உடனுக்குடன் சென்று பணிகளை முடித்துக் கொடுத்து நியாயமான கட்டணங்களைப் பெறுவேன். இதனால் என்னுடைய வாடிக்கையாளர்களின் எண்ணிக்கை படிப்படியாக உயர்ந்தது.

மின் பணிகளுக்கான மின் பொருட்களை வேறு கடைகளில் வாங்கித்தான் பணிகளைச் செய்து கொண்டு இருந்தேன். கையில் கொஞ்சம் சேமிப்பு சேர்ந்த உடன் நாமே ஒரு மின்பொருட்கள் விற்பனையகம் நடத்தலாம் என்று முடிவு செய்து ஒரு கடையையும் தொடங்கினேன். மொத்த விலைக்கு பொருட்களை வாங்குவதால் விலை குறைவாக இருக்கும். இதன் வாயிலாகவும் என் லாபம் அதிகரிக்கிறது. இந்த தொழில் எனக்கு மனநிறைவையும், மகிழ்ச்சியையும் தருகிறது.

இந்தத் தொழிலைப் பொருத்த வரையில் எப்போதும் வேலை இருந்துக் கொண்டே இருக்கிறது. எந்த வேலை எடுத்தாலும் நல்ல லாபம் கிடைக்கும். ஆனால், இரவு பகல் பாராமல் உழைக்க வேண்டும். நிறைய விசிட்டிங் கார்டுகளை அச்சடித்து வைத்திருக்கிறேன். சந்திப்பவர்கள் அனைவரிடமும் என் விசிட்டிங் கார்டை கொடுப்பேன். இந்த பழக்கம் என் தொழில் வளர்ச்சிக்கு குறிப்பிட்ட அளவுக்கு உதவியது.

என்னிடம் இருவர் பணிபுரிகிறார்கள். எனக்கு இந்தத் தொழிலில் பதினைந்து ஆண்டுகள் அனுபவம் இருக்கிறது. எனக்கு பிளம்பர் வேலைகளும் தெரியும். நான் எலக்ட்ரீஷியன் வேலைகளை கற்றுக் கொள்ளும் போதே பிளம்பர் வேலைகளையும் சேர்த்துக் கற்றுக் கொண்டேன். ஆகவே வாய்ப்பு கிடைக்கும் போது பிளம்பர் வேலைகளையும் செய்து கொடுக்கிறேன். பிளம்பர் தொழிலில் கூடுதாலாக லாபம் கிடைக்கும். சில இடங்களில் மின்பணி, பிளம்பிங் என்று இரண்டையும் சேர்த்துச் செய்யும் வாய்ப்புகளும் கிடைக்கும்.

பிஇ படித்தவர்கள் இந்தத் தொழிலில் அதிகம் ஈடுபட்டு வேலைகளைச் செய்ய மாட்டார்கள். அவர்கள் நேரடியாக எதாவது தொழிற்சாலையில் சூப்பர்வைசர் பணிக்கு சென்று விடுவார்கள். அதனால் படித்து விட்டு வருபவருக்கும், எங்களுக்கும் எந்த வித போட்டியும் இருக்காது. நாங்கள் பல இடங்களில் வேலை செய்து கற்றுக் கொண்டதால் எங்கள் அளவிற்கு அவர்களால் ஈடுகொடுக்க முடியாது. அவர்களுக்கு எங்கள் அளவிற்கு அனுபவம் இருக்காது.

வெற்றி என்பது நாம் கற்றுக் கொள்வதிலும், கவுரவம் பார்க்காமல் வேலைகளைச் செய்வதிலும் தான் இருக்கிறது என்று கருதுகிறேன். மேற்கண்ட பணிகளுடன் எனக்கு 300 அடி வரை மோட்டார் மாட்டத் தெரியும்; மெயின் போர்ட் அசெம்பிள் (Main Board Assemble) செய்ய தெரியும், ஈபி பாக்ஸ் லைன் (Eb Box Line) போட்டு ஒவ்வொரு அறைக்கு ஏற்ப பிரித்துக் கொடுக்கத் தெரியும், லைட், ஃபேன், மிக்சி மற்றும் க்ரைண்டர் போன்றவற்றிற்கு ஏஎல்எம்ஸ் (ALMS) மற்றும் எம்சிபி (MCB) போட்டு பிரிக்கத் தெரியும். அதனால்தான் என்னால் இந்தத் தோழிலில் சிறப்பாகவும் செயல்பட முடிகிறது, அதிக அளவில் லாபமும் பார்க்க முடிகிறது.” என்றார், திரு. கோபி.

-ச. சங்கீதா

சேவைத் தொழில் செய்து வருமானம் ஈட்டுவதற்கு பல வாய்ப்புகள் இன்று உண்டு. குறிப்பாக காப்பீட்டு முகவர்களுக்கு இன்று மேலும் பல வாய்ப்புகள் உருவாகி உள்ளன.
ஆயுள் காப்பீட்டு முகவர்களுக்கு உள்ள வாய்ப்புகள் பற்றி ஆதித்ய பிர்லா சன்லைஃப் ஆயுள் காப்பீட்டு நிறுவனத்தில் விற்பனைப் பிரிவு குழு மேலாளராக இருக்கும் திரு. எல்லையா இது பற்றிக் கூறும்போது,
”ஒரு வாடிக்கையாளருக்கு ஆயுள் காப்பீடு, மருத்துவ காப்பீடு, மியூச்சுவல் பண்ட் முதலீடு தொடர்பான பணிகளுக்கு அதற்கான முகவர்களை தனித்தனியே நாடி செல்வார்கள். ஆனால் ஆயுள் காப்பீட்டு முகவர் ஒருவரே, இவை அனைத்தையும் விற்பனை செய்து வருமானம் பெறலாம். அதற்கான வாய்ப்புகள் இன்று உண்டு.
அண்மையில் மருத்துவ காப்பீடு பற்றி மக்களுக்கு விழிப்புணர்வு ஏற்பட்டு உள்ளது. இதற்கான முகவர் தனியாக இருக்கிறார் என்றாலும், ஆயுள் காப்பீட்டு முகவரும் இதனை விற்பனை செய்யலாம்.

முகவர்கள் முழு நேரமும் செயல்படலாம், அல்லது பகுதி நேரமும் பணி புரியலாம், எந்த அளவுக்கு வாடிக்கையாளர்களை நோக்கி செல்கிறோமோ, அந்த அளவுக்கு பயன் தரும். இவர்களுக்கு தேவையான பயிற்சிகளை அவர்கள் சேரும் நிறுவனங்களே வழங்கும். தேவைப்படும் பொழுது நிறுவன மேலாளர், முகவர்களுடன் வந்து வாடிக்கையாளர்களை சந்திப்பார்.

இன்று ஆயுள் காப்பீட்டு முகவர்கள் ஐஆர்டிஏ (IRDA) தேர்வு எழுதி ஆயுள் காப்பீடு விற்பனை செய்கிறார்கள். அதே போல் இவர்கள் ஏஎம்எஃப்ஐ (AMFI) தேர்வு எழுதி மியூச்சுவல் நிதி (Mutual Fund) முகவராகவும் செயல்படலாம்.

இவை தவிர நிறுவன பத்திரங்கள் (Company Bonds), கடன் பத்திரங்கள் (Debentures) போன்றவற்றைக் கூட விற்பனை செய்ய முடியும்.
காப்பீடு விற்பனை செய்த அடுத்த ஆண்டு நீங்கள் வாடிக்கையாளர்களுக்கு பணம் செலுத்தும் நாளை நினைவுபடுத்தினால், வாடிக்கையார் உங்கள் மேல் மிகுந்த நம்பிக்கை வைப்பார். தொடர்ந்து அவர் மேற்கொள்ளும் காப்பீடுகளுக்கு உங்களையே தேர்வு செய்வார்.

காப்பீடு விற்பது ஒரு குடும்பத்தை பொருளாதார ரீதியில் பலப்படுத்துவதற்கு நிகராகும்.” என்றார், திரு. எல்லையா.

– ஜா. செழியன்

.

பெரிய அளவு மூலதனம் இல்லாமல், பெண்கள் வீட்டில் இருந்தவாறே சம்பாதிக்க கூடை பின்னுவது, தையல் ஆகியவை உதவும் என்கிறார், சிதம்பரம் அருகே உள்ள கோணயாம் பட்டினம் என்னும் கிராமத்தைச் சேர்ந்த திருமதி. ஜமுனா ராணி. இவரிடம் அது எப்படி என்று கேட்டபோது,
”நான் பத்து ஆண்டுகளாக வீட்டில் இருந்தே தையல் மற்றும் கூடை பின்னுவது ஆகியவற்றை செய்து வருகிறேன். நான் வாழ்வது ஒரு சிறிய கிராமமாக இருப்பதால் தையல் பயிற்சியில் சேர்ந்து கற்றுக் கொண்டு வீட்டில் இருந்தவாறே தையல் தொழில் செய்து வருகிறேன். சுடிதார், ஜாக்கெட் போன்றவற்றைத தைத்துக் கொடுப்பதால் ஓரளவுக்கு வருமானம் வரும். நகரங்களில் வருவதைப் போன்ற வருமானத்தை கிராமங்களில் எதிர்பார்க்க முடியாது.

எங்கள் அடிப்படை செலவுக்குத் தேவையான வருமானம் கிடைக்கிறது. இது தவிர யாராவது பிளாஸ்டிக் ஒயர் கூடை பின்னித் தருவேன். ஆனால் கூடை பின்னுவதை விட தையல் தொழிலில் தான் எனக்கு வருமானம் அதிமாக கிடைகிறது.
ஒரு கூடையின் உதிரிப் பொருட்களை 50 ரூபாய்க்கு என்று வாங்கி கூடையைப் பின்னி 150 ரூபாய் என்று விற்பனை செய்கிறேன். தையல் தொழிலில் ஒரு நாளைக்கு சுமார் ஐநூறு ரூபாய் அளவுக்குக் கிடைக்கும். நாங்கள் சொந்த வீட்டில் இருப்பதால் ஓரளவுக்கு சமாளிக்க முடிகிறது. வாடகை வீட்டில் இருந்தால் சமாளிப்பது சிரமமாக இருக்கும்.
எனக்கு இந்தத் தொழிலகள் இருப்பதால் நேரம் போவதே தெரியாது. நேரத்தை வீணாக்காமல் என்னால் முடிந்த வேலைகளைச் செய்து பொருளீட்டுவது எனக்கு மகிழ்ச்சியைத் தருகிறது” என்கிறார், இவர்.

– ரா. காயத்ரி

நல்ல பெயின்டர்களுக்கு எப்போதும் தேவை இருந்து கொண்டே இருக்கிறது. இவர்கள் நாள் ஊதியத்துக்கும் பணி புரிகிறார்கள். ஒப்பந்த அடிப்படையிலும் பணி புரிகிறார்கள். பெயின்டர்களுக்கான தொழில் வாய்ப்பு எப்படி இருக்கிறது? சென்னை, போரூரில் பெயின்டர் ஆக இருக்கும் திரு. சையது இடம் கேட்ட போது, அவர் தன் தொழில் பற்றியும் பெயின்டிங் தொடர்பான சில நுட்பங்களையும் பகிர்ந்து கொண்டார்.
”நான் சொந்தமாக தொழில் செய்யத் தொடங்கும் முன் ஒரு தனியார் ஒப்பந்த நிறுவனத்தில் பதிமூன்று ஆண்டுகள் பணி புரிந்தேன். தனியார் நிறுவனத்தில் நாள்தோறும் வேலை இருக்கும். தனியாகச் செய்யும் இப்போது மாதத்தில் ஒரு வாரம் அளவுக்கு வேலை இருக்காது. ஒப்பந்தப் பணிகள் கிடைத்தால் தொடர்ந்து வேலை இருக்கும். லாபமும் கூடுதலாக இருக்கும். ஆனால் கையில் தேவையான முதலீடு இருக்க வேண்டும்.

நான் பெயின்டிங் செய்ய ரோலர் பிரஷ், கையால் அடிக்கும் பிரஷ், ஏர் கம்ப்ரஷர் ஸ்ப்ரே போன்றவற்றைப் பயன்படுத்துகிறேன். பட்டி பார்த்த சுவர்களில் மட்டுமே ரோலர் பிரஷ் பயன்படுத்த முடியும். சாதாரன சுவர்கள் மேடும், பள்ளமும் ஆக இருக்கும் என்பதால் ரோலர் பிரஷ்சைப் பயன்படுத்தினால் பெயின்ட் திட்டுத்திட்டாக இருக்கும். கையால் அடிக்கும் பிரஷ்சை எல்லா சுவர்களிலும் பயன்படுத்தலாம். பட்டி பார்க்கவில்லை என்றாலும் பெரிய பரப்பளவு உள்ள சுவர்களில் ஸ்ப்ரே பயன்படுத்தலாம்.

பட்டி பார்ப்பதற்கு தகடுகளை பயன்படுத்துகிறோம். இந்த தகடுகள் மூன்று அங்குல அகலம் முதல் பன்னிரெண்டு அங்குல அகலம் வரை கிடைக்கின்றன. சாதாபட்டி, சாதாபேஸ்ட் பட்டி, பிர்லா, ஜேகே, ஏசியன் பேஸ்ட் பட்டி என பல வகை பட்டிகள் உள்ளன. பிர்லா, ஜேகே, ஏசியன் பேஸ்ட் பட்டிகள் தரமாக இருக்கும்.

சுவர் சொரசொரப்பாக இருக்கும் போது அதிக பட்டி பிடிக்கும். அதுதான் தரமாக இருக்கும். சுவர் பளபளப்பாக இருந்தால் பட்டி குறைவாகப் பிடிக்கும். தரம் சற்று குறைவாக இருக்கும். பொதுவாக புதிய சுவர்களில் பட்டி பார்க்கும் போது ஒன்றன் மீது ஒன்றாக இரண்டு முறை பார்க்க வேண்டும். சுவர்களில் ஏர் கிராக் என்று சொல்லப்படும் லேசான விரிசல் இருந்தால் பிளாஸ்டர் ஆப் பாரீஸ் கொண்டு பட்டி பார்க்க வேண்டும்.
உயரமான இடங்களில் அடிக்க ஏணி போன்ற கயிற்றால் செய்த பாய்டொக்குகளைப் பயன்படுத்துவோம். அவற்றில் ஒற்றை டொக்கு என்ற வகையும் உள்ளது.

பாய்டொக்கை பெரிய இடங்களில் பயன்படுத்தலாம். சந்துகளில் பயன்படுத்த முடியாது. ஒற்றை டொக்கு என்பதை எல்லா இடங்களிலும் பயன்படுத்தலாம்.
ஓரு மாடிக்கு மேல் அடிக்க வேண்டிய வேலை இருந்தால் டொக்கை பயன்படுத்துவோம். அதற்கு கீழ் இருந்தால் ஏணியை பயன்படுத்தலாம்.
புதிய வீடுகளில் சிமென்ட் பூச்சு முடிந்த மூன்று வாரத்திற்கு பின்னால் நேரடியாக சுவரை பாதுகாக்கும் பட்டி பூச வேண்டும். இது சுவர்களுக்கு நல்ல பலனைக் கொடுக்கும். முதலில் வெள்ளை சிமென்ட் அல்லது பிரைமர் பூசுகின்றவர்கள் உள்ளனர். இது தவறான முறை ஆகும். பிரைமர் பூசி விட்டு பட்டி பூசக் கூடாது.” என்கிறார், திரு. சையது.

– சை. நஸ்ரின்

மத்திய அரசு, இந்தியாவின் கச்சா எண்ணெய், இயற்கை எரி வாயு மற்றும் பெட்ரோல், டீசலின் தேவையை குறைக்க வேண்டியதன் தேவையைக் குறித்து தொடர்ந்து வலியுறுத்தி வருகிறது. இத்தகைய குறைப்பு சுற்றுப்புற சூழல் பாதிப்பை தடுக்கவும், இறக்குமதியை குறைக்கவும் தேவையாகிறது. சில மாதங்களுக்கு முன்பு பாரீசில் நடந்த உலக சுற்றுச் சூழல் மாநாட்டில், காற்றாலை, சூரிய சக்தி போன்றவற்றை கொண்டு 175000 மெகா வாட் மின்சார உற்பத்தி திறனை ஏற்படுத்தும் என இந்தியா கூறி உள்ளது.

காற்றாலை மற்றும் சூரிய சக்தி கொண்டு மின்சாரம் உற்பத்தி செய்யும் திட்டங்களுக்கு மத்திய அரசு பெரிதும் ஆதரவு அளித்து வருகிறது. இந்தியாவின் சூரிய சக்தி மின் உற்பத்தி திறன் சுமார் 1500 மெகா வாட் என்ற நிலையில் இருந்து தற்போது 25000 மெகா வாட் அளவிற்கு உயர்ந்து உள்ளது. இதே போல், காற்றாலை சார்ந்;த மின்திறனும் கணிசமாக உயர்ந்து தற்போது 32500 மெகா வாட் என்ற அளவை எட்டி உள்ளது.

காற்றாலை மற்றும் சூரிய மின்சக்தி உற்பத்தித் திறன் இந்த அளவுக்கு நாலரை ஆண்டுகளில் கூடி இருக்கிறது. இருப்பினும் காற்றாலை மற்றும் சூரிய சக்தி மின்திறன் இந்தியாவின் கச்சா எண்ணெய், இயற்கை எரி வாயு, பெட்ரோல், டீசல் தேவையை போதுமான அளவு குறைக்காது.

தற்போது, இந்தியாவின் மொத்த மின் உற்பத்தித் திறன் 3,45,000 மெகா வாட். நாட்டின் மின்சார தேவை சுமார் 1,71,000 மெகா வாட். இந்தியாவின் 80 சதவீதம் மின் உற்பத்திக்கு . நிலக்கரி, இயற்கை எரிவாயு, பெட்ரோல், டீசல் எரிபொருளாக பயன்படுத்தப்படுகிறது.
நாட்டின் மின் தேவை ஆண்டொன்றிற்கு சுமார் 6.5 சதவீதம் கூடி வருகிறது. இத்தகைய கூடுதலான தேவை வருங்காலத்தில் தொடரும்.

இந்தியாவின் மின் உற்பத்தி கணிசமான அளவு நிலக்கரி, கச்சா எண்ணெய், இயற்கை எரி வாயுவை எரிபொருளாக கொண்டு செய்யப்படுவதாலும், போக்குவரத்து, தொழிற்சாலைகள் போன்றவற்றிற்கு இயற்கை எரிவாயு, பெட்ரோல், டீசல் பெருமளவில் தேவைப்படுவதாலும், கடந்த ஆண்டு சுமார் 220 மில்லியன் டன் கச்சா எண்ணெய் இறக்குமதி செய்யப்பட்டது. ஆனால், இந்தியாவின் கச்சா எண்ணெய் உற்பத்தி ஆண்டொன்றிற்கு சுமார் 32 மில்லியன் டன் தான்.

இந்தியாவில் கடந்த ஆண்டு சுமார் 25000 மில்லியன் க்யூபிக் மீட்டர் (cubic metre) இயற்கை எரிவாயு இறக்குமதி செய்யப்பட்டது. தற்போது இந்தியாவின் இயற்கை எரிவாயு உற்பத்தி ஆண்;டொன்றிற்கு சுமார் 32000 மில்லியன் க்யூபிக் மீட்டர் என்ற அளவே உள்ளது.

தேவை கூடி வருவதால் இந்தியாவின் கச்சா எண்ணெய், இயற்கை எரி வாயுவின் இறக்குமதி ஆண்டிற்கு 6 சதவீதம் அளவு கூடி வருகிறது. இத்தகைய கூடுதல் வரும் காலத்திலும் தொடரும்.
தற்போது, இந்தியா ஈட்டும் அந்நிய செலவாணியில் 70 சதவீதம் கச்சா எண்ணெய், இயற்கை எரி வாயு இறக்குமதி செய்யவே செலவிடப்படுகிறது. மேலும் இறக்குமதி கூடும் நிலையில், இந்தியாவின் அந்நிய செலவாணி கையிருப்பு நிலை மிகவும் பாதிக்கப்படும். இவ்வாறு ஏற்படக்கூடிய இக்கட்டான நிலையை காற்றாலை, சூரிய மின்சக்தியை மேலும் கூட்டுவதனால் தவிர்க்க முடியுமா என்பதே இப்போது நம் முன் உள்ள கேள்வி.

சிக்கல் என்னவென்றால் சூரிய மின்சக்தி உற்பத்தித் திறனில், சுமார் 15 சதவீதம் அளவே மின்சக்தி உற்பத்தி செய்யக் கூடும். காற்றாலை மின் சக்தியில், சுமார் 30 சதவீதம் அளவே மின் சக்தி உற்பத்தி செய்யக் கூடும். இத்தகைய குறைவான மின் உற்பத்திக்கு காரணம், சூரிய ஒளி 24 மணி நேரமும் கிடைக்காது என்பதும், காற்று ஆண்டுக்கு சுமார் 4 மாதமே தேவையான வேகத்தில் வீசும் என்பதும்தான், சூரிய ஒளியை ஒரளவே மின் சக்தியாக மாற்ற முடியும்.

அதாவது 25000 மெகா வாட் சூரிய மின்சக்தி திறன் உள்ள நிலையில் மின் சக்தி உற்பத்தி அளவு 3750 மெகா வாட் அளவே கிடைக்கக் கூடும்.
அதாவது, இந்தியாவின் 1,75,000 மெகா வாட் சூரிய மின்சக்தி, காற்றாலை மின் சக்தி போன்றவற்றால் உற்பத்தித் திறன் கூடினாலும், கிடைக்கக்கூடிய மின்சாரம் சுமார் 35000 மெகா வாட் என்றே நிலையே காணப்படும்.

இந்தியா முழுவதும் மின்சாரம் கொண்டே ரயில் எஞ்சின்களை இயக்கத் தேவையான ஆயத்த பணிகள் நடைபெற்று வருகின்றன.
மின்சார வாகனங்கள், மற்றும் மின்சார ரயில் இயங்க பாட்டரிகள் தேவை. இந்த பாட்டரியை சார்ஜ் செய்ய மின்சாரம் தேவை. இந்த மின்சாரம் டீசலையோ, இயற்கை எரி வாயுவையோ கொண்டு தயாரிக்கப்பட்டால், நாட்டின் டீசல், இயற்கை எரிவாயுவின் தேவையும், இறக்குமதியும் குறையாது.

மாற்று நடவடிக்கை
சூரிய மின்சக்தி, காற்றாலை மின்சக்தி பெரிதளவில் அதிகரிக்கப்பட்டாலும், இந்தியாவின் கச்சா எண்ணெய், இயற்கை எரி வாயுவின் தேவை ஒரளவே குறையும். கணிசமான அளவு குறையாது.

இத்தகைய நிலையில், கடல்பாசி கொண்டு எரிபொருள் தயாரிக்கக் கூடிய வாய்ப்புகள் குறித்து ஆராய வேண்டும்.
அண்மைக் காலங்களில் வளர்ந்த நாடுகளில், கடல் பாசியிலிருந்து எரிபொருள், மற்றும் வேதிப் பொருட்கள் தயாரிப்பது குறித்து தீவிரமாக ஆராய்ச்சிகள் செய்யப்பட்டு வருகின்றன. பல நாடுகளில் குறிப்பாக அமெரிக்காவில் கடற்பாசியை குறித்த ஆராய்ச்சிக்கு ஊக்கம் அளிக்கப்படுகிறது.

வளர்ந்த நாடுகளில், கடல்பாசியில் இருந்து எரிபொருள் தற்போது வர்த்தக ரீதியில் தயாரிக்கப்படுகின்றது.
கடல்பாசி விவசாயம் செய்ய தேவையானது சூரிய ஒளியும், கார்பன் டை ஆக்சைடும்தான். இந்தியாவின் தட்பவெப்ப நிலைக்கு கடல்பாசி விவசாயம் மிகவும் ஏற்றது. கடல்பாசி விவசாயம் அறுவடை செய்ய 30 முதல் 40 நாட்கள்தான் தேவை. கடல்பாசியில் சுமார் 30 முதல் 40 சதவீதம் வரை எண்ணெய் காணப்படும்.

இந்தியாவில் சூரிய ஒளியும், கார்பன் டை ஆக்சைடும் தேவையான அளவு கிடைக்கின்றன. கடல் பாசியில் இருந்து எரி பொருளாக பயன்படுத்துவதற்கு ஏற்ற எண்ணெயை பிரித்து எடுத்து விட்டு மீதமுள்ள சக்கையில் இருநது எத்தனால் தயாரிக்கலாம்.

கடல்பாசியை கடல்புறங்களிலும், தரிசு நிலங்களிலும் விவசாயம் செய்து, அவற்றில் இருந்து எரிபொருள் மற்றும் வேதிப்பொருட்களை தயாரிக்கும் திட்டத்தை நடைமுறைப் படுத்தினால், எரிபொருள் கிடைப்பது மாத்திரமல்லாமல் விவசாயம், தொழில்துறைக்கும் மிகுந்த நன்மை ஏற்படும். வேலை வாய்ப்புகள் பெருகும்.

– என். எஸ். வெங்கட்ராமன், நந்தினி கன்சல்டன்சி

இனி அனைத்து பங்குப் பரிமாற்றங்களுக்கும் 2.10.2018 முதல் டிமேட் (Demat) முறையையே பரிமாற்றத்துக்கு பயன்படுத்த வேண்டும் என கம்பெனி விவகாரத் துறை அமைச்சகம் சுற்றறிக்கை வெளியிட்டு உள்ளது. அதாவது இதுவரை ஸ்டாக் எக்ஸ்சேஞ்சில் பட்டியல் இடப்பட்ட நிறுவனங்களின் பங்குகள் மட்டுமே டிமேட் வடிவத்தில் இருந்து வந்ததற்கு பதில் அனைத்து பங்குகளும் டிமேட் வடிவத்திலேயே கையாளப்பட வேண்டும். பங்கு பரிமாற்ற நடவடிக்கைகளில் வெளிப்படைத் தன்மை, முதலீட்டாளர்களின் பாதுகாப்பு, கம்பெனி நிர்வாகத்தின் மேம்பாடு ஆகியவற்றிற்காக இந்த மாற்றம் என கூறப்பட்டு உள்ளது.

இந்த மாற்றத்தின் காரணமாக கிடைக்கும் முக்கிய நன்மைகள் பின்வருமாறு –
பங்குச் சான்றிதழ்கள் காணாமல் போதல், திருட்டு போதல், அழிந்து போதல், மோசடியாக அபகரித்தல் போன்ற அபாயங்கள் அறவே அகற்றப்படும் வெளிப்படைத் தன்மை அதிகரிக்கும். தவறான நடைமுறைகளை தடுக்கும் வகையில் நிறுவனங்களின் நிர்வாக அமைப்பு மேம்படும்.

பங்குகளின் பரிமாற்றத்தின்போது முத்திரை வரி செலுத்துவதில் இருந்து விலக்கு.
பங்குப் பரிமாற்றம், பங்குகளை அடமானம் வைத்தல் போன்ற நடவடிக்கைகள் எளிமை ஆகும்.
2.10.108 முதல் எந்தவொரு நிறுவனமும் பொதுப் பங்குகளை இனி டிமேட் வடிவத்தில் மட்டுமே வெளியிடும்.

Also Read: எதிலெல்லாம் முதலீடு செய்யக் கூடாது

ஸ்டாக் எக்ஸ்சேஞ்சில் பட்டியலிடப்படாத நிறுவனங்கள் அனைத்தும் தற்போது நடப்பு பங்குகளை வைத்து இருக்கும் அனைத்து பங்குநர்களின் பங்குகளுக்கு இன்டர்நேஷனல் செக்யூரிட்டி ஐடென்டிஃபிகேஷன் எண் (International security Identification Number (ISIN) ஒதுக்கீடு செய்து அந்த தகவலை பங்குநர்களுக்கு அறிவிக்க வேண்டும்.

பங்குச் சந்தையில் பட்டியலிடப்படாத நிறுவனங்களின் பங்குகளை வைத்திருக்கும் எந்தவொரு வரும் தன் பங்குகளை மற்றவர்களுக்கு பரிமாற்றம் செய்ய விரும்பினால் முதலில் பங்குகளை டிமேட் வடிவத்துக்கு மாற்றிய பிறகே மாற்ற முடியும்.

டிமேட் செய்வதால் எழும் எந்தவொரு குறைபாடுகளையும் முதலீட்டாளர் கல்வி மற்றும் பாதுகாப்பு நிதிய ஆணையத்தினை (The Investor Education and protection Fund Authority( IEPF)) அணுகி தீர்வு செய்து கொள்ளலாம்.

– முனைவர் ச. குப்பன்