மரபு மாற்றப்படாமல் வலுவூட்டப்படும் இயற்கை விதைகள்

Valar
-
0
மரபு மாற்றப்படாமல் வலுவூட்டப்படும் இயற்கை விதைகள்

கடந்த ஃபெப்ரவரியில், மெம்பிஸ் நகரில், ஒரு கண்காட்சி மையம் நடத்தப்பட்டது. ஏராளமான வேளாண் துறை மற்றும் வர்த்தக வல்லுநர்கள் இதில் கலந்து கொண்டனர்.

இங்கு சார்லஸ் பாரோன் என்பவர், பங்கேற்றவர்களின் உணவுத் தட்டுகளில் துருவிய முட்டைகளை வைத்துப் பரிமாறினார்.
விதைகளின் விற்பனைச் சந்தை அவரது குடும்பத் தொழிலாகவே மாறிவிட்டது. குறைந்த லாபத்திற்கு இயற்கை விதைகளை உற்பத்தி செய்ய, மிகக் கடினமாக உழைக்கிறார் பாரோன்.

பாரோன், உழவர்களின் வர்த்தக நெட்ஒர்க் (எஃப்பீஎன்) நிறுவனத்தின் கூட்டு நிறுவனர். இவரது கூட்டு நிறுவனர் க்ளென்னர் பெர்கின்ஸ். ஐந்து ஆண்டுகள் கடந்த இந்த நிறுவனம், மக்காச் சோளம் மற்றும் சோயா பீன்ஸ் விதைகளை உற்பத்தி செய்யும் நிறுவனம். இப்போது பெரும்பாலான உழவர்கள் மரபியல் வழியில் மேம்படுத்தப்பட்ட விதைகளைத்தான் வாங்கிப் பயன்படுத்தி வருகிறார்கள்.
இதனை உடைத்து, இயற்கை விதைகளின் மரபை மாற்றாமல், வலுவூட்டி விற்பனை செய்வதன் மூலம், மரபு மாற்றப்பட்ட விதைகளை விற்பனை செய்யும் நிறுவனங்களுக்கு கடும் போட்டியை ஏற்படுத்தி வருகிறார்.

இந்த மரபு மாற்றப்பட்ட விதைகளில் களைகள் வளர்வதைத் தடுக்கும் ஆற்றலும், பூச்சிகளை நெருங்க விடாமல் தடுக்கும் ஆற்றலும் மரபியல் பண்பாக இணைக்கப்படுகின்றன.. இதனால் இத்தகைய விதைகள் பேட்டன்ட் உரிமையில் பாதுகாக்கப்பட்டு வருகின்றன.

அமெரிக்கச் சந்தைகளை ஒருங்கிணைத்து இத்தகைய மரபு மாற்றப்பட்ட விதைகள் ஓரளவுக்கு தங்கள் செல்வாக்கை செலுத்தி வருகின்றன.
கடந்த ஆண்டு அமெரிக்க சந்தைகளில் உழவர்கள் மரபு மாற்றப்பட்ட விதைகளுக்காக 22 பில்லியன் டாலரை செலவு செய்துள்ளனர். இது 2010 ஆம் ஆண்டில் செய்யப்பட்ட செலவை விட, 35 விழுக்காடு அதிகம் என்று சொல்லப்படுகிறது.

இது அமெரிக்காவின் நிலங்கள் அதிகரித்து விட்டன என்ற பொருளை உணர்த்தவில்லை. மாறாக, இத்தகைய மரபு மாற்றப்பட்ட விதைகளின் வல்லாதிக்கம் அதிகரித்து இருப்பதையே காட்டுகிறது.

ஆனால் மரபு மாற்றப்படாத விதைகள் உள்ளூர் மொத்த விற்பனையாளர்கள் அல்லது சில்லறை விற்பனையாளர்கள் மூலம் மட்டுமே விற்பனை செய்யப்படுகின்றன. பெரும்பாலும் ஆன்லைனில் செய்யப்படவில்லை.

1990-களின் நடு ஆண்டுகளில் மன்சான்டோ (இப்போது பேயர் ஏஜி உரிமையாளர்) அல்லது டவ்டூபான்ட் இன்க் போன்ற நிறுவனங்களிடம் இருந்தே பேட்டன்ட் செய்யப்பட்ட மரபணு மாற்றப்பட்ட விதைகளை வாங்கவேண்டி இருந்தது. இவர்கள் இருவரும் ஒருவருக்கு ஒருவர் போட்டியிடும் அருகருகே உள்ள நிறுவனங்கள்.
தற்போது, எப்பீஎன் தகவலின் படி, இந்த இரண்டு நிறுவனங்களும் அமெரிக்கச் சந்தையில் 72 விழுக்காடு மக்காச் சோளம் மற்றும் சோயாபீன்ஸ் விதைகளை விற்பனை செய்கின்றன.

மேலும் பல தனித்தனியான விதை நிறுவனங்களும் அவரவர்களின் போட்டித் தயாரிப்புகளுக்காக, இதே மரபு மாற்றப்பட்ட விதைகளுக்கான பேட்டன்ட் உரிமம் பெற வேண்டியுள்ளது.
“மேற்சொன்ன முதன்மை நிறுவனங்கள் இரண்டும், இதற்கான நெறிமுறைகளை வகுத்து வைத்துள்ளன” என்கிறார் பாரோன்.
இதற்கு இவரது தீர்வு, மரபு மாற்றப்படாத விதைகள். இதன் மூலம் இத்தகைய முதன்மை நிறுவனங்களுக்கு கடினமான போட்டியை ஏற்படுத்த முடியும் என்று நம்புகிறார். இதற்கு உழவுத் தொழில்நுட்பம், வேதியியல் தீர்வுகள், நவீன இனப்பெருக்க முறையில் ஏற்பட்டுள்ள வளர்ச்சிதான் என்கிறார் பாரோன்.
மரபு மாற்றப்படாத இயற்கை விதைகளின் விலையை குறைவாகவே பாரோன் வைத்திருக்கும் காரணம், இத்தகையை விதைகளை தங்கள் நிறுவனம் தேர்ந்தெடுத்த பயிர் வளர்ப்பவர்கள் மூலம், நேரடியாக உற்பத்தி செய்து, எந்த இடைத் தரகர்களும் இல்லாமல், கொள்முதல் செய்வதுதான்.

இப்போது எப்பீஎன் நிறுவனத்தின், மரபு மாற்றப்படாத இயற்கை மக்காச் சோளம் விதைகள், எஃப்2எஃப் என்ற ஜெனட்டிக்ஸ் நெட்ஒர்க்கின் பிராண்ட் பெயரில் விற்பனை செய்யப்படுகிறது.

ஒரு பை (பேக்) விதை 115 டாலருக்கு விற்பனை செய்யப்படுகிறது. ஆனால், மரபு மாற்றப்பட்ட விதை ஒரு பேக், 270 டாலர் ஆகும். இரண்டு மடங்குக்கும் அதிகம். இருந்தாலும் எப்பீஎன் நிறுவனம் மரபு மாற்றப்பட்ட விதைகளுக்கு எதிரானது அல்ல.
முறையான பேட்டர்ன் உரிமை கிடைத்தால், அடுத்த சில ஆண்டுகளில், எஃப்பீஎன் மூலம் மரபு மாற்றப்பட்ட விதைகளையும் விற்பனை செய்ய திட்டமிட்டிருப்பதாகத் தெரிவிக்கிறார். உழவுத் தொழில்நுட்பத்தில், மேலும் பல தொழில் முனைவோர்கள், முதலீடு செய்ய முன்வந்திருப்பது தன்னை மகிழ்ச்சி படுத்துவதாகவும், உழவர்களுக்கான மேலும் பல கருவிகள் உருவாக்கப்படுவதை தான் வரவேற்பதாகவும் சொல்கிறார்.

எஃப்பீஎன் நிறுவனம், கிட்டதட்ட 200 மில்லியன் டாலர் முதலீடுகளை, டிமாசெக், க்ளைனர் பெர்கின்ஸ், ஜிவி (முன்னாள் கூகிள் வெஞ்சர்ஸ்) உள்ளிட்ட நிறுவனங்களில் இருந்து ஈர்த்துள்ளது.

உழவர்கள் மற்றும் இவர்களின் உறுப்பினர்கள், அவர்களது சொந்த வேளாண்மைத் தகவல் அறிவுகளைப் பதிவேற்றி, அதற்குப் பதிலாக, நிறுவனத்தினரின் மதிப்பீட்டுத் தகவலைப் பெறுமாறு வாய்ப்பு கொடுக்கப்பட்டுள்ளது.

Also Read: சிறுதானியங்களை அடிப்படையாகக் கொண்ட இயற்கை உணவகம்!

இதனால் நாடு முழுவதும் 8000 உழவு உறுப்பினர்கள் தங்களது தகவல்களை அறித்தும், பெற்றும் பயனடைந்து வருகின்றனர். இது பென்சில்வேனியா பரப்பளவு நிலத்திற்கு ஈடானது ஆகும். இந்த மாபெரும் தகவல் வங்கி, விதைத் தொழிலுக்கு வெளிப்படைத் தன்மையைக் கொண்டுவந்துள்ளது.

உழவர்கள் ஒரே பொருளுக்கு ஒவ்வொரு இடத்திலும் கிடைக்கும் வெவ்வேறு விலைகளைத் தெரிந்து கொள்ள முடிகிறது. இடம், சூழல், காலம் மற்றும் இதர அம்சங்களைப் பொறுத்து, சில இடங்களில் இரண்டு பங்கு அதிக இலாபம் தருவதாகவும் அமைகிறது.

நூற்றுக்கணக்கான உண்மையான பண்ணைகளின் செயல்திறன்களையும் இவர்கள் சரிபார்த்து, தொழிலறிவை வளர்த்துக் கொள்ளலாம். இதற்கு முன்பு பாரோன் ப்ரோகிராம் மேலாளராக கூகிள் நிறுவனத்தில் பணிபுரிந்து வந்தார்.
உழவர்கள் தங்களுக்குத் தேவைப்படும் எல்லா மேம்பாட்டுத் தகவல்களையும் பெற முடியும் – மகசூலைப் பெருக்குவது உட்பட. உழவர்களின் உற்பத்தி பெருகினாலும், அமெரிக்க வேளாண்மை வருமானம் உலகளவில் கடந்த ஐந்து ஆண்டுகளாக 46 விழுக்காடாக சரிந்து விட்டது.

காரணம் மக்காச் சோளம் மற்றும் சோயாபீன்ஸின் விலை தொடர்ந்து சரிந்து வருவதுதான்.

எஃப்பீஎன் உறுப்பினர்களுக்கு பல்வேறு இடங்களின் விலை விவரங்கள் கொடுக்கப்படுவதால், இவர்களுக்கு வேளாண்மை உற்பத்திகளின் விலையை முடிவுசெய்யும் உரிமை கிடைத்திருப்பதாகச் சொல்கின்றனர்.
அமெரிக்கா கார்ப்பரேஷன் வங்கியின் அறிக்கையின் படி, அமெரிக்காவின் மரபு மாற்றப்பட்ட விதைகளின் சில்லறை விற்பனையாளர்களில் பாதிக்குப் பாதி பேர், கடந்த ஆண்டில் எஃப்பீஎன் வளர்ச்சியால், தங்கள் விற்பனையையில் இழப்பைச் சந்தித்துள்ளதாகத் தெரிவிக்கிறது.

பேயரின் மற்றும் டவ்டூபான்ட் – இன் இயற்கை விதை சலுகை, அவர்களின் உழைப்புக்கு தகுந்த வருமானத்தை தந்து கொண்டிருக்கிறது.
பெம்பிஸ் பகுதியில் ஒருங்கிணைந்த பல உழவர்கள், மரபு மாற்றப்பட்ட தெரியாத விதைகளுக்குப் பதிலாக, இந்த ஆண்டு முதல், இயற்கை விதைகளுக்கு மாறப் போவதாக அறிவித்துள்ளனர். சிலர் ஏற்கெனவே இயற்கை விதைகளுக்கு மாறிவிட்டனர்.

Also Read: ஜி.எஸ்.டி. தொடர்பான கேள்விகளும், பதில்களும்

டிரன்ட் டப்ஸ் என்பவரின் குடும்பம் அர்கான்சஸ் என்ற இடத்தில் 3000 ஏக்கரில் பயிரிட்டு வருகிறது. இவர்களது வசந்த கால மக்காச் சோளப் பயிராக எஃப்2எஃப் ஜெனட்டிக்ஸ் நெட்ஒர்க் விதைகளையே பயிரிட்டுள்ளனர். இதனால் அவரது விதைச் செலவு பாதிக்கும் மேலாகக் குறைந்து விட்டது. மேலும் இது மரபு மாற்றப்படாத சோளமாக இருப்பதால், சந்தையில் நல்ல விலை கிடைக்கிறது.

“நாம் தேர்ந்தெடுக்கும் விதையின் விலை வெளிப்படையாக சரியானதாக இருந்தால், மகசூலிலும் நம்மால் சேமிக்க முடிவதை வெளிப்படையாகக் காண முடியும். இதுதான் நான் கையாளும் மிகப்பெரிய சவால்” என்கிறார் டாப்ஸ்.

– ஆனி லினியா

டிடிஎச் சேவைகளில் வந்துள்ள புதிய தொழில் நுட்பங்கள்!

Valar
-
0
டிடிஎச் சேவைகளில் வந்துள்ள புதிய தொழில் நுட்பங்கள்!

கடந்த ஐந்து ஆண்டுகளாக சென்னை மாதவரத்தில் டாட்டா ஸ்கை டிடிஎச் ((DTH) Direct-To-Home) சேவையை தனி உரிமைக் கிளை (Franchise) முறையில் இத்தொழிலை நடத்தி வரும் திரு. எல். செந்தில்குமார் அவர்களை வளர்தொழில் இதழுக்காக சந்தித்தபோது,
“டாட்டா ஸ்கை 2006 ல் தொடங்கப்பட்டது. நான் 2007 ல் இருந்து டாட்டா ஸ்கை நிறுவனத்தில் பணிபுரிந்து வந்தேன். சொந்தமாக 2013 செப்டம்பர் மாதம் 27ஆம் நாள் எங்கள் மாதவரம் தனி உரிமைக் கிளையைத் தொடங்கினோம்.
டிடிஎச் சேவையை நடுத்தர குடும்பத்தினர் முதல் வருமானம் அதிகம் உள்ள மக்கள் வரை அனைவரும் விரும்புகிறார்கள். நடுத்தர குடும்பத்தினர் அவர்கள் வசதிக்கு ஏற்ப மாதம் 200 ரூபாய் வரை வரும் சேனல்களை மட்டும் தேர்ந்தெடுத்து பார்ப்பார்கள். ஆனால் வருமானம் அதிகம் இருப்பவர்கள் கட்டணம் பற்றிக் கவலைப்படாமல் அவர்களுக்கு பிடித்த அனைத்து சேனல்களையும் சந்தா செலுத்தி பார்ப்பார்கள்.

இப்போது ஸ்மார்ட் டிவி பயன்படுத்தி தொலைக் காட்சி பார்ப்பவர்கள் எண்ணிக்கை கணிசமாக அதிகரித்து வருகின்றது. நெட்ஃப்ளிக்ஸ், அமேசான் பிரைம், சன்நெக்ஸ்ட், ஹாட் ஸ்டார் போன்றவற்றால் டிடிஎச் சேவைகளுக்கு எந்தவித பாதிப்பும் இருக்காது. ஏனென்றால் கேபிள் டிவியில் இருந்து டிடிஎச் சேவைக்கு மாற பல ஆண்டுகள் தேவைப்பட்டது. இருப்பினும் மக்கள் அனைவருமே கேபிள் டிவியில் இருந்து தற்போது வரை டிடிஎச்-க்கு மாறவில்லை. இதனால் டிடிஎச் சேவைகளில் இருந்து ஸ்மார்ட் டிவிக்கு மாறவும் இன்னும் பல ஆண்டுகள் தேவைப்படும். இதனால் டிடிஎச் சேவைக்கு எந்த வித பாதிப்பும் இருக்காது என்பதுதான் உண்மை.

வாடிக்கையாளர்கள் இருப்பிடங்களுக்கு சென்று அங்கு உள்ள பொருத்தும் இடங்கள் தொடர்பான சிக்கல்களைத் தாண்டி டிடிஎச் கருவியை மிகச் சரியாக பொருத்துவது என்பது ஒரு சவாலான செயலே. அப்படி கருவிகளை கையாள மற்றும் பொருத்துவதற்கு என நிறுவனத்தால் சென்னையிலேயே ஆறு நாட்கள் சிறப்பு பயிற்சி வழங்கப்படுகின்றது. இந்த பயிற்சி முடித்து சான்றிதழ் பெற்றவர்களையே புதிய சந்தாக்களுக்கு டிடிஎச் கருவிகளை பொருத்த அனுப்புவோம். சான்றிதழ் பெறாத எவரையும் கருவிகளை பொருத்த நிறுவனம் அனுமதிப்பது இல்லை.

டாட்டா ஸ்கை ஒரு பெரு நிறுவனம் என்பதால் எங்களுக்கும் வாடிக்கையாளருக்கும் இடை பணப்பரிமாற்றம் என்பது எந்த காலத்திலும் நேரடியாக இருக்காது. எங்களுக்கும்வாடிக்கையாளருக்கும் உள்ள ஒரே தொடர்பு என்பது சேவை கருவிகளைப் பொருத்தி இணைப்பு கொடுப்பது மற்றும் பழுது நீக்கும் சேவைகளின் போது மட்டும்தான். பணப்பரிமாற்றம் முழுக்க முழுக்க ஆன்லைனில்தான் நடைபெறும். அவர்கள் கணக்கில் இருந்து நிறுவனம் ஆன்லைனிலேயே பெற்றுக் கொள்ளும். எங்களுக்கு சேர வேண்டிய வர்த்தக கழிவு தொகை நிறுவனத்தால் எங்களுக்கு வழங்கப்படும்.

கடந்த டிசம்பர் மாதம் டிஆர்ஏஐ ((TRAI) Telecom Regulatory Authority of India) புதிய விதிமுறைகளை அறிவித்தது. அவை 2019 ஜனவரி மாதம் முதல் நடைமுறைக்கு வந்துள்ளன. இந்த புதிய விதிமுறைகளால் எங்களை போன்றவர்களை விட வாடிக்கையாளர்களுக்குதான் மிகுந்த தொல்லை. அந்த புதிய விதிமுறைகளால் ஏற்பட்டுள்ள அவதிகளை, சிக்கல்களை சரி செய்வதற்கு டாட்டா ஸ்கை நிறுவனத்தின் மேம்பாட்டாளர் குழு தனியே இதற்கென ஒரு சாஃப்ட்வேரை கண்டுபிடித்து அதனை டாட்டா ஸ்கை மொபைல் ஆப்-இல் பதிவேற்றி உள்ளது.

இதனால் புதிய விதிமுறைப்படி எந்த எந்த சேனல்களுக்கு எவ்வளவு கட்டணம் மற்றும் வாடிக்கையாளருக்கு எந்த சேனல்கள் மட்டும் வேண்டும் என்பதை அவர்கள் ஸ்மார்ட் ஃபோன் மொபைல் ஆப்-இல் இருந்தே தெர்ந்தெடுக்க முடியும். மேலும் தெர்ந்தெடுத்த சேனல்கள் தொடர்பாக ஏதேனும் மாற்றங்கள் செய்ய வேண்டும் என்றாலும், அதையும் அந்த ஆப்-ஐ பயன்படுத்தியே செய்யலாம்.

இப்போது டாட்டா ஸ்கையிலேயே புதிதாக இன்டர்நெட் இணைப்பு பிராட்பேண்ட் கொடுக்கும் திட்டத்தை வீடுவீடாக கொண்டு வர உள்ளனர். இத்திட்டம் 2018 மே மாதம் முதலே உயர்ந்த கட்டிடங்களில், அதாவது எழு அடுக்குகளுக்கு மேல் இருக்கின்ற கட்டிடங்களில் நடைமுறையில் உள்ளது. வரும் ஜூன் மாதம் முதல் இந்த திட்டம் பகுதி பகுதியாக அனைத்து வீடுகளுக்கும் நடைமுறைப்படுத்தப்பட உள்ளன. தனி வீடுகளுக்கான கட்டண விகிதம் விரைவில் அறிவிக்கப்பட இருக்கிறது.
டிடிஎச் சேவைகளின் மீது வைக்கப்படும் பொதுவான குறை, என்பது கருமேகம் இருந்தாலோ, மழை பெய்தாலே சிக்னல் வரவில்லை என்பதுதான். இதற்கு நிரந்தர தீர்வு என்பது கிடையாது. ஏனென்றால் டிடிஎச் சேவை என்பது நேரடியாக சாட்டிலைட் மூலம் நிகழ் நேரத்தில் வழங்கப்படும் சேவை. இதனால் சிக்னல்கள் ஒரு இடத்தில் இருந்து சாட்டிலைட்டுக்கு சென்றுதான் டிவியை வந்தடையும். அப்போது சாட்டிலைட்டில் இருந்து வரும் சிக்னல் வீட்டில் இருக்கும் ரிசீவரை வந்தடைய நடுவில் எந்தவித இடையூறும் இருக்கக் கூடாது.

ஒருவரது கையை நடுவில் வைத்தால் கூட சிக்னல் கிடைக்காது. இப்படி எந்தவித இடையூறும் இல்லை என்றால்தான் நம் தொலைக்காட்சியில் சேனல்கள் சீராக தெரியும். இடையில் கருமேகம் குறுக்கிட்டால் சிக்னல்களை அதைத் தாண்டி வர முடியாது. அப்போது நம் வீட்டு டிவியில் சேனல்கள் வராது. சிலர், மற்ற டிடிஎச் சேவைகளில் மழை பெய்யும் போதும் சேனல்கள் வருகின்றன, டாட்டா ஸ்கைதான் வருவது இல்லை என்பார்கள். அதற்கு காரணம், ஒவ்வொரு நிறுவனமும், ஒவ்வொரு திசையில் சாட்டிலைட் சிக்னல் ஏற்பான்களை பொருத்தி இருப்பார்கள். வடக்கு, தெற்கு, கிழக்கு, மேற்கு என்று. இதனால் எந்த திசையில் மேகம் வலுவாக இருக்கின்றதோ அந்த திசையில் இருந்து சிக்னலை எந்த நிறுவன டிடிஎச் கருவியாலும் பெற இயலாது.

டிடிஎச் சேவை வழங்கவே முடியாத இடம் என்பது Line of Sight (LOS) என அழைக்கப்படும். அதாவது மரம் மற்றும் செடிகொடிகள் அதிகம் உள்ள இடங்களை இப்படிக் கூறுவோம். நகரப் பகுதிகளைத் தவிர்த்து புறநகர் பகுதிகளில் மரங்கள் அதிக அளவில் இருக்கும். வீடுகளில் கூட இரண்டு, மூன்று மரங்கள் இருக்கும். இது போன்ற பகுதிகளில் டிடிஎச் கருவிகளை பொருத்த இயலாது அப்படியும் பொருத்த வேண்டும் என்றால் மரங்களை வெட்டத்தான் வேண்டும். இதனால் நாங்கள் அவர்களுக்கு நடைமுறைச் சிக்கல்களை விளக்கிக் கூறுவோம். பின்னர் பொருத்த விரும்புவதும், விரும்பாததும் அவர்களது விருப்பம்.
இப்போது டிடிஎச்-இல் புதிய தொழில் நுட்பங்கள் பல வந்து இருக்கின்றன. குறிப்பாக, ரெக்கார்டர். இதனை செட்டாப் பாக்சில் பொருத்தி விட்டால், அதனைப் பயன்படுத்தி நாம் விரும்பும் தொலைக்காட்சி நிகழ்ச்சியை எப்போது வேண்டுமானாலும் பார்க்கலாம். அந்த ரெக்கார்ட் செய்த நிகழ்ச்சியை வீட்டில் இருந்துதான் பார்க்க வேண்டும் என்பது இல்லை. டாங்கிள் உதவியுடன் எங்கு இருந்தும் நம்மால் பார்க்க முடியும். அது மட்டும் இன்றி டாட்டா ஸ்கை ஆப்-ஐ பயன்படுத்தி எந்த இடத்திலும் எந்த நேரமும் நாம் நிகழ் நேரத்தில் சேனல்களை மொபைல் ஃபோனிலேயே பார்க்கலாம்.

எங்களது நிறுவனம் தொடங்கி பதினொரு ஆண்டுகள் முடிவடைந்து விட்டன. எங்கள் நிறுவனத்துக்கு வழங்கப்பட்டு உள்ள சுற்றெல்லை என்பது வடசென்னை முழுவதும் இருக்கும் வியாசர்பாடி, கொடுங்கையூர், மாதவரம், மணலி, மின்ட் காலனி, புழல், காவாங்கரை, கொளத்தூர், பொன்னியம்மன்மேடு, பெரவள்ளூர் ஆகிய பகுதிகளில் டாட்டா ஸ்கை சேவையை நாங்கள் வழங்குகின்றோம்.

நமக்கு எந்த பணியை கொடுத்தாலும் அதனை சிறப்பாக செய்து முடிக்க வேண்டும் என்பது எனது விருப்பம். நான் முதல் முதலில் எல்ஜி நிறுவனத்தில் 2002 ல் டிவி டெமோ செய்பவராக (இயக்கிக் காட்டுபவாராக) பணியாற்றத் தொடங்கினேன். அங்கு பணியாற்றும் போதே, கிடைக்கும் நேரத்தில் டிவி பழுது பார்ப்பதற்கான பயிற்சிப் படிப்பை முடித்தேன், அதவது டெக்னீசியன். பின்னர் அதே ஷோ ரூமில் அட்மின் பணிக்கு தேர்ச்சி பெற்றேன் அப்போது அந்த நிறுவனத்தின் முதலாளி புதிதாக டாட்டா ஸ்கை நிறுவனத்திடம் இருந்து ஃபிரான்சைஸ் எடுத்தார்.

அதற்கு என்னை ஒருங்கிணைப்பாளராக நியமித்தார். அதற்கடுத்து அந்த நிறுவனத்திலேயே படிப்படியாக மேற்பார்வையாளர், மேலாளர் என்று இப்போது நான் அதே டாட்டா ஸ்கை தனி உரிமைக் கிளை ஒன்றின் உரிமையாளராக இருக்கின்றேன். எங்கள் நிறுவனத்தில் தற்போது முப்பத்தைந்து பேர்கள் மிக சிறப்பாக வேலை பார்க்கிறார்கள். எனது துணைவியார் திருமதி. பவானி செந்தில்குமார், ஒரு வழக்கறிஞர். எங்கள் நிறுவனத்திற்கான சட்ட ஆலோசகராக இருப்பதோடு தொழில் வளர்ச்சிக்கு அவரால் முடிந்த ஒத்துழைப்புகளை நல்கி வருகிறார்’’ என்றார், திரு.. செந்தில்குமார் (98845 93585).

– செ. தினேஷ்பாண்டியன்

நூற்று ஐம்பது ரூபாயில் தொடங்கிய தொழில் பயணம்: 25 – ம் ஆண்டில், மணிபாரதி அச்சகம்!

Valar
-
0
நூற்று ஐம்பது ரூபாயில் தொடங்கிய தொழில் பயணம்: 25 – ம் ஆண்டில், மணிபாரதி அச்சகம்!

”வருவாய் ஈட்டுவதே ஒருவர் தொழில் செய்வதற்கோ, வேலைக்கு செல்வதற்கோ அடிப்படை, எனினும் அது அத்தோடு முடிந்து விடுவது இல்லை. ஒரு மனிதருக்கு சமூகத்தில் மதிப்பு மிகு அடையாளத்தைத் தருவது அவர் செய்யும் தொழிலே. தவிர தான் நன்றாக வாழ்ந்தோம் என மனநிறைவைத் தருவதும் அவரது தொழிலே. ஆக வருமானம், அடையாளம், மனநிறைவு மூன்றையும் தரக் கூடியதாக ஒருவரது தொழில் அமைந்திருக்க வேண்டும்” என்கிறார், திரு. ச. மணிவண்ணன். சிதம்பரத்தில் உள்ள மணிபாரதி அச்சகத்தின் உரிமையாளரான இவர் கடந்த இருபத்தைந்து ஆண்டுகளாக, தன்னுடைய அச்சக வளர்ச்சி தொடர்பாக சந்தித்த நிகழ்வுகளைக் கூறும்போது,

”நான் அச்சுத்தொழிலில் ஈடுபடத் தொடங்கியது, 1993, ஆகஸ்ட் மாதத்தில். அப்போது திண்டிவனம் வட்டம், மயிலம் கிராமத்தில் கட்டி முடிக்கப்படாத ஒரு கட்டடத்தில் நூற்றைம்பது ரூபாய் முதலீட்டில் ஸ்கிரீன் பிரின்டிங் செய்யத் தொடங்கினேன். காலண்டர்கள் அச்சிடும் பணியே முதன்மையாக இருந்தது. சிதம்பரத்தில் உள்ள சில நகைக் கடைகள், தங்கள் கடைகளுக்கான ஆண்டுக் காலண்டர்கள் அச்சிட்டுத் தரும் பணிகளை வழங்கினர். அச்சகத்துக்கு என்னுடைய பெயரையும், என்னுடைய வாழ்விணையர் திருமதி. பாரதி பெயரையும் இணைத்து மணிபாரதி அச்சகம் என்று பெயரிட்டோம்.

தொடர்ந்து பெருமளவுக்கு காலண்டர் அச்சிடும் பணிகள் வந்தன. புதிய வாடிக்கையாளர்களும் பெருகினார்கள். இதன் அடுத்த கட்ட வளர்ச்சியாக 1994, மே மாதத்தில் கட்டிங் மெஷினும், ஆகஸ்டில் முதில் டிரெடில் எந்திரமும் வாங்கினோம். பெரும்பகுதி வேலைகள் சிதம்பரத்தில் இருந்து வந்ததால் அச்சகத்தை சிதம்பரத்துக்கு மாற்றினோம், 1996 அக்டோபர் இரண்டாம் தேதி முதல் எங்கள் அச்சகம் சிதம்பரத்தில் இருந்து செயல்படத் தொடங்கியது. 1997, மார்ச்சில் சிதம்பரத்தின் பெரிய அச்சகங்களில் ஒன்றான மீனாட்சி அச்சகம் விலைக்கு வாங்கப்பட்டு மணிபாரதியுடன் இணைக்கப்பட்டது.

மீனாட்சி அச்சகத்தில் இருந்து பெறப்பட்ட ஆஃப்செட் எந்திரம் எங்கள் தேவைகளுக்குப் போதுமானதாக இல்லாததோடு, அடிக்கடி பழுது ஏற்படுதல் – அதை நீக்க ஏராளமாக செலவு செய்தல் – வேறு ஊர்களில் இருந்து மெக்கானிக்கை வரவழைத்தல் – அதற்காக காத்திருத்தல் – இதற்கிடையே ஏற்படும் உற்பத்தி இழப்பு என செலவும், போராட்டமாகவும் ஓடியது. 2000, ஜூலையில், சிதம்பரம், தெற்கு வீதியில் உள்ள ஸ்டார் அங்காடிக்கு அச்சகத்தை இடமாற்றம் செயதது, ஒரு திருப்பு முனையாக அமைந்தது. தொடர்ந்து, பாரத ஸ்டேட் வங்கியின் உதவியுடன் ஆட்டோபிரின்ட் 15ஜ்10 ஆஃப்செட் எந்திரத்தை வாங்கி நிறுவியதும் இன்னொரு திருப்புமுனையாக அமைந்தது.

2001, மே மாதம் நடைபெற்றி சட்டமன்றத் தேர்தலில் கணிசமான அச்சுப் பணிகள் கிடைத்தன. இன்னொரு அச்சு எந்திரம் வாங்க வேண்டிய கட்டாயமும் ஏற்பட்டது. இதே ஆண்டு ஜூலையில் இன்னொரு ஆஃப்செட் எந்திரம் வாங்கினோம். அடுத்து வந்த உள்ளாட்சித் தேர்தலை ஒட்டி கணிசமான அச்சுப் பணிகள் கிடைத்தன. சுமார் பதினைந்து நாட்கள் இருபத்து நான்கு மணி நேரமும் இரு எந்திரங்களும் இடைவிடாமல் இயங்கின. உள்ளாட்சித் தேர்தல் அச்சுப் பணிகள் நல்லதொரு வருவாயை ஈட்டித் தந்தன.

2001 இறுதியில் காலண்டர் பணிகள் தொய்வின்றி நடைபெற்றன. அப்போது பொதுவாக சந்தையில் பெருமளவு தொய்வு ஏற்பட்டு இருந்தாலும், புதிய வாடிக்கையாளர்களின் வருகை அந்தத் தொய்வை ஈடுகட்டியது. 2003 – ல் ஸ்டார் அங்காடியில் மேலும் இரண்டு கடைகளை வாடகைக்கு எடுத்தோம். அங்கு காட்சிக் கூடமாக அலுவலகமும், கணினிப் பிரிவும் நிறுவப்பட்டன. அதே நேரத்தில் 15ஜ்20 க்னைட் மல்டி கலர் அச்சு எந்திரம் வாங்கி நிறுவினோம்.

2004 – ம் ஆண்டில் மணிபாரதி பதிப்பகம் தொடங்கப்பட்டு, குறுகிய காலத்தில் பத்துக்கும் மேற்பட்ட நூல்கள் வெளியிடப்பட்டன. ஆனால் நூல்களை விற்பனைக்கு வாங்கிய பெரும்பாலான விற்பனையாளர்கள், நூல்களுக்கு உரிய தொகையை முறையாகத் திருப்பி அளிக்காததால் பெரும் இழப்பையே சந்திக்க நேர்ந்தது. எனவே 2006 – க்குப் பிறகு பதிப்புப் பணிகள் நிறுத்தி வைக்கப்பட்டன.

2005 – ல் அண்ணாமலைப் பல்கலைக் கழக பொறியியல் புல வைர விழாப் பணிகள் எங்கள் உழைப்பிற்கும், திறமைக்கும் சவாலாய் அமைந்தன. எதிர்பார்த்ததை விடவும் கூடுதலாக பக்கங்கள் அச்சிடக் கொடுக்கப்பட்டன. ஆனால் உறுதி அளித்து இருந்தபடி காகிதம் முழுமையாக வழங்கப்படவில்லை. சந்தையில் கூடுதல் விலைக்கு காகிதம் வாங்கி இரவு பகலாக பணியாற்றி விழாவன்று நூல்களை வெளியிடுவதற்கு ஏற்ற வகையில் அச்சிட்டுக் கொடுத்தோம்.

பணி முடிவடைந்து விட்ட நிலையில் புல முதல்வர் சொன்னபடி நடந்து கொள்ளவில்லை. இதற்கென அமைக்கப்பட்ட பேராசிரியர் குழு தமது ஒப்புதலை அளித்த பிறகும், நாங்கள் கொடுத்த பில்களை புதிதாய் ஒரு அலுவலரிடம் மறு ஆய்வு செய்யக் கொடுத்தார். புதிதாய் சில காரணங்களைச் சொல்லி பில் தொகையில் பாதியைக் குறைத்தார். இது குறித்து மீண்டும் புகார் செய்தோம். மற்றுமொரு அலுவலரை வைத்து மறுமதிப்பீடு செய்யப்பட்டது. பல்வேறு சவால்களை எதிர்கொண்டு, மிகக் குறுகிய காலத்தில் முடித்துக் கொடுக்கப்பட்ட அந்த பணிக்கான பில் தொகையில் மூன்றில் ஒரு பாகம் பிடித்தம் செய்யப்பட்டு ஆறுமாத அலைக்கழிப்புக்குப் பின் வழங்கப்பட்டது.

அந்த ஆறுமாத காலத்தில் ஏற்பட்ட பொருளியல் நெருக்கடியால் வேறு வழியின்றி அவர்கள் கொடுத்த தொகையைப் பெற்றுக் கொள்ளும்படி நேரிட்டது. அதே நேரத்தில் இன்சிஸ் நிறுவனத்தாரும் ஒரு பெருந்தொகையை பாக்கியாக வைத்து இருந்தார்கள். அதுவும் சேர்ந்து கடும் பொருளியல் நெருக்கடியை அளித்தது. காகிதம் வழங்குவோர், அச்சு மை வழங்குவோர் என பலரிடமும் கெட்ட பெயர் வாங்க நேரிட்டது. பதிப்பகத்தில் ஏற்பட்ட இழப்பு, பொறியியல் புலப் பணியில் ஏற்பட்ட இழப்பு இரண்டும் அச்சகத்தின் இருப்பையே தள்ளாட வைத்தது.

இந்த சூழலில் திருமதி. பாரதி நேரடியாக நிர்வாகக் களத்துக்கு வந்தார். நிர்வாகத்திலும், பல புதிய மாற்றங்களைச் செய்தார். ஒரு ஆஃப்செட் எந்திரம் விற்கப்பட்டு கடன்கள் ஓரளவு சரி செய்யப்பட்டன.

ஸ்டார் அங்காடியில் தனித்தனிக் கடைகளாக இருந்ததால் வேலைகளை ஒருங்கிணைப்பதும், பணியாளர் ஒழுங்கைப் பராமரிப்பதும் இயலாததாய் இருந்தது. வேறு இடம் தேடத் தொடங்கினோம். 2009 – ல் மேல வீதியில் கட்டப்பட்ட புதிய கட்டடத்துக்கு வாடகைக்கு இடம் பெயர்ந்தோம். கட்டட முன்தொகை, காட்சிக் கூட அழகு படுத்தல் போன்ற செலவுகளுக்கு வீட்டில் இருந்த நகைகள் விற்கப்பட்டன. இந்தியன் வங்கியிலும், பாரத ஸ்டேட் வங்கியிலும் புதிதாக கடன்கள் வாங்கப்பட்டன.
ஒரே பார்வையில், ஒரே கூடத்தில் அலுவலகமும், பணிமனையும் அமைந்து இருந்ததால் நிர்வாகமும், உற்பத்தியும் எளிதாயிற்று. பழைய இடத்தில் இரவு ஒன்பது மணி பத்து மணி என்றெல்லாம் பணி செய்து கொண்டிருந்த நிலை மாறி எட்டு மணிக்கெல்லாம் பணி நிறைவு செய்யப்பட்டது. அந்த ஆண்டிலேயே வங்கி நிதி உதவியோடு டிஜிட்டல் கலர் பிரின்டர், கலர் செராக்ஸ் வாங்கினோம்.

2011 – ல் 17ஜ்11 எபிடெக் அச்சு எந்திரம் வாங்கினோம். அதே ஆண்டு ஜூன் மாதம் லேமினேஷன் எந்திரம் வாங்கினோம். ஜூலை மாதம் எதிர்பாராமல் எனக்கு மாரடைப்பு ஏற்பட்டு, புதுவை ஏ. ஜி. பத்மாவதி மருத்துவ மனையில் ஆஞ்சியோ பிளாஸ்டி செய்யப்பட்டது.

பாரதி மருத்துவமனையில் இருந்தபடியே வீட்டையும், அச்சகத்தையும் திறம்பட நிர்வாகம் செய்தார். அச்சகப் பணியாளர்களும் அதற்கேற்ப ஒத்துழைப்பு நல்கினார்கள். உள்ளாட்சித் தேர்தல் பணிகள் கிட்டத்தட்ட நான் இல்லாமலேயே நடந்தன. இந்த வருவாயைக் கொண்டே மருத்துவச் செலவுக்கு உதவிய நண்பர்கள் அளித்த தொகையை பகுதி பகுதியாக திருப்பி அளித்தோம்.

2013 – ம் ஆண்டில் அண்ணாமலைப் பலகலைக் கழகத்தை அரசு தன்வயப்படுத்திக் கொண்ட பின்பு, சிதம்பரம் சந்தையில் பெருத்த தொய்வு ஏற்பட்டது. பல்கலைக் கழக அச்சுப் பணிகளை வெளியே கொடுக்கக் கூடாது என நிர்வாகியால் உத்தரவு பிறப்பிக்கப்பட்டது. அதை மட்டுமே நம்பி இருந்த பல அச்சகங்கள் சிதம்பரத்தில் மூடப்பட்டன. நாங்கள் காலண்டர்கள், திருமண அழைப்பிதழ்கள், புத்தகங்கக் அச்சு, அலுவலகங்களுக்குத் தேவையான அச்சுப் பணிகள் என்று வேறு பல பணிகளையும் மேற்கொண்டு இருந்ததால் பெரிய அளவில் பாதிப்பு இல்லை என்றாலும் கணிசமான பாதிப்பு இருக்கவே செய்தது.

க்னைட் ஆஃப்செட் எந்திரம் வாங்கி பத்தாண்டுகள் ஆன நிலையில் அடிக்கடி பழுது ஆவதும், அதற்கு செலவு செய்வதும் கூடிக் கொண்டே இருந்தது. 2016 தொடக்கத்தில் சிதம்பரத்திலேயே முதன் முறையாக ரையோபி டெம்மி அளவு ஆஃப்செட் எந்திரத்தை, பாரத ஸ்டேட் வங்கி உதவியுடன் வாங்கி நிறுவினோம். டெம்மி அளவிலான பலவண்ண அச்சுப் பணிகள் சிதம்பரத்திலேயே அச்சிடப்பட்டன. புத்தக அச்சு வேலைகளும் விரைவாகவும், எளிமையாகவும், அழகாகவும் முடிந்தன. தொடர்ச்சியாக தானியங்கி பர்ஃபெக்ட் பைண்டிங் எந்திரம் வாங்கினோம்.
அச்சகப் பணியாளர்கள் அனைவரிடமும் அன்போடு நடந்து கொள்வோம். வேலைகளை பொறுமையுடன் கற்றுக் கொடுப்போம். பணிகளில் தவறு செய்தால் மீண்டும் பொறுமையுடன் கற்றுத் தருவோர். வாரம் ஒருமுறை பயிற்சி வகுப்புகள் நடத்துவோம். சில நேரங்களில் பயிற்சி அளிக்க வெளியில் இருந்தும் வல்லுநர்களை வரவழைப்போம். பணிபுரிவோரின் குடும்பச் சிக்கல்களையும் தீர்த்து வைத்திருக்கிறோம். அவர்களில் யாராவது தனியே தொழில் செய்ய விரும்பினால் அதற்கும் உதவுகிறோம்.

எங்களிடம் வரும் வாடிக்கையாளர்களுக்கு, அவர்கள் தங்கள் பணிகளை மகிழ்ச்சியுடன் முடித்துச் செல்ல வேண்டும் என்பதில் அக்கறை காட்டுகிறோம். அந்த வகையில் அவர்களுக்கு எங்களுடனான தொடர்பு இனிமையான அனுபவத்தைத் தர வேண்டும் என்று நினைக்கிறோம். கட்டணம் தொடர்பானவற்றில் எந்த முரண்பாடும் வரக்கூடாது என்பதால், அவர்கள் பணியைத் தரும்போதே அதற்கான கட்டணத்தை சரியாக கணக்கிட்டுக் கொடுத்து, அவர்கள் ஒப்புதலுக்குப் பிறகே பணிகளை மேற்கொள்கிறோம்.

க்னைட் எந்திரத்தைக் கொடுத்து விட்டு, 16ஜ்21 கிராம்பஸ் ஆஃப்செட் வாங்கினோம். தற்போது ரையோபி டெம்மி ஆஃப்செட், கிராம்பஸ் கிரவுன் ஆஃப்செட், எபிடெக் மினி ஆஃப்செட், தானியங்கி பர்ஃபெக்ட் பைண்டிங் எந்திரம், லேமினேஷன் எந்திரம், டிஜிட்டல் கலர் பிரின்டர், ஸ்க்ரீன் பிரின்டிங் வசதிகளோடு எங்கள் மணிபாரதி அச்சகம், தனது இருபத்தைந்தாம் ஆண்டைக் கொண்டாடுகிறது. இது தொடர்பாக 25-ம் ஆண்டு மலர் ஒன்றையும் வெளியிட்டு இருக்கிறோம்” என்றார் திரு. மணிவண்ணன்.

– எவ்வி

கடந்த நான்கு ஆண்டுகளில் ஏன் இந்த பொருளாதார சரிவு?

Valar
-
0
கடந்த நான்கு ஆண்டுகளில் ஏன் இந்த பொருளாதார சரிவு?

கடந்த நான்கு ஆண்டுகளில் ஏற்பட்டு உள்ள மிகக் கடுமையான பொருளாதார (வருவாய்) ஏற்றத் தாழ்வு, ஏழைகள் உட்பட பெரும்பாலான மக்களின் நல்வாழ்வை நலிவு அடையச் செய்து விட்டது. இது இந்திய ஜனநாயத்தையும், அரசியல் அமைப்புச் சட்டத்தில் உள்ளடக்கப்பட்டு உறுதி செய்யப்பட்டு உள்ள சமூக நல உடன் படிக்கையையும் அச்சுறுத்துவதாக உள்ளது (Oxfam International)பொதுவாக நல்ல பொருளாதார முன்னேற்றம் என்பது, பொருள் உற்பத்தி வேகமாக உயர்வது (GDP Growth) என்றும், வேலை வாய்ப்பு அதிகப்படுவது என்றும் மற்றும் நாட்டில் வறுமையில் இருப்பவர் எண்ணிக்கைக் குறைந்து வருகின்ற நிலை என்றும் கருதப்படுகிறது.

சரியான பொருளாதார வளர்ச்சி. இவை பொருளாதார முன்னேற்றத்தின் முக்கிய அம்சங்களாக இருக்கின்ற போதிலும், பொருள் உற்பத்தி உயர்வு மூலமாக உண்டாகும் மக்களின் வருவாய் உயர்வும் நலனும் பரவலாக யாவருக்கும் (குறிப்பாக ஏழைகளுக்கும்) கிடைக்கும் நிலைமை தான் மிகச் சரியான, மக்கள் நலனை உறுதி செய்யும் பொருளாதார மேம்பாடு ஆகும்.

பொருளாதார நலன் மேம்படுவதற்கும், பரவலாக எல்லோரிடமும் போய்ச் சேருவதற்கும். அரசின் பொருளாதார கொள்கை எவ்வாறாக இருக்க வேண்டும்?
முதலாவது, பெரும்பாலான மக்கள் செய்கின்ற தொழில்களில் மூலதனத்தைப் பெருக்கி, உற்பத்தி உயர்வுக்கான வழிகளை உண்டாக்க வேண்டும். இந்தியாவில், 65% மக்கள் வாழ்கின்ற கிராமப்புற தொழில்கள் ஆன விவசாயம் மற்றும் ஊரகத் தொழில்களின் மூலதனத்தைப் பெருக்க வேண்டும்..

இரண்டாவது,. பொருள் உற்பத்தி உயர்வதன் மூலமாக உண்டாகும் மக்கள் நல மேம்பாட்டைத் தக்க வைப்பதற்கு, அத்தியாவசியப் பொருட்களின் விலைவாசி உயர்வை கட்டுக்குள் இருக்கச் செய்வது மிக அவசியமானது ஆகும். இதற்கு ஏதுகரமாகப் பொருளாதாரக் கொள்கைச் செயல்பாடுகள் இருக்க வேண்டும். ஏனெனில், வருவாய் உயர்வின் மூலமாகக் கிடைக்கும் நன்மையை விலை உயர்வு விழுங்கி விடும். சான்றாக, ஒருவர் பெறும் மாத வருவாய் ஐந்து விழுக்காடு உயரும் பொழுது, விலை உயர்வு எட்டு விழுக்காடாக இருந்தால், அவரின் வருவாய் அதிகமானதால் உண்டாகும் பொருளாதார நலன் மூன்று விழுக்காடு குறைவடைகிறது.

மூலதனம் பெருக வேண்டுமானால் விலைவாசியை கட்டுக்குள் வைக்க வேண்டும். ஏனெனில், விலை உயர்வு மக்களின் சேமிப்பை அதிகப்பட விடாமல் தடுக்கிறது. சரியான கொள்கையின் மூலமாக விலைவாசி கடுமையாக உயராமல் இருக்கச் செய்யும் பொழுது, அது சேமிப்பை அதிகப்படுத்தி, தொழில் மூலதனத்தைப் பெருக்கி, புதிய வேலை வாய்ப்புகளை அதிகப்படுத்த ஏதுவாகும்.

மூன்றாவது, நாட்டின் 90 சதவீதமானோர், அமைப்பு சாராத துறை சார்ந்த வேலைகளில் பணி செய்கிறார்கள். அரசு நிதிக் கொள்கையின் மூலமாக இந்தத் துறையில் வேலை அல்லது தொழில் செய்பவர்களுக்கு உதவும் வகையில் திட்டங்களை செயல்படுத்த வேண்டும்.

நான்காவது, மூலதன அதிகரிப்பின் மூலம் உண்டாகும் வருவாய் உயர்வு சென்று அடைய முடியாத கோடிக் கணக்கான அடித்தட்டு மக்கள் இருக்கிறார்கள். இவர்கள் படிப்பு அறிவு இல்லாதவர்கள். கிராமப்புற வாசிகள், மலைவாழ் மக்கள்

போன்றவர்களாவர். இவர்களில் வறுமைக் கோட்டுக்குக் கீழே கோடிக் கணக்கானோர் இருப்பார்கள். இந்த மக்களுக்கு அரசு அத்தியாவசிய தேவைகளை நேரடியாக இலவசமாகவும், குறைந்த விலையிலும், மானியமாகவும் கொடுத்து உதவ வேண்டும்.

2014 – 2018

கடந்த நான்கு ஆண்டுகளில் பொருளாதார நிலை சரிவடைந்து விட்டது. அரசின் கொள்கைகள் எல்லா மக்களின் நல மேம்பாட்டையும் உள்ளடக்கியதாக இல்லை. எனவே, ஏராளமான மக்களுக்கு நலன் மேம்படாமல் போனது மட்டும் அல்ல. இருக்கும் நலனையும் நலிவு அடையச் செய்து விட்டது.

கடுமையான வருவாய் ஏற்றத் தாழ்வு

இந்தியாவின் மொத்த வருவாய் உயர்வில் 79% வருவாய் உயர்வு, நாட்டின் ஒரு விழுக்காடு மக்களிடம் மாத்திரமே போய்ச் சேருகிறது என்று ஆக்ஸ்ஃபாம் இன்டர்னேஷனல் (Oxfam International)- (உலகின் வறுமை மற்றும் சமூக அநீதியை குறைக்கத் தாக்கம் ஏற்படுத்தும் நோக்கத்துடன் செயல்படும் அமைப்பு) 2018 இல் கணித்து இருக்கிறது. அதாவது, நாட்டின் மொத்த வருவாய் உயர்வில் 21% வருவாய் மட்டுமே 99% மக்களுக்கு, போய்ச் சேருகின்றது.

இது வருவாய் ஏற்றத் தாழ்வு எவ்வளவு கடுமையாக இருக்கிறது என்பதைக் காண்பிக்கிறது. தாராள மயமாக்கல் கொள்கையைக் கடைப்பிடிக்கும் எல்லா நாடுகளிலும் பொதுவாக, முதலில் ஏற்றத் தாழ்வு உண்டாவது தவிர்க்க முடியாததுதான். ஆனால், இந்தியாவில் தாராள மயமாக்கல் அறிமுகப்படுத்தி சுமார் முப்பது ஆண்டுகள் ஆகி விட்ட நிலையிலும் கூட வருவாய் ஏற்றத் தாழ்வு மிகக் கடுமையாகிக் கொண்டு இருப்பது, எல்லோருக்கும் நலன் பெருகும் பொருளாதார கொள்கைகள் வகுத்துப் பின்பற்றப்பட வில்லை என்பதைத் தெளிவாகக் காண்பிக்கிறது.

அரசின் கொள்கைக் குழப்பம், இதுவரை பெரும்பாலான மக்கள் பெற்று வந்த பொருளாதார நலனைக் கூட மட்டுப்படுத்தி விட்டது. அரசின் செயல்பாடுகள், நாட்டில் கோடிக் கணக்கான மக்கள் தொடர்ந்து வறுமையில் சிக்கிக் கொண்டு இருப்பதற்கும் நடுத்தர மக்களின் நலன் கூட தொய்ந்து விட்டதற்கும் காரணங்கள் ஆகும்.

வேலைவாய்ப்பு கடும் வீழ்ச்சி

வேலை இல்லாத நிலை கடினமாகிக் கொண்டே இருக்கிறது. அசிம் ப்ரேம்ஜி பல்கலைக் கழகத்தில் (Azim Premji University) உள்ள தொடர் வேலை வாய்ப்பு மையத்தின் (Centre for Sustainable Employment) ஆராய்ச்சியாளர்களும், திட்ட வல்லுநர்களும், சமூக ஆர்வலர்களும் சேர்ந்து தயாரித்து இருக்கும் ஆய்வு அறிக்கையின் படி, வேலை வாய்ப்பின்மை பல ஆண்டுகளாக (மக்கள் தொகையில்) இரண்டு முதல் மூன்று விழுக்காடாக இருந்து, கடந்த நான்கு ஆண்டுகளில் ஐந்து விழுக்காடாக கடுமையாக உயர்ந்து விட்டது.

இதில் இளைஞர்களிடையே வேலை இன்மை மிக அதிகமாக, பதினாறு விழுக்காடாக உள்ளது. பொருள் உற்பத்தி உயர்வுக்கு ஏற்ப புதிய வேலை வாய்ப்புகள் உண்டாக வில்லை. அதாவது, பத்து விழுக்காடு பொருள் உற்பத்தி உயர்வு ஒரு விழுக்காடுக்கும் குறைவான புதிய வேலை வாய்ப்பையே உண்டாக்கி இருக்கிறது. மேலும், நடுவண் அரசின் தேசிய மாதிரி அளவீடு அமைப்பு (National Sample Survey Organisation) ஜனவரி 2019 வெளியிட்டு உள்ள வேலை வாய்ப்பு அறிக்கை, நாட்டின் இப்பொழுது உள்ள வேலை இன்மை நிலை, 45 ஆண்டுகளுக்கு முன் இருந்த கடுமையான வேலை இன்மை நிலைப்பாட்டு அளவுக்கு ஈடாக மிக மோசம் அடைந்து விட்டது என்று குறிப்பிடுகிறது. பண மதிப்பு இழப்புதான் இந்தக் கடுமையான வேலை வாய்ப்பு வீழ்ச்சிக்கு முக்கிய காரணம் ஆகும்.

விவசாய வீழ்ச்சி

நாட்டின் மக்கள் தொகையில் சுமார் 60% மக்கள் வசிக்கின்ற கிராமப்புற வருவாய் மொத்த வருவாயில் 15% சதவீதம் மட்டுமே ஆகும். இந்த நிலைதான் தொடர் கதையாகி விட்ட கிராமப்புற வறுமைக்குக் காரணம் ஆகும். கடந்த நான்கு ஆண்டுகளில் நெல் உற்பத்தி சராசரியாக ஆண்டிற்கு 1.2% கூடி இருக்கிறது. (2010 முதல் 2014 வரை 4.7%).

கோதுமை உற்பத்தி உயர்வு 0.9% (2010-2014-ல் 4.4%). இதைப் போலவே சிறு தானியம், எண்ணைய் வித்துக்கள், கரும்பு, பஞ்சு ஆகிய விவசாயப் பொருட்கள் உற்பத்தி இந்த ஆண்டுகளில் மிக மந்த நிலையில் இருந்தன.

தொழில் துறைத் தொய்வு

தொழில் துறை உற்பத்தி 2013-14 இருந்து 2017-18 வரை சராசரியாக ஆண்டிற்கு நான்கு விழுக்காடு தான் உயர்ந்து உள்ளது. அரசின் பொருளாதாரக் கொள்கை நிலையாக இல்லாததால் தொழில் துறை உற்பத்திப் பெருக்கம் இப்படியாக மந்தமாகி விட்டது.

விலைவாசி உயர்வு

நுகர்வோர் விலைவாசி குறியீடு எண் (Consumer Price Index) நான்கு ஆண்டுகளில் (2013-14 இல் இருந்து) 22% உயர்ந்து இருக்கிறது. இது மக்களின் வருவாய் கூடினாலும் விலை ஏற்றத்தால் ஏற்படும் ரூபாயின் மதிப்பு குறைவு, மக்களின் நலன் மேம்பாட்டை மட்டுப்படுத்துகிறது என்பதைத்தான் காண்பிக்கிறது. பணப் புழக்கத்தின் அளவைக் கட்டுப்படுத்துவது மூலமாக விலைவாசி உயர்வை தடுப்பது தான் ரிசர்வ் வங்கியின் பணக் கொள்கையின் (Monetary Policy) முக்கிய நோக்கங்களில் ஒன்றாகும்.

விலைவாசி உயர்வை (பணவீக்கம்) கட்டுக்குள் வைப்பதுதான் சிறந்த வறுமை ஒழிப்பு கொள்கை என ரிசர்வ் வங்கி உறுதி படக் கூறுகிறது. அரசின் கொள்கையும், செயல்பாடுகளும் ரிசர்வ் வங்கியின் கொள்கை, கோட்பாடுகளுக்கு முக்கியத்துவம் கொடுக்கவில்லை எனத் தோன்றுகிறது.

பட்ஜெட் பற்றாக்குறை

மத்திய அரசின் பட்ஜெட்டில், 2014-15 இருந்து 2018-19 வரை செலவுக்கு எதிரான வரி வருவாய் பற்றாக் குறையை சரி செய்வதற்காக அரசு சுமார் ரூ.28 லட்சம் கோடிகள் கடன் வாங்கி இருக்கிறது. ஆனால் நிதியை கவனமாக, மக்கள் வருவாயை பெருக்கும் நோக்கத்திற்காக செலவு செய்யவில்லை.

இப்படியாக, அரசின் அண்மைய பொருளாதார கொள்கைச் செயல்பாடுகள், அத்தியாவசியப் பொருட்களின் உற்பத்தியை மட்டுப்படுத்தி, புதிய வேலை வாய்ப்புகளை உருவாக்காமலும், லட்சக் கணக்கான சிறு தொழில் நிறுவனங்களை நலிவு அடையச் செய்து ஏராளமானோருக்கு வேலை இழப்பு ஏற்படுத்தியும், பெரும்பான்மை மக்களின் நலனை ஒடுக்கி விட்டன.

– எஸ். ஜெ. எஸ். சுவாமிதாஸ், இயக்குநர், ரிசர்வ் வங்கி பொருளாதாரத்துறை (ஓய்வு)
9841024391

மரவள்ளி சாகுபடியில் நல்ல லாபம்

Valar
-
0
மரவள்ளி சாகுபடியில் நல்ல லாபம்

சில மாவட்டங்கள் மரவள்ளிக் கிழங்கு சாகுபடியில் பெரிய அளவில் பயன் அடைந்து கொண்டிருக்கின்றன. தன்னுடைய சிறு வயதில் இருந்தே கேரளாவில் மரவள்ளி சாகுபடியில் ஈடுபட்டு வரும் திரு. ஆர். அய்யாக்கண்ணு, மரவள்ளி பயிரிடுதல் தொடர்பான சில செய்திகளை நம்முடன் பகிர்ந்து கொண்டார். அவற்றில் இருந்து,
”படிப்பதற்கான வாய்ப்பு இல்லாததால் என்னை என் சிறுவயதிலேயே விவசாயப் பணிகளுக்கு கேரளாவுக்கு அனுப்பி வைத்து விட்டார்கள். தொடக்கத்தில் இருந்தே அங்கு மரவள்ளி சாகுபடிதான். அதனால் எனக்கு மரவள்ளிப் பயிர் குறித்த அத்தனைப் பணிகளும் அத்துப்படியாகி விட்டன.

இப்போது எனக்கு இங்கே சொந்த வீடும், விவசாய நிலமும் இருக்கிறது. மரவள்ளிக் கிழங்கை குச்சிக் கிழங்கு, குச்சி வள்ளிக் கிழங்கு, மரச்சீனிக் கிழங்கு என்றெல்லாம் அழைக்கிறார்கள். மலையாளத்தில் கப்பா என்று அழைக்கிறார்கள். கேரள மக்கள் கப்பாவை அதிக அளவில் விரும்பி உண்ணுகிறார்கள். இங்கு உள்ள எல்லா உணவகங்களிலும் மரவள்ளிக் கிழங்கு தொடர்பான உணவுப் பொருட்கள் எப்போதும் இருக்கும்.

மரவள்ளிக் கிழங்கு இந்தியாவின் பதின்மூன்று மாநிலங்களில் பயிரிடப்பட்டாலும் தென்னிந்தியாவில்தான் அதிகமாக பயிரிடப்படுகிறது. குறிப்பாக கேரளா, தமிழ்நாடு, ஆந்திர மாநிலங்களில் அதிக அளவில் பயிரிடப்படுகிறது.

மரவள்ளி அறுவடைக் காலத்தில வணிகர்கள் வந்து மொத்தமாக கொள்முதல் செய்து பல்வேறு ஊர்களுக்கும் விற்பனைக்கு அனுப்புவார்கள். அங்கிருந்து உணவகங்கள், சிப்ஸ் தயாரிப்போர் தங்கள் தேவைக்கு ஏற்ப வாங்கிக் கொள்வார்கள். இது தவிர சவ்வரிசி ஆலைகளுக்கும் மொத்தமாக வாங்கிச் செல்வார்கள். சவ்வரிசிக்கு என நிறைய ஆலைகள் இயங்கி வருகின்றன.

வேறு சில தொழில்களுக்கான மூலப்பொருளாகவும் மரவள்ளி விளங்குகிறது. அண்மையில் மக்கும் பிளாஸ்டிக் தயாரிப்பிலும் மரவள்ளியை மூலப்பொருளாக பயன்படுத்தும் செய்திகள் வந்து கொண்டிருப்பதும் கவனிக்கத் தக்கது.” என்றார்.

– ஆர். காயத்ரி (மாணவ பத்திரிகையாளர்)

ஜிஎஸ்டி பதிவு இல்லாதவர்கள் இ-வே பில் எடுப்பது எப்படி?

Valar
-
0
ஜிஎஸ்டி பதிவு இல்லாதவர்கள் இ-வே பில் எடுப்பது எப்படி?

சான்றாக அ என்பவர் திருப்பூரில் பனியன் உற்பத்தி செய்யும் சிறுதொழில் நிறுவனர். அவர் நிறுவனத்தின் ஆண்டு விற்பனை வருமானம் புதிய விற்பனை வருமான வரம்பு ரூ. 40 இலட்சங்களுக்குள் வருவதால் ஜிஎஸ்டி பதிவு எண் பெறாமல் தன் தொழிலை நடத்தி வருகின்றார்.

இவர் தன் உற்பத்திப் பொருட்களை தமிழ் நாட்டிற்குள் அல்லது மற்ற மாநிலங்களுக்கு அனுப்பும் போது சரக்குடன் இ-வே பில் (மின்னணு வழி பட்டியல்) அனுப்ப வேண்டுமா? ஆம் எனில் ஜிஎஸ்டியில் பதிவு எண் பெறாத அவரால் இந்த இ-வே பில்லை தயார் செய்து தன் உற்பத்திப் பொருட்களை அனுப்ப முடியுமா? என்ற கேள்வி எழுகிறது.

இவ்வாறானவர்களுக்கு உதவுவதற்காகவே ஜிஎஸ்டி இணைய தளத்தில் இ-வே பில் ஃபார் சிட்டிசன்ஸ் (E-Way Bill for Citizens) எனும் வாய்ப்பு இருக்கின்றது.

இ-வே பில் என்பது ஜிஎஸ்டியில் பதிவு எண் பெற்று வியாபாரம் செய்யும் ஒருவர் அல்லது ஜிஎஸ்டிஏயில்  (GSTA) பதிவு பெற்ற பொருள் போக்குவரத்து செய்யும் ஒருவர் பொருட்களை கொண்டு செல்லும் போது கூடவே அவைகளுக்கான ஆதார ஆவணமாக கொண்டு செல்வதே இந்த பில் ஆகும்.

ஒரு மாநிலத்திற்குள் அல்லது மாநிலங்களுக்கு இடையே ரூ. 50,000 (ரூபாய் ஐம்பதாயிரம்) மதிப்பிற்கு மேல் பொருட்களை கொண்டு செல்லும் போது கண்டிப்பாக இந்த பில் உடன் மட்டுமே பொருட்களை கொண்டு செல்ல வேண்டும். இந்த பட்டியலை உருவாக்குவதற்காக தனியாக இ-வே பில் சிஸ்டம் (E-Way Bill System) எனும் தளம் உதவுகின்றது.

ஜிஎஸ்டியில் பதிவு பெற்றவர் ரூபாய் ஐம்பதாயிரம் மதிப்பிற்கு மேல் பொருட்களை கொண்டு செல்லும் போது இந்த தளத்தில் இவ்வாறான பில்லை உருவாக்கி அச்சிட்டு கொண்டு செல்லலாம். ஜிஎஸ்டியில் பதிவு பெறாதவரிடம் இருந்து, ஜிஎஸ்டியில் பதிவு பெற்றவர் ரூபாய் ஐம்பதாயிரம் மதிப்பிற்கு மேல் பொருட்களை பெறும் போது பொருட்களை பெறுபவர் இந்த பில்லை உருவாக்கி அச்சிட்டுக் கொண்டு செல்ல வேண்டும்.

சாலைவழி, தொடர்வண்டி வழி, வான்வழி ஆகியவற்றின் வாயிலாக ரூபாய் ஐம்பதாயிரம் மதிப்பிற்கு மேல் பொருட்களை கொண்டு செல்லும் பொருள் போக்குவரத்தாளர் கண்டிப்பாக இந்த பில் உடன் மட்டுமே அவைகளை கொண்டு செல்ல வேண்டும். ஜிஎஸ்டியில் பதிவு பெறாதவர் பின்வரும் வழிமுறைகளை பின்பற்றி இந்த மின்னணு வழி பட்டியலை உருவாக்கி அச்சிட்டு கொள்ளலாம்.

முதலில் இ-வே பில் சிஸ்டம் எனும் தளத்திற்குள் செல்ல வேண்டும். பின்னர் அதில் உள்ள ரெஜிஸ்ட்ரேஷன் (Registration) எனும் பட்டியில் இ-வே பில் ஃபார் சிட்டிசன்ஸ் எனும் வாய்ப்பை தேர்வு செய்து கிளிக் செய்ய வேண்டும். தொடர்ந்து விரியும் திரையில் Generate New EWB எனும் பொத்தானை தேர்வு செய்து கிளிக் செய்ய வேண்டும்.

பின்னர் விரியும் விண்ணப்பப் படிவத்தில் தேவையான அனைத்து விவரங்களையும் நிரப்ப வேண்டும். இவ்வாறு விவரங்களை நிரப்பும் போது மிக முக்கியமாக நாம் பொருட்களை கொள்முதல் செய்கின்றோம் எனில், இன்வேர்ட் ஆப்ஷன் (Inward Option) எனும் வாய்ப்பையும், நாம் பொருட்களை விற்பனை செய்கின்றோம் எனில், அவுட்வேர்ட் ஆப்ஷன் (Outward Option) எனும் வாய்ப்பையும் தேர்வு செய்து கொள்ள வேண்டும். நாம் ஜிஎஸ்டியில் பதிவு பெறாதவர் என்பதால் ஜிஎஸ்டிஐஎன் (GSTIN) எனும் புலத்தில் யூஆர்பி (URP) என உள்ளீடு செய்து, இறுதியாக சப்மிட் எனும் பொத்தானை தேர்வு செய்து கிளிக் செய்ய வேண்டும்.

இதனை தொடர்ந்து நமக்கான இ-வே பில் ஒன்று உருவாகி திரையில் தோன்றும். அதை அச்சிட்டுக் கொள்ள வேண்டும். பொருள் போக்குவரத்தாளர் இந்த பில் உடன் குறிப்பிட்ட இடத்திற்கு கொண்டு செல்லலாம்.

– முனைவர் ச. குப்பன்

இனி எல்லாம் மின்சார வண்டிகளே !

Valar
-
0
இனி எல்லாம் மின்சார வண்டிகளே !

இன்றைய உலகில் மின் வண்டிகளுக்கு மிகப்பெரிய சந்தை ஏற்பட்டு உள்ளது. இந்த சந்தையை இன்னும் பெரிதாக்க உலகின் அதிக மக்கள் தொகை கொண்ட சைனா திட்டமிட்டு உள்ளது. இது தானியங்கி வண்டிகளை உருவாக்கும் மிகப்பெரிய நிறுவனங்களிடையே உற்சாகத்தை ஏற்படுத்தி உள்ளது.

இந்த ஆண்டு ஜனவரியில், சைனாவில் வண்டிகளை உற்பத்தி செய்யும் பன்னாட்டு நிறுவனங்களான டயோட்டா மோட்டார் & ஜெனரல் மோட்டார் மற்றும் சைனா நாட்டின் உள்நாட்டு நிறுவனங்களான பிஒய்டீ மற்றும் பீஏஐசி மோட்டார் போன்ற நிறுவனங்கள் எல்லாம், தாங்கள் புதிதாக உற்பத்தி செய்ய விரும்பும் மின்னாற்றல் வண்டிகளுக்கு குறைந்தபட்ச செயல்திட்டத்தை வகுத்து உள்ளன.

தனி மின்வண்டிகள் – ஹைபிரிட் வண்டிகள்

இந்த ப்ராஜெக்டின் படி, புதிய ஆற்றல் வண்டிகள் (என்இவி) அல்லது எரிபொருள் மற்றும் மின்சாரத்தில் இணைந்து இயங்கும் ஹைபிரைட் வண்டிகள், முழுக்க முழுக்க மின்கலத்தில் (பேட்டரி) செயல்படும் வண்டிகள் மற்றும் ஃபியூயல் செல் ஆட்டோக்களுக்கான ப்ராஜெக்ட்கள் வகுக்கப்பட்டு உள்ளன.

அந்த நாட்டு அரசு, 2019 முதல், சைனாவில் இருந்து ஏற்றுமதி செய்யப்படும் அல்லது உள்நாட்டில் பயன்படுத்தப்படும் வண்டிகள் பசுமையானதாக (சுற்றுச் சூழலுக்கு ஏற்றதாக) ­இருக்க வேண்டும் என வேண்டுகோள் விடுத்து உள்ளது.

எரிபொருளில் இயங்கும் வண்டிகள், சுற்றுச்சூழலுக்கு மாசு ஏற்படுத்துவதில், முழு உலகத்திற்கும் ஆகப்பெரிய தலைவலியாக மாறி உள்ளன. அனைத்து உலக நாடுகளும் கரியமில மாசுவைக் குறைக்க வேண்டும் என வலியுறுத்தி வருகின்றன.

இத்தகைய சூழலில், சைனாவில் கரியமில மாசுவை அதிகளவில் ஏற்படுத்தும் வண்டிகளை உற்பத்தி செய்யும் நிறுவனங்களுக்கும் சரி, சுற்றுச்சூழல் மாசு ஏற்படுத்துவதைத் தடுப்பதில், அரசின் போதுமான புள்ளிகளைப் பெறாத நிறுவனங்களின் மீதும் சரி, சைனா அரசு எச்சரிக்கையும், தண்டமும் (ஃபைன்) விதித்து வருகிறது.
பசுமை வெறியில் சைனா

இதனைப் பற்றி கலிஃபோர்னியா பல்கலைக்கழகத்தில், ‘ஆற்றல் மற்றும் போக்குவரத்துக்கான சைனா நடுவத்தின் இயக்குநர் யுன்ஷி வாங்க், குறிப்பிடும் போது, “இது இதர உலக நாடுகளுக்கு ஒரு முன்மாதிரி மட்டுமல்ல, இது உலகளவில் ஒரு நடைமுறை மாற்றத்தை (கேம் சேஞ்சர்) ஏற்படுத்தும் என நம்புகிறார்.

இது உலகளவில் அதிகளவில் மாசு ஏற்படுத்தும் அமெரிக்காவைக் குறிவைத்து சொல்லப்பட்டது என்கிறார்கள் வர்த்தக வல்லுநர்கள். தற்போது அமெரிக்க அதிபர் டிரம்ப், மைலேஜ் தேவையைக் கருத்தில் கொண்டு, மாற்று எரிபொருளுக்கு ஆதரவு தெரிவிப்பதில் இருந்து பின்வாங்கி விட்டார் என்று சொல்லப்படுகிறது.

இத்தகைய சூழ்நிலையில், சைனா மின் வண்டிகளைக் கொண்டு எதிர்கால உலகை அமைப்பதில் மரண வெறியில் (டெட் – சீரியஸ்) ஈடுபட்டு உள்ளது.

இதன் மூலம், எரிபொருள் இறக்குமதிக்காக, மற்ற நாடுகளைச் சார்ந்து இருப்பது குறைவதோடு, கரி மாசுவால், சைனா நகரங்கள் புகைவதில் இருந்து தப்பிக்கவும் முடியும். அதோடு உள்நாட்டில் வண்டி உற்பத்தி செய்யும் நிறுமங்களுக்கு உலகளவில் மிகப்பெரிய சந்தையையும் ஏற்படுத்த முடியும் என சைனா நம்புகிறது.
வரப்போகும் மின்-சந்தை

சைனாவின் சந்தையைப் பொறுத்தவரை, மின் வண்டிகளை உற்பத்தி செய்து, தங்களது இலக்கை பெருமளவில் எட்டி வருகின்றன. வரப்போகும் 2025 முதல், ஆண்டுக்கு சராசரியாக, ஏழு மில்லியன் மின் கார்களை விற்பனை செய்ய சைனாத் தலைவர்கள் விரும்புகின்றனர்.

அல்லது தாங்கள் உற்பத்தி செய்யும் கார்களில் 20 விழுக்காடு மின் கார்களாக இருக்க வேண்டுமென அறிவுறுத்துகின்றனர். இந்த கார்கள் எரிபொருள் / மின்சாரம் இரண்டிலும் இயங்கும் ஹைபிரிட் கார்களாகவோ அல்லது மின்கலத்தில் (பேட்டரி) இயங்கும் கார்களாகவோ இருக்கலாம்.

சைனாவில் கடந்த ஆண்டு விற்பனையான வண்டிகளில் நாற்பது விழுக்காடு பங்காற்றி இருக்கும், உலகின் மிகப்பெரிய வண்டி உற்பத்தி நிறுவனமான ஓல்ஸ் வேகன் ஏஜி, தமது நிறுவனம் அடுத்த பத்து ஆண்டுகளில், சைனா முழுவதும் நாற்பது உள்ளூர் புதிய மின் வண்டிகளை உற்பத்தி செய்யும் மையங்களை அமைக்கப் போவதாக அறிவிப்பு கொடுத்து உள்ளது.

இது அரசின் இலக்கை (டார்கெட்) எட்டும் வகையில் செயல்படும் என்றும் அறிவித்து உள்ளது. சைனா அரசின் பசுமை இலக்குப் புள்ளிகளின் (கிரடிட்ஸ்) படி, 300 கிமீ செல்லும் தனி மின் வண்டிக்குக் கிடைக்கும் பசுமை இலக்குப் புள்ளிகளை விட எரிபொருள் மற்றும் மின்சாரம் இரண்டிலும் இணைந்து இயங்கும் ஹைபிரிட் வண்டிகளுக்கு சற்றுப் புள்ளிகள் குறைவாகக் கிடைக்கும்.

இந்த விதிமுறைகள் அனைத்து வண்டி உற்பத்தியாளர்களுக்கும் பொருந்தும். தனி எரிபொருளில் செயல்படும் வண்டிகளுக்குப் பசுமை இலக்குப் புள்ளிகள் இல்லை.

பீஎம்டபிள்யூ ஏஜி நிறுவனம் கூட சைனாவில் அதிகளவில் கார்களை விற்பனை செய்து உள்ளது. இந்நிறுவனம் கூட, இரண்டு வகை தனி மின் கார்களையும், சில வகை ஹைபிரிட் கார்களையும் உற்பத்தி செய்ய திட்டமிட்டு உள்ளது.

இருந்தாலும் சைனாவில் சில நிறுவனங்கள் அரசு நிர்ணயித்த இந்த பசுமை இலக்குப் புள்ளிகளுக்கு ஈடு கொடுக்க முடியாமல் திணறி வருகின்றன. இதனைப் பற்றி குறிப்பிடும் தானியங்கித் துறை ஆய்வாளர், “இன்னும் கூட வண்டிகள் உற்பத்தி நிறுவனங்கள் மின் வண்டிகளை உற்பத்தி செய்வதில் முழுவதும் தயாராகவில்லை” எனக் குறிப்பிடுகிறார்.

வாடிக்கையாளர்களின் வரவேற்பு:

தற்போது கார் உற்பத்தியாளர்களின் காட்சிக்கூடங்களில் (ஷோரூம்ஸ்) மின் வண்டிகளும் பெருமளவில் காட்சிக்கு வைக்கப்படுகின்றன. ஆன்லைனில் கூட மின் வண்டிகள் விற்பனைக்கு வைக்கப்பட்டு உள்ளன. மின் சைக்கிள் முதல், மின் பைக்குகள், மின் கார்கள், மின் மூன்று சக்கர சைக்கிள்கள் விதவித மாடல்களில் உள்ளன.

ஆனால் வாடிக்கையாளர்கள் இவற்றிற்கு வரவேற்பு கொடுக்கிறார்களா என்றால், பெருமளவில் இல்லை என்றே சொல்லலாம். காரணம், இன்றைய நவீன எரிபொருள் வண்டிகளை விட, மின் வண்டிகளின் விலை அதிகளவில் இருப்பதே. இந்த மின் வண்டிகளின் மின்கலன்களுக்கே (பேட்டரிகள்) அதிக விலை கொடுக்க வேண்டி உள்ளது.

ஆனாலும், பசுமையை நேசிக்கும் சிலர் மின் வண்டிகளை வாங்கி, பயன்படுத்தி வருகின்றனர். இன்னும் சில ஆண்டுகளில் மின்கலன்களின் விலை குறைய வாய்ப்பு இருப்பதால், மின் வண்டிகளின் விலையும், எரிபொருள் வண்டிகளுக்கு இணையாகக் குறையலாம் என துறைசார் வல்லுநர்கள் நம்பிக்கை தெரிவித்து உள்ளனர்.

– ஹெலன் ஜஸ்டின்

ஒரு தாயும் அவருடைய மகளும் வரைபடமும்

Valar
-
0
ஒரு தாயும் அவருடைய மகளும் வரைபடமும்

குடும்பத் தலைவியான தாய் ஒருவர் மகளிர் மாத இதழ் ஒன்றை மிக ஆழ்ந்து படித்துக் கொண்டு இருந்தார் அறிவுத்திறன் மிக்க சுறுசுறுப்பான அவருடைய மகள்” அது என்ன? இது என்ன?” என்றவாறு கேள்விகளுடன் அந்த குடும்பத் தலைவியை மகளிர் மாத இதழை தொடர்ந்து படிக்க முடியாமல் தொந்திரவு செய்து கொண்டு இருந்ததால், தம் மகளின் தொந்திரவை தவிர்க்கும் பொருட்டு அருகில் இருந்த உலக வரைபடம் ஒன்றை தாறுமாறாக கிழித்து, அவைகளை ஒன்றிணைத்து முழுமையான உலக வரைபடமாக செய்யுமாறு பணித்து விட்டு தொடர்ந்து மகளிர் மாத இதழை படித்துக் கொண்டு இருந்தார். அந்த தாய்.

சுறுசுறுப்பான அறிவுத்திறன் மிக்க அவருடைய மகள் உடன் ஓரிரு நிமிடங்களில் அவைகளை ஒன்றிணைத்து முழுமையான உலக படத்தை “அம்மா! இதோ பார் நான் முழுமையான உலக வரைபடத்தை ஒருங்கிணைத்து விட்டேன்” என கொண்டு வந்து காட்டினாள். கிழிந்த துனுக்குகளை கொண்டு முழுமையான உலக வரைபடத்தை நாள் முழுக்க முயன்றாலும் ஒருங்கிணைக்க முடியாது. அதனால் நாமும் நம் மகளின் தொந்திரவு இல்லாமல் தொடர்ந்து மகளிர் மாத இதழை படித்து விடலாம் என எண்ணினால்.

இவ்வளவு விரைவில் ஒருங்கிணைத்து கொண்டு வந்து விட்டாளே என அந்த குழந்தையின் தாய்க்கு மிகவும் வியப்பாகி விட்டது. உலக வரைபடம் மிகச்சரியாக ஒருங்கிணைந்து இருந்ததை கண்டு” மகளே! எவ்வாறு இவ்வளவு விரைவில் கிழிந்த துனுக்குகளை கொண்டு முழுமையான உலக வரைபடத்தை ஒருங்கிணைத்து உருவாக்க முடிந்தது?” என வினவினார் அந்த தாய். அதற்கு அவருடைய மகள் “அது ஒன்றும் அவ்வளவு கடினமான பணியில்லையம்மா உலக வரைபடத்தை திருப்பி பாருங்கள்!” என்றாள் அவருடைய மகள்.

திருப்பி பார்க்கும் போது ஒரு முழுமையான மனிதனின் உருவப்படம் இருந்தது “அம்மா! நான் உலக வரைபடத்தின் மறுபுறமான பின் பகுதியில் இருந்த மனிதனின் படத்தை மிகச் சரியாக பொருத்தினேன், இந்த பக்கம் முழுமையான உலக வரைபடம் உருவாகி விட்டது அவ்வளவுதான்!” என அடுத்து தொந்திரவை கொடுக்க தொடங்கினால் தன் தாய்க்கு.

அவ்வாறே நம் வியாபார நடவடிக்கைகளின் போது தீர்வு செய்ய முடியாத அளவிற்கு நம் முன் எழும் எந்த ஒரு சிக்கலையும் அதன் மறுபுறத்தை பார்வையிட்டு எளிய வழியில் மிகச்சரியாக தீர்வு செய்ய முடியும் என்ற செய்தியை மனதில் கொள்ள வேண்டும்.

– வசந்தகுமாரி

வணிகர்களுக்கான ஜிஎஸ்டி விளக்கத் தொடர்

Valar
-
0
வணிகர்களுக்கான ஜிஎஸ்டி விளக்கத் தொடர்

குறைக்கப்பட்ட வீடுகளுக்கான ஜிஎஸ்டி
வீடு வாங்குபவர்களுக்கு சலுகை அளிக்கவும், வீட்டு வசதி துறையை உயர்த்தவும், ஜிஎஸ்டி கவுன்சிலின் 33வது கூட்டம் 24/02/2019 அன்று நடைபெற்றது அந்த நேரம் வீட்டு வசதிக்காக ஜிஎஸ்டி சதவீதம் குறைப்பு மற்றும் முக்கிய பரிந்துரைகள் செய்யப்பட்டு உள்ளது. அவை என்ன என்று பார்ப்போம்.

ஜிஎஸ்டி வரி விகிதம்

மலிவான பிரிவிற்கு வெளியே வாழும் குடியிருப்புகளுக்கு உள்ளீட்டு வரி வரவு இல்லாமல் 5% வரி விதிக்க வேண்டும். இது தற்பொழுது 12% உள்ளது.
அதேபோல் மலிவு விலை வீடுகளுக்கான வரி விகிதம் 8% இருந்து 1% ஆக குறைக்கப்பட உள்ளது. இதற்கு உள்ளீட்டு வரி வரவு கிடையாது. இந்த வரி விகிதங்கள் 01/04/2019 முதல் நடைமுறை படுத்தப்படும்.

மலிவு விலை வீடு எது?

மாநகராட்சி நகரங்களில் 90 சதுர மீட்டர் (968 சதுர அடி) பரப்பளவில் உள்ள ஒரு குடியிருப்பு வீடு அல்லது பிளாட்
பெரு நகரங்களில் 60 சதுர மீட்டர் (645 சதுர அடி) பரப்பளவில் உள்ள ஒரு குடியிருப்பு

வீடு அல்லது பிளாட்

நகரம் அல்லது பெரு நகரம் ஆகிய இரண்டிலும் ரூ. 45 லட்சம் வரை மதிப்பு உள்ள குடியிருப்புகளுக்கு மட்டும் இது பொருந்தும்.

பெருநகரங்கள் என்பது சென்னை பெங்களூர், தில்லி என்சிஆர் (ழிசிஸி) (டெல்லி, நொய்டா, கிரேட்டர் நொய்டா, காஜியாபாத், குர்கான், பரிதாபாத்), ஜதராபாத், கல்கத்தா மற்றும் மும்பாய் (முழு ழிவிஸி) ஆகிய இடங்களை குறிக்கும்.

டிடீஆர், ஜெடீஏ வரி விலக்கு

டிடீஆர் (TDR), ஜெடீஏ (JDA) நீண்டகால குத்தகை, பிரிமியம் போன்ற எஃப்எஸ்ஐ (FSI) மேம்பாட்டு உரிமை ஜிஎஸ்டி செலுத்தும் குடியிருப்புகளுக்கு மட்டுமே விலக்கு அளிக்கப்படும். இந்த திட்டத்தின் விவரங்கள் ஒரு அலுவலர் குழுவால் நிர்வகிக்கப்பட்டு ஜிஎஸ்டி கவுன்சிலால் இந்த நோக்கத்திற்காக குறிப்பாக அழைக்கப்படும் கூட்டத்தில் ஒப்புதல் அளிக்கப்படும்.

சிபாரிசுகளின் நன்மைகள்

புதிய வரி விகிதங்கள் கோட்டுபாடு அடிப்படையில் ஏற்கப்பட்டதால் கீழ்கண்ட நன்மைகள் கிடைக்கும்.

மலிவு விலை வீடுகளுக்கான ஜிஎஸ்டி 1% ஆக குறைக்கப்பட்டதால், வீடு வாங்குபவர் நியாயமான விலையை பெறுகிறார்.

வாங்குபவர் அல்லது நுகர்வோர் நலன் பாதுகாக்கப்படுகிறது. 1% ஜிஎஸ்டி ஆக இருப்பதால் உள்ளீட்டு வரி வரவு அளிக்காமல் இருப்பது ஒரு சிக்கலாக இருக்காது.
திட்டத்தின் முடிவில் பயன்படுத்தப்படாத உள்ளீட்டு வரி வரவு நீக்கப்பட்டு வீடு வாங்குபவர்களுக்கு நல்ல விலை கிடைக்கும்.

துறைக்கான பணப்புழக்க சிக்கல், வளர்ச்சி உரிமைகள், நீண்ட கால குத்தலை (பிரிமியம்), எஃப்எஸ்ஐ போன்றவற்றில் ஜிஎஸ்டி விலக்கு அளிக்கப்படுகிறது.

கட்டிட அமைப்பாளர்கள் அல்லது வணிகர்களுக்கான வரி விகிதம் மற்றும் இணக்கம் மிகவும் எளிமையாக்கப்பட்டு உள்ளது.

– சு. செந்தமிழ்ச் செல்வன்

உங்களைப் பின்தொடரும் பப்பி – 1 சூட்கேஸ்

Valar
-
0
உங்களைப் பின்தொடரும் பப்பி – 1 சூட்கேஸ்

ரிமோட் கன்ட்ரோலால் இயக்கப்படும் ‘தி பப்பி’ The Puppy – 1) என்ற சூட்கேஸ் உருவாக்கப்பட்டு உள்ளது. இரண்டு சக்கரங்களால் இயங்கும் இந்த சூட்கேஸ், உங்களைப் (சூட்கேஸ் உரிமையாளரை) பின்தொடர்ந்து வர சென்சார்களைப் பயன்படுத்துகிறது.

இந்த சூட்கேசை ஒருமுறை சார்ஜ் செய்தால், மணிக்கு 10 மைல் வேகத்தில், ஏறக்குறைய 30 மைல்கள் வரை இயங்குகிறது. இந்த சூட்கேசில் தனியாகப் பிரித்து மாற்றக் கூடிய லித்தியம் – அயன் பேட்டரி பயன்படுத்தப்பட்டு உள்ளது.

இதில் கடினமான பிளாஸ்டிக் பயன்படுத்தப்பட்டு உள்ளதால், இது காலியாக இருக்கும் போதே ஒரு சில பவுண்டுகள் எடை கொண்டதாக இருக்கிறது.

மேலும், இந்த சூட்கேசில் விரல் ரேகையை ஸ்கேன் செய்யும் லாக் உள்ளது; மற்றும் செல்லும் வழியை, இருட்டிலும் தெளிவாகக் காட்டும் வெளிப்புற விளக்குகளும் பொருத்தப்பட்டு உள்ளன. இதன் விலை ஐநூறு பவுண்டுகள் என நிர்ணயம் செய்யப்பட்டு உள்ளது.

இதர ஸ்மார்ட் லக்கேஜ்களில் நான்கு அல்லது ஆறு சக்கரங்கள் பயன்படுத்தப்பட்டு உள்ள சூழ்நிலையில், இந்த பப்பி-1 இல், இரண்டே சக்கரங்களில், வேகமாக உரிமையாளரைப் பின்தொடர்ந்து வருகிறது.

இந்த சூட்கேசை, ரிமோட் கன்ட்ரோல் அல்லது ஸ்மார்ட் ஃபோனால், அறுபது அடி தொலைவில் இருந்தே இயக்க முடிகிறது. இந்த சூட்கேசை சைனாவில் உள்ள சாங்காய் ரன்மி டெக்னாலஜி நிறுவனத்தின், லக்கேஜ் உருவாக்கும் பிரிவின் உற்பத்தி மேலாளர் கிளார்க் வூ() என்பவர் உருவாக்கி உள்ளார்.

மேலும் இதே சூட்கேசை மேம்படுத்தி, சூரிய ஆற்றலால் இயங்கும் படி வடிவமைக்கப் போவதாகவும் நம்பிக்கை தெரிவித்து உள்ளார்.

– ஜஸ்டின்

1...434445...59Page 44 of 59