கோடிக் கணக்கில் புழங்கும் வணிகத்திற்கு எத்தனை வியூகங்கள் வகுக்க வேண்டும்? போட்டிகள் குவிந்து இருக்கும் பிராண்டுகளுக்கு எத்தகைய நுட்பங்களைத் தீட்ட வேண்டும்? மாறி வரும் சந்தையில் தன்னை நிலைநிறுத்த எப்படிப்பட்ட திட்டங்களைத் தீட்ட வேண்டி இருக்கும்?

போட்டி பிராண்டுகளின் வீக்னஸ் மீது, நம் வலிமையை பயன்படுத்துவதே வியூக த்தின் அடிப்படை. சந்தையில் நிலவும் வளமான வாய்ப்புகளை எளிதாகக் கைப்பற்ற பயன்படுத்தப்படும் நுட்பம்தான் வியூகம். செய்வதைத் திருந்த செய்வது மட்டும் அல்ல வியூகம். சரியான வழியைக் கணித்து தெளிவான பயணம் செய்யப் பயன்படுவதே வியூகம்.

கண்ணுக்குத் தெரியாத மாற்றம்

மாறிவரும் சந்தையைத் தெரிந்து கொள்ள வேண்டும். அதுபோல மாற வேண்டிய சந்தையை யும் புரிந்து கொள்ள வேண்டும். செய்ய வேண்டிய புதிய நிர்வாக முறைகளை, முறையாக அறிந்து கொள்ள வேண்டும். வர்த்தக உலகின் நாளொரு வளர்ச்சியும், பொழுதொரு மாற்றமும் நம் கண்களுக்குத் தெரிவதில்லை. கடந்து வந்த காலத்தை கண் திறந்து பார்க்கும் போது தான் கண்மூடித் திறப்பதற்குள் நடந்த வளர்ச்சிகள் கண்கூடாகத் தெரிகிறது.

சந்தை மாறுவதும் தெரிவதில்லை, மாறும் விதமும் புரிவதில்லை. மாற்றத் திற்குத் தேவையான காலத்தைக் கூட கணிக்க முடிவதில்லை. கடந்த 15 ஆண்டு களில் சந்தை கண்ட மாற்றங்களை எண்ணிப் பார்த்தால்தான் நாம் கடந்து வந்த வழியின் மேடுபள்ளம் தெரியும். கடக்க வேண்டிய வழியிலுள்ள புதை குழிகள் புலப்படும். வர்த்தகத்தையும் சந்தை யையும் அணுக வேண்டிய வழிமுறைகள் புரியும்.

பிராண்டுகளின் குவியல்

அந்தக் காலத்தில் கடையில் எந்தப் பொருள் வாங்கினாலும் அதன் பில்லில் “விற்ற பொருள் திரும்ப எடுத்துக் கொள்ளப் பட மாட்டாது” என்று அச்சிடப்பட்டு இருக்கும். வாங்கிய பொருட்கள் சரியில்லா விட்டால், குப்பையில் தான் போட வேண்டும் என்ற நிலை.

இன்று வாடிக்கையாளர்களே பிரதமர், முதல்வர். வாங்கிய பொருளை திருப்பி எடுக்க மாட்டோம் என்ற நிலை மாறி, “எங்கள் பொருளைப் பயன்படுத்திப் பாருங் கள். பிடிக்கவில்லையா, திருப்பித் தந்து விடுங்கள், பணம் வாபஸ்” என்று கூறுகி றார்கள்.
கடைக்கு வந்த வாடிக்கை யாளரிடம், “வாங்க சார், ஒரு ஃபோன் போட்டா, வீட்டுக்கே வந்து தருவோமே?” என்று கெஞ்சுகிறார்கள்.

சுமார் 30 ஆண்டுகளுக்கு முன்பு, எந்தப் பொருளை எடுத்தாலும், அதில், ‘பார்த்துக் கோ, எடுத்துக்கோ’ என்பது போல, ஓரிரண்டு பிராண்டுகளே இருந்தன. இன்றோ திரும்பிய பக்கங்களில் எல்லாம் பிராண்டுகள்.

நினைக்கும் நேரத்தில் அறிமுகம்

புதிய பிராண்டை அறிமுகப் படுத்து வோம் என்று நாம் நினைத்து முடிப்பதற் குள் நான் நினைத்த பிராண்டைப் போலவே வேறு மூன்று நிறுவனங்கள் உற்பத்தி செய்து கொண்டு இருக்க, மேலும் ஐந்து நிறுவனங்கள் அறிமுகப் படுத்தியே விடுகின்றன.

நாம் எதைச் செய்ய முடியா தென்று திகைத்து நிற்கிறோமோ, அதையே மூன்று பேர் செய்தே முடித்து விடுகிறார் கள். இன்றைய தொழில் நுட்ப வளர்ச்சி யைப் பார்க்க முடிவது இல்லை. எங்கிருந்து அதைக் கணிப்பது, பின் அதை எப்படிக் கையாள்வது?

ஒரு பக்கம் ஒரு பெரிய அறையை பூதம் போல அடைத்துக் கொண்டு இருந்த கணினியை, உள்ளங் கைக்குள் கைக் கணினியாக சுருக்கியது தொழில் நுட்பம் என்றால், இன்னொரு பக்கம், சிறிய டிவிகளை, திரையரங்கு அளவுக்கு பெரிதாக மாற்றியதும், தொழில் நுட்பமே.

வாங்க விரும்பும் பொருள எந்த இடத்தில் குறைந்த விலையில் கிடைக்கும் என்று தேடி, ஸ்மார்ட் ஃபோனில் ஆர்டர் செய்து விட முடிகிறது. அதே பொருளின் தரம் சரியில்லை எனில், ஃபேஸ்புக், டிவிட்டர், வலைப்பூ போன்ற சமூக வலைத் தளங்களில் வெளியிட்டு, காட்டிக் கொடுக் கவும் முடிகிறது.

இன்று சமூக வலைத் தளங்களில் ஒவ்வொரு மனிதனும் ஓர் ஊடகமே. தனிநபர்களை பகைத்துக் கொண்டால், நிறுவனங்களின் வண்ட வாளங்கள் தண்டவாளத்தில் ஏறிவிடும்.

உலக மயமாக்கம்

இத்தனை மாற்றங்களுக்கும் முக்கிய காரணமாக இருப்பது உலக மயமாக்கம் (குளோபலைசேஷன்). இந்த தத்துவம்தான் தனித்தனியாகப் பிரிந்து கிடக்கும் உலக நாடுகளை ஒரே ஊராக மாற்றி விட்டது. இந்த உலக மயமாக்கத்தை நாம் யாரும் தடுத்து நிறுத்த முடியாது. உலக மயமாக் கத்திற்கு ஏற்ப இன்று நிறுவனங்களும் மாறி வருகின்றன.

மூலப் பொருட்களை விலைகுறைந்த நாடுகளில் வாங்கி, குறைந்த வேலைக்கூலி நாடுகளில் உற்பத்தி செய்து, குறைந்த விலையில் விற்க முடிகிறது. எந்த நாட்டில் உற்பத்திச் செலவு குறைவோ, அந்த நாட்டுக்கு பொருள் உற்பத்தியை எளிதாக மாற்ற முடிகிறது. இன்று விற்பவர்களுக்கும், வாங்கு பவர்களுக்கும் உள்ள இடைவெளி குறைந்து வருகிறது. வாடிக்கையாளர் களுக்குத் தேவையான பொருள் உலகின் எந்த மூலையில் இருந்தாலும், ஆர்டர் செய்து வாங்க முடிகிறது.

உலகம் விரிகிறது, போட்டி பெருகுகிறது

உற்பத்தியாளர்களின் பிராண்டுகள் உலகம் முழுவதும் விரிவடையும் அதே நேரத்தில், உலகில் உள்ள அனைத்து நிறுவ னங்களின் பிராண்டுகளும் போட்டிக்கு வந்து விடுகின்றன. ஒருபுறம் சந்தை விரிகிறது; இன்னொரு புறம் போட்டி பெருகுகிறது.

அடுத்த தெரு கடை, பக்கத்து ஊர் நிறுவனம் என்று கண்காணும் இடத்தில் இருந்த போட்டியாளர்கள், இன்று உலக வரைபடத்தில் புலப்படாத இடத்தில் இருந்தும் போட்டியாளர்கள் நம்முடன் சண்டைக்கு (சந்தைக்கு) வந்து நிற்கிறார்கள். கண் இமைக்கும் நேரத்தில், நம் வாடிக்கை யாளர்களை இழுத்துச் சென்று விடலாம்.

மாறிவரும் சந்தையில், உலகம் தழுவி பெருகி வரும் போட்டியில், பெருகிவரும் வாடிக்கையாளர்கள் எதிர்பார்ப்புகளின் நடுவில், நமக்கு புதிய சிந்தனைகள் தேவைப் படுகிறது. நம் தொழிலுக்குத் தேவை புதிய நிர்வாக முறைகள், புதிய சிந்தனைகள், புதிய நுட்பங்கள், புதிய வியூகங்கள். அடிப்படை மாற்றங்களை ஏற்றுக் கொள்ள வேண்டும்; புதிய வழிகளில் முயற்சிக்க வேண்டும். அப்போதுதான் நம் வர்த்தகம் வளரும், தொழில் பெருகும்.

-சிவமுருகன், உப்பத்தூர்

நம்மில் பலரும், பொதுவாக மார்க்கெட்டிங் என்பதையும், விற்பனையையும் ஒன்றோடு ஒன்று குழப்பிக் கொள் வோம். ஆனால் உண்மையில் மார்க் கெட்டிங் எனப்படும் சந்தை வேறு, விற்பனை வேறு.

சந்தை என்பது பல படிகள் கொண்ட ஒரு செயல்முறை. நமது வாடிக்கையாளர் யார் என்று கண்டறிந்து, அவர் எதிர்பார்ப் பைப் புரிந்து, அவர் தேவையை போட்டி யாளர்களை விடச் சிறந்த முறையில் நிறைவு செய்து, அவரை ‘மகிழ்ச்சி’ என்று சொல்ல வைக்கும் நிலை.

மனிதனின் அடிப்படைத் தேவைகளை யும், அடிமனதில் அவனது விருப்பங்களை யும், அவனே உணராத ஆசைகளையும், அவனது உந்து ஆற்றல்களையும் உணர வைக்கும் இயலே சந்தையியல். ‘தெரிந்ததைச் செய்வோம், செய்ததை விற்போம்’ என்பது அந்தக் காலத்தில் சரியாய் இருக்கலாம். இந்தக் காலத்திற்குப் பொருந்தாது. ஓர் எடுத்துக்காட்டைப் பார்க்கலாம்.

நாம் பொருளை விற்கவில்லை
பயன்பாட்டை விற்கிறோம்

நாம் விற்பது ஒரு பொருளாக இருக் கலாம். ஆனால் வாடிக்கையாளர் வாங்கு வது பொருள் அல்ல, அவர் வாங்குவது ஒரு பயன்மதிப்பு அல்லது வேல்யூ. நாம் ஒரு பல்பு விற்பதாக நினைக்கிறோம். அல்லது நாம் நாம் விசிறி என்று நினைத்து விற்கிறோம். வாடிக்கையாளர் அதனைக் காற்று வீசும் பொருள் என்று, அதன் பயன்மதிப்பை (வேல்யூவை) மதிப்பீடு செய்கிறார்.

மேலும் நாம் ஏசி கருவியை விற்கவில்லை. வாடிக்கையாளர் கண்ணோட்டத்தில், குளிரை விற்பனை செய்கிறோம். நிறுவனத் தின் கண்ணோட்டத்தில் கார். வாடிக்கை யாளரைப் பொறுத்தவரை வசதியாக ஓரிடத் தில் இருந்து இன்னொரு இடத்திற்கு அலுங்காமல், குலுங்காமல் பயணம் செய்ய வைக்கும் கருவி.

விற்பனைக்கு இரண்டு படிகள்

வாடிக்கையாளர் கண்ணோட்டத்தில் இருந்து பார்த்து உற்பத்தி செய்ய வேண்டும்.. விற்பனைக்கு இரண்டே படிகள். ஒன்று, பொருளை உற்பத்தி செய்வது; இரண்டு, செய்த பொருளை விற்பது. மார்க்கெட் டிங்கையும் இதுபோல நினைப்பது தவறா கவே முடியும். ‘பொருளை உற்பத்தி செய், பின்பு விற்பனை செய்’ என்று நினைக்கும் உற்பத்தியாளர்கள் சிலர், தங்கள் பொருள் வாடிக்கையாளர்களுக்கு முழுவதும் பயன் படுமா, அவர்களின் தேவையை முழுவதும் நிறைவு செய்யுமா என்று சிந்திக்க மறுப்ப தால், சறுக்கல்களைச் சந்திக்கிறார்கள். ஆகவே, மார்க்கெட்டிங்குக்கு மூன்று படிகள் இருப்பதை நாம் உணர முடியும்.

சந்தைக்கு மூன்று படிகள்

முதல் படி : பயன்மதிப்பைத் தேர்ந்தெடுப் பது நம் வாடிக்கையாளர்களுக்கு என்ன பயன்மதிப்பை (வேல்யூ) வழங்குவது என்பதைக் கண்டறிய வேண்டும். எந்த பயன்மதிப்பு வாடிக்கையாளருக்கு முழுவ தும் பயன்படும் என்பதைத் தேர்ந்தெடுக்க வேண்டும்.

இரண்டாம் படி : பயன்மதிப்பை வடிவ மைப்பது – என்ன பயன்மதிப்பு என்று முடிவு செய்த பின்பு, தேர்ந்தெடுத்த பயன் மதிப்பை ஒரு பொருளாய் வடிவமைப்பது. நம் வாடிக்கையாளர்களின் தேவைகளை நிறைவேற்றும் வகையில் நம் பொருளுக்கு வடிவம் கொடுக்க வேண்டும்.

மூன்றாம் படி : பயன்மதிப்பை வழங்குவது – வாடிக்கையாளருக்குத் தேவைப்படும் பொருளை, அவருக்குத் தேவைப்படும் வடி வத்தில், வாடிக்கையாளர் கைக்கு கொண்டு சேர்க்கும் படி இது. இந்த மூன்று படிகளுக்கும் தொடர்புள்ள இன்னொன்று சந்தைக் கலவை என்கிற ‘மார்க்கெட்டிங் மிக்சிங்’.

சந்தைக் கலவை

மேற்கண்ட மூன்று படிகளின் நான்கு அம்சங்கள் – பொருள், விலை, வழங்குதல், விற்பனை மேம்பாடு ஆகிய. இவைதான் நம் வெற்றியை உறுதி செய்பவை. இந்த நான்கு அம்சங்களையும் ஆங்கிலத்தில் பிராடக்ட், பிரைஸ், பிளேஸ், பிரமோஷன் – என நான்கு எழுத்துகளின் முதல் எழுத்தை வைத்து, 4பி என்பார்கள். இந்த நான்கு அம்சங்களின் கலவைதான் சந்தைக் கலவை.

விளம்பரம் செலவா, வரவா?

பல உற்பத்தியாளர்களும் விளம்பரம் என்பது வீண் செலவு என நினைப்பார்கள். ஆனால், விளம்பரம் என்பது செலவு அல்ல; முதலீடு. விளம்பரத்திற்கு நாம் செலவிடும் பணம் ஆயுள் காப்பீடு. இதுதான் நம் தொழிலை விழாமல் தூக்கி நிறுத்துகிறது. விளம்பரம் செய்வதை நாம் நிறுத்தி விட்டால், விற்பனைச் சந்தை சறுக்கி விடும்.

சந்தைக் கண்ணோட்டம் வேண்டும்

பீட்டர் ட்ரக்கர் என்கிற மேலாண்மை வல்லுநர், “சந்தை (மார்க்கெட்டிங்) மட் டுமே வர்த்தகத்தில் வருமானம் ஈட்டித் தரும் துறை; வர்த்தகத்தில் மற்ற துறைகள் எல்லாமே செலவுகள்” என்கிறார். சந்தை என்ற கண்ணாடி மூலம், நிறுவனத் தின் எல்லா செயல் திட்டங்களையும் நடை முறைப்படுத்துவது பயன் தரும்.

கடந்த 15 – 20 ஆண்டுகளில், தொழிலை அணுக வேண்டிய புதிய அணுகுமுறைகள், வர்த்தகத்தை நடத்த துணை செய்யும் புதிய சிந்தனைகள், வியூகங்களைச் சரியாக பயன் படுத்த புதிய நுட்பங்கள் என மேலாண்மை அடையாளம் தெரியாத வகையில் மாறி உள்ளது. இன்றும் மாறிக் கொண்டு இருக்கிறது.

என்ன செய்ய வேண்டியது காலத்தின் கட்டாயம்?

தொழில்களுக்குத் தேவை, ‘எப்படி செய்வது’ என்பதற்கான கருவிகள் மட்டு மல்ல, என்ன செய்வது என்பதற்கான வழிமுறைகளும் கூடத்தான். அதாவது ‘என்ன செய்ய வேண்டியது காலத்தின் கட்டாயம்?’ – இதுவே வர்த்தக உலகின் முதன்மை சவால்.

எதையாவது கண்டுபிடித்து எப்படி யாவது உருவாக்குவோம் என்ற ‘ஆய்வு – மேம்பாட்டுத் துறை’ இன்று, வாடிக் கையாளர் தேவைகளை, அவர்கள் உணரும் முன்பே, நிறைவு செய்யும் ‘கண்டறி – ஆய்வுசெய் – மேம்படுத்து’ துறையாக மாறி விட்டது.

மூலப் பொருட்களை அடிமாட்டு விலைக்கு வாங்குவது மட்டுமே தன் வேலை என்று இருந்த ‘பர்சேசிங் துறை’ இன்று தரக் கட்டுப்பாடு கோட்பாடு களுடன் வாங்க வேண்டிய ‘ப்ரொக்யூர் மென்ட் துறை’யாக மேம்பாடு கண்டுள்ளது.

-வேல் முருகன், வேப்பம்பட்டு, சென்னை

தொழில் செய்யும் பெரும்பாலானோர் தங்கள் தொழில் பற்றிய தகவல்களை மற்றவர்கள் தெரிந்து கொள்ள, வலைத்தளம் ஒன்று உருவாக்கி இருப்பார்கள். அதில் தொழில் பற்றிய செய்திகள், படங்கள், விலைப் பட்டியல், முகவரி என்று நிறைய தகவல்கள் இருக்கும். ஒருவர் வலைதள முகவரியை நேரிடையாக கொடுத்து வலைத்தளத்தை பார்க்கலாம்.

இன்னும் சிலர் வலைதள முகவரி தெரியாமால் பொருட்கள் பெயர் கொண்டு கூகுளில் தேடுவார்கள். அப்பொழுது அந்த பொருட்களை விற்பனை செய்யும் பல வலைத்தளம் கூகுள் முதல் பக்கத்தில் வரும் அதில் நம் வலைத்தளம் வரலாம் அல்லது வராமலும் போகலாம் அதற்கு சில காரணங்கள் உண்டு.

நம் தொழில் வலைத்தளம் கூகுள் முதல் பக்கத்தில் வரவில்லை என்றால் நம் போட்டி நிறுவன வலைத்தளத்திற்கு அந்த வாடிக்கையாளர்கள் சென்று விட வாய்ப்பு உண்டு. கூகுள் முதல் பக்கத்திற்கு நம் வலைத்தளம் வரவேண்டும் என்றால் அதனை சரியான சொற்கள் கொண்டு உருவாக்க வேண்டும். இவற்றை எஸ்இஓ ((SEO) Search Engine Optimization) என்று அழைப்பார்கள். இதில் On page SEO மற்றும் Off Page SEO என்று இரண்டு வகை உண்டு. அதற்கு முன்பு கூகுள் எப்படி இயங்குகிறது என்பதை பார்ப்போம்.

கூகுள் தனக்கென்று ஒரு அல்காரிதம் (Algorithm) முறையை வைத்துக் கொண்டு தன்னிடம் தேடும் வாடிக்கையாளர்களுக்கு தகவல்களை வழங்குகிறது. கூகுளின் இந்த அல்காரிதம் முறை யாருக்கும் தெரியாது. அப்படி மக்களுக்கு தெரியவந்தால் உடனே அல்காரிதம் முறையை மாற்றி விடும். ஒவ்வொன்றுக்கும் ஹம்மிங் பறவை பாண்டா, என்று பெயர் வைக்கப்படுகிறது.

கூகுள் ஆண்ட்ராய்டுக்கு லாலிபாப், கிட்காட் போன்ற பெயர் போல் அல்காரிதமுக்கு பெயர் வைக்கப் படுகிறது. கூகுள் எப்படி தகவல்களை எடுக்கிறது என்று சில வழிமுறைகளை வைத்து இன்று பரவலாக பின்பற்றப்படுகிறது. அவற்றை கொண்டே எஸ்இஓ செய்யப்படுகிறது.

நம் வலைத்தளத்திற்கு நிறைய வாடிக்கையாளர்கள் வரவேண்டும் என்றால் நம் வலைத்தளம் கூகுள் தேடுபொறியில் முதல் பக்கத்தில் வரவேண்டும். பொருள், சேவை, படிப்பு, மருத்துவம் என்று எது தொடர்பாக கூகுளில் தேடினாலும் நிறைய வலைத்தளம் நம் முன்பு காண்பிக்கும். அதில் முதல் நான்கு வலைத்தளம் கூகுள் வழியாக விளம்பரம் செய்தவர்களின் வலைத்தளம் ஆகும்.

இதன் தொடக்கத்தில் ஏடி (AD) என்று இருப்பதை பார்க்கலாம். அதற்கு அடுத்து வரும் வலைத்தளங்கள் ஆர்கானிக் வழியாக காண்பிக்கக் கூடியவை. ஆர்கானிக் வழி என்பது பணம் செலவழிக்காமல் நம் வலைத்தளத்தை காண்பிக்க வைப்பது ஆகும். (காண்க படம்-1)

அனைவராலும் பணம் செலுத்தி விளம்பரம் செய்வது கடினம். ஆனால் அவர்கள் ஆர்கானிக் (Organic Search) வழியாக தங்கள் வலைத்தளத்தை கூகுள் முதல் பக்கத்தில் வரவைக்க முடியும். இதற்கு எஸ்இஓ செய்ய வேண்டும். அவை கடினமான செயல் இல்லை சிறிது கவனித்து தெரிந்து கொண்டால் தொழில் செய்யும் அனைவரும் டிஜிட்டல் மார்கெட்டிங்க் வழியாக சந்தைப்படுத்தலாம். எஸ்இஓவில் இரண்டு வகை உண்டு என்று மேலே பார்த்தோம் அதில் ஆன் பேஜ் எஸ்இஓ பற்றி முதலில் பார்ப்போம்.

ஆன் பேஜ் எஸ்இஓ

ஒரு வலைத்தளத்தை பார்க்கும் பொழுது Ctrl+U என்று அழுத்தினால், புதிய விண்டோ ஒன்று திறக்கும் அதில் நிறைய எழுத்துக்கள், சொற்கள் இருப்பதை பார்க்கலாம். அவை எச்டிஎம்எல் என்ற வலைதள மொழியாகும். அனைவரும் இந்த மொழியை கற்றுக் கொள்ள வேண்டும் என்பது இல்லை. ஆனால் ஒரு சிலவற்றை மட்டும் தெரிந்து கொண்டு அதன்படி செய்தால் நம் வலைத்தளமும் கூகுள் முதல் பக்கத்தில் வரவைக்கலாம். சான்றாக நாம் தொழில் செய்வதற்கு ஒரு கடை/ஷோரூம் வைத்து இருப்போம். அங்கு வாடிக்கையார்கள் வந்து பார்க்கும் பொழுது அவர்களை ஈர்க்கும் வகையில் பொருட்களை அடிக்கி வைத்து இருப்போம். அதில் சிலவற்றை வாடிக்கையாளர்கள் வாங்கலாம். அந்த பொருட்களை பார்வைக்கு வைக்காமல் எங்கேயோ மூட்டை கட்டி வைத்த இருந்தால் விற்பனை செய்வது கடினமாகவும். இதே முறையை நம் வலைத்தளத்திற்கும் பின்பற்ற வேண்டும்.

இங்கு வலைத்தளம் என்பது கடையாகும். கடையில் பொருட்களை வாடிக்கையாளர் ஈர்க்கும் வகையில் அடிக்கி வைத்து இருப்பது போல், வலைத்தளத்தை கூகுள் தேடுவதற்கு ஏற்ற வகையில் உருவாக்க வேண்டும். ஒருவர் கூகுளில் பொருட்கள் பெயர் கொடுத்து தேடும் பொழுது கூகுள் நம் வலைதள எச்டிஎம்எல் மொழியில் தேடிப் பார்க்கும் அங்கு காணப்படவில்லை என்றால் வேறு எந்த வலைத்தளத்தில் இருக்கிறதோ அவற்றை தேடி வாடிக்கையாளர்களுக்கு காண்பிக்கும்.

எஸ்இஓ மெட்டா டேக் (எச்டிஎம்எல் மொழி)

எஸ்இஓஎம்-இல் மெட்டா டேக் (meta tag) என்பது முக்கிய இடத்தை வகிக்கிறது இவற்றை கொண்டே நாம் எஸ்இஓ செய்யப் போகிறோம். மெட்டா டேக் என்பது எச்டிஎம்எல் மொழியாகும். இதில் Title, Keyword, Description இந்த மூன்றையும் நிச்சயம் நம் வலைத்தளத்தில் கொடுக்க வேண்டும். இது போல் நிறைய மெட்டா டேக் உண்டு அதில் எஸ்இஓ-க்கு ஏற்ற சில டேக் கொடுத்து வலைத்தளத்தை அமைக்க வேண்டும். இவற்றை உங்கள் வலைதள வடிவமைப்பவர்களிடம் தெரிவித்தால் செய்து கொடுப்பார்கள். அல்லது சிறிது முயற்சியில் நீங்களே செய்யலாம்.

கீவேர்ட் என்பதில் அதிகம் கவனம் செலுத்த வேண்டும். ஒருவர் என்ன சொல் கொடுத்து கூகுளில் தேடுகிறார் என்பது நம்மால் தெரிந்து கொள்ள முடியாது. ஆனால் நம் தொழிலுக்கு என்ன விதமாக தேடுவார்கள் என்பதை நன்கு ஆராய்ந்து அதற்கே ஏற்றார் போல் கீவேர்ட் அமைக்க வேண்டும்.

“H1” to “H6” tag, “alt” tag, robots போன்ற சில டேக் தெரிந்து கொண்டு எஸ்இஓ அமைக்கலாம். மேலே குறிப்பிட்ட அனைத்தையும் பற்றி அடுத்து பகுதியில் பார்க்கலாம்.

ஆஃப் பேஜ் எஸ்இஓ

ஆஃப் பேஜ் எஸ்இஓ (on Page SEO) செய்யும் பொழுது நம் வலைத்தளத்திற்குள் செய்ய வேண்டும். ஆனால் ஆஃப் பேஜ் எஸ்இஓ என்பது நம் வலைத்தளத்தை தொடாமல் வெளியே செல்வதாகும். நம் வலைத்தளத்தை பற்றி பரவலாக பல இடங்களில் தெரியப்படுத்த வேண்டும். சான்றாக நம் கடையை பற்றி தெரிந்தவர்களிடம் சொல்லுவோம், சிறு கூட்டங்களில் நம் பொருட்களை தொடர்பாக பேசுவது, டெலிபோன் டைரக்டரியில் நம் தொழில் முகவரியை பதிவு செய்வது போல் நம் தொழில் வலைத்தளத்தை பரவலாக இணையத்தில் பதிவு செய்தால் அதை பார்க்கும் வாடிக்கையாளர்கள் நம் வலைத்தளத்திற்கு வர வாய்ப்பு உண்டு. இவைதான் ஆஃப் பேஜ் எஸ்இஓ ஆகும்.

என்னவெல்லாம் செய்யலாம்

நம் தொழிலை, பொருட்களை, சேவையை பற்றி வீடியோ எடுத்து யூடியூபில் (Youtube) வலைதள முகவரியுடன் பதிவேற்றலாம். பொருட்கள் பற்றிய படங்களை இன்ஸ்டாகிராம் (Instagram), பிண்ட்ரெஸ்ட் (Pintrest) போன்றவற்றில் தெரிவிக்கலாம். தொழில் தொடர்ப்பான கட்டுரைகளை டாக்குமென்ட பகிர்தல் www.issuu.com வழியாக வெளிப்படுத்தலாம். நம் தொழில் செய்லபாடுகளை பவர் பாயின்ட் www.slideshare.net வழியாக தெரிவிப்பது, தொழிலுக்கு என்று ஒரு www.blogger.com உருவாக்கி தொடர்ந்து, அதில் தொழிலை பற்றிய கட்டுரைகளை வெளியிடுவது,

எல்லோ பேஜஸ் (yellow pages) போல் நம் தொழில் தொடர்பான செய்திகளை www.flegoo.com போன்றவற்றில் வெளியிடுவது, இணையத்தில் கேள்வி பதிலுக்கு என்று நிறைய வலைத்தளங்கள் உண்டு அதில் நிறைய பேர் பல விதமான கேள்விகள் கேட்டு அதற்கு பதில்கள் பெறுவார்கள். அதனால் நம் தொழில் தகவல்களை www.quora.com என்ற வலைத்தளத்தில் தெரிவிக்கலாம்.

இவை அனைத்தும் நம் வலைத்தளத்தை தொடாமல் மற்ற இடங்களில் நம் தொழில், வலைத்தளம் பற்றி தெரிவிப்பது ஆகும். மேலே குறிப்பிட்ட அனைத்திலும் முடிந்தால் தினமும், அல்லது வாரம் இரண்டு முறையாவது செய்து வரவேண்டும். இப்படி தொடர்ந்து செய்து வரும் பொழுது நம் தொழில் பற்றிய தகவல்கள் இணையத்தில் பரவலாக காணப்படும்.

ஒரு வாடிக்கையாளர் கூகுளில் தேடும் பொழுது நம் வலைத்தளம் உடைய இந்த ஏதாவது ஒரு வலைத்தளம் அவர்கள் பார்வைக்கு வரும். அதன் வழியாக நம் வலைத்தளத்திற்கு வருவார்கள். இவையே ஆஃப் பேஜ் எஸ்இஓ ஆகும்.
ஆன் பேஜ் ஒரு முறை செய்தாலும் போதும் ஆறு மாதத்திற்கு ஒரு முறை தேவைக்கு ஏற்ப மாற்றி அமைக்கலாம். ஆனால் ஆஃப் பேஜ் தொடர்ந்து செய்து வரவேண்டும்.

செழியன்.ஜா

ஆன்லைன் டுட்டோரியல்: இணையத்தைப் பயன்படுத்தி டுட்டோரியல் எனப்படும் தனிப் பயிற்சி வழங்கும் பணியில் பலர் ஈடுபட்டு உள்ளார்கள். இவர்கள் வழங்கும் பயிற்சியைப் பெற கட்டணம் செலுத்த வேண்டும். அவ்வாறு யாருக்காவது குறிப்பிட்ட துறைகளில் பயிற்சி வழங்கும் ஆற்றல் இருந்ததால் முயற்சித்துப் பார்க்கலாம். புதிய தொழில்நுட்பங்களை, இசை, நாட்டியம், ஓவியம், சமையல் போன்றவற்றை கற்க விரும்புகிறவர்களுக்கு கட்டணம் வாங்கிக் கொண்டு ஆன்லைனில் கற்றுத் தரலாம்.
அனிமேஷன்: அனிமேஷன் கற்று வைத்து இருப்பவர்கள், விளம்பரங்களை, காமிக்ஸ் கதைகளை உருவாக்குபவர்களுக்குத் தேவையான அனிமேஷன்களை உருவாக்கித் தரலாம். வீடியோ கதைகள், அறிவியல் விளக்கப் படங்களுக்கும் அனிமேஷன் தேவைப்படுகிறது. இதற்கு அனிமேஷன் தொடர்பான மென்பொருள்களை சிறப்பாக பயன்படுத்தத் தெரிந்து இருக்க வேண்டும். அதிக ஆற்றல் உள்ள கணினி ஒன்றும் தேவைப்படும்.

விளம்பரங்கள் உருவாக்கித் தருதல்: வாடிக்கையாளர்களைக் கவரும் அளவுக்கு விளம்பரங்களை உருவாக்க நல்ல கற்பனை மற்றும் படைப்பாற்றல் தேவை. இத்தகைய திறமைகள் உள்ளவர்கள் விளம்பரங்கள் உருவாக்கித் தரும் தொழிலைச் செய்யலாம். உள்ளூர் தொலைக் காட்சிகள் முதல் பெரிய தொலைக் காட்சிகளுக்கு வரை விளம்பரங்களைத் தர விரும்புகிறவர்கள்தான் உங்கள் வாடிக்கையாளர்கள்.
விளம்பர ஏஜென்சி: பெரும்பாலும் இதழ்களுக்கும், காட்சி ஊடகங்களுக்கும் விளம்பர முகவராக செயல்படும் ஒரு வாய்ப்பும் உள்ளது. இவர்களுக்கு இதழ் நிறுவனங்களும், தொலைக் காட்சி நிறுவனங்களும் குறிப்பிட்ட அளவு வர்த்தகக் கழிவு வழங்குவார்கள். நல்ல மார்க்கெட்டிங் திறமை உள்ளவர்களுக்கு மட்டுமே ஏற்ற தொழில்.

விழாக்களுக்கான ஃபோட்டோ மற்றும் வீடியோகிராஃபர்: இன்றைக்கு திருமண விழாக்கள் முதல் அனைத்து விழாக்களையும் ஒளிப்படம் மற்றும் வீடியோ எடுப்பது என்பது இன்றியமையாத ஓன்றாக ஆகிவிட்டது. அதுவும் திருமண வீடியோக்களில் நிறைய மாற்றங்கள் வந்து உள்ளன. திருமணத்துக்கு முன்னரே கூட மணமக்களை வெளியிடங்களுக்கு அழைத்துச் சென்று, போஸ் கொடுக்க வைத்து படம் எடுக்கப் படுகிறது. ஒளிப்பட ஆல்பங்களிலும் நிறைய புதுமைகள் வந்து உள்ளன. இந்த தொழிலைச் செய்ய ஃபோட்டோகிராஃபி மற்றும் வீடியோகிராஃபி தெரிந்து இருக்க வேண்டும். அல்லது கற்றுக் கொள்ள வேண்டும். இதற்கு ஸ்டில் கேமரா, வீடியோ கேமரா தேவைப்படும். சென்னை போன்ற சில நகரங்களில் இவற்றை வாடகைக்குப் பெறும் வாய்ப்பும் உள்ளது.

எழுத்துப் பணி: நல்ல மொழி வளமும், பொது அறிவும் உள்ளவர்கள் முயற்சித்துப் பார்ப்பதற்கு ஏற்ற தொழில். இதழ்களுக்குத் தேவையான கட்டுரைகள், பேட்டிகள் எழுதித் தரலாம். வெளித் திறன் பெறுதல் என்ற அடிப்படையில் நிறுவனங்கள் இத்தகைய எழுத்துகளை ஏற்கின்றன. வெளியிடப்படும் படைப்புகளுக்கு மதிப்பூதியம் என்ற பெயரில் ஊதியம் வழங்குவார்கள். மொழி பெயர்க்கத் தெரிந்தவர்கள் மொழி பெயர்த்துத் தரும் பணிகளையும் ஏற்றுச் செய்யலாம்.

– முனைவர் ச. குப்பன்

இன்றைய உலகில் சில புகழ்பெற்ற குறியீடு (Brand) கொண்ட பொருள்களுக்குக் கூடச் சந்தைப்படுத்துதல் தேவைப்படுகிறது. பொது மக்களுக்கு நன்கு அறிமுகமான பொருள்களுக்கே புகழ்பெற்ற மனிதர்களை வைத்து விளம்பரம் செய்கிறார்கள்.

ஆனால் மருந்துகள், வீட்டுக் கருவிகள் போன்றவற்றை விற்பதற்குப் பிரதிநிதிகள் தான் முக்கியம். இப்போது புறநகர்களில் கூட நிறைய அடுக்கு வீடுகள் (Flats) எழும்பி வருகின்றன. உள் அலங்காரம், சமையலறை க்குத் தேவையான மாடூலர் வகை மின்தூக்கிகள் அனைத்துக்குமே விளம்பரப் படுத்துதல் இன்றியமையாதது.

அடுத்த தெருவில் வசிக்கும் நண்பர், தாங்கள் புதிதாகக் கட்டுகிற இரண்டு மாடித் தளத்துக்கு கூட்டிச் சென்றார். நாங்கள் போன போது, விற்பனைப் பிரதிநிதியுடன் கட்டடப் பொறியாளரும், ஒப்பந்ததாரரும் இருந்தார்கள். ‘‘இவர்தான் சார் வீட்டு உரிமையாளர், இவரிடம் சொல்லுங்கள்’’ என்று நண்பரைப் பொறியாளர் சுட்டிக் காட்டினார்.

அவ்வளவுதான்; பிரதிநிதி மடமடவென்று பாடம் ஒப்பிக்கும் மாணவன் போல், குறிப்பிட்ட மின்தூக்கியின் பிளஸ் பாயின்ட்களை சொல்லலானார். இந்த வகை மின்தூக்கி, மின்சாரம் தடைப்பட்டாலும், தானாகவே இயங்கத் தொடங்குமாம்; ஜெனரேட்டர் தேவைப்படாதாம். நண்பரின் கேள்விகளுக்கு எல்லாம் உடனுக்குடன் பதில் சொன்னார்; மின்னஞ்சலைக் கொடுத்து பிற விவரங்களைப் பார்க்கும் படியும் கூறினார்.

‘‘எஸ்டிமேட் கூடுதல்தான், ஆனா, மனைவியிடம் கேட்கணும்’’ என்று நண்பர் சொன்னாரே தவிர முகத்தில் நிறைவு தெரிந்தது.

ஆக, விற்பனையில் முதல் அம்சம் புலப்பட்டு விட்டதல்லவா? அணுகுமுறையில் (Approach) பொறுமை மிகத் தேவை. அணுகுமுறைத் திறனை ஓரளவு வளர்த்துக் கொள்ள இந்த நாளில் ஊடகங்களும், பத்திரிகைகளும் உதவுகின்றன. புரியவில்லையா? எந்தத் துறையில் ஒருவர் சற்றுப் புகழ்பெற்றவராக இருந்தாலும், அவரைப் பற்றிக் கால் பக்கத்துக்கு, படத்துடன் செய்திகள் வெளிவருகின்றன. குறிப்பாகக் கட்டுமானத் தொழிலிலும், மருத்துவத் துறையிலும்.

அவரை நினைவு வைத்துக் கொண்டு விற்பனைப் பிரதிநிதி, ‘‘உங்கள் பேட்டி படித்தேன் சார்’’ என்று சொன்னால் போதும், மனிதர் மகிழ்ந்து போய் விடுவார். மருத்துவத்தில், நீரிழிவு, வயிற்றுக் கோளாறு இவை பற்றி சில மருத்துவர்களின் கட்டுரைகள், பேட்டிகள் பல ஏடுகளின் இணைப்புப் பகுதியில் வருகின்றன. ஒருவேளை நீங்கள் நேரடியாகப் படிக்கா விட்டாலும், வேறு யார் மூலமாகவோ தெரிந்து கொண்டாலும் பரவாயில்லை. நீங்களே பார்த்ததாகச் சொல்லுங்கள். இயல்பாக இந்த நினைவாற்றல் உறுதியாக விற்பனை பிரதிநிதியின் அணுகுமுறையை மேலும் வலுப்படுத்தும். புகழ்ச்சிக்கு மயங்காத மிகச் சிலரிடம் மட்டுமே இந்த அணுகுமுறைக்கு பயன் இருக்காது. அடுத்துத் தேவைப்படுவது முழுமையான பகுத்தறிவு. குறிப்பாக மருத்துவத்துக்குத் தேவை. ஏனெனில் அலோபதி மருந்துகளுக்கு பக்க விளைவுகள் உண்டு. டாக்டர் இதைப் பற்றி எப்படி விசாரித்தாலும், நன்கு புரிந்து கொண்டு விளக்கும் திறமை தேவை. அவ்வப்போது நாளேடுகளில் வெளிவரும் கருத்துக்களை மேற்கோளிட்டுக் கூறலாம்.

‘‘அமெரிக்க ஆய்வு இந்த …. வேதிப் பொருள் ஒன்றும் தீங்கு செய்யாது என்று சொல்கிறது’’ என்று குறிப்பிடலாம். டாக்டருக்கோ, வல்லுநருக்கோ இது தெரியாமல் இருக்குமா? இருந்தாலும் நீங்களும் தெரிந்து வைத்து இருக்கிறீர்கள் என்பதுதான் பிளஸ் பாயின்ட்.

மூன்றாவது — விற்பனைக்குப் பின் சேவை. தொடக்கத்தில் சொன்ன நிகழ்வில், மின்தூக்கி பொருத்திய பின்; அதன் பயன்பாடு எப்படி என்று கவனித்துக் கொண்டே இருக்க வேண்டும். குறிப்பிட்ட கால அளவு இலவச சேவையைச் சலிக்காமல் தொடர வேண்டும். நிறைய நிறுவனங்களும், தனியார் வங்கிகளும் இந்த – ‘‘விற்பனைக்குப் பின் சேவையை’’ முறையாகச் செய்வது கிடையாது. ஆக, விற்பனையில் முன்னணியில் நிற்க, மூன்று அம்சங்கள் – அதாவது A, K, A – (Approach, Knowledge, After Sales Service) முக்கியம் என்று வல்லுநர்கள் கருதுகிறார்கள். இதில் இரண்டாவதைத் தான் – அதாவது முழுமையான அறிவு – முதலில் பெற வேண்டும். மற்ற இரண்டையும் அனுபவத்தில் வளர்த்துக் கொள்ளலாம்

-வாதூலன்