கொரோனா – சிக்கித் தவிக்கும் ஆயத்த ஆடைகள் உற்பத்தித் தொழில்

உள்நாட்டுத் தேவைகள் அதிகரித்து வருகின்றன -

கடந்த சில ஆண்டுகளாகவே இந்தியாவில் உற்பத்தி செய்யப்படும் ஆடைகள் நமது சந்தையிலேயே பெரிய அளவில் விற்பனை ஆகின. அண்மைக் காலமாக, நமது நாட்டின் ஆயத்த ஆடை தயாரிப்பு நிறுவனங்கள் புதிய பாதைகள் வகுத்து செயல்படுவதால் இந்த வகையில் இந்திய ஆயத்த ஆடைகள் வணிகம் உச்சக் கட்டத்தை எட்டி இருந்தது. கொரோனா காலம் வந்து அத்தனையையும் புரட்டிப் போட்டு விட்டது.

உலக சந்தை உறைவிடமான அமெரிக்கா, ஐரோப்பிய ஒன்றிய நாடுகளில் இந்திய ஆடைகளுக்குத் தேக்கம் ஏற்பட்டிருந்தாலும், உள்ளூர் சந்தை விநியோகம் விரிவடைந்து இருந்தது. நமது உள்நாட்டுத் தேவை, இன்னும் ஏழு, எட்டு ஆண்டுகளுக்கு தொய்வில்லாமல் இரட்டிப்பாகும் வாய்ப்பு உள்ளதாக கருதிய நிலையில் கொரோனா வந்து அத்தனையையும் சொதப்பி விட்டது. அரசின் ஆடை உற்பத்தி கொள்கைகளும் தொழிலுக்கு துணை புரிந்து வந்த நிலையில் தற்போதைய நிலையை ஆடை உற்பத்தியாளர்கள் எப்படி சமாளிக்கப் போகிறார்கள்?
ஆடைகள் உற்பத்தி செய்யும் பல நிறுவனங்கள் ஏற்றுமதி நோக்கில் இருந்து விலகி உள்ளூர் தேவைகளை குறி வைத்து ஆடைகள் தயாரித்து வாணிபத்தைப் பெருக்கி வந்த நிலையில் இந்த எதிர்பாராத திருப்பம் ஆடை உற்பத்தியாளர்களை நிலை குலைய வைத்து இருக்கிறது.

Also read: சிறிய வியாபார நிறுவனங்களுக்கான குறைந்த செலவில் சந்தை படுத்துதலுக்கான ஆலோசனைகள்

இந்திய ஆடைகள் உற்பத்தியாளர் சங்கங்களைச் சேர்ந்தவர்களளிடம் கேட்ட போது, ”உள்ளூர் சந்தையில் இந்திய ஆடைகளின் வியாபாரம் நிதானமாகவும், சீரான வளர்ச்சியுடனும், சமூக, அரசியல், பொருளாதார வளர்ச்சிக்கு ஏற்றவாறு விரிவு அடைந்து வந்த நிலையில் ஏற்றுமதியை அதிகம் சார்ந்து இருக்க வேண்டியது இல்லை என்று கருதி உள்நாட்டு வணிகத்தில் கூடுதல் ஆர்வம் காட்டி வந்த நிலையில் இப்படி ஆகி விட்டதை எண்ணி வருந்தினாலும் இந்த நிலை ஒரு சவாலாகக் கருதி எதிர் கொள்ளத் தயாராகி விட்டோம்.

சில மாதங்களுக்கு  முன் மும்பையில் நடந்த தேசிய ஆடைகள் பொருட்காட்சியில் 800-க்கும் அதிகமான இந்திய சிறு, குறு ஆடை உற்பத்தியாளர்களும், பெண்களுக்கு என சிறப்பு வகை ஆடைகள் தயாரிப்பவர்களும், 40,000-க்கு மேற்பட்ட சில்லரை வியாபாரிகளும் கலந்து கொண்டனர். இந்த பொருட்காட்சியின் மொத்த விற்பனை 600 கோடி ரூபாயை எட்டியது.இந்த ஆடைகள் காட்சி வாயிலாக, நமது உள்ளூர் ஆடைகள் தேவை எவ்வளவு என்பது தெரிய வந்ததோடு, உற்பத்தியாளர்களும், நுகர்வோரும் தங்கள் தேவைக்கும் வசதிக்கும் ஏற்றவாறு தங்களை மாற்றிக் கொள்ளவும் இந்த காட்சி கற்பித்தது.

நமது உற்பத்தியாளர்கள் தங்களால் இயன்ற அளவு முயற்சி செய்து தமது ஆற்றலுக்கு ஏற்ப ஆடைகளை தயாரிக்கின்றனர். தங்களின் பிராண்டுகளை புகழ் பெறச் செய்ய, விளம்பரங்களுக்கு செலவிடவும் தயங்குவது இல்லை. இவர்களின் வணிகம் இரண்டாம், மூன்றாம் நிலை நகரங்களில் கூட சக்கைப்போடு போடுவதை சில மாதங்களுக்கு முன்பு கூட காண முடிந்தது.

உற்பத்தியாளர்கள் அணிவோரின் தேவைகளை, அளவு, முறைகள் முதலானவற்றை சரியாக அறிந்து செயல்பட்டதால் அனைத்து ஊர், நகரங்களிலும் ஆடை வியாபாரம் சிறப்பாக நடைபெற்று வந்தது.

அண்மைக் காலமாக கொஞ்சம் கொஞ்சமாக தளர்வுகள் அறிவித்து வரும் நிலையில் இன்னும் இரண்டு மூன்று மாதங்களில் நாடு முழுமையான இயல்பு நிலைக்கு வந்து விடும் என்று கருதுகிறோம். இந்த காலக் கட்டத்துக்குள் பெரிய, சிறிய ஆடைகள் உற்பத்தி நிறுவனங்கள் தங்கள் உற்பத்தியை படிப்படியாக தொடங்கி இருக்கிறார்கள். அனைத்து ஜவுளி விற்பனை நிலையங்களும் திறக்கப்பட்டு விடும். பழைய இருப்பை விற்றுத் தள்ளும் முயற்சிகளிலும் இவர்கள் ஈடுபட வேண்டி இருக்கும். இதற்காக இவர்கள் கொடுக்கும் தள்ளுபடி போன்றவை பொருளாதாரத்தில் பின்னடைவைச் சந்தித்து இருக்கும் நுகர்வோருக்கு ஒரு வாய்ப்பாக அமையும்.

புதிய தலைமுறை இளைஞர்களுக்கு ஏற்றவாறு, சிறப்பான வித, விதமான ஆடை வடிவமைப்புகளளை அறிமுகப்படுத்துவதில் இன்னும் தீவிரம் காட்ட வேண்டி இருக்கும்.  சமூக வலைத்தளங்களில், விற்பனையாளர்கள் புதியபுதிய வடிவமைப்புகளுடன் ஆடைகளை உலவ விட்டு மேலும் வணிகத்தை அதிகரிக்கவும் முயற்சிகளை மேற்கொள்ள வேண்டி இருக்கும். இளைய வயதினர் கணினி முன் அமர்ந்த படியே தாங்கள் விரும்பும் ஆடைகளை வரவழைத்துக் கொள்ளும் விருப்பத்தை இன்னும் சிறப்பாக பயன்படுத்த முடியும்.

கொரோனா தீவிரம் அடங்கியதும் ஏற்றுமதி வாய்ப்புகளும் அதிகரிக்கும் என்று கருதுகிறோம். ஏற்கெனவே சில ஆடை உற்பத்தியாளர்கள் தங்கள் உற்பத்தியில் சுமார் 70% அளவுக்கு ஏற்றுமதி செய்து கொண்டிருந்தார்கள். அவர்கள் அந்த நிலையை அடைய தொய்வு இல்லாமல் பாடுபட்டால்தான் முடியும்.

வங்கிக்கடன் தொடர்பான பல உறுதிகள் ஆட்சியாளர்களால் அறிவிக்கப்பட்டு இருப்பது எங்களுக்கு நம்பிக்கையை அதிகரித்து இருக்கிறது. அந்த உறுதிகளுக்கு ஏற்ப வங்கி மேலாளர்கள் எங்களுக்கு உதவ வேண்டும்.

இந்த நிலையை வெற்றி கொண்டு சமாளிக்கக எப்படியும் குறைந்தது ஒரு ஆண்டாவது ஆகும் என்று கணித்து இருக்கிறோம். மக்களிடம் பணப்புழக்கம் அதிகரிக்க வேண்டியதும் எங்கள் தொழிலுக்கு மிகத்தேவை” என்கிறார்கள்.

– முத்து செல்வராஜா

LEAVE A REPLY

Please enter your comment!
Please enter your name here