- Advertisement -
சிகரட் பழக்கத்தை எப்படியாவது விட்டுத்தொலைக்கவேண்டும் எப்படி எப்படி என்று பலரும் கேட்டுக்கொண்டே இருக்கிறார்கள். எட்டு ஆண்டுகளாக சிகரட் விடுபடல் ஆலோசகராகவே ஆகிவிட்டேன். நானே பெரிய ஸ்மோக்கராக இருந்து அதை ப்ரேக் பண்ணினவன் என்கிற படியால் எனக்கு அத்தகுதி வந்துவிட்டது. என்னுடைய அனுபவத்திலல் இருந்து ஒவ்வொருவருக்கும் தனித்தனியாக சொல்லிக் கொண்டட் இருந்ததை மொத்தமாக தொகுத்து இருக்கிறேன்.
1 – சிகரட் பழக்கத்தை எளிதில் கைவிட முடியும் என்கிற எண்ணத்தை மொதல்ல கை விடுங்கள். அது ஈசி இல்ல ப்ரோ. நிகோடின் நாம் நினைப்பதை விட கொடியவன். அதே அளவுக்கு சாதுர்யமானவன். நம்மை ஏமாற்றுவதில் கில்லாடி! ஒரு சிலர் ‘’நான்லாம் ஒருநாள்ல டக்குனு விட்டுட்டேன் அதுக்கு பிறகு தொடவே இல்லை’’ என்பார்கள். நாம் அந்த ஒரு சிலராக இருக்க வாய்ப்பு குறைவு. எல்லோராலும் அது முடியாது.
2 – தினமும் முன்னால பத்து இப்ப நாலு அப்படியே இரண்டு ஒன்னுனு கம்மி பண்ணப்போறேன் என்று சிலர் சொல்வதுண்டு. படிப்படியாக சிகரட் பழக்கத்தை குறைக்கவே முடியாது அப்படி குறைத்து அப்பழக்கத்தை கைவிடவும் முடியாது.
3 – நான் மைல்டான சிகரட் பயன்படுத்துகிறேன் எனக்கு பாதிப்பு குறைவு நினைச்சால் விட்டு விடுவேன் ஈசிதான் என்று நினைக்காதீர்கள். அதுவும் சாத்தியமில்லை. மைல்டான சிகரட் என்று ஒன்றே உலகத்தில் இல்லை. சிகரட் என்றாலே தாரும் நிகோடினும் ஹைட்ரஜன் சைனைடும் அம்மோனியாவும் இன்ன பிற விஷங்களும்தான். அளவு வேறுபடும் அவ்வளவுதான். பாதுகாப்பான அளவு என்பது சிகரட்டில் இல்லை!
4 – நிகோரெட் மாதிரி நிறுவனங்கள் நிகோடின் மாத்திரை பப்பிள் கம், உடலில் ஒட்டக் கூடிய பேட்ச்கள் எல்லாம் விற்கிறார்கள், அதை வைத்து சமாளித்து விட்டு விட முடியுமா என்றால் முடியாது. அதுவுமே ஒரு சிலருக்கு உதவும். VAPE என்கிற ஆவி அடிப்பான்கள் பயன்படுத்தினால் சிகரட் பழக்கத்தை நிறுத்த முடியுமா என்றால்… இந்தியாவில் வேப் தடை விதிக்கப்பட்டு உள்ளது. அதை பயன்படுத்தினாலும் கை விட முடியாது! வேப்புக்கு அடிமையாகி விடுவோம்!
5 – என்னதான் தீர்வு? ஒரே வழிதான் COLD TURKEY என்று மேற்கில் அழைக்கிறார்கள். குடி,புகை,ஹெராயின் மாதிரி போதைப் பழக்கங்கள் எதுவாக இருந்தாலும் அதை படிப்படியாக குறைத்து ஒருவரை மீட்பதை விட ஒட்டு மொத்தமாக ஒரே நாளில் கை விடச் செய்து விடுவதுதான் குளிர்வான்கோழி முறைமை. இதன் வெற்றி விகிதம் மிக மிக அதிகம். முதல் பாய்ன்ட்டில் அப்படி பொசுக்குனு விடுதல் எல்லோருக்கும் சாத்தியம் இல்லைனு சொன்னீங்களே என்று கேட்கலாம். தொடர்ந்து வாசிங்க!
6 – இந்த வான்கோழி முறைமைப்படி சிகரட்டை கை விடுவதை இந்த கட்டுரையை படித்தவுடன் உடனே வீறு கொண்டு எழுந்து போய் ‘போராடு வாளோடு சோழாசோழா’ என்று நாளைக்கு காலையிலேயே செய்யக் கூடாது. பலன் இருக்காது. பொறுமை பொறுமை பொறுமை. அதற்கு சில படிநிலைகள் உண்டு. அதை முதலில் தெரிந்து கொள்ள வேண்டும்.
7 – முதலில் ஒரு நல்ல நாளை சிகரட்டை விடுவதற்காக தீர்மானித்துக் கொள்ளுங்கள். என்னுடைய மகளின் பிறந்த நாளில் இருந்து இனி சிகரட் கிடையாது, என்னுடைய காதலி பிறந்தநாள், திருமணநாள், இந்திய சுதந்திர நாள், அண்ணா பிறந்த நாள் என எப்போதும் நினைவில் இருக்கும்படி ஒரு நாளை தேர்வு செய்து கொள்ளுங்கள். அந்த நாளில் இருந்துதான் சிகரட்டை கை விடப் போகிறோம்.
8 – ஏன் சிகரட்டை கை விடப் போகிறீர்கள் என்பதற்கு வலுவான காரணங்களை எழுதுங்கள். ஆமாம் பேப்பர் பேனா வைத்துக் கொண்டு சுள்ளிக் காட்டு இதிகாசம் போல அதை பட்டியல் இடுங்கள். உங்களிடம் வலுவான காரணங்களே இல்லை என்றால் சிகரட்டை கை விட முடியாது. ஆண்மை குறைவு வந்துவிடுமோ என்கிற அச்சத்தில் தொடங்கி காதலிக்கு முத்தமிட முடியவில்லை நெஞ்சம் பஞ்சர் ஆனது என எதுவும் இருக்கலாம்.
9 – ஒரு மின்னஞ்சலோ வாட்சாப் க்ரூப் தகவலோ தயார் செய்யுங்கள். உங்களுடைய நெருக்கமான வட்டத்தில் இருக்கிற நண்பர்கள், உறவினர்கள் எல்லாருக்கும் வருகிற டேஷ் டேஷ் நாளில் இருந்து நான் சிகரட் பழக்கத்தை விடப் போகிறேன். எனக்கு உங்களுடைய அன்பும் ஆதரவும் தேவை என்பதை அறிவியுங்கள். சிலர் சிரிப்பார்கள் காமெடி பண்ணுவார்கள். நம்முடைய வீரப் பயணத்தில் வெற்றிப் பயணத்தில் இதெல்லாம் சகஜம். எல்லோருக்கும் அறிவித்து விடுங்கள். மீண்டும் தொடங்கினால் இந்த நாய்க வேற நம்மள நக்கலடிக்கும் என்கிற கடுப்பிலேயே சிகரட்டை தொட மாட்டோம்! இதுவும் மோட்டிவேஷன்தான்.
10 – அந்த நன்நாளுக்கு முன்பு வரை சிகரட்டை கை விட வேண்டாம். அது வரை எவ்வளவு முடியுமோ அவ்வளவு அடித்து தீர்த்து விடுங்கள். உங்கள் ஆசை எல்லாம் தீரத்தீர அடியுங்கள். ஆனால் ஒவ்வொரு முறையும் வருகிற ஆவணி மாதம் ஐந்தாம் தேதி நிறைந்த பௌர்ணமியில் இருந்து நான் சந்திரமுகி மேல் சபதமெடுத்து இந்த சிகரட் எனும் சாத்தானை தொடப்போவது இல்லை என்று நினைத்துக் கொள்ளுங்கள். நினைக்க மறந்தாலும் உங்கள் மனம் நினைக்கத் தவறாது!
11 – அந்த நாளில் இருந்து உங்களுடைய பயணம் தொடங்கி விடும். முதல் பதினைந்து நாட்கள் மிகமிக முக்கியமானது. சொல்லப் போனால் எளிதானதும் கூட. அதை எளிதில் கடந்து விடலாம். பார்க்கிறவர்களிடம் எல்லாம் சிகரட்டை விட்டு விட்டதை பெருமையாக பகிர்ந்து கொள்ளுங்கள்! சிகரட்டால் உண்டாகும் கேடுகளை சொல்லுங்கள். நீங்கள் சொல்வது மற்றவர்களுக்கு அல்ல உங்களுக்கு!
12 – சிகரட் பிடிக்கிற நண்பர்களோடு தற்காலிகமாக சேராதீர்கள், அவர்களை எல்லாம் உங்கள் வாழ்க்கையில் இருந்து மூன்று மாதத்திற்கு சஸ்பெண்ட் செய்யுங்கள். முன்பு சிகரட் பிடித்த பொட்டிக் கடைகள் பக்கம் போகாதீர்கள். பழைய பாக்கிகளை முன்பே செட்டில் பண்ணிவிடுங்கள்! எங்கெல்லாம் சிகரட் பிடித்துக் கொண்டடு இருந்தீர்களோ அதெல்லாம் தடைசெய்யப்பட்ட பகுதிகள். அந்த இடங்களுக்கு பக்கத்தில் போனாலும் சிகரட் Buddiesகள் பார்த்தாலோ தலையை திருப்பிக் கொண்டு சென்று விடுங்கள். சிகரட் பிடிக்கும் ஆர்வம் வந்தால் சுவிங்கம் மெல்லுவது, டீ குடிப்பது, கடலை மிட்டாய் தின்பது என எதையாவது கண்டு பிடித்து செய்யப் பழகுங்கள். நான் முதல் மூன்று மாதங்களுக்கு நிஜாம் பாக்கு வாங்கி மென்று கொண்டிருந்தேன்!
13 – பதினைந்து நாட்களை தாண்டி விட்டால் அடுத்த இலக்கு 45 நாட்கள்.
14 – சிகரட் பிடிப்பதற்கான தூண்டுதல் என்பது அதிகபட்சம் மூன்றிலிருந்து ஐந்து நிமிடங்கள்தான் நம் மண்டைக்குள் இருக்கும். அந்த நிமிடங்களை கடக்க எதாவது வழிகளை யோசியுங்கள். பேஸ்புக்கில் யாரிடமாவது வம்பிழுங்கள். புத்தகம் இருந்தால் படியுங்கள். எதாவது ஒரு என்டர்டெயின்மென்ட் மனசுக்கு பிடித்த மாதிரி செய்வது உதவும்.
15 – 45 நாட்களை கடந்து விட்டால் அதற்கு பிறகு உங்களை யாராலும் தடுக்க முடியாது. இப்போது உங்கள் உடலில் பல மாற்றங்கள் வந்திருக்கும். நன்றாக பசிக்கும். தாகம் எடுக்கும். ஜீரணக் கோளாறுகள் சரியாகத் தொடங்கும். தூக்கம் வரும். உணவின் சுவை தெரிய ஆரம்பிக்கும். மூச்சு விடுதல் எளிதாக இருக்கும். எதாவது வாழ்க்கையில் உருப்படியாக பண்ணவேண்டும் என்று தோன்றும்.
16 – இந்த காலக் கட்டத்தில் எதாவது உடற்பயிற்சியை தொடங்கி விடுவது நல்லது. உடலுக்கேற்ற படி எதாவது ஒன்றை தொடங்கி விடுங்கள். அது உங்கள் உடலை புத்துணர்வாக மாற்றும்.
17 – அடுத்த இலக்கு மூன்று மாதங்களை கடப்பது. மூன்று மாதங்கள் கடந்த பிறகு உங்களுக்கு சிகரட் பிடிக்கும் எண்ணம் 90 சதவீதம் முடிந்து விடும். இந்தக் காலக் கட்டத்தில் அவ்வப்போது எழும் சிகரட் பிடிக்க வேண்டும் என்கிற எண்ணத்தையும் எளிதில் கை விட்டு விடலாம். அதற்கு பிறகு காலத்திற்கும் நிகோடினோடு பிரேக் அப்தான்!
18 – சிகரட்டை விட்ட நாள் தொடங்கி சில விஷயங்களை கவனத்தில் கொள்ளுங்கள். ஒரு பஃப் அடித்தால்கூட ஆபத்து. எனவே ஒரு இழுப்பு கூட இழுத்துவிடாதீர்கள்!
19 – இதே காலக்கட்டத்தில் உணவு பழக்கத்திலும் கவனம் வைக்கவும். காரணம் அதிகமாக பசிக்கும் என்பதால் கண்டமேனிக்கு சாப்பிட்டு தொப்பை எடையெல்லாம் ஏற்றிக்கொள்வோம். எனவே கவனமாக சாப்பிடுங்கள். உடற்பயிற்சி பண்ணுங்கள்.
20 – எப்போதும் ஏன் சிகரட் பழக்கத்தை கைவிட நினைத்தீர்கள் என்பதை மறந்துவிடாதீர்கள். எவ்வளவு சோகம் என்றாலும் துக்கம் என்றாலும் மகிழ்ச்சி என்றாலும் கூட சிகரட்டை மீண்டும் தொடாதீர்கள், உங்கள் முயற்சிகள் அத்தனையையும் வீணடித்துவிடும். நிகோடின் தந்திரமானவன், உங்களை வீழ்த்துவதற்கான சந்தர்ப்பத்திற்காக மூளையில் காத்திருப்பவன்! அவனை ஒருநாளும் உங்களை வீழ்த்தி விட அனுமதிக்காதீர்கள்.
21 – சரி தோற்று விட்டோம். மீண்டும் புகைப்பிடித்துவிட்டோம் என்ன செய்வது. பாய்ன்ட் ஆறில் இருந்து மீண்டும் தொடங்குங்கள். எத்தனை முறை வேண்டுமானாலும் தொடங்குங்கள். ஆனால் முயற்சியை கைவிடாதீர்கள். நான் ஏழு முறை சிகரட் பழக்கத்தை கைவிட்டு எட்டாவது முறைதான் அதில் வென்றேன்! உங்களாலும் முடியும் ஆல் தி பெஸ்ட்!
– அதிஷா வினோத்
- Advertisement -
