Saturday, June 25, 2022

Latest Posts

தாழக் கிடப்பாரை தற்காக்க வேண்டும் என்று சொன்ன அய்யா வைகுண்டர்

- Advertisement -
அய்யா உண்டு என சொன்னால்…. அங்கே நீங்கள் இந்து சாதீய கொடூரங்களை எதிர்க்கிறீர்கள் என பொருள்…
இந்து சனாதன தர்மத்தில் இருக்கும் சாதீய பாகுபாடுகள் குறித்து பலரும் பேசியிருக்கிறார்கள். போராடி இருக்கிறார்கள்.
தமிழ்நாட்டில் வள்ளலாருக்கு முன்னரே தோன்றியவர் அய்யா வைகுண்டர். வள்ளலார் காலம் 1823 – 1874 அய்யா வைகுண்டர் காலம் 1809 – 1851. வைகுண்டரின் காலத்திற்கு பிறகுதான் வள்ளலாரின் திருவருட்பா வெளிவருகிறது. இது ஒப்பீடு அல்ல காலத்தை உங்களுக்கு புரிய வைக்கவே இந்த கணக்கு.
முத்துகுட்டி என்பதே அவரது இயற்பெயர். அவர் பிறந்த காலங்களில் சாதீய வெறி உச்சத்தில் இருந்தது.  நாடார் உள்ளிட்ட பல சாதிய பெண்களுக்கு மார்பு சேலை அணிதல், இடுப்பில் குடம் எடுத்தல், பொன்நகைகள் அணிதல் ஆகியன தடை செய்யப்பட்டு இருந்தது. ஆண்களுக்கு தலைபாகை கட்டுதல், மீசை வளர்த்தல், வளைந்த கைப்பிடி கொண்ட குடையை பயன்படுத்துதல், உயர்ந்த சாதி மொழியை பயன்படுத்துதல் போன்றவை தடை செய்யப்பட்டு இருந்தது. (உயர்ந்த சாதி மொழி என்றால் சாப்பிட போகிறேன் என சொல்லக்கூடாது, கஞ்சி குடிக்க போறேனுதான் சொல்லணும்) குழந்தைகளுக்கு தெய்வங்களின் பெயர்களை சூடுவது கூட தடை செய்யப்பட்டிருந்தது. வைகுண்டருக்கு பெற்றோர் சூட்ட நினைத்த பெயர் முடிசூடும் பெருமாள். ஆனால் முடியவில்லை. முத்துகுட்டி என்றே வைத்தார்கள்.
இந்த கொடூர சாதியங்கள் ஊடாக முத்துகுட்டி வளர்கிறார்.
1833 ஆம் ஆண்டு திருச்செந்தூர் சென்ற அவர் இறையறிவு பெற்று தன் பொதுவாழ்வை தொடங்கினார். #தாழக்கிடப்பாரை_தற்காப்பதே_தர்மம் என முன்வைத்தார். நாடார் மட்டுமின்றி இடையர், பறையர், கம்மாளர், வாணியர், தோல் வணிகர், மறவர் , பரதவர், சக்கிலியர், துலுக்கர், பட்டர் உள்ளிட்ட பலரும் அவரை அப்போது வணங்கினர்.
“காணிக்கையிடாதீங்கோ காவடி தூக்காதீங்கோ
வீணுக்கு தேடுமுதல் விறுதாவில் போடாதீங்கோ “
என உழைக்கும் மக்கள் மீதான அன்பை வெளிக்காட்டினார். ஆலயங்களுக்குள் விடமறுத்த இந்துகளிடம் இருந்து காணிக்கை மட்டும் வாங்கிக் கொண்டிருந்த காலம் அது. இந்த கருத்தை அவர் உரக்கவே சொன்னார். மன்னராட்சி நடைபெற்ற காலம் அது. அரசனுக்கு எதிராக பேசுவது, தெய்வத்திற்கு எதிராக பேசுவதும் நிந்தனையாக கருதப்பட்ட காலம் அது. ஆகையால் அவர் கைது செய்யபட்டார். 110 நாட்கள் திருவனந்தபுரம் சிறையில் அடைக்கப்பட்டார்.
அந்த காலக் கட்டத்திலும் அவர் “ அவன் பட்டம் பறித்திடுவேன், கொட்டி கலைத்திடுவேன் “ என உரக்கப் பாடினார்.
இந்து கோவில்களில் ஊட்டுப் புரைகள் என்ற பெயரில் பார்ப்பனர்களுக்கு மட்டும் இருவேளை உணவு இலவசமாக வழங்கி வந்த காலம் அது. அய்யா வைகுண்டர் அவர்கள் உழைக்கும் மக்களை சாதி பேதமின்றி ஒன்றுபடுத்தி அவர்களை பொது சமபந்தி என்ற பொது உணவை உண்ணவும், தன் கருத்துகளை பரப்ப ஏதுவாகவும் சிறிய நிழல் தாங்கல்களையும், பதி என்ற சற்றே பெரிய வழிபாட்டு கட்டிடங்களையும் நிறுவினார்.
கன்னியாகுமரி மாவட்டத்தில் அகஸ்தீஸ்வரம், தாமரைக்குளம், சின்ன முட்டம் பகுதிகளில் ஏராளமான நிழல் தாங்கல்களை காணலாம்.
வைகுண்டரின் பதிகளில் ஆண் பெண் பேதமில்லை, சாதி மத பேதமில்லை, வீண் சடங்குகள் இல்லை, உருவ வழிபாடில்லை. அனைவரும் தலைப்பாகை கட்டி சுயமரியாதையுடன் வழிபட முடியும்.
“ கோவில்கள் வைத்து குருபூசை செய்யார்கள்
பூவதுகள் போட்டு போற்றியே நில்லார்கள்
ஆடு கிடாய் கோழி அறுத்துப் பலியிடார்கள்
மாடு மண்ணுருவை வணங்கி திரியார்கள் “
என அவரின் அகிலத்திரட்டு ஓங்கி சொல்கிறது. வேள்விகளை அவர் முற்றிலும் மறுக்கிறார். இன்றும் அய்யா வழியினர் வேள்விகளை நம்புவது இல்லை. சக மனிதர்களை முன் வைக்கிறார்கள். அய்யா வைகுண்டர் உருவாக்கிய கருத்துகள் நீதிக்கட்சி மூலம் பின்னர் சட்டங்களாகின. தோள் சீலை போராட்டத்தில் இவரின் விழிப்புணர்வு பெரிது. இவர் உருவாக்கிய நெருப்பு சனாதன தர்மத்தை பொசுக்க தொடங்கியது.
அவரின் அகிலத்திரட்டில் இருந்து… சில வரிகள்..
கனத்த கற்கண்டு கருப்புக் கட்டிக் கேட்டடிப்பான்…
நாருவட்டியோலை நாள் தோறுங் கேட்டடிப்பான்…
வாதுக்கு நொங்கு வாய்கொண்டு கேட்டடிப்பான்..
…..
கொல்லைதனில் சான்றோரை கொண்டுவா என்றடிப்பான்
….
கொதிக்கும் பதனீர் கொண்டுவா என்றடிப்பான்
….
சாணான் கள்ளேரியெனச் சண்டாள நீசனெல்லாம்
வீணாகச் சான்றோரை விரட்டியடிப்பான் காண்
சாணுடம்பு கொண்டு தரணிமிக ஆண்டாலும்
….
சாணான் சாணானெனவே சண்டாள நீசனெல்லாம்
கோணா துளத்தோரை கோட்டி செய்தேயடித்தான். என முடிக்கிறார் தன் அம்மானை பாடலை.
இதுவே போதுமானது அய்யா வைகுண்டரை புரிந்து கொள்ள. அவர் உருவாக்க நினைத்த சமதர்மத்தை புரிந்து கொள்ள்.. இந்தியாவில் சாதிய மறுப்பாளர்களுக்கு காலத்தால் மட்டுமில்லை, கருத்துகளாலும் முன்னோடி அய்யா வைகுண்டர். யாரின் உரிமைக்காக போராடினாரோ அவர்கள் முழுதாக உள்வாங்கி செயல்பட வேண்டும்.
அய்யா உண்டு என சொன்னால்…. அங்கே நீங்கள் இந்து சாதீய கொடூரங்களை எதிர்க்கிறீர்கள் என பொருள்.
 – பா. சரவண காந்த்.
ஆதாரம்: நாடார் வரலாறு கறுப்பா…? காவியா…?
- Advertisement -

Latest Posts

Don't Miss

Stay in touch

Subscribe to our latest news