நினா பெஞ்சமின் சிங் (Nina Benjamin Singh) குர்பிரீத் சிங் (Gurpreet Singh). நினா தகவல் தொழில்நுட்பம் மற்றும் உற்பத்தித் துறையில் நல்ல அனுபவம் பெற்றவர்கள். குர்பிரீத் மின்கலங்கள் உற்பத்தி செய்யும் தொழிலில் முப்பது ஆண்டுகளுக்கும் மேலாக ஈடுபட்டிருந்தவர்கள். இவர்கள் இருவரும் சேர்ந்து வாகனங்கள் மற்றும் தொழில் சாலைகளுக்குத் தேவைப்படும் மின்கலங்களைத் தயாரிப்பதில் இறங்கினார்கள். தங்களுடைய உற்பத்திப் பொருளை விற்பதற்கு இவர்கள் தேர்வு செய்த முறை, பெயர் வழங்கு உரிமை அடிப்படையில் இயங்குவதாகும்.
Nina Benjamin Singh and Gurpreet Singh
ரூ.3 ஆயிரம் முதல் கொண்டு 13 ஆயிரம் வரையிலான விலை கொண்ட மின்கலங்களை இவர்கள் உற்பத்தி செய்கிறார்கள். இன்பைனைட் அக்குமுலேட்டர்ஸ் (Inpynyt Accumulators) என்பது இவர்களது நிறுவனத்தின் பெயர்.
இவர்களுடைய தயாரிப்பின் தனித் தன்மை என்னவெனில் இதே வகையில் சந்தையில் விற்பனை செய்யப்படும் மின்கலங்களைக் காட்டிலும் குறைந்தபட்சம் 15 முதல் 20 விழுக்காடு விலை குறைவாக இருப்பதுதான். முதலில் வாங்கிய வாடிக்கையாளர்கள் இரண்டாவது முறையாக இவர்களையே தேடி வந்தால் விலையில் இன்னும் தாராளமாகக் கழிவு கொடுக்கிறார்கள். இதன் மூலம் வாடிக்கையாளர்களைத் தக்க வைத்துக் கொள்வதில் பெரும் வெற்றியை ஈட்டி இருக்கிறார்கள்.
இந்தியாவில் அதிலும் குறிப்பாகக் கிராமப்பகுதிகளில் மின் அளிப்பு எப்படி இருக்கும் என்பது எல்லாருக்கும் தெரிந்த ஒன்று தான். அத்தகைய சூழ் நிலைகளிலும் பழுதே ஏற்படாத வகையிலான, தொடர்ச்சியான மின் அளிப்பை உறுதி செய்யும் விதத்தில் இவர்கள் மின்கலங்களைத் தயாரித்து அளித்தார்கள். நாட்டிலேயே இத்தகைய தொழில் நுட்பத்தை முதன்முதலில் அறிமுகப்படுத்தியவர்கள் இவர்கள்தான்.
தங்களது தயாரிப்புகள் இடையில் எந்தத் தடங்கலையும் ஏற்படுத்தமாட்டா என்பதை உறுதிபடக் கூறி அதைச் செயல் படுத்தியும் காட்டி இருக்கிறார்கள். காலால் மிதித்து இயக்கப்படும் ரிக்ஷாக்களுக்கு மாற்றாக, மின்கலங்களைக் கொண்டு இயக்கும் புதிய வகை வாகனங்களையும் இவர்கள் அறிமுகம் செய்தார்கள்.
கால மாறுதல்களுக்கு ஏற்ப சூரிய விசை மின்கலங்களைத் தயாரிப்பதிலும் ஈடுபட்டு இருக்கிறார்கள். மோட்டார் சைக்கிள்களுக்குத் தேவைப்படும் மின்கலங்களையும் தயாரிக்க ஆரம்பித்திருக்கிறார்கள்.
ரூ.12 கோடியில் துவங்கிய விற்று முதலை ரூ.300 கோடிக்கு எடுத்துச் செல்வது இவர்களது இலக்கு. இதற்கான முழு முயற்சிகளை முடுக்கி விட்டிருக்கிறார்கள். விநியோக அமைப்பை விரிவாக்குவதும் இந்தத் திட்டத்தில் அடங்கும்.
-சுதா தனபாலன்